عامن اوّل وكِت دفر تساب الهكر اصلو لا نحرا من اللطراف لا شالآ بهدآم، بس جا خاوي ؤُ كف لفحا في اباطو ؤُ دفربها وسط الشيم والتيران . فضلت تغتس ؤُ تقلع وسط الموج الهادر، لآمن شافا صبي من فوق القيفة خلآس باقية علي الغتسة اللآخيرة قال كدي تلّب وسط اللُجّة ؤُ دفر بي سدرو الضُمّة ما اتبلّ ولو قطير ؤُ قال كدي غتس تِحِتا ؤُ سندا فوق ضهرو ؤُ مرقبها شرق فوق القيفة . عفيت مِنّك يا قسم الفضيل جنا مضوي اكان ما ضراعك اللخدر كانت لِحقت شيلآ ؤُ وِليداتا .
اها، بقينا علي دي الحالة، وِكت الوآطة بيّحت وصلنا سندة الودعاب، ؤُ قلنا كدي كسرنا علي السوق الجنب محطة السكة حديد . ربطنا حميرنا تحت النيم وِ اتوسدنا شواوِيلنا قلنا نستريح شويّة دوبِنو السوق فتح .
مدآخلة من ابو صفقتين، ود المدير في الطريق إلي قِـنـيـفِيّـطـة ...
01-28-2016, 03:20 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
دخلنا سوق أُم سُقُد والعُربان دآبُن داخلين ينوِخو في جُمآلُن ؤُ ينزلوا في بُضاعتُن، جو جالبين الجدقة والمحريب والحزا، ؤُ نحن قوزنا شوالآتنا فوق بعضِن راجين الرِزِق . حِجيري قالنا، الشِتا اللِيّل السنة في عِزّو ظهرن تخايات في السما، معناتا الخريف بيكون ناجح السنة دي، عشان كدي زبالتنا دي بي تِنباع سريع لا تخافو عليها . كلآم حِجيري في محلّو، الناس اوآت كسرو علي السوق نحن بِعنا و قبضنا قِريشاتنا . اوآت ما قبضنا القِريشات الكِرير قالنا، أها، كدي امشاكُن الناكُلنا اكل أفرنجي الليلة . مشينا اكنالنا فول بالجنا جداد والجبنة . بعد اكلنا مرقنا قروش المريسة فرزناهن غادي، ؤُ باقي القِريشات كل وآحد فينا حزآهِن في حِزّة سروالو ؤُ قلنا كدي مشينا علي اللِندآية . ربطنا حميرنا بعيد شويّة من باب اللِندآية ؤُ كشحنالِن قبضة قصب، ؤُ دخلنا علي المريسة .
السِرية بطاريتو نزلت ؤُ خليتو في المُخلآية. مدآخلة علي الهواء مباشرة، ود المدير من داخل إنداية أُم سُقُد ...
01-28-2016, 03:24 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
الكِرير قالنا، تعالوا اقُعدوا هنا جنب الحيطة نحن الناس ديل ما بنعرِفُن . طلبنا مريستنا ؤُ خلينا الحيطة في قفانا . جابولنا مريسة بِكريّة رِغوتا فايرة، تقعُد تفِج في الرِغوة يااااالله حتي تصل المريسة . كملناها ؤُ شعرنا بي عروقنا تب إتلّن، والجو راقلنا تب ؤُ بدينا ننسى كلّ التعب الطاح فوقنا . طلبنا تاني مريسة، قُوتلهم، بعد نشرب دي نمشي نشوفلنا درِب لحم . أها، في شرابنا ؤُ ونستنا جاء وآحد يترتح كف دفق مريستنا، ؤُ داير يقع فوق حِجيري، حِجيري إدرقو بإيدو، في الساعة دي انا ما سمعت إلآ الكع فوق راسي !، واحداً تاني إتنفض ؤُ في نُص صلعتي بالعُكاز، كان ما الكِرير كان صاحي ؤُ صرفا الجنا كان ودرني تب، أها، في اللحظة دي حِجيري كف كفت الزول الدفق المريسة قلبو فوق المريسة المدفوقة، الزول قام خافس مِتل الجاموس، ؤُ وآحد من هناك جدعلو عصا إتلآفاها من الهوا، وانا جدعت في الزول اللكان داير يضربني البنبر، ؤُ في رمشة عين كنا نحن التلآتة مدين ضهرنا الحيطة ؤُ نصرُف في العكاكيز بعد إنضموا للِتنين تلآتة تانيّن . الزول الدفق المريسة كان طامح ؤُ هايج زي الجاموس، والكِرير يشيّل ؤُ يصرُف في العكاكيز نعمنو في الصرف دا مافي زول بيلحقو، لكن الزول الهايج دا فلقُو، انا عاينت لقيت وشيهو دا كُلو مدمم، ؤُ قلنا كدي عصرنا عليهم، والناس الفي اللِندآية ست فزوا، ؤُ بقينا ما بنسمع غير فرقعة العكاكيز . وكِت عصرنا علي بعض بالحيل جا راجل كبير جاري جري، ؤُ قال كدي دخل وسط العكاكيز، حرّم كان ماهو زولاً فارس ما