هتافات داوية من الزمالكاوية للأهلاوية جائين للسوبر ليه هو انتو أخدتو إيه .. خخخخخخ رايت ناو في ملعب إستاد هزاع بن زايد بالعين أفضل ملاعب العالم على الإطلاق .. والله الفراعنة يعرفون الحكي .. يتبع ....
يلعب الزمالك بطل ثنائية الدوري والكأس والأهلي المصري وصيف البطولتين على كأس السوبر المصري بعد نصف ساعة من الآن على ملعب إستاد هزاع بن زايد بنادي العين وسط حشد جماهيري مهول لم تشهده مدرجات الملعب الأحدث والأفضل في العام من قبل . وصدر قرار من الإتحاد المصري لكرة القدم يفيد بأنه في حالة فوز فريق واحد بلقبي الدوري والكأس فسيقام لقاء السوبر بينه والفريق الوصيف على ملعب محايد خارج جمهورية مصر العربية، وهي المرة الأولي التى يقام فيه كأس السوبر المصري خارج مصر . يتبع ...
10-15-2015, 04:46 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
جماهير الأهلي سبق وأن هتفت ضد جماهير الزمالك في البطولة الأفريقية بهتافات تحمل ذات المعني بحجة أن الزمالك شارك بعد الأدوار التمهيدية ولا حق له في مسابقة الكبار ( الجايبنها عضل وعرق جبين).. مع مراعاة الفروق في الحالتين طبعا .. عموما هتافات جماهير الزمالك التى تصم الآذان حاليا أشد وطأة وأكثر مدعاة للغيظ .. إذ أن الأهلي شارك في السوبر دون أن يحصل على أية بطولة في الموسم المنصرم.. وهو بالفعل بمثابة طفيلي . يتبع ...
10-16-2015, 09:05 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
إنفض سامر الديربي المصري الصاخب بدار الزين وطار الشياطين الحمر بالسوبر وتركوا للزمالك دموع العين .. لكن صدي الليلة المثيرة سيظل باقيا في الوجدان .. الأهلي قلب تأخره بهدف إلى فوز بثلاثية (3-2)، وكعادة مباريات القمة لم تخل المواجهة من أحداث مؤسفة، أحيانا وطريفة أحيانا أخرى فالزمالكاوية ألقوا باللوم على حكم المباراة الإسباني بحجة أنه عكس العديد من الحالات وتقاضي عن إحتساب ركلة جزاء لصالحهم، فيما منح الطرف الآخر ركلة جزاء من نبت خياله، وخرج رئيس نادي الزمالك المثير للجدل المستشار مرتضي منصور ليهاجم مدرب فريقه ويصفه بالفاشل ويقيله على الهواء مباشرة وسط دهشة وإستنكار المتابعين بيد أن المدرب البرتغالي فيريرا هو ذاته الذي حصل مع الفريق على ثنائية الدوري والكأس، لكن جنون الرئيس العجيب كان حاضرا بمفاجآته الداوية كما كل مرة .. يتبع ....
10-16-2015, 09:28 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
للأمانة حضرت وعايشت ميدانيا مباريات قمم عديدة في مختلف بلدان العالم، في كأس العالم الأخيرة بالبرازيل، وفي الليجا الإسبانية والدوري الإنجليزي، وفي عدد كبير من دول العالم الغربي والعربي والأفريقي، غير أن لقاء القمة المصرية هو أمتع ما شاهدت وعايشت، بداية من أحداث ما قبل المباراة وحتي قبل دخول الجمهور للمدرجات وما يلي ذلك من تقليعات وتعليقات ومناكفات بين جماهير الفريقين، مرورا بما يحدث في المدرجات من مشادات وسخرية متبادلة، وليس نهاية بأجواء المباراة وما يحدث داخل أرضية الملعب.. الجمهور المصري نكهة لا غني عنها في الملاعب المصرية وأعتقد جازما أنه لولا هذا الجمهور لما كان للكرة المصرية هذا الصيت وهذا الصخب المحبب، حتي لو أحرز منتخب الفراعنة كأس العالم .. يتبع ...
