يا عم!

كتب الكاتب الفاتح جبرا المتوفرة بمعرض الدوحة
مرحبا Guest
اخر زيارك لك: 05-09-2024, 11:36 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
06-09-2016, 03:36 AM

mustafa mudathir
<amustafa mudathir
تاريخ التسجيل: 10-11-2002
مجموع المشاركات: 3553

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
يا عم!

    02:36 AM June, 09 2016

    سودانيز اون لاين
    mustafa mudathir-Canada
    مكتبتى
    رابط مختصر



    بمناسبة رمضان، هاتو الحكاوي، ياعم في أمريكا زي ياعم حقت السودان زمان، قبال ما يسموها فضل ظهر وحركات.


    طق، طق، طق.
    شدّو فتح عيونو بصعوبة. نعسان استعدل في قعدته. بردان والسما برة العربية ماخدة اللون البنفسجي، الأحمر داك بين المغربية والليل.
    طق، طق، طق.
    في زول قال يا سيد وشدّو إتلفت، الزول دا واقف جنب العربية، ما أكتر من هيئة غبشا على خلفية الليل الداخل. شدو مد يدو ونزّل قزاز النافذة حبة بوصات. تثاءب وقال: هاي.
    - إنت كويس يا زول؟ ولا عيان؟ كنت بتشرب؟
    الصوت كان عالي، صوت مرة أو صبي.
    - أنا بخير، دقيقة.
    فتح باب العربية ومرق منها بيمط في عضلات يدينو وكرعينو الواجعاهو. بعدها فرك يدينو في بعض عشان يحرك الدم فيها وتدفأ.
    - واو، أنت زول ضخم.
    - بيقولو علي كدا، إنت منو؟
    - أنا سام
    - سام الولد ولا البت؟
    - أنا بت. كان اسمي سامي وكنت بخت وجه ضاحك بين سام وحرف الياء، لكن بعد شوية لقيت تقريباً كل زول بيعمل كدا، فوقفتها.
    - طيب يا بت الناس، كدي أمشي أقيفي هناك وخلي بالك للشارع.
    - ليه؟ قاتل مجنون ولا حاجة؟
    - لا. عايز أبول، عايز شوية خصوصية.
    - لا، صاح. فهمتك. نو بروبلم. معاك في دي. أنا ما بقدر أعمل كدا لو في زول في الحمام ال جنبي. عندي مشكلة كبيرة بتاعت متلازمة المثانة الخجولة.
    - طيب خلاص من فضلك.
    البت مشت لجنبة العربية البعيدة وشدو مشى خطوتين ووقف جنب سياج مزرعة كدا وقام حل سوستة بنطلونه وبال على عمود خشبي متكول. بعدها مشى راجع للعربية. الواطة بقت ليل.
    - إنتي لسع واقفة؟
    - طبعاً. إنت عندك مثانة بحجم بحيرة تانا. ياخي ممالك سادت ثم بادت في الوقت الكنت بتبول فيهو. سامعاك الوقت دا كلو.
    - شكراً، إنتي عايزة حاجة؟
    - كنت داير أشوف انت كويس ولا مالك. يعني لو كنت ميت ولا حاجة كنت ح أتصل بالشرطة. لكن قزاز العربية كان عليه ضباب شديد فقلت إحتمال الزول دا يكون حي.
    - إنتي بيتكم في الحتات دي؟
    - لا. أنا بركب يا عم ماشه ماديسون.
    - دي حاجة خطرة.
    - لي تلاتة سنين بسوي كدا خمسة مرات في السنة وتراني عايشة. إنت ماشي على وين؟
    - أنا ماشي لحدة كايرو.
    - طيب شكراً. أنا ماشه ألباسو إجازة عند عمتي.
    - ما بقدر أوديك لغاية هناك.
    - ما ألباسو حقت تكساس، ألباسو التانية في إلينوي. كم ساعة كدا جنوباً. إنت عارف إنت وين؟
    - لا. ما عندي فكرة. في مكان ما في هاي واي اتنين وخمسين.
    - المدينة القدام في الطريق هي بيرو، ما ديك بتاعت أمريكا اللاتينية. ممكن أشم ريحتك. دنقر لي شوية.
    قام شدو دنقر للبت عشان تشم وشو.
