أولا بعد ( إذن ) ود البشرى ...ده موضوع ما عنده أي موضوع ...
مجرد خواطر تدور في البال ... او حالات عشناها ...
عندي عادة غريبة ... كل ما أقرأ موضوع او اسمع اغنية او قصيدة ...
أتذكر شيء من الماضي الجميل ...
اليوم كنت بسمع في قصيدة لكامل عبد الماجد ...
قال فيما قال ...
يا سلام انا من زمنّا الكان ينابيع من سرور ... كانت الحاجات عديلة ... لا زيف لا قشور ... الطيور كانت طيور و العطور كانت عطور ______________________________ حالة رقم واحد :
اوضتين و صالة ... ده لو محظوظ يكون بيتكم !!!
و رفين في ضلفة دولاب مع اخوانك ... لو امك داعية ليك ...
و لو ما داعية ليك ممكن تنتهي بي مسمارين في حيطة تعلق فيهن هديماتك ...
اوضتنا نحن الأولاد كان سقفها عالي زي 5 امتار على الأقل ...
السقف عقِد ... و الشباك ارتفاعه مترين و زيادة ... و قدامها برنده ...
مروحة سقف تلاتة ريش معلقة بي فتله خفيفة في المرق الأوسط في السقف ...
نمرة واحد و اتنين ... فترانين و يا الله المروحة تلف ...
نمرة اربعه و خمسة ... مع تركيب المروحة ( المفتول ) ... تقرب تطير و تشيل معاها العقد ... ( وورق الكشاتين في مرحلة متقدمه كده )
كان الاعتماد الكلي على نمرة تلاتة ...
نمرة تلاتة ... هوا انسيابي ... سرعة معقولة ... تطرد الضبان نهاراً و البعوض ليلاً ...
مع نمرة تلاتة نومك هادي ...
المفتاح كان عبارة عن علبة مدورة ضخمة جدا لونها اسود و المفتاح زي مفتاح الخلاط ...
و شغال بي رمّانة ... لما تحركه ... يطقطق معاك ..
من كتر ما ختينا المروحة على نمرة تلاتة ...
باقي النمر عضت ... عشان تصل لي نمرة تلاتة الا تكون عضلاتك معاك ...
من كتر النتِل ... جانا يوم و المفتاح بقى يفط نمرة تلاتة ...
الا تكون حريف شديد ... تحرك المفتاح بي فن بعد نمرة اتنين و عينك في السقف و معاك عود كبريت ...
اول ما يهبش محل نمرة تلاتة القديم ... تمسك اعصابك و تحشر عود الكبريت ورا المفتاح ... و تقرط على كده ...
عشنا سنين في تلك الغرفة ...
حشرنا ورا المفتاح الف عود و عود كبريت ...
ضحكاتنا تفضح سعادتنا بحياتنا البسيطة ... و يفوت يوم ... و تفوت ناس ...
و نمرة تلاتة ما زالت فاطة ...
05-23-2016, 05:38 AM
Hani Arabi Mohamed
Hani Arabi Mohamed
تاريخ التسجيل: 06-25-2005
مجموع المشاركات: 3515
با سلام يا صاحب ياخ !! ما قاعدة تعمل سييييك سييييك وهي شغالة ولا قول مروحتنا عملنا ليها مفتاح نور . نمرة واحدة بس .. والمفتاح زاتو باظ بقن سلكين برة . ودايرات حرفنة تشبكن مع بعض سبحان الله نمرة تلاتة كانت سريعة زمان .. هسة نمرة خمسة ضعيفة وكل مرة تمشي تشوفها .. تشك فيها من ضعف سرعتها
05-23-2016, 02:25 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: با سلام يا صاحب ياخ !! ما قاعدة تعمل سييييك سييييك وهي شغالة ولا قول مروحتنا عملنا ليها مفتاح نور . نمرة واحدة بس .. والمفتاح زاتو باظ بقن سلكين برة . ودايرات حرفنة تشبكن مع بعض سبحان الله نمرة تلاتة كانت سريعة زمان .. هسة نمرة خمسة ضعيفة وكل مرة تمشي تشوفها .. تشك فيها من ضعف سرعتها
زمان يا صديقي ... قال تاني فيهو كامل عبد الماجد ...
