اتراح الحول الرابع" حمّيد ولا بِقدر بموت"

سودانيز اون لاين
Dahab Telbo-
مكتبتى
رابط مختصر

ولا زالت جيوش الملتحين

تحتل المأذنة

مرت صنوف من عذاب

ونيران من اشتياق

وانت فوق ........ فوق في السما

تقادل عزيزك ومصطفاك

فلتقدِلا بسلام

اما عن الواطا

فمازلنا مشدودين جلد طار وثير

ولازال "مغنينا" شُتر

ولكن رغم ذلك

لم نعدم حق الحلم

بنحلم بيهو يوماتي

ذي ماعاهدناك

شاسع وعاتي

حدادي مدادي

فيهو "عيوشة"

لا شافت الشارع

ولا اكلت من " كوشة"

بتنوم في قطية

او غرفة معروشة

وكل صباح بنقرا من ورد غناك

"نشيد الجابرية"

وبأهتمام نقول:

كان ضحويه وكنا بنزرع في المحروت

فجأه يدوي مكبر صوت

قالوا الريس مار بي فوقنا

من شغلتنا قلعنا عروقنا

وفكينالوا حبل واسوقنا

وقمنا جميع الحله مرقنا

البشوفنا يقول وا شوقنا

كان ضحويه وكان عين شمس

الله قويه وكان الريس فوق عربيه

واقف طولوا تحت شمسيه

هللنالوا ولوحنالوا بالطوريه

وصفقنالوا صفقه قويه

الجابريه

تحي الثوره

دايرين بوسته

ومدرسه وسطي

الشفخانه

وسوق منضبطه

والريس حتى الان يا يابا

لا فانتا ولا خلانا نفوتو بهتافنا!

وعارفين خلاصنا في طريق "الزين ود حامد"

الا الايد رعديدة ذي قلب الزعف

لكن ليهم يوم!!

لازال ودالمفتاح يحب ودمدني والقهوة والبرنجي بعد رحيل امنا بهجة بت نوري

ثم عاصم الحزين هو كما تعرفه مهووس بوجود الأحباب في الألوان

جيفارا عمر

صابرين المنارة

سارة بُلة

نصرالدين البونجا

محمدالطاهر بيكو

جميعهم يتوحدون في أمنية ان تكون علبة "البونبان" كوباً من لبن

سيف جِنين يحب صغيرته "إيفا" ويقرأ عليها سفر "بِسْم السلام دايما"

الصادق سفير يذكرك بعم عبدالرحيم ويعيش مغبونا في مدينة " الزرقاء"

وحبيب الذي كسب لقباً جديد بعد رحيلك ايضاً يذكرك في بعض خلواته

مودة تحب ست الدار منذ ان خلقهم الله بتاء تأنيث

والنبي الصادق برباتوف ايضاً

النذير محمد موسى يُقرئك السلام

والحوت بعد ان "قطع البحر"عوم الى بلاد فيكتوريا ما مل من عروج "السما التامن" ذات المصابيح

وانا احبك كلما صدح الكناري " أرضاً سلاح"

كن بخير

مابتقدر تموت انت ياخ

مابتقدر تموووووووووت

سلم علي ودالمقبول والصحاب

تلبو

مصابيح السما التامن

يا جايي مارق

من دخول الغيث

شرايين التراب السايفة ..

أوردة الوطن .

قشره اليباب ..

نشره العطش..

كلما سرت

قطرات دِرِبَّ الرحمة

في جوفو ارتعش ..

بال الشجر

حال العصافير

الخياله مع الدغش

مشدوه متل

خاطر طفل

من ضل ضهر راكوبة

فوق حافة حجر

واقع سجر ..

واقف يعد نقط المطر ...

ويتمطق إحساس السحاب

بين لهفة الطين

والشمش

لمَّت ورا طرف الحقاب

آخر رمش

باقيله في عِب الشفق

والليل ملقِّيله الطرف .

شفق المغيب ..

قفا غيم بِهِت

كان نفضة الريشة الأخيرة

حَمَاره .. فوق لُوحةْ الوكت ..

