الصورة الذهنية التى نرسمها للاشياء دائماً تخالف الواقع

Quote: هناك خلل (مركزي) في إدارك (معظم) الزوجات لمفهوم (الرومانسية). وهذا الخلل ناتج من مركز (القياس) والمعايرة.. مشكلة قديمة شويه،يعني نحنا بنتعرّف على الرومانسية كيف؟ مصادرنا شنو؟ زمان كانت كتب (عبير) و(زهور) .. هسع المصادر بقت الأفلام والمسلسلات الرومانسية والزوج المسكين لابد يواكب المعايير الجديدة دي وإلّا... صاح ما كل النسوان بحضروا مسلسلات تركية لكن زي بقى في تيار بخلي أي واحده بمجرد المعايشه بتتأثّر.. الزوجة تحديداً مفروض تطوّر أدوات وعي بشعور زوجها نحوها..تعبه من أجل البيت،حمايته لها،حفاظه على عفتها وكرامتها.. بدلاً عن مطالبته كل ليلة بأن يقرأ لها من شعر نزار قبّاني..والترداد (القاتل) لسؤال :بتحبّني؟ الزوج ما عنده مانع يعمل الحاجات دي لكن ما كل يوم يا جماعه الزوج دا كائن مختلف مفروض الزوجة تبذل الوسع في فهمه..يعني تعرف كيف بعبّر عن إحساسه،وكيف بكون متضايق..ما ممكن تخلق ليهو مواعين محددة يفرّغ بيها عاطفته أو هو ما بحبّها بالضرورة. بعدين الزوج بحكم مركز القيادة مرات كثيرة بكون عنده هموم وغموم،مهمة الزوجة هنا مساعدته ومساندته مش الضغط عليه بمطالبات (مشروعة) لكنها في غير وقتها.. لو مافي تنميط للتعبير عن الحب الناس دي بترتاح مرات الحبّ دا بكون (باين) في العيون،في داعي تعصري الراجل عشان يقولو ليك؟ انا غايتو شايف من كمال نضج المرأة احترام طرق تعبير الرجل عن حبّه واغتنام أوقات صفوه للمطالبة بالمزيد.