10-16-2015, 09:51 AM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
الزمالك كما هو حاله من زمان .. يمتلئ بافذاذ اللاعبين .. جاب احرف ناس من زمن فاروق وشحاته .. لكنه فريق يفتقد الى حرفية كرة القدم .. هسه عليك الله في أحرف من حفني وعمر جابر ديل .. هل شفت في لعيبة الاهلي من يماثلهم موهبة .. لكن برضو غلبوهم .. وهكذا كرة القدم مابتدي حريف .. فهناك الكثير المهم خلا الموهبة .. الكورة بقت صناعة والاهلي يعرف كيف يصنع كرة قدم وبطولات .. وهنا يكمن الفارق ..
هذا هو لاعب الأهلي الموهوب رمضان صبحي، وقف على الكرة أثناء المباراة، وهي حركة متكررة ظل يقوم بها اللاعب في المباريات عندما يكون فريقه مسيطرا ومتقدما، لكن الأمور أختلفت و( جاطت أوي) عندما كررها أمس على ملعب إستاد هزاع بن زايد، بعد أن تقدم الأهلي بثلاثية مقابل هدف حيث اعتبرها الزمالكاوية إستفزاز لا يمكن قبوله، فكان أن دخل قائد الزمالك حازم أمام الذي كان على دكة البدلاء إلى أرضية الملعب و( قبقب) اللاعب على مرأي ومسمع من الحكم والجمهور ليتدخل بقية اللاعبين، و( تجوط الأمور ) بصورة كادت أن تفضي إلى ما لا يحمد عقباه، خصوصا بعد أن غادر حكم المباراة الملعب، خوفا على نفسه، وكان ذلك في الدقيقة 78 لكن الأمور ما لبثت أن عادت إلى طبيعتها لتستأنف المباراة بعد 9 دقائق توقف، قلص خلالها الزمالك الفارق لتصبح النتيجة 3-2 ، غير أن الأهلي حافظ على تقدمه ومضي ليفوز باللقاء ..
تعليقات الفراعنة على حركة الواد رمضان كانت حاضرة بسرعة مبالغ فيها حتي قبل أن تنتهي المباراة ومنها :
يتبع ..
10-16-2015, 11:02 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
Quote: ولا عزاء لي كورتنا المحلية لاننا ماحنشتغل بيها تاني ..
يا راجل كورتنا بتاعت الساعة كم .. ؟ نحن أصلا عندنا دافوري زايداهو صحافة المدرجات والتعصب والهراء موية .. كورتنا محتاجة شغل سنوات عشان تقيف على حيلا .. هاك دي :
10-16-2015, 11:15 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
نعم المناكفات في الجرايد الرياضية هي ملح كرة القدم شريطة أن لا تتجاوز الخطوط الحمراء، وهي بالطبع مفهومة عندما تسيطر على صحف النادي ولكنها مستغربة ومذمومة عندما يجعلها بعض المشجعين مادة أساسية لأفكارهم المبثوثة في ما يزعمون أنها مقالات تحتشد بها الصحف المستقلة أو المحايدة .. للأهلي صحفه وللزمالك مثلها كما للهلال والمريخ ولكن الفرق يكمن جليا في إستغلالها هنا حيث للمناكفات طعمها اللذيذ وهناك حيث الكواريك والهراء والشتم الشديد .. لهذا يتقدمون ولذلك نتأخر .
10-16-2015, 11:27 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
اللذيذة ياطلحة ولدي ( عشرة سنوات ) .. يشجع نفس الفرق الأنا بشجعها وبتعصب شديد كمان .. مرة مغلوبين وزعلانين بعد نهاية كورة اتغلبنا فيها .. قلت ليهو ياولدي نحن خلاص موضوعنا مستحمي .. إنت اخير ليكـ تلحق نفسك من بدري .. وسيبك من تشجيع المواسير الانا بشجعها دي .....
الغريبة رفض الفكرة وبشدة .. قلت ليهو خلاص خم وصر ..
10-16-2015, 04:16 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
ربنا يحفظو يا ود القوز ولدك أديتو أكعب ما عندك ههههههههه جيبو لي اديهو كورس في كيفية الوقوف إلى جانب المنتصر دائما .. لكن بيني وبينك ابنك صاحب مبدأ وأتوقع ليهو مستقبل مشرف في قوة العزيمة على الرأي .. خخخخخ
10-16-2015, 05:16 PM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
Quote: ربنا يحفظو يا ود القوز ولدك أديتو أكعب ما عندك ههههههههه جيبو لي اديهو كورس في كيفية الوقوف إلى جانب المنتصر دائما .. لكن بيني وبينك ابنك صاحب مبدأ وأتوقع ليهو مستقبل مشرف في قوة العزيمة على الرأي .. خخخخخ
ويحفظك ليك يأخ .. تسلم ..
