|
|
 ههههههه في عش الدبابير الهلاريخية ..
|
08:21 AM Oct, 03 2015
سودانيز اون لاين
طلحة عبدالله-
مكتبتى فى سودانيزاونلاين
قبل يومين دخلت في قروب لجماهير المريخ
وفي خضم إحتفالاتم المسبقة بتأهل المريخ
للنهائي على حساب مازمبي رميتا ليهم بررررردلب
المريخ صعب جدا يتأهل لأنو .. واحد اتنين تلاتة الخ الخ الخ
وعينك ما تشوف إلا النور .. شىء بيض فاسد وشىء مراكيب
وشىء سفنجات وشىء حقة صعوت ويا عميل ويا رشاشة
ويا صفرابي ويا كرداني ويا بنغالي ويا ما عارف شنو ..
غايتو مرقني كلك الخروج ..
أنقروا وقفت على كدا ؟؟
لا طبعا.. أخوكم بحب المغامرات ويموت في المجازفات
دخلت قروب للهلالاب وبدون سلام ولا كلام قلت ليهم :
أي زول يفكر مجرد التفكير في تأهل الهلال للنهائي
الليلة أو لمدة عشر سنوات قادمة .. دا زول مسرف
في الأحلام ومغشوش في حنانو .. وطبعا ما في داعي
أحكي ليكم الحصل ..ههههههههه .. أنصار سنة في جامع
صوفية إنتقد القباب والضريح .. ( إحترامي وتقديري للطرفين ).
جمهور مسحور ومغشوش غشة مزمنة الله يكون في عونو ..
|
|
 
|
|
|
|
|
|
|
|
Re: ههههههه في عش الدبابير الهلاريخية .. (Re: aosman)
|
أبدا والله يا حبيب أنا كاتل الجدادة وخامي بيضا
عارف البير وغطاها .. باني في الهواء قبب ..
حركات هلال مريخ دي ما بتمش علي ...
أقول ما في بطولة يعني ما في بطولة ..
لكن الساعة البقول البطولة جاية .. الناس
طوالي تستعد للاحتفالات .. هههههههههه
ومال أيه ؟
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: طلحة عبدالله)
|
الشاهد انو مشجعي الفريقين عايزين بس يعيشوا
اللحظة .. لحظة الأحلام والتمنيات .. أي كلام خارج الإطار
دا بالنسبة ليهم هو إزعاج بصحيهم من أحلامهم اللذيذة
العايشنها .. على الجميع أن يتكوم معاهم في نفس سرير
أحلامهم .. لا مكان للواقعية والحسبة العقلية لديهم ..
من يفعل ذلك هو محض متشائم وداعي للإحباط ..
التفاؤل حتي لو لم يستند على ذرة منطق هو مفتاح
الدخول لقلوبهم وأذواقهم التى أفسدتها صحافة المدرجات ..
الأوهام فراش من ريش النعام والحرير.. والواقع فراش
من المسامير والحديد الصدىء لا أحد يقترب منه.
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: طلحة عبدالله)
|
Quote: ا طلحه دي فلسفه زايده منك ساي . .
كدي ادخل قروب اتحاد العاصمه الجزائري وقول ليهم ما تحلمو بالبطوله . .
وكدي ادخل قروب نادي الزمالك المغلوب خمسه من النجم الساحلي في الكونفدراليه وقول نفس الكلام . .
وادخل قروب مازيمبي المغلوب من المريخ وادخل قروب الاهلي القاهري وادخل قروب ريال مدريد . .
مافي مشجع لنادي رياضي بعيش من غير احلام والا لماذا يشجع البعض نادي اسبانيول الاسباني . .
ولماذا يشارك نادي تركي في كاس الانديه الاوربيه ولماذا تشارك كثير من الدول في كاس العالم . .
دي احلام مشروعه وليس فيها ما يعيب . . ماعارف انت عايز الناس تعمل شنو يعني . .
التفاؤل ده مجان انت قايل بدفعو فيهو قروش زي كلامك ده مجااااااااان
. |
يا خالد طلعت الفلسفة ذاتا ما بقروش .. وبالمفهوم دا
أها عيبا لي .. وهسع انت كلامك الفوق دا بتعتبروا
فلسفة زايدة واللا ناقصة ؟ واللا لأنو كلامك انت ما بكون
فلسفة ؟؟
من جهة تانية ياخ من حق ناس مازمبي والأهلي والزمالك
وريال مدريد انهم يحلموا ويتفاءلوا لأنهم معودين على
البطولات وعندهم ليها المقومات .. لكن ناس أنتوا
مع شنو ؟؟ لا متعودين ولا عندكم المقومات .. 26 سنة
بعد آخر وأول بطولة قارية عايشين في نفس الوهم بنفس
المخدرات بتاعت اتفاءلوا واستبشروا .. وصدقني ح يستمر
الوضع كدا ل26 سنة جاية إذا إستمر نفس هذا الفهم والتفكير
والتعامل مع البطولات الخارجية .