    - أوكي. ما في ريحة شراب فيك. ممكن تسوق. أرح.
    - الخلاك تتأكدي إني ح آخدك معاي شنو؟
    - إني آنسة في وعسة. وإنت فارس في...، المهم. عربيتك وسخانة لكن. في واحد كاتب ليك في القزازالورا أديني غسلة.
    ركب شدو العربية وفتح الباب اللي على يساره وطلع إنو العربية ما فيها نظام إنو النور يولع لما تفتح الباب. قام رد على قصة إنو في زول كتب في القزاز:
    - لا مافي زول عمل كدا.
    قامت البت ركبت وقالت ليهو:
    - هو شنو؟ دا ما أنا ذاتي. أنا ال كتبت لما كان لسع في ضو.
    دوّر شدو العربية وفتح الأنوار، واتجه على جهة الطريق السريع. قامت سام قالت ليهو من باب المساعدة:
    - لف شمال.
    لف شدو شمال وساق. بعد كذا دقيقة سخّان العربية اشتغل وعم العربية دفء جميل.
    سام قالت:
    - ياخي ما تقول حاجة.
    - هل نحنا بشر؟ مخلصين للخير، أولاد مرا وراجل؟
    - أكيد.
    - أوكي. بس بتأكد. عايزاني أقول شنو؟
    - حاجة تطمنّي في اللحظة دي. فجأة كدا داهمني إحساس (أوه شيت أنا في العربية الغلط مع زول مجنون).
    - آي، الإحساس دا جاني قبل كدا، شنو ال بيطمنك؟
    - بس قول هل إنت سجين هارب ولا قتال قتلة سفاح.
    فكر شدو قليلاً وقال:
    - تعرفي، أنا حقيقة ما النوع دا.
    - لكن شكلك أديتا فكيرة كدا؟ موش؟
    - حاكموني وقضيت المدة لكن ما كتلت زول.
    - يا الله!
    دخلوا مدينة صغيرة مضاءة بمصابيح في الشوارع، وفيها لمبات الكريسماس تفتح وتغمض وشدو أخد نظرة على يمينه. البت كان شعرها أسود، قصير، متشابك ووشها كان جذاب، وفي نفس الوقت، قرر شدو، إنو فيهو شيئ من الرجولة وملامحها ربما اتنحتت من ضخرة. وكانت هي بتعاين ليهو.
    - كنت في السجن مالك؟
    - عوّقت لي نفرين شديد، زعلوني.
    - وكانو بيستحقو كدا؟
    شدو فكر وبعدها قال: دا كان رأيي وقتها.
    - بتعمل كدا تاني؟
    - يا زولة لا. أنا فقدت تلاتة سنين في السجن.
    - أممم، إنت فيك دم هنود حمر؟
    - ما بعرف.
    - شكلك كدا بس.
    - آسف. خذلتك.
    - ما في مشكلة. إنت ما جيعان؟
    - ممكن آكل.
    - بعد إشارتين كدا في محل كويس. أكل كويس ورخيص.
    ركن شدو عربيته في موقف السيارات. نزلوا من العربية وما إهتم يأمن أبوابها لكنه وضع المفتاح في جيبه. مرق شوية فكة من جيبه عشان يشتري جريدة. قام سأل سام:
    - بتقدري على تكلفة محل زي دا؟
    - نعم،
    ورفعت حنكها وقالت:
    - بدفع لي روحي.
    قام شدو هز راسه وقال ليها: أقول ليك حاجة؟ ما نعملا طرة وكتابة. لو وقعت ليك طرة تدفعي لينا الإتنين لو وقعت ليك كتابة عشاك عليّ.
    قالت ليهو بطريقة كأنها شكت فيه:
    - بس لكن أشوف العُملة في الأول، النحاسة. أنا عمي كان عنده ريال الجهتين فيهو كتابة.
    عاينت القطعة المعدنية وتأكدت إنها سليمة. قام شدو وضع القطعة وجنبة الصورة فيها هي الظاهرة على إبهامه، وغش في الرمية فقامت القطعة إتأرجحت كأنها لفت، وقام قبضها وقلبها على باطن يدو الشمال وكشفها بيده اليمين قدام سام. فقالت سام بسعادة:
    - كتابة، العشا عليك.
    - صاح، ما ممكن الواحد يفوز في كل المرات.
    طلب شدو رغيف محشو باللحم، وطلبت سام لازانيا.
