مولانا محمد المرتضى سلام عليك ,,,, معليش الرجاء توضيح ما هي الاغنية او اسمها على الاقل لانو الفيديو لا يعمل لدي وهذا ليس لعيب فيه ولكن لانني اجلس في كمبيوتر المكتب والذي تم اغلاق كل البرامج التي تعمل على نظام الريال بلاي فيه لذا لم اتمكن من رؤية الفيديو المرفق فعذرا ,,, واتمنى ان تشير للاغنية كتابة لو امكن ... ولك شكري وتقديري ...تحياتي : ياسر العيلفون ...
11-24-2015, 07:57 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
سلامات يا ياسر..يقال (الدال على الخير كفاعله)، والعكس صحيح..لا أخفيك إحساسي أني بابتدار هذا البوست سأخرِّب علىالعباد مزاجهم فتركت الأمر ، لكن طالما أنك طلبت إلي أن أشيرإليها (كتابة) فهي من ناحية قلة الذوق تنافس أثاث مكاتب (المسئولين)إياهم وطريقة جلوسهم، ومن حيث خلوها من المضمون فهي تضارع أحاديث الحاكمين في جمهورية تصريحستان، ولك أن تنسج ما تبقى على هذا النول..إنها غيابة الجب .وعشان ما أرجعك بيد فاضيه قلت أعدل مزاجك واقول ليكما زال في السودان ناس كويسين وأهتبل السانحة لأشكرالصافي مهدي وصحبه الكرام على جهوده في كورال كلية الموسيقى والدرما واختياراتهم الموفقة.. لهم التحية.
11-24-2015, 08:14 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
سلامات يا مولانا حقيقة ياسر حيّرنا خلاّني افتّش لابتوب و موبايل و تابلت عشان افتش الفيديو الما ظهر عندو دافي النهاية قلت هي اصلها طالما اسوأ اغنية مالي تعبان في كواستها قدر دا, براها ح تفرض نفسها وتجيني لحدي عندي في نغمات الموبايلات و الركشات و الحافلات ومحلات الليمون و دندنة الشباب وغيرها كما فعلن اخوات لها في السوء من قبل
11-24-2015, 09:12 AM
عمر نملة عمر نملة
تاريخ التسجيل: 11-07-2009
مجموع المشاركات: 2553
Quote: اجمل ما سمعت في الفترة الاخيرهمرة فى وادى المحنة ومرة فى ابعد بطاحطاوى حريتو فى جناحو عمرو ماملا الرواح
سلام يا عمر..ومن بحر الوافر كما يقول عزيزنا د. بشرى الفاضل..النور الجيلاني أحببنا أغانيه منذ يفاعة الجهاز السمعي بطبله المشدود وسندانه الراكز..في قناعتي أن النور محطة فارقة في تاريخ الغناء السوداني منذ رائعة محمد سعد دياب (مادلينا).. ومادلينا دي يا عمر - أيام يفاعة الخاطر والمخيلة – ظننتها بنت خالة (مريه)لَزَم وأنها كانت ترافقها إلى المدرسة الثانوية بفستان أزرق فاتح (لَبَني) مع كَبَك وجوارب (شرابات) بيضاء طويله في أعلاهما خطين أحمرين يتوسطهما خط أزرق بقراءة الشرقأتى والغرب أتى ، حاجه كدا زي إنييستا وهدفه الثالث من تمريرة نيمار التي أقالت مدربالريـال وغيره من الرياييل، كانتا تتهاديان والحقيبتين الجِزلتين بمقامهما مضموتين إلى الصدرين ضد الرصاص والنفاثات في العقد، في عملية تحتمون ، يتبعهما شَعر يهدي إلى الهذيان والمسألة كلها يا مولاي مسرح للفجيعة.النور الجيلاني يا عمر فنان خلية خلية، وما يزيد جمال فنه جمالا أنه إنسان.
11-25-2015, 08:41 AM
بلال زكريا بلال زكريا
تاريخ التسجيل: 11-17-2015
مجموع المشاركات: 361
انا متضامن مع الفنان الأنيق ياسر العيلفونلكن يا مولانا اسمح لي بعد التحية ان اشير لظاهرة اسوأ من الأغنية الماسمعناها انا وياسر ديوهي تشويه بعض الأغاني الجميلة باداء سمج لايمت للفن بصلةوحيث انه مرة نزلت من حافلة في امدرمان عندما سمعت واحدة بتغني في اغنية جميلة بطريقة لاتعلم بها الا هي
11-24-2015, 09:51 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: قلت هي اصلها طالما اسوأ اغنية مالي تعبان في كواستها قدر دا, براها ح تفرض نفسها وتجيني لحدي عندي في نغمات الموبايلات و الركشات و الحافلات ومحلات الليمون و دندنة الشباب وغيرها كما فعلن اخوات لها في السوء من قبل
على نهج الرشيد (امطري حيث شئت فسوف يأتيني خراجك) أم مصداقا لقولهم:Good news travels slowly, bad news has wings؟والله يا باشمهندس، لا أتمنى ذلك..
11-24-2015, 11:41 AM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
سرد جميل يا جميل...وبقيت ما زى زمان......تحياتى وسلامى.
Quote: أيام يفاعة الخاطر والمخيلة – ظننتها بنت خالة (مريه)لَزَم وأنها كانت ترافقها إلى المدرسة الثانوية بفستان أزرق فاتح (لَبَني) مع كَبَك وجوارب (شرابات) بيضاء طويله في أعلاهما خطين أحمرين يتوسطهما خط أزرق بقراءة الشرقأتى والغرب أتى ، حاجه كدا زي إنييستا وهدفه الثالث من تمريرة نيمار التي أقالت مدربالريـال وغيره من الرياييل، كانتا تتهاديان والحقيبتين الجِزلتين بمقامهما مضموتين إلى الصدرين ضد الرصاص والنفاثات في العقد، في عملية تحتمون ، يتبعهما شَعر يهدي إلى الهذيان والمسألة كلها يا مولاي مسرح للفجيعة.
11-24-2015, 12:49 PM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: وحيث انه مرة نزلت من حافلة في امدرمان عندما سمعت واحدة بتغني في اغنية جميلة بطريقة لاتعلم بها الا هي
صاحبنا الودود محمد المشرف حرَّك ليهو بوست عن (مطرب) موديل 2015، قلت أمشي أشوف في اليوتيوب الحاصل شنو ، وجدت عددا لايحصى من (الأغاني)لشباب أدهشني قبح ما (فعلوا) بالغناء وبأنفسهم وعرفت أني ظلمت المطرب المعنيبتعليقي السالب عنه.معليش يا محمد..لكن لازم نضيفك بنداء الإستغاثة أدناه ، وكما ترى فهي كلمات (تقطع نفس خيل القصائد):
Quote: بموت انا بموت لو قلت ليانك مفارق كيف تفارقني وتفوتعاوز اعيش جنبك سعيدوتمسحي همي العليا ديمه بديك المحنه وانتي تديني الصموتليه تقولي الكلمه ديه وتهدمي السويتو ليكيانتي اكتر زول بتعرف السبب زولا حسودالخ.. كفاك.. ..
مع تحياتيبس ما تقوم تموت وتورثنا الصموت....
11-24-2015, 01:12 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
يا مولانا ياخ أغنية عصفور دي بأداء الكورال ما نزلت في عصب الذوق بتاعيأعتقد انو الأغنية دي كتبت خصيصا لنور الجيلاني ..البنات والأولاد الفوق ديل من وجهة نظري جايطين ساي .
11-24-2015, 01:30 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
الأمير اسماعيل..لاشئ يبقى على حاله يا حبيبنا..خارطة العالم إلى تبدل فما بالك بالعبد الضعيف..أهو ، مرات لامن نلقى وقت نرِد الحوض ونمني النفس بملاقاة أهل الود في هذهالواحة ، وحتى لو صدقت نبوءة نوستراداموس برضو نكون قريبين منكم..رغم بُعدي برسل سلامي..
11-24-2015, 03:26 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
أبوالريش ..يا غايب عن عيني مع انك في قلبي..بالطبع لاأجرؤ على الاعتراض باعتبار أنك عشت ذلك الزمن وكل ما جاءنا عن (أتينيه) مجرد عنعنات.. أتينيه دي من زمنكم انت وقباني وعاطف..لم نشاهد دعاية ال BOAC بلمبات النيون باللونين الأزرق والأحمر تتبادل الإضاءة كأنها (تغمز) لساكنيالقصر قبل أن يأتي ناس الهوت دوغ الأدرجونا مع (شزاز اللافاغ). كنا بالأهلية الثانوية العامة عندما انفجرت مادلينا وبطريقتنا الخاصة صنفناها في الخاطر مع مريه التي بقيت موهطه في الفؤاد كصدى للوجيب وأسقطناهما معا كصور مشتهاة. مش على كيفنا؟عندي صورة لمادلينا ومريه لن أخاطر بتحقيقها في الواقع بمشاهدة ست الشي زاتا ، فكما يقالالخيال أجمل من الواقع وأنا لهذا اليوم نادم على مشاهدة فيلم مائة عام من العزلة..
11-24-2015, 05:21 PM
وضاح عبدالرحمن جابر وضاح عبدالرحمن جابر
تاريخ التسجيل: 10-11-2012
مجموع المشاركات: 1986
Quote: يا مولانا ياخ أغنية عصفور دي بأداء الكورال ما نزلت في عصب الذوق بتاعيأعتقد انو الأغنية دي كتبت خصيصا لنور الجيلاني ..البنات والأولاد الفوق ديل من وجهة نظري جايطين ساي .
اتفق معاك .. ما استمتعت بيها من الكورال ..افتقدت نبره الحزن عند النور .. والتطريب الكبيرمع انى بحب اغانى الكورال جدا .. لكن ما شايف انهم ظبطوها ...............تحياتى مولانا
11-24-2015, 05:38 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
أها ..... لحدي ما يلقى الـ Arabic set up بتاعو ....... إلاّ تاخد ليك ساترياخ أتينيه دي بتحكي جمال الخرطوم لما كانت خرطومأكيد يا مرتضى كنا يُفّع، وما كان بيدهشنا الجمال الحولنا .... ببساطة لأنو ما كان في قُبح
11-24-2015, 07:30 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: يا مولانا ياخ أغنية عصفور دي بأداء الكورال ما نزلت في عصب الذوق بتاعيأعتقد انو الأغنية دي كتبت خصيصا لنور الجيلاني ..البنات والأولاد الفوق ديل من وجهة نظري جايطين ساي .
