أنا ما مابنساك* طيب وقبل أن تتورط في موضوع امكن ما عندك بيهو شغلة، فأنا اتحدث، في الحقيقة، عن أغنية "كل ما ذكرت جمالو "! ههه! المعنى واحد لكن أنا مشكلتي مع أغنية أحمد المصطفى دي مشكلة عريقة، زي أقول ليك شنو؟ النخيل على شاطئ النيل؟ نو No أو...إلخ! ولكنها اتحلت زمان هذه المشكلة. طيب دعني أكون صادقاً، لم تنحل هذه المشكلة قبل مضي 25 عاماً على الاستماع إليها شبه المتواصل، غصب عني، والمفارق تماماً لمزاجي، لأني كنت من عشاق ابراهيم عوض، وناس الجاز (ومعاهم شرحبيل)! وقبل أن استحدث طريقة للتخلص من مطاردة أغاني أحمد المصطفى لي، برز وردي فتعقد الأمر لسنوات. لكنني يوماً استمعت لأغنية أخرى لأحمد المصطفى اسمها "قلبي" اللي هي بتقول قلبي وبعدها تَرارا ري، فقلت سمح اللحن دا ما لو؟ امكن مشكلتو انو ما مستخدمة فيهو الأصوات اللي بنسمعها عند ناس الجاز، ناس الحداثة وبتاع اللي هم جات فوقيهم حاجة وهم قاعدين اسمها مابعد الحداثة! المهم قلت أديها صنة وأديتها صنة. وطبعاً الصنة مهمة لأنو لو فتحت باب نعم لكل أنواع الغناء ح تحتاج انك تكون أكتر من شخصين وهو خارج أمري الواقع! في رأيي، أحمد المصطفى، رغم أن صوته مميّز بالتقادم، لكنه محدود وغير مثقف، أقصد الصوت طبعاً، عشان أنا عارف نص السودان دا بيسمع أحمد المصطفى ك(نوناية) بس تهدهد جراحه حتى لو كان الواحد بلا جراح! وهذه الأغنية استعادها للحلبة أناس غيره من (شوّافين الغنا) الذين غنوها، نوع الواحد يقول ليك، كنوع من التفكير الاستراتيجي، والله أنا شايف الأغنية دي الناس ح تحبها ويكفي ذلك لواحد بتاع بيز أو حريف كوردات يقوم يقّعدها لك في المزاج الشعبي الهسع! عباقرة! كشفوا أن مستوى التطريب الموجود في الأغنية أكبر من طاقة صاحبها، مؤلفها، وهذا يحدث يومياً دون إذعان أصحاب بعض الأغاني عنها لمن يحسنون إليها أكثر منهم، لكي تروج وتدوم وتخلد أغنياتهم! يعني الواحد يصر أن يؤدي الأغنية بنفسه بغض النظر عن صوته، ودي مشكلة! أغنية "كلما ذكرت جمالو" لا ينبغي أن تستغرقك 40 سنة كي تفهم قيمتها فهي أغنية صادقة ونقية، وإنه لَمن العجيب ان يكتشف المرء بعد عقود من التعلم والتثقف والفلفسة، أن مزاج خالاته وعماته كان هو الأروق والأقرب لمعاني الجمال المتاح فهمها وقت أن خرجت مثل هذه الأغاني، وأن في الأغنية رقة وتوصيف في مقام الحُجة والمنافحة عن الجمال والعشق لا يدركها أمثالي ومَن سيأتون بعدي، إلاّ مَن وُهبوا حساً متجاوزاً للزمن، زمن العاديات. ----------------------------------------------------- * مجرد عنوان لمقالة صغنتوتية. إليك الفيديو الأصلي.
03-14-2015, 09:12 AM
Kabar Kabar
تاريخ التسجيل: 11-26-2002
مجموع المشاركات: 18537
لمن قلت انك كنت من عشاق ابراهيم عوض وناس الجاز ، كدت ان اقول(مصطفى مركب مكنة كبرينكس ولا شنو يعني)..!!
واحدة من فوائد حكم الجبهة الأسلامية في امسودان ، انها منحتنا المنفى..
والمنفى منحنا ، معاينة امسودان بصورة تانية.. ياخي حتى الحب الواحد ده ، لو الواحد لاقي طريقة..يقوم يعيدو من اول..!!