مجتمع كان من بساطة و احترام لا تطاول لا تعادي لا ملام تبدا يومك بي حبابك و تنهيهو بي مرحب سلام و كل زول حايم اخوكا و ان ختيت و يوم غلطت .. في الكبار البزجروكا و المعلم كان ابوكا كنا نحترمه و نجله كانت الناس بي سلوكها كان صحابك في المدارس طول حياتهم يذكروكا لما تطلع فوق تشيلهم ... و لما يطلعوا يرفعوكا كنت تشتاق للحبايب و لما تبعد يشتهوكا و القطر كان ستة شوكا نضبط الساعات عليهو و الزمن ما فوضى روكا بيهو للحبان نسافر و لا هم حلوين يجوكا
_________________________________
تعرف يا صديقي ...
كم سر كتبته و كم قلب رسمتو في حيطة الاوضة ديك في الليل بي قلم الرصاص ... و محيتو مع طلعة النهر ...؟
05-23-2016, 02:10 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
نمرة تلاتة ،،لغاية ما الواحد قلبو قال شح ، يا قباني،، ناس كامل الاحمدي ،، وحسين محمد حسن ، وخدعوك ،،وَعَبَد الحميد يوسف - وغضبك جميل زي بسمتك - و ( المولد)، الاول - ،،وركُز في المولد - دي-!! لكن كُلها،، في النهاية -مراوح ،،، مراوح ،،تديك هواء نقي- ،، ومراوح،، تمنحك ،،هوي مُنعش،، وتنتعش - وتتكهربّ،، وللاسف ،،تذكرت أمس مقطع ،، لي نافع ،،،قال إنّو الناس ،،،قبل الإنقاذ ما عندهم كهرباء!! وسرحت في ،،كاترينا،، والخرطوم بالليل،، والسليماني ، وزكي ،،والزيبق ، وَقُلْت كما يقول، أُستاذنا ود - المـرتضي :- مخيرٌ الله،،،
05-23-2016, 05:12 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: يا لها من ضحكات .. ويا لها من سعأدة................. هل قلت لك من قبل بأن كتابتك تلك التي بشوك البنفسج تلامس فينا دوماً شيئاً من حتى.. واصل بالله عليك .. فقد زالت كثيراً من طبقات الصدأ .. فعثرنا على بعض ما ضاع منا.. مودتي
نصر الدين يا صديقي ...
كتابات تخرج بين الحين و الآخر ... تخرج من جرح قديم تنكأه بعض الكتابات او المواقف الأخرى ...
هو كامل عبد الماجد ... قال ما قال ... ف ( هيجتنى الذكرى ) كما قال عبد الرحمن الريح ...
نواصل ان شاء الله بعد الرد على الناس الرائعة الشرفت البوست بي مرورها ...
05-24-2016, 00:17 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: نمرة تلاتة ،،لغاية ما الواحد قلبو قال شح ، يا قباني،، ناس كامل الاحمدي ،، وحسين محمد حسن ، وخدعوك ،،وَعَبَد الحميد يوسف - وغضبك جميل زي بسمتك - و ( المولد)، الاول - ،،وركُز في المولد - دي-!! لكن كُلها،، في النهاية -مراوح ،،، مراوح ،،تديك هواء نقي- ،، ومراوح،، تمنحك ،،هوي مُنعش،، وتنتعش - وتتكهربّ،، وللاسف ،،تذكرت أمس مقطع ،، لي نافع ،،،قال إنّو الناس ،،،قبل الإنقاذ ما عندهم كهرباء!! وسرحت في ،،كاترينا،، والخرطوم بالليل،، والسليماني ، وزكي ،،والزيبق ، وَقُلْت كما يقول، أُستاذنا ود - المـرتضي :- مخيرٌ الله،،،
و نسمة هوا يا بلال ... و انت قاعد في طرف عنقريب قدام دكان عمك احمد سعد في ودنوباوي
راجي صحن الفول العجيب ... و حولك اترابك و اصحابك ...