يَا كرْكُدَايْةَ الله

إترشق ناقع عصيره

من إيد ملاك

فوق المغارب بي تحت .

كانت مراكيب حين صلاة

والترعة قِدّامن .. طشِت

ولاّ المراكب من بعيد ..

ودعات على النيل

والنخيل المتكي

دار يقرا البَخِت

قنّب يحِت ..

قلّــع زريزير غفوتو

عضَّ إنطلاقة غنوتو

وقام منحفِت ..

والكمبو ..

ينشاف .. من مسافة ..

قطر بضاعة

العربجية الطيبين ..

سبّابة والمتسببين ..

شعراء ومغنين الأنادي ..

أنصاص لصوص ..

حلب البلد ..

عرب الجبال ..

منسللين من لاتحت .

والريح يشيل

للنيل

مع هرج المغنين

الدعايات

نشرة أخبار الولايات

الوفيات

الملايات

العبايات

المرايات

التصاوير

التعابير

الحكايات

النِكــــِتْ .

عشم البنيات في الضراع

الضاع

وكت حرَّ الكفِت

زاغ الصراع

ذات جمعة

قدَّت من وطن

توب السبت .

نقد الحمام خُرج الوكِت

طارتلو نقطة لحظة

من موية ملح

في حلقو

مرّرت الهديل ..

كَمَد الجرح ..

جبد السكات ...

لكنو فات ...

وأبى يتلفت ؟

بال الطفل ..

يرقل على ضهر الحَمَار

يجمع مصابيح السما التامنة..

ويطش

ينكربش الحلم البعد

قرب يوافينا

ابتعد

لو مدّت ايد

كان إنجبد ..

يا الدنيا

بي ريحة الدعاش

لو تنعرش ...؟

أو تنفرش

تحت الفراشات

بالبَرَد ؟

فوقُو الوعد

صادق يمش .

لو يلقى راس رسن الزمان

ديك لحظة

ما كانت تمش

شان يندهش

أو ينبرش

بين نجمة الملكوت

ونسمة رضية

من رب العرش .

يا غادي منك

فوت كلام الشوق

من القلب

الخشم بابو البلد

لو خشَّ هدهد

في رماد ما فيهو

يمرق قانقرد ..

والقانقرد بابُو الحمام

راجيهو لمليم الطيور ..

ضمَّة جناح ..

صمّة عدد ..

إيدين بنيات الفريق

قادرات على

صد الحِدَيْ

جاسرات على

صقر النكد .

إيدين بنيات الفريق

بتهدهد الطفل الرضيع

بتعدي شيخ

دومة الحفير

تشلخ لبق ..

تسقي الخدير

بتعوس

وتفرك للملاح

بتورِّق اللوبي

وتحش

تمسك مراح ..

تحلب ، تخُش

تغسل هموم أيامه

في طشت الحلم

تنفض تشر الشوق

هِدِم

تنشل من البير

أم تلاتين باع

تعتِّل ..

تفزع الطيّانة

لو ما تجدع التبّانة

بتجيّه بيوت ..

تغزل خيوت ..

بتطرز المنديل

تخيِّت لي طواقي العيد ..

صبر ..

بتَتَبِبْ السجاج

مع الفجاج

تقوم

إيدين بنيات الفريق

بتحش تمر ..

تخرت سبيط

بتعتِّق الدكّاي ..

وتخبز للصفاح

بتكفّي عيزومة

وضيوف ..

بتغني قيدومة

وتطوف

بتهني ..

بتودي وتجيب

بتحني ..

بتدلك حبيب

بتولِّد الأمات ..

تربِّي على الصلاح ..

زي ماب تضمِّد للجراح

إيدين بنيات الفريق

إن داهم الحلاّل

خطر

قادرات على شيل السلاح .

يا مناحته

وبلاّله

يا ..

رجع اللي راح

يا ود عيون ..

فِرْحَن .. بكن

تِرْحَن يغطْسِن

في الدموع ..