كان بيدخل وسط العوّة اللكانت حاصلة . الراجل دخل وسطنا ؤُ كورك بصوت جهور، علي بالطلآق تقيفو، علي بالطلآق تاني ما يترفع عُكاز . الزول دا وكِت كورك الخمسة فد مرّة وقفو . اها، نحن وقفنا ؤُ رقدنا علي الحيطة تب . الراجل الكبير لملم عِمتو ؤُ مسحبها وشي الكِرير من الدم، ؤُ مرق حُقتو كمدا ليهو صعوط ؤُ ربطا بالعِمّة، ؤُ قال كدي عدل البنابر ؤُ قعّد الكِرير ؤُ قالنا اقعدوا، أها، قعدنا والخمسة فضلو وآقفين . بعد اخدنا نفسنا، الراجل عاين للصبي اللكان هايج زي الجاموس ؤُ قالوا، دي سُوآة شِنو السويتوها يا عبد الوهاب !، كيفِن بتكاتلو ضيوفكم ؟، امانة ما اتلومتو لوم !. الراجل سعلنا، إنتو من وين ؟. قُتلو، نحن من أم الكرم . قال، ياسلآلآلآلآلآم، حباب أهل الكرم، والله إنتو تِرِب ناس كِرآم ؤُ فرسان . حقيقة إنتو من أُم الكرم . الراجل سكت مساااافة ؤُ هو مدنقر ؤُ عبد الوهاب ؤُ جماعتو واقفين ؤُ متكلين علي عِصيهُم ؤُ مدنقرين . بعد مسافة الراجل رفع راسو ؤُ سعلنا، إنتو جنوناً هِيّل مِنو في أُم الكرم ؟. قُتلو، نِحن هِيّل ود الكاسر . قال، هِيّل ود الكاسر !، هلآ هلآ الليلة نحن اتلومنا حدّ اللوم، ؤُ رفع راسو عاين لعبد الوهاب ؤُ قالوا، شُفت يا عبد الوهاب الشي ما ضيفان، الجنوّن ديل نفراً ليكم ؤُ طلعو أهلكُم تب، حقيقة المابيعرفك يجهلك ؤُ في ابوك ما يعزيك . الراجل الكبير صفّق إيدينو في بعضِن ؤُ هزّ راسو بحسرة وألم، ؤُ قال، غايتو دا لوماً تب ما بيتمسِح . عبد الوهاب طوالي في اللحظة دي قبّل ؤُ مرق من اللِندآية ؤُ تلآتة من الكانو مكاتلننا مرقو معاهو، ؤُ وآحد فضل معانا، ؤُ عمنا الكبير دا بقى قاعد فوق البنبر ؤُ ماسك راسو بين إيديهو ؤُ نحن متمحنين نعاين .
مدآخلة من داخل اللِنداية بخط اليد بعد فقدنا موبايلآتنا في الشكلة .
ود المدير من داخل إنداية أُم سُقُد ...
01-28-2016, 03:28 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
كلنا ساكتين والراجل متمحّن والجنا وآقف فوق راسو زي الديدبان . الكِرير قالوا، يا عمنا قوّم إرتاح ؤُ نحن ادونا خاتِركم . الراجل رفع راسو عاين للكِرير ؤُ قالوا، يا ولدي انا خالاً ليكم، انا البلة ود حمد ود البِطيران، ؤُ رجع تاني ختّ إيديهو فوق راسو وإتمحّن ورجع الصمت يلُف المكان . بعد مساااافة جا عبد الوهاب، قالوا، يا خال كُلو شي جاهز، الراجل وقف علي حيلو ؤُ قالنا قومو تعالوا معاي . قمنا بِرِيناهو ؤُ جنوّن إتنين ساقو حميرنا، أها، مشينا دخلونا في حوش تجري فيهو الخيل، الخال قالنا، ادخلو علي الديوان . دخلنا ؤُ عيني للصبيان الكاتلونا يسلخُوُّلُن في كبشين . الديوان ماهل ؤُ فيهو عناقريباً زيّن وهيطات، قلنا كدي قعدنا والجنون السغار جابو الطشت وِ إبريق النحاس غسلنا إيدينا، والخال قعد يجُرلنا في النسب ؤُ يوقعلنا في السرارة البينا . عبد الوهاب ؤُ باقي الجِنيات بعد قضو من وِضيب اللحم جو قعدوا يتونسو معانا ؤُ شوية شوية الجو بدأ يروقلنا لآمن البساط بقى احمدي تب ؤُ شعرنا بنفسنا أهل بيت . بعد مسافة الصواني جات ؤُ نحن مريوقين بالحيل، أها، قُمنا فوسبنا في اللحم زييين ما خلينالنا فرضاً ناقص، ؤُ بعد دآك جابو كفتيرة الشاي المِي خمج قعدنا نشرب في الشاي ؤُ سرحنا في الونسة والقرقرآب لآمن نسينا عوّة العكاكيز الكانت مدورة في اللِندآية، والخال مبسوّط ؤُ نحن رقبتو بسطنا مرق من اللِيّد . بعد الوآطة بقت العِصير، أنا قلت للخال، يا خال بعد دا ادونا خاتِركُم ما قصرتو معانا تب . الخال قال لي، خاترنا دا تسعلونا مِنو بعد تلآتة يوم، تاني ما داير اسمع السيرة دي في لسانك سامع كلآمي دا ؟ ...