أبدا الشي الانا متاكد منو إنه طالع لي خالو .. وطالع لي في لعب الكورة بس .. في مره من ذات ( المرارات ) الهلال مغلوب .. بعد الكورة جابو العشا .. صنقرت في الصينية وناديتهم .. واحد فيهم عمل نايم والتاني شايفو مفنقل عويناتو وأبا يرد علي .. نظام حردانين وكده .. قلتليهم بي جازكم .. انا غلبتكم ! .. ولا العشا ده كان لاعب ضد الهلال !! .. فضربت عشاي عادي .. وحبسّت بي كباية شاي .. هههههههههه الكورة لعبناها وحتى لمن نكون مغلوبين .. بعد المباريات كنا بنضرب الباسطة زي الماحصل حاجة ونقرطع قزايز اللبن .. مافي تعصب الكورة ياغالب يا مغلوب .. فقلت ليهم .. بلا هلال بلا بتيخ معاكم .. والله ما اخلي عشاي لي زول .. أها أكان الجوعه قرصتني بالليل .. آكل هلال يعني .. ولا أمش أكابس المطبخ .. هههههههه
ــــــــــــــــــــــــــــــــــــــــــــــــ
البزعل إنه فرقنا تتغلب بهذه الطريقة العبيطة .. وفي كل مره زي خيل الكارو .. من تجي في العالي .. تنبطح ... فقلنا نفعّل الهواية التانية ونرجع للسباحة .. لانه ركوب الخيل كرهتنا ليهو فرقنا الجربانه دي .. فضل تاني شنو ؟ .. الرماية .. خليناها للعساكر .. باقي نحن ناس مدنية ساي ....
10-16-2015, 05:25 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
Quote: للأمانة حضرت وعايشت ميدانيا مباريات قمم عديدة في مختلف بلدان العالم، في كأس العالم الأخيرة بالبرازيل، وفي الليجا الإسبانية والدوري الإنجليزي، وفي عدد كبير من دول العالم الغربي والعربي والأفريقي،
والله يا أبو حسين للشىء الشايفو دا أصلك ملان فقر لامن مدفق ما تعملا فيني ساي .. اتا في رأيك البئيس دا مشيل بلاتيني بحضر المباريات ميدانيا يعني ؟؟ وأشمعني بلاتيني بس ؟؟؟؟ البمنع شنو يا خوي ما أحضر المباريات القلتها دي ميدانيا عشان يعني بشيل وبدي معاك واللا شنو ؟؟ هههههههه أوع تكون ما مصدق بس ؟ يا زول اتا أحسن تشوف ليك صرفة والله لأنو بصراحة وضعك كدا ما مطمئن أبدا .. الله يساعدك .
10-16-2015, 05:48 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
Quote: حتى لمن نكون مغلوبين .. بعد المباريات كنا بنضرب الباسطة زي الماحصل حاجة ونقرطع قزايز اللبن .. مافي تعصب الكورة ياغالب يا مغلوب
عشان كدا دائما قاعدين نقول انو البشجعوا كورتنا ديل مساكين وسافين المسكنة سف .. ياخ حتي البلعبوا ذاتم ما شغالين بالفارغة .. عادي جدا يمشوا يتبهدلوا ويتذلوا ويتزعمطوا وبعد نص ساعة من المباراة تلقاهم قاشرين على أفضل نسق خاتين سماعتم في إضيناتم ويا ضاربين الحفلات يا كمان مع ( المزز) الواحد فيهم يقول لى ناس ميسي ورنالدو شوفوا شغلة الكورة دي خلوها لينا نحن .. والله البغيظ أكتر من المتلاعبين ديل هم الجمهور البشجعم .. بلا نيلة يا قول الفراعنة الفوق ديل .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
طلحة عبدالله
جمال ود القوز
محمد البشرى الخضر
ABUHUSSEIN
فيس بوك
تويتر
انستقرام
يوتيوب
بنتيريست