08:23 AM May, 04 2016 سودانيز اون لاين د.محمد حسن- مكتبتى رابط مختصرسد مروي ماسورة الانقاذ المحلوجة لا ادتنا موية لا ادتنا كهربا يعني بقى خازوق يسدد الشعب الفضل ديونه غصبا عنه جدولة الكهربا لانه الانتاج الحراري لا يكفي ةالفيرنس الرخيييييييييييص ده مافي والشراء بالاجل بقى غالي لانو الحكومة ما عندها قروش والسماسرة الفي النص كتااار وكل زول حقو بره ( رجاء عدم تاويل العبارة لانها متداولة بشدة في سوق السماسرة من بين الوزارات وعمارة الضرايب) اما الدهب فده زي حجوة ام ضبيبينه كدي نقارن (
Quote: 5- جنوب أفريقياإنتاج المناجم: 170 طن | النسبة المئوية من إجمالي احتياطيات النقد الأجنبي: 12.7٪قد وتراجعت جنوب أفريقيا عن كونها أكبر منتج لكونها منتج خامس في غضون ست سنوات
يلا نشوف نحن الخطيرين والا خطر من ميسي قول واحد
Quote: أعلن وزير المعادن السوداني أحمد صادق الكاروري أن السودان أنتج 82 طنا من الذهب منذ بداية عام 2015 حتى مطلع ديسمبر/كانون الأول الجاري.وقال الكاروري في تصريحات نقلتها وكالة الأناضول أمس الاثنين، إن بلاده باتت تعتمد على صادرات المعادن -لا سيما الذهب- لجلب العملات الصعبة لاستيراد عدد من السلع المهمة، وأشار إلى إقبال كبير من الدول والشركات العالمية على قطاع المعادن السوداني.وبحسب إعلان سابق صادر عن وزارة المعادن السودانية، بلغت جملة عائدات الذهب أكثر من مليار دولار خلال عام 2014، حيث أنتج السودان 71 طنا منهغرد النص عبر تويتر، لكن الوزير لم يوضح في تصريحاته قيمة إنتاج هذا العام.
وقول اتنين
Quote: أعلن وزير المعادن السوداني أحمد صادق الكاروري أن السودان أنتج 82 طنا من الذهب منذ بداية عام 2015 حتى مطلع ديسمبر/كانون الأول الجاري.وقال الكاروري في تصريحات نقلتها وكالة الأناضول أمس الاثنين، إن بلاده باتت تعتمد على صادرات المعادن -لا سيما الذهب- لجلب العملات الصعبة لاستيراد عدد من السلع المهمة، وأشار إلى إقبال كبير من الدول والشركات العالمية على قطاع المعادن السوداني.وبحسب إعلان سابق صادر عن وزارة المعادن السودانية، بلغت جملة عائدات الذهب أكثر من مليار دولار خلال عام 2014، حيث أنتج السودان 71 طنا منهغرد النص عبر تويتر، لكن الوزير لم يوضح في تصريحاته قيمة إنتاج هذا العام.
