صديقي كافوتا لديه عادة عجيبة،فهو عندما يحكي شيئا يغلق عينيه أولا ثم يبدأ في الحكي..
قال لي ذات مرة :إنت عارف طبعا إنو أنا عندي مصران،أها مرات بتعبني شديد،يوم المرة قالتلي :جارتنا عواطف قالت الردة بتعالج المصران.. أنا ماكنت عارف الردة دي شنو بالضبط،فسألتها :الردة دي ياهابتاعة الحمير وللا واحدة غيرا؟ قالت:لا، دي بتاعة الخرفان.. قلتليها : جارتك عواطف دي،مش ياها الكسرت جك العصير حقنا؟ قالتلي :أيوا، لكن دا دخلو شنو بموضوع الردة.. قلتليها :والله أنا كجنتها من اليوم داك،ومن ناحية نفسية كدا مابقدر استفيد من علاجا دا.. وهنا فتح عينيه :طبعا إنت عارف ياصاحبي، النسوان ديل لما يختن حاجة في راسن،تاني مابنزلنها بالساهل.. وأغمض عينيه من جديد:أها قامت رسلت ولّي بتاع الركشة قالتليهو جيب ربع بتاع ردة.. أنا قلت في سري ربع كااامل،المرة دي تكون ناوية تضبحني في عيد الضحية وعاملة حكاية العلاج دي وهمة ساكت.. بعد ولّي جا،البرنامج بدا طوالي،كباية كبيرة من نقيع الردة صباحا وظهرا وليلا.. وكل مرة المرة تسألني :أها ماشاعر بتحسن و أنا طبعا برد :تحسن كبير.. وهنا فتح عينيه:إنت عارف،هي طعما ماكعب،عامل زي الشعير كدا،لكن أنا زهجت منها،ماممكن ياخي زول كبير كدا كل يوم يقرطع في عصير الردة تلاتة مرات.. وأغمض من جديد :أها قلت أعمل لي وهمة كدا أتخارج بيها من الموضوع دا..يوم بعد سقتني كباية الصباح طوالي شبكتها ليك :بااع،باااع،بااااع... قامت هرشتني :مالك في شنو اتكلم كويس.. وأنا طوالي رجعت للواقع وقلتليها: داير قهوة.. مشت عملت القهوة وجابتا.. بعد كباية الضهر،شبكتها تاني :بااع،باااع.. قالتلي:هديك في التربيزة الجمب السرير.. قلتليها :شنو هي؟ قالتلي :مش بتسأل من النضارة؟ وهنا فتح من جديد:إنت عارف ياصاحب أنا فعلا كنت بسأل من النضارة.
11-18-2016, 03:06 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
بديع يا عليش الريدة عليش الريدة دي لو ختيت بعدها علامة استفهام بتبقى زي السؤال كده: عليش الريدة ؟ النسوان فعلا ذكيات فيما يتعلق برجالهن عشان كده حتى لو قلت باع الواحدة بتعرفك قاصد شنو ههههه لكنهن يتمتعن باندفاع و رغبة في التجريب و استجابة سهلة و انقياد للحكمة السائدة في نفس الوقت. و هو امر يتعارض مع الذكاء و يثير الحيرة في امرهن. الواحدة يقولوا ليها اشربي محاية تشرب، دهني طفلك بزيت الخروع تدهن، اسقي راجلك موية ردة ما في مانع و هكذا. اعلم ان التعميم افة الافات و لكن يبدو احيانا الا مفر منه.
11-18-2016, 03:18 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3479
الرٓدّة أو نخالة القمح أو السبوس بلغة الخلايجة من المكونات الاساسية في غذاء ابل الحليب. اثناء قراءتي لنص عليش دا، كنت منتظر انها ممكن حقيقة تدي تأثير ايجابي في علاج المصران بالرغم من كثرة الفايبر؟؟ فهي تضاف لغذاء الانسان لتنشيط البكتريا في المصارين الغليظة الارتباط بالردة البيطرية افسد علي متعة المفارقة في النص!
فعلا يا ابوبكر الردة او النخالة و ما في حكمها من الالياف الغذائية تستخدم في علاج بعض حالات المصران العصبي و تجد بعضها في شكل حبوب او بريكفاست سيريل و ما الى ذلك. المرضى يفضلون تسميتها نخالة او bran عوضا عن ردة. المهم هي ليست دائما ناجعة في علاج القولون. في ظني عليش ليس مهتما في الأساس بفرضية انو الردة بتعالج او ما بتعالج.
11-18-2016, 04:46 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
في ظني عليش ليس مهتما في الأساس بفرضية انو الردة بتعالج او ما بتعالج. ـــــــــــــــــــــــــــــــــــــــــــــــــ صحيح يادكتور ،دار اتكلم عن اليوم العالمي للزوجة..