    قلّب شدو الجريدة عشان يشوف هل فيها أي خبر عن نفرين ماتوا في قطر بضاعة. ما لقى خبر، القصة الوحيدة الملفتة كانت موضوع الغلاف في الجريدة المحلية، إنو البلد موبوءة بغربان بأعداد قياسية. وإنو المزارعين عايزين يعلقوا الغربان الميتة في المباني العامة عشان يخوّفوا الغربان الحية. وعلماء الطيور قالوا ليهم دا ما ح ينفع لأنو الغربان الحية ببساطة ح تقوم تأكل الغربان الماتت. لكن الأهالي مصرين إنو لما يشوفو جثث أصحابهم، بحسب رأي ناطق عنهم، الغربان ح تعرف إننا ما عايزنهم هنا.
    جابوا الأكل في صحون مليانة وبوخها يلوي، أكل كتير.
    سام وهي خشمها مليان أكل قالت:
    - أها كايرو فيها شنو؟
    - ما عندي فكرة. جاتني رسالة من المدير قال لي عايزنك هناك.
    - إنت شغلك شنو؟
    - مراسلة
    إبتسمت.
    - غايتو إنتو ما مافيا، ما شكلكم كدا، شوف العربية الخرا الإنت سايقها دي. ليه عربيتك فيها ريحة موز؟
    هز كتفه وواصل أكل. سام قامت ضيقت عيونها وقالت:
    - تكون مهرب موز. ما سألتني انا بشتغل شنو لي هسع.
    - خمنت إنك لسع في المدرسة.
    - جامعة وسكونسن، ماديسون.
    - حيث، بلا شك، تدرسين الفن والتاريخ والدراسات النسوية وإحتمال تكوني بتصبي بيدينك جوائز برونزية، أو تكوني شغالة في قهوة عشان تغطي الإيجار.
    سام رمت الشوكة ونفخت نخرينها وسألته:
    - في نيكة شنو بتعمل كدا؟
    - شنو مالك؟ عارفك ح تقولي إنك بتدرسي الادب واللغات وعلم الطيور.
    - يعني عايز تقول إنو داك كان تخمين محظوظ أو حاجة.
    - شنو هو؟
    عاينت ليهو بعيون داكنة وقالت:
    - إنت زول غريب يا سيد...، إسمك ذاتو ما عارفهاهو.
    - بيقولو لي شدَو
    عوجت خشمها بإمتعاض، زي ضاقت ليها حاجة ما بتحبها. سكتت وحنت راسها وخلصت اللازانيا.
    - عارفة ليه سموها مصر؟
    - على جهات كايرو؟ نعم. لأنها واقعة في دلتا نهر أوهايو ونهر المسيسبي، زي كايرو ال في مصر، في دلتا نهر النيل.
    - كلام عقل.
    استرخت في جلستها وطلبت قهوة وفطيرة بكريم الشوكولاتة. وإتخللت شعرها الأسود بيدها.
    - إنت متزوج يا سيد شدو؟
    بعدها وهو متردد قالت:
    - أمك، دا سؤال تاني محرج، موش؟
    - دفنوها يوم الخمس الفات دا
    اختار كلماته بعناية: ماتت في حادث سيارة.
    - يا الله، يا يسوع، أنا آسفة.
    - أنا ذاتي.
    مرة لحظة مشاترة كدا
    - أختي بت أمي برضو فقدت ولدها، اللي هو أنا خالتو، نهاية السنة الفاتت. حاجة صعبة.
    - نعم، مات بي شنو؟
    شفطت شوية من قهوتها
    - ما عارفين. ما عارفين إنو مات ذاتو. أختفى. لكن كان عمره تلتاشر سنة بس. عز الشتا الفات. الحاجة دي دمرت أختي جد.
    - ما في أي، أي أدلة؟
    شدّو بقى شكلو زي شرطي في مسلسل تلفزيوني. قام حاول تاني:
    - هل شكوا في أي لعبة قذرة؟
    ودي كانت العبارة الأسوأ.
    - هم شكوا في نسيبي اللي هو أبوهو. كان قنيط بما يكفي إنو يسرق ولده. إحتمال يكون عملها. لكن دا حصل في مدينة صغيرة في الغابات الشمالية. مدينة جميلة وحتيتونة كدا، ناسها ما كانوا بيتربسوا أبواب بيوتهم.
    شالت سام نفَسها وهزت رأسها. مسكت كباية القهوة بيدينها الإتنين.
    - إنت متأكد إنك ما فيك شي من الهنود الحمر؟
