|
Re: ميدالية أولمبيّة (Re: أبوبكر عباس)
|
أثناء جلوسو في الكورنيش عبرت في خاطرو فكرة الدور الذي يطمح به في المجتمع، وامنيتو بان يعمل حاجة خلال حياتو تكون في ذاكرة الاجيال. عاين كدا، لقى أكبر انجاز ممكن يحققو انو يحجز لزوجات الوزراء مقاعد سفر في الاجازات! سرح واذكر انو آخر إنجاز حققوهو أهلو قبل الهروب من حريق قلعة محمد علي هو الحريق نقسو! وقف على حيلو وقرر طرد الوساويس دي بالذهاب لبار الخواجة الجنب صينية سان جيمس، دخل يدو في جيبو عشان يتصل بالقبطية السكرتيرة، يقول ليها بكرة بتاخر من المكتب، لكنو تذكر انو الموبايلات لسع ما كانت في! أول ما دخل البار اتصل بصباح في المسالمة من تلفون البار وقال ليها؛ عليك جيسس يا صباح بكرة قولي لود عمك المعفن داك خليهو يوقع الاوراق؛ عشان أنا بتأخر شوية. قالت ليهو: خير إن شاء جيسس يا أستاذ؟ - لا لا خير، عندي إجتماع بخصوص مشروع مكتب مدني وقفل السماعة وقال في سرو: مدني شنو كمان ووسخ شنو! والله، عرب الجزيرة ديل لو انكسرو في لندن دي إلا يلحقوها أمات طه!
| |
|
|
|
|
|
|
Re: ميدالية أولمبيّة (Re: بله محمد الفاضل)
|
بعد الكاس الرابعة إنتبه لسهرة في التلفزيون مع رئيس اللجنة الأولمبية السودانية، السهرة كان تتخلها لقطات عن المسابقات السابقة، ضيف السهرة قال: السودان يستعد بكثافة لاولمبياد برلين ٧٢، والسيد الرئيس القائد حارسنا وفارسنا وجه وزير الرياضة للاهتمام بالالعاب القوى، وضرورة حصد الميداليات من معاقل الامبريالية في برلين، في اللحظة دي كانت هناك لقطة لبطل العالم في العدو السريع. علق نور الدين على سرعة العداء بصوت خافت: بالله شوف العب دا سريع كيف!! النادل سمع التعليق دا وقال: وحات الله وسيدي أبقدم، يا سعادتك، عندنا في أم قوزين حرامي اسرع مية مرة من الأمريكي دا. نور الدين قال ليهو: أبقدم دا منو؟
| |
|
|
|
|
|
|
Re: ميدالية أولمبيّة (Re: معاوية الزبير)
|
عليك الله يا بله والصادق كلمو معاوية دا، وقولوا ليهو معلومة زي معلومة ميونخ ما ممكن تفوت على كاتب بكثافة أبوبكر عباس! يا معاوية، يا مثقف، السوفيت هم من أصروا على عدم اقامة الاولمبياد في برلين، والامبريالية رضخت ليهم وحولتها لميونخ. ثم ثانيا الكلام على لسان الرئيس القائد وكتر خيرو كونو يكون عارف اسم برلين في الزمن داك!
| |
|
|
|
|
|
|
Re: ميدالية أولمبيّة (Re: معاوية الزبير)
|
Quote: : وضرورة حصد الميداليات من معاقل الامبريالية في برلين،
|
Quote: ميونيخ يا مستنير يا بتاع الخلاوي. |
انت كمان ما تدقق يا حبيب ... الراجل صاحبك ...
صاحبنا ود النعيمة يا معاوية ... ( الغريبة من أولاد مدني برضه )
قال زمان كان مؤجر بيت في العمارات في شارع 44
فوتناها ليهو لأنه صاحبنا ... رغم انه العمارات ارقام شوارعها فردية ... ____________________________________________ و صاحبنا ود الحضري ( الغريبة قرا في الهوارة مدني )
كتب موضوع انشا في الوسطى قال كان ماشي فوق ( كوبري الحرية ) ...
و سمع صوت استغاثة ... و تاوق من فوق الكوبري شاف زول داير ( يغرق ) ...
فقفز و صارع الأمواج لغاية ما انقذه ...
الغريبة يا معاوية ... الحتة ديك بالذات كانت عبارة عن قراشات لي صعاليق المحطة ...
