شبّال المحبة للبلد

حلمك مرق
من باقى حبرك بشتكى
والليل شرب باقى الدوايه
قاعد قصاد حرف النويح المتكى
حاضن تفاصيل الأرق
وجع نومك
متاوقة البيوت
جيهة البحر
ريقك نشاف الأمنيات
همك مرق
من محاحاة البدايه
من درب الحروف الانسرق
من جوه من جمر السفر
ولامن مواعيد الحكايه
تطير بعيد
وترك على وش القمر
تكتب عناوين النهايه
تنده تباشير المطر
وحس الرعود الإنشرق
وتلت التلاتة الإنقسم
بلدا كبير
مرق المودة الإنكسر
بلدا يدافر ما فتر
روح الكحل
ريحة الحليب
معطونة فى باقى الأتر
والطين معاهن انصهر
خت الحلم فوق للهجير
سواهو ضل
لفحة سمومك همبريب
لون الكحل
روح الحليب
ولامن نشيدك ينصلب
يزعل يفوت يختا الدرب
يحرد يفارق ليل صفاك
تبقى البشاتن غنيتك
والنغمة تتحدى السكوت
ترقص تصفق بى قفاك
والمعنى شهقات الوتر
فرح الوجيع البشتكى
حلم التراب المتكى

وجلد الشدر
مدبوغ رقد
نضمى البشر
ملدوغ شرد
هوى يا بشر
خلو النضم
نادو الفكى
قصو الأتر
الداهية وين ؟
دخلت جحر حيطة الكلام
ولا اللسان اصبح حجر ؟
وفرحك مدمدم ومتكى
دحين اخيرلك يا الفكى
فج الزحام
دفق محايتك فى الضلام
ما اللمه ترياق الفراق
والنمه مقلاع الوجع
الغنية مخلاية الوئام
الضحكة بلسم لى الفزع
وشك مبحلق فى الشمس
حاضن نهارات السؤال
حسا مصنقع من أمس
ينده تساويف المحال
حلما هناك لابس الضيا
بهرج حقيقتك
وإنكسف حد الخيال
ويا طالع الأكوان
جيب لى معاك وصال
يربط يكفينا
يا خازن الأحزان
خلى الوجع ينشال
زح همنا الفينا
أملا المخالى أمان
اسقينا وادينا
حبة بشاره وفال
خلى المحبة تقوم
ترقص على الموال
تدى البلد شبال
يا حارس الحبان