|
|
 صداقة دافوري
|
03:28 AM Sep, 08 2015
سودانيز اون لاين
أبوبكر عباس-الإمارات
مكتبتى فى سودانيزاونلاين
لا أرضى ضياع أعمالي الأدبية.
فتشت البوست دا، لقيتو أختفى من مكتبتي، قلت لازم نرجعوا للمكتبة السودانية مرّة أخرى:
صداقة:
سنة تزعة وتمانين وتزعين كنت خريج وعاطل.
مدني دي بالرغم من إنها تقع جنوب الخرطوم، لكن مدخلها البري من الخرطوم غربي، لأنو النيل عامل فيها زي كلوة من الشمال محل عترة والدباغة. شارع الخرطوم والسكة حديد بدخلنها متوازيات من حي البان وبانت غرب ومعاهن متوازية ترعة البحوث الزراعية. يعني لو كنت بتعوم في الترعة عريان وجا القطر ماري، الناس المسطحين بشاغلوك بكلمة واحدة ممطوطة: مدنيييييي! لكن الناس المسطحين في اللواري ما بشوفوك، لأنو السكة حديد عالية!
أها، أنا كنت ساكن في بانت غرب دي جنب شارع الخرطوم، السكة حديد والترعة وعاطل!
وجنبنا شارع الخرطوم بنقسم عشان يمشي سنار، لو وقفت في التقاطع دا قبل المغرب بتجي اللواري من سنار شايلة البطيخ ماشة الخرطوم، وعادي لمان اللوري يهدن عشان يلف ممكن تشحد المساعد بطيخة ويجدعا ليك وما تنفجخ وتقعدوا تاكلوها في السكة حديد، ولو ما أداك بتقول ليهو أمشي يا بتاع الكجيك.
بهناك للترعة دي في حواشات البحوث الزراعية والأراضي الشاسعة دي في طفولتنا المبكرة كانت يا إما مزروعة أو محروتة في انتظار الزراعة وعُرفت عندنا بالسرابات. بعد الإنقاذ جات بقت قاعدة بور، في السنة ديك قدرنا نساوي لينا ميدان بلودر حافظ وأصبح ميدان دافوري معتمد يؤمه بعض أولاد بانت، شندي فوق وعمال المنطقة الصناعية.
تقريبا كل يوم قبل الدافوري يبدأ، اللاعبين بكونوا قاعدين في طرف الترعة بتونسوا، وتقريبا نصهم كان بضرب ليهو سجارة خضرا. عثمان منقة صاحبي جدا، من شندي فوق وخريج عاطل وبحب الدافوري زيي، وبشبهني في كل شيء، لكنو كان بتفوق علي بالسجارة القبل الدافوري! مرة قلت ليهو يا عثمان، شربكم للسجارة دا قبل الدافوري ما فير؟! عاين لي مستغرب بعيونو الحمر، قلت ليهو عشان البنقو بخدركم وما بتحسوا بالضرب في الدافوري! عمل لي علامة إتّا مجنون ديك ونزل الميدان، اليوم داك ضربني ضرب!
مرّة بعد ناس منقة ضربوا السجارة، عرفنا انو الكورة ما حتجي، قلت لعثمان ارح نقعد في القضيب (قضيب السكة حديد)، قلت ليهو لو حكيت لي تلاتة قصص خطيرات؛ عندي ليك فكرة جهنمية، قال لي ولو ما عجبتني فكرتك؟
- بعزمك سينما وعشا عند كشك.
- أوكي دييل (اتفاق).
قلت ليهو إتّا عارف ليه أنا بحبك؟
- عشان بونسك ونسة غير نمطية!
أوكي أبدأ الأولى:
دقيقة خلوني أوصف ليكم منقة دا قبل يبدأ قصتو الأولى: ملامحو كلها مصرية ما عدا انو زول طويل جدا ونحيف وأسوااااد فحمة.
|
|
 
|
|
|
|
|
|
|
|
Re: صداقة دافوري (Re: أبوبكر عباس)
|
القصة الأولى:
ابوي مات ونحن ممتحنين الشهادة، إتّا ما شفتو؟
- قلت ليهو شفت أمك حلبية
- اليما التبلعك، لمان أقول ليك أبوي مات قول لي الله يرحمو؟!
