|
Re: يالمغتربين البيقرأ الكلام دة ما ظنيتو ينز (Re: Adam Youssif)
|
طبعا يااخ ادم دي واحدة من سيئات الغربة بتشيل من جواك "الهيومر سنس"...شوفتهم كيفين حساسين واي حاجة بياخدوها مسالة شخصية .....الضحك دا عندهم بالجلالة كدا واي حاجة يحسبها ليك بالريال والسوداني والكلام لناس السعودية تحديدا... مملين خلاص .....الكفيل مطلع دينهم ...تلقي الواحد مغترب عشرة سنة ..خمسة سنوات رايحة اشارات وصلاة ...... هسي دا يجو طايرين لي جوز .... يااخوانا انا بهظرررررررررررر...
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: عمر سعيد علي)
|
يا اخوي يا ادم والله نسمع بجاي وبنفضي بجاي وبنجي وانتو يا ناس جوا تتريقوا علينا وعلى حاجاتنا ابوعشرة وابودرهمين والصناعات الصينية لكن وحاتكم وغلاوتكم عندي انتو بقيتو طبعكم شين وشحادين لاخر شبشب صيني بتاخدوهو مننا بلدنا حلوة بناسها واكلها طاعم وناسها حلوين لكن اتغيروا كتير ومش للاحسن ابدا لم يعد انسانها بخير من مجاميعوا انا مغتربة ومواكبة جدا للبحصل اول باول ورغم السنين الطويلة برا والمعاناة البعانيها في غربتي من نفسي ومن اسرتي ومن الحولي الا انني بكون مبسوطة جدا من الجري والتسوق والضايقات المالية البتحصل لي بعد كل اجازة بت اختي صغيرة وجات من السعودية في اجازتها مع اسرتها بعربة خاصة وفي الرجوع تعبوا جدا بسواكن وشكلها تعبت من الوقوف في الصفوف والشمس وتجرست جدا وبعد وصلت بيتم ونامت كم يوم جات لامها بهدوء وحيرة وقالت ليها ياماما بنسافر كل سنة الاجازة بالسودان لانها استرجعت اكيد الحاجات الحلوة بمجرد نست التعب بعدين انت مواكبتك دي للصغيرة والكبيرة والدقة دي دقة زول كان ممارس الفعل دا يعني اغتربت وجربت وغالبا يا سعودية ويا امارات ما غيرم يلا اعترف
بالمناسبة ناس السودان ديل اي شي عايزنها مافارزين ايطالي او صيني كمان جاهم طمع وقوة عين ماتزعل مننا انت كلمت عن المغتربين براحتك فلازم الدور علينا يعني الواحد شهري بيوزع مرتبوا في الصرافات ولمن تجي الاجازة يتدين تاني عشان الهدايا دا غير احتياجاتو الشخصية والمواقف كثيرة لاتعد ولاتحصى لكن برضو في اغترابنا الكثير من الفوائد لكل اسرة وبرضو ابودرهم ودرهمين من برا احسن من اي مصنوع سوداني والسودان دا نحن البرا بنحبوا اكتر وزيادة من الجوا ها ....
ويبقى ع قول منى عمسيب الحبيبة المغتربة الثورة خيار الشعب
ترا مب زين تشيلوا حالنا ونحن كل يوم نطرش الفلوس والملابس والهدايا انتو طماعين وايد وايد
محبتي
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: نعمات حمود)
|
بامكاني وبلا فخر أن أعد مؤلفا .. ومن عشرات المجلدات في هذا الموضوع .. ولكن زنقة العمل تحول دون ذلك الآن .. إلا أنني ساخرج من هنا بعد قليل بعد ان أعطيكم { تصبيرة } ريثما اعود ان كان في العمر بقية
علي بالطلاق واحد في السودان شغال السنة كلها .. { المرة حملت } { المرة بتتوحم } !!! { المرة ولدت } !!!! بعد كل { 3 } شهور يقول ليك { مرتي حامل !!!! } وبي هناك الزغاريد تضرب لديه ماشاء الله ثلاثة اولاد وبنت اها { الحمل } مسئول عنه زولنا بتاع السودان !!!! والسماية مسئول عنها صديقي { الأعزب } هنا بوادي الدواسر !!!!!
هسي دي تجي كيف ؟؟؟؟؟؟؟؟؟؟؟؟؟؟؟ وعليكم الله لو الواحد اشترى كل شوالات الويكة في السودان تفتكروا بيقدر { يلايق } الشغلانية دي
مش معقول { تحمّلوا النسوان انتوا } ونحن يكون علينا حق السماية !!!! كمان قال شنو ؟؟ الولد الأخير دا عاوزين نسميهو عليك !!!
