|
|
 **راجــيك** اضافات لقصيدة قديمة مع التحية لسيد الهذيان المقدس/محجوب البيلي
|
راجيــــك
لـسـه راجيـك مـن زمـان
في منارات المرافـي
وفـي متاريس الطــريق
ولسه جاييك يا بعيدة
كاتم أسـرار المحن
قاطع البحر الغريـق
ولـسـه شايفك زي حديـقة
رغم إنو سماك رهاب
غيمها ضنّ على الـفـريـق
وبرضو مشتاق لي صفاك
يا نخلة من خصب الضفاف
يا فرحة في زفة صديق
شبالو من حور الجنان
*******
من كم زمن شايل أساك
عمراً سدر ضياَ خـبا
سفراً ودار
والسـكه يا زولاً غريب
مكتوبة بي تعب المسافة
ومرسومة بي لون البحار
مسكونة بي خوف الفيافي
معجونة بي وجع انتظــار
ورغــــــم إنو سماك بعيد
بس شفت صورتك في المدار
مغسولة بي مطر السـراب
منحوتة في ريـح المنافي
ومنسوجة بي وهم السحاب
مزروعــة في حزنك قوافي
هماً نزل وعـداً يباب
ويبقى صوتك هو الرفيق
يا قمره يا عز المكان
*******
ضيعت في بعدك خطاى
وكتمت في روحي الشهيق
دقيتها أوتاد الغياب
ولّعت في قلبي الحريق
تاريني بحلم بي عيونك
لو عيونك بكرة تفرح
أبقى أختصر الصراع
وأتمنى أرشف من نداك
ياومضه ياسر اليراع
ياواحه في حر الهجير
وبرضو راجيك من زمان
ياذكرى تقطر بالحنان
*******
أيامك الحاضرات عدم
ما ضيك مجمر بالعذاب
أحلامك الجايات عشم
يابنيه مهرك ما دهب
اولادك التايهين عجب
عافوا المكان ركبوا الصعب
في كل بر في الجو كمان
حتى البحر شيتا كعب
ما لُن بعاد والقسمه دارت
في العقاب واحد طمع واحد ضهب
واحدين كتار عرفوا السبب
هجروا التراب سابوه تب
خلوه للساهرين نهب
بدقونهم الطايلات كضب
أزلامك القاعدين غصب
وبرضو ساعين لرضاك
ولسه صابرين يازمان
يازينة يا نور الدرب
*******
وبكره راجعين يا بلد
نتمنى نلقاك زي زمان
ممدودة والنيل في افتتنان
نغشاكي في ضل الضحى
ونستنى من ضرعك مطر
نبراكي في عز الضهر
نجمة دليل وثبات أثر
يا كلمة غناها البعيد
ما إنت يا بلد المسار
إنت النغم إنت القصيد
للعز محل للروح دثار
لا كنت تايه عن هواك
لا اخترت من غيرك صحاب
بس كنت راجيك من زمان
*******
جاييك أنا ومن بكره باديهو المسير
يافزعة في وكت النفير
يامطيره شايله مع العصير
خليني أحلم بي رؤاك
وأديني يادرة الأمان
لكني خايف من جفاك
ماأصلي كايسك من زمان
مترجي من طيفك حنان
ياسمحه يافايته الحسان
والله رايدك من زمان
وياني صامد صبري بان
وبرضو مستنيك كمان
ولسه راجيك من زمان
لسه راجيك من زمان
يا فرحة ضوت في القلب
الرباط 20/9/2005
|
|
 
|
|
|
|
صلاح الأحمر
فيس بوك
تويتر
انستقرام
يوتيوب
بنتيريست