- لكن كدا الونسة بتبقى نمطية!
سب لي دين وقال: لو ما عشان السينما وعشا كشك كنت لغيت الدييل، عارف فكرتك بتكون معفنة ومهببة زيك.
واصل: أبوي جنوبي لقبو حسن كبريتة لانو عيونو دائما حُمر، رباهو جدي أبو أمي وأداهو اسمو يعني امي وابوي في الاوراق الرسمية أخوان.
- قلت ليهو بارك الله في السيدة زينب الالغت التبني.
امتعط وواصل:
جدي شغلو معاهو كمساري في اللوري بتاعو الكان بمشي بيهو الجنوب، جدي كتلوهو الجنوبيين في الاحداث الكتل فيها الجنوبيين الشماليين.
- قلت ليهو الوثقها عنصريا عبد الله الطيب ب:
ألا هل درى قبر الزبير بأننا نذبح وسط الزنج ذبح البهائم
قال لي بس إتّا أقعد أحفظ لي الحاجات الملانة اشكالات!
تقاطعني تاني بسب لسينما الخواجة وكشك.
حسن كبريتة دفن جدي في الجنوب وجاب اللوري وأموال جدي وجا راجع سلم الأمانات لحبوبتي وبناتا.
بعد الاربعين يوم بتاعت الفراش خلصن أهل حبوبتي رجعوا دنقلا واتفقوا معاها ترجع دنقلا بعد شهور العدة يخلصن.
أبوي قال لحبوبتي: أبوكم قبل يموت وصاني عليكم، دحين شوفو اتو دايرين مني شنو وأنا حاضر؟
حبوبتي قالت ليهو كتر خيرك يا حسن ولدي، دايراك تعرس هانم بتي الكبيرة دي وتقعد معانا في البيت ترعى مال أبوك وتجارتو، لو موافق بكرة جيب أصحابك يتغدوا معانا وكلم الماذون يجي يعقد ليك وما دايرا أهلي في دنقلا يعرفوا هسع!
- قلت ليهو واوو! لكن جدك ما بكون وصاهو!
قال لي احتمال، لكن حبوبتي حريفة وأمي منقة بس وأبوي يستاهل، يا أخي،دا كان أجمل مخلوق في مدني دي كلها، لو فكرتك طلعت تستاهل بحكي ليك عن محنو بعد سلم التجارة لأخوي الكبير وبقى عامل فيها مدرب كورة قدم.
- أها القصة دي كيف؟
- قلت ليهو: عشرة على عشرة، ولو التانية طلعت زيها؛ بعفيك من التالتة.
فجاءة اتحرك ناحية التقاطع وكان توقيتو مع لوري البطيخ ممتاز، في لمح البصر كان جايب معاهو بطيخة وجاني يتبسّم.
قلت ليهو كدا عفيتك من باقي القصص، لكن يا منقة، الكمساري قلت ليهو شنو؟ قال لي أصلا ما بوريك سر قدراتي التفاوضية.
طلع مطوتو واستمتعنا بالبطيخة، وقلت ليهو قول لي واحدة من محن ابوك واضفت بزمبقة شديدة جملة الله يرحمو!
- بعد خلى الشغل عمل ليهو فريق كورة بالفريق،وعمل فيها مدرب، طبعا هو بحب أهلي مدني موت وهوالقال انو فريق البرازيل بتاع 82 في أسبانيا بقلد أهلي مدني وتحديدا سقراط بقلد بابكر سانتو!!
وواصل عن محن كابتن كبريتة قائلا:
بعد السويدي يقول للعيبة: come on كم اون كم أون ويكون بأشر بيدينو بحركة أمشوا
اللاعبين يجوا عليهو، يقول ليهم : أقول ليكم امشوا تجوني؟!
يقولوا ليهو لكن يا كابتن كبريتة كم أون معناتا تعالوا
- كم أون بتاعتي معناتا أمشوا أمشوا!!