    - ما حاجة بعرفها كدا يعني. ممكن. ما عرفتا كتير عن أبوي. وأظن أمي كانت ح تكلمني عنو لو كان هو من الأمريكان الأصلانيين. إحتمال.
    وعوجت خشمها تاني، وزهجت من باقي الفطيرة. الفطيرة كانت بحجم نص رأسها. دفرت الصحن ناحية شدو.
    - عايز؟
    ابتسم وقال ليها أكيد. قام خلص على باقي الفطيرة.
    الجرسونة مدت ليهم الشيك وشدّو دفع.
    - شكرا، قالت سام.
    الجو إبتدأ يبرد شديد. العربية كحت مرتين قبل ما تشتغل. ساق شدو راجع للطريق السريع.
    - حصل قريتي لي زول إسمو هيرودوتس؟
    - يا ساتر. ليه؟
    - هيرودوتس. حصل قريتي كتابو تواريخ؟
    - لا كدي تعال،
    قالت بطريقة حالمة
    - أنا ما قادرة أفهمك. ما بفهم طريقة كلامك. في لحظة كدا شكلك زول جهامة وغبي، ال بعديها إنك بتقرأ مخي المنيوك دا، والبعديها أنحنا بنتحدث عن هيرودوتس. ف شنو؟ لا ما قريت ليهو. سمعت بيهو جايز في الراديو القومي، موش ياهو ال بيقولو عليهو أبو الكضب.
    - أفتكر داك الشيطان.
    - آآي داك ذاتو كمان. لكن سمعت إنو قال إنو هناك نمل عملاق ووحوش بتحرس مناجم دهب، وقالوا كلامو كله طلع تلفيق.
    - لا ما أظن. هو كتب الحاجات اللي قالوا ليهو أكتبها. يعني زي هو كتب التواريخ بس. بعدين هي تواريخ جيدة جداً وفيها شحنات من التفاصيل الغريبة، يعني مثلاً هل تعلمي زمان في مصر لو ماتت بت جميلة أو زوجة زول مهم، ما كانوا بيرسلوها للتحنيط إلاّ بعد تلاتة أيام. بيخلوا الجثة تبوظ في الحر.
    - ليه؟.....دقيقة، دقيقة، أنا عارفة ليه. حاجة مقرفة.
    - وفي التوريخ دي معارك، وكل الحاجات العادية. وبعدين في الآلهة. واحد يجي جاري عشان يكلم الناس بأخبار المعركة، يجري ويجري يقوم يشوف الله في فسحة والله يقول ليهو قول ليهم يبنوا لي معبد هنا، يقوم يقول ليهو سمح ويجري ويجري وبعد ما يقول ليهم أخبار المعركة شنو يقول ليهم بالمناسبة الله عايزكم تبنوا ليهو معبد، حاجات أمر واقع كدا.
    - طيب في قصص فيها آلهة، إنت بتحاول تقول شنو؟ إنو الناس ديل كانو بيهلوسو؟
    - لا، ما كدا.
    قعدت تأكل في أضافرينا وبعد داك قالت:
    - أنا قريت شوية كتب كدا عن الدماغ. زميلتي في الغرفة كانت عندها الكتب دي وحايمة بيها في الغرفة. يعني زي قبل خمسة ألف سنة الفصين ال في الدماغ ديل قاموا إتلحموا مع بعض. قبل دا كان الناس فاكرين إنو لما الفص اليمين يقول حاجة معناها دا صوت إله بيوريهم يعملوا شنو. قصة عقلية يعني.
    - أنا بفضل نظريتي أنا.
    - شنو نظريتك؟
    - إنو الناس زمان كان مرة مرة بتصادفهم آلهة في الطريق.
    - أيوااااا!
    ونزل عليهم صمت، صوت العربية بس هو المسموع، المكنة بتنوني، والعادم بيعوعي وصوتو ما صوت صحة ، وبعدها:
    - تفتكر هم لسع هناك؟
    - هناك وين؟
    - اليونان، مصر، الجزر، الحتات ديك. تفتكر لو حمت في الحتات ديك ح تشوف آلهة.
    - جايز. لكن ما أظن الناس ح يكونوا واعين إنو دا هو الشافوهو.
    - أراهنك؟ ح يكون شكلهم زي جايين من الفضاء كدا. على أيامنا الناس بتشوف أغراب من الفضاء وزمان كانوا بيشوفو آلهة. إحتمال الفضائيين جايين من الفص اليمين للدماغ.
    - ما أعتقد إنو الآلهة عملت مجسات شرجية، أو قتلت مواشي بيدها، بتكون سخرت ناس عشان يعملوا كدا.