وقد كاد عقلي يذهب ياخ نحن لما عندنا دهب قدر ده متغربين ليه؟يبدو انو موضوع البترول راح في الباي باي والاتجاه للذهب طيب ليه؟ايوة ليه لانو البترول الزمان لسه قروشو ما معروفة وين واذا طلع بترول جديد حيكون في شكل محاسبة دقيق لكن الدهب ده للحد الان ارقام بس لكن بينتج كيف؟ ووين ؟وبتباع كيف؟لسة اسالة من الصعب الاجابة عليها غايتو النفسو في الدهب عاين لي رقبة فلانه الفنانة يعني سياستنا الاقتصادية زي فريق المريخ الان يمرق من دي يقع في الكونفدرالية وبعد شوية يعرض النادي للبيع في مزاد علني لكن الببيع منو عرفنا المشتري وقروش البيعه الحيستلمها منو ؟وحتتخط في ياتو حساب وناس حقي برة كم عددهم في نادي المريخ العظيم انا خايف في الاخر يتوضع في حساب النادي مبلغ 100 جنيه بالقديم ابو عركي البخيت بالله الحقنا بي اغنية اضحكي
السلام عليكم د.محمد الحسن سد مروي علي رسم الكاركتير فيما اذكر انو طلع ماسورة بيشتغل بي الكهربا ما بولد كهربا حاله حال البضائع التي تستورد من الصين رديئة التصنيع ما يهمني هو الذهب حسب العرف الجاري هنا هناك نوعين من التعدين الأول مايعرف بي التعدين الأهلي و الثاني مايعرف بتعدين الشركات التعدين الأهلي وهو عدة انواع يبدأ بحامل الجهاز كاشف لي المعادن - زي بتاع الألغام داك الزمان - ويسير لحدي مايلقي ليهو حاجه توقفو يبدأ البحث حتي يجد تلك الحته وهو ورزقو تتراوح مابين تسالييايه وإلي خليه دي بالجرامات مابقدر اوصفها المهم التقسيم اخر اليوم علي 3 صاحب الجهاز و الجهاز و العامل النوع التاني - ودا ذا تأثير علي الشركات بعدين بشرحها ليك - يبدأ في عمل شكل بئر للتنقيب ويبدأ في فتح منجم - عشوائي شديد - ويتعرض المخرج لي عمليات الطحن اليدوي ويعبأ في شوالات ويمشيو بيهو الطاحونه اها في الطاحونه دي يطحنوهو وتلخبط بي زئبق ويتم إستخراج الذهب و يترك باقي التراب - التراب دا بسموهو كرته - ديل ماعندهم علاقة بي وزارة المعادن نهائيا بتشتغل معاهم المحليات وبتجي بيكون عندها يوم في البير بتجيب العمال وبيشتغلو فيها ودي عبارة عن رسوم كل 15 يوم تقريبا المحليه عندها يوم ممكن عشان المحلية ماتخش تدفع كاش وبخلو يومك يمشو لي ناس تانيه الإيراد - سواء ان كان محليه او افراد - يقسم علي 2 أو 3 حسب الناس صاحب البئر وصاحب الأليه والعمال وفي حالات لاتوجد اليه بتكون نص لي العمال ونص لي صاحب البئر مميزات التعدين الأهلي هو عملية الكشف العملي - مفروض تقوم بيهو الوزارة - لي معدن الذهب - اما عيوبه فهي كثييرة جدا اهمها انو بتضيع باقي المعادن من معادن نادرة ولي اي نوع اخر من المعادن المطلوب هو الذهب ولاشئ غير الذهب وانت عارف انو في انواع من المعادن النادرة الجرام بي الاف من جرامات الذهب اما اخطر المشاكل هو الزئبق المستخدم في عمليات الغسيل لإستخراج الذهب وتأثيره علي البشر وعلي الحيوانات و الزراعة و الثروة السمكية و المياه الجوفيه - التعدين الأهلي منتشر في كل السودان نجي نشوف الشركات تنقسم الشركات العاملة في التعدين إلي 3 أقسام تقريبا - دي لي ناس قريعتي راحت الزي انا وانت اكيد في تصنيف رابع وخامس بس ما لي العوام بيكون لي الخواص و وخواص الخواص - في تعدين رسوبي وفي تعدين كبير وفي معالجة مخلفات التعدين الرسوبي دا بتلقاهو في مناطق الخيران القريبه من النيل دائما لإعتمادة التام علي المياه ويبدأ بتجريف الخور وتكويمه الخور في شكل كيمان كيمان - بعد دراسة الخور وفحص نوعية الخام والخ - بعداك بتشد أليه