|
دعواتكم لزميلنا المفكر د.الباقر العفيف بالشفاء العاجل
|
|
 Re: طهــور الســــر! (Re: عمر التاج)
|
(أ) لا تختزن ذاكرتي من أمور السياسة التي عكرت صفو طفولتنا إلا القليل، ولا تدري نفس من أقراني بعلاقة تلك الأحداث السياسية و طهور السر إلا ما حكته أم السر لاحقا، ورغم ذلك تظل ذكريات السر (العوير) وأبيه (الوزير) جزء من ذاكرة قريتنا للأبد.
يعتبر السر ثاني المخلوقات التي كانت ترهب أولاد الحلة بعد (تيس) السرة، التيس صاحب الذقن الطويل و القرون الحادة إذا سلك طريقا في ذلك الوقت اتخذ الاولاد طريقا آخر، أما السر فيكفي أن ترى فمه الذي تبرز منه سن واحدة وتغطيه (شلاليف) تحتل أكثر من نصف مساحة وجهه لتحكم على حيونته، ويكفي أن تشاغله بعبارة (السر الأغلف) حتى يستوحش في وجهك ويصبح أخطر من تيس السرة.
السر العوير لا يمر بمرحلة (الانسنة) شعوريا إلا من خلال غرامه بالحلوى وحبه للفطير باللبن، ولا تعرف له حديثا بشريا إلا عند سؤال الناس له: ( بتعرس متين يا السر؟)، فيرد بقوله :(أبوي قال لمن يطهرني بعرس لي طوالي)، ومن هذا الرد المبرمج كنغمة (عفوا) التي تنطلق من الهاتف لتخبرك بنفاد رصيدك تبرمجت (غلفة) السر في أذهان الناس .
السر كان (الولد) الوحيد في بيت عباس، لذا فقد نشأ مدللا (خمجا)، ويبدو أن خيرات أبيه (النائب الولائي لدائرة المنطقة) والتي من ضمنها أن أطلقها في نفسه (وزيرا)، أو لعنات أهل البلد، قد ظهرت في تضاريس ابنه وعقله، فعندما شب السر لم يكن يشغله شئ غير ضرب اخواته الست، ومطاردة صبيان الحي متضامنا مع تيس السرة، ونادرا ما يصادف فتاة مليحة يسألها ( يا بت بتعرسيني؟) فتعتذر الفتاة وترد بالسؤال التقليدي (وانت بتعرس متين؟) فيجيب لها بسيرة الطهور، (عوارة) السر تبدو جلية في مناسبات الفرح والترح في الحلة، فالسر بعكازه الغليظ لا يبرح مواقع الحفلات حتى الصباح، ينطط كالقرد في (دارة) خارجية يصنعها له أهل العرس، لا ينتبه لفاصل غناء أو نهاية حفل، ومتى ماغلب عليه النوم يتمدد في (دارته) حتى توقظه شمس الصباح، أما في حالة الوفيات فهو يرابط ليله كله ينتقي من (بواقي) الاكل الفطير باللبن، يرتع فيه ويتلذذ به حتى الصباح.
| |
 
|
|
|
|
|
|
|
|
Re: طهــور الســــر! (Re: عبدالعزيز الفاضلابى)
|
تتبارك يافاضلابي ويتبارك العيد عليك
وكتر خيرك جبت لينا الركيزة الاساسية في افراحنا ..الجلد
وطبعا الفيديو بنقل المشهد كاملا باحداثه وتواريخه
وما عارف لو كان موجود من زمن الجاهلية كان الشعراء حايكتبوا في الوصف
وصف الفرس .. وصف الحرب .. الخ .. ام سيكتغون بالفيديو
مع اصدق التحايا.