    قرقرت.
    مشوا مسافة في صمت، بعدها سام قالت: إنت عارف دا بيذكرني بقصة الإله المفضلة عندي، من الأديان المقارنة واحد قصاد واحد، عايز تسمعها؟
    - أكيد.
    - طيب دي واحدة عن أودين. إله النرويج والحتات ديك، عارف؟ كان في ملك من الفايكنج على سفينة من الفايكنج، وواضح إنو دا كان في زمن الفايكنج، حصل ليهم إنو سفينتهم وقفت لعدم وجود رياح، أصابتهم حالة سكون في البحر. قام الملك قال طيب كويس أنا ح أضحي بواحد من رجالي لأودين لو رسل لينا رياح توصلنا لي أهلنا. أها جات الرياح ووصلوا للبر. الزول الوحيد الإتفقوا إنو يضحوا بيهو هو الملك ذاتو. القصة دي ما عجبتوا، زعل، قاموا قالوا ليهو إنها ح تكون مسألة شكلية وما ح تتأذي. فجابوا مصران حمل ولفوهو حوالين رقبتو وربطوا الطرف التاني في فرع لين وقاموا شالوا قصبة بدل حربة وقعدوا يشكوهو بيها ويقولوا ليهو أها خلاص شنقناك، ضحينا بيك لأودين.
    الطريق بقى فيهو إنحناءة، وظهرت مدينة تانية، سكانها تلتمية نسمة، موطن الفائز بالموقع التاني في بطولة الولاية للتزلج السريع لما دون الإتناشر سنة. بها صالونين لتحضير الجنائز من نوع الحجم الإقتصادي الضخم. إتنين كل واحد في جنبة من الطريق. شدّو فكّر، مدينة سكانها تلتمية زول عايزة كم صالون تحضير جنائز.
    - أها أول ما جابو أسم أودين دا في لسانهم إتحوّلت القصبة لحربة وطعنت الراجل في صفحته ومصران الحمل بقى حبل تيل، الفرع اللين بقى فرع رئيسي والشجرة بقت تسحب لي فوق والأرض تميد وبقى الملك معلق هنااااك بيموت ودموا نازف من صفحته ووشو أسود. الناس البيض ديل عندهم شوية آلهة متناكة بجد، يا سيد شدّو.
    - صاح. إنتي موش بيضاء؟
    - أنا شيروكي.
    - دمك كلو؟
    - لا. لترين بس. أمي بيضاء. أبوي كان هندي من النوع الحقيقي بتاع المحميات داك. جا ماري بي هنا، وآخر مطافه إنو إتزوج أمي وجابني. لما أختلفوا رجع أوكلاهوما.
    - رجع المحمية؟
    - لا. استلف قروش وفتح تاكو بال، عايز ينافس تاكو بيل. ماشي كويس. ما بريدني، بقول علي هجين.
    - حاجة مؤسفة.
    - فاكا منو. أنا فخورة بي دمي الهندي دا. بيساعدني في قروش المدرسة، إحتمال ذاتو بسببو ألقى لي وظيفة يوم، لو ما قدرت أبيع البرونزيات بتاعتي.
    - في حل زي دا دايماً.
    وقف شدّو في ألباسو، إلينوي، أتنين ألف وخمسمية نسمة، عشان سام تنزل قدام بيت في حتة منحدرة من طرف المدينة. كان قدام باحة المنزل الأمامية تمثال كبير، قايم على إطار سلكي، لحيوان الرندير أو الأيل، مكلل بأنوار متلألئة.
    - عايز تخش معاي؟ عمتي ح تعمل ليك قهوة.
    - لا. لازم أواصل.
    إبتسمت ليهو وبدت فجأة ولأول مرة قابلة للإيذاء. مدت يدها وضربته على يده وقالت:
    - إنت شكلك أمورك جايطة يا سيد، لكنك ظريف..
    - أفتكر دا ما يسمونه الحالة الإنسانية. شكراً لرفقتك.
    - نو بروبلم. لو لاقتك أي آلهة في طريقك لكايرو، ضروري تقول ليها هاي مني.
    نزلت من العربية ومشت لباب البيت. ضغطت على الجرس وانتظرت فترة بدون تعاين وراها. إنتظر شدّو لغاية ما الباب اتفتح وشافها دخلت سالمة، بعد داك وضع قدمه لتحت وإتجه نحو الطريق السريع.
    -------------------