اثناء قراءتي لنص عليش دا، كنت منتظر انها ممكن حقيقة تدي تأثير ايجابي في علاج المصران ـــــــــــــــــــــــــــــــــــــــــــــــــــــــــــــــــــــــ يامستنير ،النص هو سيفي الذي به أجندل كاريزما الحقائق
11-18-2016, 05:11 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3479
غير صحيح انو النص غير مهتم بأنو الردة تعالج أو لا تعالج المصران؟ المفارقة جاية من انو الردة لعلاج المصران هي خرطي بتاع نسوان ساكت، وبالرغم من دا تستطيع الزوجة أن تفرضه عليك! هذه المفارقة تعتمد على عدم المعرفة بحقائق الردة، وحصرها في كونها هي فقط علف للحيوانات
أبداً يا عليش، النص لا يستطيع أن يجندل الحقائق الغائبة
11-18-2016, 05:53 AM
علي دفع الله علي دفع الله
تاريخ التسجيل: 08-31-2012
مجموع المشاركات: 4740
يامستنير ،أنا قلت الكاريزما ماقلت الحقائق..مرات بتندفع غلط في حاجات ظاهرة.. بعدين أنا قلت الزول دا اسمو كافوتا،عشان أطلع من بؤرة الحقائق..الاسم دا أصلو ما أداك إنطباع بشئ محدد أبدا.. الحقائق برا النص،في الحياة العامة،أنا عبد من عبيدها،لكن هنا في نصي،ملكي،حر ذهني، والله أجندل ليك الكاريزما حقتا جندلة...إت قايل الناس بتحب الحقائق يعني؟ أبدا ،ديل بحبوا نتائج الحقائق..عشان كدا صابرين على الحقائق.. زي الموظف البحب يوم 30 عشان الماهية هههه
*المداخلة الجاية هدية عشانك،تريث شوية..
11-18-2016, 03:07 PM
جلالدونا جلالدونا
تاريخ التسجيل: 04-26-2014
مجموع المشاركات: 9389
عليش ازيك ياخ ياخى كافوتا ده الذّ زول ياخى قولو ليهو يقول لو مرتو دى تسأل جارتا عن شوربة قشر البصل .. البصل الناشف ما اللخدر ... قالو بتنفع فى حاجات كتيرة بس اهم حاجة يقول الكلام ده و هو مفتح عشان يتأكد لينا من المقادير ___ يا بكور ياخ خليهو يتم كلامو و بعدين نشوف الكاريزما و الحقايق و يوم 30
11-18-2016, 03:14 PM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
كنت أنا،أود أن اتكلم عن حديث سيدي عمر،عن ذلك الرجل الذي يريد أن يطلق زوجته لأنه لايحبها،قال له سيدي عمر: ويحك،أو كل البيوت يقوم على الحب.. كنت أود الحديث عن هذا،لكن كافوتا بادرني سائلا : إت في يوم عالمي للزوجة؟ يعني أنا سمعت بيوم الحب،ويوم المرأة ،ويوم الأم..لكن يوم الزوجة دا ماسمعت بيهو..إت سمعت بيه؟ وهنا دهمني الشعور بالرغبة في التدخين،أنا الآن لست مدخنا،لكني في السابق كنت شرها جدا، وبطبيعة الحال،قصة إقلاعي عن التدخين،ليست مهمة في مانحن فيه الآن،لكن إكراما لزيارة المستنير،سأقوم بسردها...إكرام الضيف ــــ كما تعلم يامستنير ــــ هي عادة عليها نشأنا،مسلمين ومسيحين ولادينيين... أنت وأنا وغيرنا،مدينون لتلك العادات،نعم يجب تطويرها،لكن الذي يجب بصورة أدق،هو الاعتراف بأن الدرجة من السلم التي نقف عليها الآن،تلك الدرجة التي أتاحت لنا رؤية العيوب والقصور،إنما هي نتاج لتلك العادات،هناك حقيقة لامراء حولها،وهي أن،أنت وأنا وغيرنا،أجنة خرجت لهذا العالم من رحم تلك العادات.. والناس تظهر ترحابها بالضيف بطرق شتى،وأنا الآن تواجهني معضلة تقنية،إذ لايمكنني ذبح كبش وإرساله عبر الشبكة،العلم لم يصل لهذا بعد،لذلك لامانع من التحايل،سأذبح قصة سمينة،كنت أعلفها منذ زمن بعيد،أردت إدخارها لليوم الأسود،لكن في هذا البوست سأقدمها قربانا.. تزوجت في عام 2004،وكنت قادم من مدينة واو (في دولة الجنوب غير الشقيقة)، ولأن البلاد حينها كانت مقبلة على اتفاق سلام،والأوضاع كانت هادئة على الجبهة،قررت اصطحاب زوجتي معي مباشرة بعد شهر العسل،كان هناك إشلاق صغير للضباط،بعد حوالى شهرين من قدومنا،بدأت المدام تشعر بأعراض مرضية،كان هناك شح في العربات الميرية الإدارية،لدينا عربة واحدة مخصصة لقائد الكتيبة،القائد رجل كريم لكنه عملي،قدر لو أنه أعطى العربة لكل طالب،فإن ذلك سيؤدي لتلفها وحرمان الناس بالتالي من خدماتها،فقرر أن العربة للجميع ،لكن بشرط واحد ،من يقود هو السائق.. آدم ودفور هو السائق،شاب ممتاز ،عسكري نشيط،وسائق محترف،في تلك الأمسية امتطينا العربة وذهبنا لعيادة د.