وانا يافع ، يا مصطفى ، سارح في الخلاء في ضواحي لقاوة ، ومعاي بت خالي واسمها حواء.. في الخلاء بتقوم تغني اغاني عجيبة خلاص.. زي ناس الزمان اشقاني مرة..!! وانا مارق من امسودان ، 1999، امي الثانية ، ام النسب عليها السلام ، طلبت مني طلب غريب خلاص.. انو اخلي ليها شريط كاسيت من مقتنياتي ، وكان الشريط ده بتاع ابراهيم عوض..اسمو (بيتنا نور)..فيهو اغنيات من شاكلة (الزمان اشقاني مرة) ، (زهرة نادية ) و (جمال دنيانا).. الخ..! ده زمن ما بعد الحداثة القاعدين ياباهو الجماعة واحدين..!
في سنة 2012.. جمعتنا جلسة نادرة وغريبة ببعض الصحاب هنا في مدينة كالقري..واحيهم جميعا (محمد عثمان سر الختم ، بكري الأحمر ، مرتضى جعفر الخليفة) ، ولم اجد ما اهديهم اياه سوى فيرشن نادر وعجيب من اغنيات ابراهيم عوض.. فخرج علينا صديقنا بكري الأحمر بنظرية عجيبة.. اسمها ( اللواري وشريط الكاسيت).. ومضمونها انو ناس بكري ديل ناس بحر ابيض (نظام بحارة وكده) كانت عندهم لواري بتمشي لغاية افريقيا الوسطى والكاميرون..والناس هناك ما بتتذكر منها غير شريط الكاسيت..ولمن تجي صاده ، بتجيب معاها اشرطة كاسيت من تلك البقاع العجيبة..!!!..نظام انسياب الثقافات بصورة جمالية بعيدا عن عيون العسس ، ناس شنو كده ما عارف..!!
واحد من الفيرشنات النادرة لأغنيات ابراهيم عوض..و بيقوم بادائها الفنان الشاب (الجيلي موسى)..وهو من منطقة امروابة..!
غايتو ، اكتر زول كنت بحب الإستماع ليهو وهو بيردد اغنيات ابراهيم عوض ، هو اخونا الفنان عصام محمد نور.. وبعده الجيلي موسى ده.. وهذا هو الفيرشن القمت عزمت عليهو صحابي في كالقري..ولو مصطفى مدثر عتب على كالقري ، قبال كباية الليمون ، ح نسمعوا الجيلي موسى ده..!!
الغنية ، من جمالها ، ابراهيم عوض ذاتو وقف من ترديدها..!!
كبر
03-14-2015, 09:28 AM
Kabar Kabar
تاريخ التسجيل: 11-26-2002
مجموع المشاركات: 18537
وقبال حكاية الحكامة صباح ، كان الليجند ابراهيم عوض..!! في افلام عمك اسماعين ياسين (بالمناسبة الأسبوع الفات اعدة الفرجة في بعض افلام عادل امام ، ومنها فليمين: مسجل خطر ، والإنسان يعيش مرة واحدة..!!!!)..
كبر
03-14-2015, 09:41 AM
Kabar Kabar
تاريخ التسجيل: 11-26-2002
مجموع المشاركات: 18537
Quote: ويكفي ذلك لواحد بتاع بيز أو حريف كوردات يقوم يقّعدها لك في المزاج الشعبي الهسع
كان ممكن اقول ليك ، كمال كيلا ح يوفيك طلباتك العجيبة دي.. لأنو قام اشتغل نفس المواصفات في اغنية مثل (فؤادي).. هنا الفيرشن بتاعو..
مافي طريقة لأستاذنا كمال كيلا..وان كنت اتمنى أن يؤدي لنا اغنية احمد المصطفى المذكورة هنا..
ولكني اثق كثيرا في اعمال واشغال صديقنا واخونا العبقري وليد عبد الحميد (وليد كوش)..وشفت ليهو شغل قبل كده مع اخونا احمد بركات..واثق جدا ان وليد بيعرف شغل كمال كيلا كويس خالص.. فلو قام رتب الغنية دي ، بطريقة اقرب لشغل كمال كيلا.. فح تكون حاجة تانية..!!
ولأحمد بركات بنقول.. بدل تستهدف جمهور امسودان ، وانت بتغني بعض اعمال احمد المصطفى ، ليه ما تقوم تستهدف جمهور العالم كلو؟..
وهذا لا ينفي موقفي المتطرف.. انو عز الدين هو الأقوى والأعمق..!!
