الأسبوع الفات سافرت الخرطوم قميتي (بالدس)، صحي البورداب لو كان كلمتهم، كانوا عزموني سمك عند عوضية وما بعيد يهدوا لي ثوب، لكن برضو لاوزت يكون فيهم واحد انضمّ لمعروف بدري، ويقوم يتشبّك فوقي ويفتح فيني بلاغ ردّة!! صحي بقدر اتخارج بالتوبة قدام القاضي، لكن قلت الكفار ديل يقوموا يأخروني ساكت. نرجع للموضوع الاساسي: بعد قضيت المهمة السافرت ليها، أبيت أمشي أنزل عند نسابتي، قلت بقوموا يعذبوني بالأكل والاحترام وما بعيد يودوني اشيل فاتحة فاتحتين عند أهلم الكتار ديك، وفواتح بعد الانقاذ دي لو عديت لحدي عشرين، الزول داك ما بنزل يدينو! غير رصيع الضهر وكيف حالك والله يبارك فيك الخمسين مرّة! علي شنو تاعب روحي؟ هولي داي فيلا عملوها لناس منو؟! بعد الحمام الدافي بالصابون السائل بريحة الفل، لبست ليك بجامتم البيضاء ديك وطلبت قهوة تركية وقعدت في البلكونة ارسم برنامج التراث للايام التلاتة الباقيات لي في بلد التراث الحي. وأنا برسم في البرنامج في رأسي، تذكرت زيارتي التراثية لامدرمان السنة الفاتت والصورة الصورتها لمطعم وست شاي تحت ترلة بتاعة قندران قديم متكّلة بالبراميل بدل اللساتك، وفي نهاية الترلة جنب الخور في كلبة والدة ليها جريوات أربعة، ووحات سيدي الحسن، بملاحظة المهنة لاحظت انو اتنين من حلمات الكلبة فيهن عيب خلقي.
01-18-2016, 03:37 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
حلاوة مولد يمكن يمكن اشيلها، لأنو السكر مادة حافظة وما بكون فيها تلوث، لكن نوع فول مررو وويكة وجبنة ديل، نهي نهي!! بجدعن قبل المطار لو الكيس حسيت انو بخرب لي البريستيج بجدعو
01-18-2016, 04:01 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
ختيت حاجاتي المهمة في خزنة الفندق ولبست لي بنطلون جينز وتي شيرت، وطلعت الكاميرا من شنطتها الانيقة ودخلتها في شنطة جينز جايبها معاي هدية لود اختي (جبهة ديمقراطية) بجامعة الجزيرة، ووزعت القروش السودانية على الجيوب والشنطة، ووليت وجهي شطر حافلات الشهداء ام درمان، في الطريق من الفندق لموقف الحافلات تعمدت تغبير الجزمة. ركبت الحافلة نظام الولد مقددا، وقبل الحافلة تتحرك اديت الكمساري عشرة ألف وقلت ليهو: الشهدا يا فردة شالن وقال لي بلؤم: فردة ولّ جوز؟ برضو جديد في البلد، متين الفقر ديل قاعدين يدفعوا قبل نطقطق ليهم؟! همست ليهو في أضانو: عفيت ليك الباقي قال لي بابتسامة: شكرا يا فردة يا عسل
01-18-2016, 05:15 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
نزلت في الشهدا وفي مافتريا في راس الدكاكين البقسمن الشارع البمشي علي بيت أزهري والتاني الملان ركشات وبمشي اتجاه زقاقات شوارع شمال أم در، طلعت في مسطبتها العالية البتيح ليك مراقبة حركة الناس المجنونة بميدان الشهدا. جا ماري جنبي شاب عشريني عندو داقوسة، طوالي سألتو: كيفك يا شاب؟ بتعرف عوض محمدين؟ عاين لي متوجسا وقال: عوض محمدين أبوي؟ قلت ليهو: أكيد غادة صلاح أمك؟! بعد طايبتو قلت ليهو : معاك عمك بكور، صديق قديم لأهلك، كدي سوي تلفون لأبوك خليني أسالمو