    لمحة من حكاوي أمريكية باللغة السودانية.
                  

06-09-2016, 09:22 PM

معاوية الزبير
<aمعاوية الزبير
تاريخ التسجيل: 02-07-2003
مجموع المشاركات: 7893

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)

    تذييلك كان حيكون تعليقي على هذا النص الممتع المصور
    فما خليت لينا حاجة نكتبها
    هذا أولا (كما يقول المحللون السياسيون في نشرات الأخبار، وعينهم على حساباتهم المصرفية التي تتضخم بتضخم كوارث المنطقة)
    ثانيا، كتابة نص باعتماد صيغة الحوار، حاجة صعبة جدا، إذ تُحيَّد حيلة الاختباء وراء السرد
    أهنئك على التوفيق فيها
                  

06-09-2016, 09:41 PM

ناصر حسين محمد
<aناصر حسين محمد
تاريخ التسجيل: 01-09-2013
مجموع المشاركات: 5233

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: معاوية الزبير)

    ياحلاوة

    كلام جميل جدا
    استغرقت فيه وضحكت بشدة في بعض المفردات ( المدغمسة) السودانية
                  

06-10-2016, 01:07 AM

mustafa mudathir
<amustafa mudathir
تاريخ التسجيل: 10-11-2002
مجموع المشاركات: 3553

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: معاوية الزبير)

    Quote: كتابة نص باعتماد صيغة الحوار، حاجة صعبة جدا، إذ تُحيَّد حيلة الاختباء وراء السرد

    سلام يا معاوية
    السرد لو فيهو وصفيات متقنة، وشوية تاريخ للمكان أو للشخوص، اكيد بيكون حاجة جميلة.
    ونجي لي قدام لأصول النص.
    خليك متابع.
    ---------------------
    سلام يا ناصر وشكراً على القراءة والتداخل

    Quote: استغرقت فيه وضحكت بشدة في بعض المفردات ( المدغمسة) السودانية


    الغاية من النص هو مقاربة السؤال لماذا لا نكتب نصوص باللغة السودانية. نكون اتخارجنا من قصة النحو والإعراب.
    ونبقى في طريق الإعراب الجد، اللي هو نعرب عن أنفسنا بلساننا.
                  

06-10-2016, 04:11 AM

معاوية الزبير
<aمعاوية الزبير
تاريخ التسجيل: 02-07-2003
مجموع المشاركات: 7893

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)

    سلام يا عم
    طبعا أنا ما قصدت إنو السرد ساهل أو ما جميل، بل أعرف أيضا أنه يستهلك الروح
    مثله مثل أجناس الإبداع الأخرى
    لكن صعوبة الحوار أنه يحتوي السرد في داخله يضمه يحتضنه يجعل النص 2 في 1
    هذا أولا (كمحلل سياسي عيني على حسابي المصرفي)
    ثانيا أعجبتني فكرة كتابة النصوص بلغة سودانية لـ(الإعراب) عن أنفسنا بدل (إعراب) العرب ونحوهم.
    تصدق هذا ما يجذب الجمهور هنا لحكايات صاحبنا المستنير!
    Quote: ونجي لي قدام لأصول النص.
    خليك متابع.
    في الانتظار
                  

06-10-2016, 04:42 AM

mustafa mudathir
<amustafa mudathir
تاريخ التسجيل: 10-11-2002
مجموع المشاركات: 3553

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: معاوية الزبير)

    Quote: تصدق هذا ما يجذب الجمهور هنا لحكايات صاحبنا المستنير!