علي في طرف سوق الجو... قبل هذا تعرضت أنا لمحاولات عدة لترك التدخين،لكن كما تعلم باءت جميعها بالفشل،آخر محاولة كانت كالآتي:إن حملت المدام فسأترك التدخين.. في تلك الأمسية،كنت موقن أن هناك حمل،كان لدي صندوق به ثلاث سجارات،دخنت واحدة في الطريق،وواحدة أثناء انتظارنا للنتيجة...ثم قال الفحيص :مبروك جاييك ولد.. وهنا ناولت ودفور آخر سجاراتي وقذفت بالصندوق في السلة (لم تكن هناك سلة )،ودفور وحسب التقاليد العسكرية،وأيضا تقاليد تبادل السجائر(كانت آخر واحدة في الصندوق)،رفض أخذها مني ،لكني ألححت،واستجابة لإلحاحي قال:خلاص ياسيادتك نخمسا،جر واديني.. قلت :أنا خليت السجائر ياود فور.. لم يسأل،ولم أشرح،كنت مشغولا،بهذا الضيف الذي يطرق على الباب (مثلك الآن)..ولأننا ،أنت وأنا وغيرنا،مجبولون على هذه العادات،فقد أكرمت ذاك الضيف العزيز،إكراما رفيعا،ومازلت.. آدم ودفور،تعرضت قريته في دارفور لمناوشات حربية،وتبعثر أهله في الصحراء،بناء على ذلك قرر القائد إلحاقه على قواتنا في الفاشر،حتى يتمكن من جمع شمل عائلته،أمضى في إلحاقه ذاك فترة تمانية أشهر،ثم حضر من جديد،قبل أن يحضر بأيام،تلقيت أنا اتصالا من شندي :مبروك جاك ولد،نسميهو منو؟ قلت:محمد عليه السلام.. بعد أيام حضر ودفور،وبعد أن تعانقنا،قال :بتذكر سجارتك ديك ياسيادتك؟ :بالحيل..وندمان عليها لي هسّ :ههه...ديك كانت آخر سيجارة شربتها.. :يازوووول؟.. :والله جد،أنا قلت سيادتو دا،بشرب تلاتة علب يومي،وخلاّ السجاير،وأنا بشرب خمسة سجارات بس،وما أقدر أخليهو؟ومن ديك ماشربت تاني.. أنا قلت في سري:بركاتك ياحمودي،مدد،مدد.. طلقتين تحية للمستنير.. أو كما يقول جورج قرداحي :تحية إكبيرة..
11-18-2016, 03:26 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3479
أقصد بالظبط في مداخلتي السابقة كاريزما الردة. الفاو تتطلع الى انتاج حليب من الابل بالاماكن الجافة يعتمد على اعلاف لا تتقاطع مع الانسان. هوس الانسان بالصحة خلق للردة كاريزما جديدة تجعل الفاو تستبعده من تطلعاتها.
11-18-2016, 03:46 PM
اخلاص عبدالرحمن المشرف اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
الشبكة زي الزفت النتم الموضوع بعداك برد على الزملاء والزميلات الأفاضل
الشعور بالرغبة في سلخ سجارة ،ينقسم لنوعين،نوع تحكمه العادة،والآخر تصنعه المناسبات المستفزة..تماما مثل الاجتماعات،اجتماع روتيني مبرمج،واجتماع طارئ..والنوع الثاني ،خطر وأشد وطاة,مثل قصة زميلنا الذي ترك التدخين لمدة ثلاث سنوات،وتصادف أن كان ذات يوم،متحركا مع مجموعة في نواحي مدينة (ياي)،فانفجر لغم تحت عربته التي يستقلها،هرع إليه الناس ليتفقدوه،سألوه :نعل ماجاتك عوجة؟ قال:أنا كويس،ولعوا لي سجارة..خرماااان أنا نسيت التدخين،صرت حتى أتضايق من روائح التدخين،لكني لم أنس الطقوس..النوع الثاني،خطر وأشد وطأة.. شعرت برغبة عارمة،عندما بادرني كافوتا بذلك السؤال،لذا لم أتحدث عن قصة سيدي عمر،وإنما قلت: تعرف ياكافوتا،في حلتنا في زوجين كبار في السن،عاشو مع بعض أكتر من خمسين سنة،نصف قرن،يوبيل فضي دا وللا ذهبي ياكافوتا؟ لم يرد..واستمريت : الزوج اسمو الطيب،الزوجة آمنة،أولادن تزوجوا كلهم وسافروا برّا الحلة،الراجل ومرتو،ليهم حكاية عشر سنوات عايشين براهم،الراجل فتر، وقعادو بقى معظمو في البيت، المرة أضانا تقيلة شوية،لكن هي مازالت نشيطة،بتشتغل في البيت وتحوم على الناس.. أها الناس لما يلاقوها،بسألوها أسئلة مختلفة،حسب الحال،عن أحوال الأبناء،هل ذهبت هي لحاجة فاطمة العيانة مثلا،هل تريد شيئا من السوق..وهكذا.. حاجة آمنة أضانا تقيلة،عشان كدا كانت بتجاوب إجابة واحدة،أو أجوبة مختلفة،لكن بتعتقد أن السؤال واحد،كانت تجاوب كالآتي،حسب الحال:خليتو كويس..أو :ماعندو عوجة والله...أو: أمس مانام الليل كلو يقنت..أو:الليلة كمان جابلوا وجع أضان... حاجة آمنة،بتظن دائما أن الناس بسألوها عن زوجها...إت عارف دا شئ قريب من لحظات فكة البنج،وكت الهضربة ديك،الزول بحرك لسانو بأهم الأشياء عندو،الأشياء المتحكرة في العقل الباطن، ومصنقرة في عصب المخ...دي خمسين سنة ياكافوتا،خمسيييين سنة..