01-18-2016, 05:26 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
ضرب لأبوهو وأداني التلفون فتح الخط وقال بهناك: في شنو؟ داير شنو؟ قلت ليهو: داير أبو الغد أب داقوسة سب لي دين وقال: طلعت من وين يا معفن؟ وحات شيخك داك.... قلت ليهو: الحسن الحسن واصل: واحتو، لي شهرين بفكر انتحر ، أقوم افكر انك لو سمعت بي انتحرت ح تضحك علي، أقوم أجلي الفكرة
01-18-2016, 05:40 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
انتظرتو بمحل سمك بالموردة جنب محل عوضية سمك، وأنا بعاين للافتة قلت ليها: والله، يا تراجي اتجدعتي، نحنا ندبّا ولينا الله وعيشة السوق وضيعنا التياب. قبل ابداقوسة يصل خلوني اديكم نبذة عنو وعن غادة: عوض من حتّة اسمها أم ضريسة جنوب الحوش، ما عارفها هسع تبع سنار ولّ الجزيرة؟! كل شبابها أو معظمهم شغالين مدرسين (معلمين) ، والقرية خارج المشروع ومعظم المدرسين متزوجين من المدرسات وبالتالي قدروا يغطوا معظم مدارس جنوب الحوش. أم ضريسة دي حتوتة!! ابداقوسة دفعتي بالاقتصاد وسبب علاقتي بيهو انو كان بحب غادة دي، وغادة اختها دفعتي بشمبات ابداقوسة كان بجيب غادة لاختها كل خميس خميسين بشمبات، منها تزور اختها ومنها يخلطها تحت شجر المنقة، وبالليل بمشي يبيت معاي، ويوم الجمعة بعد أفطرو بمشي يتم خلطتو تحت الشجر لحدي ما ألاقيهو خميسا تاني. توثقت علاقتي بيهو لدرجة عديت معاهو جزء من اجازة بام ضريسة. غادة من الشمالية فوق، ما داير أقول اسم قبيلتها، عشان ما اتهم بالعنصرية المهم، كانت سمحة سماحة الجن وعندها نونات، لمان تضحك، بتوقف قلب عوض!
01-18-2016, 08:19 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
جا داخل، الداقوسة جات معاها صلعة اصلية، خلت بالجمبات شعيرات بويض، نضارة نظر سميكة، قلت ليهو وانا نحن متعامتين بالسلام: حباب بالباشكاتب همس لي: باشكاتب بدرجة مدير فرع ببنك الخرطوم بتكلم بوحوحة زي بتاعة الناس البسكرو ديك وفيها شفط هواء وبين كل كلمتين يقول لي: أبكر أح أح أح الله الله قام علي حيلو بعد قعد وقعد تاني وقام: دقيقة دقيقة خلينا نطلب الصير ونجيك مشيت معاهو للكاشير وبعد دفع هو حق الطلبات، رشيت بتاع الصاج عشان يحمر لينا الصير في زيت جديد عوض عاين لي باستغراب وقال:
01-18-2016, 08:33 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
يا خالد من الفيس بوك، دا نص أدبي ما عندو علاقة بأبكر الحقيقي. بعدين في النص، الراوي وين اتلوم مع نسابتو؟ قال بعذبوهو بالاحترام والأكل الكتير وين اللوم؟
01-18-2016, 08:30 PM
عمر دهب عمر دهب
تاريخ التسجيل: 10-19-2014
مجموع المشاركات: 2010