    يا معاوية ياخ صاحبنا دا مست أي حاجة غير نير!
    ياخ دا بعد قلت ليهو في بوستيهو ال بيسخر فيهو من الاريتريين، إريتني كان منهم، قلت ليهو ياخي إنت clueless!
    دا كي أو knockout المفروض ما يقوم منو. تصوّر بكّة أخد الكرت الاخضر قايل إنو ح يحسبوهو مع (العقول) المهاجرة!
    ها ه بتاعت م عبدالله مشاوي، الله يرحمه
                  

06-10-2016, 07:46 AM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)

    القصة ممتعة وهذا هدف اساسي في تقديري .. واعجبني سودنة ########
    وملاحظة عابرة لكنها امسكت بي . لحظة الوداع بينت سلوكين لعالمين مختلفين
    هو وقف لامن تاكد من دخولها
    وهي ولا هببتو ليهو
                  

06-10-2016, 10:35 AM

طه جعفر
<aطه جعفر
تاريخ التسجيل: 09-14-2009
مجموع المشاركات: 7329

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)


    سلام يا مصطفي
    القصة جميلة جداً
    و يبدو أنها بالأساس كتبت بالإنكليزي و تمت ترجمتها
    انا عاوز النص الإنكيزي.
    إذا لم يكن الأمر كذلك
    فسيكون أن الراوي يفكر بالإنكيزي و يكتب بالعربي
    المهم في القصة دي وضوح عالمان لغويان متجاوران بسبب الهجرة

    و سأعود
                  

06-10-2016, 12:30 PM

sadig mirghani

تاريخ التسجيل: 03-03-2014
مجموع المشاركات: 2555

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)

    جيب شدو دا السودان ومعاهو الخواجية بت الغ......
    وبعداك متعنا في سردية وتطواف علي مدن السودان المختلفة
    واصل واصل خربت صيامنا
                  

06-11-2016, 01:11 AM

mustafa mudathir
<amustafa mudathir
تاريخ التسجيل: 10-11-2002
مجموع المشاركات: 3553

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: sadig mirghani)

    Quote: وملاحظة عابرة لكنها امسكت بي . لحظة الوداع بينت سلوكين لعالمين مختلفين هو وقف لامن تاكد من دخولها وهي ولا هببتو ليهو

    سلام أستاذ عبد الحفيظ وشكراً على القراءة. نعم الحتة دي بتخلي الواحد يفكر في النوايا، والأخلاق، وكذلك سطحية العلاقة واستحالة أن تصلح لإبداء رأي أو تقييم.
    حقيقة انا قصدت إنو الناس تحاول تتذكر، هل مرت بموقف مثل هذا وما يتناسل من حكي.
                  

06-11-2016, 07:06 PM

mustafa mudathir
<amustafa mudathir
تاريخ التسجيل: 10-11-2002
مجموع المشاركات: 3553

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)

    Quote: ثانيا أعجبتني فكرة كتابة النصوص بلغة سودانية لـ(الإعراب) عن أنفسنا بدل (إعراب) العرب ونحوهم.

    شكراً معاوية على عبارة (لغة سودانية)، ممكن نتخلص من وصف كلامنا بأنه عامي، من العامة ليس لكراهة في العامة. ولكن قصة الإعراب أو قواعد الصرف دي ممكن تظهر لي قدام. مثلاً عبارة مسكها أو ضربها، هي عندنا مسكا وضربا، فهنا ضمير المؤنث ها، لمن أراد كتابته، ستكون هاؤه صامتة. ودا معناهو إنو هنا في قاعدة، ههههه. كذلك اسقاط الألف في آخر عبارة كانوا وعملوا، فنقول كانو وعملو بحذف الألف ونكتفي بواو الجماعة. لكن، بجانب ذلك، فإن كلامنا السوداني دا، لغتنا إن شئت، فهو أقوى في التعبير من البحث عن مثله في اللغة العربية الصرفة. وأهو رمضانيات!
                  