كلامك لايخلو من صحة يا طلحة ، أتفق معك أن هذه الأغنية وصحو الذكرى المنسية فُصِلتا علىحنجرة النور ، متأثرا بالأحداث أقول ، أن أي تحليق أي مغن بأي من الأغنيتين يعتبر انتهاكا للأجواء الجيلانيةالتي أحسها كأجواء الرهبان في التبت.. لكنني تخيَّرت الأغنية دون غيرها من أغنيات مثل (خلي العيش حرام) و (أوعديني) لانحيازي المكشوف للجيلاني ومحاولتي إبراز (شغل) الكوراليين الجميل والذين يقومون بدور عمال النظافة وجامعي القمامةالأماجد الذين آلوا على أنفسهم إزالة ما يخلفه غيرهم من أدران وقبح في الليل البهيم ونقوم دغش نلقى الدنيا فرحه ونضيفه ..برضو في حاجه تانيه يا طلحه، كان للفرقة الكورالية عرض بالمسرح القومي وللأسف كانت الفرقة ترتدي ملابس سوداء والمسرح خلفيته سوداء ويا ملاك الدنيا ليل ، تعذرت الرؤية وكانت ثمة إشكالية في الصوت .. يعني ناس المسرح شطبوا 50% من جهدالشباب ..
11-25-2015, 03:11 AM
يحي قباني يحي قباني
تاريخ التسجيل: 08-20-2012
مجموع المشاركات: 18742
Quote: أها ..... لحدي ما يلقى الـ Arabic set up بتاعو ....... إلاّ تاخد ليك ساترياخ أتينيه دي بتحكي جمال الخرطوم لما كانت خرطومأكيد يا مرتضى كنا يُفّع، وما كان بيدهشنا الجمال الحولنا .... ببساطة لأنو ما كان في قُبح
جايب لينا الكلام بي عُجزك ده ياخي ...بعدين اتنيه شنو الحضرناهو كمان ... نحن أولاد بِمبو ...لا شفنا اتينيه ... لا فصّلنا بناطلين عند مأمون في نفس العمارة ... لا شاغلنا بنات الخطوط الأثيوبية برضوا في ضهر العمارة ...لا مشينا المطار السعة 5:30 صباحا يوم التلات و الخميس ( بدون تفاصيل ) ...لا اتعشينا في احمد سعد ... و لا اتغدينا في السُكّي ...ياخ خرطوم شنو و امدرمان شنو كمان ...
11-25-2015, 03:18 AM
يحي قباني يحي قباني
تاريخ التسجيل: 08-20-2012
مجموع المشاركات: 18742
Quote: لا مشينا المطار السعة 5:30 صباحا يوم التلات و الخميس ( بدون تفاصيل ) ...
و نسيت نادى التنس مالكبعدين يا مولانا المرتضى شنو حكاية يفّع دىمالا شفّع ما سمحة و بيها يستقيم المراداها الغنوه دى يلقوها وين----الجيلانى برغم فنو الراقى و ادبو الجم بيمتاز بكمية تواضع كده ما لاقتنى فى بشرشاء حظى السعيد ان يجمعنى به و القامة المرحوم خضر بشير مرات عدة فى زمن سمحالمرحوم خضر يكن محبة لهذا النور لامن تحتار فيها ذاتوو كانت التعليمات الا يخاطب المرحوم الا بلفظ الاستاذ , قلنا سمح دى مقدور عليهاو الثانية الا يتجرأ احد و يطلب منه اداء اى اغنية .. اها دى يحلوها كيف و نحنا دايرين نسمع غناهوقالو الحل عند النورو فعلا كان الحل عند النوريبدا فى واحدة من اعنيات الاستاذ المرحوم و من قولة تيت يلخبت فيهايرد الاستاذ بى نهرة ..لا ما كده .. ما كده و طوالى يروح خاشى فى الاغنيةكان زمن جميل و ناس جميلين عشان كده البجى منهم كلو جميلامنياتى له بعاجل الشفاء و العودة الى فنه و معجبيهو الرحمة و الغفران للعاشق المتصوف الصادق النبيل خضر بشير
11-25-2015, 03:46 AM
يحي قباني يحي قباني
تاريخ التسجيل: 08-20-2012
مجموع المشاركات: 18742
Quote: و نسيت نادى التنس مالكبعدين يا مولانا المرتضى شنو حكاية يفّع دىمالا شفّع ما سمحة و بيها يستقيم المراداها الغنوه دى يلقوها وين
و الله كنت مكيّس لي واحده من بنات التنس ديل زمان ...لكن ما حصل لي الشرف و لعبت تنس ...اصلوا عندي حاجتين ندمان عليهم لي هسي ...اني ما لعبت تنس ... و ما قريت في كمبوني ... كان بقيت بلبكس أصلي ...او كما كان يقول عمنا عبد السلام مشاغلاً ... أحيي انا الما قريت في كمبوني ...صاحبنا كشكش يا جلّي ... بلعب حريق ليهو 55 سنة الان ...يكون ماسك صاحبنا بي دو او تريس الليل كله لامن يحرق ...صاحبنا يقول ليهو ما فكيت الدو مالك ...يقول ليهو انت قايلني تلميذ في كمبوني ...و الله يا جلي انشالله كمبوني عطبره بدل الشرقية مدني و المساكن الشعبية بحري ...
11-25-2015, 05:27 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
بالغت ياخ . وصف الاغنية (بالصاموتية) بذكرني بقول المتنبئ في مرثيته لوالدة سيف الدولة عندما قال :(صلاة الله خالقنا حنوطا على الوجه المكفن بالجمال)ياخ وصف الصاموتي دا يطلق من قبل آكلي التابا على وارد سهول الفاشر يا حمد اخوي هههههههههها المصدر : حيدر شنقرة بوست صاموتي يا ابا اكرم
11-26-2015, 01:03 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: ياخ وصف الصاموتي دا يطلق من قبل آكلي التابا على وارد سهول الفاشر يا حمد اخوي هههههههههها المصدر : حيدر شنقرة
بالله دا كلام دا !!يا شيقوق عربي عربي عربي ياخ..مليون مره قلت لبكري أعمل لينا منبر منفصل عن ناس الضهاري..وكمان حيدر شنقره؟هسه نقول لناس الشهاده العربيه شنو؟قال البردانه قال..
صاحبك ودابشنقره يا الطيب قبل كم سنه قال لي عندهم واحد اسمو دفع الله عايزينيسجلوهو ناس هلال سنار شدة ما حريف لو شافوهو ناس برشلونه يشطبو رونالدينهو ويسجلوهو مكانو..قال دفع الله دا كان تحت إشراف مدرب من ودالعباس إسمو كَتَرابه..الله يرحمك يا عوض دكام ..
11-25-2015, 05:42 AM
عاطف عمر عاطف عمر
تاريخ التسجيل: 11-26-2004
مجموع المشاركات: 11152
البوست دا ذكرني صاحبي عبدالكافي الطيب ( ربنا يطراهو بالخير ) فتحت الجامعة أبوابها بعد إغلاق إستمر قرابة الستة أشهرمن أشواقنا ، تلبسنا وتعطرنا وطيران على المين رود من الساعة السادسة صباحاً وقايلين ح نكون أول ناسلقينا الناس عييييك زى يوم وقفة العيد أو يوم ( قفلة المولد )نظر صاحبي كافينول وتلفت يمنى ويسرى وأطلق طرفته" اليوم نقالد ونحضن من طرف "وهكذا حالنا معك ومع أحبابنا ضيوفك
Quote: بالطبع لاأجرؤ على الاعتراض باعتبار أنك عشت ذلك الزمن وكل ما جاءنا عن (أتينيه) مجرد عنعنات.. أتينيه دي من زمنكم انت وقباني وعاطف..
والشئ بالشئ يذكروالذكريات تجر وراءها الذكرياتفهاهنا ( بهيتة ) كما قالها صديقنا كمال خليلإذ أتينا لكافتيريا الهندسة ذات ( إسبوع مهندس )وجدنا طاولة لم تخضع لإجراءات النظافة من مخلفات من سبقوناجلسنا عليها وفي الخاطر " ما ياها كباية الشاي دي ؟؟ أصلها ما محتاجة لطاولة "وعندما هممنا الذهاب فاجأنا النادل ( حلوة النادل دي موش ؟؟ ) فاجأنا بتسديد قيمة زجاجات الببسي المشروبة سابقاًعاجله صديقنا كمال بالقول" الله يبهتك زى ما بهتنا ، ياخوي الببسي دا نحن بنشربو في مناسبتين ، يكون في عقد في الحلة أو الزول يكون عندو عسر هضم ، وهسع لا دي لا دي فالببسي شن لزومو ؟؟ "وعليهابهتوني الله عالم وشاهد في ( أتينيه ) بتاعكم دا خرطومكم دي جيناها للجامعةوالسنة الأولى ما تحسبوها كنت مدسي في الداخلية أو مسافر رفاعة يوم الخميس
11-25-2015, 06:25 AM
نادر النور آدم نادر النور آدم
تاريخ التسجيل: 04-29-2010
مجموع المشاركات: 1126
مولانا والحضور النقاوة صباحاتكم رضا وعافيةمرة بحضر في لقاء مع فنان شاب قاموا قالو ليهو عايزين نستمع لي عمل قال نسمعكم عمل خاص وهو من كلمات فلان ليهو التحية والألحان الظاهر الحان الفنان نفسو.. مطلع الأغنية بقول (لو بتريد وريدك باين ليك الريد نعبي سفاين) طبعا باقيها ما بعرفو بقول فيهو شنو والله ههههههههههههههه فالقاعدة الجديدة بتقول انو أي غنا معمول في العصور المظلمة دي تستمع ليهو ويدك علي زر الهروب حفاظا على صحة دواخلك.. براها ما ناقصة
11-26-2015, 02:23 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
يا عاطف..صاحبنا تزوج حديثا وقام بزيارة صديقه بصحبة العروس ، الطفل إبن صاحب البيتامتنع عن مصافحة العروس بعد أن مدت إليه يدها ، فما كان من العريس ، وكان من الإسلاميين وقتها، إلا أن أثنى على سلوك الطفل البرئ معلقا بلغة الجماعة إياهم: ماشاء الله يا هذا، والله إن إبنك هذا سيكون له شأن عظيم. فالتفت الطفلإلى أبيه قائلا: يابا ، خلِّي العروس دي تديني بوسه..-العودة من العطلة لها طعم آخر رغم ما كان يصاحبها من (خسائر) تتمثل في ضرباتاستباقية إغترابية عندما تعرف أن إحدى النجمات هوت بخطوبة في الإجازة، ومنثم تبدأ قعدات تدار فيها الندامى والندامة وانت لو داير بكايا ألف أهلا يا دموع..يا حليلنا فيها الزايله يا عاطف..