ليالي الخرطوم و ام در و بحري ... أيام محفورة في الذاكرة ...
05-23-2016, 08:22 AM
عمر أبوعاقلة
عمر أبوعاقلة
تاريخ التسجيل: 04-11-2016
مجموع المشاركات: 1321
😂😂👌 ذكرتني حوشنا في ودارو الواحد عايش اوانطة محل ماتمسي ترسي اول سرير يقابلك تنوم فيهو. تصحي الصباح رباح تغيب من البيت تلاتة يوم زول يجيب خبرك مافي اتذكر عندنا صاحبا لينا ابوهو اتوفي في الابيض المربع التاني اها قمنا مشينا ركبنا طوالي ولا كلمنا زول ولاشي اها جيت خاشي البيت بعد تلاتة يوم الجماعة قالوا لي وين انت اليومين ديل بايت مع خالتك ولا شنو😂😁 هسي موبايلك لو قفل بطارية حدك المغرب يمشوا يكوسوا ليك في الاقسام وما بعيد يمشوا المشرحة ايام لها ايقاع
05-23-2016, 10:24 AM
munswor almophtah
munswor almophtah
تاريخ التسجيل: 12-02-2004
مجموع المشاركات: 19368
عضم رواية مكتمل، ناقص بس تكسوها لحما أهم حاجة إنو الكتابة ادت الغرض وهو الإمتاع انت قايل الرواية شنو يا قباني؟! ياها بيت الكلاوي، الباقي أكاديميات ساكت. كتابة يا قبة، يشهد الله، أمشي وأجيها راجع لو محلك بقرّض على كدا والشباب ما قصروا، تمّوا باقي الحلة
05-24-2016, 00:32 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: ذكرتني حوشنا في ودارو الواحد عايش اوانطة محل ماتمسي ترسي اول سرير يقابلك تنوم فيهو. تصحي الصباح رباح تغيب من البيت تلاتة يوم زول يجيب خبرك مافي اتذكر عندنا صاحبا لينا ابوهو اتوفي في الابيض المربع التاني اها قمنا مشينا ركبنا طوالي ولا كلمنا زول ولاشي اها جيت خاشي البيت بعد تلاتة يوم الجماعة قالوا لي وين انت اليومين ديل بايت مع خالتك ولا شنو😂😁 هسي موبايلك لو قفل بطارية حدك المغرب يمشوا يكوسوا ليك في الاقسام وما بعيد يمشوا المشرحة ايام لها ايقاع
الدنيا كانت امان يا الصادق ...
و ان غبت عارفنك وين ...و وين ما كنت هم اهلك و صحابك ...
الزمن اتغير ... و بقى حاميها حراميها يا صديقي ...
05-24-2016, 00:36 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: عضم رواية مكتمل، ناقص بس تكسوها لحما أهم حاجة إنو الكتابة ادت الغرض وهو الإمتاع انت قايل الرواية شنو يا قباني؟! ياها بيت الكلاوي، الباقي أكاديميات ساكت. كتابة يا قبة، يشهد الله، أمشي وأجيها راجع لو محلك بقرّض على كدا والشباب ما قصروا، تمّوا باقي الحلة
و الله مقرَض من اول ما كتبت كلامي ...
لكنك عصرت علي شديد بكلامك السمح ...
ياخي الواحد راسه مزحومة بي كلام خارم بارم كتير ... مرة مرة بجي مارق زي ده ...