لا تحلموا بعالم سعيد .
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: طلحة عبدالله)
|
سلام طلحة
الجقلبة البتعمل فيها بين المجموعات بيني بينك هي نوع من الرجفة طيب انت لمن كنت متاكد
انو ما فريق يمكنه للصعود للنهائي وليس لديك عشم في الكورة السودانية الاهتمام الزائد لزومو
شنو كلامك دا اسقاط ، انت مؤمل ولديك امل زي ناس المجموعات الهاجمتك والدليل على ذلك
بوستاتك المفتوحة دوما عن الرياضة ، واذا ما عندك اهتمام مافي داعي توجع قلبك ياالحبيب
الجمهور السوداني زواق للكرة لكن للاسف ليست لدينا المستويات التي توزاي هذا الذوق.
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: بدر المعارف محمد المساعد)
|
أهلا بدر المعارف
وين آزول أنا قلتا ما عندي اهتمام بالكورة السودانية ؟؟
أبدا حرم الكلام دا ما خطر ببالي أصلا .. بالعكس اهتمامي
بالكورة السودانية في اعتقادي يفوق اهتمام أي زول تاني
في أي مكان .. الجقلبة البتزعما دي ما جقلبة يا حبيب
دي محاولة لتوعية الجماهير بالواقع، وقرصة ليهو عسي يفيق
من احلامو وأوهامو في إطار حرب معلنة على فوضي
وعشوائية الوسط الرياضي بداية من صحافة المدرجات
ومرورا بتجار الإدارة ونهاية بالجمهور المستكين المستسلم
للوضع المأزوم دا ..
اتا بس قول أنا معاك في المعركة دي وان شاء الله لو
حصل النصر وقامت الثورة المنتظرة الكورة السودانية
ح تشم العافية ونجيب البطولات .
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: طلحة عبدالله)
|
Quote:
المريخ اصبح قادر على المنافسة دى حقيقة يؤكدها المستوى والنتائج ..
التى رايناها باعييننا الصحيحة اما عيون الرمد فهى معذورة
|
يا وائل حيدر أصبح قادر على المنافسة يعني ح يلعب
النهائي ( عفيناك من يشيل الكأس ) لو بس فقط وصل
النهائي يبقي كلامك مليون في المية وكلامي صفرين
تحت المية .. والعكس طبعا ..
تكون مصيبة لو عيون الرمد بتشوف أبعد وأحسن
من عيونكم الصحيحة ..
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: طلحة عبدالله)
|
Quote: ( عفيناك من يشيل الكأس ) لو بس فقط وصل
النهائي يبقي كلامك مليون في المية وكلامي صفرين
تحت المية .. والعكس طبعا ..
تكون مصيبة لو عيون الرمد بتشوف أبعد وأحسن
من عيونكم الصحيحة ..
|
يا رب خفف على المريخاب
العندهم عيون صحيحة والما عندهم .. خخخخخ
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: usama Babiker)
|
الأخ العزيز طلحه عبدالله
حبيبنا محمد بحر فى بوست مجاور فتح بوست بخصوص هذه المسأله الرياضيه .
هلا سمحت لى بنقل مداخلتى والتى عبرت فيها عن وجهة نظرى فى هذا الخصوص
Quote: الحبيب محمد البحر , تحياتى
واضح أنك هلالابى على السكين
ويا ناس شرق السودان أنتم بتذكرونا بالزمن الجميل زمن اللعيبه الأفذاذ
عبدالله أوهاج
الطاهر حسيب
ومصطفى شاويش
زمن السودان كان يعتمد أساساً على اللعيبه السودانيين بل كان اللاعب السودانى مفخرةً فى الدول
العربيه ودول الجوار وكمثال :-
سليمان فارس - السد العالى -
عمر النور
سمير محمد على ,,, فى مصر.
الفاضل سانتو
حمورى
محجوب الضب,,, فى دولة الأمارات .
التاج محجوب,,, فى سلطنة عمان .
كل هؤلاء اللعيبه الأفذاذ ظهرت بوادر مواهبهم الكرويه بالدافورى بكرة الشراب منذ الصغر فى
فسحات الأحياء وميادين المدارس عندما كانت هنالك فسحات عامه فى كل حى سكنى وفى كل مدرسه
ميادين للتنافس الرياضى.