قال لي: كدي خلاص قول الفكرة المهببة الوعدتني بيها
قلت ليهو شوف يا منقة، صحي إتّا حبرتجي، لكن أنا أذكى منك وساكن في حي ارستقراطي وإتّا ساكن مع الشماسة!
ما ممكن بأي حال تكون أفكاري مهببة دحين استمع بأدب.
قال لي: تذكر أول ما دخلنا الجامعة لمان جانا ود الجبهة الديمقراطية داك في الغرفة، وشبكنا ليك برجوازية متعفنة، برجوازية صغيرة، ارستقراطية وثورة البروليتاريا!!
بعد مشى سألتك الزول دا قال شنو؟!
قلت لي بسخريتك المعفنة دي: برجوازية معفنة ديل ناس الدرجة.
ارستقراطيون ديل ناس بانت.
البروليتاريا ديل انتو ناس شندي فوق، المزاد، 114 والعشير.
قلت ليهو: تذكر كأنو أمبارح، يا أخي، الود دا كان بمشي مع هدى السمحة ديك الفيها نعاس خفيف في عينها الشمال، يأخي، البت دي مرّة ذلتني ذلة:
مشينا أنا ومعاي برالمة عروب من أولاد طابت الشيخ عبد المحمود كافتريا الاقتصاد وأشترينا السندوتشات و البيبسي ومشينا قعدنا في طرف الكافتريا في التروتوار، وفكينا ورق السندوتشات وقبل ما نقرم السندوتش، تجينا هدى دي طايرة و قالت: وقف عندك يا برلوم، دا شنو؟ وكوركت ليها لأولاد حناكيش: عصام و عماد تعالوا شوفوا ديل.
البت و الأولاد الاتنين و صحبانم الفي الكافتريا حاوطونا في شكل هلال و بدوا يدونا في محاضرة حول كيفية أكل الساندوتش من غير نزع الورقة كاملا.
- يلا يا برالمة لفوا السندوتشات زي ما كانن.
- لفينا السندوتشات.
- أفتحوا السندوتش من واحد من الاطراف و أمسكوا طرف الرغيفة بسنونكم و ارخوا مسكة الورقة من الطرف التاني و جروا الرغيفة للجهة المفتوحة مع القرمة.
- حاضر.
واصلوا بالطريقة دي لحدي ما السندوتش يكمل.
- أوكي.
- اوعة ترموا الورقة في الواطة.
- حاضر
أول مرة في حياتي تذلني بت!!
| |
|
|
|
|
|
|
|
|
|
Re: صداقة دافوري (Re: أبوبكر عباس)
|
قلت ليهو الفكرة ببساطة نمشي نقدم زيارة في السفارة الأمريكية.
جرى منقة للترعة غسل يدينو من سكر البطيخ وجا قعد قدامي زي الحوار جنب شيخو وقال لي: أكيد حسبتها كويس؟
- قلت ليهو نسبتا اكتر من خمسين.
- نمشي متين؟
- بكرة ببص عزوز خمسة صباحا نشيل الفورمات ونرجع في نفس اليوم.
تاني يوم كنا قاعدين في حتاتنا ديك بنملا في الفورمات بعد مشينا الخرطوم ورجعنا، ظبطنا الاستيتمينتس من بنكين مختلفين، ورجعنا بعد أيام دخلناهن السفارة وبعد اسبوع دخلنا المعاينة، وكان منقة عندو تأشيرة وأنا بخفي حنين!!
قلت ليهو عملت شنو في المعاينة؟
قال لي: حظ حبرتجية ساكت، قوود لك يا فردة!!
قبل يوم سفرو بيوم عزمتو سينما الخواجة فلم صن فلور للجميلة صوفيا لورين، واتعشينا عند كشك وافترقنا زي ما بقول الرقيق صديق مدثر وبعيني المنى غالهاْ الدمعُ فما أبصرتُ شيّا.
