الله يغطي عليك يا بنيتي..! هيا ترا كي بيت امك (مكة ومدينة منورة)..!!
كلامك يا بريمة ما وقع واطاة تب..! كل كتابتك عن ثقافة اهلك..اهو جابت حقها.. صحيح صفاء قد تكون امتداد لشادن ، لكن تظل الفكرة الأجمل باقية.. وياريت كل عيالنا وبناتنا من ناس الغناء والتأليف والموسيقى يتجهوا لعمل مثل هذه الفيديوكليبات..التي تعكس ملامح الناس التحت وحاجاتهم..!!
المدخل..
ترانيم المزيكا..اول الدخول كمنجة..زي بداية اشغال اخونا الفنان ادم حمودة..!! الخلفية مجموعة ابقار..بنات مادوك الفُـضة ام صوف كما يسميها البقارة..!! يعني نظام زولة سارحة (راعية) بالبقر..! تجلس تحت شدرة (شجرة هجليج) وهي تضفر طرقاية (الضـُفارة هي طريقة صناعة البروش)..وتترنم..وهذه هي الطريقة التي تؤلف بها البقاريات الغناء والأشعار..! ثم تحمل العصاية على اكتافها وهي تهش الأبقار..نظام سايقاهن على الفريق..يعني نهاية اليوم..!! ثم مارقة من الكوخ الصغير..وبتقوم بتحرك الجمرات (جقجاق النار)..وهي تستعد لتجهيز الشاي..ياخي الكفتيرة الحرقانة دي بتعمل حنين غريب..!!..طبعا البقارة جنهم شاي..!! كفتيرة (براد) الشاي قاعدة على تلاتة حجارة..اسمها اللدايا ( الأثافي )..!!
شخيط التراب..لمن عملت اربعة خطوط طولية ..تحتها ثلاث خطوط..دي عادة ضرب الرمل..وفي تلك المناطق اسمها (الرمــُل) وهي عادة معروفة في الثقافة العربية القديمة..وتدخل في باب (العرافة)..!
الزينة والإكسسوار..الفستان ملون..وهناك بنسميهو (العراقي)..يعني العراقي ليس فقط هو لبس الرجال..والألوان العديدة تعبير عن حب الحياة..! المشاط (تسريحة الشعر) هي طريقة قديمة سادت في اواخر القرن التاسع عشر..والمساير (الضفاير القدامية) ظاهرة..! الخرز على الرأس يسمونه التلال (الجمع تلاليل)..! اما الخرز على العنق يسمى الخناق (الجمع خنانيق)....هناك ايضا الورقات (الحجبات)..!..واضافت على ذلك (المحفظة) وهي نظام جزلان خاص بالنساء..!! الحلقات على الأذن تسمى (الخــرُوس)..! الأساور على اليد تسمى (العاجات)..طبعا صفاء في الفيديو لابسة اتنين..كل واحد في يد..!! الأساور على الأقدام (حول الرسغ) تسمى الحجول..!!
في الدقيقة 2:52..يلاحظ انها تضع عمامة صغيرة على رأسها..العمامة دي اسمها (الــُوقاية)..وبيقولوا فلانة وقت وقايتها..وذلك انها تريد ان تحمل حمل ثقيل على راسها..ويلاحظ انها بعد ان وضعت الوقاية..وضعت حزمة حطب على راسها..وطريقة جلب الحطب تسمى الفزع للحطب..ويقولون فلانة فازعة للحطب .. أي ماشة تجيب ليها حطب للوقود.. الوقاية ممكن تكون قطعة قماش منفصلة..او جزء من التوب..التوب السوداني الواحد ده..ولمن البقارية تعمل جزء من توبها وقاية..بيكون الجزء التاني ملفوف حول الخصر..وهنا بيقولوا ليك فلانة كاتلة توبها امقعير..!! ولو حصل في زولة من غير تكون فازعة للحطب وكتلت توبها امقعير.. فارجى الراجيك..دواس للطيش..لمن الدم يسيل للركب..!!!!
