|
|
|
 Re: مـن حكايــات ست المريسة في السودان (Re: عبدالعظيم عثمان)
|
ست المريسة وتوبة وكيل العريف
م.ع وكيل عريف في الجيش اولاده في المدرسه , بيصرف المرتب مرتين في الشهر
علاقاته ممتازة مع الضباط لانه شفت ومقرم وفقري بيعرف أسرار ميز الضباط بالليل
وبيعرف المدينة زقاق زقاق , بيسوق الجيب وهو مغوض , و كيس التمباك ما بفارق
جيبه , بيلقط الأخبار وبيعرف أي زوول جديد في الحلة وبيعرف الطلقوها منه
وأي ضابط جديد في المدينة ما بقدر يزبط أموره الا عن طريق وكيل العريف ...
في نص الشهر يوم صرف مرتب نص الشهر , النقيب أتلحه وكل شوي يرسله السوق
ومره يرسله الميز , المهم كل شوي بيطلع ليه مشوار , وصاحبنا عاوز يودي خضار البيت
ويدقش الحلة , والنقيب كل شوي مرسال المهم أخر شيء في حطب جاي من الجنوب
النقيب عاوز وكيل العريف يجازف الموضوع برا برا عشان ما مجروس الجيش يصل الحامية
صاحبنا إضايق شديد "وجلا موضوع النقيب" وجري علي سوق الخضار لفح أي شيء وغشا البيت
يسابق الزمن عاوز يصل الحلة سريع , المهم وصل الحلة ولقي العميان شايل المكسر
في أزمة شديدة وزحمة شديدة , الناس جيوبا ملانة قروش , والعرقي قطع من بدري
صاحبنا رأسه ضرب , وهو طالع نادته ك.خ قاتليه تعال أتسمم "ساعدته قال ما بقدر يجي الليله"
دخل بيت ست المريسة (طبعا البيت لا فيه باب ولا فيه شباك) رفع الشوال ودخل جوة بطن الحوش
وقد في أقرب بنبر ( ختت ليه النص) وقبل ما تمشي الباب دق شديد ودقة مزعجة
ست المريسة مشت علي الباب وجاته راجعة ( جيب القروش يقرش حلقومك) صاحبنا دخل يده
في جيبه وطلع القروش , وقامت المرا شالتها ومشت علي الباب وسيد اللبن مستعجل
كب ليه خمس أرطال لبــن ورجعت قفلت الباب .. ووكيل العريف يعايـن ويتمتم بالله
الواحد يشتري السم الهاري دا وبي قروشه ست المريسه تشتري اللبن
قام علي حيله وطلق الحلة وتاب توبة تاني ما رجع الحلة ..
| |
 
|
|
|
|
|
|
|
|
Re: مـن حكايــات ست المريسة في السودان (Re: عبدالعظيم عثمان)
|
ست المريسة وضباحيـن الجداد :-
صاحبنا بكور عنده مزرعه جداد ويوم الضبح الضباحيـن إتأخروا
وكل شوي يضرب تلفون ويكورك في التلفون , التلج حيسيح ومابقدر أجيب تلج بالليل دا
ولازم أخلص الليله , والجماعه كل شوي ( نحا في الطريق مسافة السكة بس)
بكور علي الحالة دي لغاية الساعه 4 صباحا ما قادر يتعشي وما قادر ينوم
ويزوزي كل شوي يصل طرف الشارع ويرجع تاني ( بالله دي حالة دي)
طبعا لا في مسلخ ولا شيء يعني لازم ينتظر الضباحين الشفوت ديل
رجله في رقبته , المهم علي الساعه 5 ص قرر يمشي يشوف الضباحين ديل
هو بيعرف بيت الزعيم (طبعا الضباحين ديل ناس منظمين وعندهم زعيم وكلهم بيسمعوا كلامه كأنه منزل)
المه وصل البيت ويدق في الباب نص ساعه لغاية ما فتحوا ليهوا ( السلام عليكم , (م.) ويـن ؟ رد عليه
عمك كبير كدا الزول من أمبارح ما جا لكن أمشي بعد السوق بي مسافة بتلقي الحلة
أسأل من بيت (فلانة) إحتمال كبير تلقاه هنالك ... المهم بكور دخل الحلة
وبيفتش في بيت (فلانة) لغاية ما وصل ... في الطريق لقي ليه ناس متلمين حول زول بيكورك
(توفيا ... توفيا .... توفيا ) قدر ما حاول يمشي ما قدر الشمار حارقه عاوز يعرف قصة ( توفيا دي شنو)
وقف عربيته ومشي علي الزول البكورك ( توفيا .... توفيا .... توفيا ) .. سأله يا حاج إنت من قبيل بتكورك
توفيا دي شنو ؟ قاليه إنتو وقت الزول بموت مش بتقولوا ليه (توفي الي رحمة مولاه)
نحنا هنا بجيب الجداد الميت وبنقوليه توفيا وبنبيع مشوي لكن عشان بنخاف الله بنكلم الناس
بنقول ليهم الجداد دا ( توفيا) ... المهم بكور وصل بين ست المريسة , ودخل لقي جماعته واقفين لمبة
ونايمين , وست المريسة سادة الدرب ( الناس ديل كلموا المريسة كلها وما دفعوا القروش
اذا ما دفعوا القروش شبر من هنا ما حيمشوا !! صاحبنا رأسه ضرب
وفي النهاية دفع لي ست المريسة حقها وساق الضباحين المزرعه ...
