ياالف مرحب بيك و بساط المودة ممدود و بالمحبة نلتقيك وجلسة محضورة و عامرة ان شاء الله و الف مرحب بى ضيوفك الكرام ____ و بسم الله نبدأ و كبر فى سطور الميلاد النشأة الدراسة و احلام الصبا
07-19-2015, 00:45 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
محمد النور كبر __________ ول ابا جلالدونا..حبابك وحباب الأصدقاء ..عيال ابا..عبد الرحمن طبيق ..يحي قباني..معاوية الزبير..وجميع الصديقات والأصدقاء ممن يتابع هذا الخيط.. كتر خيرك يا جلال..وليتها تبقى حاجة خفيفة..
طبعا محمد النور كبر..
زمن الميلاد: كان جوز الحمام تلاتة..الكمونية بالأمتار..السكسانية بالملوة..والقلب في الجنبه اليمين..الرصاص كان اسمو الخرطوش..بيستخدموهو في حاجتين: الصيد و الإعلان عن الفرح.. الموت كان حاجة نادرة لدرجة انو بيشكل نقطة مفصلية لتأريخ الأشياء..مثلا يقولوا ليك كبر ولدوه سنة جدي فلان مات..وهكذا..! مكان الميلاد بابنوسة..
النشأة..فيها شوية حظ .. يعني تجوال في مدن عديدة في امسودان..نحن كنا ساكين القطر..والطفولة عامرة بملامح مدن مثل كوستي..الدمازين..الرهد اب دكنة.. بابنوسة..واو..نيالا..الدويم..كادقلي ..لقاوة..الدلنج..لعبنا كورة شراب..وكورة بلاستيك كده هسع بقت مافي.. لمن يدقشها لوري ويفجرها..بنتم الباقي كمبلت..
تعليم مجهجه ومشلهت شديد خلاص.. بخت الرضا (سنة اولى وتانية) ، الدويم النموذجية(سنة تالتة ، رابعة ، خامسة) لقاوة الشرقية (سنة ساتة)..ثانوي عام (الدلنج الأميرية) سنوي عالي (كادقلي الثانوية الحيكومية/تلو حجر الطير)..كلية القانون جامعة الخرطوم..دخلت القانون بالصدفة.. ثم باقي تعليم (بتاع القراية ام دق) هنا في كندا..واخر حصة حضرتها كتلميذ في سنة 2004..رحلة طويلة وشاقة ..
احلام الصبا كتيرة ..بعضها اتحقق ..وبعضها ذهب في غياهب غبار النسيان..الحلم الوحيد المتذكرو .. من ايام الثانوي العالي كل حلمي اجي كندا..واهو جيت..! ..اما الحلم اللسع قاعد في خيالي وما اتحقق..انو اعزف جيتار اكوستيك..! قضيت الخدمة الإلزامية..ودفعتي صديقنا ول ابا الأستاذ عبد الرحمن طبيق..!
ودمتم..
كبر..
07-19-2015, 01:07 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
كبر ____ ول ابا يحي..حبابك يا صديقي.. كتر خيرك على الأغنيات الجميلة..وتحية لأستاذنا عبد الله الكردفاني.. طبعا اتلخبطت شديد..متذكر عبد الله عازف الكمان المجيد..و متذكر عبد الله صاحب التسجيلات في الإذاعة..مثل (ساءل عني مالك)..وشكلو ظهر بداية السبعينات..هل هم نفس الزول ولا نفرين مختلفين تماما؟.. طبعا الأسامي مرات فيها مشكلة.. يعني محمود الكردفاني..هم نفرين وكل واحد تجربتو مختلفة تماما عن التاني..المهم..