أها، قعدنا تلآتة يوم علي الحالة دي، ضبايح ؤُ الناس مِنكسرة فوقنا كأننا ملآيكة نزلت من السما . في اليوم التالت بعد إتغدينا ؤُ شربنا الشاي والوآطة بقت العِصير والجو برد ؤُ جابلو نسمة، وقفت أنا علي حيلي ؤُ قبلت علي الخال ؤُ قلت، سنادين ضعيف قِمِح البِجي مكاجِركُن للجود والكرم يشلع دوآم فآطِركُم يا تِرب العُزاز سيف الصلآح ناصركُم غمرنا كرمكم الفياض وادونا تب خاتركُم
تبسم الخال دِلآلة علي الرضا، ؤُ قبل ينضم تمثل الكِرير قول عكير الدآمر، تسلم يا الزعيم يا التلفى ساعة العترة ويا جبل الضرى ويا الرى نهار الخترة عندك طبعة وكتين تدر إيدك تترى زي صفق الأراك الشم ريحة النترة
يا خال والله تب ما قصرتو معنا دحين ادونا خاتركم . تبسم الخال وِانبسط، ؤُ كورك، يا جننوّن جيبو لأهلكم ديل حمِيّرُن، أها ودعناهم ؤُ خفسنا فوق حميرنا ومسكنا الدرب . وِكت الشمس غابت والصحرا نسّمت، ؤُ شلع العبادي في سمانا، والحمير جدّت في المشي ؤُ صفالآ الجو الكِرير رفع عقيرته، جيتك بامتثال صاحبي المتمم كيفي إبراهيم ثبات عقلي ودرقتي وسيفي مطمورة غلاي مونة خريفي وصيفي سترة حالي في جاري ونساي وضيفي
الجرحو نوسر بى غوّر فى الضمير فوق قلبى خلف الكى يا ناس الله لى كان ما الشى قسم وانا عقلى مداير ليه عاشق المدلل بيهو شن داير يمشى الكى قبل وينتف الداير والديس الغزير لى قامتو يداير والمحيا المتل قمر العشا الداير يجيك بى عجن ويقولى شن داير رحماك يا عشوق طاش الفكر حاير ؤُ بقينا علي هادي الحالة الليل قدامنا يتقاصر، والأيام تذخر بالكثير .
مدآخلة من الآي فون 13 قبل ينجض ؤُ يمرق، ملعون ابوكي غربة، يا ناس رجعوني أهلي. ود المدير صحراء العتمور، شكراً لكم جميعاً...
01-28-2016, 06:10 AM
عزالدين عباس الفحل عزالدين عباس الفحل
تاريخ التسجيل: 09-26-2009
مجموع المشاركات: 9025
Quote: معاوية كيفنك انت قبال تضرب السناحة دي قاعد تاكل حاجة ولا فوق بطنك الفاضية يازول ما الذي نفسك في البرد دا
صباح باهي والله وطلة بهيّة، جد انا سعيد ؤُ فرحان بطلتك ووجودك في مساحتي هذه أخي عثمان، نحمد الله طيبين ؤُ زدنا صحة وعافية . حليل الصقط يا عثمان هسّع انا بكتبلك الساعة 7 صباحاً ودرجة الحرارة 6 فوق الصفر، عادةً في يناير بتكون من 15 تحت الصفر وإنت ماشي . شيطان الشوق للبلد هو الذي نفث في روعي، وانا زولاً بضرب فوق اللبادة، اوعّ بالك كِجنتي في الدنيا دي الحيرقان .
بكري خرب علينا الداهي دا، تصلحلك فِرِد حرف الباقيات كُولهِن ينساطن !. يديك العافية يا عثمان أخوي ؤُ ياريت تسعدنا دايماً بطلتك ...
01-28-2016, 04:15 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
ها يا جماعة هوي حرم تدخلو لا جوة .. مشواركم كان طويل ولّ قصير قبال تبرد الحراية حرم ماكم مارقين .. قوم يا ولد ضاير الحمير ؤ ارميلن كليقة قصب من عرش البيت .. مرحبابكم هاكم اتريقو.. شن مارقكم في الحراية دي يا المطاميس؟ الكرير الله لا تآجرك لساك تكّر في الوليدات تشرق ؤ تغرب؟ درافينك ما بقو على الصراع ؟. ياجنا افتحلنا الرادي كان يجينا خبرا زين .
01-31-2016, 09:36 AM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1437
Quote: ها يا جماعة هوي حرم تدخلو لا جوة .. مشواركم كان طويل ولّ قصير قبال تبرد الحراية حرم ماكم مارقين .. قوم يا ولد ضاير الحمير ؤ ارميلن كليقة قصب من عرش البيت .. مرحبابكم هاكم اتريقو.. شن مارقكم في الحراية دي يا المطاميس؟ الكرير الله لا تآجرك لساك تكّر في الوليدات تشرق ؤ تغرب؟ درافينك ما بقو على الصراع ؟. ياجنا افتحلنا الرادي كان يجينا خبرا زين .
يا ملك خيرك وآصل، بس نحن حالفين ما نضوقلنا شئ كان ما قضيت غردنا، فرايك شنو، بتقضاهو واللآ نرجع فوق اترنا ؟...