| |
|
|
|
|
|
|
|
|
|
Re: مـن حكايــات ست المريسة في السودان (Re: عبدالعظيم عثمان)
|
ست المريسة ووكيل النيابة :-
كل ما ناس الشرطة عاوزين علاوات وترقيات وعاوزين يبيضوا وشهم
يمشوا يكشوا ستات العرقي ويصادروا ممتلكاتهم ( وبعدين يبيعوها ليهم تاني)
عندهم قائد شرطة جديد جايهم نهاية الشهر , الجماعه قاموا لك كشات تقيله
وداهموا الحلة , وأرفعك وهمجية شديدة المهم ساقوا ستات العرقي كلهم بي عدتهم
المركز , والصباح عرضوهم علي وكيل النيابة وقام شغال غرامات ومصادرة ممتلكات
الغرامة (30 قرش ومصادرة ممتلكات) , وكت جاء دور " ك . م) قاليها إنتي غرامة (جنيه ومصادرة ممتلكات)
قالتليه إنت يا ود عبدالرحيم جنيت ولا شنو (انا زاتي عندي مريسه وعرقي) ما عندي شيء ثاني
ليه إشمعنا ديل 30 قرش وإنا جنيه كامل ( ليه الظلم دا)
وكيل النيابة قاليها إنتي الناس الفي المقابر ديل نصهم ماتوا بي سبب عرقيك القوي دا
| |
|
|
|
|
|
|
|
|
|
Re: مـن حكايــات ست المريسة في السودان (Re: عبدالعظيم عثمان)
|
ست المريسه وكادر جبهة كفاح الطلبه في الجنوب :-
في إحدي أركان النقاش الملهلبة في الجامعات دخل كادر جبهة الطلبة (ر . ت)
وحكي قصة في الجنوب , المهم بعد التخرد قاموا لموا ليك فيه ناس الخدمة الإلزامية
ورفعوا الجنوب والحرب مدورة , المهم يوم زهجان قام قال أمشي أعبي الرأس
ومشي بيت العرقي ... بعد ما صنقر ست العرقي قاتليه إتأخرت
المجاهدين وحاتك بعد صلاة الصبح دقشوا البيت وكملوا العرقي كله
وخرج صاحبنا خشمة ملح ملح وهو يقول : الله لا كسبكم إنتوا مجاهدين مرايس ولا شنو
| |
|
|
|
|
|
|
|
|
|
Re: مـن حكايــات ست المريسة في السودان (Re: عبدالعظيم عثمان)
|
| Quote: ست المريسة والجنقو كسارين القصب :- |
في الجنقو مسامير الأرض تناول الأديب عبدالعزيز بركة ساكن الجنقو حصادين السمسم والعيش
مع ست المريسة هنا الجنقو كسارين قصب السكر
في حصاد قصب السكر تتم عملية الحصاد في مرحلتين : الأولي : حرق القصب والثانية سكب القصب
قبل عملية حرق القصب تتوافد مجموعات من العمالة الي المشروع المعني
ومن نعم الله علي الجنقو في أي مشروع هنالك حلة أو كمبو فيه ما لذ وطاب
تكون هجمتهم للحلة مشهودة , وتنتعش الحلة إقتصاديا
وتقوم الحلة في هذه المشاريع بدور إقتصادي كبير حيث براميل الكنجو مرو ممتلئة
والما يشتهي يتفرج ..