غنية توب الكرب الساده..ما عارف مناسبتها شنو بالضبط.. لكن عندي قراية من سكة تانية بتركز على (الساده)..وهي كانت ظاهرة لمقاومة عادة الشلوخ..فكان اتجاه الغنا تشجيع الساده اي الناس الما مشلخة (توب الكرب الساده ، الساده لونو خمري..الخ)..لأنو غنا التلاتينات والأربعينات تقريبا كان ماشي في حكاية التغني بالشلوخ.. نفس السكة..مقولة سمعتها عن اركون وكان بمييز فيها بين طريقتين لكتابة التاريخ.. لأنو المعروف انو التاريخ في اي حتة كان بينكتب عن العظماء وناس السياسة..لكن ناس التراب التحت من غمار الناس..تاريخهم ما قاعد ينكتب نوهائي..الشغلانة دي الغنا السوداني فطن ليها.. يعني بيؤرخ لحاجات الناس التحت.. اسامي الهدوم الكانو بيليبسوها..اهتماماتهم..افراحهم ..احزانهم..الخ..
في النموذج ده ، الكردفاني ، كعهده ، فارق الشايع في اذهان الناس..فقال (سوت قلوبنا نقادا)..والشايع (توب الكرب الساده ، الجابوهو النقادا)..ونقادا حقت كردفاني (قلوبنا مولعة نار منقد).. والنقادا الشايعة طائفة التجار في امدرمان..و فكرة كردفاني هي اعمق عندي..!
شغلانة (من حور الجنان)..كردفاني فيها فارق الشايع بطريقة محببة للغاية..وراجعت الأداء بصوت ناسها الأصليين (الثنائي ميرغني المأمون واحمد حسن جمعة) .. فالفكرة عندهم مفاضلة بين ثلاث درجات (ممكن تسميها للخلق): الحور ، انسان الكمال ، والملاك.. طبعا سؤال (هل) هو البيقود الناس لفكرة المفاضلة دي..البتكون في شكل سؤال حائر ومبهور..! كردفاني قام عمل حاجة عجيبة..وطريقة المخارج بتاعة الحروف بتديك انطباع حيرة عجيب..كأنو بيقول لينا (من حور الجنان) الوضع بالنسبة لي مأمون وما منو خوف ، لكن الخوف من انسان الكمال..!!
ودمت.. كبر
07-19-2015, 01:09 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
محمد البشرى الخضر _________ سلامات كبر ورمضان كريم سؤالي عن كبر السياسي, وتجربتك السابقة و الحالية وهل انضممت أوتنضم حاليا لتنظيم او حزب ولو امكن القاء مزيد من الضوء على تعبيرك الشهير : "شعوب" دار امسودان
تحياتي جلال و الضيوف ـــــــــــــــــــــــــــــــــــــ أعرف الحق تعرف أهله
07-19-2015, 01:15 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
شكرا كبر على الرد الوافى و كافى و معليش نجيك لى قبيلة القانونيين وقد كان المرجو فيهم كثيرا قبل و بعد الاستقلال و الان و غدا ولكنهم مارسوا السقوط فى مستنقع العسكر مثل سقوطهم فى مستنقع الطائفية .. المحجوب مثالا ... فى البال بابكر عوض الله الرشيد الطاهر بكر احمد سليمان سبدرات بدرية و كثيرون فى زمن الانقاذ هل يفتقدون .. القانونيون .. حس الريادة و القيادة ام هى طبيعة المهنة
07-19-2015, 01:17 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
كبر _____ صديقي..محمد البشرى..حبابك كل سنة وانت طيب.. كتر خيرك على الأسئلة .. هل تصدق يا محمد انا ما عندي علاقة بالسياسة نوهائي..!!!..وعمري ما فكرت في ذاتي كزول سياسي..!! ناس امسودان دايما عندهم طريقة تفكير عجيبة..يعني انت بقاري معانتو انت حزب امة.. تقوم تفكر ليك تفكير بطريقة مختلفة.. طوالي الناس بتفصل ليك جلابية وبتحاول تخطك فيها.. اتهمت باني بعثي ، شيوعي (دي من عمك حاج النور كبر شخصيا) ، حزب امة ..ليبرالي..منظراتي لحركات دارفور المسلحة..واخر الموضة الجماعة دايرة تركب لينا طاقية مؤتمر وطني..! لم اعمل بالسياسة في المرحلة الثانوية والجامعة..وايام الجامعة كنت ضمن حركة طلابية مطلبية وتعرفها جيدا..هي حركة المحايدين..! في انتخابات 1986 اديت صوتي لعمنا حبيب سرنوب الضو ، مرشح حزب الأمة..في الدلنج..ببساطة لأنو كان اكتر زول متعلم من زمرة المرشحين المعروضين ..!