و شوقنا ليك نعمل فوقه شنو طيب ؟
05-23-2016, 01:35 PM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20360
هههه والله يا مجيدو كلامك صاح، قبة دا متبرجز ساكت نحن الزمن داك، بداية السبعينات، كنا ننتظر النسمة ونقول مع أمهاتنا: هبوبك يا الله قال كوتشينه قال ؤ نجيب الغدا ولّ شوية ؟!
05-24-2016, 01:04 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: هههه والله يا مجيدو كلامك صاح، قبة دا متبرجز ساكت نحن الزمن داك، بداية السبعينات، كنا ننتظر النسمة ونقول مع أمهاتنا: هبوبك يا الله قال كوتشينه قال ؤ نجيب الغدا ولّ شوية ؟!
بمناسبة الغدا دي يا مِعا ...
سكنا عذابة فترة في الخرطوم أيام إضرابات الجامعة و كنا لسة طلبة ...
انا و جلال صالح و حمدتو و معتصم حسن حمد و ود كوستي سامي حجازي محمد صالح ...
سامي كان عليهو الغدا كل يوم و انا و جلال علينا العشا ... و البقية عليهم تجهيز الكشاتين...
صاحبك سامي كان يجي شايل صينية الغدا و انحنا نايمين نومة الضحوية الجميلة ديك ...
يقوم يكورك لينا بي صوت عالي ... قوموا يا ( افندية ) غداكم جاهز ...
05-24-2016, 11:45 AM
almulaomar
almulaomar
تاريخ التسجيل: 07-08-2002
مجموع المشاركات: 6485
المروحة فعلا كانت ترف ذات يوم شأنها شأن التلفزيون والتلاجة ولم تعد كذلك بعد أن عرفت مدننا المول والركشة والمسكول ، وما أستغرب له أنني بعد غياب عن الديار لفترة إمتدت حيناً من الدهر وعدت والعود قال طق وليس أحمد ، لقيت المراوح كلها لافه بسرعة الضوء في سقف بيتنا وجميع بيوت الحلة من نفس الطبقة أم بناياً قش "التحية للزميل جلال إبن داؤود" أها الحتة دي ما لاقي ليها تفسير لغاية الآن فصوت المروحة إبتداء بيوجع راسي الماااكن دا خاصة بعد أن أصابه الصلع إصابة مباشرة ، تاني هام الهوا بيؤذي سمعي وبصري ونخرتي سواء بسواء ، والقصة دي ليست حكراً على بيوتنا بل ممتدة حتى في الدوائر الحكومية فلو غلطت وفكيت الورقة من إيدك إلا تجيبها من ناصية المكتب ولو كان الموظف في برنده أو بارتشن أها إلا تستعين بنسر أو صقر صيد لإستعادة المستند ، وزي ماقال المعلق المصري منفعلاً هاتها من الشبكة بعد أن ولج مرمي كوت ديفوار هدف من قدم أبو تريكه في بطولة أمم أفريقيا. أها من مضار المروحة كمان أنها مرات بتجهجه الزول اللابس عراقي تخلي أباطو والنجم زي ما بيقولو تمسك بي جاي تجيك بي هناك زي حيلة الثعلب مع الكركي في تلكم القصة إذا أتاك الهواء عن يمينك أين تجعل رأسك. ونحمد للإسترتش ذلكم البنطال الضيق أنه واحد من مضادات مراوح السقف المروحة في تقديري فقدت غاياتها أو كادت أن تفعل فهي لا تطير الضبان كمان كان ولا تهش الباعوض ولا بيت العنكبوت حتى وهو كما تعلمون أوهي البيوت. وهي فوق هذا وذلك تجهجه هواء مكيفات الموية على علاته ولا يستطيع (الشخص المراوح) أي القاعد تحت المروحة من تف السفة إلا بعد أن يعمل ساتر والحال كذلك هي من أكثر المجهجهين لنار الشيشة والبخور سواء بسواء. المروحة ما أنفكت تمثل لي رعباً حقيقياً فهي مربوطة بسلك 2 ملي في أحسن الأول وتهتز وغير ثابته ويخيل إليك من إهتزازها أن سوف تسقط في التو على صنقور الجالسين حولها وقد تسبب بالضرورة أذي جسيم للجالس أو الشخص المراوح ما لم يعتمر خوذة على نافوخه كوسيلة من وسائل السلامة. صديقي اللدود عماد كنش قال فض فوه وفوه اللي خلفوه "أن معظم اشعار أغاني الحقيبة كتبت تحت مروحة وإستدل على ذلك بأن الشاعر يبدأ بوصف الحسناء بكلام مفهوم ومعبر ليصل إلي أغوار بحسب كلامه أيضاً يبد فيها بالهمهمة مردداً يا ليلة هوي هوي هوي هوي ، ودقي يا مزيكا.