11-26-2015, 07:55 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: مرة بحضر في لقاء مع فنان شاب قاموا قالو ليهو عايزين نستمع لي عمل قال نسمعكم عمل خاص وهو من كلمات فلان ليهو التحية والألحان الظاهر الحان الفنان نفسو.. مطلع الأغنية بقول (لو بتريد وريدك باين ليك الريد نعبي سفاين) طبعا باقيها ما بعرفو بقول فيهو شنو والله ههههههههههههههه
وفي مقابلة شبيهة يا نادر سأل المذيع (المطرب) الديجيتال أبو سلسل مدلدل كبنطاله : عندك انتاج خاص؟أكيد،ممكن تقدم لينا نموذج؟عندي حاجه جديده كلماتا بتقول : يا اب بطناً غريقه وريني الحقيقه..
Quote: فالقاعدة الجديدة بتقول انو أي غنا معمول في العصور المظلمة دي تستمع ليهو ويدك علي زر الهروب حفاظا على صحة دواخلك.. براها ما ناقصة
هذه ليست طرفة بل هي الحقيقة العلقم، هسه لو سألتك تحصي لي خمس أغنيات جاءت بعد 1989 وحتى الآن فلن تستطع في الوقت الذي يمكنك أن تعُد ألف أغنية من الروائع كلها ترجع إلى قما قبل ذلك التاريخ،ذات الأمر ينطبق على كافة الأعمال الأدبية والإنجازات الرياضيه والمسرحية وكافة ميادين الإبداع...أما (المطربين) المحدثين فمعظمهم يهرف بما لايعرف ،لازم تستمع إليهم مع صندوق أندروس.**الأندروس يا بله زكريا سمعت بيهو مع الكاسلتزر في ونسه مع أبوحسين ..
11-25-2015, 06:31 AM
محمد مجيدو محمد مجيدو
تاريخ التسجيل: 07-06-2013
مجموع المشاركات: 2392
Quote: لا شفنا اتينيه ... لا فصّلنا بناطلين عند مأمون في نفس العمارة ... لا شاغلنا بنات الخطوط الأثيوبية برضوا في ضهر العمارة ...
يا هندسه ... يااااخمامون دا انا كنت بفصل عندو .... وعمل لي شارلستون كسر الجكس تكسير .. هههههوفي الجهة الشرقيه من العماره .. كان مطعم كوباكبانااا .. وقعدات على الهواء .. رائعه ...وما كنت بتمشي النادي العربي ؟؟ويا مولانا .. محمد المرتضى ...نور الجيلاني .. فنان بمعنى الكلمة .. وغنى في حفل زواجي سنة 1981 وهو في قمة مجده ...لك التحية ولضيوفك الكرام ,,,
11-25-2015, 09:50 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: افتقدت نبره الحزن عند النور .. والتطريب الكبيرمع انى بحب اغانى الكورال جدا .. لكن ما شايف انهم ظبطوها
وضاح اليمن..إن شاء الله مرتاح وسعيد،هذا ما عنيته وهو إيراد الكورال كنموذج لإنتاج فني مزيل للكولسترول في زمنأغاني الدهون المشبعة وجرادل الشمع التي يصبها البعض في آذاننا صباح مساء،الجيلاني يا سيدي لي مع أغانيه قصة جميلة أيام الطلب ، كانت قدمي في الجبسوزارني بعض الطلاب وكنت أستمع لشريط منوعات به أغنية للنور، فقام أحد الزائرينالشليقين المحسوبين على اليسار بالتقاط شريط لفنان آخر من على الطاولة لتشغيلهأثناء تلاوة الجيلاني ما تيسر من إحدى سور الألم المهدرج، وبابتسامة مقطوعة من شجره لاجذور لها في القلب وما فاتت ال smile line شِبِر عبَّرت عن حبي للنور وجمال النور وصدق نبراته هادئة كانت أم اخترقت حاجز الصوت ، جاءني تأييد غير متوقع وفوري وحماسيوحاسم من زائر آخر كان بحد ذاته أغنية، جاءني ذلك الزائر في اليوم التالي بمجموعةكاملة للنور ( نور على نور) مكافأة على حبي للجيلاني فعرفت الفارق الشاهق بين الجاغواروالرافال ومستوى التحليق وحساب الإرتفاعات وقواعد الإشتباك..النور عجيب ياخ.
11-25-2015, 03:26 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
كيفك يا شيقوق نعمل شنو ياخ الزول دا ما غلطان فعلا الصمود بقى صموت وما تستبعد يجي واحد يقول لحبيبتو أهديتيني الصعوطبالمناسبة كمال خليل الجاب سيرتو عاطف عمر دا قطع شك بتعرفو احتمال كبير يكون دفعتكم في الحوش الثانوية
11-25-2015, 07:17 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
يا حمد يا خطير من وين ليك الكلام دا ؟فعلا انا درست في الحوش الثانوية بس انت شغال استخبارات ؟للأسف ما بتذكر الأخ كمال دا لكن كان قلت ليهو معانا الطيب العريس طوالي بيعرفني
11-25-2015, 07:53 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39370
(مادلينا).. ومادلينا دي يا عمر - أيام يفاعة الخاطر والمخيلة – ظننتها بنت خالة (مريه)لَزَم وأنها كانت ترافقها إلى المدرسة الثانوية بفستان أزرق فاتح (لَبَني) مع كَبَك وجوارب (شرابات) بيضاء طويله في أعلاهما خطين أحمرين يتوسطهما خط أزرق بقراءة الشرقأتى والغرب أتى ، حاجه كدا زي إنييستا وهدفه الثالث من تمريرة نيمار التي أقالت مدربالريـال وغيره من الرياييل، كانتا تتهاديان والحقيبتين الجِزلتين بمقامهما مضموتين إلى الصدرين ضد الرصاص والنفاثات في العقد، في عملية تحتمون ، يتبعهما شَعر يهدي إلى الهذيان والمسألة كلها يا مولاي مسرح للفجيعة.
نافذة الاقتباس بمنبر بكري, قد تفسد بعض تفاصيل أعلاه .. واعلاه الواردة باعلاه مخارجة عبقرية للاشارة نحو اعلاه .. لانو ما عرفناهو هو شنو بالتحديد ؟!
Quote: مولانا مالك بتهابش في موروث الألفية الثالثة؟
Quote: Quote: الصموت
ياخ دي أغنية صاموتية الصموت في معرض الحديث كلامون
بس تخيل يا حمد كنا وين وبقينا وين، تفتحت آذاننا على (وافترقنا وبعينيَ المُنى غالها الدمع فما أبصرت شيئا) واكتهلناونحن (نتردِم) بالصموت ... ومن قراءة الخط البياني للواقع الأدبي المترنح لا أستبعد نبوءتك بأن ( يجي واحد يقول لحبيبتو أهديتيني الصعوط).. أترى مازال هناك تشريعا يعنى بالمصنفات الأدبية والفنية؟
غير الشجن الفي الصوت فالنور الجيلاني تعبير حركي كامل الدسم يعكس حالة الأغنية زي ما قال الكتابالبنات البتراقصن ويتبسمن في أغنية حزاينية ديل افسدن متعتهابعدين انتو كلية الموسيقى والدراما دي موش فيها اساتذة موسيقى وصوت ! بغلبهم يعملوا الحان خاصة بالكورال والكلمات على قفا من يشيل السودان مليان شعراءشنو بس قايمين إعادة توزيع لي أغاني مسموعة ؟!!!________________المدام عاملة لي حرب أعصاب كل يوم تعبّر في الجلحات ومصرة على إنها صلعة والعجب يوم تلقى ليها شيبة جديدة .. بتعمل احتفال وتقعد تحسب في أخوانها عشان كدة مما ألقى لي بوست لي مولانا ولا قباني بحرسو .. بكتشف إني لسة صغير .. بشعر بالأمان ياخ
Quote: وغنى في حفل زواجي سنة 1981 وهو في قمة مجده
11-25-2015, 10:15 PM
الصادق اسماعيل الصادق اسماعيل
تاريخ التسجيل: 01-14-2005
مجموع المشاركات: 8620
الطيب شيقوقالأغنية دي جميلة ولذيذة وفكرتها ذاتها حلوةوبعدين بتخليك (تعبر عن مشاعرك) بسهولةأغنيى حفلات بإمتياز.طبعاً أنا من المكسرين في البيسموهو (الغنا الهابط)بيعجبني وبيطربني والله ما بقدر أكضب من زمن حنان بلو بلو، كنت بسك حفلاتهاوبطرب لوردي ولعثمان حسين برضهوفناني المفضل والشايفو أحسن زول بيغني هو النور الجيلاني بلا منازع.قصة أسوأ أغنية دي طبعاً (ذوق شخصي جداً)ولكل أغنية (مقام من الطرب) يعلمه مستمعوها
11-26-2015, 06:23 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: بعدين اتنيه شنو الحضرناهو كمان ... نحن أولاد بِمبو ...لا شفنا اتينيه ... لا فصّلنا بناطلين عند مأمون في نفس العمارة ... لا شاغلنا بنات الخطوط الأثيوبية برضوا في ضهر العمارة ...لا مشينا المطار السعة 5:30 صباحا يوم التلات و الخميس ( بدون تفاصيل ) ...لا اتعشينا في احمد سعد ... و لا اتغدينا في السُكّي ...
...أهو زي قباني دا أحسن يحتفظ بالصور الذهنية العتيقة الجميلة عن تلك الأمكنة وأولئك الناس وألايخاطر بالمرور بتلك الربوع وبرقة ثهمد إلا إذا كان (على خطى العرب) يهوى البكاء على الطلول وله ما يكفي من مخزون دمع يكفي لنحيب بين الدخول فحومل. يا باشمهندس ، كان مشيت هسه بيسلموك الزهايمر من شارع افريقيا وعلى بال ما تصل أقرب كوبري ستسحقك حسرة وحالة ندم أنك فرطت في صورة جميلة عن وطن لو سرت فيه الآن لسِرت بترجمان، إنت قايل النجوم بيعتزلوا في القمة ليه؟ يا يحيى حتى المطر ودعاشه والسبع السمان تحول إلى حالة سيول هي توأم الجفاف , والشكشاكه الظريفه وأوامر الأم يا أولاد دخِّلوا المراتب ولَّت، تبدلت كل خطوط السير والمسافات ، و سعي أيام الصبا بين (صفا) و (مروة) تحول مساره بين الغاز والرغيف ودربنا دخل المويه. ألهانا التكاثر والتكاسل يا بركة ولم يتبق ما يبهج سوى زيارة المقابروالإنصات إلى تلاوة عوض عمر وبادي محمد الطيب وهرولة بين الأزقة مع السؤال الدائري: يادار وين حبيبي ؟يازول من الأخر كده الجمال عمل اعتزال.