يبدأ سكب القصب عن طريق منجل مقوس له أسنان حادة , ويتم السكب مع أنغام أهازيج الحصاد
والجلالات , ونهاية كل إسبوع تكون الهجمة المشهودة علي الحلة ... في إحدي هذه الهجمات
قامت ست المريسة " ش " بالتحضير من بدري ورشت الحوش في إنتظار الكنجالات
ما لم تحسب حسابه أن الجنقوا جاين الحلة مقلسين لأنه قروشهم إتأخرت حتي الإسبوع القادم
وقامت الجقلبة في الحلة , كل بيت يدس ما عنده من مشروبات (قطعنا من بدري) هو بدري لسه ما أنتهي
المهم " ش" دقت سدرها فتحت حوشها للجميـع ومنذ ذلك اليوم ولم تبور تجارتها ولم تكشح أي برميل
| |
|
|
|
|
|
|
|
|
|
Re: مـن حكايــات ست المريسة في السودان (Re: عبدالعظيم عثمان)
|
ست المريسة الإشترت الحمار الميت :-
عمك حاج أحمد عنده حمار نجيض نجاضة بعرف طريقه براه
بعد ما عمك يسكر ويقيف لمبة ينط في حماره والحمار يشق الخيران والفسحات والميادين
حتي يصل الي بيت عمك الحاج . كل يوم بعد ما عمك يخلص الزراعه والشغل يغشي الحلة
يربط الحمار برا البيت ويخت ليه القش ويدخل جوة الحوش يقضي باقي يومه يكضب للجماعه
وينجر من رأسه ساي بعد داك يطلع يركب حماره بيوصله البيت .. في يوم من الأيام وعمك جوة
بيت ست المريسة وحسب الفي رأسه يكضب ليهم ويألف في القصص سمعوا صوت دقشة عربيه
برا البيت قاموا كلهم جارين , عربيه عمك أب دقينة طويلة وجلابية قصيرة دقشت حمار عمك حاج أحد
المهم خشول الأجاويــد وعمك حاج أحمد " عفي وأصفح" قال ربنا بعوضني خيـر
بعد ما الناس إتفرقوا جات ست المريسة قالت لي عمك أحمد : تبيع لي الحمار دا بي كم ؟
الحاج قال المرا دي جنت ولا سكرانة ( ست المريسة قالت ليه لا مجنونة ولا سكرانة) وأنا زاتي ما بسكر
حمارك دا تبيعوا لي بي كم ؟ عمك قاليها الحمار حي ب5 قروش بس دا ميت !
قالت ليه أنما بشتري منك بي 5 قروش ( عمك ما صدق وواقف طوالي وقامت طلعت مطبقتها وأدته ال5 قروش)
ومن دغشا بدري "ست المريسة" مشت علي المحكمة وإشتكت عمك أب دقن طويلة وجلابية قصيرة
وودوهم للقاضي قالت ليه الزولدا يا حضرة القاضي دقش حماري الريفي الأبيض وحيرني وانا بطالب بي تعويض 15 جنيه
وسط دهشة الناس الناقشين النومة والقاضي قام حكم لي صالح ست المريسة وأخذت 15 جنية
ووسعت نشاطها وزادت العدة ورجعت بيتها مبسوطة ( ركبت سمبك في عمك أب دقن طويلة وجلابيه قصيرة)
لانه كل إسبوع كان بجيب ليها الكشة ..
| |
|
|
|
|
|
|
|
|
|
Re: مـن حكايــات ست المريسة في السودان (Re: ياسر السر)
|
Quote: سرد جميل وحكايا جميلة فهذا السرد اذ ينبي بقصص كثيرة لاناس عاشو بيننا ولهم وجود فعلي في حياتنا ...
واصل استاذ عبد العظيم فنحن لك من المتابعين ...