مطاردة كور (مراح) الماعز بتكون لغرضين: اما لفصل صغار الماعز عن امهاتها أو لمسك احداهن لحلبها من اجل لبن الشاي..!!.. والبقارة في كردفان ودارفور..لغاية تشاد..عندهم تربية الماعز موجودة..ويستغلون الماعز فقط من اجل لبن شاي الصباح..طبعا مرات بيستغلوهو للذبيحة واكرام الضيف..والذبيحة عندهم درجات: الماعز الأقل درجة..ثم الضان..ثم البقر..!! يعني لو مقتدر (عندك ماعز وضان وبقر) وجات نسيبتك وضبحت ليها تيس..الله قال بي قولك..ح تبقى حديث القرى والفرقان (فلان نسيبتو جات وضبح ليها تيس ساكت)..!!
في زمننا ..لمن كنا ناس خلا..الماعز مطلوق ساكت..ومافي زول بيرعى بيهو..لأنو السرحة (الرعي) بالمعيز حاجة شينة كلو كلو..!!
يلاحظ ان صفاء قامت بربط ارجل الحمار الأمامية..وهذه الحركة تسمى (القيد) يقولوا ليك فلان قيد الحمار..!!..اما اذا ربطت القدم الأمامية مع الخلفية (في نفس الجانب) فهذه تسمى (الشــُكال) ويقولوا ليك فلان شكل الحمار..والشائع استخدام الشكال في الخيل اكثر..اما الثيران فلا تقيد ولا تشكل..لأنها بتكون مزمومة (الزمام يوضع على الأنق..ومنها حكاية زينة الزمام ، سواء كان زمام ابو رشمة أو زمام ابو تيلة)..!
عيد الحول ما يغضب زول يا عيال ابا..زايدين ماني ناقصين..والعيد الجاي ان شاء الله معيدين في جبيل عرفات..
كبر
06-24-2017, 03:30 PM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 24986
بالضبط يا حيدر ..اجمل حاجة هي الإخراج..والزول/ة الصور الفيديوكليب ده واضح انو من المنطقة..لأنو حرص كتير على التقاط تفاصيل دقيقة ونادرة..نحن بنعيشها بذاكرة قبل اربعين سنة..!!
بالنسبة لحكاية ناس المساحيق (الجننت استاذنا دكتور الباقر العفيف في حكاية تنظير المتاهة اياها) فالعافية يا صديقي درجات..ولو حظيت بمتابعة افلام ناس ارض السمر.. فعندنا ارضية جاهزة وشفنا تفاصيل السودان بكل ملامحها..يعني تاني بعد ده غنا الصوالين والإستديوهات ما بيقسم معانا..!!..ودي الحتة الخلتنا نهتم كثير بمزيكا غرب افريقيا..خصوصا مالي والنيجر والصحراء الغربية..لأن الناس البتغني هناك لمن تعمل فيديو كليب ..بتكون عارفة انو في رسالة بتحتوي على تفاصيل جميلة مرات بتكون اجمل من الغنا والمزيكا..عشان كده الخواجات (الآخر الثقافي والحضاري) لم يشوفوها بتديهم احساس بحاجة مختلفة..!!
كبر
06-29-2017, 11:35 PM
Kabar Kabar
تاريخ التسجيل: 11-26-2002
مجموع المشاركات: 18537
عيد الحول ما يغضب زول..والله يخلي ليك الطويرات تملى العش لمن يدفق وتطير بالعافية والسلامة..!! سعيد بي شوفتك يا قريبي..وكتر خيرك على الهدية السمحة..الجهجهتني في حناني ذاتو..!!
طبعا لأني مارق من حلقات ناس ارض السمر في الدلنج وكادقلي..وفيها رقراق درملي حنون.فقمت طوالي افتكرت الموضوع درملي..لكن الصفقة عدلت راسي ..وجابتني في القالب..!!