11-26-2015, 07:43 AM
بلال زكريا بلال زكريا
تاريخ التسجيل: 11-17-2015
مجموع المشاركات: 361
ابوووو الزهايمر ،، على أبوووو الباركنسون ، رحم الله أحمد داؤود وأطال عمر ميرغني ود الشول ، تحياتي وعيني فيها تلج (أبورجيلة) هذا توثيق (HD) تعجز عن مثله نيكون ، DX,FX، الله يخلي هذا الخيال المتمرد .
11-26-2015, 10:55 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: و الرحمة و الغفران للعاشق المتصوف الصادق النبيل خضر بشير
يا سلام ياخ..يا جلال لو كتبت أي رواية عن العلاقة بين خضر والنور بخلاف ما أوردت أعلاه لاحتاجتروايتك لمراجعة، لكن ما جئت به من حديث يمثل تصويرا ألترا هاي ديفنيشن لما كان بين القامتين ، لا أغالي إن قلت لك أني لاتطربني أغنيات خضر بشير إلا إذاكانت بصوته ولكن الإستثناء كان النور الجيلاني وهو من القلائل الذين عطَّلواالمثل القائل : سمح الغُنا في خشُم سيدو. أبحث بلا هوادة عن مناجاة قوم يا ملاكبصوته لأنه يضيف للأغاني (تركيبة سريه) تُدرِج المستمع في قوائم الإدمان . الدون جلال ، أنا ما كنت عايز البوست يبقى عن النور لكنني مضطر للإستطراد عنه، لامِن يغني ( ساعة النسمه ترتاح على هدب الدغش وتنوم) تحسدهمعامل فايتزر والتجاني حاج موسى وأسترازينيكا زاتا على نتائج عجزت عنها أبحاثهم لبلوغ الإسترخاء الجميل والخَدَر المعُطَّر..النشوة هي الرسالة التي آل خِدِر بشير والجيلاني على توفيرها للبلاد والعبادبسعر زهيد دون تدخل هيئة حماية المستهلك ..رحم المولى النبيل خِدِر ومتَّع النور بالعافية والضياء.برضي ليك المولى الموالي
11-29-2015, 08:21 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
أريتو زهايمر السرور،عارف يا بلال، من فوائد الزهايمر أنك تنسى كل الغثاء الجديد، تبني حيطه بين ما قبل السقوط وما بعده ، يعني تبقى على القديم.. الشيخ عوض عمر عليه الرحمة ، كنا نستهل بصوته كافة أيام الطفولةالنظيفة الخضراء النديه، وقبل أن نكمل كوب الشاي البودياني الصاموتيالمقنن من يد حبوبه الأصبح كرك في زمن الكوليرا ، نستمع لصوت مديحهرشيد المدفعي من لندن تحكي عن انتصار للفياتكونغ قرب نهر الميكونغ، كنت ، وما زلت ، أعشق صوت عوض عمر وأكثر ما يعجبني أن يخطئ ثم يصححالخطأ مباشرة، بالله مش شفافية محببة للنفس ؟ ..
11-28-2015, 07:48 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: قصة أسوأ أغنية دي طبعاً (ذوق شخصي جداً)ولكل أغنية (مقام من الطرب) يعلمه مستمعوها.
يا الصادق سلام وعساك طيب يا عزيز.أولا بالنسبه للأغنية التي أوردها شيقوق فهي ليست أغنية كلو كلو،لا كلمات ولا لحن ولا أداء وعنوانها مسئ للذوق العام ، صدقني لمأتمكن من مواصلة الإستماع إليها.أما بالنسبه لكلامك المقتبس أعلاه فهو بدهي وأتفق معك فيه رغمأنه موجه للطيب، وأعلم أنك بإيراده في العام قصدت به العامة كرأي،أثق تماما يا الصادق أنك تحفظ عن ظهر قلب مئات الأغنيات الخالدةالجميلة وترددها بينك وبينك كما ظللنا نفعل لأربعين عاما دون أن تسقطمن الذاكرة جملة موسيقية أو حرف من كلماتها ، في ذات الوقتأشك أنك تتذكر (أغنية) واحدة لبلو بلو وهذا لايعني أن أغنياتها- إن جاز التعبير - رديئة، لكنها لم تبق في الذاكرة لأن عناصرها ضعيفة للغاية مثلها مثل آلاف الأعمال المشابهة. الأغاني التي نستمعإليها بالأكتاف والأرجل كنا نطلق عليها أغاني الأندروس، فهي ينتهي مفعولها بانتهاء القفله، لكن الخوالد تبقى تطرق في دواخلك حتى البرزخ.
11-27-2015, 03:34 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: بعدين انتو كلية الموسيقى والدراما دي موش فيها اساتذة موسيقى وصوت ! بغلبهم يعملوا الحان خاصة بالكورال والكلمات على قفا من يشيل السودان مليان شعراءشنو بس قايمين إعادة توزيع لي أغاني مسموعة ؟!!!
السؤال مشروع يا أحمد وكثيرا ما يتساءل العباد هل عقمت أرضنا السودانية أن تأتي بروائع فطفقت تستهلك مما خزنه الأسلاف في صوامع الإبداع؟الإجابة من وجهة نظري أنه رغم وجود أشعار جيده وملحنين متمكنين وأصوات سمحه لكن يا أحمد الناس بقت ما عندها نفِس ، في ناس قالواالمواهب نُزعت منها البركه. عارف يا سيدي، استمعت لأغان أنتجت في السنوات الماضية وتغنى بها عماليق الفن لكن أذني رفضتها رغم أننا ما زلنا نردد أغانيهم التيصدحوا بها منذ 40 عاما أو تزيد، ربما لأن تعلُقنا بتلك الأغاني كلمات ولحون إرتبط عندنا بزمن بجميل لم يعد متوفرا وهذا من الآثار الخفيةللنوستالجيا ..
11-27-2015, 04:58 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
اوذكر فإن الذكرى تنفع العاشقين ,, قال محمد سعد دياب عن مادلينا: أجمل منها ما خلق الله !!!!هذا المدخل يذكرني نوعا ما بمقدمة "الحب في زمن الكوليرا" "هناك في الدروب, تمضي ربة متوجة" (مادلينا صبية تقطر حلاوة وفتنة لا حد لها ،يكاد كل شيء في جسمها يصرخ إغراء ودعوة ..أجمل منها ما خلق الله ..يقال أنَّ أباها يوناني نزح من أثينا وحطَّ بأثيوبياوتزوج من قبيلة الأمهرا الشهيرةوأنجب مادلينا.. أحلى من رآها قلب):::::::::::::مادلينامحمد سعد دياب::::مادليناأغنية رقت لحناً ورنينامادليناعينانِ رحاب’’ من صحوٍوشفاة’’ تزداد جنونامادليناالشَّعْرُ خَيالات’’ سكرىوخُطاها تمطر تلحينامادلينا .. مادليناسمرتُها..عفواً صحبيفالوصفُ يعزُّ ..أحايينامادلينا..مادليناالأم سليلةُ أمهراوالوالدُ من قلب أثيناترك الأهلينَ ذاتَ مساوترنَّحَ بِراً..وسفينامادلينا .. مادليناالغربُ أتىوالشرقُ أتىوتلاقتْ قمم’’ يا مَرْحَىفعطاءُ اللقيا مادليناالأم سليلةُ أمهراوالوالد من قلب أثيناوأبوهاوبرغمِ...رزاياهُ..يكفيأن أهدي الدنيا..مادلين
11-27-2015, 06:54 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: نور الجيلاني .. فنان بمعنى الكلمة .. وغنى في حفل زواجي سنة 1981 وهو في قمة مجده ...
الفن يا مجيدو يتجلى في كل كثير من سكنات وحركات الفنان ، لامن تشوف النور صامتا حا تعرف أنه فنان وربما حاول كثر تقليد أسلوب تزييه أو حتى إرسال شعره بضفائر اشتهر بها هو وبادي وبوب مارلي وخوليت ، عندما تغنى الجيلاني بكدراويه قدم لنا نموذج السهل الممتنع، وأظهر للجمهور بلدة غيبتها أطالس الجغرافيا ، وأتفق معك أن الجيلاني في 1981 كان في قمة نشاطه ولا أقول مجده لأنه في عقيدتي ارتقى قمة المجد وقعد قبلو ، وعندما تقول لي إنه من شاركك حفل زواجك يمكنني تصور كيف كان الحفل وكيف كان الحضور ، في ذلك الزمن المعقم كانت الحفلات تبدأ في العاشرة وتنتهي والفجر على الأبواب وكان يكفي أن يشاع أن (الحفله بالنور) لتعرف أن عددا من الحسان سيرقصن في دائرة متحركة على أنغام أغنيته المعروفة (يا القدامنا يا إنت)..الدائرة المعنية لازم يكون في محيطها ضمن الراقصين زول نووي لامن يمر أمام المصفقين ، الذين ينتظرون مروره كعربة الرولركوستر ، يشيح بنظره إلى داخل الدائرة حياءا وإغراءا مع ابتسامه تعلن أن الحفل حاز شهادة الإيزو ونرجع بيوتنا بماجستير الطرب معطونين بالرضا وسكارى بغير سلاف.بختك يا مجيدو،
11-27-2015, 09:55 AM
علي دفع الله علي دفع الله
تاريخ التسجيل: 08-31-2012
مجموع المشاركات: 2502
علي دفع الله،سلامات،ثمة أغنية مسيئة للذوق العام وددت نقدها وغيَّرت رأيي بعد ابتداري البوست..قلت أحسن أغير اتجاهووأشير للغنا الزين عوضا عن الطرق على الشين والمساعده على نشره. ممكن تقول أشَّرت شمال ولفّيت يمينومعليش لو جهجهتك (الإنحرافة الحادة) وسواقتنا الكعبه ....ما تزعل مننا ، ديل الدقداق ومشارف الزهايمر لامن يتلموا ..هاك مودتنا وادينا دعواتك..