* الناس الما حضروا الزمن داك ممكن يسألوا صعلوق المحطة يعني شنو ) ____________________________________________________
| |
|
|
|
|
|
|
Re: ميدالية أولمبيّة (Re: أبوبكر عباس)
|
لمان الساعة اتنين جات وناس البار بدو يرفعوا في الكراسي فوق الترابيز، كورك للجريون بتاع أم قوزين سألو: اسمك منو؟ - مختار - ممكن يا مختار تجيب لي تاكسي وتمشي معاي بيتي ولو داير تنوم ما مشكل، والصباح تشيل الفيها النصيب؟ علي الفور مختار وافق، وقال ليهو أصلنا عزابة مقطوعين من شجرة وساكنين اللاماب.
تاني يوم نص النهار صحى لقى مختار مرتب البيت وعامل الشاي والقهوة وطابخ ليهو حلة جداد كاربة ابتسم وقال لمختار كدي تم لي قصة حرامي أم قوزين وذكرني بأبقدم دا منو؟
| |
|
|
|
|
|
|
Re: ميدالية أولمبيّة (Re: أبوبكر عباس)
|
=
أتعهد أنا وأخوي الشفيف (بله الفاضل) ومعنا (نورالدين صلاح، ومختار زاتو) ونزولاً عند طلب الكاتب الكثيف، أن نلتزم ونحن في كامل قوانا العقلية، بإقناع الأخ غير الكثيف (معاوية الزبير) بأن معلومة (زي معلومة ميونخ ما ممكن تفوت على كاتب بكثافة أبوبكر عباس).
ونحن من جهتنا نطلب من الكاتب الكثيف الذي قال نصاً: Quote: السوفيت هم من أصروا على عدم اقامة الاولمبياد في برلين |
ونستحلفه بالله وبسيده أبقدم، وحتى نمضي معه في بقية حداثياته، أن يشرح لنا مبررات إصرار السوفيت على عدم إقامة الأولمبياد في برلين، علماً بأن برلين في العام 1972 لم تكن إمبريالية ولا يحزنون كما يزعم الكاتب الأشد كثافة في تاريخ الأدب الحداثي. بل كانت عاصمة لألمانيا الشيوعية التابعة للاتحاد السيك ــوفيتي معلَّق فيك. ... .. .
| |
|
|
|
|
|
|
Re: ميدالية أولمبيّة (Re: أبوبكر عباس)
|
لعلي على ضوء انتباهة الزملاء الكيشة .. وقبل وصول من علموهم السحر ناس منتصر وجلالدونا .. أرفع كرتا أصفر يمنع دغمسة لغتنا العامية الشعبية وتحريفها على يد المستنيرين الجدد .. إتا متأكد مختار قال ليهو كده بالحرف؟
| |
|
|
|
|
|
|
Re: ميدالية أولمبيّة (Re: أبوبكر عباس)
|
نور الدين طلّع العربية من الشارع ووقفها وقال لمختار: يعني أمس لو احتكيت بيك أو خليتك نمت معاي في اللوضة كنت انتهيت مني؟ - لا لا - لا لا شنو؟ دا ياهو كلامك! - ابدا ما كنت بعمل القصة دي معاك بدون ما استلم الفكّة قبل الشغل نزل من العربية وقعد في الواطة منفقع من الضحك لحدي ما اتعشرق وطرش الجداد المخلوط بالنبيذ وردد صحي كلام الخواجات: "إيّاك والغريب" تلاتة مرات رجع العربية قال لمختار: إتّا من وين يا ولد؟ - أم قوزين أم قوزين أم قوزين
| |
|
|
|
|
|
|
Re: ميدالية أولمبيّة (Re: أبوبكر عباس)
|
الأجواء في اسبورو الخضراء شكلها منعشة و همبريبها طاقش.. كل عام و انتم بخير،، و انا هنا مرابطون في درب الأنبياء برلين ولا ميونخ شرقية ولا غربية معاذ الله ولا لا حول ولا قوة كلوا ما فارق كتير فى سبيل الوصول لفك طلاسم أم قوزين و أب قدم.. غايتوا في البرتا كندا في اتنين هايوي مشهوران دير فوت و بلاك فوت احتمال يكون عندهم علاقة بروايتك و كدا..
| |
|
|
|
|
|
|
Re: ميدالية أولمبيّة (Re: muntasir)
|
Quote: Quote:
لعلي على ضوء انتباهة الزملاء الكيشة .. وقبل وصول من علموهم السحر ناس منتصر وجلالدونا .. أرفع كرتا أصفر يمنع دغمسة لغتنا العامية الشعبية وتحريفها على يد المستنيرين الجدد .. إتا متأكد مختار قال ليهو كده بالحرف؟ |
كتبا ناقصه (لا) أخرى بعدها فاصلة يا مولانا .. ولعلك لحظت أنه رمى برلين كدا ساااي ما عارف إنو صاحبو معاويه هو اللي سقف استاد ميونيخ، هسه أي مداخله يكتبا يردد وراها ( وجعلنا من بين أيديهم ..) الله يجازي أيلول الأسود..