| |
|
|
|
|
|
|
|
|
|
Re: طهــور الســــر! (Re: درديري كباشي)
|
(ب) عندما بلغ السر سن الرشد مات أبوه، وترك له ميراثا ضخما من الأراضي السكنية والزراعية والعقارات، فقد كان الوزير شغوفا بنفوذه المحب للامتلاك ، ولم تنج من اسمه في سجلات الأراضي حتى مدرسة الحي وناديه، عشية الوفاة أجتمع أعيان المنطقة ليقرروا بشأن ورثه الوزير الضخمة ، ووجدوا أن نصيب السر سيجعل منه أثرى أثرياء المنطقة، ولكن من أين للسر بالعقل الذي يمتلك أو يدير هذا المال، قال خاله التلب: ( أنا بعرس للسر بتي مريم، عشان هي استاذة وبتقدر تساعده في إدارة الدكاكين والأراضي) ، الشبلي عم السر رد عليه بقوله: ( كان جات للعرس أن بناتي أولى بيه، السر ياهو ولدي، أعرسلو بتي ويقعد معانا في بطن البيت).
شيخ الطاهر امام جامع الحلة كان عنده رأي آخر، قال للقوم (نحن حقو ننادي السر، ونشوفو داير يعرس بت منو ونعقد ليه عليها ونديها ورثته من ابوه).
- السر ، البركة فيكم في ابوك.
- أي زول ما جاب معاهو فطيرة بي لبن مايبارك لي ميتة ابوي .
(ان شاء الله أبوي يموت عشان أشبع فطيرة بي لبن) كانت هذه أشهر أقوال السر المأثورة قبل وفاة والده.
- الفطيرة بتجيك في العشا آ السر، أسع نحن دايرين نشاورك في عرسك.
- أنا ما عندي عرس اسع، أبوي قال لمن يطهرني بعرس لي طوالي .
- خلاص نحن بكره عايزين نطهرك وبنعرس ليك طوالي، رأيك شنو؟.
- أنا الحروم ما بدورن بجيبن لي أخلاقي هنا (وأشار لشلاليفه الكبيرة) .
- يا زول بنسوي ليك حفلة كاربة في العرس ، ونخليك تنطط في نص الدارة مع عروسك.
- كان بتسو لي حفلة حلاس عرسو لي .
- طيب قول لينا داير تعرس بت منو في الحلة دي؟
- داير أعرس زهرة أحوي
(وكان مما زاده عوارة أنه لا ينطق حرفي الخاء والشين)..
- لا لا، أختك ما بتتعرس ليك، شوف أي واحدة تانية في الحلة غير أخواتك.
- حلاس بعرس التاية.
- التاية منو؟
-التاية ام سعرا طوال الكانت بترقص أمبارح في عرس ود الجد.
- المسنوح ده قصده التاية بت شيخ البلد ، الجات امس من المكابراب مع قريبتها العرسها ود الجد.
- ها جنا ات ماك نصيح، التاية شنو البتعرسك ات؟ وبعدين دي زاتها ما من الحلة، البنيه جات ضيفها ورجعت لي حلتها، كدي شوف غيرها.
- لا ماني داير واحدة تانية ، امبارح جيتها قريب وقتلها داير اعرسك ضحكت وقالت لي آآي بعرسك بعد ما يطهروك.
- لاحولا .. انت يا العوير غلفتك دي وصلت لا عند ناس المكابراب؟ ..
| |
|
|
|
|
|
|
|
|
|
Re: طهــور الســــر! (Re: عمر التاج)
|
(ج)
بعد مداولات كثيفة و(مجابدة) معه ، (عصلج) السر وقال ؛(ما داير أعرس)، إلا أن شيخ الطاهر فكر وقدر ثم قال:(يا جماعة نحن ما نجرب بت شيخ البلد، الأرض جربت الحجر، بكره لمن شيخ البلد يجي للعزاء نكلمو بالخبر ونشوف شورتو ).
وبعد أن قدم لهم شيخ البلد التعازي في نائب دائرة المنطقة قال له الطاهر:
- نحن آبونا الشيخ قاصدنك في شوره لي ولد المرحوم ده.
- ان شاء الله خير.
- الجنا ورث طين أبوه وبنكوس له في مره يعرسها وتمسك ليهو قروشو.
- خير ما عملتوا.
- أها الجنا شاف بتك أمبارح في عرس ود الجد، وقال يا يعرسها هي يا اما ما يعرس كلو كلو.