11-27-2015, 11:01 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: سلام للجميعغايتو كتيرين قاعدين على الهبشة ...اتاري المنبر كلو جلاكين ...المرتضى دردقكم ... و انتو ما صدقتو ... جيتو مدردقين .. بكري دا مفروض يعمل ليهو ايقونة اوفر 60 ...
قيل إن أحد أسباب تردي مهنة الطب في السودان هو الإنقطاع الذي لازم التسلسل التاريخي في هذا المجال، زمان الأطباء الجدد بيتعلموا من الأقدم وبيسلموا الرايه لمن يليهم كما في سباقات التبادل وهكذا ، وحاليا لاتوجد مستشفيات ، وقبائل الاستشاريين والإختصاصيين في معظمها هاجرت وبعضهم تفرغ لكتابة قصائد الغزل في الدولار والتشبب بما يسمى بالمشافي الخاصة والتي لاعلاقة لها بالمشافي التي نعرف ولا الطب الذي نشتهي. المقدمة الماليها داعي دي يا عادل سببها كلامك الفوق دا ، أصحابي الجلاكين المشاركين هنا هم قلة أتيح لها التعلم الجامعي وربما ما فوقه والتعامل مع مخرجات التقنية والعيش في زمن كان جميلا على كافة الصُعُد مع حس نضيف ديجيتالي وفوق هذا وذاك ذاكرة متسامحة وحنينه وحميمه سعتها عشره يوتابايت. الناس ديل يا أبا حسين بيعملوا تجسير بين جيل منى الخير وجيل منى مجدي وجيل جلاله رغم أنهم ما التقوا المنى الأولى ، نقلوا بكل أمانه وكتبوا بالدمع وكلامم جاي من معالق الجوف، لاينقلوا الأغاني وحدها بل معها التفاصيل الحياتية اليومية المصاحبة لتلك الأغنيات في كل نواحيها الإجتماعية والسياسية والإقتصادية وحتى حالة الطقس، بيقوموا بدور يفوق روايات ماركيز و أمادو ويرتقوا بالذوق العام وتوثيق مكنونات الخاطر ، وحتى إن جنحوا للتحليق بعيدا عن الواقع فلهم العذر في ذلك ، وكما قال خورخي بورخيس:إننا بحاجة إلى الخيال كي نواجه تلك الفظاعات التي تفرضها علينا الأشياء.وأضيف ، وغير الأسوياء..
11-27-2015, 11:42 AM
علي دفع الله علي دفع الله
تاريخ التسجيل: 08-31-2012
مجموع المشاركات: 2502
Quote: وذكر فإن الذكرى تنفع العاشقين ,, قال محمد سعد دياب عن مادلينا: أجمل منها ما خلق الله !!!!هذا المدخل يذكرني نوعا ما بمقدمة "الحب في زمن الكوليرا" "هناك في الدروب, تمضي ربة متوجة" (مادلينا صبية تقطر حلاوة وفتنة لا حد لها ،يكاد كل شيء في جسمها يصرخ إغراء ودعوة ..أجمل منها ما خلق الله ..يقال أنَّ أباها يوناني نزح من أثينا وحطَّ بأثيوبيا..وتزوج من قبيلة الأمهرا الشهيرةوأنجب مادلينا.. أحلى من رآها قلب)
دا كلام عجيب يا المشرف المشرف.. زي كلام دياب شعرا ونثرا عن ما دلينا يختزل المسافات ويختصر الوصف إلى حد مكثف حتى ليُشبه الكون حين كان رتقا ، مجرد نقطة انفجرت وانداحت في كل اتجاه ومازالت ، وهذه موهبة الشعراء والأدباء التي تبقى معها كلماتنا في وصف الجميلات مجرد (أقوال محتضر ) ، فمنذ الاستماع إلى (مريه) يظل خاطرك يحمل إزميل فدياس دون كلل مستصحبا حالة الفتنة الهوجاء الموهطة في خيال متمدد بين الطفولة والكهولة وتبقى حتى المثوى الأخير. لكن دياب جاء بالهجين الفادح ، أمهرا وهيلينيا وتخصيب اليورانيوم ، هو ما يعرف بالقوات الهجين أو الموت الزؤام، درجة من الجمال تكتسح النفس يا سيد ابوك ، وزي ما قال لي صاحبي بعد أن رأى (عينه) زي دي إنو ( جاتو لوَّايه ) وهذا ما شهدت به مستغانميبأنه (اذا صادف الانسان شيئا جميلا مفرط الجمال ، رغب في البكاء) ، أما حسن الزبير سمح السجايا لم يبق له خيار سوى أن يردد علنا : إن شالله القيامه تقوم.ما داير أطول عليك الكلام لكن مادلينا أو (مادلين) تجري في حقها إفادة سيد عبدالعزيز في قضية الحسن البديع الشهيرة ب (سيده) الجمالا فريد..لكن يا محمد بعد مرور العمر أصبح لجمال البشر في النفس معنى آخر ، يتجسد في أناس – كما قالت غاده السمان – عندما تلتقيهم تشعر كأنك التقيت بنفسك (وعندما تفارقهم تتساءل كيف لم تمت)؟قادر الله في خلقو..
11-28-2015, 02:31 PM
Giwey Giwey
تاريخ التسجيل: 09-02-2003
مجموع المشاركات: 2130
ياااا مرتضىمن زمنا" بعيد ما قعدت في بوست في المنبر ده بهذا القدرشكرا" على هذه اللحظة البديعة والونسة الطعمانةوقطع شك بجيك راجع كان الله مدّ في الاياممع تحياتي وشكري
11-28-2015, 04:03 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: المدرسة الثانوية بفستان أزرق فاتح (لَبَني) مع كَبَك وجوارب (شرابات) بيضاء طويله في أعلاهما خطين أحمرين يتوسطهما خط أزرق
حولا ,,, وعلى من يجدها الاَتصال على تلفون(5051) ,,,.
أي والله يا بلال، وحاولت جهدي اختصار الوصف فلم أشر إلى كرتين صغيرتين تتدليا بالجنب من أعلى كل جوربكانت تسمى البلابل وهو الإسم الذي يطلق أيضا على كرات ثلاث تُعقد أعلى الضفيره الخطيرة سواء حضَرت التوكةأم غابت ، كانت تتلاعب في فرح مع بدايات االشعر المموج عامله مزيكة قِرَب ، تناغم في كل شئ يا بلال، ، المشية والإعتداد بالنفس والنظافة المتحالفة مع البهاء والشطاره ، البسمات توزع عن رضا كما الصدقات والزكوات على العاملين عليها والمؤلفة قلوبهم والمفطورة أفئدتهم..تصور روعة المشهد..قلت لي ميرغني ودالشول..والله إنت الكِسره أكلت سماياتا والبحر لملمت الطواري الحفروهو بيها ..تسلم بلال...
11-28-2015, 09:07 PM
يحي قباني يحي قباني
تاريخ التسجيل: 08-20-2012
مجموع المشاركات: 18742
تحياتى الاخ /قبانى ,, والقبانية أصحابنا وأحبابنا ,, وجاهزين ليك كمان لو عاوز غير ( ود الشول) بى و(د التويم )أو أبو طالب , أو(عبد الرازق ود الشتيلة.). والشكر لصاحب هذا الخيط الجميل,, والذى بسبب ( الخشونة )التى حدثت فى مُداخلةً سابقة لى,, عزمتُ على أن أتداخل ببوست( الخشونة) ,,
11-29-2015, 01:18 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: من زمنا" بعيد ما قعدت في بوست في المنبر ده بهذا القدرشكرا" على هذه اللحظة البديعة والونسة الطعمانةوقطع شك بجيك راجع كان الله مدّ في الايام
السلام يا روح البدن..والله يا عبدالرحمن البوست المرقك من محرابك دا جاب حقو تب..دي سعاده ياخ (أشوفك) بعد السنوات العجيبه الغريبه دي..شكرا على كلامك الطيب وعشمي في (شوفه) قريبه وفقا لوعدك..ما تتأخر، العبوس الغراره ما معروفة والعمر ما أردب سمسم..مودتي يا قوي لك وللأحباب طرفك.
..تعرف يا مولانا .. بقعد يوميا أكثر من مرة في البوست دة .. ومرات بيكونو معاي الاولاد في البيت وبفتح ليهم البوست برضو عشان يقرو المكتوب من اعمامهم .. ويلقوهو نفس الكلام القاعد اقولو ليهم .. بس مع اختلاف بسيط .. وهو انهم ما شافو .. الشفناهو .. ولا عشاهو .. العشاناهو . ومن هنا بيعيد السؤال نفسه ... عميق مودتي لكم .
..تعرف يا مولانا .. بقعد يوميا أكثر من مرة في البوست دة .. ومرات بيكونو معاي الاولاد في البيت وبفتح ليهم البوست برضو عشان يقرو المكتوب من اعمامهم .. ويلقوهو نفس الكلام القاعد اقولو ليهم .. بس مع اختلاف بسيط .. وهو انهم ما شافو .. الشفناهو .. ولا عشاهو .. العشاناهو . ومن هنا بيعيد السؤال نفسه ... عميق مودتي لكم .
11-30-2015, 06:31 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: Heitham Suleiman · University Of Khartoum / Faculty Of Architectureوتسلم انت, ياااا روعة يا من تذكرنا دومآ بسبب ولهنا بهذا المنبر. نلف ونلف بين الصفوف ولا يثيرنا عنوان ولا يلفتنا موضوع, فإذا ما لاح اسمك ضمنا المتعة وايقنا بالمكافأة. ومن ثم وتحيزآ لمهنة راقية انيقة جمعتنا, اسمح لي ان ازعم ان لها نصيب في تعبئتك بهذا الجمال, فمن سوى المصمم من يقتطع من روحه ومن صميم الفؤاد لينتج إبداعآ وينثر فرحآ, ومن سوى المعماري من يهتم بالباطن والظاهر وبعوامل (ثمانية). ويظهر الجلال والإبهار بعد المعنى في المبنى حين تنتظم سطورك وتتلون بلون الخضرة المريحة.