شوت ضفاااااري في برنامج لذيذ كان ياتي في احد القنوات اللبنانية برنامج مسابقات اسمه { الحل عليك } والتذكرة علينا !!!!!
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: نعمات حمود)
|
غايتو أكبر "ضحية" وقعت في شر اعمالها هم شريحة "المغتربين" ...دائما بتذكر تصنيفات الراحل العزيز زميل المنبر والمنابر المجاورة (CG) لاطوار حياة المغترب وقد صدق... فقط فات عليه... طور "جمل الشيل"...
ويموت في السودان كهلا مريضا مهملاً...وحوله اللعنات من اقرب الناس اليه...نفس الناس الكان يدفع مصاريف دراستهم وعلاجهم ...ولايبخل عليهم بالاي فون والجلاكسي...من لحمه ومن راتبه الهزيل
نحن في عصر "عقوق" المغتربين
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: نعمات حمود)
|
والله يا نعمات لمن النت زاتو طشا لمن قريت الكلمة دي أنا قايل ترامب في ذات نفسو نازل إجازة السودان أتاريهو الجملة مركبة (تري + ما ب....) يا أخي صحيح من عرف لغة قوم أمن مكرهم على العموم في مغتربين ينطبق عليهم الموضوع وفي مغتربين ياهم حقين زماااان البعملو كل شيء أسياد القدح البجر والحيشان الثلاثة والبقرات الثلاثة كمان ، في الداخل لاشك الناس إتغيرت وإتبدلت غصباً عنها أهم حاجة أن من سلبيات الغربة أن المغتربين ومن شابعهم تعودوا على النوم في لصناديق المغلقة أو ما يعرف بالشقق وحتى ذلك النوع من المعمار نقولوه للسودان دون مراعاة للبيئة والمناخ والوضع الاقتصادي وتردي الخدمات ، أها وحاتكم عندنا حوش خمسمية متر في أوضتين خلف خلاف وراكوبة بطول حيطة الشارع والحمام تركب ليهو ركشة في آخ الحوش وباقي البيت تلعب فيها كركيت عديل كده أها دا سلاحنا للحر القادم وصيف العبور إنتو دباركم شنو مع الحر صحيح أن شققكم fully equipped بالمكيفات وامعينات الأخرىى وما في حكمها لكن الدبارة شنو لا كهرباء لا ماء ولا حول ولا قوة إلا بالله التوقيع almulaomar المكان من تحت شجرة نيم مرشوشة ومن فوق عنقريب حبل حلفا كرابو مرخي وبدون مخدة الساعة الحادية عشر إلا إثنا عشر دقيقة صباحا ودرجة جرارتنا الآن 38 درجة مئوية يعني 100 درجة فهرنهايت والرطوبة 17% وسرعة الرياح 6 ميل في الساعة والجو عموما مشمس وغروب الشمس كان الله أراد عند الساعة السابعة وتسعة دقائق بالتوقيت المحلي (GMT +3) أهلا وسهلا بكم في السودان መልካም ጉዞ።
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: almulaomar)
|
المبدع عمر الملا تحيات
Quote: وحاتكم عندنا حوش خمسمية متر في أوضتين خلف خلاف وراكوبة بطول حيطة الشارع والحمام تركب ليهو ركشة في آخ الحوش وباقي البيت تلعب فيها كركيت عديل كده أها دا سلاحنا للحر القادم وصيف العبور إنتو دباركم شنو مع الحر |
ههههههههههههههههههههههه كدة بتعمل نفسيات للناس المغتربين ديل ياخ حوش زي دة الشفع يلعبوا فيه بالدراجات الهوائية وكمان الدرجات البخارية وكورة قدم كمان ياسلاااااااااااام
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: Mohd Ibrahim)
|
اخونا محمد ابراهيم
Quote: شوفتهم كيفين حساسين واي حاجة بياخدوها مسالة شخصية |
أسألني أنا من الناحية دي حساسين شديد اعمل حسابك من اي كلمة او حركة غير مقصودة في مرة من المرات قلت ل واحد كان بتكلم معاي بالتلفون قلت ليهو (يلا) مع السلامة زولي زعل شديد وقال لي كيف تقول لي (يلا)
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: Mohd Ibrahim)
|
يا ادمو او الدوما طبعا انا ابوي ادم والله يرحمو يوم يكون عندنا طلبات بندلع زي ما دائرين فيهو اها جيتك لعوجة الخشم وبالمناسبة الخشم بالاماراتي تعني الانف او النخرة و انا 13سنة غربة وكتبت عن تراث الامارات ولهجتها واختلافاتها من خلال مهرجان الايام التراثية بالشارقة سبع سنوات يعني مؤرخة ليهم لكن يوم وااحد ما غيرت سودانيتي لدرجة الاوفس بوي او الولد الشغال بقى يجي بالاجتماعات يقول دائرين شاي سادة او موية باكستاني وللعلم بس انا السودانية الوحيدة والوافدة الوحيدة بقسم الاعلام كااامل وسط المواطنات وكلهم بقولوا زول وزولة وتاثروا هم بي فشنو دي قصة قشرات من الناس ساي لانو مستحيل 13سنة تمسح عشرين ونيف من السنين على افتراض عمري بالسودان وبعدين ليه اغير شي حقي عشان اقنع مصري او اماراتي او شامي او زلمي باني افهموا بلهجتو واقعد الولوي في فمي وهيك وميك ههههههه نرجع للشحدة المغتربين تعبانيين مع اهاليهم وبعد دا ما في شكر في عالم جحوود وطماعين ماتزعلوا مني اتمنى الناس تقدر غربتنا ووحدتنا وشقانا وجهودنا المضنية في الارتقاء باسرنا التعبانة ههههه فتك بعافيا
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: Adam Youssif)
|
السلام عليكم ...