02-03-2016, 02:44 AM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
Quote: عوافي يا قريبي معاوية ,,,,, ياخي إنشاءالله بوستاتك كلها تكون قلة شغلة منك ,,,, ياخي يسعد صباحك الخليتنا فيهو سارحين مع المراح في خلا ود حسونة من دغشا" بدري. ياخي يسعد صباحك الخليتنا فيهو من الصباح نطلب من التي بوي الهندى يسويلنا كباية شاي أبوكتيحا وأنا بمزمز فى كلامك الطاعم دا. ياخي يسعد صباحك الخليتنا فيهو نصدر فرمان لى أم أحمد بتجهيز العصيدة و ملاح الكرارة نفطر بيها بمناسبة زيارتك لى قنيفيطة. سالت الله و سيدنا محمد ,,, إنو يخلوك دايما" فى قلة شغلة عشان تدهشني أكتر و أكتر.
تحياتي
حيّاك الغمام يا قريبي صلاح الزبير . شاحد الله الكريم السعادة تبقالك هِدِم يا سيدي سِروال ؤُ نِعليّن، يا قول بِت ود خير .
عذراً قصدت امازحك شوية بأنك ما بتلقى نتيجة في النهاية ، تقبل اعتذاري الشديد
ويمكنك حذف المداخلة مع خالص شكري وتقديري لك
أها، شُفت يا يوسف ما قُتلك إنت زول سمح بالحيل، يا يوسف انا زول قرية والزول اللخو النضيف تب ما بغباهو . عارف كلآمك ممازحة لشخصي والأخ الفحل، ورديت عليهو بممازحة لك والفحل، وعنيت البيبقى علي عمرة من الفحل يا قول أهلنا، كزم حجر . أفو يا يوسف !، علي اليمين البساط بيني ؤُ بينك أحمدي من هنا لقِنيفِيّطة .
اوّعك تتلوّم يا يوسف أخوي ...
02-05-2016, 11:02 PM
جلالدونا جلالدونا
تاريخ التسجيل: 04-26-2014
مجموع المشاركات: 9389
تابعت بى شغف رحلة الايام الثلاثة قبل الهكرة... ياخى الوكت داك كت داير اقولك شغلك ده و الله ما بقل عن شغل عشناهو ايام الطفولة وذكريات مع مسلسلات اذاعية كاربة زى ناس الحراز و المطر , خطوبة سهير , كشك ناضية , الدهباية و قطر الهم وعم الزين وكيل سنطور و كتير و كتير من اعمال اذاعية عملاقة .... حقيقة الشغل ده ما هين و ابقى عشرة على الابداع ده
02-06-2016, 12:40 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: تابعت بى شغف رحلة الايام الثلاثة قبل الهكرة... ياخى الوكت داك كت داير اقولك شغلك ده و الله ما بقل عن شغل عشناهو ايام الطفولة وذكريات مع مسلسلات اذاعية كاربة زى ناس الحراز و المطر , خطوبة سهير , كشك ناضية , الدهباية و قطر الهم وعم الزين وكيل سنطور و كتير و كتير من اعمال اذاعية عملاقة .... حقيقة الشغل ده ما هين و ابقى عشرة على الابداع ده
تبالغ يا جلالدونا !، ياخي دا شغف ؤُ معاهو تركيز شديد جداً . تصدق انا إستدعيت الملك لأجل هذا الشأن والذي كان مثار إهتمامي لو لا التساب الذي غرّق قِنيفِيّطة، علي كُلٍ انا لآزم اضع الملك علي صفيح ساخن . الفترة ما كانت ساهلة بل كانت فترة إزدهار حقيقي للدراما الإذاعية وإتقدمت فيها أعمال ممتازة وبإمتياز شديد جداً لذلك لآزم نصل للحقيقة وبعدها سيكون هنالك إحتفال ضخم وتكريم كمان ...
02-06-2016, 06:02 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
Quote: لو لا التساب الذي غرّق قِنيفِيّطة، علي كُلٍ انا لآزم اضع الملك علي صفيح ساخن
ههههه لازما لازما يعني ؟ طلبك أوامر.. إلا عاين جاي قنيفيطة ما غرقانا الدميرة بتغسلا ؤ تحمّيها كل سنة.. إنت قايل التساب ما صديق للبيئة ؟ حرم كان ماتسابنا أرضنا ما كانت خدرة ؤ ولودة .. اسه في ضمتك وكت التساب جايس في الحلال كان ناس ود جبرين بياكلو معاها عيش؟ أهلنا قالو أكتر حاجة كانت زمان بتآذاهم القرنتية أمات ضرعات وارد بحر أبيض.. باين خزان بحر أبيض بواباتو صّقرن.. (أب كريق في اللجج ** سدر حبس الفجج.) هييع الجد جد .. أمرق جاي يا ود أخوي ؤ ما تلاوز بي.. سبوعين أنا أرش في الديوان ؤ خاتي ماعوني في رجاك.
02-10-2016, 10:04 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
إلا قول لي يا ملك بصراحة رايك شنو في دراما الإذاعة في عصرها الذهبي، في السبعينات ؟. في ذلك الوقت قُدمت أعمال جميلة جداً، أخونا جلالدونا ذكر بعضها، عليك الله ادنا رايك فيها بصورة عامة كمدخل لموضوعنا ...