-
من أجمل البوستات ، يستحق مسمى أبوبكر عباس وشركاؤه (تضامنية) ..
| |
|
|
|
|
|
|
Re: ميدالية أولمبيّة (Re: أبوبكر عباس)
|
في بوستات "الشراكة" يا محمد المرتضى، الشركاء ديل، بعد يصلحوك، ترجع تصلح مداخلتك ولا تشير للتعديل وتخلي الشريك حايم ساكت!
أرحب ترحيب كبير بانضمام الشفيف المرتضى لرابطة محبي الأديب الكبير أبوبكر عباس
| |
|
|
|
|
|
|
Re: ميدالية أولمبيّة (Re: أبوبكر عباس)
|
منتصر وغلاطكم ضيعن عليكم تفاصيل حميمة فيها على سبيل المثال لا الحصر: جيبة صجّة من سجن بارا، والعلاقة الجنسية بين مختار ومامور السجن، واعجاب الرئيس القائد بسرعة صجّة، وتعيين نور الدين رئيسا لبعثة السودان لاولمبياد برلين المعدلة، وح أعرش ليكم القصة دي في تلاتة سطور جايات، ولمدة اسبوع ما ح ابركم بعمل أدبي جديد وتحياتي لفيصل سعد
| |
|
|
|
|
|
|
Re: ميدالية أولمبيّة (Re: أبوبكر عباس)
|
كضااااب ما بتقدر .. لكين عشان انضمام مولانا ود المرضى لفريق الكيشة في اولمبياد وين ما عارف .. بديك تلاته يوم فقط .. : واحد قبضو يدير مصنع مشروبات في الكمينة .. القاضي قال ليهو حكمت المحكمة عليك بشهرين سجن .. قال لي : وييي جهّر واحد بس .. استغرب القاضي وسألو ليه شهر واحد .. قال لي نمشي الزراعة .. قديمة مش ؟ المهم عايز اقول شنو؟ أيوه – كل سنة وانتو طيبين .
| |
|
|
|
|
|
|
Re: ميدالية أولمبيّة (Re: محمد على طه الملك)
|
Quote: أرحب ترحيب كبير بانضمام الشفيف المرتضى لرابطة |
هيا اااا دا!! أنا براااي معجب الكاتب الكبير تقوم تسويني رابطه؟
الشي عجاجه!!
-
عيدكم مبارك ونسأله أن يعيده على السودان والأهل جوه وبره بالخير واليمن والبركات..
| |
|
|
|
|
|
|
Re: ميدالية أولمبيّة (Re: محمد المرتضى حامد)
|
ابداع يا بكور اى محاولة لتقليل كثافة الاديب بكور هى محاولة مأجورة و مدانة
اللام دى يا بكور تجر ليك صجّة بتاعك ده فى علبة صلصة و ان كان فكوها فى الخلا تجر ليك جبل خليك من ده ان درعوها فى رقبة جمل برضو بتجرو زى حرف الفى ده لآنبيائكم
| |
|
|
|
|
|
|
Re: ميدالية أولمبيّة (Re: معاوية الزبير)
|
Quote: صاحبنا ود النعيمة يا معاوية ... ( الغريبة من أولاد مدني برضه )
قال زمان كان مؤجر بيت في العمارات في شارع 44
فوتناها ليهو لأنه صاحبنا ... رغم انه العمارات ارقام شوارعها فردية ... |
يا قباني دي شكلها دقت معاك في العارضة ... وكلام ود مدني صحيح واحتمال يكون كان ساكن في شارع 44 ... العمارات الشوارع العرضية بتاعتها بالارقام الفردية فعلا ... ولكن الشوارع الطولية بالأرقام الزوجية ... بتلقى شارع 15 بالعرض وبعده شارع 17 بالعرض برضو ولكن بيربط بينم شارع 16 بالطول ...