قضيت في القاهرة ثمانية شهور وانا في طريقي الى كندا.. نلت بطاقة الحزب القومي السوداني ، لأنو في دستورو كان عندهم نص بنادي بعلمانية الدولة السودانية..وما كنت عضو نشيط.. لأن ناس الحزب هم اصدقاء من مدينة الدلنج..!..ولمن وصلت كندا ..انقطعت صلتي بالشباب ديل (سياسيا)..!
حاليا..ما عندي علاقة باي حزب ، مجموعة ، او فصيل سياسي سوداني.. ببساطة السياسة كما اراها التزام وبتطلب انك مرات تعمل حاجات ضد قناعاتك (بمبدأ الغاية تبرر الوسيلة)..اكتر من كده ، ياخي حتى المستوى الإجتماعي على مستوى الجالية هنا في المدينة القاعد فيها.. ما عندي بيها التزام أو نشاط فيها..!
السودان ما فيهو نضج سياسي عشان يقدر يكون احزاب ممكن الزول يضحي عشانها بزمنو وصحتو..!!
مفهوم شعوب دار امسودان ، نابع من فكرة التنوع الثر والكبير الموجود في امسودان ، خصوصا قبل انفصال الجنوب.. لأنو في مجموعات ثقافية عديدة ومركبة..من الصعب كلها تسميها شعب سوداني ..على الأقل المستوى النظرى..هناك تعدد لغات..حتى على مستوى اللغة العربية ، ما كل اهالي امسودان بتتحدث بنفس الطريقة..ناهيك عن لغات اخرى متواجدة لعشرات القرون..اضافة لتنوع الثقافات وتعددها.. عشان كده الخواجات قاعدين يقولوا انو السودان عبارة عن قارة مصغرة.. طبعا بلدان كتيرة فيها تنوع مشابه لبتاع امسودان ، لكن قدروا يديروا التنوع ده بصورة منضبطة ما بتخلي زول بعيد.. الكل عندو فرصتو في التمثيل والتعبير عن ذاتو سواءا تعبير سياسي او ثقافي او حضاري..! المفهوم جاي من مشاهدة طبيعية لتكوين امسودان..
ودمت..
كبر
07-19-2015, 01:19 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
حامد بدرى ________ رمضان كريم تتفق او تختلف معه كبر واحد من الاقلام الرائعة في الموقع لاغرابة في ذلك طبعا باعتبار خلفيته القانونية ومادام طلقتا السياسة ياول ابا مع انو صعب جدا تعال لينا حزب الكورة كن بخير وفطورك فوق العافية ولض امي كبر
07-19-2015, 01:20 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
جمال ود القوز _____ حبيبنا جلال والحضور هنا ... رمضان كريم عليكم ... نستأذنكم تدونا كبر ده شويه .....
سلامات حبيبنا وأستاذنا كبر ...
ماذا أضافت الهجرة لكبر .. وماذا خصمت منه على كافة الأصعدة .. لاني أرى ( ولو من زاوية تخصني ) .. أنه كان بالامكان أفضل مما هو كائن .. هل لو عاد الزمان القهقري الى الوراء هل كنت ستهاجر أيضاً ..
أنت تنكر ولعكـ بالسياسة مع أن الحاصل غير .. فجل تركيزكـ على الراهن السايسي .. .. لكن وفقاً لذخائر كبر المعرفية ولغتة الجزلة الفخيمة .. أين هو كبر الروائي من كل هذا الحاصل ..