02-10-2016, 11:50 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
اهااااااا ... يعنى الدعوة دى ما ساى الموضوع فيهو مزارراه مولانا فى قفص الاتهام ادوك حق الرد على كل المداخلات يلّه اكرب نصك كو كو كو محكمة ممثل الاتهام .. ممكن تستجوب المتهم ► بس يا مدير ورينا التهمة شنو ◄
02-10-2016, 08:31 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
Quote: لا قول لي يا ملك بصراحة رايك شنو في دراما الإذاعة في عصرهاالذهبي، في السبعينات ؟.
Quote: قطر مااااشوعمي الزين وكيل سنطوروزي ما الدنيا سكة طويلةمرة تعدي ومرة تهدي ومرة تدووور عمي الزين محكر في قطار الهم يشرّق يوم يغرّب يوم شههووور ودهوو
الأبيات للشاعر هاشم صديق والأداء للفنان أبو عركي البخيت.. والله يا ( أخي ) ود المدير (بعد اللذن من أهل الاختساس ) .. مع إنه ماني من أهل الاختساس العلمي والمهني في مجالات نقد الدراما.. إلا رأي ما بختلف عن رأيكم إتا وجلالدونا .. بس هاك دا كلام أخونا خطاب وهو زول متخصص .. في بوست قديم للأخ جمال السنوسي .. حيث كتب :
Quote: الاخ صاحب البوست وضيوفه الكرام .. اولاً جميل ان تعود الذاكره الى المسلسلالاذاعى والدراما الاذاعيه عموما التى بلغت مدارج عاليه فى معالجة قضاياانسانها السودانى من جوانبها المختلفه بل وسعت الى تثقيف مستمعها بربطه بالادب الافريقى العربى والعالمى . عموماً يطول الحديث ويتشعب حول هذا الامر اذا ما قورن بما يدور الان .. او الدراماالتلفزيونيه او السينما وحركة المسرح او الدراما عموماً
Quote: روعة الاداء وواقعية التناول لقضايا معاشية كانت أحد المحفزات لكي أحاول .. طبعا مع حماسة الشباب وطموحاتو آنذاك ..(جيتك في القاطرة مش )؟إتا ما تقول لي مقابلة بىكمراتا عشان استحمى واتريح واجيلك ؟
يا ملك الرآبط طلقني في صحراء العتمور، لا عرِفت اوّل لا عرِفت آخر !.
كل مافي الموضوع، محاولة لِسبر الأغوار، علي الأقل في هذا البوست ...
02-11-2016, 11:23 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: إلا عاين جاي قنيفيطة ما غرقانا الدميرة بتغسلا ؤ تحمّيها كل سنة.. إنت قايل التساب ما صديق للبيئة ؟ حرم كان ماتسابنا أرضنا ما كانت خدرة ؤ ولودة .. اسه في ضمتك وكت التساب جايس في الحلال كان ناس ود جبرين بياكلو معاها عيش؟ أهلنا قالو أكتر حاجة كانت زمان بتآذاهم القرنتية أمات ضرعات وارد بحر أبيض.. باين خزان بحر أبيض بواباتو صّقرن.. (أب كريق في اللجج ** سدر حبس الفجج.) هييع الجد جد .. أمرق جاي يا ود أخوي ؤ ما تلاوز بي.. سبوعين أنا أرش في الديوان ؤ خاتي ماعوني في رجاك.
والله يا ملك الجزءية دي محفزة لنضمي كتير عن زمن التسآب لآمن اللتبراوي يدفر النيل بسدرو عند المقرن في اتبرا ؤُ من هناك يكسحن شمال بسرعة جنونية في منظر خرافي، كنت بحكيلك عنو وبحدسك عن (الطوآفة) ومعاناتهم لآمن الموج الهادر يفرتك الطوف خشبة خشبة عِلآ هسّع شاغلني غردي ...
02-11-2016, 03:51 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
Quote: والله يا ملك الجزءية دي محفزة لنضمي كتير عن زمن التسآب لآمن اللتبراوي يدفر النيل بسدرو عند المقرن في اتبرا ؤُ من هناك يكسحن شمال بسرعة جنونية في منظر خرافي، كنت بحكيلك عنو وبحدسك عن (الطوآفة) ومعاناتهم لآمن الموج الهادر يفرتك الطوف خشبة خشبة عِلآ هسّع شاغلني غردي
مقضي بإذن واحد أحد .. إلا نضمك دا ما بنفات ؤ لازما نرجا .. وحات الخوة أهن داك أنا شايف الزول مكفكف هديماتو رابطن في وسطو .. يحاوي بمقدافو في الحطب الجارفو الاتبراوي .. إلا عقرب الطوف الله لا وراك بكان قرصتا المنعولة.