صاحب البوست .. الأخت نعمات والأخوة الأكارم الزوار....
خلوا المغتربين يعوجوا خشمهم ولا يقولوا للعربية سيارة ولا أي حاجة...
التغيير ضرب الأمة كلها.... وإلا
السودان كله يقول ليك الدوام (العمل) من وين جات كلمة الدوام...
يطرشنا سمعنا أهلنا بقولوا الشغل ولا حتى العمل...
وبعدين محلات المندي والمظبي الأنتشرت دي برهنت أنو في الحتة دي
أننا شعب هش الثقافة...
لكن يا نعمات يا أختي كلامك لمس أوتار كثيرة ما زالت صدى إرتداد لحنها يعتور القلب...
لله درنا من مغتربين فقد عقنا الأهل والأصحاب على الرغم مما نظن أننا نبذله
تحياتي
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: Kamal Karrar)
|
Quote: غايتو أكبر "ضحية" وقعت في شر اعمالها هم شريحة "المغتربين" ...دائما بتذكر تصنيفات الراحل العزيز زميل المنبر والمنابر المجاورة (CG) لاطوار حياة المغترب وقد صدق... فقط فات عليه... طور "جمل الشيل"...
ويموت في السودان كهلا مريضا مهملاً...وحوله اللعنات من اقرب الناس اليه...نفس الناس الكان يدفع مصاريف دراستهم وعلاجهم ...ولايبخل عليهم بالاي فون والجلاكسي...من لحمه ومن راتبه الهزيل
نحن في عصر "عقوق" المغتربين |
على الرغم من الفكاهة في الموضوع لكن الزول دا جاب الوجعة الحقيقية
تحياتي للجميع
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: Adam Youssif)
|
. ادم كييف حالك وازيك في نتائج اجتماعات بين رئيس الجمهورية ونائبه ورئيس البرلمان ووزير العدل وأركان المال وأركان الأمن ..... وقراراته متداوله في المواقع بدرجة ( عاجل ) وهي كما يلي : . 1. منع التعامل بالعملات الأجنبية بين المواطنين . 2. أي مواطن يتم ضبطه وهو يحمل وهو يحمل أي عملة أجنبية ستتم محاكمته بالإعدام أو المؤبد ( العقوبتان اللتان أقراهما الإجتماع ) 3. إمهال التجار ومدخري العملات الأجنبية مدة أقصاها عشرة أيام لتحويلها لجنيه عبر البنوك , . وقد أقر الإجتماع التحويل بسعر 13.5 لهذه المرحلة على أن يتم تثبيت سعر الدولار بواقع عشرة جنيه بعد المهلة ويحدد سعر بقية العملات على أساس الدولار . 4. سيتم تطبيق الإعدام والمؤبد بعد انقضاء مهلة العشرة أيام على كل من يتم ضبطه بعملة أجنبية . 5. بعد تثبيت سعر الصرف سيتم التعامل مع تحويلات المغتربين بسعر عشرة جنيه للدولار بالتحويل فقط ولا يسمح لأي مغترب الدخول بعملة أجنبية وإلا سيطبق عليه القانون . 6. الشركات والأجانب سيتم استلام تحاويلهم ومعايرتها بالجنيه السوداني بواقع عشرة جنيه للدولار بعد انقضاء المهلة . 7. القانون لا يستثني أيٍّ من منتسبي الحكومة وأجهزتها وسيطبق عليهم القانون بالسواء . . فلنناقش تداعيات هذه القرارات ....... مشكورين
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: محمد فضل الله المكى)
|