التحية ،للزوجة التي أحبت،وأخلصت.. الاحترام والعرفان وجزيل التقدير،للزوجة التي لم تستطع أن تحب،وأخلصت.. لا أعرف شخصا آخرا،جمع سواها،بين عدم الحب والإخلاص..سفح البطولات واسعٌ،والقمة ضيقة..
11-18-2016, 07:02 PM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
عليش ازيك ياخ ياخى كافوتا ده الذّ زول ياخى قولو ليهو يقول لو مرتو دى تسأل جارتا عن شوربة قشر البصل .. البصل الناشف ما اللخدر ... قالو بتنفع فى حاجات كتيرة بس اهم حاجة يقول الكلام ده و هو مفتح عشان يتأكد لينا من المقادير ـــــــــــــــــــــــــــــــــــــــــــــــــــ مرحب الأخ جلالدونا.. سألت كافوتا من كلامك.. قالي :جلالدونا دا ياهو زول أمريكا؟ قلتليهو :آي قالي :طيب أنا أضمنو كيف بسأل من قشر البصل تحديدا، مايمكن يكون قاصد حاجة تانية، ويجيب لينا هوى بسؤالو دا؟ ناس أمريكا ديل نضميهن براهو..
11-18-2016, 07:22 PM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
أقصد بالظبط في مداخلتي السابقة كاريزما الردة. الفاو تتطلع الى انتاج حليب من الابل بالاماكن الجافة يعتمد على اعلاف لا تتقاطع مع الانسان. هوس الانسان بالصحة خلق للردة كاريزما جديدة تجعل الفاو تستبعده من تطلعاتها. ــــــــــــــــــــــ دي ياها قضيتك البتنطط فيها من الصباح.. أول حاجة هنا مافي هوس،تاني حاجة ،مافي كاريزما للردة، في كاريزما لكن ماللردة.. تالت حاجة ودي الأهم :الفاو دي ما إلهة إغريقية،دي منظمة عملوها البشر،وبخدموا فيها البشر، هن صاح (بيض) لكن بشر برضو..عندهم قصور وضعف زي باقي البشر.. يعني ماتألهن لينا،هي مش مسؤلة من غذاء العالم؟ أها ،العالم جعان.. مجلس الأمن مش مسؤل من أمن العالم؟أها،العالم غير آمن.. في رأيي ،منظمة الأمم المتحدة أكبر همبول في مزرعة العالم،الهمبول قاعد،والطير ياكل في السنابل..لكن الكلام دا مابعجبك.. هسّ انا قايلك دار تتكلم في الأدب،تجي تقول لي الفاو.. بلا فاو بلا بطيخ
11-18-2016, 07:42 PM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
ليش تضايقت؟ مداخلتي الأولى قلت انو المعرفة بخصوص الردة أفسدت علي المتعة. ثم بعد ذلك الكلام جرّ الكلام، لكن ليس لي نقطة خططت للوصول اليها أو نططت عشانها.
ناخد بنصيحة جلال ونتكامل الخروج
11-18-2016, 10:39 PM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
ليش تضايقت؟ مداخلتي الأولى قلت انو المعرفة بخصوص الردة أفسدت علي المتعة. ثم بعد ذلك الكلام جرّ الكلام، لكن ليس لي نقطة خططت للوصول اليها أو نططت عشانها.