مع إن طرحك السياسي يلفت إنتباهي كثيراً .. بالذات على المستوى العقلاني والمنطقي .. لكن هو في الآخر طرح وجهد يذهب هباء حسب وجهة نظري .. لأنه بلا إنتماء سياسي بعينه .. الم يحن الوقت لينتمي كبر لجهة حزبية معينة .. أو بالعدم يكوّن أو يكون نواة لحزب جديد .. يطرح رؤى وأفكار تعبر عن الراهن السياسي للوطن .. من وجهة نظر مختلفة وبرؤى غير ..
هل أثرت سنوات العمر التي مضت وأنت مهاجر .. شيئاً في تغيير إتجاه بوصلة الانتماء السياسي .. ( ولو الانتماء الداخلي الذي يخصكـ وحدكـ ) .. .. نحو اليمين أو اليسار .. في السودان .. أو في كندا ..
رمضان كريم ... عليكـ والأسره ... تصوموا وتفطروا على خير ..
وعيد مباركـ مقدماً .....
07-19-2015, 01:22 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
أستاذنا العزيز كبر رمضان مبارك عليك والعفو والعافية
انا جيت أسلم وسؤال على خفيف كده
التوثيق والبحث في التراث الكردفاني على وجه الخصوص والسوداني والافريقي بصورة عامة إلى أين وصل عند كبر وهل توجد إصدارات أنجزت او قيد الإنجاز في هذا المجال
لك التحية ولضيوفك الكرام
وشكرا جلالدونا على هذا الجهد المقدر
07-19-2015, 01:24 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
Abdullah Idrees ____________ إستضافة موفقة تعيد كبر الأديب الفنان "الوناس" الى قواعده .. سؤالي : ذكر كبر انه دخل كلية القانون بالصدفة ، لكن ما رأيته في هذا المنبر ، او انطباعي عنه ، كبر محامي بالميلاد ، واقصد من خلال طريقة إدارته لنقاط اختلافاته ، وقدرته على تطويع الكلام ، الصبر ، المثابرة على توضيح آراءه واقناع مخالفه بمداخلات مطولة ربما تفقده تركيزه في بعض الاحيان . هل تستخدم "تكتيكات المحامين في حواراتك ، وما هي علاقتك بالمحاماة حاليا؟ رمضان كريم جلالدونا وكبر والجميع
07-19-2015, 01:26 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
كبر _____ ول ابا جلالدونا..حبابك ياصديقي.. ليه كده ياعم؟.. هسع عليك الله بدرية سليمان دي لو قالوا ليها دافعي عن روحك باقي ليك بتلقى سكة؟.. سؤال محرج.. المهم.. القبيلة خشوم بيوتها كتيرة..و بعض اهلها وشيوخها كانت ليهم مواقف ناصعة.. امثال استاذنا عبد المجيد امام..!
وفي دولة طبيعية (دولة مؤسسات وقانون) ، القبيلة دي هي السلطة الثالثة..وبرضك عندها عود في السلطة التنفيذية.. ناهيك عن القطاع الخاص (المحاماة)..يعني هم عماد البلد في وضعها الطبيعي..وحرام نحاكم كل القبيلة بسلوك افراد اختاروا السياسة على القانون..!
عموما..افتقاد حس الريادة والقيادة ، راجع لظروف انو القبيلة دي ما عندها القدرة والمال عشان تعمل تاثير كبير..فمثلا تجربة الرشيد الطاهر بكر (بالمناسبة الزول دي انقلابي من نهاية الخمسينات) ، واحمد خير المحامي ، والمحجوب ، وعبد الله خليل ، لغاية منصور خالد وسبدرات وبابكر عوض الله. .وغيرهم وغيرهم..الناس ديل لمن ظهروا في الساحة كسياسيين..الواقع في امسودان كان معوج ومعقد شديد.. فحصلت ازاحة لفكرة القبيلة(بمفهومها الإثني). .وحلت محلها الطائفية (كانت سلطة ومال)..ومن كان منهم اشتغل مع الطائفية.. اكتشف انها فكرة ما بتودي لي قدام ، لكن التعامل معاها ضرورة بحكم الواقع. .بعد شوية حصلت ازاحة للطائفية نسبة لوجود فئة تمتلك القوة والسلاح (مؤسسة الجيش)..فعشان كده بتلاحظ بعضهم قام اشتغل مع المؤسسة دي (احمد خير المحامي ، بابكر عوض الله ، منصور خالد ، الترابي ، سبدارت ..احمد سليمان ، بدرية سليمان..الخ)..العمل مع المؤسسة العسكرية كان لظروف منها مكايدة في الطائفية التي لم تستطع انجاز احزاب سياسية فاعلة ..ومنها محاولة انزال التصورات (قهرا ) لأرض الواقع ..خصوصا الدولة الشمولية بتفتح مجال للناس الشغالة معاها عشان تتعلم الحلاقة فينا نحن المساكين ديل..!