أبكر، أقول ليك داير أنتحر، تقوم تقول لبتاع الصير حمرو لي في زيت جديد؟! إتّا داير تعيش تاني قدر شنو؟ واصل دون انتظار إجابة: بعدين إتّا قبل كدا بعضمة لسانك دا موش حكيت لي قلت لي: جدك عباس بعد الكتلة زمن المجاعة، كان طالع ليهو في شجرة صمغ وهو طفل بكد ليهو كعكول صمغ، جات نسوان اتنين تحت الشجرة كوركن ليهو: عباس هوي، أمك وأبوك ماتوا قلت لي: بدل ينزل يجعر كنكش في الكعكول زيادة زول جدو طلع للحياة بكعكول صنف، تجي تتفلسف في الزيت؟ قلت ليهو: بلحيل قلت ليك القصة دي لكن عبس، دي يا ها الخيارات الكانن متوفرات ليهو لمواصلة الحياة، وبدل ينزل يكمل طاقتو في الجعير، احتفظ بال ATPs للمواصلة لكن كدي وريني كيف كنت بتفكر في طريقة الانتحار الممكن تصلني أخبارها؟ أوعة تكون يا داقس كنت ناوي تنتحر بالعمة والمروحة والتربيزة؟ تقليدي يا أبو الغد حتي في انتحارك يا أخي، بعد قوقل دا ممكن تلقى ليك مادة تشربها أو تحقنها وموتك ح يبدو لناس مستشفى أم درمان التعبانين ديل كأنو سكتة قلبية، لكن فعلا لو انتحرت بالطريقة التقليدية كنت بضحك فوقك
كدي قول لي داير تنتحر لشنو؟
01-18-2016, 10:53 PM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
السبب الخلاني أجتهد وأنتظر لملاقاة عوض أم ضريسة، ما الشوق، لكن فكرة الانتحار الذيذة القالها لي: قلت ليهو كدي خلينا من زيت الصير والكعكول، إتّا ما لك داير تنتحر؟ طلع النضارة ومسح الدقينة البيضا المشعفة وعاين لي في عيوني، وقال لي أبدأ ليك من وين؟ قلت ليهو من اليمين قال لي: آخر مرّة اتلاقينا بكون سنة كم؟ أعتقد سنة تسعين قبل عرسي بشوية يا أخي، طيلة الزمن دا ما عملت لي شيء عليهو القيمة لي تقريبا أكتر من عشر سنوات لا أدهشت زول لا اندهشت فقط امارس الحياة أمشي الشغل، أجي من الشغل، عقد، مقابر، صلاة العصر، صلاة العشا، كشف لكهربة الجامع، كشف لجلود الضحية نترس البطن ونفضيها نترس بيها محلات تانية، ترس في ترس شغالين تروس يا أبكر، وحات سيدي الحسن، ما في أي fun يا أخي، والله، بكون حافظ تفاصيل اليوم وحوارات الناس ال ح يلاقوني قلت ليهو: السُنة كم مرّة في الأسبوع؟ وقف علي حيلو وانفقع من الضحك وقال لي وعيونو ملانات دموع: يا أخي، وحات سيدي الحسن، ولا واحد من الناس المعفنين الحولي ديل فكر ساكت يسألني السؤال الناعم دا رفع يدو اليسار وفتح اصابعنو ختيت يدي في راسي وقلت ليهو: خمس سنين نهي؟ هوزز راسو لتحت خمس مرات قلت ليهو: خليني أجيب الصير ونشوف موضوع الانتحار دا نشتغلو كيف
01-19-2016, 11:11 AM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
Quote: قلت ليهو: السُنة كم مرّة في الأسبوع؟ وقف علي حيلو وانفقع من الضحك وقال لي وعيونو ملانات دموع: يا أخي، وحات سيدي الحسن، ولا واحد من الناس المعفنين الحولي ديل فكر ساكت يسألني السؤال الناعم دا رفع يدو اليسار وفتح اصابعنو ختيت يدي في راسي وقلت ليهو: خمس سنين نهي؟ هوزز راسو لتحت خمس مرات
أبو داقوسة بالغ هنا ..!! أكان ما السُنه دي كان أنتحر زماااان وتحياتي يا مستنير ...