- إتو بي صحكم .. السر العوير يعرس بتي أنا.
- نحن قلنا يعني الجنا وارث وأملاك الوزير أنت أولى بيها، وكمان يعني ننزل السر عشان يبقى خليفة أبوهو في الدايرة.
شيخ البلد فكر قليلا ثم قال:
- خلاص خلوني أشاور البت وأمها.
على الرغم من أن السر اشتهر بعوارته الظاهرة على أوله ، وما رسخ في ذهن الناس أن عباس لم يطهره بعد أن فقد الأمل في اصلاحه، إلا أن شيخ البلد فاجأهم بقبوله ولكن بشرط واحد، أن يطهروا السر ثم يأتون به عريسا لبنته.
| |
|
|
|
|
|
|
|
|
|
Re: طهــور الســــر! (Re: عمر التاج)
|
مرحبتين بالنحرير درديري كباشي
وكل عام وانتم بالف خير.
Quote: كل عام وأنتم بخير يا ود التاج
واصل أها وطهروه ولا عرس سفري
|
عرس سفري دي ما عرفتها ..
اذا قصدك عرس كيري فالزمن داك زمن نظيف
مافيهو كيري زي ومنا ده،
بس السر سرو باتع ،
و الحلقة الجاية بنوصلها العرس ان شاء الله
وشكرا لطلتك البهية يا حبيب
| |
|
|
|
|
|
|
|
|
|
Re: طهــور الســــر! (Re: عمر التاج)
|
(د)
- السر، نحن عايزين نطهرك وبعدين نعرس لك التاية.
- ما بدور الطهور ، العوين قالوا حار.
- لكن ابو التاية قال ما بعرس لك بتو الا بعد يطهروك، دحين البس هدومك عشان نوديك طهار البندر قالو طهورو بارد.
وفي صباح الغد انطلقت عربات السيرة نحو طهار البندر، نزل منها العريس بضريرته وحريرته وفي معيته بعض شباب الحي.
- أها يا جماعة وينو ود الطهور.
- مو ياهو المضرضر الواقف قدامك ده.
- لكن دا ود طهور ولا عريس؟
- الاتنين، انت تقطعلو بي جاي، والعصر نمشي نعقد له بي هناك، باقي ابوه كان ناسيوه من الطهور.
الطهار بين مصدق ومكذب جهز أدواته وأرقد العريس وقال لمن معه: (أمسكوه من ايديه وكرعيه، عشان طهورة الكبير بتكون صعبة)، ثم أمر واحد ممن معه بأن يفك التكة، وبدأ يسحب السروال الطويل ومن تحته القصير، ومال نحو فخذيه حاملا حقنة البنج، تأمل فيه قليلا ثم رفع رأسه وصاح بعصبيه :(خلاص طهرناهو، شيلو من قدامي).
شيخ البلد عندما سمع بما حدث جاءهم سريعا وهو لا يصدق أن يمر طهور السر بهذه البساطة :(السر كان طهرتوه الصباح ده مفروض تلاتة يوم ما يقدر يمشي، وبعدين ده طهور شنو المافيهو دم ده ؟) شيخ الطاهر فسر الأمر بأن عباس سمى ولده السر لأنه رأى فيه سر الأولياء ، وأبوه كان ود شيوخ) العمدة لم يقتنع بكلام الطاهر ولكنه حسم أمره قائلا : (خلاص، الدخلة بتكضب الطهار) .
| |
|
|
|
|
|
|
|
|
|
|
Re: طهــور الســــر! (Re: عمر التاج)
|
حبابك ود البوش .. حباب أسد البطانة والصي
شرفتنا شرافة شديدة .. وذكرتنا حرفك الرشيق في هذه الزيارة الكريمة
وألف تحية وشكر لك على قراءتك واطلالتك ورأيك ولوبتك، فقد أشبعت روحنا حتى الثمالة
| Quote: متاع حد الدهشة..عمر التاج اتي مجنون يا كتابتك دي مجنونةآمنت بالعتق الغزالي اخي شكرا ما كفايةحقو الواحد يعزمك ملاح لوبامبالغة |
وللحقيقة فقد افتقدت اطلاعك على هذا الخيط الحـــــــرة، حكاوى من الزمن الجميل
والذي أحسب أني كنت أتمثل أسلوبك عندما حدثته و أنزلته في المنبر ..
