***** من الأرشيف *****

Quote: جننتوني والله بكري دا لو يديك راسو مايديك ايميل دا قافلها بي طبلة بعدين انت تلف وتدور عاوز العنوان السألتني منو لكن والله تذوق السم ودا ماتشوفوا قال بكاش قال انت قايل نحن في هداليا وهيا هناك تتضرع ساكت بعدين والله انا شايل النايحة ساكت كتار الكاتلين الجدادة وخامين بيضها سوما بكتلك كان وقفتي مع بكاش دا ماتصدقي اللعبة دي والله ايميلي فاضي برا الدعايات مافيهو شيء امبارح واحدة تتكلم معاي كويس مما جبنا سيرة العرس أها قالت لي عامل راسك الماكن دا العرس الجابو شنو نص الليل قلت ليها و مال العرس متين وقت الفطور ماكل الأعراس دي بالليل مما نجي نحن الحكاية تخرب قالت خامي البيض قالت

Quote: دعاها لجلسة استماع فى حديقة الصداقه ... اعتزرت بان لديهم ضيوف فى البيت اليوم ... افترقا بعد ان قضيا يوما جميلا .. وذهب للقاء اصدقاءه فى الحديقه ... لم يستطيع الجلوس بين الاصدقاء قرر التسكع على ضفاف النيل .... وهناك فى بنش بعيد .. ومكان شبه مظلم ... لمح اثنين يتعاطيا الحب ... وتركا لغة الحوار لشفتيهما اعجبه الموقف ... تخيل انه وهى يتعاطيان نفس الموقف وفى نفس اللحظه .. اغمض عينيه ... وسرح.....................0 بعد حين ايقظه من حلمه صوت ارتضام باب سيارة قريبه ... كانا هما نفس العاشقين قد قررا الرحيل ... على ضوء السياره الداخلى .. كانت الدهشة فى انتظاره .... والدنيا تتكوم على راسه .... لقد كانت هى ... وبنفس ثياب الجامعه التى فارقها عليها ... 0 اتبكم ... بكى ..... لايدرى كيف وصل الى البيت .... ولا متى وكيف نام فى الصباح قرر انها ماتت ... وعند ذهابه للجامعه ... قابلته مبتسمه وهى تغرقه بكلمات الشوق ... وتحكى كيف ان يوم امس كان متعبا ..وان الضيوف تاخروا كثيرا لديهم ... وكيف ارهقها غسيل العده ... 0 فى المساء ... كان يجالسها فى نفس البنش ... ونفس التوقيت .. وترك لشفتيه مهمة بث المراره بين شفتها ... وعند مرور اول سيارة اجره غادرا البنش .. ليقضيا الليل فى بيت صديقه ... فى الصباح .. لملمت ماتبقى منها .... وخرجت بعد ان وعدها بالزواج ديكو

Quote: غسلت كل الاوانى ..اغلقت ابواب المنزل فى عجالة ..وزعت الاغطية لاخوتها ..لم تكن تنظر امامها ..او تستمع الى احد ..كل همها ان تنهى واجباتها باسرع ما يمكن ..فلها موعد مع القمر ..وهى لا تخلف ميعادها ..اخيرا ..اطفات كل الانوار ..وجلست فى منتصف سريرها فى حوشهم الفسيح ..رفعت عينها الى السماء لتبدا الحديث ..اتسعت عيناها دهشة ورعبا ..لا قمر هناك ..بحثت وبحثت ..لم تجد سوى النجوم ..نادتها احداهن بان حديثنا نحن..تعلم ان النجمة لا تحل محل قمرها ..ولكن رغبة الحديث فيها تكاد تفجرها شظايا ..سالتها ..يا نجيمة هل ترين رسمه؟ ..جاوبتها مستهزئة..تساليننى رسمه وقد نزفت له روحك قلبا وقالبا .. ..اى ساذجة انت ..لا يا نجيمتى انا اراه واحفظ ملامحه كالنقش فى مخيلتى ..فهو لا يوصف ..اذا ..قولى لى ..هل تسمعين همسه ..اضطرب ضياؤها وهى تجلجل ضاحكة ..الرجال لا يعرفون الهمس يا عزيزتى فلا تحلمى ..عبست لها ..واستلقت على وسادتها مستجدية الاغفاء بحثا عن الحلم ...صادفت عينها الشمس وهى على حالها ..فقد جافاها الحلم والقمر فى غيابه

Quote: عشان ماتقولوا ابوحراز غشانا ترا المصيبة دي رغم جمالها بتعضي ودوها مرة مستوصف عند أهل العوض والجماعة كانوا منبهرين بالعلم والجمال المتقطر اصيلاً وذهباً اها بجوها بالصف واحد طراش 00 واحد وجع ضهر 00 واحد منزول واحد مرتو داقاهو وجسمو كلو مكعكع اها بتدي الواحد الدواء كان شراب او حبوب وبتوريهو طريقة الوصفة اها الراجل بجي تاني داخل وبسألها اها يادكتورة قلتي حبة بعد الفطور وحبة بعد الغداء وحبة بعد العشاء تقول ليهو ايوة زي ماقلت ليك يطلع ويجيها تاني اها يادكتورة كان مالقيت عشاء في البيت أبلع الحبة وللا أخليها لحد الصباح طبعاً الدكتورة بتضايق ومابتستحمل الأسئلة الكتيرة دي بتقوم تقول ليهو تعال قريب هنا اول مايجي بتديهو عضة في رقبتو وبتقول ليهو انا اديتك الحبوب عاوزني اجيب ليك العشاء برضو انشاء الله تاكل السم انقلع من قدامي أها شغالة تعتعض وتخربش بالطريقة دي أهل العوض العض كتر عليهم ومشوا اشتكوها لوزير الصحة قام الوزير ارسل مفتش عشان يتحرى في الموضوع المفتش جاء داخل عليها وعرفها بي نفسو وماقال ليها الجماعة اشتكوا من عضك الكتير لكن كان خايف زح كرسيهو بعيد منها اها جوك ناس الملاريا داخلين والفانسيدار والكلوركين ما يديك الدرب اها تدي الواحد الدواء بعد شوية يجيها راجع تاني اقول : يا الدكتورة : كان بلعت حبتين مع بعض بتجيني حاجة الدكتورة طولت بالها قدام المفتش وبدأت تقول ليهم 00 لالالا 00 زي ماقلت ليك حبة واحدة جاها واحد قال ليها : والله امس الناموس ماخلانا نمنا قالت ليهو : ممكن تجيب ليك ناموسية مشبعة وبتنوم انشاء الله دخل واحد تاني قال ليها : والله يادكتورة امس نسيت بلعت الحبة قبل الأكل 00 ابلع واحدة تاني بعد الأكل ؟؟ قالت ليهو خلاص 00 لكن افضل بعد الأكل اها المفتش تضايق شديد من اسئلة الجماعة وقام قال ليها يادكتورة هووووووووي عاوزة تعضي الناس ديل وللا اقوم اعضيهم ليك انا

Quote: طبعا اليومين دي الامتحانات قرررررربت وما تقولو الزول ده مالو أنا بقصد ناس >العربية< ·· جننونا بالعربية تقول كنا بنقراها على كيف كيف كيفنا، يعني قايلننا أدونا الاختبار وقريناهو في البيت يومين وبعداك دخلنا الامتحان وووووووووو وعشان نشاطر ناس >العربية< نقول ليهم: من طلب العلا نام الليالي وسحب البطانية وقال أنا مالي خذ الصفر ولا تبالي فإن الصفر من شيم الرجالي دخلت الامتحان من غير تحضير فوجدت السؤال الأول عسير والثاني لم أجد له تفسير والثالث كاد عقلي يطير فدعوت الله أن يقرب ورقة زميلي مني ويبعد عيون المراقبين عني اللهم عليك بدفتر الدرجات وحول الصفر إلى مئات اللهم عليك بالوكيل واجعل له خرطوما طويل اللهم عليك بالإخصائي الاجتماعي واجعله ممن تنهشه الحيات والأفاعي اللهم عليك بأستاذ الدين لأنه كبير المنافقين اللهم عليك بأستاذ اللغة العربية واجعله من عمال البلدية اللهم عليك بأستاذ التاريخ واحذفه بعيدا إلى المريخ اللهم عليك بأستاذ الجغرافيا لأنه من عصابة المافيا اللهم عليك بأستاذ الأحياء واجعله من عارضات الأزياء اللهم عليك بأستاذ الإنجليزي Beacouse he was crazy اللهم عليك بأستاذ العلوم واحبسه بين الفم والبلعوم اللهم اعط المدرس ضربة قوية والمدير سكته قلبية والمدرسه قنبلة ذرية والطلب عطلة صيفية اللهـــم هذا من باب الدعابة فلا نرجو منك الاستجابة ونسألك المغفرة رحمتك يأرحم الراحمين تحياتي حمـ العسل ـودي

Quote: واحد داير يدخل دار الرياضه امدرمان دخل الدايات لقى مكتوب التطعيم ضد الجدري قال الاتحاد ده كل يوم بيجيب فريق جديد ههههههههههه يكه زاتو اضحك تضحك لك الدنيا

Quote: يا اخوانا لا افهم هل اعضاء السجم المجروس السوداني هذا يحملون الهوية السودانية أم انهم منتدبي من قنوات ما وراء البحار وشعرهم اصفر وعيونهم خضراء ويتحدثون اللاوندي وبظهروا في تلفزيونا محض غلطة فضائية !!!! أم تراهم اتراك مخلطين بهنود واللا يعني هم ما كانوا قاصدين احنا نشوفهم ولا يتوقعون أننا قد تراهم يوماً حتى ولو حمى وهضربة تدعنا نتابع هذا التلفزيون السوداني المرض. أم ماذا ليفتيني احدكم بالله؟؟؟ ثم هل هموا يمثلون ثقافة وإعلام و (نبض) البلد أم انهم جايين كده سياحة فنية ؟؟؟؟ غريب هذا وكل السودان داخله وخارجه يرتدي ثياب الحداد حتى لو لمجرد احساس بوطنية وانتماء لا اكثر ولا اقل...وهو يواصل في اعراس شهدائه الذين هموا من قتلوهم عياناً بياناً لا خشا ولا حياء ولا حتى بعض احساس بانسانية بشرية عادية. ثم يأتونا بمذيعة كل مهمتها ابتسامة مصطنعة بلهاء لتقول اها احنا دايرين نسعلك الفرغة دي كونتوها كيف؟؟؟ انا قلت في البداية ربما الصدمة...إذ ربما من يدري...وربما عدم التجهيز لهذه الكارثة التي جاءت من السماء ولا ادنى توقع لها هو السبب في هذا الحس البارد.....إذا كان وزير التموين يوما ًصرح بأن رمضان الذي سبحان الله يجئ في السنة مرة قبله شعبان وبعده العيد... والسنة واحدة في السنة... قد فاجأه يوماً فلم يعمل حسابه في تغذية السوق يالتموين اللازم...يبقى تلفزيون الهنا ده ممكن يعمل حساب كارثة قومية...أو حتى يشارك هذا الشعب المسكين مصابه ولو ببعض حس...بعض بعض حس!!! اين التغطية الإعلامية وأين الحدث والسبب والتحقيقات و و و و و ...أين التصوير الحي ومشاركة المنكوبين أين يا جماعة ونحن نتخبط في تليفونات لكل البلد وكل البلد لا تستطيع أن تعطيك ولو لمحة مجرد لمحة عن ماهية الخسائر الحقيقية؟؟؟ عالم ايه دي؟؟؟ اي اعلام هذا الذي يمارسون!!!!! واللا يعني فالحين يعملوا لينا لقاءات مع (عبد الله بالخير) الذي اكاد اقسم أن ثلاثة ارباع البلد (وانا منهم) لا يعرفون ماذا يبيع أو من هو اساساً ثم يفتوا بأن (إمكانات التحقيقات الخارجية ضعيفة)؟؟؟ الله يرحم اعلام بلادي قبل موتاها إذا كان يمارس كنوع من الجلسات والقعدات الفنية.. وطبطبة تمسحية لاتجاهات قلما يقال عنها تدميرية... وأعان الله من يموت في بلادي فطيس فلا يجد سوى بعض (الفرغ) السمجة وعرس شهيد هو اساساً من قتل بلادي...

Quote: ول الكلام حليل ارض الجزاير والمراكب والطنابير التئن حليل ناس ليلي ساعة الليل يجن ياغاليه يا ثمره فؤادي الليلة ماعاد المراكب شرقن والقمري فوق نخيل الفريق فاقد الاهل يبكي ويجن وبي خجل بنسأل الزائر اهلنا حبائبنا .. راحوا من الحلة لا بتكاتبونا لا بيفدونا الحصل الغناء لحمد الريح __________ امدرمان الثورة الحارة 21 الاثنين .نصت نهار 2.8.1998 عزيزي ابو مصعب زهجني الحر والمويه القاطعه وزهجتني اكثر الكهرباء وهي تواصل دلالها وغيا بها لليوم الرابع على التوالي ..ولا اظنها تتمسك بنيتها في التخلي عن هذا الغنج والدلال ماعارفه ليه ما كتبت ليك باسم حبيبي او زوجي ؟ يمكن لاني نسيت انك زوجي ، كما نسيت انت انك ابو مصعب لذلك لم تكن نيتي الكتابة اليك مباشرة.. فجأة رفت عيني وتعشرقت وخطرت في بالي انت دونا عن العالمين .. وقلت في بالي يابشراي .. طراني ابو مصعب .. طراني المشي وماجاني تاني وكمالجنونه ضحكت وانا ادندن بهذه الاغنيه السخيفه .. اتؤمن زوجي بتوارد الخواطر ، ورفة العين ؟؟ اه نسيت انك قد نسيت ثقافتنا المحلية ، واستبدلتها بثقافتك الامريكانيه.. عندما وقف مصعب امامي وهو يناولني قمصيصك الكاروهات الذي استخدمته يوم عرس اختك الهام في ضرب بيتكم بالجير انت واولاد الجيران هم ايضا اظنهم نسوك من زمن اصبحوا يخشون على مشاعرنا من بعثرة اسئلة يعرفون سلفا اجاباتها .. كان ذلك قبل تسعة اشهر بالتمام والكمال من زواجنا .وكان ذلك عندما كنت حبيبي فاحتفظت به مثلما فعل يعقوب مع قميص ولده يوسف .. كنت اشم فيه رائحتك وامسح به على خاطري المنهوك ، اخوة يوسف القوا قميصه على وجه ابيهم فارتد بصيرا ، ومصعب القاه علي وجهي فرأيت انك لن تأتي .. وارتديت تعيســـه. قبل ان تاخذني الشكوي والحردنه بعيدا عنك .. اوصل اليك سؤال سألني اياه مصعب وهو يشاهد أليس في بلاد العجائب .. هو يا امي ابوي .. بعرف اليس؟لم ينتظر اجابتي كأنه خاف ان تخزله. . طيب ليه ما نسأل آليس عنه نقول ليهو تعال . بنفس تفاصيل احلام طفولته وامنياته لا زال مصعب يعتقد جازما ان اليس تشوفك يوميا لذلك ادمن عادة التبرك بطلتها.. الضبان ينوني ويطير هدوئي وافكاري . .وينسيني هل انا مازلت اعرفك او دعنا نقلب السؤال هل انت مازلت تذكرنا هل مازلت تذكر ان لك ولدا يسمي مصعب امك متفائلة حد التغني مع القمري كل صباح على عمود كهربتنا احمدو ربكم .ولدكم بيجي بكره متفائلة انه لابد ان تظهر او حتى تتصل لتقول ، خزلتني ظروفي او خانتني الحياة او مقدرتي على الصمود كعذر يغطي مساحة الاسيى والخيبه التي تسكن قلبها حتى الانسجة.. اكتب ولا اعرف هل ينصر الله هذه الرسالة وتصل اليك ومن ثم تقرأها لانني توصلت مؤخرا الى ان المشكلة ليست في بريدك الغير معروف وانما فيك انت .. انت الذي لا تقرأ لذلك جعلت امك ومصعب يدعوان الله ان يجعلك تقرأ رسائلنا تري هل مازلت تذاكرنا مثلما نفعل نحن مع كل حرف يتعلمه ولدك . هل فعلا مازلت تفعل ذلك حتى ولو من خلال البوم صور لا يخصنا؟؟ فجاة تذكرت حديثا كنا قد قلناه وانت تحلل شخصيتي قلت لي عيبك انك ان احسست بالظلم لا تعرفين عزيز ولا عدو ترفضينه جذريا لا تعرفين الحلول الوسطي . لذلك اخاف ان اخطأت يوما في حقك ستطلبين الطلاق اقول ذلك واكاد اوقن انك ستفعلين ذلك ولن ترجعي مهما تكاثر عليك الاجاويد .. خطر لي كل ذلك في لمحة كأنك مازلت معي .. كأنك قلته اللحظة وكأن المكان مازال محتفظا به في فضاءاته . سوف افاجئك ولن اطلب الطلاق لانني قررت ان اخيب ظنك وانتظرك وانتصر عليك حتى من خلال معارك نخوضها وهما على الورق مهما طال غيابك هناك مع اليس في بلاد العجائب

Quote: امدرمان الثوره ح 21 الاربعاء في امسية حضرت فيها الكهرباء خطأ ولم تغيب اكتوبر 1993 زوجي ابو مصعب نطقها اليوم مصعب فانفتحت كل صمامات قلبي على غفلة مني تضج بك وتطق السكلبة .. حاولت ان امسك علي فرحتي .. فلم افلح .. فلتت مني زغاريدي . .وخطفته من علي الارض اهرول به صوب ، حبوبته .. ياحاجة مصعب اتكلم الليلة . . مصعب قال بابا . ورفعته وانا ابرز وجهه المختبي في صدري ، ثم بوسته فنزلت عليه قبلاتي كالمطر على كل اجزاء وجهه ... لا اعرف لما كان فرحي بمجرد ان نطق بكنيتك واعترف بشرعيتك ابا له .. هل كان يعرف انك ابوه وانا اريه في صبحه ومساه صورتك على ظني ان لا تكبر ولا تجده امامك . قررت ان اكون انا ذاكرته .. دليله الى حبك .. كنت اراها امانه في عنقي مجرد ان يعرف كيف يختارك من بين مجموعة من الناس اصطفوا في صورة .. ان يخرج اصبعه ويؤشر على وجهك . هذا بابا بابا الذي لم يحضر عيد ميلادي الاول . بابا الذي لم يراني وانا اتاتي باولي خطواتي تجاه الحياه بابا الذي لم يراني اللحظة وانا انطق باسمه واؤشر اليه في صورة فوتوغرافيه . قد تكون انا نفسي اخطأت في شكلك . فلربما تغيرت وهذا اكيد يقولون ان الذين يقطعون البحر ويسافرون بعيد بعيدا . اول شيء يفعلونه انهم يزيدون وزنهم ، كانهم يفعلون ذلك عن قصد حتى يغيرون ذاكرة جسدهم ويتلفوا كل اثار احبابهم من عليها .. ورحت اخرجك من حضني واعرضه على حبوبتي وانا اكرر مثلما ببغاء . شوفي ياحاجة مصعب قال بابا ولم انتبه الى دموعه الغزيرة التي فاضت وروت قهوتها علي ناراه فاطفئت نارها الا حينما ارتفع نشيجها الى نواح ... بكت وبكت وبكيت . فشاركنا مصعب متضامنا معنا .. فكان عزاء لجدته انها احست به وعفت عنك وغفرت لك كل ذنوبك . مجرد ان بكى مصعب . . لان جزء منك تضامن معنا وبكاء لالالم كنت ومازلت السبب فيها ترى هل ستتصل لنسمع مصعب وهو يتلاهف ليسمع صوتك عبر اسلاك من محاسنها انها تستحضرك ولكنها لا تسمح لك بتناول كوب من الشاي معنا

Quote: اول الحكي حنيني ليك وليل الغربة اضناني وطيف ذكراك بدمع القلب بكاني اسماعيل حسن/الغناء لمحمد ميرغني اصل الحكي بري للمرة الاولي على صوت (نخنخة) عربيات النظافة دائما ما استيقظ لامارس هوياتي التي تشبهني ، وهي الفرجة من نافذة غرفتي على تلك السيارة وهي تمارس حرفتها بسلاسة وحرفنه وتدخل في كرشها الكبيرة كل تراب الشارع .. ابدا لا تتاخر عن موعد حضورها .دائما قبل صلاة الفجر وليس بعده.. يمشطون هذا الظلط على طوله يلحسون كل ترابه ويعدمونه التكتح ، ولم اعرف قيمة هذه التراب (التكتح) الا حينما شاهدت ومن نافذتي التي تطل على الشارع الموش رئيسي ، في ذات مشاهدة وانا امارس عادتي في تلقيط الشمارات مع انه وفي كل دول العالم يدفع الناس فلوس متلتلة لكي يسكنون في منزل تطل بلكوناته على شارع هادي الا هنا في الجزيرة العربية ، يخبرونك ان المنزل به بلكونتين ويطل على الشارع الجانبي وهذه هي الميزة الحلوة الا انه من الجرم العظيم ان تُضبط وانت تمارس الفرجة من خلال بلكونتك .. سواء ان كنت انثي او كنت ذكرا فهذا وحدة مدعاة لان يدلقون عليك حمم من غساق ونار السموم ويرمونك بكل خناث وهماز ولماز وياهاتك عورات الناس ويا متاوق من الشباك الله لا هداك ..وهكذا تكره البلكونه حتى الغسيل هو نفسه ولو خيروه لقال بعلو حسه شوفوا لي حبل تاني انشروني فيه .. البلكونة البجيب الكلام قفلها واستريح .. مع انك تقف على نافذتك انت ، وغرفتك انت ، وتنظر بعيونك انت الى الفراغ .. الى عربات تتدافع على الشارع .. الى عربات تنقل قاذوراتنا .. تلم اوساخنا اشتهي ان افعل هذه الفرجة من نافذتي . .. كأن تقف على شاطي البحر عند شروق الشمس والهواء يداعب وجهك ويطير (طرحتك) بدلا من شعرك مثلما فعلت (جوليا روبرتس ) في فيلم النوم مع العدو وموج البحر يضاحك ساقيها الناعمين ..ورمل الشاطي الفضي يحتار في مقاسها بتلبس 35 ولا 40 . ويواقع الهواء بترانيمه حبائل شعرها ، فيهبهبه طربا هنا وهناك .. اما انا وشعري فيحرم علينا مثل هذا الفعل .. ليس لانني أخبئه تحت الطرحة والخمار بل لان شعري من تلبيكه وتلابكه متحد ومتماسك.. مدعى هواء البحر وكاذب ان حرك سبيبه واحده أو زحزحها من مكانها ، مثل ليفة السلك ابدا ملتصقة بفروة راسي .. لن يجروء الهواء على فعل ذلك .. وتأب شعراتي ان يتفرقفن حتى وان جاءت ريح عاتيه ، فلتطيرني انا ، لكنها لن تفلح في هبهبته حتى ولو مسافة كدا .. كاذبون هؤلاء الشعراء .. يخبرونك في كل مناسبة ان الحبيبه من الرقة يسيل خدها وينجرح .. انا عن نفسي لم ارى امرأة (من نواحينا) جرح خدها النسيم ولا حتى شققه .. الا زيتا جونز ، وهي تقف في مواجهة البحر والنسيم يتلاعب بشعرها .. ساعتها قطعت الفلم دهشة وخلعة وانا اتقافز بسرعة صوب المرآة مثل التي اصابها مس من الجنون حتى اتمكن من رؤية الفرق بين شعري وشعرها .. نظرت الىّ وانا احتل المرآة مثل شيطان الكتشينه ، وانقسم شعري الى اربع فرق ، قبلي وبحري وقدام ووري وحنسته حتى تغلبت عليه وجمعته كله من وراء ظهري واحضرته امام عيني التي زادت زاوية (حوصانها) وانحرفت حتى تشتت بصرها وفشلت في تجميعه وبدل ما اعاين لشعري ثم الانحراف صوب (زيتا جونز) وخدها الناعم تشتت بصري وجلبت من ذاكرتها . كيف ؟؟ لست ادري .؟ استحضرت صورة نوال الزغبي ولصقتها على المرأة على انها صورتي أنا ..يا جمال الدنيا ساعتها في عيني الحوصاويتين ..وبالفعل رأيت شعرها شعري وخدودها هي خدودي .. ولاول مرة أكتشف أن (الحوص) حاجة حلوة وقلت في نفسي يااااه يا ليت خطيبي كان احوصا قبل ان تحرشه (امه) ويفكني عكس الهواء .. لحملت له معي صورة (حـلا شيحه) ووضعتها على مسافة منا ، لكانت عينه الحوصاء رأتني نجلاء فتحي .. وكنا ارتحنا من هذه النقه ..لقد كان (الاهبل) مفتونا بفتيات الاعلانات ، كل مارأي بنت حلوة ، نظر اليه محندقا ومقايظا : ياااه شوفي شوفي شوفي البنات الحلوات ولا بلاش نسكت احسن ..لمن جاب لي نفسيات ..البقاء للاصلح ، اهو راح وراحت ايامه ، والتفت بسرعة صوب الشاشة لاجدها ماشاء الله عليها.. هو نان جنس حلاة !!! صلاة النبي فوقها. ما نقوم نسحرها.. بالله تعالوا نسألكم انتو الخواجات ممكن العين تمشي فيهم .. طيب كثيرا ما كنت اسمع جدتي تقول : عين الفتاة فيها واطه .. وعين يا عنيه يا كافرة يا نصرانيه ... انظرو معي هداكم الله الى هذه (الدوشه) من يسحر من ؟؟ النصرانيه التي يكسر ضياؤها وحسنها القمر ..؟؟ ولا انا دي التي اشبه روحي ؟ غايتو في هذا الموضوع كذب المنجمون ولو صدقوا .. يعني انا ممكن اسحر زيتا جونز او حتى جوليا روبرتس مع انها موش على قدر كده (ارأيتم هذا الحقد المتأصل فيني) عادية جدا .. بس كل القصة انها جذابة جدا . يعني لو ما الجاذبية بتاعتها دي كانت شوية كده وتكون قريبة مني .. بس يبقى الفرق طفيفا ويسميه علماء الارض اختلاف خصوبة مثل الفرق بين طعم القرنفل في الدول الكاريبيه والجزيرة اسلانج ، لا شيء يذكر .. يعني العيون والشعر ..واللون شوية كده وكنت اكون على مسافة ليست بعيده منها يعني كأن تكون اسوداً ويصفونك ((والله فلان دا لونه اخضر فاتح )) صديقتي الفلسطينيه حينما وصفت لها سوداني يعمل حارسا في عمارتهم بانه اخضر موش اسود .. ضحكت وقالت ((الرجل الاخضر)) واحضرت لي كوب بلاستيكي اخضر . وسكتت ..

Quote: انتابتني الرهبة لأول مرة وأنا أقابل أصدقاء لم التق بهم الا عبر الأسلاك كنت أتوقع أن أحدهم سيكون فاتح خشمو زي البقرة وآخر سمين زي تجتوج وكان نفسي اشوف الزول الغير اسمو من رومانسي لأساسي دا وقرشو القرش حلقنا دا أها يازول وصلتهم ليك اول واحد قابلني أساسي قال رومانسي قال رومانسي بتاع شنو ياخي افتكرت ليك الولد وسيم ورومانسي لقيتو شاسي بتاع لوري عدييييييل كدا والكضوم منفخات تقول أكل ليهو لقيمات في الكرنتية وجاء لقينا الشرير وما معاهو أي برتكانة الزول الزول عداها لينا ضحك ساكت وكل مانقول ليهو العشاء وين يقول والله انا كلمت ليكم شيري شيري وقعت فينا جبنة وشاي والله الشاي الشربناهو في الإجتماع دا يبل ليهو حوض اسمنتي عديل والله واحد عندو لحية طويلة خلاص كان ما اتوضيت ماتقدر تسلم عليهو روبنسون جانا بي ريحتوووووو قال أوبن قال 00 كلما نقول ليهو العشاء وين يقول المزة بعد شوية ذا رين كنت متوقعوا زول جهامة كدا وغزير كالمطر لقيتو ليك تقول داقاهو مطرة بس شال ليك قهوة شيري ولما ليك فينا بالكباية الكبيرة بالله خلانا نشوف البحر طشاش طشاش قرجة جانا بي قرجتو لمست ليكم كتفو قلت يمكن الزول دا يكون شايل سكينو معاهو غايتو الجعلي ماشاء الله طاقاهو رشاقة انشاء الله تكون عند خطيبتي قال رشاقة قال سنجاوي قال لي عندي حبوبتي في ابوحراز عاوز أسألك منها قلت ليهو انا ناقص العندي ديل اوديهن وين قرشو دا لمن تدخل عليهو في البورد تقول الزول دا يديك لكمة هسع لكن وجدناه يحمل كل الظرافة قعدت ليكم جمبو عديل كدا 00 كان لابس نظارات بعدين قال المرة الجاية بشتري خروف لي ناس البورد صلاح درار تشوف الصورة حقتو تقول الزول دا اول مايلاقيك يرتب فيك لكنه انسان مرح ومضحك 00 وكل الزملاء ببورد جدة وجدتهم غاية في اللطف أها الزول الزول طاقاهو جنس شفقة قال لازم ياجماعة تتعشوا أها فتحنا خشمنا للمرارة والشية مما شفت ليكم كويرات البلاستيك بدن يطاقشن بطني قعدت تكورك زيتون هبطرش 00 معاهو مخلل 00 وجبنة وحلاوة طحنية اها روبنسون كان رئيس اللمة دي اتفضلوا ياجماعة والله لحسنا الجبنة وقرشنا الزيتون 00 الرغيف الرخيص ماجابوه لينا لكن شربنا بارد عشان نهضم بيهو الأكل دا ومشينا البيت برضو مالقينا عشاء غايتو الإجتماع الجايي لازم نتفق من بدري الشغلانية فيها أم فتفت بنجيكم وكان مافيها بنشتت ساكت

Quote: الأخ ديك الجن نسيت أقول ليك الجماعة جابو لينا برضو بيض في العشاء كنت متوقع تكون انت جبت البيض دا معاك وللا انت زول جداد ساااااااكت طبعاً توصيات الإجتماع عند الإخوان المسئولين ونحن ناس بنشاتر ساكت وسوف يغمركم يازول يازول وذا رين وقرشو بما تم لكن أهم شيء في الإجتماع هو الحضور المتألق لجميع الأعضاء

Quote: الجعلي قال اتخنق من اللحمة قال بعدين صورتي الموجودة في البورد دي والله عملتها قبل 3 شهور ماتشوف الواحد منفوخ كدة زي كفر التراكتر تقول اني الصورة دي أخدتها من زمان ياخوي دي جديدة ولو عاوز واحدة بالمقاس الحالي ماعندي مانع لكن بيني وبينك فكرت شوية وقلت حقو الواحد ينزل صورة خطيبتو عشان النقة الكتيرة دي تقيف بعدين شايفك بتحمر فيني ساكت يوم الإجتماع عملت ليك شنو قال خنقتو لحمة قال

Quote: الأخ الثوري دقنة والله لو جيتونا هنا في الطائف كان ضبحنا ليكم جمل زي حقك الراكب فيهو دا لكن هنا الجماعة كان الطبق الرئيسي عندهم زيتون وبعد دا كلو قالوا ابوحراز خنقتو اللحمة ياخي والله ولا عضة واحدة ماشفناها في جدة والمشكة الناس الكنت قاعد معاهم جيت لقيت ليك ست البيت مولعة عيون الغاز كلهن عشان تعمل لينا العشاء قلنا يازولة هوي عشاء شنو الدايرة تسوي يللا اطفي نيرانك ديل نحن متعشيين في سودانييز أونلاين قال سودانيز أونلاين قال

الزول ابو جضوم دا ما نصيح ..

Quote: بسم الله الرحمن الرحيم زمان كان في واحد عريبي لا قوهو ليك جماعة كسروهو كسر نضيف وفاتوا أها بعد داك هو مشى إشتكاهم للمحكمة . قام القاضي سأله (الجماعة الكسروك ديل كم نفر؟) فرد عليه العريبي يا حضرة القاضي أنا أجر ليك ولا أحسب ليك . طبعاً في السودان ما كان عندنا أي مشكلة ننطق حرف ال(ق) (غ) وال (ث) (س) وال(ذ) (ز) أها الحالة جبرت ومرقنا بره عشان نشتغل في الخليج وبدأت المشكلة يعني أنا معاي في الشغل أربعة خليجين طالع نازل معاهم واقفين لي في حلقي .. بس ما أغلط إلاّ يقولوا لي إيش إيش إيش ؟ يعني بقيت لمن تلاقيني كلمة فيها واحد من الحروف دي وخاصة الثاء والذال يقوم لساني يطلع قبل مواعيدو تلقاهو مرة يطلع في حرف ال(ر) ومرة في حرف ال(خ) ومرات أعضيهو يعني عشان أنطق ال(ذ) في كلمة تلاميذ مثلاً تلقى لساني يرازي من حرف ال(ت) وبعض الأحيان ألقاهو ليك يتحاوم بي برة زي لسان الكوبرا في النهاية قررت أمرق ليهو عنقريب برة في الضل إلأ تجي مطرة . أها الحل شنو يا جماعة نحن نشتغل ليكم ولا ننطق ليكم ؟. عاطر التحايا بدرالدين شنا

Quote: كديس الحلة يمنعني من النوم يبدأ دوامه المسائي بعد التأكد بان عيني غفيت...فيبدأ عويله الغريب... غريب كديس البلد دي..اول مرة اسمع صوت كديس اشبه بصوت الكمان العطلان...ولو اني عمري ما سمعت صوت الكمان العطلان...لكنه هكذا اتاني في بداية الحلم الذي شوشني فيه هذا الكديس الثقيل للمرة الثانية على التوالي اليومين الفاتو لا ادري اي فار حذف به على نواحينا...واي خوف يصيبني من عيني قط فامتنع أن اذهب لمكان ارتداد الصوت وابدا اعزف له سيمفونية كلبية تطيره من الحلة دي فيردد تائباً...ناس الحلة ديل انا تاني ما بجيهم...نبيحهم كتير انا تاني ما بجيهم تجزم (حبوبة) أن كثير من الكدايس شيطان رجيم بسم الله الرحمن الرحيم فلا يجب أن نزعلها لئلا تخرج ارواحها الشريرة من جسد كديس لراس زول...ولو انه علم المنطق يتساءل...ليه يعني يسكن شيطان في حتة ضيقة ذي دي مع انه يقدر يسكن في فيلا مثلاً؟؟؟ ثم ماذا يستفيد من عواءه الكثير ده وصحيي من النوم الهو زاتو نمته بالعافية ؟؟؟؟ والله حبوبة دي زاتها غريبة وقبل والله يا جماعة انا محبطة...واشعر بحزن لن ادعي انه نبيل...في حياتي لم اشعر بهذا النوع من الاحزان النبيلة....فاحزاني ليست من النوع الرقيق الجميل بتاع المسلسلات ده...انه من النوع المتعب...كله دموع واشياء لا داعي مع قصة الكديس البايخة التي حكيت أن اقرفكم بها يقولون ان الحزن قد يغور بوجود السامر أو المشارك...وكل احزاني لا يشاركني فيها إلا علبة الكلينكس وكم القميص الذي ارتدي الشكوى عندي نوع من الدلع...لا احب ان اقرف بحزني احد سواي...لا احب ازية الناس...فكل الناس تورم عيونها وانا يورم شعري لا ادري ما سر نكشة الشعر بورم العيون بالحزن الذي مع مناديل الكلينكس وكم القميص ونواح الكديسة ونكشة الشعر من المستحيل أن يكون نبيلاً كما تفعل ابطال السينمات فتسكب نواحاً يحيل صاج حبوبتي زاتو للبحر الأسود ومع ذلك لا يحرك ساكناً في كحلهن الممدود لطرف من العين اليمين للأذن الشمال وبالعكس ...كانه دوار يوتيرن هنا لا احد يعرفني...من دواعي شكركم لله...ونعم تبدون نضاف لدرجة العقدة منكم...ناس مشهورة ومهمة...كلامكم موزون مموسق...مع ذلك لا اجد افضل من الكواريك هنا...اني حزينة محبطة واود ان اشارك احد معي هذا الحزن اللانبيل انا بت قضيم لست كاتبة عظيمة ولا انا بشاعرة لاستطيع التعبير عن احباطاتي بكلمات مضيئة احملها شتم الكديس...والحلة الاحنا فيها...وطبيخي الكثير...وغربتي الذاتية...ومديري... والحب المستحيل...واحلامي المتسربة كسراب وهمي...وجارتي الغياظة...والناس السيئة...يا ساااااتر...لماذا الناس آذياية للدرجة دي؟؟؟؟ ... اعاني من ضعف انساني في ان اعبر عني امام العالم...انتوا عالم نعم لكنه عالم سايبري...البكاء معاكم ليس لديه اي جوانب سلبية اكلينكية...على الأقل لن تروا ماذا سيحدث لكم القميص بعد قليل من الجعير لماذا اذن احاول الظهور بكامل الملابس الرسمية؟؟؟ معليش...سأقول اي كلام اكسر به روتين الصالون الأنيق هذا الذي تجلسون فيه...ياخي بالجد تعقدوا...ولو حب احد أن يدخل ليفش خلقه من إحباطه...فلا بأس...لكن بصراحة يعني...فاقد الشئ لا يعطيه...فاعذروني إن لم ارد...يعني هو كان قانون دولي ان يكتب واحد يرد عليه التاني؟؟؟ انا ناقصة احباط ؟؟؟؟؟

Quote: اول الحكي عشان بريدو اديتو وردة بيضا أداني وردة زادت علي الريده لمحبة قلوبنا ما بنختلف والله يأزي الازانا وييين والبلال مالو جانا واحدة بتغني _____ نشرت هذه الاحباطات هناك عندي ، لكني رأيت ان مشاركتم لي هذا الاحباط والنقة وتحمير عينكم لهذا الحزن الاشتر الذي يعتقل عيني اليسرى ، ربما يقطع ريحتو ويريحني منه او يعود كديس صديقتي بت قضيم ، للعواء امام عني وحزنها العجيب فيسلم لي بقية نظري وبصري سلمتم كلكم ولي عودة ______ أصل الحكي من يدوزن فيني انفراط الحزن الذي انداح يشدد على عصب العين ، مع انها ليست ناقصة (حوصان)، لكن ماذا تقولون لهذا الحزن الغتيت ، ترك الدنيا وعلى رحابتها وسكن عيني ، من منكم شعر يوما ان عينه حزينه ، وان لا علاقة لحزني الساعة بالقلب ؟؟ استيقظت وبي نفس الاحساس المحبط الذي حكيت لكم قبل يومين عنه ، لكن درجات هذا الاحباط لشيء ما لا اكاد أن اتبين كنهه ، احسست انني لست كذلك ، في السابق تعودت ان احس من احباطاتي انها تتواجد اينما تواجد فيني عضو ، لكن هذا اليوم الغريب الملامح ، احسني حزينه ، لكنه حزن اشتر ، حزن احوص ، اذ ظل يترائ لي امام عيني ، مع انني في (اخر احباطاتي) التي كانت قبل يومين كنت اتوقع ان اموت قبل شراب شاي الصباح ، وعندما جلست لتناول العشاء في ذلك اليوم ، كنت احمد الله كثيرا الذي بلغني هذا الوقت ، ولكن بعض ان رأيت (صحن) الفول وا لبيض ، تتراص امامي ، شيء جلعني اقول ليتها كانت القاضية ، ورجعت وقلت في نفسي استغفري الله ايتها الجاحدة ، واستفغرت الله على سلامة النفس ، مع انني كنت جوعاااانه (مره) لانني لم اتناول شيئا ، مالها اللغة العربية اليوم تتمسك بحروفي ، بسم الله هسع في شنو ، تقوم اللغة العربية وبهذا الاندياح تنتفح فيني ، الم اقل لكم ان عيني اليسري فقط هي الاكثر حزنا من يمناي ، اضع يدي عليها وواتبسمل واتحوقل ، واتعوذ من الشيطان ، واتذكر كلام حبوبتي انه ربما رأيت شيطان بعيني اليسري دون ان انتبه ، يا لهذه الحبوبة التي تحيل كل شيء يغلبها تفسيره الى (عالم الشواطين ) بسم الله الرحمن الرحمن ، يقوم يضربني الشيطان في عيني اليمين ويزيدني حزنا وحواصة ، في غني عنها انا اللحظة .. كنت سوف احدثكم عن مشروعي القومي لرعاية الناس المحزونين والناس المدبرسين ، لكني اصبت بحالة منه جعلتني اتنحي واقعد في كرسي تاني غير هذا المقعد الكريه .. ماذا رأيت ؟؟ ماذا رأيت ؟ يا ربي انا شفت شارون في نشرة الاخبار ؟؟ ولا جورج بوش ؟؟ ما اعتقد ذلك !! اذا مر اسبوعان على مقاطعتي لكل نشرات الاخبار وعالم الرجل السياسي منذ ان توقفت عن ممارسة النظريات الاعلاميه الحديثة .. حتى الكورة لم يستطيع اخوتي ان يجروني الى شاشتها بكثرة طلباتهم بعمل الشاي (وترامس شايهم) وصياحهم وهرجهم ومرجهم بعد كل صافرة يصفرها الحكم .. ارأيتم احداً ، مصاب بالحزن لكن عينه هي التي تتأثر بالحزن .. ماذا شاهدت ؟؟ ماذا شاهدت ؟؟ حتى تصاب عيني بحزنها الذي يخرم ننو عيني ، ويقلق منامها ؟؟ حتى (النصف) شغالتنا ، لم تضحك معي ولم تعلق كعادتها وهي تغادرنا الى (نصف) عملها الاخر عند جيراننا ،على شعري ولا علي منظري وانا اتحصن بكومبيوتري مثل قرد اعمش ، حدثتها مطولا مرة عن فكرتي العظيمة في الاستفادة من الفاقد الحزني عند انسان العالم الثالث الذي يعرف بعملية الاستنطاق العاطفي ومقاربة بيئتي التكافل الانسيابي والانشراري في عملية بناء الفرد ، وحركت رأسها في تواتر باد عند كل الاتجاهات يمين يسير فوق تحت ثم ابتلعت ريقها في اندهاشه فائقه ، و(بلعان الريق) هذا وحده هو الذي اقنعني انها قد فهمت بل اثناء واتفاق مطلق على صحة افتراضاتي ودراساتي وبحوثي العلمية التي حتما سوف تعود بالنفع والخير لسكان القمر ، لاني اشك في صلاحها _ حتى ولو عينه واحدة _ عند تجربتها في سكان الارض .. ومع ذلك اصررت عليها ان تملاء الاستبيان وبلغتها الخاصة ثم جعلتها تبصم بالعشرة ، لا نها لا تعرف القراءة ولا الكتابة (اذ انها اميه – طيب ما انا برضو ما بعرف لغتها ولا اكتبها ، ايضا انا جاهلة واميه بس بالسيرلانكي ) ، علي اعتبار انها سترافقني الى القمر في رحلتي الميمونة، وبما انها (ستبتلي بي) فان حالها سوف يصبح من حال سكان المريخ ، هو انا عايزه اجرب البحث في سكان المريخ ولا القمر ؟؟ ما علينا ، اهي كلها كواكب سيارة .. والمهم ان الشغالة السيرلانكيه ، لم تنظر الى عيني مباشرة ، ولم تضحك البته كما انها لم تجلس لتقاسمني بسكوت الشاي ولم تقف كعادتها خلفي تمشط لي شعري ، وهرعت من امامي كان مس اصابها ، لذلك ااشعر ان الحزن الذي يتطاير من عيني هو الذي سوف يشقيني لايام قادمات ، الله يكون في عوني وعونكم .. لانكم انتم من يكتوي بنيران هذا الحزن. لكني متقائلة انه سوف يطير الاكتئاب في العالم ، لانه طير شغالتنا من امامي بسرعة الصاروخ هل للحزن علاقة بطبيعة الانسان ، مثلا هل يختلف حزني انا عن اخي الصغير ؟؟ مثلا عندما تكون عيوني حزينه لا اشعر ان هنالك احباط او حزن في بقية اعضائي ، وعندما يصاب اخي بصداع يقول ان هنالك الم متمسك في رأسه ، لكن انا اشعر ان الصداع يهدم تجاويف عيوني ، وعندما يهدأ يتجه الى اذني ، وعندما يهدأ ، يصيب معدتي ، ثم يتوقف عمل معاول الهدم في شرايين راسي ، وتبدأ الوساس مخبرتني انني ائلة للرحيل قبل (وجبة طعام) ايهما اقرب ، لا ادري لماذا دائما ما اجد ان يام عمري مقسمة الى ثلاث وجبات ، ؟؟ مثلا زمان كنت مجرد ان تنتهي حلقة مسلسل اقول وانا ملتاعة وبي شوق لمعرفة حلقات الغد ، هسع لو مت ، كيف اعرف نهاية المسلسل ؟؟ هل للحزن علاقة بالهترشه ، عندما اشعر انني محبطة او حزينه في جزء من اعضائي ، مثلا يداي ، قلبي ، رئتي ، ينعكس سلبا على طريقة تصرفاتي ، فاكون (لجوج) اي كثيرة الحركة ، وتتاذي (عدة)ماما ومطبخها أيما اذى ، وتصيبني دعوات امي الماحقات الساحقات لتصرفاتي ، فانغلق في دائرة لا توصل التيار الى قلبي ، فيصبح قلبي ميتا ,واظل اضحك طوال اليوم .من قلة بختي .. ماله البخت وجني الذي يزهج (امي) . ويكسر عدتها وينكش في مطبخها .. ويعيدني الى طاولتي انقب بحوثي . هل تتوقف هترشتي عند هذا الحد ؟؟ اتفحص البورد ومناقرات (اساسي) و(ود عزه) ومشاكساتهما ، فاراه يتغطي بثوب برتقالي ، وخطوط برتقاليه . فاحزن لحزن البورد البرتقالي ، فكل مواضيعه اراها حزينه .. الغريبة ان لون الحزن في عيني برتقاليا !! .. هل للحزن لون محدد ؟ اشمعنا حزن الفراق عند بعضهم اسوداً .. وانا حزني لونه برتقالي ؟ الهذا الحد انا اتشائم من اللون البرتقالي ؟؟ .. اه يا عيني التي ترمش بحكايات غريبة ، ومشاهد متسارعة ، كانما استلفتها من ازمان اخرى .. هل يعيش الانسان ازمان لم يسبق له أن سمع عنها شيئا ؟؟ كأن تأكل (اكلة) ، فسيخ او قراصة وتحس ان لهذه الاكلة (المظبطة) علاقة بحيوانات من عوالم اخرى ، كانت تأكل على نفس الطبق ، بسم الله الرحن الرحيم .. او انك (عفصت) طرحة امرأة ، كانت تعيش في العصر العباسي ، فدفرتك من كتفك فتعلق عطرها بك ومازال يحتل نخاشيمك ؟؟ او انك تسمع الخليفة المأمون بصوته ذاتو (المايغباك) يكورك ليك باسمك ، ثم يعلن في مجلسه ، اذهبي يا امرأة وعين الله وعيينا ترعاك .. اعطوها مائة الف وخمسيمائة مليون دولار امريكي .لاني رفضت ان اتزوج الخليفة المأمون !! اتخيلوا انا ارفض الخليفة المامون !! بعيوني الحوص ، وشلختي التي ترقد في اكتئاب على خدي الايسر. بسم الله الرحمن الرحيم . دا شنو ؟ دا .؟؟ اظني مانصيحة عايزة اجن ؟ امرق مني ياجني الملازمني .. سوف اتصل بصويحبات (ماما) وادعوهن لتناول القهوة معنا .. وعندما يتجمعن اكيد انني سوف اراهن بعيني الحزينه التي تحيلهن واثوابهن الى الوان برتقاليه ، وارتاح أنا نفسيا من الالوان المخستكة التي يرتدينها في الغالب ، وسوف اعتقل اذانهن وأنا احدثهن عن مشروعي القومي القادم .. كيف تجعل نفسك سعيدا مع الاخرين ؟؟ سوف يندهشن ، لاني الوحيدة التي تعرف مفاتيح (اغلاق ) ابوازهن وتعرف تماما كيف تشده اسماعهن وتخيط (افواههن) وتمنعهن من الكلام في ان واحد على غير عادة النسوان ، ولن تفتح الواحدة منهن (فمها ) وتقول (بغن) وعندها يمكنني ان اصل الى النتيجة الطبيعية ان أصل الانسان ، راديو ، ومكرفون .. دعوني اتفرغ لهن . ابقوا معنا , ولا تغيروا المحطة

Quote: في فترات الديمقراطية وعندما تبدأ عملية الإعداد للانتخابات للبرلمان في الخرطوم ، تهتم الأحزاب بالريف وتقوم بتسيير الحملات الانتخابية ويبدأ الصراع بين الأحزاب حيث ينغمس أهل الريف في صراع لا ناقة لهم فيه ولا جمل، و ينتهي الأمر بفوز أحد المرشحين ويختفي لمدة 4 أو 5 سنوات حتى ينساه الناس تماما. ويلجأ المرشحون للاستعانة بالشعراء لدعم حملاتهم الانتخابية. ويمكن لبيت شعر واحد أن يعادل في أهميته عددا من الليالي السياسية، ويرجح كفة مرشح على الآخر ويخرج مرشحا من اللعبة السياسية تماما. ومن الشاعرات اللائي كان لهن باع طويل في هذا المجال عائشة بت إدريس من بلدة الرويس تنقاسي بمركز مروي. وهي شاعرة قديرة وسليلة بيت زعامة من بيوت الشايقية فهي شقيقة المرحوم عبد الله إدريس ناظر عموم الشايقية. وتقول الشاعرة في قصيدة مدحت فيها شقيقها عبد الله إدريس: يا ناس البلد العز قلانا الولد حكم البلد حدو الرطانة لا اليزيد ينقص يوديهو الزنزانة وللدكتور محمد أحمد سليمان إدريس (ابن شقيها) تعليق ظريف على الأبيات حيث يقول: شوف الناس يقليهم الجوع وأنا عمتي يقليها العز!!.. والغريب أن الشاعرة قادت حملة ضد شقيقها أحمد إدريس ونجحت في اسقاطه في الانتخابات. فقد كانت هي ختمية تؤيد حزب الشعب الديمقراطي بينما كان شقيقها أحمد مرشح الحزب الاتحادي عن دائرة مروي. وكان بيت شعر واحد قالته في قصيدة كافيا بإخراجه من اللعبة السياسية، والبيت هو : أحمد إش تبعو بلا الرخم والرخمة طائر من فصيلة الصقور التي لا تصطاد فرائسها بل تعيش على أكل الجيف والحيوانات الميتة، ويضرب بها المثل في الخنوع والذلة. وتقصد الشاعرة أن أنصارأحمد ومؤيديه هم من الذين لا قيمة لهم، وبالطبع فإن كل إنسان يحرص أن يكون بعيدا عن مجموعة الرخم. واليك صديقي أبيات من قصيدتها وهي غير كاملة : مكرفونكم دقس السلم مالو لا اتكلم ولا نضم أصلو يحي الفضلي اتبكم وأحمد إش تبعو بلا الرخم أصلي في زول ماني فاضي وتاني في زول ماني فاضي لا في مامور لا في قاضي روح آب كرفتة غادي ترا الحمار فيهو القلادي ولم تتوقف الشاعرة عند هجاء المرحوم يحي الفضلي أحد قادة الحزب الاتحادي وكذلك شقيقها أحمد إدريس، بل لم تنس حتى الزعيم اسماعيل الأزهري الذي حضر في زيارة لمنطقة مروي مستخدما قطار كريمة، وكانت الشاعرة ترى أن الزعيم الحق يستخدم الطائرة وليس القطار، فقالت الشاعرة في ذلك: وينو كركولو الفي المطار ووينا طيارتو مع الرجال وكركولو طبعا تعني بها قراقول الشرف الذي يستقبل به الزعماء. مع التحية لكم عبد الرحمن مامان

Quote: لم يندهش جيراني عندما أخبرتهم أن كم أنا مشتاقة (لغنمايتهم) شوقا لا تحده بحور إذ أظنهم كانوا يعتقدون أنه من المفروض أن لا نشتاق لهذا الكائن الذي وجوده الدائم في الشارع السوداني،، لم يعطنا الفرصة للتفكير فيه ككائن متفرد،، نشتاق له ونخاف من تأثيراته القوية على شجيراتنا الشوارعية ودي ما سبة بالطبع،، حيث لا اظن أن الشارع (سبة) فقد قال الشاعر ( من ما قمنا وشفنا الشارع شفنا الشارع هو البعلم) يعني (تربية شوارع) ليست لفظة بهذا القدر من السوء لذا ،، وأنا في السودان،، وعدت نفسي بأن اظل اتحدث عن الغنم فترة لا بأس بها،، الغنم وام رقيقة، العلاقة شنو؟؟؟!!! آآبعرفوا وحاتحدث وين قايلين يعني؟؟؟ ياهو حوش بكري ده وطبعا سأتهم بالإنصرافية وهدر الباندوث !!!حسنا حسنا انا من الآن اعترف،، انا انصرافية،، وهدااارة جنس هدارة وربما يسبني احدهم فيقول (امشي يا غنماية يا عنبلوق) وسلن اشتغل به الشغلة،، فانا احمل كما من الهم والبرطمة لا مجال لأن افشه إلا هنا،، خصوصا ان مدير السجم فرض عليا اليومين الأواخر شعار،، دعونا نعمل في صمت وللآن لا اعلم لماذا ضميري القلقان ده ما اتكوم شوية شان اكتب مدير السجم ده في الفكي يكتب ذنبو ان شاء الله والذي يرغب في النقنقة الفاضية فأهلا به،، واني ادعو حملة مشاعل الفكر النضيف المستحمي ناس الكلام الكباااااااار داك،، أن لا يستاءوا من الكلام الفارغ الذي سأكبه هنا كبا دون تفكير،، وليعتبروه شئ مشتت هنا وهناك كأغنامنا الكثيرة،، نطالعها كثيرا ولا نفكر البتة لماذا هي تشاركنا حيواتنا بهذه القوة الجبارة دقيقة بس

Quote: يا جايه من عمق الألق مرسومه بى لون الصفا ومسقيه من روح العبق جايه وحِداك الأغنيات شايله فى إيد الخريف وفى إيدك التانية الوفا كل الدروب مرقت تبارك طلتك تتمعنك مندهشه كيف إنه الفراش إنضم ليك سمّاك حديقه وفيك سرح كيف الكلام حاضن حروفه ومشتهيك سواك حقيقه عشان يحاول يكتبك عنوان فرح وكيف الشمس نست الغروب لبست ألق جيتك طِرح بدل الشفق يا جايه من عمق الألق جايه ومعاك الأمسيات نديانه بى معنى الحضور نتقاسم الأيام هدايا شويه ريد وشويه عيد شويه زهرات للفريق وشويه غنوات للصبايا وكل ألوان البريق تشعل تفاصيل الحكايه تعلن صباحك ونشوة الريد الدفق يا جايه من عمق الألق يا جايه زى لحنا رزين من جوه من بوح الوتر موسق خطاويك بالحنين يا طلتك ضحكة نجيمة بعيدة عاشقه وغمزه فى وجنة قمر يا طلتك إشراقة فى الزمن الضنين شبّال مزخرف بالنجوم موسم سنا وإيقاع مدوزن فى نسق يا جايه من عمق الألق يا مارقه من ضوء القصيده وطالعه من زهو النشيد نشوان مقام الريده فى زحمة غناى طربان مبلل بى شذاكِ ودمعة الفرح العنيد روّضتى حزن الليل معاى جيتك وطن خليت أساى ومعاكى خلانى الشجن جيتك وطن فتّ المواجع والرهق يا جايه من عمق الألق