05-25-2016, 07:08 AM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20360
نسيت الراديو في الشباك ونص النهار صوت الكاشف أو عثمان حسين يكملوا الصورة. _______
المراوح في الدواوين الحكومية: عملت فترة من الفترات في إحدى الدواوين الحكومية، وكان مكتب كبيرة به عدد من الطاولات مرصوصة حول جدران المكتب والمنطقة في الوسط خالية لتنقل المراجعين والموظفين بين المكاتب المرصوصة. في السقف هناك مروحتين تعملان لتوزيع الهواء في كل المكتب تفصلهما عن بعض مسافة محسوبة. إحدى الموظفات في مكتب مجاور تأتي لهذا المكتب عدة مرات في اليوم - حسب متطلبات عملها - لموظف يجلس في نهاية المكتب. هذه الموظفة تلبس (موضة) ... عبارة عن بلوزة واسكيرت واااسع. في نقطة معينة في وسط المكتب يلتقي تيار المروحتين ويصطدمان ويصعدان إلى أعلى. هذه الموظفة إن لم تنتبه وتمسك الأسكيرت بيديها، لأصبح كما الشراب حين تخلعه من قدمك فيخرج مقلوباً.
05-25-2016, 08:30 AM
almulaomar
almulaomar
تاريخ التسجيل: 07-08-2002
مجموع المشاركات: 6485
هههههها أبو العزائم أبو الريش مودتي إنت في البداية قول لي بتشتري الفول من وين كمية وجوه ضاحكه دي بتذكرني قاعدة الساكنين في قواعد اللغة إذا التقى ساكنان فيتم التخلص من أولهما؛ إما حذفا أو بتحريك أحدهما بالحركات إن كان الساكن صحيحا. من ناحية أخرى هي تشابه في الواقع حالت المراسلين لمحطات التلفزة المختلفة في يوم عاصف فيه إعصار أو تأدباً windy day وهو ما يشبه عندنا الهبوب المبرومة التي تهب ولا تبقي ولا تذر في طريقها وتعرف في بعض أمصارنا بإيه كده ما عارف إبليس. غايتو شفت لي مراسله تلفزيونية كده من النوع البلبس جكسا في خط ما في وقومي يا هبوب هبي والله جهجت النشرة وجهجهت البرنامج وجهجهت الدش زاتو لا عرفت تمسك المكرفون لا الإسكيرت وخلتها كما وصفت تماما شراب من غير إستك كمان ومقلوب قلبة عدوك.
05-25-2016, 09:00 AM
مني عمسيب
مني عمسيب
تاريخ التسجيل: 08-22-2012
مجموع المشاركات: 15691
رجعتنا لأزمان سحيقة كتابة بسيطة وغنية في آن توصف وتشف محملة بأدب الفكاهة الجميل
أهم حاجة أنا أطمأنيت إنني لست من جيلك بعد قراءتي لهذه الجملة
Quote: زمن تودي هدومك الغسال ... يلقى في جيبك طرادة مطبقة ولا ريال ... ما ينوم الا لامن يرجهن ليك ...
لأنه مرة وديت هدومي الغسال وكان فيها بنطلون جنز أسود جديد كنت عشمان أقشر بيه في العيد الصغير تصور لقيت بدلا عنه بنطلوب أكل عليه المكوة وشربت
تسلم اخي العزيز ( و لا نقول الابن ههه ) ...
