أصحاب المُعلقات في حوش عُكاظ بني بكر ذو الصلعة ...

Quote: في البال كبر و أبو حراز وود القوز

اللذيذة إني جيت على بالكـ ..

الألذ بقى إني جاي في معية أساتذة كبار زي كبر وأبوحراز ..

الأروع من ده كله إنكـ الحقت بركب أصحاب المعلقات ..

( اللهم نحن ) زول جميل زي عاطف عمر ..

يشهد الله ماخليت لينا حاجة ..

ومافضل إلا تدينا من فوق طبقة كريم شانتيه ..

كتر خيركـ يأخ ..

عارف الشغله كلها إنه الناس دي بتتفق معاي وحسب ظني ..

في إنهم كيبورداتهم سنينة جداً ..

بمعنى إنهم بيقدروا ينجزوا كم هائل من الكلمات في الدقيقة الواحدة ..

هل تصدق أنا مرات كتيرة بكتب في ظلام الغرفة ..

وضوء الشاشة خافت يادوب تتبين أبعاد الكيبورد قدامكـ ..

حافظ مكان الحروف بالملي وحاتكـ ..

أساتذتي الحلوين ديلاكـ أنا ما عارفهم ..

لكن انا شخصياً جبرتني ظروف في زمناً قديم ..

إني أصف كتير وكتير جداً كمان ..

الراس مليان كلام يا ود البشرى يا اخوي ..

لكن زمنا ضنين ..

يادوبك يكفينا قراية ومتابعة للمنبر ..

وكل المعلقات دي يشهد الله بتتكتب في دقائق معدودة ..

تسلم كتير يأخ ..

وللمدير سلامي ..

وللكورجة المبجلة الجمعتني بيها محبة شديدة ..

العجيبة كلهم عاجبني شديد ..

عاطف .. فكبر .. فاأبوحراز ..

أنا أشبههم أواتشابى لذلك .. أو أتأمل ذلكـ ..

إن كانت الحقيقة بخلاف ما كتبت ......

هسه الكلام ده إتزعط في تلات دقايق أو تزيد قليلا ...

أمسك الخشب ياعمك .....

ده كل السر ..

بالاضافة للراس الملان كلام والهواجيس الكتيرة ..

Quote: تقصد معَاطين

أياهو قصدو ذاااتو بي ذاااتو ..

ويجي يقول ليكـ بوست اخواني وما عارف شنو ..

وهو أكبر معّاط في الحوش ده ..

والمفروض يخت نفسو أول لاعب في التشكيلة ..

بعد داكـ اليكوس التمومة الباقية ..

بعدين شنو عندو حروف فيها مدات كده بيعرفها براهووو ..

يمعطكـ بيهن لامن يبقيكـ زي الديكـ العادم الريش داكـ .......

Quote: كيف انسى يا ود القوز ياخ مجموعة زي دي زي ما قلت وكمان ابوحسين أضاف ليهم كمال عباس شرف كبير الواحد يتخت معاهم لكن طبعا ما لذيذة اضيف روحي خليها تجي منكم :)

هو ما قلت والله ..

فأنتم الأعلى كعباً والأقيم حروفاً ..

ود المدير ذاتو على رأس هذه القائمة ..

تسلموا جميعاً ..

ــــــــــــــــــــــــــــــــــــ

النجم الصغيروني ده بكي بطريقة أحزنتنا على حال الكورة في هذا البلد ..

المفترى عليه وعلى رياضته واهله ..

وحقيقة يستاهل يتوسد بروفايلكـ ..

فقد رفعوا راس السودان عالياً ..

رغم الحال المايل ..

وليتهم يكونوا أمل لي كورة السودان ..

وماتطويهم أضابير النسيان ..

ويلوصوا أمام بيروقراطية النظام ..

وحال الأندية المسيطرين عليها تجار السوق ..

الماعندهم أي شغلة بمنشط كرة القدم ..

أي زول عنده قروش خش مجال الكورة ..

فبقت الشغلة جبانة هايصة ...

جمعة مباركة وربنا يتقبل منكم ..

Quote: في النهاية كدا، الأول منو؟ "لكن انا شخصياً جبرتني ظروف في زمناً قديم .. إني أصف كتير وكتير جداً كمان .."

الأول إتــــــا ده ...

داير يشددوها ليكـ يعني ...

غالي والطلب رخيص يامستنير يأخ ..

( أصُفّ ) ..

وحاة سيدي الحسن تاني ما بصوّبكـ ..

شكلكـ إتحسست ...