التوقيع / واحد أغبش قرأ في السجانة وكان بشاقق بشوارع العمارات
كل عام وانتم بخير ...
| |
|
|
|
|
|
|
Re: ميدالية أولمبيّة (Re: يحي قباني)
|
السلام و التحايا للجميع و كل عام و انتم بخير،، غايتوا يا أخوانا زي ما قال ليكم أبكر قبيل مغالطة الأنبياء و أرقام الشوارع ضيعت علينا سرد تفاصيل حميمة و كدا في هذا البوست البديع، علاوة على خروج الحبيب يحي في زمن تتي و لا بعيونك تقول لي تعال و تعال، و طبعا الكاتب الحردان أشار بأنه توقف عن الكتابة مؤقتا لأسباب لوجستية حفاظا على سلامة حياته من تهديدات إهدار دمه بواسطة بعض المتشددين الدواعش، عليه واحد فيكم يتبرع يكمل الرواية و يظبط ليها خاتمة جهبوزة ريثما تصفو السماء و نتبين الخيط الأبيض و الخيط الأسود و فجر المشارق و انا ارشح الأخ معاوية الزبير ليقوم بهذه المهمة باحتمال انه سمع القصة شفاهة من خشم سيدها..
و كونوا بالف خير..
| |
|
|
|
|
|
|
Re: ميدالية أولمبيّة (Re: Faisal Saad)
|
فيصل يا حريف عايز تبقى فيني حكاية الصحابي القال ليهم، هذه هي الفاتحة فأين عمر. قوول عارف القصة أقصها كيف؟ فميزة هذا الرجل الساحر ليست في عضم قصصو (أصلا كلها فشفاش) إنما في حكيهو هسي لولا الحكي، شنو يعني لوري قطع في السكة وختوا الصاجات وكان معاهن قمر قامت نطت وكلوشها شبك في التندة إلى ما لا نهاية إلى ما لا نهاية إلاه إلاه إلاه
| |
|
|
|
|
|
|
Re: ميدالية أولمبيّة (Re: أبوبكر عباس)
|
انا آسف يا بكور على ردي أعلاه، الحقيقة افتكرتك ما ح ترجع تاني بعد التحذير المبطن من أخونا منير، قلت أدلي برأيي الحقيقي.
بوردابية صاحبتي تركت المنبر من سنين طويلة، مرة سألتها عن سر صمودها على قرارها بترك المنبر نهائيا رغم بعض البوستات المغرية سواء من ناحية المتعة أو الآكشن (الحق محفوظ لود البشرى) فضلا عن المناشدات المتكررة لها بالعودة فأجابتني: أنا والله هجرت ليك المنبر دا هجران الحبيبة المغدورة، لا بشوف مغريات لا منغصات لا مناشدات.. محطة وعديناها.
أها أفضل طريقة لمقاومة مغريات الكتابة في المنبر ألا تلتفت إليه نهائيا بعد تركه شكلو قلبك رهيف وماااا بقدر على الهجران في عز الصيف. ننتظر ونشوفك كيف في الشتا
| |
|
|
|
|
|
|
Re: ميدالية أولمبيّة (Re: أبوبكر عباس)
|
شيخي المستنير بعجبني فيك اخلاصك لصحبانك مع اني اشك انك انتيم وبي اف اف لابوالاباليس اكتر من معاوية ما هاين عليك إرجموا يا معاوية ما تخاف ابوبكر ده عندو رسالة استنارة بكب فيها ما بنسحب حتى ينير عقول اقوام من يسار ويمين
| |
|
|
|
|
|
|
Re: ميدالية أولمبيّة (Re: أبوبكر عباس)
|
فعلا لاحظت أنو أبوبكر أعلن فرارو من المنبر بعد تنوير دكتور منير لكنه نكث الوعد وعاد زي الما حصل حاجة .. كما لاحظت أيضا في هذا البوست ثمة مشكلة (ربما) في عبارة (يستعد بكثافة) حسب ما ردده بعض السابلة المشكلة شنو الله أعلم . كل عام وانتم بخير .
| |
|
|
|
|
|
|
Re: ميدالية أولمبيّة (Re: أبوبكر عباس)
|
سنما أونطا ادونا قروشنا .. : ويحكم براكم يا معاوية الزبير.. الأديب لن يتخلى عن أولمبياده ( بالله الدال دي لما تصلوها أكسروها فوق رويسو الغليد دا ) .. صحيح تخلى عن برلين بعد سقوطها بيد البلاشفة .. وربما تخلى قريبا عن ميونخ في أقرب زنقة مالية .. إن تأخرت شيكات الامبريالية الامريكية قيد أنملة حسب فتيا حلاق الجامعة .. غير أنه لم ولن يتخلى عن أولمبياده حتى لو أقامو في جبرونا.. جرو انتو ذيما عايزين فهو ليس له وقت للجرجرة .. دعوه يفتل حبال أفكاره على نار هادئة .. أيوه النيران لا تحرق الأنبياء .. افرنقعوا - دي كلمة عربية ولّ أنا غلطان؟
| |
|
|
|
|
|
|
|