. 1. أولا كنت أتمنى أن يحيل الإجتماع هذا الأمر ( للجنة ) لدراسته من كافة الجوانب والوصول لتوصيات سليمة فيها مصلحة السودان اولا ومن ياتون بالعملة . 2. في تقديري إن هذه القرارات ستحد كثيراً من تدفقات أموال المقتربين للبلاد . 3. لماذا لا تتم العودة لنظام ( الديكلاريشن ) الذي يتم تحريره في منفذ الوصول ؟ على أن يفرض على صاحبه تحويل مبلغ معين عبر القنوات الرسمية . وكان معمولا بهذا النظام وقد شهدت العملة استقراراً كبيراً نتيجة لتلك السياسة . 4. يحتاج المغترب لبعض المال بالعملة الصعبة عند العودة لعمله بعد الإجازة فقد يحتاج لفنادق ومواصلات داخل بلد العمل حتى يصل لمكان عمله .. 5. يحتاج المغتربون الذين يأتون بسياراتهم في الإجازة إلى مبالغ بالعملة الصعبة للبنزين والفنادق والأكل عند العودة عبر السعودية ، وبعضهم يأتي بأطفاله . . 6. سعادة وزير المالية بدلاً من الإشتراك في اصدار مثل هذه القرارات لتغطية فشله في الإرتقاء بالإقتصاد .. كان عليه تقديم دراسة علمية اقتصادية للخروج من المأزق الإقتصادي الذي ترزح فيه البلاد . 7. وكما قال صاحب ( العرضحال ) الهزلي الذي أورده أخونا آدم فإن السماسرة يقابلوك بالعشرات ( دولار ريال ) طبعاً شيك سياحي الظاهر بقت ما شغاله.. ومافي سيطرة عليهم ولا حتى ( كشه ) ... ...هذا والسودان من وراء القصد
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: محمد فضل الله المكى)
|
محمد فضل الله المكي حياك الله Up
Quote: . 1. أولا كنت أتمنى أن يحيل الإجتماع هذا الأمر ( للجنة ) لدراسته من كافة الجوانب والوصول لتوصيات سليمة فيها مصلحة السودان اولا ومن ياتون بالعملة . 2. في تقديري إن هذه القرارات ستحد كثيراً من تدفقات أموال المقتربين للبلاد . 3. لماذا لا تتم العودة لنظام ( الديكلاريشن ) الذي يتم تحريره في منفذ الوصول ؟ على أن يفرض على صاحبه تحويل مبلغ معين عبر القنوات الرسمية . وكان معمولا بهذا النظام وقد شهدت العملة استقراراً كبيراً نتيجة لتلك السياسة . 4. يحتاج المغترب لبعض المال بالعملة الصعبة عند العودة لعمله بعد الإجازة فقد يحتاج لفنادق ومواصلات داخل بلد العمل حتى يصل لمكان عمله .. 5. يحتاج المغتربون الذين يأتون بسياراتهم في الإجازة إلى مبالغ بالعملة الصعبة للبنزين والفنادق والأكل عند العودة عبر السعودية ، وبعضهم يأتي بأطفاله . . 6. سعادة وزير المالية بدلاً من الإشتراك في اصدار مثل هذه القرارات لتغطية فشله في الإرتقاء بالإقتصاد .. كان عليه تقديم دراسة علمية اقتصادية للخروج من المأزق الإقتصادي الذي ترزح فيه البلاد . 7. وكما قال صاحب ( العرضحال ) الهزلي الذي أورده أخونا آدم فإن السماسرة يقابلوك بالعشرات ( دولار ريال ) طبعاً شيك سياحي الظاهر بقت ما شغاله.. ومافي سيطرة عليهم ولا حتى ( كشه ) ... ...هذا والسودان من وراء القصد |
| |
|
|
|
|
|
|
Re: يالمغتربين البيقرأ الكلام دة ما ظنيتو ينز (Re: Adam Youssif)
|
تحياتي للجميع لن يخمد بريق الإغتراب ، والنظرة للمغترب بإعتباره البقرة الحلوب إلا أذا تجاوز السودان الظرف الاقتصادي الحرج الذي يعيشه ومتى ما كان المغترب هو جمل شيل وحلال مشاكل البيت السوداني ، سيكون مظهره هو السائد ولهجته هى المسموعة وثقافيه الخليجية هى السائدة ، ودشداشته هى الملبوسة ..... الخ
| |
|
|
|
|
|
|
|