لعملية الغسيل ويبدأ المولد بغسل كل تلك الأكوام وتعريضه لي كميات كبيره من المياه وعمل مصافي - موكيت العادي دا- لتقل الذهب و العناصر الأخري يتم الترسيب في حاجه زي محاكاه لي الواقع ودا بمتاز غير انك جرفته الخور ماضريت شي التعدين الكبير انك تاخد بإسم الشركة مربع كامل وتبدأ في الدراسة لعمل خرط لي المربع وترسيم حدوده بعد داك بتبدأ في فتح المنجم بي صورة صحيحه - حسب مهندسين التعدين - وتبدأ في استخراج الذهب الميزة الفيهو انت مستهدف خط سير الذهب وبتكون راسم خريطة وماشي عليها فما بتضر اي شكل من أشكال التعدين لي قدام أو العناصر الأخر - ممكن تقول انو في ناس ممكن تستغل الحته دي بي أنها تعلن انها شغاله دهب وهي شغاله عناصر تانيه - بعد داك تطحن وتبدأ تدخل في عمليات تانيه نفس مخلفات التعدين نجي لي النوع التالت وهو معالجة مخلفات التعدين ودا بيتم بعد انتهاء من مرحلة الزئبق - بيستخلص لحد 40% من الذهب حسب الكتب - تبدأ العملية بإستخدام حامض الساينايد - تقريبا - ودا مادة سامة شديدة السمية وشديدة الخطورة - بيتعمل وفق لي 3 طرق الأحواض الأرضية أو الأحواض الفوقية و نظرية ال CIL هي في النهاية بتشيل الحامض بتدخل في التراب - حسب الطريقة - ويتم فصل الحامض من التراب وغسل التراب للتأكد من عدم وجود اي باقي وسحب الدهب من الحامض بأي طريقة كانت حرق او الفصل الكهربائي خطورتو في المادة المستخدمة وسميتها العالية حسب الصيغ بتاعت الشراكة مع الوزارة تخصم حوالي حاجة وعشرين في الميه من الإجمالي لصالح الدولة بعد ماتخصم البيفضل حاجه وسبعين دي يخصم منها تكاليف الإنتاج و الخ و الأرباح الحكومة السودانية - المحليات و الجبايات و الخ - عندهم نسبة لكن يا عشرة أو في حدودها في المية الباقي بيكون حق الشركة دا بإختصار شديد انتاج القومي لي الدهب بالحال الفوق دا انا أكاد اقول ليك في شركات انتاجياتها بتكون عاليه جدا جدا وفي شركات ناس قريعتي راحت الأهم من الإنتاج وكحال السودان هو عمليات مابعد الخام وللأسف الشديد السودان غير داخل في عمليات التصنيع - معظم المصدر خام - انا بقول ليك خام بيطلع من التصنيع في الفوق دا كلو دهب عيار 1000 ولي للأسف الشديد معظم الناس العيار دا بيكونو ماسمعو بيهو -دهب خام - لو اضاف السودان عمليات الصنيع عشان اوضح ليك الصورة اكتر الخام عيار 1000 -حتكون لي 1000 جرام من السبيكة دهب عيار 24 تقريبا في حوالي 800 دهب و الباقي نحاس دهب عيار 21 تقريبا حوالي 700 دهب و الباقي نحاس دهب عيار 18 تقريبا حوالي 600 دهب و الباقي نحاس ماشرط نحاس بس وعلي ما اظن خلطه هي لكن تقريبا في الحدود الأرقام الكاتبه ليك بعد داك بيدخل في عمليات الصنيع لي سبائك أو اشكال استخدام اخري لو كلام الكاروري صح - بفرضية انو صح - دا يبقي مجال لي تصنيع دهب خرافي بيفتح مجال لي فرص عمل من عمال تشكيل الدهب و تصهير وعمل السبائك وتصميم منتجات الدهب واضاافات الدهب وبدل مايتصدر خام يتصدر في صيغ حلي دهبيه - الكلام دا ما ممكن يحصل لي عدة اسباب اولها انو يتم تصدير الدهب و الإستفادة بيهو في مجال السوق الأسود لي الدولار زي المواشي والخ من المنتجات السودانية البتتصدر خام وفي الختام ارجو ان اكون قد وفقت في تبسيط صورة التعدين في السودان وارجو من الأخوة في الجيولوجيا تصحيح المعلومات في حال خطأ والسلام عليكم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
د.محمد حسن
Mahamed Eltaze
فيس بوك
تويتر
انستقرام
يوتيوب
بنتيريست