في زمنهم..كانوا امام خيارين احلاهما مر.. فهم ، لأنهم مودرن شوية فكانوا اسقطوا القبيلة (بمفهومها الإثني ) من حساباتهم ..ومافضل ليهم الإ المفاضلة بين قوتين: الجيش (القوة)..والطائفية (البرستيج والمال)..فاختاروا الجيش..بمظنة يعملوا برستيجهم الخاص..! التسيس اضر بقبيلة القانونيين وافقدها كثير من مصداقيتها.. فكليات الحقوق والقانون في امسودان ، مثلها ومثل بقية الكليات..الناس من وكت مبكر بتنخرط في السياسة والتنظيمات السياسية السودانية.. عشان كده الناس ديل ومن وكت مبكر برتكبوا خيانة كبيرة..ده الوصف البينطبق على حال القبيلة في اخر خمس وعشرين سنة..
نعم بيفتقدوا الريادة والقيادة والمبادرة ساكت.. لأنهم ما عندهم قدرة على الإستقلال التام والمشاركة المتفردة في انجاز مشروع دولة مؤسسات..!
ودمت.. كبر
07-19-2015, 01:28 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
كبر _____ ول ابا حامد..حبابك.. كل سنة وانت طيب.. اخوك هلالابي من زمن الضب وزغبير..وشواطين القام قطعها لبيلية في حنانو ذاتو.. كنت بلعب كرة قدم..وشوية باكست بول..لكن سنين الغربة خلتنا نقطع شوية من متابعة الكورة..وتحديدا من حكاية تاصيل الأسامي..! عمنا واحد الله يرحمو ويغفر ليهو.. هلالابي متعصب.. ياخي ده لو ناس المريخ لاعبين في الفريق القومي بدور ليك فيهم..اها مرة السودان لاعب .والمذيع يشيل ويعيط (بابكر الحلو..بابكر الحلو).. عمنا طاخ ادى ليك الرادي شلوت..وقال عليك الله المدرب الحيوان هسع كان جاب باكمبا مش كان اخير..!!
جدا نبقى معاكم في حزب الكورة.. لكن شكلنا ح نكون زي استاذنا السر قدور..!!
سعيد بالمطايبة يا حامد.. كبر
07-19-2015, 01:30 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
كبر _____ ول ابا جمال..حبابك يا صديقي.. كل سنة وانت طيب.. كتر خيرك على المطايبة.. الغربة كانت بفهم غريب ..حيث كنا نظن اننا نحيا القهر الكامل والقمع في امسودان..وكانت الفكرة ان نختار قهرنا وقمعنا بارادة حرة تماما ولو لمرة واحدة (طبعا هو موقف مستهبل)..! الغربة اضافت لي فرقة لرؤية امسودان وحاجاتو بصورة مختلفة واظنها كويسة..اضافة لأنها منحتني السلام والطمأنينة..!.. اول اسبوع في مدينة ريجاينا..كنت بمشي الليل كلو في الشوارع.. عشان اقنع نفسي انو هنا مافي حظر تجول..ومافي دبابة واقفة تحمر ليك..ولا دورية..وكشك بسط امن شامل..! صحيح لم اجد فيها ما كنت احلم بيهو.. لكن لو عدت القهقرى..ح اختارها تاني..وح اختار كندا.. ببساطة لأني في امسودان كنت غريب وعايش في غربة عجيبة خلاص..! الخصم الوحيد.. الأسرة الممتدة ، واصدقائي وصديقاتي في مدينة الدلنج..ديل فارقين معاي شديد..!