01-19-2016, 11:48 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
أنا ذاتي يا ود اللمين، لمان رفع لي يدو افتكرت خمس مرات في اللسبوع، لكن وشو ما وش خمسات! عشان كدا فهمت انو قاصد خمس سنوات ما عمل حاجة المهم هو قاعد بنسألو ونحن بنقرم في الصير خمسة سنين ما في؟ ولّ خمسة في الاسبوع؟
01-19-2016, 12:06 PM
بكري الخير بكري الخير
تاريخ التسجيل: 02-12-2008
مجموع المشاركات: 1779
Quote: قال لي: آخر مرّة اتلاقينا بكون سنة كم؟ أعتقد سنة تسعين قبل عرسي بشوية يا أخي، طيلة الزمن دا ما عملت لي شيء عليهو القيمة لي تقريبا أكتر من عشر سنوات لا أدهشت زول لا اندهشت فقط امارس الحياة أمشي الشغل، أجي من الشغل، عقد، مقابر، صلاة العصر، صلاة العشا، كشف لكهربة الجامع، كشف لجلود الضحية نترس البطن ونفضيها نترس بيها محلات تانية، ترس في ترس شغالين تروس يا أبكر، وحات سيدي الحسن، ما في أي fun يا أخي، والله، بكون حافظ تفاصيل اليوم وحوارات الناس ال ح يلاقوني
ياخ دي صورة مبالغ فيها .......... المستنير .......... راجيك
01-19-2016, 12:08 PM
El-Saddig Abdalla Abbas El-Saddig Abdalla Abbas
تاريخ التسجيل: 03-03-2014
مجموع المشاركات: 139
اتا عارف يا (بكور) انا زمان دخلت منبر المرحوم خالد الحاج عشان "زهرة الغرق" الغتست حجر صاحبك . . . وهسي بخش المنبر دا عشان القى لي هضربة من حكاويك الذي دقة الباسطة الملفوفة بي ورقة جريدة سمحة وشوية وتخلص سرعة سرعة
بس ما طوالي
بعد مرات بتبقى انت "وناسك" معاطين، واحنا ما ناقصين
01-19-2016, 12:45 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
أنا ذاتي بردمو بعد كده.. يستاهل يتّستّس من ناس ود البشرى .. ويحلق لي ود قباني وكبر ؤ عثمان في السكة.. ياخي صاحبك اللدود كمين سنة يرتبلك في الاوضة .. ؤ يلململك وريقاتك المشتتة ؤ سفنجاتك الملانا زبالة.. ما اتعلمت منو الترتيب والنظام في التعقيب.. يعني منتصر ؤ ود قباني يقعدو مصنقرين لامن يحمرو الصير ؤ تقرقشو و الصراف يخلص من مشروعاتو الاتنتحارية؟ هو البرستيتج دا بس ياهو شكل الكيس؟
قال ايه : من الشمال ؤ بتسب الدين الا ما داير يقول قبيلتا عشان ما يقولو عنصري!! باااااع.
01-19-2016, 06:52 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
ترتيب شنو يا ماك؟ زمان كلمتكم قلت ليكم نصوصي الأدبية انتو جزء منها!! بدل تكاجروني بفتح همزة إنّ وكسرها ادخل جوة النص الرائع دا واتحكروا وجيبوا صيركم
نرجع للموضوع الاساسي: قال لي: إتّا يا بكّة، جنيت؟! لو خمس في اللسبوع البخليني أنتحر شنو؟ قرمت لي صيرايا بعد غمستها في الشطة، وتبعتها ببصلاية، وخشمي ملان قلت ليهو: غادة كبرت؟ - كبرت شنو؟ لو شفتها تقول تلاتينة، شغالة معاي في البنك والبنك كلو مكسر فيها، الشفع الصغار مرّة قبضتهم بقطعوا فوقي: أم نونات السمحة دي، أدوها أبداقوسة دا كيف؟ قلت ليهو زمان عرض الرجال كان قليل وواصلت، طيب ما لك؟ بلكاتك رخن؟ عندك سكري؟ ضغط؟ قال لي، ديل كلهن ما عندي، مكاجرا في مكاجرا، غلبني أتراجع قلت ليهو: تلقاك يا عوير صدقت قصة اهجروهن في المضاجع؟ نطط عيونو واضنيهو واصلت: ديك ،كان غير الرسميات الاربعة؛ احتياطي كبير من ملك اليمين واصلت: يمكن تكون مصاحبا وقف الأكل وزاد التنطط وقال لي: ورعة جدا قلت ليهو حسب خبرتي مع بتان دبي، الناس ديل مطاوعة في كل شيء إلا الموضوع دا، أصلا ما مدخلنو ضمن الدين، والخميس بمشوا فريج مرر بمشوا سب لي دين وشال صحن الشطة داير يفلقني بيهو قلت ليهو: أصلن ما في شيء بخليك ما تنتحر يا شين
01-19-2016, 07:12 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
قلت ليهو اتا دايرني أدور عليك زي برنامج ما في مشكلة بتاع رشا الرشيد في قناة النيل الازرق؟ البت تتصل عليهم تقول ليهم: زوجي اتغير معاي الدكتور الاخصائية تقول ليها: إتي يا نون، هو اتغير معاك قبل امو تجيكم ولّ بعدها؟ تقول ليها قبلها لكن زاد بعد جاتنا الكتورة: أخواتو بجوكم؟ نون. بجونا الدكتورة: بحب صبخك؟ نون: بحبو زمان الدكتورة: بتغسلي ليهو هدومو؟ نون منتظراها تدخل في الموضوع الاساسي، لمان زهجت قفلت السماعة وسبت لرشا الرشيد وجمال الوالي سيد القناة وقالت من خلف الشاشة: أغسل ليهو هدومو هو بخرا فوقن؟! بلا يخمك ويخم معاكم الكاردينال ذاتو لحدي ما التلفزيون اشوفو اهتز!!