تحياتي : ياسر العيلفون ..... |
سلامات ياسر
ذاكرة المدينة تختزن الكثير من القصص عن بيت المريسة
بالمناسبة بيت المريسة دا بيت مختلف خالص وبكونوا الناس فيه
مبسوطين وبيرموا فيه أحمالهم ونفوسهم طيبة وناس كريمين
وفيهم من القيم والأخلاق الفاضلة الكثير .. وأي زول فيهم بكون
عنده قصة مع ست المريسة البتكون عارف تفك كل الشفرات القدامها
أحكوا لينا حكايات من المجتمع عن هذا العالم المدهش
تحياتي
| |
|
|
|
|
|
|
|
|
|
Re: مـن حكايــات ست المريسة في السودان (Re: عبدالعظيم عثمان)
|
العزيز عبدالعظيم عثمان التحية والإحترام من أمتع ما قرأت عن حكاوي الفداديات بأسلوب سهل ممتنع وذكرتني قصصك هذه كتاب الإنداية للأستاذ الباحث الطيب محمد الطيب طيب الله ثراه فقد جال إندايات السودان وقدم دراسة إجتماعية مفيدة عن هذا المجتمع تناولت عاداتهم تقاليدهم طرفهم مشاكلهم أتمني فحكاوي الفداديات ظريفة ولا تنتهي يُقال أن إحداهنّ قدّمت لأحد الزبائن مريسة لكنه عندما فرغ من الشراب رفض أن يدفع لها قيمة المريسة فما كان منها إلي أن قالت له قروشي خليت ليك دين قيامة😀
| |
|
|
|
|
|
|
|
|
|
Re: مـن حكايــات ست المريسة في السودان (Re: محمد الحسن حمدنالله)
|
الاخوان
عبدالعظيم ومحمد الحسن
من الطرائف التي تروى في هذا المجال أن واحدة ست عرقي في حارات الثورة تابت ومشت حجت
لمن رجعت من الحج جاها زوبنا السابق عوض النجار
وبارك ليها الحجة واهداها كيس حلاوة مع بلح
قامت علمت ليهو شاي وآخر ونسوة عن الحج وتعبو
لمن جاء ماشي مرق القزازة الفاضية من جييو
قليها يا حاجة قومي ادينا المعلوم
قالت ليهو: سجمي بعد حجتي دي اديك المعلوم انتا يا عوض جنيت؟
قال ليها: جنيت شنو يا حاجة، اسا انا امشي الحج اقوم اسيب شغل النجارة؟
قومي يا حاجة على شغلك
| |
|
|
|
|
|
|
|
|
|
Re: مـن حكايــات ست المريسة في السودان (Re: Ali Alkanzi)
|
Quote: قالت ليهو: سجمي بعد حجتي دي اديك المعلوم انتا يا عوض جنيت؟
قال ليها: جنيت شنو يا حاجة، اسا انا امشي الحج اقوم اسيب شغل النجارة؟
قومي يا حاجة على شغلك |
تعرف يا علي قاليك مرة واحد مراسي قديم
بعد ما مشي الحج وتاب وبقي إمام الجامع في الحي
يوم عزموه لي عرس وبعد الغداء في برميل مريسه
يقول يا غربتي , عمك كل شوي يسرق النظر ويستغفر
وكل شوي يعاين للبرميل ويستغفر
المهم قبل ما يطلع لصلاة المغرب قام مشي علي البرميل ودخل أصبعه
وأداها ليك لحسة وقال : الله يقطع يومك لسه بي سماحتك
| |
|
|
|
|
|
|
|
|
|
Re: مـن حكايــات ست المريسة في السودان (Re: محمد الحسن حمدنالله)
|
الاخوان
عبدالعظيم ومحمد الحسن
من الطرائف التي تروى في هذا المجال أن واحدة ست عرقي في حارات الثورة تابت ومشت حجت
لمن رجعت من الحج جاها زوبنا السابق عوض النجار
وبارك ليها الحجة واهداها كيس حلاوة مع بلح
قامت علمت ليهو شاي وآخر ونسوة عن الحج وتعبو
لمن جاء ماشي مرق القزازة الفاضية من جييو
قليها يا حاجة قومي ادينا المعلوم
قالت ليهو: سجمي بعد حجتي دي اديك المعلوم انتا يا عوض جنيت؟
قال ليها: جنيت شنو يا حاجة، اسا انا امشي الحج اقوم اسيب شغل النجارة؟
قومي يا حاجة على شغلك
| |
|
|
|
|
|
|
|
|
|
Re: مـن حكايــات ست المريسة في السودان (Re: محمد الحسن حمدنالله)
|
Quote: يُقال أن إحداهنّ قدّمت لأحد الزبائن مريسة لكنه عندما فرغ من الشراب
رفض أن يدفع لها قيمة المريسة فما كان منها إلي أن قالت له قروشي خليت ليك دين قيامة |
تعرف يا محمد الحسن دي فراسة شديدة من النسوان ديل
يسكروا في الناس ديل وما ببكونوا خايفين منهم
بالعكس بستروهم وبيراعوا ليهم لانهم زبائن بزنس