الدنيا عامرابك تظل

وإن كان رحيلك

فرتكه

أو يا لسان نار الصراع

لهليبه بعدك لو هكَع

مين شالُّو شيلة بلا اتكَّأ ؟

مع إنو صبرك .. ما نفد

برشمت .. أو كبسلت

كيف سعة الوجود في ضيق لحد ؟

باغتنا ريح الفجعة ليل

فرنب في جوفنا مرابنات الصبر

شات سعن الجلد

صادنا الذهول ..

زي التكنو قبل دا

ما فارقنا زول بعد الرسول

واللاّ التقول أول قلوب في الدنيا

يغشاها القدر بعدن تضيع منّو الدروب

تنطمبج الساحات حريق

يدغي الطريق المحتمل

كل الفريق سوقر وراك

يا جرحنا الكيف يندمل

ما بار وراك شهد الغنا

ونحل الحناجر ما همل

صادر خلايا أبو الدبر

صاقر حناياه نمل .. نمل

... .. .... ....

وين ماشي ..

يا نبض الرحيق

سايب المشاعر ريق دقيق

نهب المغنين التِفِل

غنواتن الورطانة

أو لوطانة في الريد المقق

حُترب صفق .. في طين ذبل

أوصاف على جسد الحبيبة

بهق .. بهق

تحت احتماله مرضرضة

زي لعبة ما استهوت طفل

وين داجي يا قمر الهنا

الكرّمنا عند مغرب مرق

سايب لياليك لي نجوم

واقفات وجوم على فد رجِل

وفرع الغُناء الميَّل هنا

على مين وراكَ . . حيتِّكل

والشيل تِقِلْ ؟

قَدْر اليشيلو الشيلة في

لكِن ظروفن هل تفي ؟

تحتاج جماعة من الرجال

الليها كنت براك تقل

دارت قبيلة من الحبال

الكان يقيله فرد حبل ...

الخوف قلوبنا التشتهيك ..

تنشك في ذاته وتنقفل

من بعد ما اتوحدنا فيك

ننفك قبائل وتنكتل

وينشعنفِن مسّار بعد فتل الحبل .

حب يا خيالي الوين وصل

دُر يا لساني وماك فَسِل

أطهر وزيزيناً يعوم

في النيل ، مع الصير منشغل

ولاّ اليقوم يوم بعدِ يوم

يغسل دمومو عديل غسل ..

ولاّ الوطن قال ماب ينوم

إلاّ الفجر يا ليل يهِل

ماسك وضوهو من الغيوم

السالو سيل ساعة محِل ؟؟

كيف الدبارة ؟

و ما العمل ؟

لمّا القبيلة تشيل سيوفه السوق

تبيعه على عجل ..

تغشى الكناتين العويش

عُقُب المغارات الحشيش

تاخد بخور ، ودخان

ولفّافات سطل ؟

ورق المواثيق إنبهل

كاويق جريح

طلوحبو ريح

كيمان مقنبرة للمديح

والطار مجلّد من حشا الفي القبّة

عصب الفي الضريح ؟

حلقات قمار تحت النخل

والخيل مجهزة للرهان

آخر النهار فوق السهل

لما الجدل يبقى الدجل

والأيدولوجيا هي الملاججه

واللواجه بلا عمل

اللخبطة

الخمج

البوليس كتا كتل

ليش البلاد ما تستباح

يوماتي كل ما الليل دخل

اشمعنا يا شوفنا الرحل

ما انصدقت زرقا غناك

ما كان حصل الحصل

والبت نصيرة سنة محل

بَنَت الدهب

بنيانه ما فات الرُكب

حزنت على التِقِي

والتِبِن وين تِبني لِبني

أبى يتلقي ..

والكيل كرب

ساعة الرجال سكنوا التُرَبْ ..

والدنيا موية وسط حريق

تصبح كُرَب تتمسى ضيق

قامت نصيرة تحِت تعب

بِرَت الفريق ..

يا اخواتي ستات البيوت

ناولني قوت

قبّال أموت

دور والعيال

ما فكُّوا ريق

طبق الدهب

بي مِدْ دقيق

دهب الجبال

صافي البريق

بي مد دقيق

أُن كان مريق

يا أخواتي ستّات البيوت

أدِّني قوت ..

