|
كتب الكاتب الفاتح جبرا المتوفرة بمعرض الدوحة
|
|
 Re: هههه حليل الزمن السمح (Re: عبدالحفيظ ابوسن)
|
حكاني استاذ سعد بابكر .. المعلم بالمدارس الاساس
قال لي جيت معلم جديد للدندر والاساتذة طلبوا من معلم كبير في السن يحكي لي قصتو
واصروا
المعلم كبير في السن ورجل ورع متدين ولطيف
وتحت ألحاح المعلمين حكي قصته
هي من تلك القصص التي كلما سمعتها تزداد ضحكا لها وبالذات لامن يحكيها صاحبها
| |
 
|
|
|
|
|
|
|
|
Re: هههه حليل الزمن السمح (Re: عبدالحفيظ ابوسن)
|
انا واستاذ فلان كنا صبيان ومعلمين جداد.. سمعنا قالوا في حواتة جن 25 بت زي القمر .. وعمرهن اقل من 20 سنة .. واجرن ليهن بيت هناك .. بنات صرر .. انا وزولي اتفقنا نسافر ليهن من الدندر .. وكتمنا الخبر
دغش قمنا سافرنا باللواري ..والدنيا شتاء ..ضربتنا ليك جنس زيفة .. خشينا حواتة تاني يوم .. جيعانين جوعة شديدة . وغربا ما بنعرف زول ولا بنعرف المدينة .. السوق مقفل..وبقينا نكوس بعد زمن واحد بتاع شاي ولقيمات فتح .حبسناهو لامن ولع نارو وهباها .. وخت طشت الزيت .. هو يطلع ونحن ناكل
شبعنا شبعة جد
اها قلت لي زولي شبعنا اها الدبارة كيف ..والسوق فتح تب
غرضنا دة يسألو منو كيف ويسألو منو ونقول شنو
في حيرتنا ديك .. نشوف ليك واحد جاي يتكسر وشايل قفة
قلت لي زولي
اها دة دليلنا
ونحن حسب غربتنا وقفناهو في نص السوق وسالمناهو
وسألناهو في بنات كدة كدة
قال لينا
شفتو الشارع المارق دة ما تفكوهو لي نهايتو ..بعدو بيت واقف براهو دة اياهو البيت
| |
|
|
|
|
|
|
|
|
|
Re: هههه حليل الزمن السمح (Re: عبدالحفيظ ابوسن)
|
مسكنا وصفو ومسكنا الشارع مرق بينا برة الحواتة .. وعينا هناك بيت واقف براهو ما جمبو ولا جار .. وفي السكة البتدخل البلد
مشينا علي البيت والدنيا صباح والشوارع فاضية وبلد خلا
تاوقنا بي قد الباب البنات مجدعات في الحوش .. بنات سوغار وسمحات .. ونايمات .. بساهرن بالليل وينومن النهار !
قلت لي زولي
اها الدبارة كيف
ندق الباب
دقينا زول جانا مافي
دحين يا خوي وقفتنا شينة قدام البيت دة . نرجع ونجي بعدين .. وزاتو ما جمبو شدرة ولا ضل شان تقيف تحتو
زولي ابا
قاطعين الفيافي دي كلها وتقول لي نجي بعدين والبعرفنا منو هنا هسة
في كلامنا داك نشوف ليك بص اوستن جاي علينا
قلت لي زولي نضاري ولا نزوغ
قال لي
نضاري وين ولا نزوغ وين .. والبعرفنا منو زاتو هنا
في غلاطنا داك البص وصلنا وجا جمبنا الشارع واحد
ألاقي ليك عمي اخوي ابوي راكب قدام وفي الجمبة المقابلانا .. والبص مدفوس جوة كلو اهلنا .. عوين ورجال .. عرفت بعد داك ماشين لي عزاء وجابم الشارع
عمي عاين فيني لا سلم علي لا سلمت عليهو
وكدني ووكدتو
الرجال والعوين كلهم بشباك البص تاوقو يعاينو لي
لا سلمو ولا سلمت عليهم
ومن دربنا داك للموقف وجينا راجعين
ومتحاشي عمي لكن تف مرة لاقيتو
والله يا عمي كنا ماشين لي استاذ زميلنا امو ماتت وماعرفنا البيت قلنا ندق الباب ونسأل الناس
قال لي وهو مدنقر
ما مشكلة يا ولدي الشباب بسوي
| |
|
|
|
|
|
|
| |
عبدالحفيظ ابوسن
محمد أبوالعزائم أبوالريش
فيس بوك
تويتر
انستقرام
يوتيوب
بنتيريست