نحن بعض من زمرة المتكلمين في امسودان وواقعها..وكل ما نحاول هو تقديم صوت مختلف وطريقة تخاطب وعرض للحاجات..وهسع ده لو ناس السياسة انكربوا شوية..ممكن ننسحب من الساحة..ونشوف لينا شغلة تانية..! شغلانة الرواية والقصة القصيرة ..ونهج جديد في كتابة الخواطر..دي الشغلانة الأساسية بالنسبة لينا ..لكنها ضاعت في الزحمة..الخربشات الموجودة..والتي افكر نشرها في شكل كتب تقليدية.. برضك فيها نقة ممكن توصف بانها سياسية الى حد ما..وعندي الأمر واقعية تخلط باسطرة بعض الحاجات.. وهو تيار موجود في الساحة..لكنه يمنح الزول فرقة كويسة للتعبير والقول..
بالنسبة للطرح ، فهو مؤثر.. بصورة قد تكون غير مباشرة ومرئية..ولكن في محطات تانية بتلقى ناس كتيرة اتاثرت بالحاجات..واكبر مكسب لو قدرنا نقنع المواطن يعاين للحاجات بصورة مختلفة شوية..! فكرة الإنتماء لحزب سياسي.. هي فكرة جيدة.. لكنها خارج حساباتي.. في العمر ده لو انتميت لحزب سوداني فمعناتو الإنتحار بعد اسبوع أو ينفجر ليك عرق..! اما تكوين حزب.. فدي ممكن تبقى في اي بقعة الإ امسودان ، لأن واقع امسودان ما بيحتمل حزب بالتصور الفي راسنا..!
العمر لم يؤثر في شكل القناعات والتصورات..بل منحها فرصة اطيب لتمتينها..في امسودان الواحد استوعب فكرة التنوع بصورة اكبر واوضح.. ولسع بيتفكر اي دولة تعمل على مجانية التعليم ، والعلاج ، وفرص العمل المتساوية ، وحق التعبير السياسي والثقافي المتساوي ، وتطوير مشاريع صناعية كبيرة..يعني فكرة العدالة الإجتماعية الواضحة والمتينة..هي ما اؤمن به..!
لم اكن قريبا من اليمين في حياتي..!
في كندا ادعم منظومات اليسار الجديد..وخصوصا حزب الديموقراطيين الجدد.. لأنو حزب قايم على تاريخ ترسيخ العدالة الإجتماعية في كندا..
ودمت..
كبر
07-19-2015, 01:31 AM
جلالدونا جلالدونا
تاريخ التسجيل: 04-26-2014
مجموع المشاركات: 9389
كبر ____ ول ابا الجنيد..حبابك يا صديقي.. كل سنة وانت طيب.. كتر خيرك على السؤال.. المقاربات موجودة..بعضها في شكل بحوث صغيرة ..وبعضها في شكل اوراق مكتملة..
المضحك يا صديقي.. الواحد دايما رابط روحو بمزاج اهلنا في امسودان..والسؤال الدايم هل الناس لسع بتقرا كتب؟..
التواصل في النت..بالرغم من انو بيختار نظام الونسة لكن فيهو ميزات كويسة وبيمنح فرصة اكبر للتفاعل..واستخدام وسائط يصعب استخدامها في الكتاب.. خصوصا الفيديو..
قبل يومين.. كنت قريت خبر عجيب..انو عدد الموبايلات في السودان سبع وعشرين مليون (في كندا ثمانية وعشرين مليون)..فدي حاجات مرات الواحد بيخطها في الإعتبار..
مافي اصدارة حتى الآن.. لكن الترتيب موجود لإحداثها..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جلالدونا
فيس بوك
تويتر
انستقرام
يوتيوب
بنتيريست