كويس يا هيثم ، اصلو كنت متردد أقول ل بكري أبوبكر تاني ما بكتب إلا يدفع لي باللسترليني خصوصا بعدمااللنقليز هددوا بالخروج من أوربا واتحادا. شكرا يا عزيز رغم أن كلامك السمح الذي يحمل الكثير من المجاملة أدرجها تحت عنوان لطفك وفي خانةتشجيعك لي ، وبالطبع يا العزيز هناك أقلام في البورد دا من فرط جمالها تقول أصحابا بيعبوا حبرها من Calvin Klein وبحقيتقاصر ما أكتب عن سقف معانيهم، لكنك نظرت إلي بعين الرضا ال عن كل hump كليلة ويسرني ذلك كبقية البشر..لو بقيت من ناس المعمار وأخوك من قبيلة المحامين برضو مابنختلف، المعمار يا هيثم كانت ضمن لستة الأمانيالخدَّرت أيام المدرسة لكنها ذبلت ضمن قائمة رجاءات كثيرة بسبب قلة الماء وشح المخصبات والرعايه والسقيالكن لسه بنريد المرحوم فرانك لويد رايت ومحبه خاصه ل (زها حديد ) المدهشة، لامن أشوف إبداعاتها يخال إلي أنها تصمم وبجوارها محمد ودالرضي يردد بهوى الخلخال. دا المعمار التم تم.ما تنسى تكلم بكري في موضوعي (وما تزيد بلبالي ولاتكون شكواي مويه في غربال)
مولانا /المرتضى.. لك التحيه..حقيقة احترت ابتداءا بعد المداخلات المليئهبالاشواق لدروب اتساسقت خطواتنا فيها تحكى الخرطوم بالليل..لاى جيل ننتمى ..واحمد لك حدسك القانونى للاشاره للتاريخ الفاصل.. 89..... فالاخلاق سادتى لم تتغير الاف السنين فما بالك ببضع سنوات.. وماهو الجديد فى النوته الموسيقيه..للفرق التى يقف امامها..اصحابالالقاب الملوكيه..الامبراطور والامير....الخ...مافى جديد... بالتاكيد لايد فى تداول الايام بالذى يحدث بل هنالك ايادى عبثت...فى مسار التداول والتسليم والتسلم..رغم ان اصحاب العهده مازالو ..موجودين ومعاصرين ..واسال الحلنقى ود الامين الكابلى الموصلىابوعركىى وعشرات ... لقبانى والاخوه ان ايقاع التاريخ فى بلدنا لا يقاس بالاجيال..فاتنيه من سبتمبر ... ١٩٨٣...اصبح اطلال
12-01-2015, 08:43 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: ومرات بيكونو معاي الاولاد في البيت وبفتح ليهم البوست برضو عشان يقرو المكتوب من اعمامهم .. ويلقوهو نفس الكلام القاعد اقولو ليهم
حليمو ، عوافي..في أكتوبر المنصرم كنت في زيارة لإحدى الأسر الصديقة المهاجرة في دول الغرب وكنا – كما هي عادتنا – نحكي لأبناء وبنات تلك الأسرة – وهم في نهاية العقدالثالث من العمر - كيف كان السودان ، كيف كانت المشافي والمدارس والبريدوالبرق ورائدات الهلال والجامعات وأبطال إفريقيا أمين زكي وكمال عبدالوهاب،وبوليس عمر علي حسن وبخاري وكيف أتى وليم اندريه كآصف بن برخيا بصرح بلقيسفي كأس السله قبل أن يرتد إلينا الطرف وكيف أنشد وعاصم زين ليلا Many Rivers To Crossمع جيمي كليف سيد الشي زاتا، كفر ووتر، ولماذا كان قانون (الحركه) يلزم سائق التاكسيبارتداء العمامه والحذاء قبل ما (يدقوا سيستم) في غفلة رقيبي، ولماذا كانت البلديه تغسل سوق الخدار والجزاره ليلا وعمال الصحه بالمرصاد لأية مخالفه والديتول حاضر يؤانس الجمكسين ، وكيف كان شارع الجمهوريه وأكروبول وصحارى وإكسلسيور والأمم المتحدة يعج بمعارضالمرسيدس والموسكوفيتش جوار نهر الفولجا والشعب يغني للسايق الفيات والتيمس والبدفوردطويل التيله ، ولماذا أحببنا عبدالناصر ولوممبا وجيفارا من المسالمه حتى جبال السييرامايسترا.وكيف كانت المسارح والجي إم إتش وقصص الأعمام والخؤولة عن كلاي ونكروما وجميله بوحيرد ، وماهيالفابريقه والبيره أبوجمل - عليها اللعنة - في برودتها الكنديه النديه وجوني المشاي الشقيالفرتق خطوبة سهير، آمن حكامنا وقتها يقينا بأن المولى قال لرسوله الحبيب إنك لاتهدي من أحببت ، كان لنارؤساء ووزراء بعفة المظهر والسرائر تعرفهم بسيماهم من غير سارينا ومواتر، والروثمانكنج سايز والفودكا بت خالة السوخوي قاهرة الرجال ، ولم نسمع ب (الخرشه والشمشماني)إلا في هذا العهد الغيهب . لو ما لبست البنطلون الأسود والجزمه لامعه والقميص كم طويلقطع شك أهلك إتغابوا فيك العِرفه وفاتتك الفرقة الصومالية والسيرك الروسي، يا حليلناس تيتو وبرجنيف (أبحواجب) العظما المثلوا أعظم دور السووا شارع الوادي وصينية الدومه ساساقا ، حكيت لهم كيف كنا وجهاء العروبة وافريقيا نصلح ما بين البشر وبينعماليق كناصر وفيصل وكيف يومها انكشح إعلام العالم كله في بيت المحجوب قبل أن يتنبأ سماعين ود حد الزين ، كالناظر في كرة نوستراداموس البلورية ، بما نعيشه الآن فقال (حليل الكان بيهدي الغير صبح محتار يكوس هداي) وكيف كان كيندي واليزابيث القيافهوجاكي الفايته النسوان مسافه يحتفون ليس بعبود الرئيس وحسب بل حتى بأعياننا ناسالسيد عبدالرحمن البيصرفوا عندو فاتحة فلان، حكينا لهم عن سفريات الشمس المشرقه وهيتصبح في فرانكفورت وتمسي في الفاشر، حكينا لهم عن أيام صفانا واعتذرنا لهم أننا لمنُهدِهِم تفاحه أو برتقانه ، فالفاكهة أضحت (قنبله) بعدما ارتدى عتيق البرمودا.الشباب ديل يا ود حامد كان بينهم إبني الأكبر (أكرم) وهو الآن طالب جامعي والذي سمعأسطوانتي المشروخة هذه وحفظها عن ظهر قلب ولعله في الماضي كا يظنني أمزح و(عايزأطلع بيهو الجو) وبالتكرار لاشك أنه يساوره أنها حالة مرضية أوخرف مبكر ، وربما يردد سرا بأن (داد) دستورو نازل في الخرطوم تلاته ..
12-02-2015, 09:27 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: بالتاكيد لايد فى تداول الايام بالذى يحدث بل هنالك ايادى عبثت...فى مسار التداول والتسليم والتسلم..رغم ان اصحاب العهده مازالو ..موجودين ومعاصرين
...الأيادي العابثة معروفة، لكن الحاجه التسغرب يا عبدالرحمن هي الإنهيار السريع المريب في فترة وجيزة لكل ما شاده أهل الإبداعقبل عام النكسة الذي بدأت إرهاصاته في 1983 كما تفضلت، وأراه قبل ذلك ببضع سنين . ربما تتأخر المواسم قليلا وليس من الطبيعي أن تتوقف تماما عن المجئ، لكن الإبداع في كافة أوجه حياتنا مات بالصدمة رغم تواجد بعض المبدعين الذين أحسهم كما لو أصيبوا بشلل في الجهاز العصبي المركزي ، فقد ورد في تشريح الطبيب الشرعي ما يشي بحالة Cadaveric Spasm لكل المشهد الثقافي وهو الآن جاهز للغسل والدفن في أحمد شرفي وينتهي العزاء بانتهاء مراسم الدفن دون صلاة. يا عبدالرحمن مات الأطفال ونزحت الحرائر وتشرد الأصائل في أطلس الجغرافيا ومكتبة بغداد لونت أحبارها مياه دجلة ونحن ما زلنا نحاور ونتحرى الرؤية . الأيادي العابثه والانتهازيه ، والتي بينها وبين الجمال ما بين مجرتنا والأندروميدا ، هي العدو الأول للدهشة والنشوة ، فزمرة هولاكو مسخت ومسَّخت على كل ذي لب ما حوله من جمال وجففت كل مصادر المياه والعطور والضياء. قل لي بربك كيف يبدع إنسان لا يأمن أن يبيت بين عياله أو يصدع بكلمة حق أو يصدح بأنشودة حب ، كيف يبدع بشر لايجد قوت يومه ولايرى إلا ما يرى أعداء الحياة ولا يقرأ الا أسفار الكذب ولا يسمع سوى نعيق البوم والغربان والنشرة الجويه والمنخفض الجوي الإفريقي الآسيوي ورياح الحركات التجاريه .(لاتلم الكافر في هذا الزمن الكافر فالجوع أبو الكفار) ياهو زي ما شايف البعض في صف الجوع الكافر ونفر يسجد من ثقل الأوزاروالسواد الأعظم ترك العبوس الغراره ، حتى من بقي في رئته بعض أوكسجين لايكفيه ليندب حظه أو ليردد (كل من عليها فان..)..ما يحزن يا سيدي أن الردة كانت كبيرة وربما نحتاج قرونا كي نرجع وترجع أيامنا الجميله رغم استحالة ذلك بعد أن (وحَّدوا بينا البارحونا وراحو).
..مولانا محمد المرتضى .... يعلم الله من أمس غالبني أزيد حرف على المكتوب ..فقلت أتصل .. واسمع الصوت .. يمكن العقدة تتحل ..لكن علي باليمين ... الكضمة الياها ...متعك الله بالصحة والعافية .. وبرغم عبث كتير من المشغوليات .. لكن تظل الدواخل كما هي .. مهما جار عليها الزمن ..أكيد مودتي وتقديري ..
