مزيج باهى يتراءى قريبا من عتبات الروح فى لحظات من تمردها على حدودها ومحاولتها الهروب من قمقم السأم والجسد، تراءى العود والنيل، وكأنهما توأمان حميمان، يتشابهان فى أيما ملمح
قلت لصديقى ونحن نتأبط صديقنا الغالى – العود – ونفترش عباءة من خضرة صديقة على خد النهر، قلت له، أن العود مطابق تماما لهذا النيل العتيق
كيف يعنى؟
خلاص عربدت بيك البهجة وبديت الهذيان
أسمع، العود مش خمسة أوتار، تخيل معاى، بدأ من هناك، النيل الأزرق، وجا من بعيد النيل الأبيض بعد ما شرب من كل الشرايين الحنينة ديك، بحر الجبل والزراف والسوباط، يتلم معاهم الدندر والرهد وبعد شوية يقالدو نهر عطبرة – الأتبراوى – ما سمعت حسن خليفة العطبراوى المبدع لمن يقول يا نسمة جايه عصير شايله السماح والخير فيض بالحنان وأحضن يا الأتبراوى النيل ويبدأ بعد داك كرنفال الحبور والخلود السرمدى، والمسير المقدس شمالا، مش بالله زى أوتار العود الخمسة، ويبقى النيل زى رقبة العود
مثلما كان النيل بكل زهوه وطيبته منذ الأزل، كان العود أيضا، وقبل أن يأتينا مع جحافل الغزاة فى وقت ليس بالبعيد
كان هذا الكائن صاحب أربع أرواح أو أربعة أوتار، ولكن شاءت الأقدار أن يتخاصم زرياب التلميذ مع أستاذه الأكبر، إبراهيم الموصلى، ترسخ الحسد لدى الموصلى من تقرب تلميذه من الخليفة وشق فى نفسه وهو الذى لا يرى من يماثله فى سلطنته على عوده، فبيت النية لسوء أضمره تجاه تلميذه الرقيق زرياب، وفاحت رائحة المؤامرة ووصلت الى مسمع الطائر الأسود، فما كان منه إلا أن يمم شطر الغرب، وبدافع الهلع من سطوة أستاذه، لم يحط الطائر رحاله إلا عند الأمويين وفى دولتهم الوليدة والخائفة من خلفاء الشرق ايضا، فى الأندلس
وهناك، أضافت عبقرية زرياب الوتر الخامس للعود
إنت زول مجنون ساى
تخيل معاى عثمان حسين، وهو ببدأ أول اللمسات فى محراب النيل، محتضن العود وسارح بعيد يرتل مع التجانى يوسف بشير
أنت يا نيل يا سليل الفراديس نبيل موفق فى مسارك
لو سمعت مباشرة بعد كلمة يا نيل، فى لزمة صغيرة بالعود، الناس ما قاعد يتنبهو ليها، لكين والله هى ملخص لكل خلود النيل
تخيل برعى وابوداود قاعدين فى الحوش فى الموردة، وابو داود ماسك الكبريتة
سيرونا لى نيلنا وسوو لينا عديلنا فوق جناح الحب الملايكة تشيلنا يوم تجقلب خيلنا فوقا شبان جيلنا
برضه النيل حضور والعود حضور، وسط الإحتشاد ده كله، بتقوم حياة كاملة
ولا اقول ليك
شوف الكاشف العبقرى، خلاص جهز اللحن فى المخيلة، وقاعد مع على مكى ولا شوبان، ويملى فيهو
يا حبيبى قوماك ننفرد على مقرن النيل الجميل الروض بسم والطير غرد والطقس لا حر لا برد
تقول لى ياخى ما تيمان
يلا ياخى خلاص عشان نمشى
نمشى وين من النيل، ما محل ما مشينا برضه هو معانا، انا خائف اقول ليك انه النهر ده، قاعد يجرى جواى، تقوم تقول لى انت مجنون
بس قبل ما نمشى، معقول يعنى عايزنا ننسى أمير العود حسن عطية، أناقة الطرب وطرب الأناقة، عمرك شفت كمية تطريب زى دى بالله
بكره لمن نجى حأحكى ليك عن محمد الأمين وعركى وعلى السقيد، وقبلهم حاحكى ليك عن علاقة العود وحميمية الصلة مع الأحمدين
الأحمدين ديل منو كمان
أحمد ربشه وأحمد شاويش
ايوا، انت قبيل مش قلت زرياب زاد الوتر الخامس، طيب ليه فى ناس عاملين ستة أوتار
صاح صاح، شفت على السقيد وتجليات العزف كيف، أنا يخيل لى انه السقيد ده اتناول السوباط بيده يمكن، وأضافه لسيفونية الألق العودية دى، ستة أوتار عند على السقيد، محمد الأمين برضه عامل ستة أوتار
يلا قوم خلاص، قامت قيامتك، عايز تجننى معاك انت ولا شنو
ويتواصل توسدنا صدر النهر، تجرى موجاته فى إتجاهها المعلن، شمالا، لكنها وفى سر إحتفاءنا بها، تجرى مع مسارب الروح فى شرايين عشقنا للنهر، تجرى صعودا وهبوطا وفى كل اتجاه، حاملة الحياة، الحياة بكل ما فيها من فرح ووجع، إبتسام وآهة، لكنها تظل حياة معمدة بمياه النهر تأخذ جسدها من طينه وتكتب إسمها على صفحة وجهه الحبيب
أها قلت لى الأحمدين ديل كمان قصتن شنو
أبدأ ليك بى أحمد ربشة، وحكايته مع الشدو الرفيع وحميمية لقاءه مع العود
أحمد ربشة يرتدى لونا ذهبيا، هو خليط بين لون الهضبة الشرق أفريقية، وهواء البحر الأحمر وطعم طيبة أولئك القوم هناك
كان حين يحضن عوده، تغنى الروح فيه ويشع الطرب، تلامس أنامله أوتار العود فيغوص عميقا فى حنايانا، يغنى فتتمايل شتلات البن الرشيقة على تلك التلال هناك، وتزغرد أشجار النيم وتتمايل أغصانها راقصة هنا
لكنه ذهب دون أن يودعنا، وفى القلب حسرات ثقال
كدى طيب النجيك لى أحمد التانى
ده جانا من عطبرة، مشبعا بصخب القاطرات الهادرة المزعجة، لكنها فى دواخلها تضمر حنانا ليس كمثله، تقرب الأحباب وتأخذ الأوطان معها لتهديها الى أصحاب الشوق والوجد
غاص أحمد شاويش فى معهد الموسيقى، فعلا عشقه للعود، وهو صاحب صوت ساحر جذاب ومتفرد، صوت مميز وشجى، خليط من أبوعركى وعثمان مصطفى أو لنقل بين عبد الحميد يوسف والخير عثمان، يملك حسا تطريبيا تشعر وأنت تسمعه كأنه يغنى لنفسه فقط، وحين يغنى، نعرف أن هناك شيئا يسمى الغناء
اها رأيك شنو، نجى الخميس الجاى معانا الجماعة ونتم النضمى
يا خوى تعالو براكن، انا يوم الخميس مسافر
وين ماشى فى الحر ده، هسه ده جو الزول يسافر فيهو، الاجازة ذاتا قربت تنتهى بعد كده
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
فيس بوك
تويتر
انستقرام
يوتيوب
بنتيريست