ناخد بنصيحة جلال ونتكامل الخروج ــــــــــــــــــــــــــــــــــــــــــــــــــــــــــــــــــــــ هل أنا تضايقت من قولة تيت؟ أنا فرحت بجيتك هنا..لكن إنت لسّ مكنكش في عادتك القديمة.. عارفا وللا لا؟ أوريك ليها.. ما أظن نواياك سيئة، لكن النوايا خليها مابنقدر نحددا.. البنقدر نحددو هو الإسلوب المتبع في توصيل الأفكار.. الناس ــــ عادة ـــــ تقبل أن تسمع أسوأ الأفكار، لكن بإسلوب (مختار بعناية).. وترفض ـــ عادة ـــــ أجمل الأفكار المطروحة بإسلوب (كلفتك كلفتك) نصيحة ليك ،قبل ماترسل أي مداخلة،تريث واقرأ واقرأ.. مش عشان القارئ وبس،لكن عشان ماتضيع مجهوداتك بيديك ..(كمثال إنت ماخشيت هنا عشان نصل المرحلة دي) في أديبة سألوها :ماهي الكتابة؟ قالت :إعادة الكتابة
11-19-2016, 07:54 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
اخدني معاك بالله يا ابو بكر :) ــــــــــــــــــــــــــــــــــــــــــ يادكتور سيف.. اللبرالية وبقية المبادئ البتطرحا في كتاباتك هنا،مفروض تكبحك من مثل سؤالك عن هل أنا مازلت دياشي أم تاب الله عليّ.. طيب إذا كنت أنت تكره الدياشة،ماذنبي أنا شخصيا؟ مايمكن الحاجات البتكرها فيهم أنا مافيني، وللا داير جمهورية السودان ،تكون بدون جيش؟ في يوم من الأيام،سيعرف السودانيون، الأدوار التي لعبها الضباط المستقلون المحترفون،طوال تاريخ سياستنا المهترئة، وخاصة زمن الأنقاذ.. الشئ البديع،إنو الأدوار دي،إتلعبت بصمت شديد، وقوبلت باستنكار أشد.. * الناس ديل ياسيف مامقبولين من بقية الضباط المتحزبين، ومامقبولين كمان منكم.. شفت الألم دا كيف؟ وجايي تقولي لسّ دياشي؟
ملحوظة: لا احب الحديث إطلاقا عن فترتي في الجيش ولا عن الجيش، لكن زيارة المستنير فرحتني وقلت أبرو.. رغم الدراب البرمي فيهو.. غايتو كل يوم يمر بنزهد في المنبر أكتر
11-19-2016, 08:15 AM
اخلاص عبدالرحمن المشرف اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
اجمل الزواج ما كان زوجك حبيبك الوعي اهم شئ ويا ريت الدياشي النظيف ، يشوف الواقف وحيد في هوج الرياح ما خائف ،. عمر الواحد يقضيه مع الزوج لو 20او25 سنة لو بعد عنه بكون وحيد اقصد تتكلم لينا عن زوج او زوجة بعد وفاة الطرف التاني، علميآ اكل الردة بجيب نفاخ ويجاهد المرء به وفيه واعد القرأة يا صديق دم صديق. انت وكثر مثلك
يا عليش، بحاول اتواصل معاك في المداخلات مستقبلا بصورة أحسن. ذهابك لا نرضاه وكتاباتك الأدبية واحدة من أجمل الكتابات بالمنبر. لك أن تعرف أني أضعت فيها أكثر من كرت تلفون قطيعة مع أصدقاء عبر البحار حول جمالها. فشنو أنا ممكن اتسبب في ذهاب بعض الرجرجة، لكن إتّا لا لا
11-19-2016, 09:30 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
فرحت جدا بهذا البوست الذي جمع باقة من أحبائي فااا شنو يا عليش الريدة، تعامَل بروح ملاك لم تجرب النوايا السيئة للإنسان ولم تخبرها قط تخيل أنبل وأنقى وأصفى معنى يمكن أن يلبد في ثنايا المداخلات ثم بروح الملاك البريئة تلك، خذه -هذا المعنى- وتعامل معه كما تشاء ليس لي روح ملاك ولكني لم أجد في مداخلات المستنير وسيف النصر إلا كل جميل و نبيه ----
Quote: بما اني عندي مصران والردة بتعالج على طول فكرت ارتد هههه... اصلي متحايل ...
يا علي دفع الله، ترتد من شنو؟ هههاع
11-19-2016, 09:43 AM
Kabar Kabar
تاريخ التسجيل: 11-26-2002
مجموع المشاركات: 18537
عليش..حبابك يا صديق وحباب الصديقات والأصدقاء هنا..
كتر خيرك ، ودوما حكاويك في الخاطر..وكل ما الواحد يقول يطايبك..يلقى روحو تايه في نقات تانية ..المهم..اهلنا قالوا القحة ولا صمة الخشم.. طبعا روح الحكي سمحة شديد ، ومرات الزول قاعد يتونس بحكاويك دي لأنها بتديك فرقة تشوف الحاجات بصورة مفارقة شوية..يعني مش فكرة الضحك والإستمتاع وانما التجربة فيها حاجات مفيدة كتير..! في النص ده ، عجبني تكنيك الحكي ، والبداية المفارقة..ويتخيل لي الناس البتقرا ادب امريكا اللاتينية ، خصوصا كتابة ماركيز ، بورخيس ، جورج امادو وغيرهم ، اول حاجة بتلاحظها هي فكرة المفارقة في بداية الحكي..!! يعني مثلا انتا لمن تخط فكرة سلوك كافوتا لمن يحكي.. اول حاجة تتبادر للذهن ليه الكاتب مصر يوصف لينا السلوك ده؟..بالطبع الفكرة مهمة لأن النص قايم عليها تماما.. يعني كافوتا غمض تلاتة مرات ، وفتح عيونو تلاتة مرات..ولمن يفتح بيقوم يفك كلام (حكمة)..ولمن يحكي بيفك كلام تفاصيل..!!..فكرة ظريفة ياااااااخ وانت اشتغلت عليها بدقة عجيبة خلاص..!!