عربون أموت ؟"

مطفية نيران التكول

رغم الدخان

والحلة زي المافي زول

رغم البطان ؟؟

يا اخواتي

ستات البيوت

صافي البريق ...

.. بي مد دقيق ..

أدني قوت ...

عربون أموت ...

عين الشمش زي التقول متشوشة

أو مرشوشة بي حمرة غضب..

زبد الحَمار زي رغبة المالح

بعد خجة غريق ..

والليل دخل كبت الفريق

قنعت نصيرة من البلد

قنعت نصيرة من الدقيق

كشحت على كوشة الدهب

وجات صادِّي بي نفس الطريق

لا رحمة غير الموت قبل

لمّت عياله على عجل

اتشهدت واستغفروا

وقفلت على روحه الجبل .

كانت نصبرة

بتفتكر

جوف الجبال

أولابه من عيشـة الوبال

أولابه من حرس الرجال

ساعة يصيب البال خلل

والحال مو يا ..

كم من نصيرة بلا نصيرة

اتريحت .. وفضَّل براك

رغم الفشل والإستياء

من مسخرة هادي الحياة

بي إيد تدهده للأجل ..

وبي إيد تهدهد .. في الجراح

بي إيدين تفتِّح للدروب

في كبرياء .. ..

والسايقي لابد من تصل .

ضُلْ النهار .. الليل ..

مُو .. يا ..

تبرد غبينتك ولوعتك ..

طول الأزل

ويا روعتك لامن تجادل دمعتك

دائماً تكون فوق العيون

مرحيبة بالداخل عليك من دنيتك

عبّيت مصابيح الصباح

ببياض ضميرك ونيتك

بعرق جبينك وبنيتك

وبالشمشِ ماروق الرجال

وجّت جنائن غنيتك

ما كان رحيلك غير دليل

للجايي ماسك سكتك

يا شدو عصفورنا البسيط

كل الحلوق إتوكتك

إن ماب تبيت فوق السبيط

طوِّل مسافة ركتك

ما صمتك مطراً غتيت

لا ريح لديح .. يوم سكتك

عذراً إذا حال الوطن

بالجاتو ذات ليل بكتك

سايقين بأيادينا الزمان

شادِّين خيوطو الفكتك

يا بئر تكلة الناس عليه

وما قطَّ ..

يي شنو دلو إنهتك ؟

يا صاحنا في الزمن الغلط

يا سابلو دمك كالغيوم

لا صرَّ وشك لا عبس

إيش يعني لو سالن نقط

من كل عابر نقطة بس

يصبح شرايين الظلط

تبقى الشوارع أوردة

وجسد البلد عافية عريس

لاف العتامير قرمصيص

لأجمل عروس النيل رحط .

والكون صحابك وإنبسط

فاتحة صحابك ولاّ موج

دا برش فراشك ولاّ شط ؟

سيل الدموع الما انحبَس

في الواطة بيقوِّم تَبَسْ ..؟

شهى المدائن تنتفض

ما تمتعض ..

موكب زفافك للأرض

شهداء الوجود تتلقى ليك

محتفية بيك ... شوقة الربط

مركب شرط .. هوجة البحار

شايل خبار الهاربين

كان البشارة لكل شط .

عِلت إبتسامتك حين هبط

ما من جواز غير راحة إيديك

لا من ربط عملة وشنط

نية رسول ..

إنسان فقط .

ما بينا بيناتك ربط

بي أسمى مبدأ .. وأقوى خط

ما جانا عشقك من فراغ

لا نحنَ غنيناك عبط

جرح الوطن خطالنا خط

ختالنا قول ما منو نط

والليلة يا موت يا حياة

خاتي البيختار الوسط . ..

ويا بلد فوق اللِمِيلِس

بعد شتت الروح في القصيد!

هو كيف يقر يموت؟

وجوانا مقفول بالحديد!

ولا بقدر بموت

حب الشعوب مابكتلو توقيف الوتين

ولاحتى تعطيل الوريد

تحيك سواكن وضفاف برلي العظيم

كل ما صدح النشيد

ود نوري هوي أرقد قفا جوه القليب

تلبو