والتحية لك مجددا على كتاباتك التي طالما امتعت أوقاتنا داخل وخارج المنبر
| |
|
|
|
|
|
|
|
|
|
Re: طهــور الســــر! (Re: عمر التاج)
|
(ز)
قبل أن يستوعب أحد ما حدث انلطقت عصا السر نحو مصدر الصوت ، ثم حصل هرج ومرج صاحبه هياج وجري، الكراسي تطايرت فوق الرؤوس واختلطت بطلقات عيسى العسكري عم السر، الغبار علا فوق صوت الحفلة، المغني بعد أن تعافى من النطحة وجيئ به للمنصة متكيئا على عازفيه لم يفتتح شيئا، بل أطلق ساقيه للريح بعد أن قذف بالمايك تجاه الشاشة الكبيرة، مكبرات الصوت نقلت للهاربين صوت المعركة من قلب الحدث، وصاحبها صوت التلفاز وهو يطلق البيان الاول ثم يعلن حظرا للتجوال منذ لحظته، واصوات رصاص من داخل مبنى التلفزيون اكملت ما انقطع من بندقية عيسى، الذين التفتوا نحو الدارة من على البعد شاهدوا العروس تقفز فوق الكراسي ومن خلفها تيس السرة يطاردها وينطحها مرات ومرات، أما نحن الصغار فقد كنا نجفل بأقصى ما أوتينا من سرعة، وخلفنا تعلوا أصوات حوافر السر تهددنا بالضرب والانتقام.
-انتهى-
| |
|
|
|
|
|
|
|
|
|
Re: طهــور الســــر! (Re: جمال الباقر)
|
تحياتي اخ جمال الباقر
وشكرا لرايك معنا
Quote: سرد جميل
لكن ما تقول لي انتهى دي يعني القصة خلصت ؟ |
الحكاية انت لفظا وبقيت معنى وتفسيرا 
للحقيقة لم أكن لأنهيها على العجل لولا أن عامل الزمن قدر أن تجلب النهايات للوسط
أو هكذا اوصانا اخونا الاكبر (كبر) له منا التحايا
| |
|
|
|
|
|
|
|
|
|
Re: طهــور الســــر! (Re: عمر التاج)
|
سلام عمر ود الاحيمر .. سميي
تصدق اتوقعت لما سمعت كملة ((السر الأغلاااااف)) انه يرفع جلابيته
كنهاية لهذا السرد الفلكلوري المدهش وإثباتا لعضم القصة (طهور السر)
عموماً استمتعنا جدا بهذه اللوحة
لكن باقي لي أبو الدر مااااااا مقتنع بالنهاية الضبابية دي 
مودة فايتة الحد
أخوك عمر أبوعاقلة (ودالاحيمر)
| |
|
|
|
|
|
|
|
|
|
Re: طهــور الســــر! (Re: عمر التاج)
|
الف تحية وسلام لتوأم اسمي
الحبيب عمر ود الاحيمر
Quote: سلام عمر ود الاحيمر .. سمييتصدق اتوقعت لما سمعت كملة ((السر الأغلاااااف))
انه يرفع جلابيتهكنهاية لهذا السرد الفلكلوري المدهش وإثباتا لعضم القصة (طهور السر)
عموماً استمتعنا جدا بهذه اللوحةلكن باقي لي أبو الدر مااااااا مقتنع بالنهاية الضبابية ديمودة فايتة الحدأخوك عمر أبوعاقلة (ودالاحيمر) |
نهايتك برضو منطقية وجميلة يا عمر ..