زمان في الدلنج يا عليش ، ايام البريك دانس ظهر دوبك ، عندنا اصحابنا اتنين عاملين ثنائي (ليلى هينو وادم بريك – ليلى سموها على الهينو مش لأنها ممتلئة الجسم ، ولكن لمن كان عمرها سبع سنين جات قاطعة شارع الظلط وفي عربية لوري هينو جاية ، اها السواق حاول يتفاداها ، بردلب قلب ليك اللوري ، فصار اسمها هكذا..الكلام جد يا عليش ، والله صحي..!!)..اها كل واحد قسمتو مشت على جهة..قلت لآدم بريك: عندنا صاحبنا اسمو عليش الريدة بينادي بفكرة (عيد الزوجة)..قام صاحبنا غمض عين وفتح التانية وقال لي: ده يكون زي عيد الثورة..!! قلت ليهو: مافاهم..؟ قال: لمن يجي اليوم ده ، الزوج ح يطلع (دفتر عيادة) ، والإ كن يحنسوه بعلاوة ولا زيادة مرتب حتى يحضر..!! و.. نو اوفنيس يا شباب.. كتر خيرك يا صاحب.. كبر
11-19-2016, 11:01 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
أرحب جدا بالأخوة الذين مروا بعد آخر مداخلة لي.. واسمحوا لي أن أخص الأخ كبر بترحيب مضاعف، لأن هذا أول تداخل بيننا.. ليس لدي كلام أكافئ به الود الذي بدا منكم.. لذا أعتذر عن الرد عليكم بصورة منفردة.. جزيل شكري...وكل ملاحظاتكم على عيني.. وأعلن عن عدم دخولي في هذا البوست مرة أخرى.. لكن هذا لايمنع أن البوست للجميع ممنون
11-19-2016, 11:26 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3479
يا كبر، يمين كضاب بريك دانس في الدلنج؟ وزمان كمان! يا أخي، المداخلة دي مرحة وأضحكتني لحدي ما بطني وجعتني تسليطك للضوء على كافوتا جعله شخصية معروفة لي. بريك دانس بالدلنج؟! قول جيركي ممكن
يا عليش، وحات رب المجرات، ما حصل اعتذرت لي زول هنا وكنت جادي وحاتو، أنا بعتذر ليك المرّة دي وأنا جادي
ومداخلتي التانية والتالتة، قدر ما حاولت أمسكت نفسي؛ غلبني فشنو في حاجة كدا قاعدة تمنعي من التوقف لمان ابدأ يا أخي، تعال بكري مسكني السكرتارية الثقافية للمنبر ما ممكن افرط فيك بهدي ليك أغني أغنية حرم النور ما تزعل حبيبي خصمتك بالرسول
11-19-2016, 12:28 PM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
يامستنير..أنا متضايق مازعلان.. انستر وماتفضحنا في المنابر المجاورة.. إت وكت قلبك رهيف كدا، اللداحة ليك شنو؟ كان مابقينا أصحاب حقو أقل حاجة مانتناقر.. تحياتي
11-19-2016, 06:50 PM
جلالدونا جلالدونا
تاريخ التسجيل: 04-26-2014
مجموع المشاركات: 9389
كده كويس يا مستنير اها كافوتا ذاتو زعل و قعد يسويها ما بعرفو شنو و ناس امريكا شنو يا كافوتا وحات ال لا نام و لا اكل الطعام انا قاصد قشر البصل الواحد ده فما تتحسس يا اخوى و عشان تصدقنى .. الكلام ده بقول فيهو و انا مغمّد ___ حتّة البريك دانس دى لذيذة خلاس طيّب وكت عدكم حاجات زى دى بتقولو مهمّشين ليه طول عيشتى فى المركز الداهى ده لاسمعتبو و لا عينى وقعت فوقو هو البريك دانس ده شنو
11-19-2016, 07:35 PM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
سؤالي يا عليش كان في سياق المزح بين الأصدقاء. عموما الجيش السوداني لا يختلف عن بقية المؤسسات السودانية فهو مؤسسة فاشلة و مهترئة و مع ذلك اتفق معك في ان معظم المنضوين تحت لوائه لا ذنب لهم و لا يتحملون مسؤولية اهترائه و فشله و هم كغيرهم من المواطنين السودانيين فيهم المبدع و الذكي و الظريف.. الخ و قد شاءت لهم الظروف و الاقدار أن يعملوا فيه لا اكثر و لا اقل.
11-19-2016, 08:14 PM
Kabar Kabar
تاريخ التسجيل: 11-26-2002
مجموع المشاركات: 18537
عليش..حبابك يا صديقي وبعد اذنك واذن القراء..وح تكون اخر مشاترة هنا.. هل تصدق يا ول ابا ابكر الطويل ، انو الزولة الخاتي صورتها في البروفايل بتاعي هي بت خالة ليلى هينو لزم؟.. الجيركي كان في الدويم ونحن دوبك ناس ترتارات ساكت..ويتخيل لي كان الموجة البعد التوستي (حصل اتفرجت في فيلم الإعصار الأمريكي بتاع تويستر..نفس الفكرة).. اما الدلنج كان فيها حاجات عجيبة ومدهشة..يعني في الحفلات كان عندنا اسلو دانس..والله صحي.. وناس جاز كادقلي كان في الحفلة الواحدة بيشتغلوا تلات اغاني من اغنيات فيلم (حمى ليلة السبت) ، بما فيهم غنية البي جيز ..!