02-12-2016, 10:47 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
تودي وين ؟ أيييييييييييه يا صاحبي .. إن كنت تعني احياء المحتوى من الذاكرة .. فتلك سنوات التبدت فوق بعضها .. لو نفشتها الذاكرة فسوف تجد أن ما انسرب وغاب منها هو الأكثر.. تصدق حتى ( درافت المحتوي) الذي ظللت أحفظة حتى بدايات الثمانينيات.. أخذه صديق أديب يعمل بالمحاماة عندما كنت أعمل بكسلا ولم استرده منه.. لكين .. خليني احكيلك كيف ؤ بتيين بديت وكيف تسرب العمل من بين أصابعي .. محتوى المظروف بديتو وأنا طالب في المرحلة الثانوية .. في واحدة من العطلات الصيفية .. كنت وقتها في السنة قبل النهائية .. ثم أصابه الإهمال في السنة النهائية وما فيها من تفاعلات امتحان الشهادة السودانية .. الغريب لم انفض عنه غبار الاهمال سوي في السنة الثانية الجامعية .. بدأت بتنقيح ما كتبته واستمر البناء ( سريقة ورا سريقة ) .. كنت أعنون العمل باسم ( بت ود شيخنا ) .. صديقي وزميل دراستي المستشار عبد الحكم .. كان وحده الذي يتابع معي كل خطوات الكتابة وهو الذي اقترح تعديل العنوان فاستجبت له.. إذا مذكر انتخابات 2010 .. كان هو أحد المرشحين في انتخابات الولاة في الولاية الشمالية عن الحزب الاتحادي الديمقراطي .. تقريبا اكتمل العمل وأنا في تالته جامعة .. وانتقلت لمرحلة مراجعتو واستقصاء رأي الأصدقاء .. حبب إلي أحدهم أن أسعي لنشر العمل بمجلة الشباب .. وقد مهد لي طريقة لمقابلة أحد قادة التحرير في منزله .. فعلا قابلته وعرضت عليه العمل ووعد بالاطلاع و نشره إن كان ذلك يوافق سياسة المجلة.. حتى الآن لا أعرف إن بدأ تسريب العمل من هنا أم في المرحلة التي تلتها.. أصبر لي جايك.
02-13-2016, 04:13 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
طبعا المجلة لم تنشر شيء .. بدأت وقتها أساهم ببعض الكتابات أو بالأصح المقالات في الصحف السيارة .. بس أكتر شيء حفزني على إرسال المظروف لقسم الدراما بالإذاعة .. المسلسلات اللذاعة القلتوها .. بالإضافة لمحاولة شعرية بعثت بها لبرنامج الشباب بالتلفزيون .. كا ن بقدمو الاستاذ الأديب محمد يوسف موسى . والغريبة كان شرطي يتم الإلقاء بواسطة الإذاعي الضخم عبد الكريم قباني .. يومها لم تسعني الدنيا وأنا أشاهد وأسمع الأستاذ العلم يصدح بأبياتي بصوته الفخم والقائه المموسق الفريد .. أظني كتبت عن الموضوع ده هنا قبل كده.. تصدق برضو حتة الشعر دي ما واظبت عليها عشان تمشي معاي قدام.. كنت عندي كراسة من زمن المدرسة الوسطى بسجل فيها قصائدي .. أخر قصيدة فيها ألقيتها في حفل وداع الدفعة في المدرسة الثانوية.. وكانت الخاتمة تلك التي قدمها الاستاذ محمد يوسف في البرنامج المذكور.. إن سألتني يمين الله ما متذكر منها ولا بيت .. ما تمش بعيد انت فتحت في الذاكرة ثقب قديم .. أرجاني لامن أجمع واجيك صادي. :
02-13-2016, 06:18 PM
جلالدونا جلالدونا
تاريخ التسجيل: 04-26-2014
مجموع المشاركات: 9389
متل ما حكيتلك وقتها راودتني فكرة إرسال المظروف لقسم الدراما .. بس أنا زول أقاليم لا بعرف ناس اللذاعة ولاني من ولاد أمدر المفتحين .. كل البعرفو لمن أمشى المسرح القومي عشان اتفرج مسرحيات هاشم صديق ( نبته حبيبتي ).. ؤ فضيلي جماع ( المهدي في ضواحي الخرطوم ) .. كنت بشوف مبني من طابقين مطل على النيل.. بسمعم بقولو دا بكان التلفزيون ؤ حوش اللذاعة من وراه.. قلت يا ولد مافي سكة غير البوسطة .. جبت لي ظرف ماكن جنس الظروف الكرتونية ديك .. حشرت فيهو الورق ؤ كتبت (الإذاعة السودانية قسم الدراما ) .. الأستاذ ./ صلاح الدين الفاضل .. تجده بخير.. قصرت ؟ قلت ياولد أحسن شيء عشان الموضوع ما يلف ؤ يدور كتير .. امشي أرميهو من بوسطة أمدرمان .. اصلها قريبة للاذاعة .. لصقت ليك كم طابعة ؤ هاك يا صندوق البوسطة .. لحد هنى كويس .. أصبر لا تستعجل سؤالاتك خلني اللكمل .