ولو أن الكتابة في منبر آخر لما ترددت في رفع الجلابية لحسم النهاية صورة ونص للقارئ
ولما حذفت بعض مشاهد القصة
ولكن يبدو أن لهذه النهاية المفتوحة ايجابيات منها اعطاء القارئ فرصة اختيار النهاية التي يراها مناسبة.وان كانت هناك بعض الخواتيم الخاصة في متن العبارات.
على كل حال فالقادم مجمل بملاحظاتكم ان شاء الله .. وباقات تشكرات على حضورك الانيق
| |
|
|
|
|
|
|
|
|
 Re: طهــور الســــر! (Re: عمر التاج)
|
هههههه
واحد في الماسنجر قال لي قصتك عاملة زي قصة ﻭﺍﺣﺪ ﻗﺒﻞ ﻣﺎ ﻳﺘﺰﻭﺝ ﺍﺑﻮﻩ ﺍﺩﺍﻫﻮ ﻭﺭﻗﺔ وﻗﺎﻝ ﻟﻴﻪ ﻗﺒﻞ ﻣﺎ ﺗﺨﺶ ﻋﻠﻰ ﻣﺮﺗﻚ ﺍﺩﻳﻬﺎ ﺍﻟﻮﺭﻗﺔ ﺩﻱ,,, ﻭﺍﻧﺖ ﻣﺎ ﺗﻘﺮﺍ ﺍﻟﻔﻴﻬﺎ .... ﺑﻌﺪﻫﺎ ﺍﺑﻮﻩ ﺗﻮﻓﻰ... ﺗﺰﻭﺝ ﺍﻟﻮﻟﺪ ﺑﻨﺖ ﻣﻦ ﺍﺳﺮﺓ ﺭﺍﻗﻴﻪ ﻭﻗﺒﻞ ﻣﺎ ﻳﺪﺧﻞ ﻉ ﺯﻭﺟﺘﻪ ﺍﺩﺍﻫﺎ ﺍﻟﻮﺭﻗﻪ ﻭﻣﻦ ﻣﺎ ﻗﺮﺍﺗﻬﺎ ﺿﺮﺑﺘﻮ ﻛﻒ ﻭﻗﺎﻟﺖ ﻟﻴﻬﻮ ﻃﻠﻘﻨﻲ ﺣﺴﻲ...ﻭﻃﻠﻘﻬﺎ.... ﻭﻣﺸﻲ ﺇﺗﺰﻭﺝ ﻭﺍﺣﺪﻩ ﻣﻦ ﺍﺳﺮﻩ ﻓﻘﻴﺮﻩ ﻭ ﻣﺘﻮﺍﺿﻌﻪ ﻭﺑﺮﺿﻮﺍ ﺍﺩﺍﻫﺎ ﺍﻟﻮﺭﻗﻪ ﻭﻧﻔﺲ ﺍﻟﺸﺊ ﺑﻌﺪ ﻣﺎ ﻗﺮﺗﻬﺎ ﺿﺮﺑﺘﻮ ﻛﻒ ﻭﻗﺎﻟﺖ ﻟﻪ ﻃﻠﻘﻨﻰ.... . ﺍﺧﻮﻧﺎ ﺯﻫﺞ ﻭﻣﺸﻰ ﺇﺗﺰﻭﺝ ﺑﻨﺖ ﻣﻦ ﺃﻗﺎﺭﺑﻪ ﻣﻦ ﺍﺩﺍﻫﺎ ﺍﻟﻮﺭﻗﻪ ﻗﺎﻝ ﻟﻴﻬﺎ : ﻗﺒﻞ ﻣﺎ ﺗﺤﻜﻤﻲ ﻋﻠﻲ ﺍﻗﺮﻱ ﺍﻟﻮﺭﻗﻪ ﺩﻱ ...ﻭﺩﻱ ﻭﺻﻴﺔ ﺍﺑﻮﻱ... ﻗﺮﺕ ﻗﺮﻳﺒﺘﻮ ﺍﻟﻮﺭﻗﻪ .. ﺷﺎﻓﺘﻮ ﻭ ﻋﻴﻨﻬﺎ ﺩﻣﻌﺖ .. ﺑﻌﺪﻫﺎ ﺿﺮﺑﺘﻪ ﻛﻒ ﻭ ﻗﺎﻟﺖ ﻟﻴﻬﻮ ﻃﻠﻘﻨﻲ ﺑﺪﻭﻥ ﻧﻘﺎﺵ ﻭ ﺑﺴﺮﻋﻪ.... ﺗﻀﺎﻳﻖ ﺍﺧﻮﻧﺎ ﻣﻦ ﺍﻟﻘﺼﻪ ﺩﻱ ﻭﻗﺮﺭ ﻳﺴﺎﻓﺮ ﺳﺎﻓﺮ ﺑﺎﻟﻄﻴﺎﺭﻩ ﺍﻱ ﺣﺘﻪ.... ﻭﻫﻮ ﻓﻲ ﺍﻟﻄﻴﺎﺭﻩ ﻗﺎﻝ ﻟﻠﻤﻀﻴﻔﺔ ﻣﻤﻜﻦ ﺗﻘﺮﻳﻨﻠﻲ ﺍﻟﻮﺭﻗﺔ ﺩﻱ .... ﺍﻟﻤﻀﻴﻔﻪ ﻗﺮﺕ ﺍﻟﻮﺭﻗﻪ ﻭﺻﺮﺧﺖ ﻓﻲ ﻭﺟﻬﻪ ﻭﺿﺮﺑﺘﻮ ﻛﻒ.... ﻭ ﻗﺎﻟﺖ ﻟﻴﻬﻮ ﺍﺣﺴﻦ ﺗﺮﻣﻲ ﻧﻔﺴﻚ ﻣﻦ ﺍﻟﻄﻴﺎﺭﻩ ﺩﻱ.... ﻗﺎﻡ ﺯﻋﻞ ﻭﺭﻣﻰ ﻧﻔﺴﻪ ﻣﻦ ﺍﻟﻄﻴﺎﺭﻩ ﻭﻫﻮ ﻃﺎﻳﺮ ﻓﻲ ﺍﻟﻬﻮﺍﺀ ﻣﻦ ﺍﻟﻐﻢ ﻗﺎﻝ : ﻟﻴﻪ ﻣﺎ ﺍﻓﺘﺢ ﺍﻟﻮﺭﻗﻪ ﺍﺷﻮﻑ ﻣﻜﺘﻮﺏ ﻓﻴﻬﺎ ﺷﻨﻮ ؟ ﻭﻫﻮ ﻓﻲ ﺍﻟﺠﻮ ﻗﺎﻝ : ﻭﺍﻟﻠﻪ ﺇﻻ ﺍﻓﺘﺢ ﺍﻟﻮﺭﻗﻪ ﺍﺷﻮﻑ ﺍﺑﻮﻱ ﻛﺎﺗﺐ ﻟﻲ ﻓﻴﻬﺎ ﺷﻨﻮ... ﺍﻭﻝ ﻣﺎ ﻓﺘﺤﻬﺎ ؟ ﺍﻟﻮﺭﻗﺔ ﻃﺎﺭﺕ !! ﻭ ﻣﺎ ﻗﺮﺍﻫﺎ !! ﻭ ﻇﻠﺖ ﺍﻟﺤﺴﺮﻩ ﻓﻲ ﻗﻠﺒﻪ ﻭ ﻓﻲ ﻗﻠﻮﺏ ﺍﻟﻘﺮﺍﺀ ﺍﻟﻤﺘﺸﻮﻗﻴﻦ ليعرفوﺎ الورقة ﻣﻜﺘﻮﺏ ﻓﻴﻬﺎ ﺷﻨﻮ ؟
طبعن نحن ورقتنا ما طارت بس محتاجين نقرأ فيها مابين الحروف
| |
|
|
|
|
|
|
|
|
|
Re: طهــور الســــر! (Re: عمر التاج)
|
عموماً استمتعنا جدا بهذه اللوحة
لكن باقي لي أبو الدر مااااااا مقتنع بالنهاية الضبابية دي
--------------------------------------------------------------
يا ود التاج أبو عاقلة قصدو لو القصة دي كاتبها أبو الدر
كان نهايتها تكون
السر عرس الغنماية وصيع التيس ذاتو
ما يا هو قصدك يا أبو عاقلة نكون واضحين
هههههههههههه
| |
|
|
|
|
|
|
|
|
|
Re: طهــور الســــر! (Re: عمر أبوعاقلة)
|
Quote: يا ود التاج أبو عاقلة قصدو لو القصة دي كاتبها أبو الدر
كان نهايتها تكون
السر عرس الغنماية وصيع التيس ذاتو
ما يا هو قصدك يا أبو عاقلة نكون واضحين
هههههههههههه |
ابوعاقلة بعشق الاكشن يا درديري ...