06-11-2016, 07:43 PM

mustafa mudathir
<amustafa mudathir
تاريخ التسجيل: 10-11-2002
مجموع المشاركات: 3553

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)

    Quote: جيب شدو دا السودان ومعاهو الخواجية بت الغ......
    وبعداك متعنا في سردية وتطواف علي مدن السودان المختلفة
    واصل واصل خربت صيامنا

    دا واحد من الأهداف، اللي قعدت تزيد كل يوم، إنو الناس تحكي تجارب مثيلة في السفر كعم أو مع عم.
    أنا عندي قصة مساهمة لكن ما هسع.
    مشكور على التداخل، بعدين أمريكا دي ال ما غ.. كتار خلاص فيها وقدام.
                  

06-12-2016, 00:05 AM

mustafa mudathir
<amustafa mudathir
تاريخ التسجيل: 10-11-2002
مجموع المشاركات: 3553

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)

    Quote: سلام يا مصطفي
    القصة جميلة جداً
    و يبدو أنها بالأساس كتبت بالإنكليزي و تمت ترجمتها
    انا عاوز النص الإنكيزي.
    إذا لم يكن الأمر كذلك
    فسيكون أن الراوي يفكر بالإنكيزي و يكتب بالعربي
    المهم في القصة دي وضوح عالمان لغويان متجاوران بسبب الهجرة

    سلام يا طه
    شكراً يا طه على الإطراء.
    مصدر الحكاية لسع غير صالح للنشر، لكن ح أديك تلفون، يبدو إنك انترستيد.
    عارف الحاجات بتحصل. واحد صاحب محل بقالة سوداني في نورث أمريكا دي، شوية مهمل في طريقة عرضه للأغذية. قام فوق لي كدا شغّل معاهو سوداني آخر عندو سل. قاموا سودانيين بلغوا السلطات ضده وقفلوا دكانه.
    واحد ست عايشة على السيستم وقامت اتفشرت إنها إشترت شقة في مصر، قاموا السودانيين بلغوا السلطات وطردوها من سقط السيستم وإتبشتنت.
    برضو في واحد عجلته اتسرقت، قاموا سودانيين قالوا لصاحبها العجلة سرقها فلان اللي هو سوداني، قاموا ختوهو في السجن ومرمي لي هسع، وقال إنه ما سرقها.
                  

07-22-2016, 09:33 PM

mustafa mudathir
<amustafa mudathir
تاريخ التسجيل: 10-11-2002
مجموع المشاركات: 3553

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)



    سلام يا كرام
    القصة دي ما ترجمة!
                  

07-23-2016, 04:14 PM

بابكر قدور
<aبابكر قدور
تاريخ التسجيل: 02-26-2013
مجموع المشاركات: 1561

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يا عم! (Re: mustafa mudathir)

    أخي مصطفى مدثر
    لك الود والتحايا الطيبات
    قرأت النص وتجاوب النص معي بكل العناصر التي من المفروض أن يحويها
    وهي متوفرة فيه بزيادة .. شدني النص إليه "تمام التمام" وكان التشوق حتى
    النهاية .. ولا أخفي عليك عثرة أوقفتني بعد أن فرغت من قراءة النص وانتهى
    النص من إثارة المتعة فيَّ .. عثرة كبرى تمثلت في العبارة "تحت اللباس" ورغم
    أنني أدرك تماماً كثرة استخدامها في لغة الغرب وانتشارها وعدم التحرج منها مثلما
    تنتشر كلمة "سجم" عندنا ولا نتحرج منها .. وما دار في داخلي منها أننا إذا حذفناها
    من النص فلن تؤثر مطلقاً على البناء المتين للنص .. وعثرة صغرى تمثلت في اختيار
    إسم "شدو" لأحد أبطال الرواية ولو كان مسماه "محمد أحمد" أو "أحمد" لكانت , وهذا
    حسب رأيي الذي ربما يكون فيه خطأ, لكانت الرمزية فيه أعلى درجة بكثير من الإسم
    المختار .. خاصة وأن النص قد جسد وقائع حدثت في الغرب وتم سردها بمنتهى الروعة
    بلغة محمد أحمد .. تحياتي وإعجابي الشديد بالنص .. معها مودتي ومحبتي ....
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de