02-14-2016, 12:03 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
ناس قسم الدراما ديل وصلم المظروف ما وصلم العلم عند رب العباد .. اتخرجت واشتغلت في الخرتوم .. مافي مسرحية ما صنيت لها ؤ ختيت أضاني .. يا جماعة الحكاية شنو ؟ طبعا براك خابر في بيئة متل بيئتنا الريفية ديك .. أي عمل حواراتو ؤ بكانو ؤ شخوصو ما بفوتو اللربعة ديل أو بعضهم.. سيد الدكان والفكي واللنداية ؤ شيخ الحلة أو العمدة .. كده ولّ لا ؟ إلا باين ليّ الزويل الوقع في أيدو النص نجيض وحريف يا ود عمي .. قصقص كل النضم الروائي البدور حول العقدة والحشو لزوم زيادة الورق.. ؤ لملم كل الحوارات الدارت في النص وجمعن في بكان واحد.. اللحداث والبكان والاشحاص و النضم ركب منهم موضوع المسلسل.. أيوه الشغل نزل باسمو يعني حيجيب اسمي بعد السواهو !! الزمن داك يا ود المدير لا في مصنفات لا حقوق مؤلف ولا الله قال.. باللضافة الزول باينلي واصل في البكانات ديك .. كمان أخوك شبكلو في وظيفتن ما بتسمح بالمقابضة ساكت كده .. هههه .. ذكرتني زميلا لينا كان يجينا مارق عقب كل جلسة محكمة كاضم ؤ زعلان .. يازول مالك ؟ ياخي القضا دا شغلة ما تخارج مع نوعنا ده .. ليه الحاصل شنو يالخو ؟ ياخي دي شغلة تعلمك الجبن .. ؤ نحن ناس خلا ساكت عندنا فراسة وعينا نجيضة .. كيف يعني؟ الواحد شايف الكضب يبق من عوينات المتقاضي ؤ مابقدر اقول بغم عشان مافي دليل مادي .. قتلو هوي يا بتاع الخلا .. بقولو أنتو وارثين كتير من صفات جمالكم .. دحين اعمل حسابك ؤ شد عليك الرسن .. عاد ابقى في جنس دا يا ود المدير ؟ نهايتو .. شوفلك بصلات أقرشن .. كان مافي شوفلك قرضة لامن أجيك. <<<
02-14-2016, 04:19 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
هي داب زرزرة يا ود أخوي ؟ كمان سويتلها خيط براه؟ كان من اللول ياخي .. أخ ـ يا بطنننني.. مسكين ( ود البصير ) ضيع شهادة ميلاده ؤ بقى على التبني .. كان خاتين بالكم يا ود المدير ؤ جلالدونا .. قطع شك تبنتو الميس ..
خلاص سيبوني أردد مع التيجاني سعيد .. زمان الفرقة والتسهيد بسيبو بسيبو عشان تشيلو الريح بسيبو عشان صحيح الذكرى بتوه عمرنا صحيح التجلة للشاعر الرقيق التيجاني سعيد والرحمة لامبراطور الطرب المرحوم وردي.. غايتو حكاية أبدالي شيء ؤ ما أوصلو آخره ما جديدة عليّ .. مش بقولو ( الجفلن خلهن أقرع الواقفات ) ؟ الله يستر على الواقفات .. مشكور يلخّوي على البحّيت.. إلا بحيتك وقع فوق اللضان بعد طرشت .. الله يديك العافية.
02-14-2016, 04:23 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
Quote: رغم ان الاذاعة بدات منذ الاربعينات من القرن الماضى لكن المسلسل الاذاعى كان له ان ياتى متاخرا جاء بعد تعثرات كثيرة شابت دخوله فلقد بدا من خلال "التمثيليات " القصيرة ومدخلها كان مسرح البراميل الذى كان على قمته الراحل الفاضل سعيد فى الخمسينات ومشاركة الراحل ايضا عثمان حميدة تور الجر وعثمان احمد حمدودابدليبة ومحمود سراج ينبغى التنويه الى ان "عثمان حميدة "كانت له ادواره فى السينما فى الخمسينات ايضا فى الستينات كان القدح المعلى للكتاب محمد طاهر ، احمدقبانى عليه الرحمة ممثلا ومخرجا وكاتبا دراميا ثم كان ان دخل الى المعترك الفنان الكاتب حمدنا الله عبدالقادر الذى كان له الباع الطويل فى امر الدراما الاذاعية ولعل اشهر مسلسلاته "خطوبة سهير " بطولة مكى سنادة ، تحية زروق ، امينة عبد الرحيم ، يحى الحاج ، هاشم صديق فتحى بركية"السميح" عليه الرحمة ثم كان ان توالت النصوص الدرامية وتجئ "قطر الهم"كواحدة من ابرز محطات الكتابة الدرامية لكاتبها هاشم صديق ومخرجها محمود يس الذى كان عائدا من دراساته فى القاهرة ليخلق جوا من التنافس فى امر الاخراج الاذاعى ثم دخل الى المعترك فى السبعينات الكاتب صلاح حسن احمد بعبقريته الفذة اعنى النص"موسى ود السرور" من اخراج صلاح الدين الفاضل وبطولة محمد خيرى احمد وتوالت النصوص والتجارب الدرامية خاصة لهاشم صديق "الحراز والمطر" لايفوتنى ان اذكر ان من الممثلين فى تلك الحقبة الفنانون "ابراهيم حجازى ، محمد رضا حسين، اسماعيل خورشيد، اسماعيل طه احمد قبانى ، حسن عبد المجيد،ابوالعباس محمد طاهر ،عبد الوهاب الجعفرى ، هاشم صديق،مكى سنادة عثمان حميدة،الهادى صديق عوض صديق،يسن عبدالقادر ، عيسى تيراب، السر قدور"وغيرهم ولابدمن