شبّال مزخرف بالنجوم

يا جايه من عمق الألقْ
مرسومة بى لون الصفا
معطونه فى عطر الوفا
ومسقيه من روح العبقْ

جايه ومعاكِ الأغنيات
وكل الدروب
كل الخلوق
مرقت تبارك طلتك
تحكى وتقول السمحه جات
تتمعنِك
مندهشه كيف
إنه الفراش إنضمَ ليك
سوَاك حديقة
وفيك سرحْ
وكيف الكلام
حاضن حروفو ومشتهيك
سمّاك حقيقة
عشان يحاول يكتبك
عنوان فرحْ

وكيف الشمس
فرحانه بيك
ساعة الغروب
سوت وهج جيتك شفق
يا جايه من عمق الألق


جايه ومعاك الأمسيات
نشوانه بى معنى الحضور
تتحول الأيام هدايا
شويه ريد
وشويه عيد
شويه زهرات للفريق
وشوية غنوات للصبايا
وكل ألوان البريق
تشعل تفاصيل الحكايه
تعلن صباحك
ونشوة الضو الدفَق
يا جايه من عمق الألق


يا جايه زى لحناً رزين
ممدود على طرب الوتر
موسق خطاويك بالحنين
يا طلتك
ضحكة نجيمه بعيدة عاشقه
وغمزة فى وجنة قمر
رعشة رذاذ جوه الغيوم
يا طلتك
شبَال مزخرف بالنجوم
يا طلتك
إشراق سنا
وإيقاع مدوزن فى نسق
يا جاية من عمق الألق

يا مارقه من ضو القصيدة
وطالعه من زهو النشيد
نشوان مقام الريده
فى زحمة غناى
طربان مبلل بى شذاكِ
ودمعة الفرح العنيد
روّضْتّى حزن الليل معاى
جيتك وطن
خليت اساى
ومعاكى خلتنى المحن
معاكى فارقت الشجن
جيتك وطن
فُتَّ المواجع و الرهق
يا جايه من عمق الألق