كتر خيرك كتير يا ول ابا..واسمح لينا نشيل النقة بتاعة الرقصة ..عشان نجعلها مدخل لنقة تانية خالص..قد تعجبك او لا تعجبك..ومش مهم ..لأنك انتا زول مضمون..لكن الكلام في عيال وبنات البقارة..الرايح ليهم الدرب في الموية..!! كتر خيرك يا بريمة..!!..خلي بالك الصراع مداهو كبير شديد..فقط كن هنا يا حبيب..والباقي هين..!! انا حارس الطملة يا ول ابا..متل بولي طير البحر..وبكرة ح تعرف..الغبينة ما بتبني..ولكن المباصرة ياها البتبني..!!
كبر
06-30-2017, 00:07 AM
Kabar Kabar
تاريخ التسجيل: 11-26-2002
مجموع المشاركات: 18537
: واحدة من وسائل السفر زمان عشان الناس تحصل العيد مع الأهل..كانت فكرة القطر..!
سنة 2012.. في مدينة كالقري..زارنا استاذنا محمد المكي ابراهيم..وعملنا شغل صغير حول رائعته قطار الغرب..تذكرت تلك الخواطر وانا قاعد اراجع المنبر..فلقيت خيط قديم لصديقنا بلدي حبوب..وتداخل ناس كتار منهم الأستاذة سلوى صيام ، خالد العبيد..تبلدي ..وكتبوا عن القطر..وذكرياتهم مع القطر..وركزوا على نقطة غريبة وهي محاولة التعرف على اسماء المحطات..باعتبار نقطة الإنطلاق هي الخرطوم (شمال ، شرق ، جنوب شرق ، غرب..جنوب غرب)..وكان حدهم خط الشرق والشمالية..!!
اليوم القطر..لا ادري اقول عاد ليهو بهائه وسطوته..ام ماذا حدث..؟..بالجد بتفرج في قطر عطبرة وانا اغالط نفسي في اصرار..وكذا قطر حلفا..اما قطر نيالا ..فلقد سالت مني دمعة..!!..اما قطر واو..فده عدى فات بعيد خلاص..!! في تخاطري مع ود المكي..تجرأت على تشبيه غريب..حيث قلت ان فكرة (من الأسكلا) بتاعة ود الرضي..قام جاراها واحد من عندنا اسمو الهداي العجوز ام بارات..!!..وزعمت بانو بعد شوية الحاجات ح تضيع مننا وما ح نلقى ملامح تاريخ غير رائعة ودي المكي ، ورائعة ود الرضي ، ورائعة ام بارات..!
اهديكم فكرة (من الأسكلا) بتاعة البقارة..وهنا لا يتبع الشاعر الباخرة وانما يتبع القطر..!..والقطر (قطار الغرب) الذي يخرج من الخرطوم..ثلاث: قطر نيالا ، قطر واو ، قطر الأبيض..وده بيفرق بعد محطة الرهد بي شوية ويتجه نحو مدينة الأبيض..!!
الآلة المستخدمة اسمها ام كيكي..(ح نجيب شكلها وطريقة عزفها في مداخلة منفصلة)..والأغنية قد لا تعجب المزاج..لكن بتكون ليها قيمة تاريخية..هي الغنية الوحيدة التي عددت اسماء محطات القطر (من الشجرة لغاية بابنوسة) وهي ثمانية وخمسين محطة..الزول ده رصاها برمتها..والأعجب..المحطات البيقيف فيها القطر طويلا..عمنا بياخد فيها وقفة..لغاية وصل بابنوسة..وناس الهلباوي وحماد الطاهر يجوا يوصلوا لينا القطر لغاية نيالا..قصدي حساب المحطات..
في بابنوسة المفرق (التقاطع) قطر واو يتجه جنوبا ويمر بالمجلد ، الميرم ، اويل وينتهي بمدينة واو، وقطر نيالا يتجه غربا ، يمر بفرع الهبيل ، الضعين الى ان ينتهي في نيالا..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
حيدر حسن ميرغني
Biraima M Adam
فيس بوك
تويتر
انستقرام
يوتيوب
بنتيريست