تسلم يا خي علي طيب الكلمات و جزيل الاطراء ...
هي حياه عشناها ... و ذكريات مليئة بالجمال و البساطة ...
بين الحين و الآخر ... تخرج دون ان افكر في ترتيب كلماتها ...
ذكريات من زمن قال عنه كامل عبد الماجد كما اسلفت :
تبدا يومك بي حبابك و تنهيهو بي مرحب سلام و كل زول حايم اخوكا و ان ختيت و يوم غلطت .. في الكبار البزجروكا و المعلم كان ابوكا كنا نحترمه و نجله كانت الناس بي سلوكها
05-26-2016, 10:45 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: غايتو شفت لي مراسله تلفزيونية كده من النوع البلبس جكسا في خط ما في وقومي يا هبوب هبي والله جهجت النشرة وجهجهت البرنامج وجهجهت الدش زاتو لا عرفت تمسك المكرفون لا الإسكيرت وخلتها كما وصفت تماما شراب من غير إستك كمان ومقلوب قلبة عدوك.
و الله يا ملا عندي نكتة للعراقي و الهبوب و الكهربا ...
لكن شايف الأرض مسكونة و القطر فيهو مفتش ...
05-26-2016, 08:31 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
في حياتي ما شفت لي زول بره السودان بي جسمه و جوه السودان بي كل حواسه و احاسيسة زيك يا باشمهندس
همو كان في الدنيا نسمة من اريج بلدو ال بحبو
غناها صلاح ابن الباديه ياريت تسمعنا ليها في هذا البوست
و نهديها ليك و لزوار البوست
من الذكريات الجميلة ذكرياتنا مع صاحب الحمار الذي يجوب الاحياء صائحاً
المعا قزاز شوالات صفايح
كانت مغامراتنا تبداْ ليلاً مع قعدات الشراب و غالباً يتم زجرنا و هرشتنا و لم نجمع من القزاز ما يكفي لحوجتنا المتواضعه. نعاود المحاولة صباحاً و همنا نمشي نأجر عجلات و نقودها بشاع النيل حتي الاذاعة و نرجع و نقول عاوزين نعمل انقلاب . الباعة المتجولون كان لهم نكهة خاصة و اصواتهم لها حنين
منجد العناقريب. و نصلح سراير حديد و بتاع اللبن الصباح مدن كانت تعج بالحركة و الحب و الحنين
بي بوستاتك دي يوم بتدق لينا زار في حوش بكري
لك و لضيوف البوست اجمل التحايا
ــــــــــــــ
05-29-2016, 08:36 AM
عمر دهب
عمر دهب
تاريخ التسجيل: 10-19-2014
مجموع المشاركات: 2010
Quote: في حياتي ما شفت لي زول بره السودان بي جسمه و جوه السودان بي كل حواسه و احاسيسة
آآآه يا صديقي ...
حب البلد داك يا صاوي هو نوع الحب القال عنه صديقي ود المكي : شي في قلبي كالأكلان كدبيب بعوض داخل طبلة أذن كالرغبة في تحكيك قفا أو ذقن يتحرك ذاك الشيء علي الأغوار بخطى التنميل ، خطى الإرهاص ، خطى الأحزان _____________________________ مبارك المغربي قال : وكل ما أتمناهُ بسمة من ملاك أضناه حبُه حلموا كان في الغربة نسمة من أريج بلدُه البحبُه
05-29-2016, 03:43 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
اكثر ما يؤلمني يا صديقي ... بعض الأحيان يظن البعض ...من الذين لم يغادروا البلد ...
اننا نعيش في ( ترطيبة ) كما يسمونها ... و اننا نعيش السودان كفنتازيا مجترة من ذكرياتنا الجميلة ...