الثنائي ليلي هينو وادم بريك..كان تخصصهم بريك دانس ، ونفس النموذج الظاهر في الفيديو التالي ، كانوا بيرقصوا بنفس الطريقة..ادم كان نحيف زي الراقص في الفيديو..وكان بيشتري الفنائل ويقوم يقطع الأكمام عشان تكون كت.. الحفلة بتكون شغالة ، بعد داك بيعملوا فاصل خاص للثنائي..والدخول نفس الطريقة الفي الفيديو..ليلي هينو بتجي من طرف الدايرة ، وادم بريك بيخش من طرف تاني ، بيعمل فيها قاعد يفتش في ليلى هينو .. وبيكون لابس سايد كاب وشايل خلال اسود..ليلى بتكون رابطة منديل فوق راسها ولابسة سايد كاب..وعندها مراية عين الجمل..وبيتبادلوا الرقص..ادم بريك بيشتغل كل حركات الراقص الظاهر في الفيديو..وليلى هينو بتعمل نفس حركات الراقصة مع اختلاف جوهري..في لحظة الهبوط ، ليلى هينو كانت بتقعد ضامة رجليها زي الحاجة القاعدة تنضف ليها فول مدمس..بتعمل الحركة دي برشاقة مذهلة..طبعا نسيت ، ليلى هينو كانت بتكون لابسة بنطلون جينز..وجزمة باتة ، وادم بيكون لابس بنطلون صوف اسود وجزمة باتة.. وكت داك الحرفنة بتاعة ادم انو ممكن يتمرمغ في التراب ، وبرضك البنطلون يطلع نضيف..!! والتبادل في اشواط الرقص بيكون عبر المنديل ، كل راقص يسلم المنديل للراقص التاني..وتبدو الجولة ..وهكذا..عاين للفيديو كويس..
الفقلة كانت الذ حاجة..الإتنين بيقوموا يعملوا حركات رقص عنيفة ..وكل واحد بيرجع لطرف الدايرة ، نفس النقطة الدخل منها في بداية الرقص.. والناس بتكون منتظرة انو الجماعة يرجعوا ، وبيكون كل واحد فيهم مشى بيتهم عدل..ياخي مرة انتظرنا خمس واربعين دقيقة..لم صاحبة ليلي هينو اعلنت انو ليلى مشت بيتهم ونامت كمان..ونحن منتظرين..!! الدراما كانت عالية ، والشباب كانوا بروفيشنال دانسرز لكن ما بتدي حريف..!
بالنسبة لسؤال جلالادونا: النقة الكتيرة ، لأنو الموضوع جاب ليهو نظام عام وما ادريك ما نظام عام..عشان كده حسينا باننا اتهمشنا شديد يااااااااااااااخ..!
كتر خيرك يا عليش على منحنا هذه البرهة..ونأسف للإزعاج.. ودمتم.. كبر
11-19-2016, 08:06 PM
هاشم الحسن هاشم الحسن
تاريخ التسجيل: 04-07-2004
مجموع المشاركات: 1428
قال: 《النص هو سيفي الذي به أجندل كاريزما الحقائق》 عليش..... بالله شوف العبارة ذات الصليل القاطع دي! واااااااو،،، وكمان واون ضكر، من لوح الخلوة وما حق الزمان العلينا دا. يمين دي عبارة براها بوست بل وكتاب،، يا لنصال الأدب السنينة! وبرضو يحرفوك الدكاترة ديل عن غوايات النص لسيرورات وصيرورات الكنفوت والسبوس والميسرات عسرا والمغيرات ضبحا؟ تعرف يا عليش؛ ات، لا زال طالبني تعليق/ رد في بوست معاوية عن صاحبه، و طبعا الدين الى حين ميسرة،،، لكن عبارتك دي براها بتدفع عني نصو الصعب، بوركت، بجيك بيها درقة وسيف!
أسمع يا أديب، كلام عنقالة ساي كدا، غير إني محب للأدب ومن قرائه، بمثل هذه التقنية السردية المتمكنة من أدواتها، فانني لن أجازف كثيرا، بل أجازف ونص، لو توقعت لك مركزا متقدما ومتقدما جدا كمان، في ضمن مبدعي أدب القصة والرواية السودانية وما ورائها. يكفي أنك تجعل قارئك، على الأقل كمثلي، ينسرب فيما بعد متع الحكايات إلى متعة اللغة ذاتها وألعوبات السرد بها أسلوبا وزمنا. وكمان بتجعلو يستحضر في مقارنة ذهنية حتمية، قامات كالاستاذ الطيب صالح والمعلم ابراهيم اسحق و مبدعين كعادل القصاص وع ب ساكن وآخرين...
ثم، متعة البوست لا تنتهي، بحضور الأحباب وتصافيهم عن الأوشاب، حبب على حباب...وووو، والضحكة، التي تغني عن عشرة فناجين بكرية،،،،ياخي ضحكت كما لم اضحك من زمان على كنفوت علي دفع الله وووصفة شيخه لمصرانه العصبي وردته المن غير تشكيل، وفي تجليه المثالي عن سندروم ( الشم خوخت بردن ليالي الحرة ،،، والبراق برق من منا جاب القرة)، ياخي الحياة دي لذيذة جدا، ما "استطعنا إليها سبيلا"، طبعا يا محمود، طبعا!
