سارة و أحمد شغالين مع بعض يوميا ف مشروع ف الشركة بقالهم 6 شهور.. غير الشغل و المواقف اليومية،، في بينهم نظرات صامتة و تلميحات خفيفة من أول المشروع.. و ف آخر يوم ف المشروع، أحمد طلب من سارة إنه يقعد معاها ف مكان عشان عايزها ف موضوع.. سارة فرحت بس مابينتش فرحتها طبعا.. -------------------------------- **ف الكافيه و بعد اول شفطة بينا كولادا - (مش خمرة ولا حاجة ده عصير أناناس بالحركات) - أحمد بدأ الكلام........ -سارة أنا بحبِك.. *(بثقة و تقل): مش هتعرف -لأ هعرف *يبقى مش هتقدر -لأ هقدر *يبقى مش هتفهم -لأ فاهم *طب فاهم إيه؟ -فاهم انتي عايزة ايه *طب انا عايزة إيه؟ -(نفس عميق و نظرة نافذة إلى القلب): عايزة تحسي إني بحبك خارج حدود الهرمونات و المتعة اللحظية.. بس مش خارجها أوي... عايزة تحسي إني داخل حدود العقل و الرزانة و النضج و المسئولية.. بس مش داخلها أوي.. عايزة تحسي إنك مميزة أوي عندي و يوصلك إحساس صادق و حقيقي إن مفيش واحدة غيرك تفهم أو تقدر أو تعرف تديني اللي انتي بتديهولي.. عايزة تشوفي إني بخصص وقت و مجهود إني أسعدك انتي بالذات بالحاجات اللي بتسعدك انتي بالذات.. عايزة تشوفيني ف ضعفي زي مابتشوفيني ف قوتي.. عايزة تحسي معايا بأمان الأب و شغف الحبيب و سند الزوج و احتياج الأبن.. عايزة تكوني انتي المحور و الإرتكاز.. عايزة تشوفي مني أمان المسئولية الكبيرة، و متعة الأشياء الصغيرة.. عايزة تحسي إني عالي و كبير مع الدنيا، بس صغير و ضعيف ليكي.. عايزة تشوفيني دايما بنظرة اللهفة و تعبير الإنبهار و لخبطة الأنفاس و اضطراب النبضات.. عايزة تسمعي الكلام الحلو و وراه الفعل اللي يصدق عليه.. عايزة تنجحي بيا و أنجح بيكي.. بيكي انتي و بس.. عايزة تحسي و تصدقي إنك الوحيدة اللي حبتها بجد و إنك قصة حياتي كلها.. *(مصدومة):انت عرفت كل ده ازاي؟؟ -عرفته عشان اهتميت أعرفه.. و اهتميت أعرفك.. *انت لو كدة فعلا و مش كذاب، هتجوزك دلوقتي حالا! -أنا كدة فعلا!.. بس مش دي المشكلة! *أمال إيه المشكلة؟! -المشكلة إني مش هفضل كدة.. *مش فاهمة!! قصدك ايه؟؟ -سارة انتي حلوة.. حلوة اوي.. و ذكية اوي.. طيبة بطعم الشر اللي بيخليكي مش ساذجة.. حنينة بطعم القسوة الي بتخليكي مستقلة.. و جاذبيتك أعلى من جاذبية ثقب Gargantua الأسود.. و مجرد التفكير فيكي يُعادل 3 جرام كوكايين.. سارة انتي ممكن تكوني ماحصلتيش ف حياتي قبل كدة و احتمال كبير مش هتحصلي بعد كدة.. *ميرسي خالص.. بس لسه بردو مش فاهمة! -كل اللي انا قولتهولك ده بيحطني ف حالة.. حالة "سارة" حالة "سارة" مهما طالت مؤقتة.. لأن دي طبيعة الأشياء.. منحنى صاعد مجنون – ثبات هادي رزين – انحدار محبط مهين.. *لأ معلش ثواني، انت بتقول اني نزوة يعني؟؟! -سارة أرجوكي انتي أذكى من كدة.. و انتي الوحيدة اللي ممكن تفهمي الكلام ده.. مفيش حب ولا شغف ولا جنون ولا عطاء ولا نجاح ولا أي شيء ف الدنيا بيدوم.. حالة "سارة" بالنسبالي من أجمل أوقات حياتي.. أول منحنى ف حياتي يكون صاعد بجنون.. بس مش هنعرف نهرب من القانون.. المنحنى مهما فضل طالع، لازم يثبت.. و بعدين لازم ينحدر.. *انت مجنون يا أحمد؟؟ ايه الكلام اللي انت بتقوله ده؟؟ -بقول الحقيقة *سيبيك من الكلام ده و فهٍمني!.. أمال انت قولتلي ف الأول بحبك ليه؟؟.. عمال تسمعني كل الكلام ده ليه؟؟ -جزء من الإستمتاع.. عشان يكون في منحنى صاعد، لازم يكون في قصة.. لازم يكون في حالة.. *يعني ايه؟؟!! -يعني كان لازم أقولك اني بحبك و أشوف رد الفعل.. كان لازم الكلام اللي بقالي شهور عايز أقوله يتقال.. *و بعد ما الكلام يتقال؟!! -أعيش الحالة.. و لو دقايق.. *انت مش طبيعي!.. كلامك غريب و سخيف.. -لأنه حقيقي بزيادة للأسف.. *انت عايز مني ايه دلوقتي؟!! -ولا أي حاجة غير إنك تفهمي انا مش هقدر أتقدملك ليه *انت بجح أوي! -مش هقدر أتقدملك لأني لازم أسيبك ف المنحنى الصاعد لأني لو اتجوزتك يبقى هيجي يوم و أبقى مش بحبك زي دلوقتي.. حب المنحنى الصاعد هيتحول.. و انا بحبك فعلا.. و عايز أفضل أحبك صاعد و بس.. و عشان كدة هروح أخطب شيماء بتاعت الـ HR.. -انت بتقول ايه!!! *و الله هتقدم لشيماء.. لأن شيماء بالنسبالي كائن محايد ف الكوكب.. و عشان كده هبدأ معاها من الحتة الثابتة ف المنحنى.. يعني مش بحبها و مش بكرهها.. و عشان كدة مش هيكون في انحدار.. هعيش مش بحبها و مش بكرهها و هموت مش بحبها و مش بكرهها.. -أنا مش عارفة أقولك إيه!!.. انت محتاج قلمين على وشك!! *مش مهم تقولي.. المهم اني هفضل أحبك.. (سارة بتبصله بذهول و قرف و تقوم تمشي من غير ولا كلمة) ----------------------------- **سارة ف البيت بالليل.. متغاظة و مفروسة.. بعد شوية بتطلع الموبايل..... -آلو... أيوة يا شيماء ازيك.. *أهلا يا سارة ازيك انتي.. -أحمد اللي معانا ف القسم هيتقدملك.. ده حيوان و لعبي.. أديله على دماغه! *ايه ده بجد؟!!!.. ده لسه مكلمني من شوية و حدد معاد مع بابا! -(بذهول) الحيوان!!!.. أوعي توافقي يا شيماء!!.. ده بيقول عليكي كائن محايد معاه عالكوكب! *لأ أوفق ايه!.. أنا متشكرة أوي إنك حذرتيني يا سارة.. بجد مش عارفة أشكرك ازاي! -لأ يا حبيبتي ماتشكرينيش ولا حاجة.. ده واجبي! ------------------------ **إعلان ف الشركة بعد اسبوع: (نتشرف بدعوتكم لحفل خطوبة المهندس أحمد من قسم المشاريع إلى الآنسة شيماء من الـ HR) #محمد_فايق
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
احمد سيد احمد
فيس بوك
تويتر
انستقرام
يوتيوب
بنتيريست