شيّا "هكذا بتخفيف الهمز على طريقة من يقرأ برواية ورش حتى تتسق مع القافية" كما أوصاني صديقي المحامي أحمد طه ذات مسامرة.
ألفين وإتناشر كنت بتسكع بمانهاتن عصيرا بارد، وقفت بميدان سلة مفتوح جنب مبنى الأمم المتحدة ألعب مع شباب برموا في السلة، شويّة أسمع صوت من وراي بصيح: تيتي تيتي
في لحظة الإلتفاتة شفتا ميدان السرابات ومنقة بجزمتو الشينة ديل ولو ما أخاف الكضب شميت ريحة السجارة!!
قال لي قبل السلام وحات... منو الشيخ الكنتا بتحلف بيهو داك؟
قلت ليهو سيدي الحسن
واصل: وحات سيدي الحسن، يا تيتي، كنت متأكد انك بتصل هنا وانو أنا بلاقيك تاني!
سلمنا علي بعض سلام يبدو للمشاهد العابر انو سلام بارد!
أصلا السلام بتاع العمتي وسؤال الحال الدائري داك، بتاع ناس مكنتم خفيفة!
واصل: لي سبعتاشر سنة شغال في المكتب القصادنا داك وكل ما أجي بهنا واشوف الأولاد ديل بلعبوا؛ بتذكرك واتذكر مجمجمتك وحبك للسلة واتخيل انو ألاقيك هنا.
قلت ليهو: عملت شنو في المعاينة يا معفن؟
قال لي: أها ومتأكد انك ح تسألني السؤال دا، عارفك ما بتخلي الموضوع دا، تمشي معاي البيت وبجاوب ليك.
قلت ليهو : لو وريتني هسع؛ بجيك بكرة الويك اند أتغدى معاك.
قال لي: أوكي أمري لله، شوف يا تيتي، يا ارستقراطي، الشيء الوحيد العملتو مختلف عنك في التقديم داك انو أنا كتبت تلفون دكانا كعنوان للبنك وكلمت أخوي بمبلغ الاستيتمنت ونحن في المعاينة اتصلوا بيهو وعمل ليهم انو هو بنك الوحدة.
عديت معاهو ويك إند أسري رائع، بعد أوصلني للفندق كتبت في دفتر مذكراتي:
إفترقنا سنة تزعين، هاجر لامريكا وتزوج من أمريكية مهاجرة من جزر الكاريبي، فاتنة الجمال، وكعادة أهل الكاريبي مفعمة بالحياة. أنجب بنت (قنبلة) وولدين وعاش حياة أمريكية أسبانية خالية تماما من (السودانوية).
حدثني بعد الغدا:
- الاتنين وعشرين سنة الفاتن ديل ما عارف أوصف ليك جمالن بشنو؟
- زي حلاوة لكوم؟
- بس، لا لا، زي حلاوة قطن، وشفط ليهو جغمة كبيرة من كاس النبيذ الأحمر.
وأردف: حاجة واحدة اليومين ديل مطلعا ميتيني؟
- شنو؟
- العب الإتغدا معانا هسع دا، شفتو؟
- هزيت راسي من وراء الكاس الاحمر.
- اليومين ديل طالع ونازل مع بتي علنا، تعرف، مرات أقول أديهو طلقة في نص راسو؟؟ وكمان المعفن نهاية الإسبوع بجي ينوم معانا!
| |
|
|
|
|
|
|
|
|
|
Re: صداقة دافوري (Re: أبوبكر عباس)
|
Quote: القصة الأولى:
ابوي مات ونحن ممتحنين الشهادة، إتّا ما شفتو؟
- قلت ليهو شفت أمك حلبية
|
تُرمُس تُرمُس كبكبيه ... أقِلْبَكْ ( حلبى ) وألعَب بيه ...
ويا حلبي يا حلاب التيس ...!!!
اقوال سودانيه مأثوره ... تدخل ضمن عنصرية مقبولة و مسموح تداولها .... عكس الألوان الأخرى ...