12-03-2015, 07:48 AM
بلال زكريا بلال زكريا
تاريخ التسجيل: 11-17-2015
مجموع المشاركات: 361
Quote: لكن الإبداع في كافة أوجه حياتنا مات بالصدمة
الذين لديهم مقياس (ريختر) في تمييز الإبداع. قد هاموا،، في الاصقاع (ظعناً) ثُم(نشوقاً) كما الهنود الحُمر ،عندما يخرجون للبحث عن (الخيول الأصيلة) ويروضونها، تعرف ياخي- الصوت مُلهم للابداع وكما المُهر ،، يحتاج تطويع وترويض واِستئناس واِلفة،، يعني ، جدنا(شرحبيل محمدنور منصور) وهو- شقيق(معاويةنور)، أتي بي(فضل المولي زينقار) وعرضه علي(كونسلتو) الموردة وحي العرب ثم ، علي نطاس(البلاستيك سيرجري) عمك الناظر(عبد القادر تلودي) فبُدلت كلمات أغاني(رابحة تُم تُم) بكلام (سكلاريدس / طويل التيلة)فكانت (حبيبي غاب) و(من بُف نفسك) و(سوداني) ،،ثم موّل (شرحبيل) رحلة مصر المؤمنة، مع (ديمتري) ،،فكانت إسطوانات (زينقار) المعروفة، مع إنّو جدّنا شرحبيل كان مُجرد(هاوي)،،هذه عبقرية(الاستشعار) والتي تكاد تكون قد تلاشت، إلاّ ما ندر(بشير / البلابل)، الرحمة لموتانا ،،
بالله فكونا من كلام الجلاكين ده ونزلوا ليناالمكوجي الفى الحي تشتش قميصي علي . تكونوا زمان سكسكتوا مع يا عصام جيناك وجينا نفرفش معاك ومع احي الحراسة انا والقراصة واو ديشكا ديشكا ديشكا لمن قلتو بس
12-03-2015, 11:55 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: بالله فكونا من كلام الجلاكين ده ونزلوا ليناالمكوجي الفى الحي تشتش قميصي علي . تكونوا زمان سكسكتوا مع يا عصام جيناك وجينا نفرفش معاك ومع احي الحراسة انا والقراصة واو ديشكا ديشكا ديشكا لمن قلتو بس
أيوا كدا ياخ.. ، سخِّن السكسكه..أبو الزِفِت..ملتزمون بالتفوق..هنا وهناك..المنتصر أمين عام هيئة رواد قهوة الزيبق ويوسف الفكي ومخترع كراسي القماشات، حبابك..يا منتصر السكسكه مع النماذج التي أوردتها لاتغادر الذاكره ضمن كثير من مفردات الأيام الخُضر، لكن ألا تتفق معي أن بين كل سكسه مع عصام وكل حراسه وقُرَّاصه كانت هناك عشرات من جميله ومستحيلهوالحزن القديم ومع كل ديشكا ديشكا ديشكا كنا نستغرق مع ألف زورق ألحان ووعد نوّار ؟ ألم نكن ننتشي طوال العام مع المصير وسألتو عن فؤادي وضنين الواعد ونصوم قليلا من أحبك انت بذاتك واحب ترن وترن والفرمله؟ عليك الله حكِّم ضميرك، كم يتيمات السكسكه التي تحفظها وكم من الخالدات كانت تهدهد ك في المهد صبيا فتُسبِل أهدابك؟ المشكله يا المنتصر إنو منذ 1989 وحتى تاريخه لا روائع ولا سكسكه ، ولا يسعنا سوى أن نردد ( مادوامه) حتى لو جننتني وجننت العزَّابه..دعيت لحفل في صالة زواج مليونيه ولساعة كاملة كان (المطرب) يؤدي (شيئا) بلحن دائري يردد ناس أبروف سمع وشوف ، ناس المسالمه اماسينا حالمه، ناس الأربعين الكلام حنين ، ناس... ولم أعرف ما إذا كان ذلك الرجل مطربا أم كمساري ينبه الركاب لمحطاتهم وما إذا كنت أنا في صالة حفلات أم في بص الوالي . حكِّم ضميرك يا حبيبنا ووريني وين ألقى مكان اسمع فيهو خلي من حُضنك ضرايا؟ هسه لو حبيت تخفف دمك مع زوله قالت ليك وينك يا منتصر وقلت ليها مبتسما(كلما سألت عليك صدوني حراسك)تغضب (منهم) وتقول ليك وما كلمتني ليه عشان كنت أوريهم؟ زي الطرفه القديمه عن البت السألتها حبوبتا : كيفن ما بتعرفي العتود فردت : ليه هو قال بيعرفني؟ أغاني السكسكه كانت موجوده وقليله ولا تغنى في الحفلات ولكن اليوم أصبح لها إلبومات.. -بمناسبة ال (سكسكه) ، فوجئت بإيقاع في كيبورد YAMAHA A2000 Oriental وقلت لازم أبِرَّك بصوره أخدتها مخصوص ليك كممارسه مباشره للنوستالجيا مع إبدال السين شيناً.
حليل السكسه 2 ..
12-04-2015, 11:17 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: لكن الإبداع في كافة أوجه حياتنا مات بالصدمة
الذين لديهم مقياس (ريختر) في تمييز الإبداع. قد هاموا،، في الاصقاع (ظعناً) ثُم(نشوقاً) كما الهنود الحُمر ،عندما يخرجون للبحث عن (الخيول الأصيلة) ويروضونها،تعرف ياخي- الصوت مُلهم للابداع وكما المُهر ،، يحتاج تطويع وترويض واِستئناس واِلفة،، يعني ، جدنا(شرحبيل محمدنور منصور) وهو- شقيق(معاويةنور)، أتي بي(فضل المولي زينقار) وعرضه علي(كونسلتو) الموردة وحي العرب ثم ، علي نطاس(البلاستيك سيرجري) عمك الناظر(عبد القادر تلودي) فبُدلت كلمات أغاني(رابحة تُم تُم) بكلام (سكلاريدس / طويل التيلة) فكانت (حبيبي غاب) و(من بُف نفسك) و(سوداني) ،،ثم موّل (شرحبيل) رحلة مصر المؤمنة، مع (ديمتري) ،،فكانت إسطوانات (زينقار) المعروفة، مع إنّو جدّنا شرحبيل كان مُجرد(هاوي)،،هذه عبقرية(الاستشعار) والتي تكاد تكون قد تلاشت، إلاّ ما ندر(بشير / البلابل)، الرحمة لموتانا ،،
بالله البوست دا مش مفروض نغير عنوانو ل (خريف ابوالسعن ، صرفه وجراد) !!والله يا بلال الكلام الفوق ده أصلا واقتباسا كلام جد سمح ولعلك تذكر التيكي تاكا العملوها أحبابنا د.أحمد القرشي ود. طراوه في (بوستيهما) بتاع كلاسيكو الأغنية السودانية، وكلا البوستين يصلحا كرساله لنيل الدكتوراه من ستانفورد ..فضل المولى زنقار والبازار أحسبهما من الأبرار ، (أعتذرلأستخدامي كلمة (أحسبهما) لأنها كلمة أثيرة عند الجماعه البوظوا البلد). إيقاع التمتم يا بلالمن أروع ما اكتشفه أهلنا في السودان ونقله عنا حبايبنا في الهضبه وهو الإيقاع المرتبط في ذاكرتناالإحتفاليه بالسكسكه والصعلكه الحلوه حيث أنه إيقاع اتصل بأغنيات عادة ما تكون كلماتها كما تعلم.عبقرية هذا التم تم الأثير إلى النفس تتجلى في أنه لا يمكن لإنسان سوي أن يبقى ساكنا معه والأغنياتالتي أشرت إليها تبقى نموذجا ساطعا لما أقصد، أعرف بعضهم يستبد به الطرب حتى درجة (الدَستَره) في ذلكالإيقاع الإبداعي الفلته. في ثمانينيات القرن المنصرم شهدت حفل زواج بحي أمدرماني ليبرالي 3 صلايبوكان الحضور ينصت باتزان ووقار لفنان معروف حتى قامت مطربه مغموره مؤهله ومجازه من ال MIT بأداء وصلة بأغنية (أنا غيرك ما حبيت ) فانقلب الحفل رأسا على عقب وتخلى الحضور عن المقاعد وضرب الزار بأطنابه ورقص القمر في سماهو ، أها .. قام أحدهم بأداء رقصة إسكيستا أذهلت حتى الكشافات واستشارييالعظام وعندما وصلت المطربه إياها إلى (شكيت الناس ل الله الطلقوا النار في الحِله ويييييين يا حبيب)قام عازف الساكس بعمل صولو ماركة إكستاسي ميتسوبيشي.. زولك وقَّف رقيص وقعد في أقرب كرسي يجعُر .. شايف (الخشونه) الماخمج يا بلال؟ في ظني أن هناك نوع من التم تم لايصلح للإستماع الآدمي لما يتميز به من إلغاء للعقل ومستوى الرؤية وما ينتج عن ذلك من فلتان أمني رغم أنه في غالبه يؤنسن الدواخل، مرات اشحد الله يشغلوهو اليومينديل لبوتين وأردوغان، يمين لو كانت بيننا الشاهقة فاطمه خميس كان ناس الناتو عرفوا حاجه..
12-06-2015, 06:16 AM
بلال زكريا بلال زكريا
تاريخ التسجيل: 11-17-2015
مجموع المشاركات: 361
Quote: بالله فكونا من كلام الجلاكين ده ونزلوا ليناالمكوجي الفى الحي تشتش قميصي علي . تكونوا زمان سكسكتوا مع يا عصام جيناك وجينا نفرفش معاك
غايتو،، يا ود المُرتضي، حيرتنا، ياخي وبعد ما سنيت قلمي عشان، أتداخل مع الأخ بتاع( الجلاكين) و( السكسكة) وَيَا ( عِصّام) و( المكوجي التششت القميص ،)!! جاني ( طيف)كلامك الفوق ده (طايف) في (ثوب من الطرايف )،،وكما يعمل ( النكسيوم ) في ال( Reflux-eosaphagitis )،همدت الروح ، وهدأت الضربات ،وإسترخت،، وما لقيت غير أن أوافق علي تغيير العنوان،، مع طلب ربطه في قمة المدخل،، إن وافق صاحب الدار ،،لكن و(غتاته كدة) سوف أُحاول أن أُخاشن / ،، ) ( يا عِصاّم )هو السفير عصام حسن عبد الرحمن ، عبقري الديبلوماسية السودانية/ 1961/1989/ خلّد إسمه بمهنية وحرفية عالية ،،ومن الذين شكلوا خيال الغير برفعةِ وفخر عن --بلدإسمه( السودان)،، 1964/ وهو سكرتير أول ببون/ ألمانيا- الغربية وقتها ، كان مولد الشريط ( القصة) ،،،عالمٌ من النور، والجمال ،والسمو ، ( سكسكة) لكنها ما ، مجهجهة!! ولا تُغطي( لحاها )بورقٍ أصفرٍ في كُتبٌ مُهترئة ،، ولا بخمارٍ من الخجل، والوجل، وفقدان التصالح مع النفس ،، (15) مُهرة نُقلت من ( رول) إلي( TDK ). فانتشرت في الاصقاع ،وكُلٍ نال نصيبه،،، دُهش ( الجماعة ) لما قدم عصام حسن ،إستقالته89/ عن طوعٍ وإرادة ،،وكان سفيرنا بالمانيا،، ولقد رفض زملائه من أعضاء السلك، هناك ،وعلي إختلاف دولهم أن يُغادر،، وعُين بإجماعهم أميناً عاماً لغرفة التجارة العربية- الألمانية ،، عاد ( بدون زهور) إلي بلده الجريح، وكماقُلت في ردّك علي ( قباني) بأنه لن يَجِد ، ما ترك ، وإنه لاشك سوف يسلمونه( الزهايمر ) ،،فقد تأكد حدسك حتي خلتك شيخي( ود- حسونة )، فقد سُلم -سعادة السفير ل ( الزهايمر) ،،بعد أن وجّد أمدرمان قد عُدّل إسمها إلي ، ( شلعوها الاِنقاذ ) ،وفشلت كُل محاولات رواد( بدوك/ بيت المال ) في أن يخلقوا له بيئة حاضنه،،،، مثل التي تركها، ليعود ( شذي الزهر) وما عاد!!رَحِم اللهُ سعادة السفير عصام حسن الذي إنتقل ب( الزهايمر) في 2009، ،،في حين إن نجم ذلك الطرب الجميل صاحب( آسيا واِفريقيا) ،،،كان قد ترك( المراية) و( الجارة) و( الزينة) و( طائر ألهوي الذي هوي) ،،بعد أن ( ضَنّ ) عليه وطنه المسلوب ب ( الوعدِ ) الصادق !!مُرتحِلاً،، و ضارِباً خيامه في صقيع البراري، ومُقيماً في البلدِ الذي ( الهوي في حِماه مُضطهد ) ،،،رد الله غربة( كابلي ) ،،ونخشي عليه نبوءةِ ( ود -حِسونة) إن عادّ ( الحبيبُ المُنتظر ) ( بعد الغياب ) ،،،إن (السكسكة ) خشم بيوت، ففيها ألما( بيغلت )عليك، ولا كمان ،، (البوسيخ) إيديك ، ،،لكن فيها الذي يُصيبك بحالة من ال( depression ) عميقُ الجُرحِ، وهنا لن يفيدك البروزاكً ولا ال(Zoloft)، كدي بس أسمع،،( إشراقة كبك) ،،وهي تصدح،،( يا ابو عيون كهارب وين مني هارب) ،،،لتعيش لحظة، قمع المشاعر،، ووأد الطرب ،، أما إصطلاح( جلاكين) ، فرغم إني لم أجد له وبعد البحث المُصني،، معني يمُس الشرف، أو الأخلاق، أو الأمانة وجدّت أن ما أسخف منه هو الردُ عليه ،، أما في المكوجي والقميص( التشتشو) لاأقول غير ،، وإن تكُنَ تغلبُ الغلباءُ عُنصُرَها ،،،،،،،،،،،فأَنّ في الْخَمْرِ معَنّي ليسِ في العِنَبِ، ،الرحمة لموتانا ،،
12-06-2015, 02:30 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
لا حولا يا بلال ما تكون زعلت غايتو انا ما ندمان كان الجلاكين واؤكد لك انه ليس فيها ما يمس الشرف والأمانة ما ندمان لأنها اخرجت منك درر وكان بتجيب زيادة خليني اجيب كثافتك تاني علنا نتجمل منك بأحاديث كما عرفنا بها نفس عصام رحمه الله
12-06-2015, 04:10 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: نك تحفظ عن ظهر قلب مئات الأغنيات الخالدةالجميلة وترددها بينك وبينك كما ظللنا نفعل لأربعين عاما دون أن تسقطمن الذاكرة جملة موسيقية أو حرف من كلماتها ، في ذات الوقتأشك أنك تتذكر (أغنية) واحدة لبلو بلو وهذا لايعني أن أغنياتها- إن جاز التعبير - رديئة، لكنها لم تبق في الذاكرة لأن عناصرها ضعيفة للغاية مثلها مثل آلاف الأعمال المشابهة. الأغاني التي نستمعإليها بالأكتاف والأرجل كنا نطلق عليها أغاني الأندروس، فهي ينتهيمفعولها بانتهاء القفله، لكن الخوالد تبقى تطرق في دواخلك حتى البرزخ.
ياها دي محنتا وحتى لما يتشالق واحد يقول عايز يغنيها أنت بتكون خايف إنو يجلطها في أي لحظ أكتر من حرصك على سلامة أدائه وهو ما بيخذلك أصلو بخربا بخربا ياخ جميلة ومستحيلة وبتتعلم من الأيام وإني أعتذر ديل الواحد بكون شغال معاها إيقاع بالرئتين (بالشهيق والزفير) زمن
12-07-2015, 08:07 AM
بلال زكريا بلال زكريا
تاريخ التسجيل: 11-17-2015
مجموع المشاركات: 361
عزيزنا بلال..أخونا منتصر ، إن لم تكن قراءتي خاطئة ، شارك بذات الروح التي تبنيناهافأبناء اليوم يشيرون لآبائهم وعمومتهم وخؤولتهم ب (الجلاكين) باعتبارهم أكبرسنا غض النظر عن الفئة العمرية ( وفي اعتقادي يعنون من تخطى الأربعين) ولذاكان توظيفه (حميدا) للمصطلح بقراءته مع مستوى (تشتش قميصي علي) فهو ، في ظني،أيضا ساخط على تداول هذا المستوى من الكلام إعلاميا حتى على سبيل الدعاية لذا كان ردي عليه في ذات الطول الموجي .على أية حال ربما أكون مخطئا لكن إن كانت هناك محمدة للخلاف السطحي هذا فهو- كما قال منتصر - أنك أخرجت لنا دررا تندر هذه الأيام في حوش بكري، وشخصكمإضافة نوعية له.لك وللمنتصر كل الود والإحترام ولاشك أنكما تجاوزتما هذه الجزئية.
12-08-2015, 05:07 AM
بلال زكريا بلال زكريا
تاريخ التسجيل: 11-17-2015
مجموع المشاركات: 361
بلال تزورني مرة ما تخاف انا في ذمرة الجلاكين وان لم اكن في حذية مولانا مرتضى ليس من باب الحنين ولكن حتى القعدات كان لها أدبها وكان حتى للسفاهة وقارها كانت البارات والزقايق فاتحة ولم يكن المجتمع منحطا وكان لقاع المدينة ميثاق شرف وجاء العصبة أولي الفساد فاصبح الانحطاط هو الأعم وما عداه إستثناء من القاعدة فالمكوجي وكتمتو نفسو الهوا وينو وراجل المرة هي القاعدة واجترار الماضي الجميل هو غريب اليد واللسان فقيقم وحمادة بت وشعراء الأغنية بالقطعة هم اسياد الشي ذاتو
12-08-2015, 03:33 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: ويعيش سيف الدسوقي، والذي هجمونا بموته، وهو حيٌ يُرزق، أطال اللهُ عُمره،
نحن فى الأيام بقيناقصة ما بتعرف نهايةابتدت ريده ومحبهواصبحت فى ذاتها غايةكنت تمنحنى السعادةولى تتفجر عطاياولما أغرق فى دمـوعىتبكى من قلبك معـاياشكرا يا بلال أن جزعت للخبر القبيح بكل اللغات إبن حي العرب البار والموسيقار الملهم عبداللطيف خضر ( ود الحاوي) قال في تواضع الجميلين عندما سأله السر قدور عن سر جمال لحن أغنية (المصير) للشاهق إبراهيم عوض ما معناه :هناك قصائد بتجيك ملحنه براها، حروف ترقص جزلة ولاتحتاج لحنا ، كان يعني صديقه إبن الحي الضخم سيف الدين الدسوقي. سيف الذي يكفي أن يلقي قصيدته فتذوب طربا بأعلى مما لو صاحبت كلماته أرقى أوركسترا ، حقيقة ، لنا شعراء تستعير قلوبنا ألسنتهم فيقولون بالضبط ما يمور في أفئدتنا ونعجز في التعبير عنه.. يعرفون تماما حركات وسكنات ما يجري بين الضلوع ويرصدون النبض والوجيب.شعر سيف الدين الدسوقي يأخذك إلى دواخلك جوه الجوه، تستمع إلى كلمات صاغها قبل نصف قرن فتظن أنه كان يمتطي آلة الزمن ويخترق حُجُب الغيب فيصبح معه نوستراداموس مجرد تلميذ مستجد في قراءة الكرة الكريستالية:كنا للناس رمز طيبةوكنا عنوان للشبابوهسى تائهين لينا مدةنجرى من خلف السرابيا سارية الجبل،من منكم لم تبكه تلك الأغنية الأغنية، أغنية حملت كل القيم والمشاعر الحميمة علىما يبدو فيها من تناقض فاجع حين تجري المضاهاة بين الآمال والطموح والواقع الفادح المرارة..أغنية لصدقيتها لايمكن أن تستمع إليها إلا وأنت وحدك ،كنا فى ماضينا قوةقوة تتحدى الصعابنقطع الليل المخيمونمشى فى القفر اليبابسيف ، مافي حتى رساله واحده بيها نتصبر شويه؟لا أدري لم يركض الساقطون بخبر كاذب عنك يا نسيما عربد فينا فأصلح ما ضمر من رئاتنا ..ليتك تعلم أن مرض أمثالك والصمت حدث تضيق معه مساحات البلاد المتشظية أصلا ويتسع فتق خاطرناعلى أي رتق كانت توفره حروفك..يطول عمرك أيها الجميل ، وشكرا يا بلال .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد المرتضى حامد
ياسر السر
محمد البشرى الخضر
عمر نملة
بلال زكريا
MOHAMMED ELSHEIKH
ismeil abbas
محمد أبوالعزائم أبوالريش
طلحة عبدالله
وضاح عبدالرحمن جابر
حمد عبد الغفار عمر
يحي قباني
جلالدونا
الطيب شيقوق
عاطف عمر
نادر النور آدم
محمد مجيدو
ABUHUSSEIN
محمد حيدر المشرف
الصادق اسماعيل
علي دفع الله
Giwey
فيس بوك
تويتر
انستقرام
يوتيوب
بنتيريست