رغم انو في ولد في القصة قال شاف لكن أخونا عمر داير الجمهور يشوف بعيونه عشان يتأكد من صحة العرس ،
ناس الأفلام الهندية لما يكون في مشهد ماعايزين يعرضوه بخلوا الجمهور يتاوق من سماعة التلفون ..
أها .. أسع التيس ما مستبعد يكون عرس التاية والسر لسه جاري ورا الشفع هههههه.
| |
|
|
|
|
|
|
|
|
|
Re: طهــور الســــر! (Re: عمر التاج)
|
Quote: أنا غايتو قصدي واضح وشكلك دغمست الموضوع
لكن خيارات ود التاج العاوز يعطيها للجمهور دي بقول ليه كلهم كانوا اقترحوا يرفع الجلابية
عموماً انت من كتلت كلبك تصدق نهايات قصصك بقت عندي مدغمسة يا أبو الدر
مع أكيد احترامي لما تكتب
مودة فايتة الحد |
مسلسلات زمان يا عمر دايما بتنتهي بزواج البطل من حبيبته بعد ما يقتل الخائن
لحدي ما جاء اسامة عكاشة وغيره من المحدثين وقلبوا الحكاية
تتخيل انا كنت متابع لي مسلسل من المتوسطة البطل مات في النهاية، لكن لاسع منتظر الكاتب يعمل جزء ثاني ويحي البطل ويتم الحكاية ..
أسع تلقاها البطلة زاتها عجزت ورقدت رز .. المهم
حكاي السر بدت مع أحداث سياسية وانتهت بانقلاب عسكري ،
عشان كد -وفي رأي الشخصي كقارئ- ماظنيت التاي تعيش في ثبات ونبات .
مع فائق حبي
| |
|
|
|
|
|
|
|
|
|
Re: طهــور الســــر! (Re: عمر التاج)
|
خاتمة:
على أرض الواقع حدثت أم السر عن حقائق جئنا ببعضها عرضا في القصة، الحاجة كلتوم قالت ان ابنها السر أصيب بالتهاب اللوزتين عندما كان في الخامسة من عمره، فأجرى له حاج عباس عملية اللوزتين واستغل تخديره بالبنج فأمر الطبيب بالقطع، الطبيب لم يكن مختصا بالفعل لثاني ولكنه أعمل مقصه في الولد بعد أن عرف بتخلفه، وكان نتيجة ذلك أن جاء الختان غير مكتمل ولكنه يلبي أمر الشرع، ولذلك لم يعلن ذلك لأحد حتى للسر نفسه بل جعل من الحدث شفرة لطرد فكرة العرس في حياة السر.
| |
|
|
|
|
|
|
|
|
|
Re: طهــور الســــر! (Re: Osman Musa)
|
تحياتي اخوي عثمان موسى وكل عام وانت الف خير
Quote: التاج يا تاج المنبر
والله كتابة زي الشربوت البارد في حر شهر 6 .
تحياتي |
شكرا على تذوقك طعم الشربوت البارد قبل أن يختمر 
| |
|
|
|
|
|
|
|
| |
عمر التاج
عبدالعزيز الفاضلابى
عبدالله ود البوش
جمال الباقر
عمر أبوعاقلة
Osman Musa
فيس بوك
تويتر
انستقرام
يوتيوب
بنتيريست