التنويه الى ان الفتيات كان لايذكر اسم الواحدة بل يقال ان"شارك بالتمثيل عدد من الانسات"ومنهن سكينة عربى ،عزيزة درويش،بلقيس عوض، نعمات حماد ، سهام المغربى، سنية المغربى ، تحية زروق، اسيا ـ ام ايهاب،امينة عبد الرحيم منى عبدالرحيم ، فايزة عمسيب ، فتحية محمد احمد ،زكية محمد عبدالله، رابحة محمد محمود، نفيسة محمد محمود، سميةعبداللطيف،نادية جابر، نادية احمد بابكر،سامية عمر، سعاد محمد الحسن ، سوسن دفع الله " وغيرهن من اللاتى قبضن على جمر التمثيل فى تلك الفترة والفترات اللاحقة ثم جاء جيل جديد من الكتاب "محمد خوجلى مصطفى ، فضيلى جماع ، محمد الحسن دكتور، على البدوى المبارك ،عزالدين هلالى "وغيرهم عديدون ولان المسلسل الاذاعى فرض وجوده على المستمع ظل واحدا من اعمدة الدراما الاذاعية بل الدراما بشكل عام من المخرجين بالاضافة الى محمود يسن وصلاح الدين الفاضل جاء كمال عبادى ، خطاب حسن احمد، احمد البشير دفع الله"حريكة" ومن المخرجات فايزة موسى وعفاف الصادق حمد النيل ولاحقا زكية محمد عبدالله ، سوسن دفع الله ، انعام عبد الله ، وكاتبة هذه السطور،
غايتو يا ملك عليك جنس نبل اخلاق يعنى وانتا تعتلى منصة القضاء ما حاولت تفتش عن حقك و على الاقل الجانب الادبى فيهو مع انو الامر محصور فى شخصين صديقك المعاهو نسخة من العمل و صلاح الدين الفاضل بالنسبة لى صديقك انت اولى و ادرى به و من السرد جانى احساس انو بعيد من الحتة دى اما بالنسبة لى مظروف الاذاعة , بالتاكيد المظروف وصل .. و عليه ينبغى توجيه سؤال كبير للاستاذ صلاح الدين الفاضل لاستجلاء الامر كمان يا ملك انو حسك القانونى غلب فى سرد الواقعة و عدم تحديد تحديد تاريخ لها جهجه باكاتنا حتى فى التخمين خاصة و السبعينيات كانت عامرة بالانتاج المسرحى الاذاعى ____ غشانى يا عمده و قال لى بعرسك .... فى ظنى دى بت من بنات افكارك
02-18-2016, 11:50 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: سلامات ياريت لو تسجل السرد بتاعك دا تسجيل صوتي مع مؤثرات وإخراج وخلافه
للتوثيق قبل كل شي جاي علي السودان أجيال مفطومة بجبنة لافاش كيري
سلآمات أخي تبلدي .
سأحاول إن شاء الله . لك مني الشكر الجزيل علي لفت إنتباهي، فنحن لا نتعاطى مثل هذه الثقافة، علماً بأنه الحكايات القصيرة اصبحت تُقرأ في تجمعات كتلك التي تُعقد لإلقاء الشعر .
مودتي ...
02-19-2016, 11:44 AM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
هسه بالله وآمين فكيت رقيبتي من قبضة ود المدير .. أها عقال جلالدونا ده البفكني منو شنو ؟
Quote: كمان يا ملك انو حسك القانونى غلب فى سرد الواقعة و عدم تحديد تحديد تاريخ لها
يا جلال إن ما خايف الكضب وقت الوقائع دي انت لسه في اللبتدائي .. يعنى أواسط السبعيان وقتها انا ذاتي لسه طالب .. أما المسلسل فظهر بعد داك تقريبا قريب أواخر السبعينات .. عارف يا جلال الشيء وكت ما يبقى حقك ما بتقدر تتحاوم في مجالو كتير .. هسه شوف ناس حمد نالله عبد القادر وهاشم صديق وفضيلي عملو كمين مسلسل ورواية وشعر .. لإنو دي موهبتهم ما جالبنها .. المنتج لما يبقى بيضة ديك أعرفو فاسد .. الزويل بعد المسلسل ده تاني يخربو .. أما مسالة الحقوق على الرغم من كونها ما كانت على البال وقتها .. لكين حتى بعد قننوها الآن برضو النضم لسه داير حول التعريفات وحدودها.. هسه د. مصطفى مدثر بجدعلو في مقدمات ممكن يطلع منها بنظرية تهدم مسألة الحقوق دي .. مقدماتو دي كان ما طاش فهمي ليها .. بتقول مافي مطر بلا سحاب .. ؤ مافي بناء بلا طوب .. يعني ممكن تشيلك طوبة من قصر قديم وتبني عليها قصرك وتكتب بالبنط العريض ( فيلا جلال ) .. أها إلا يجي زول شرباش ؤ قراي عندو حس البحث الأثري أو فراسة قص الأتر .. يمرقلك الطوبة ؤ يقول لا الطوبة دي من قصر فلان الفلاني .. بالمناسبة نظرة اخونا مصطفى دي.. متماهية تماما مع النظرية الكلية لعمليات البناء والتجديد و (الري سايكلنق ) الكونية.. بباسطة مافي شيء سوا كان فكري أو مادي بجي من عدم.. سرحت بيك ؤ قديتك مش؟. مشكور على المؤازرة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
عزالدين عباس الفحل
عثمان عووضة
يوسف الطيب احمد إدريس
محمد على طه الملك
محمد حمزة الحسين
علي الكرار هاشم
Salah Zubeir
MOHAMMED ELSHEIKH
جلالدونا
Hassan Makkawi
فيس بوك
تويتر
انستقرام
يوتيوب
بنتيريست