ووقود نشاطهم الإقتصادي ( وكل زول قايم بي دوره)
تحياتي
أحكي
| |
|
|
|
|
|
|
|
|
|
Re: مـن حكايــات ست المريسة في السودان (Re: الزبير بشير)
|
ست المريسة والخواجة الرمتالي:-
فليب دا خواجة شغال في بعثات الأمم المتحدة , صاحبنا دا جنو رمتلة
وبحب اللون الأسمر دا حب شديد وبحاول يكتشف قاع المدينة بطريقة مريبه
مرات الناس بقولوا قليب دا جاسوس بريطاني , ومرات كدي بقولوا دا خواجة مطرطش
المهم يوم هفت معاه وقام مشي دار الرياضة ويومها الموردة لاعبة مع فريق من بحري
المهم الزول بيشجع مانشتر ومرضان كورة علي رمتلته العليه , دخلته دار الرياضه
عصام عباس جدع ليك لوب خلف المدافعيـن , وأنطلقوا مهاجميـن المورده زي الصواريخ
(بريش بي جمبه ومحمود المستقبل بالجمبة التانية ) الخواجة خت يده في رأسه وقال "حاشا أن يكونوا بشرا بهذه السرعه"
المهم كل شوي يقوم من الكرسي مع مشاورير بريش ومحمود المستقبل خلصت الكورة
وعمك ساق معاه السواق ودقشه الحلة برضه , دخلتهم للحلة ناس الحلة قاموا جروا كلموا (ن .) ست المريسة
وقالوا ليها في واحد من أولاد الحور دخل الحلة (أولاد الحور مصطلح في السودان للناس العندهم مشكلة في صبغة الميلانين)
وبسموهم أصحاب البرص .. المهم ست المريسة تشيل وتعاين ومتنظرة "ولد الحور"
فيليب الرمتالي دخل الحوش والجماعه كلهم إتخلعوا في أفندي قاعد بعيد قاليهم
دا لا ود حور ولا شيء الزول خواجة "خواجة" يا ناس ما تفضحونا
المهم ست المريسة جابت ليه كرسي كبير وثير "عاوزة تكرمه وكدا" قال ليها أنا عاوز بمبر "بي عربي مكسر "
نططتت عيونا وإتخلعت , ومشت جابت ليه البنبر ... ودخلت جوة تنادي في واحد من الأولاد الشغالين معاها
أمشي شوف لينا شيتا أفرنجي الليلة معانا ضيوف خواجات ...
الخواجة سمع الكلام قاليها أنا زول مريسة ساي
المرا إتخلعت وقالت " سجمي الخواجة دا ما أسلم عديل كدا "
| |
|
|
|
|
|
|
|
|
|
Re: مـن حكايــات ست المريسة في السودان (Re: عبدالعظيم عثمان)
|
شكرا على أدب الإنداية ده يا عبد العظيم..
هل عندك اى معلومة عن معنى وأصل كلمة (مريسة)؟
فى وسط السودان تسمى الدقة احيانا..
هل بفرق شراب المريسة من كاس القرع؟، او خشم الجردل؟
او بكوز طلس؟ هل للمريسة علاقة بشية الجمر...؟
الاسئلة دي لأصحاب التجربة او أهل العلم..
| |
|
|
|
|
|
|
|
|
|
Re: مـن حكايــات ست المريسة في السودان (Re: سيف اليزل سعد عمر)
|
عمك اسمه بشير سواق لوري ومراسي قديم وفنجري في الدفع
مرة الظروف عاكست وجيبه فضى فمشى لست المريسة زبونته وشرب لمن قال بس
في الحساب نقص ست المريسة قرش
والغلاط قام ، فنكر تب
قالت ليه بشتكيك لي الله
عمك بشير قال ليها : دايرة تقولي لربنا بشير اكلني في قرش مريسة؟
******
واحد تاني مراسي لكن مشكلته بسكر شديد وما بتحمل السكر
مرة سكر لمن ما قدر يقوم على حيله، فأصحابه اتنين جابو قفة ختوه فيها وكل زول شايل بأضان
ماشين في الشارع وهو يبرطم، شاف ليه زول سكران ماشي ويتعتع
الشايلنو في القفة قال ليه: انتو وكت ما قدر السكر بتشربو ليه؟
| |
|
|
|
|
|
|
|
|
|
Re: مـن حكايــات ست المريسة في السودان (Re: احمد الشيخ)
|
| Quote: هل عندك اى معلومة عن معنى وأصل كلمة (مريسة)؟ |
سلام يا أهلنا،
على ما أظن أصل الكلمة من اللغة النوبية (يا ريت واحد من الرطانة يجي يأكد لينا)
الشئ السمعته إنها مكونة من شقين (مري) و(أسي) وتعني (موية العيش).
تحياتي
| |
|
|
|
|
|
|
| |
عبدالعظيم عثمان
ياسر السر
محمد الحسن حمدنالله
Ali Alkanzi
الزبير بشير
سيف اليزل سعد عمر
احمد الشيخ
محمد أبوالعزائم أبوالريش
فيس بوك
تويتر
انستقرام
يوتيوب
بنتيريست