وكيف للرياضه فى السودان أن تنتعش بينما يتم تدمير منابع نموِها ونشأتها !!!!!!!! |
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: ABDALLAH ABDALLAH)
|
مشكور يا اسامة بابكر على الإطراء .. المشكلة انو في ناس
بغالطوا الحقيقة كدا ساي انفة وكبرياء منهم .. يغالطوك
غلاط جن يزعم انو عارف ما وراء الغيبيات .. وفي النهاية
لما يصطدموا بالواقع البؤكد ليهم خطل منطقم وتوقعاتم
العاطفية.. يهربوا زي الما عملوا حاجة .. وتاني يجوك السنة
الجاية بنفس عاطفتم وأزيد وبرضو تنزل تفهم وتحاول توعيهم
ويكرروا ليك نفس إسطوانة لا المرة فريقنا قوي وبطل وما عارف
شنو وبرضو في النهاية لم تبان ليهم الحقيقة المرة يفزوا
والشجاع فيهم يقول ليك القادم أفضل باذن الله .. طيب ياخ
القادم أفضل دي بنسمع فيها لينا عشرات السنين وح نفضل
نسمعا تاني مية سنة طالما استمر الوضع بتفاصيلو الحالية
دي .. تعصب جمهور مخدر بأوهام صحافة المدرجات واداريين
تجار المناصب الرياضية عندهم وجاهة ودعاية وشو ..
الكل مستفيد والخسران هو كرة القدم والرياضة السودانية .
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: طلحة عبدالله)
|
شكرا يا عبدالله
زمان كل شىء في السودان كان في محلو الصحيح
لاعبين أفذاذ يلعبون من اجل متعة انفسهم وجمهورهم
ولا يلقون بالا للمكاسب الإقتصادية وفوق كل ذلك منضبطين
وغيورين يأكلون عشب الملعب زودا عن شعار فرقهم
والمنتخب الوطني .. و إدارة نحيطها هالة الهيبة والوقار
.. أجعص لاعب لا يقوي على النظر في وجه أصغر
اداري .. كانت هناك صحافة نزيهة يعمل بها رجال أمناء وصحافيون
عظماء في فكرتهم ونقدهم وحتي في مناكفاتهم ..
الوطنية والقومية عندهم خط أحمر .. والتعصب
والانتماء الواضح الفاضج للأندية عيب كبير يقدح
في مهنيتهم .. كل شىء كان جميلا وفي مكانه أيام
الزمن الجميل ..
انتهي كل شىء .. وإنقلبت الموازين والمواضع رأسا
على عقب وعشنا عصر صحافة المشجعين الذين
نزلوا من المدرجات ليمارسوا تعصبهم وهرائهم
وتطبيلهم المخجل للاداري دون اللعبة واللاعب .. والنتيجة
ياها الشايفا دي .. والقادم أسوأ .
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: طلحة عبدالله)
|
| Quote: وكيف للرياضه فى السودان أن تنتعش بينما يتم تدمير منابع نموِها ونشأتها |
الحبيب طلحة تحياتي ومودتي ..
كما قال أخونا عبدالله عبدالله .. زمان عشان ما يكون في تعصب ..
في المدرسة وفي حصة النشاط في الأولية .. كنا نردد أناشيد المنتخب الأهلي ( القومي ) ..
ورغم أننا في اقصى الشمال والكورة بالراديو .. برضو كان في هلال مريخ ..
النشيد حسب ذاكرتي :
عمدة في عمدة قاقارين ..
حكسا وماجد هدافين
سبت القون العالمي ..
جقدول الوينقي الخطير ..
جبل الهملايا زي سمير
القصيدة طويلة .. هذا ما أتذكره ..
تحياتي .. ومودتي ..
| |
|
|
|
|
|
|
|
|
|
Re: ههههههه في عش الدبابير الهلاريخية .. (Re: علي عبدالوهاب عثمان)
|
السلام ورحمة الله يا علي
التعصب كما هو معلوم وليد شيطاني خرج من رحم
صحافة المدرجات .. مشجعين نزلوا من المدرجات
رأسا ليتغولوا على مهمة الجمهور بل ويقودوه إلى
درك سحيق من التعصب الأحمق والإنتماء المجنون..
المشكلة انو صحافة المدرجات هي الرابح الأكبر
من هكذا وضعية وبالتالي يهمهما جدا أن يستمر
هذا التعصب بعد أن نجحت في تشتيت انتباه
الجماهير وجرها بعيدا عن واجباتاتها في الملعب
ليصبح الأمر محصورا في التنابذ بالألقاب والسخرية
المتبادلة .. وقد وجدت ضآلتها وما يشبع رغبتها
في صحافة الهراء السمج والغوغائية الرعناء ولذلك
أصبحت تشتري هذا الصحف الكارثة أكثر من شرائها
التذاكر وتشجع مشجعي الجرايد وتهتف وراءهم أكتر
من تشجيعها وهتافها لفريقها ..
لا حل سوى في اعدام جرايد السجم والرماد هذه
والاكتفاء بصفحة واحدة فقط في الجرايد السياسية
كخطوة أولي ومهمة لاشعال شرارة الثورة على
الوضع الكروي المأزوم .
| |
|
|
|
|
|
|
| |
طلحة عبدالله
aosman
بدر المعارف محمد المساعد
usama Babiker
ABDALLAH ABDALLAH
علي عبدالوهاب عثمان
فيس بوك
تويتر
انستقرام
يوتيوب
بنتيريست