يا زول انا بقول ليك الكلام عديل حتى لو ما كنت رشيتني بالصير دا فشنو لو مستعد تصبغ شعيراتك ديل وتسيب الانتحار، بديك خطة تعيد ليك الfun لحياتك
01-19-2016, 07:28 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3480
شكرا يا انور الاسد من الفيسبوك من امبارح منتظر "حكي طاعم" دي ست البنات قربت، لكن اتا ريحتني بها اصلا حكي طاعم دي بتنزل لي ابليس الكتابة ومعاهو شواطنو الصغار
01-19-2016, 08:14 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: ترتيب شنو يا ماك؟ زمان كلمتكم قلت ليكم نصوصي الأدبية انتو جزء منها!! بدل تكاجروني بفتح همزة إنّ وكسرها ادخل جوة النص الرائع دا واتحكروا وجيبوا صيركم
يا ملك، بكتب من أي فون سكس بلس، تصلحا تجي تلقى الأخطاء تضاعفن يا قباني، تصدق؟ أول بت ردتها وأنا لسع صبي كانت حنان ابراهيم بالافرو بتاعها وهي بتغني لينا: نحن عاشقين مايو يابا نشيل معاها: مايو جات جات للغلابة شكرا على الفيديو ولو عندك ليها اغنية وهي مسرحة آفرو، ألحقنا بيها
في زيارتي الأخيرة للسودان قبل أيام، ذهبت لحي الدرجة، طرقت باب بيت أخي حتى كلّ متني لحدي ما كلمتني بتو الحتالة العشرينية وبعد طايبتني قالت لي بلغة عربية فصحى: أبي مع نفر غزير من أهلنا بالصالون يختمون في القرآن، وكذلك نساء العائلة مع والدتي ببيت النساء قلت لها بنفس الفصحى: هل توفى أحد يا أبنتي؟ - لا يا عمي، إنه راتب اسبوعي تعاهدنا عليه حديثاً غفلت راجعا للوراء كشيطان طردو فكي من جسد عذراء تخيلتها مدني ووعدت بنت أخي بالعودة لاحقا قفزت بي الذاكرة المجنونة لنهاية السبعينات،وأولاد الدرجة يتنافسون في ليلة راس السنة بنادي الجزيرة على انغام بوب مارلي، على جائزة أحسن راقص وراقصة! تمتمت سرا: إن الأرض يرثها عبادي الصالحون وتحيرت من هم الصالحون وتيقنت أن أجمل الروايات، هي في صدورنا نخاف أن تمس تفاصيلها من نحب بأذى!! لمعاوية وكبر السلام في الدارين الدلنج وكوستي
01-29-2016, 01:13 AM
الصادق اسماعيل الصادق اسماعيل
تاريخ التسجيل: 01-14-2005
مجموع المشاركات: 8620
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوبكر عباس
محمد البشرى الخضر
ABUHUSSEIN
ست البنات
Abdullah Idrees
يحي قباني
Kabar
محمد على طه الملك
بكري الخير
El-Saddig Abdalla Abbas
عبدالعزيز الفاضلابى
علي دفع الله
الصادق اسماعيل
Hani Arabi Mohamed
فيس بوك
تويتر
انستقرام
يوتيوب
بنتيريست