الصديق كبر، برضو طالبني دين تعليق قديم لا بد منه، حيعفي لي لحين ميسرة،، برضو،، سرني أن انتبه وعلق على التكنيك في نص عليش، التكنيك دا ياهو ميزان موية الكتابة الابداعية ومناط حكمي أعلاه! وكالعادة، غاص كبر، ولو هونا، في ما قبل وما وراء وما بعد النص، وراوده عن نفسه من فوق وتحت ومما بين يديه ومن خلف ذاك جميعا، حتى هتك سر وردة حب أينعت وذبلت في الدلنج ثم فاحت ههنا، وترقص مذبوحة،،، الميتاتكست دي براها عالم، وقليل من يجيد التنقيب فيه وعنه مثل كبر، قولوا: الله أكبر؛ ما تسحروه!!!!! الغرببة المستنير دا يا معاوية الزبير، خلى الردة، وبقى يغالط في تاريخ البريكدانس ويقول ليك الجيرك والتويست، تصدق أنا قايلو دفعتنا، طلع أقدم من السلودانس ويمكن من العرضة والصقرية.
معاوية الزبير، أنا طالبك ترد على التلفون! لو يدينك مجبسات في اللابتوب رد بي كراعك ياخي، ما بيناتنا والله.
شكرا للجميع والله، أبوبكر براه، عشان فارماكلوجيا الردة، وبالذات لعليش، you made my day!ه
11-19-2016, 08:40 PM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
لو فرضنا إنو في شاب ضعيف أمام الجمال وكبكابة شديييد، قام فجأة صادف تلات حوريات في زقاق... أو فرضنا في حارس مرمى رجافة وبخاف من البلنتيات، قام فجأة شاتوا فيهو تلات بلنتيات في زمن واحد.. أو حتى طيارة كملت بنزينا في الجو..وللا إمام بقرأ خطبة الجمعة من ورقة، صعد المنبر هبش جيبو لقاهو فاضي،واذّكر إنو خلى الخطبة تحت المخدة..
أنا ياسادتي ،أتحدث عن العجز.. و عن كيف لا يمكن مقاومة الجمال.. بلى،أتحدث عن الرايات البيضاء...ولا أشعر بغير الرضى،وعن غرقي في لذة الأسر.. وهذا يعني أنه لايمكنني قيادة هذا البوست بعد الآن..فأنا مخمور وهذه أول حالة من نوعها أصادفها في هذا المنبر... شكرا لاتكفي،لذلك لن أسجلها هنا..
فليتقدم أي (قائد) يأنس في نفسه الكفاءة
11-19-2016, 09:22 PM
Kabar Kabar
تاريخ التسجيل: 11-26-2002
مجموع المشاركات: 18537
هاشم..حبابك يا صديقي كتر خيرك على العبور هنا (ح اعمل ليك اعلان في واحد من بوستات ابكر الطويل).. كتر خيرك على المباصرة الأنيقة ، ويا ريت تكتر لينا منها ياخي.. صديقنا عليش زول حكاي شديد ، وكل حكوة يحكيها في المنبر ده ، عندها سكة براها ..بس المعايش جبارة (بالنسبة لينا) عشان كده متابعتنا قليلة.. شوف الحكمة بتاع عليش في اخر مداخلة: قام فجأة صادف تلات حوريات في زقاق...
اها وقفت في حكاية (في زقاق)..طبعا عليش قالها ببساطة للغاية ، وأي سوداني ولا سودانية ح يقولها عادي جدا..والحوريات انت براك بتعرف مركزهن الوجودي والجمالي والأخلاقي..بس لمن تبقى (زقاق النسوان,واشار نحو منعم الجزولي) النقة بتقوم فوق والألف الأحمر يظهر على الأخر..!!
يبقى هنا مش حقو فكرة الرقيب السوداني دي نعيد فيها الإعتبار؟ ياخي رقيب داير يعقدنا في بت ام روحنا دي..!
يا عليش زمان نزار قباني قال: اذا وقفت امام حسنك صامت فالصمت في حرم الجمال جمال.. فشنو ، الذي تسميه (عجز امام الجمال) هو ذاتو موقف جمالي يا صديقي.. على ضمانتي ، شفت فترتك بتاعة الجنوب ، لو كتبت حكاوي شهر واحد..تحير العالم كلو خليك من القارئ السوداني ..لأنها بتكون واقعية سحرية ، لا تقدر تعرف حدود الواقع وين ولا تقدر تعرف حدود الخيال وين.. بس وقف السفر شوية يا عمك..
ودمتم.. كبر
11-20-2016, 04:54 AM
قسم الفضيل مضوي محمد قسم الفضيل مضوي محمد
تاريخ التسجيل: 01-08-2013
مجموع المشاركات: 2608
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عليش الريدة
سيف النصر محي الدين
أبوبكر عباس
علي دفع الله
جلالدونا
عبدالعزيز الفاضلابى
معاوية الزبير
Kabar
هاشم الحسن
قسم الفضيل مضوي محمد
MOHAMMED ELSHEIKH
عمر السلمة
يحي قباني
فيس بوك
تويتر
انستقرام
يوتيوب
بنتيريست