إتّا يا بكور ... اللون السوداني المعتمد شنو عشان الزول يكون safe !!!
| |
|
|
|
|
|
|
|
|
Re: صداقة دافوري (Re: يحي قباني)
|
اللون الذي تم اعتماده أيام الانجليز وبعدهم خلال فترة سطوة الجلابة الثقافية والاقتصادية هو الأخدر الخمري، ومكتبتك بتاعت الأغنية السودانية الأمدرمانية وثقتو بشدة، وكذلك أدب القصة، شوف بشرى الفاضل بقول شنو:
قمحية لا كالقمح الذي نعرفه ولكن كالقمح حينما يكون قمحيا مثلها
عبد الرحيم حمدي قال كان في جلسة وجا واحد من الوزرا الجلابة قال ليهو: كدي زح كدا يا حلبي
قال قلت ليهو: يا أخي، السودان دا الحتة الوحيدة في الدنيا الفيها عنصرية ضد الناس البيض!!
| |
|
|
|
|
|
|
|
|
|
Re: صداقة دافوري (Re: أبوبكر عباس)
|
لأ لحظة طيب ...
السر دوليب كان قاصد شنو لامن قال :
اللون الخمري ليله
والخد الزهري ليله
يعني كانوا اتنين ... كل واحده ( ليلة ) ...
غير كده ما بتبقى ...
كيف يكون لونها ( خمري ) و خدها ( زهري ) ...
ولّ شنو ؟
| |
|
|
|
|
|
|
|
|
|
Re: صداقة دافوري (Re: يحي قباني)
|
أها يا بكري، شوف أخونا محمد عبد المنعم وناجي من الفيسبوك قالوا ليك زود للشفيف دا الشيك بتاعو.
حاضرين يا ناجي، بكرة بمشي بار البراكودا بأم القوين بجيب لي نبيذ أحمر وبجي أديك مداخلة بحلاوة قمر
غايتو يا بكري، بديك لحدي نهاية الاسبوع دا
ما زودتا، طوالي بمشي الراكوبة
| |
|
|
|
|
|
|
|
|
|
Re: صداقة دافوري (Re: أبوبكر عباس)
|
السلام و التحايا للجميع،،، على الرغم من أن تسجيل ثنائي و إعجابي بحبكة هذه القصة قطع شك مجروحة بحكم المعرفة و الخوة و الصحبة الشديدة لكاتبها الانيق،، إلا انني أشهد بأن مستشار كبير بأبوظبي سجل إعجابه بها و بملكات و قدرات أبوبكر و ذلك في محادثة هاتفية و صرح بذلك لصاحبها و الاسبيكر مفتوح على مصراعيه.. ياخ عثمان منقة شخصية لطيفة ساهمت كمحور جذب لهذه القصة و سبكتها بمزاج.. ذكرتنا بيت المال و ايامها الخوالي..
مجدد التحايا..
| |
|
|
|
|
|
|
|
|
|
Re: صداقة دافوري (Re: Faisal Saad)
|
عليك الله يا فيصل، كلمم بتلفونات المعجبين والمعحبات
يا اخي، لو خليت تواضعي ونزلت كميات الرسائل البتجيني؛ الناس دي بتبطل الكتابة
| |
|
|
|
|
|
|
|
|
|
Re: صداقة دافوري (Re: أبوبكر عباس)
|
و معجبين مول الإمارات الما بشربوا القهوة و تشويق سردك الإبداعي خدر جسمهم و كتل حيلهم اجيب سيرتهم ولا اجليهم يا شفيف.. ياخي رد على التلفون خلينا نشوف الخميس بكرة كيف و نتفاكر في بعض تفاصيل الحياة اليوماتية قبل المغادرة إلى أسباب اسبورو الخضراء و نعيد معاك مقدما و كدا..
التحايا لك و للجميع، غايتوا لو استمريت في هذا السرد المشوق على هذه الوتيرة، قطع شك ربك بعجنك قريب لو ماك معجن اولريدي..
| |
|
|
|
|
|
|
| |
أبوبكر عباس
يحي قباني
Faisal Saad
فيس بوك
تويتر
انستقرام
يوتيوب
بنتيريست