انحنا يا صالح كتب عننا سيف الدين الدسوقي ... سيف الدسوقي الضاق مرار الغربة زينا :
شفتو لما الليل يروح والفجر يفرد جناحه والعيون الساهرة تغمد والقلب تهدأ جراحه نحن يا دوب يومنا يبدأ ما ضروري يطل صباحه *** انحرمنا من الحبايب وعشنا في الغربة البعيدة كل موجة حزن تمضي بكره موجة تهل جديدة لا خطاب يحمل محبة لا وصية بت نريده لا أمل ينعش قلوبنا ولا خيالاتنا السعيدة
الله يهونا بس ...
05-29-2016, 09:42 PM
عبداللطيف حسن علي
عبداللطيف حسن علي
تاريخ التسجيل: 04-21-2008
مجموع المشاركات: 5454
Quote: بوست غااية الروعة ، ورق الجوابات الملون ظهر لاحقا ، يبدو انك اصغر مننا !
المعاناة نفسها في كتابة الجواب لما يلموا في واحد بيعرف يفك الحرف
تسلم يا عبد اللطيف يا جميل ...
غايتو اصغر منكم دي قبلناها ...
لكن اول دفتر جوابات للحبّيبة ملون انا اشتريته سنة 75 من سودان بوكشوب و معاهو دواية حبر ماركة باركر كوينك ( ما حبر مكّي ) و انا طالب في الخرطوم الثانوية القديمة ...
كتبت فيهو اول كلام حُــب لذات الشامة ...
احلى حاجة يا عبد اللطيف ... ورقة جواب و منديل ابيض فيهو خطوط خضرا بي جنبتين نسيتهو عندها ...
و لفت الدنيا و رجعت ... و لقيتها محتفظة بالحاجتين ...
طبعا قبل ذلك بسنين طويلة جداً ... كانواً عرسوها لي زولاً طويل و عريض و لابس ليهو نضارات ...
و مالي جيوبو كنجالات ...
أهلها ما راعوا حبنا العُذري و لا دمعات عتاب من زول عزيز ...
سالت بحر شالت القليب ...
هاك ياخ اسمع الزول ده بقول شنو ... ملعون أبو الحب و سنينو ...ههه
05-30-2016, 07:33 AM
Hamid Elsawi
Hamid Elsawi
تاريخ التسجيل: 09-22-2005
مجموع المشاركات: 3450
شكراً يا باشمهندس علي اللحن ال برد الروح من الأغاني الجميلة طبعاً انت فهمنتي انا حبيت اشير للاغنية و معليش لخبط الكلمات و عارف عدم التدقيق بسبب ليك متاعب و قلق كتير شكرا للتوضيح و سرعة الاستجابة نسمع مرة تانية و ننوم علي ايقاع اللحن عسي ان تراودنا أحلام مريحة
06-03-2016, 05:20 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: شكراً يا باشمهندس علي اللحن ال برد الروح من الأغاني الجميلة طبعاً انت فهمنتي انا حبيت اشير للاغنية و معليش لخبط الكلمات و عارف عدم التدقيق بسبب ليك متاعب و قلق كتير شكرا للتوضيح و سرعة الاستجابة نسمع مرة تانية و ننوم علي ايقاع اللحن عسي ان تراودنا أحلام مريحة
و لا يهمك يا هندسة ...
اننت اطلب بـــس ...:)
06-03-2016, 05:26 AM
باسط المكي
باسط المكي
تاريخ التسجيل: 01-14-2009
مجموع المشاركات: 5475
لا انها خاطرة رائعة جدا من واقع الحال ووصف دقيق وممتع للحياة المشتركة لمعظم اهل السودان الوطن الحبيب... اما الصورة التي اتى بها معاوية ود المدير وهي صورة الحمامة التي بنت عشها فوق المروحة البتفط نمرة ثلاثة فهي صورة من بيت الكلاوي..صورة انيقة ورائعة ودليل اثبات اكيد ان الكهربا قاطعة في هذه المنطقة منذ شهور والله يديكم الصحة والعافية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة