آخر لحم في السودان اكلتو كان في سماية النِعيّر جنا بلول، الوآطة كانت نُصّت نِهار والشمش اكان كشحلك فيها حبات بُن يتقلن، اها اليوم دآك فوسبنا جِنِس فوسيب ! انا لآمن سويت لي تُرعة عرق جنب القدح، وكان اصلو للعوض ود الحسن عِدم النفس وإتمدد تحِت الحرازة زي اللصلة البالعة العتود .
10-17-2015, 10:38 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أها، وطيت كُراعي في مطار JFK ختيت الخمسة فوق اللتنين ؤُ بقيت اللحمة دي كان جداد كان غيرو إتمطق فيها ساكت واقول، هلآ، هلآ يا ود المدير امآنة ما اتهملت حد الهملة .
كدي بجيكم صاد ...
10-17-2015, 11:46 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
كنا اولآد عطبرة كلنا نسكن في شقة في منهاتن في قلب التفاحة الكبيرة شقتنا دي لآمن تجي داخل فيها لآمن تشم ريحة الفلنكة . من ضمن تجوالنا في الأيام الأولى مشينا زرنا التِويمات، اليوم داك انا شحدت رب العباد ينزلنا من الطوطاحة بين السما واللرض، ؤُ ليوم الليلة وكت إتذكر دخلة الطيارات فيهن شعرت جلدي تكلّب . بي فليل كنا نمشي الـ42 نجيب الأرقام المسروقة عشان نضرب السودان ؤُ وِكت نجيب سيرة اتبرا انا الدنيا دي تمسخ علي . كنت كلما اجد سانحة بمشي اصلي في (فلتون) مع شيخ سراج وهاج، وهذا الرجل احبه جداً فهو جاد في تدينه ولطيف جداً يجبرك علي ان تحترمه، بس الحاجة الوحيدة الكانت ما وآقعة لي حكاية اللحم دي !، يعني حتي اللحم البيقولوا عليهو حلآل دا كنت بشوفو ما ياهو .
احمد اكان عندو شريط محمد كرم الله بيدورو بي في الليل فيهو جواب بت ود خير، اها ساعت ود كرم الله يجي في الحتة البتقول فيها، (انا طلبتك بالله ترسل لي جنيهين) يتحسّر احمد ؤُ يقول، والله المرا دي كان أعرف محلها ارسلها 200$، اما انا الشريط كان بيدبرس بي ؤُ يحميني النوم خاسةً فيهو غنوة طعم الدروس ؤُ وكت الليل يفلل . كنا مساهرين في هارلم، وانا حلفت الجداد في سني ما اختو . قالوا لي نجيب لك شريم . قتلهم، دا شنو كمان ؟. قالوا لي، شِيّت بحر . قتلهم، شِيّت البحر حلآل جيبوهو، عِلآ نحن بحرنا بنعرف فيهو البياض والكانكيج، والدبس، والبلطي، والقنومة . جابوهو لي اكلتو وإتذكرت شريكنا وجبابيدنا، والمِغيرب تكون شايلك دلقون مصرور فيهو صارقيل ؤُ ماشي تبيّت الرماي، نزلت دمعة ؤُ جفّت من لهيب الحسرة . عِلآ الحاجة اللبت تقع لي حكاية اللحمة دي ...
10-17-2015, 12:41 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18040
Quote: يا ود المدير شيشك على حناكيش الزمن اللغبر .. حوكاك طاعم زي التكنك بتكتب بى بسليقة اللحم البتهاتيبو دا .
طلحة يا صديق، حبابك واليوم السعيد الليلِي جابك . حكاية السليقة دي ياها المخلياني لا اشك في إنو الناس دي كلها فاهماني، عليك الله بالصُح في ناس نضمينا دا بالنسبة ليهُن كُتُر ؟.
نيويورك بلد العجائب يدخلها كل يوم حوالي مليون زائر ويخرج منها قدرهم . المدينة تموّج وتموّر بالبشر من جميع الجنسيات . كلما اجد سانحة كنت امشي (البرادوي)، حاجة كدا زي شارع الجمهورية بالنسبة لينا زمان وكِت نزور الخرتوم، هناك تشوف الغرائب والعجائب !، محلآت فاتحة منذ إنشاءها ما قفلت إلا في 11 سبتمبر لآمن وقعت الوآقعة، بهرجة من الأنوار وكم هائل من العربات، والناس رجالاً وعلي كل ضامر، مزازيق ورقص وصخب وضجيج . يوم سمعت اوركسترا كاملة بتعزف، باريت صوت الموسيقى لحدي ما وقفت جنب زول فرِد وحِيّد بيعزف في حاجات عبارة عن كرتونة فاضية، رف تلآجة، جردل بلآستيك فاضي، شوية حديد ؤُ كراكيب من الكوشة، لكن تسمع العزف تحلف تقول جيمس لآست . في وسط هذا الزحام من البشر والأنوار والزخم من كل ماهو مُحدث للضجيج عندما اذكر البلد انسى كل ما حولي وأحس بالهدوء والصمت وانا جالس علي ضفة النيل في السيالة . ما رآقت لي نيو يورك إطلاقاً، وسئمت الحياة فيها من قولة تِيّت، وقررت ارجع البلد . الجماعة قالوا، لي كدي امش جرّب كندا . ما كضبت لفحت شنطتي ؤُ يا القطر جاك زول، ركبت القطر لبفلو ؤُ من هناك لتورنتو، ؤُ عمل نفس الحركة قبلي محمد صالح من وِلآد اتبرا، ؤُ جا بعدنا هاشم عبد الله بالقطر برضو من وِلآد اتبرا، وِلآد بورتسودان كانوا ماسكنها لينا قالوا، ناس اتبرا حتي في امريكا الشمالية برضو ساكين القطر وكان لقو طريقة كان سطحو . دخلت كندا ؤُ برضو ظليت صامي خشمي من اللحوم، ؤُفي بالي حكاية اللحم الحلآل ...
10-18-2015, 09:39 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 25108
مرة في طوكيو دخلت محل Halal Food اسيادو باكستانيين لقيت عندو سمك مجمَد مكتوب عليه Halal كنت بضرب في اكل جاهز كده ثلاثة شهور وما عارف قطعة اللحمة الفيهو دي بتاعو خنزير دخلتني جهجهة بقيت نباتي
10-18-2015, 11:00 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
من غرائب الصُدف يا جلالدونا إني إشتغلت في اونتاريو في مصنع جداد، وإشتغلت عن طريق Islamic Society of North America, ISNA. وظيفتنا كانت نقيف قُصاد السير المعلّق فيهو الجداد ؤُ نشتغل تكبير علي ورديتين، معانا وآحد كان قاعد تجيهو دقسة ينوم هو وآقف قصاد السير . قُتلهم غايتو الجداد البيجي قُصاد الزول دا ساعت دقستو، وحات نضري كُلّو حرآم . يا جلال الوآحد قرّب يفتحلو مسيّد، تصدق . كان رئيس الإسنا في ذلك الوقت باكستاني إسمو (محمد اشرف) . في زآت يوم انا كنت بردد في مقطع من قصيدة لحميد، بيقول، (جانا مُدير المصنع زآير، قال المصنع فيهو خساير، ؤُ قال حا يسرحو متين عامل)، تصدق في نفس اليوم جانا محمد اشرف مع وفد من الإسنا زيارة ؤُ بعد يومين شلعوني من الشغل !. احمد قال لي، اها اشعِر دآبك . المهم هذا المحمد اشرف بعد سنين جانا مع وفد من الإسنا في شمال كندا في مدينة (يلو نايف) ؤُ من يومها انا كرهتو كراهة التحريم . يا جلال بكل أسف الشغلآنية كلها إستهبال في إستهبال .
علي كُلٍ واصلت طريقي في البحث عن حكاية اللحم الحلآل دي ...
10-18-2015, 11:35 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: Maha Mohamed سلام ود المدير مشينا السودان قبل ثلاث سنوات ، ولدي عمره سبعه سنه مشى مع خاله محل شاورما في الخرطوم ، وقف قدام البائع بكل جديه و ساله ، اللحم ده حلال ؟
ههههههههههههههههه،
سلآمات يا مها .
معاهو حق والله . ماشا الله نسبة المسلمين زادت بكثرة في امريكا الشمالية، وأصبحت اللحمة الحلآل لها قسم خاص في اضخم المحلآت التجارية . بنتي كانت بتقرأ في السودان ؤُ جات قبل شهر عشان تواصل في كندا، سبب البوست دا جاتني قبل كم يوم قالت لي، يا ابوي إشتريت لي جداد من 11_7 بديت اكل فيهو ؤُ كان لذيذ شديد، قامن صاحباتي قالن لي، الجداد دا ما حلآل، ؤُ لأني كنت ما متأكدة رميتو في الزبالة . بعد شرحت ليها قُتلها، باكر تمشي تشيلي باقي جدادك من الزبالة ؤُ تاكليهو لأنو عكس حلآل حرآم، فمن الذي حرّم عليك هذا ؟.
مُشكلة والله . هل اللحوم الغير مذبوحة علي الطريقة الإسلآمية أو التي ليس عليها ديباجة مكتوب عليها (حلآل) حرآم ؟؟؟؟؟؟؟؟؟؟؟؟؟...
10-18-2015, 05:00 PM
جلالدونا جلالدونا
تاريخ التسجيل: 04-26-2014
مجموع المشاركات: 9390
و مع الاستهبال يا مدير الاستغلال البشع للكلمة و الجشع الذي يمارس من ورائها سلخانة فينيكس تغطى حاجة المدينة من اللحوم و عندهم يومين فى الاسبوع لى ناس حلال ديل يجيبو ضباحنهم يضبحو حلالن ده من غير اى ؤسوم اضافية و مع ذلك سعر الرطل فى اى محل بين دولارين لى تلاتة من اللحوم التانية الا لحم حلال ده فى محلات الحلال بتاعت المسلمين الرطل من خمسة لى ستة دولارات يا مدير الحلال كما الحرام بيّن انا شخصيا لن احرم ما احله الله لى
10-18-2015, 09:07 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: مرة في طوكيو دخلت محل Halal Food اسيادو باكستانيين لقيت عندو سمك مجمَد مكتوب عليه Halal كنت بضرب في اكل جاهز كده ثلاثة شهور وما عارف قطعة اللحمة الفيهو دي بتاعو خنزير دخلتني جهجهة بقيت نباتي
هههههههههههههههه، يا حنين عليك الله طعما كان كيف ؟. غايتو لحمة الياباني دي انا ما بعرفا ليك، لكن لحمة الكتابي دي ربنا قال حلآل، الناس قالوا، لا حرآم !.
الكفوة كلها جاية من الباكستانيين ديل، الواحد فيهم ما يلقى ليهو ملف فاضي يكبليك فيهو صلآة، وتجده حريص جداً علي اللحم الحلآل، ثم يرتكب من الفواحش ما ظهر وما بطن ولا حرج عليه ...
10-19-2015, 08:16 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: يجيبو ضباحنهم يضبحو حلالن ده من غير اى ؤسوم اضافية و مع ذلك سعر الرطل فى اى محل بين دولارين لى تلاتة من اللحوم التانية الا لحم حلال ده فى محلات الحلال بتاعت المسلمين الرطل من خمسة لى ستة دولارات يا مدير الحلال كما الحرام بيّن انا شخصيا لن احرم ما احله الله لى
يا جلالدونا الحكاية بقت تجارة مُربحة علي مستوى أعتى المحلآت التجارية زي walmart و costco و KFC .
10-19-2015, 08:31 AM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
انتو مش طعام اهل الكتاب ديل حلال ومباح ليكم ما خلا الخنزير والمحرمات ؟
حيدر الحنين كدي في شرق اسيا معذور.. لكن المسلمين ديل في الامريكتين واوربا بيفتشو للحلال بفهم شنو؟ زائداً على كدة واضح انه المسألة فيها استهبال وتجارة دين وجشع من الاعراب والمسلمين كعادتهم في الاتجار بالدين...!
10-20-2015, 06:19 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: لحم حلال دي يعني شنو ؟ انتو مش طعام اهل الكتاب ديل حلال ومباح ليكم ما خلا الخنزير والمحرمات ؟ حيدر الحنين كدي في شرق اسيا معذور.. لكن المسلمين ديل في الامريكتين واوربا بيفتشو للحلال بفهم شنو؟ زائداً على كدة واضح انه المسألة فيها استهبال وتجارة دين وجشع من الاعراب والمسلمين كعادتهم في الاتجار بالدين...!
والله يا ود الزين حاجة تحيّر !، حيرونا عديّل كدا !، نحن نعرف إنو حلآل عكسها حرآم، فهل لحم الأمريكتين ؤُ كندا حرآم بفهم إنو في لحمة حلآل ؟. أما حكاية جشع وإستهبال دي صُح وحات الله ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
طلحة عبدالله
جلالدونا
حيدر حسن ميرغني
HAIDER ALZAIN
فيس بوك
تويتر
انستقرام
يوتيوب
بنتيريست