سلام يا صديقي مصطفى..!!
كبر
03-14-2015, 07:37 PM
mustafa mudathir mustafa mudathir
تاريخ التسجيل: 10-11-2002
مجموع المشاركات: 3553
شكراُ يا كبرنيكوس على التداخل المدعوم بترسانة من الفيديوهات. يازول أنا الإذاعة كانت في بيت عمتي وابراهيم عوض دا غير انو ود أم در برضو كان بيجي الاذاعة. ولد، وقتها، سحسوح ووسيم ورقيق وبيحب يلاطف الأطفال جداً. إنت سمعتوا في الخلا! بس! نخش في الموضوع! مريت بتجربة مماثلة في التدليل على انتشار ونفوذ الغناء السوداني، غناء الوسط أولاً ثم بعد التحاق مردوم كردفان، في غرب أفريقيا. فبعد قطعنا نهر شاري على مركب كانو ضيق وشاهدنا قرنتيه أو اتنين وكان مزاجهم رايق فلم يلتفتوا للقشة التي كنا على سطحها، نزلنا في الكاميرون وبعد دقائق من المشي من المشرع لاحت أنوار مطعم ونادي ليلي متواضع وبمجرد دخولنا صدح وردي فشرعنا فوراً في استلام المكان مختمرين عقولنا لزوم السكسكة والشحدة. ولذلك استماع ابراهيم عوض في قيعة أو بين كثيب الرمال هو أمر يعد من دلائل قدم فكرة العولمة كونها مشروع انساني قبل أن يستثمرها الرأسمال لتصبح مصيراً كارثياً ينتظر البشر. أهو صاحبك كمال كيلا جضم هذه الأغنية لأبوداود، شغل جميل وبارزة فيه معالم الأفريقانية الموسيقية وهو مشروع صحيح ببساطة لأنه قائم على تقرييب الأذن من خصائص اللحن بطريقة لا تجدها في أغاني أحمد المصطفى الأولى، حيث صوت الفنان والمفردة المغناة هما أهم شيئ بينما أن الايقاعات والآلات النابرة كالبيز لم تكن موجودة، والنفخيات على استحياء. والآن وبعد افتراضي بوجود شوّافين غنا فلا بد قبل اثبات هذه الظاهرة أن أشير أن دورهم هو تلبية الطلبات التي أشرت إليها. فالأغنية عند المستمع تحتاج يكون فيها بيز لاين، أو مجازاً ميلودية بيز، وتحتاج للكوردات لزوم التطريب ودعم الوحدة الايقاعية. وهؤلاء الناس في الغالب ناس مواهب وليسوا ناس علم وقد يكونوا شرامة ساكت، لكن برضو عندهم حس انو الغنية دي، الشافوها دي، ح تخلي الناس يختاروا من يغنيها في حفلاتهم الخاصة، وبذا يتضح أن شوّافين الغنا هم برضو شوّافين الجيوب! لكن لابد من فصلهم عن تجارب قام بها عمالقة عندما قام كل من الكابلي، وردي، م الأمين، الجابري إلخ بحجز أغنية من أغاني الحقيبة. وهكذا تم نقل هذه الأغاني إلى عالم الحداثة، وبعدين ناس الحداثة ديل ما ممكن يتعمل فيهم انقلاب وتجي ما بعد الحداثة وهم لسع قاعدين، دا بالنسبة للسودان. وردي في قسم بي محيك لكرومة أبدع في استنباط مركبات ولزمات وجمل موسيقية ودا عمل جبار شديد. مشكلتك أنك لا تعود للتداخل عشان نقدر نخلص لحاجة مفيدة للقارئ وللموسيقيين!
03-15-2015, 05:02 PM
mustafa mudathir mustafa mudathir
تاريخ التسجيل: 10-11-2002
مجموع المشاركات: 3553
خلاص اتلميتو ؟ لاتخلونا سايطين في قديمنا ولا نلمونا في جديد .. عايزين حكايتنا تبقى زي ما قال منو داك .. السودان بدل ينضم للأفارقة ويكون في المقدمة .. انضم للجامعة العربية وبقى في المؤخرة .. نعمل شنو مع مزاج ولاد العاصمة الما دايرين ينفكو منو دا؟ عارف ح تقول هسه الجاب السياسة هنا شنو؟ حتى لو ماقلت الغنا سياسة واقتصاد وتكنلوجيا وعلوم انسانية .. أيم الله صدقت في ذائقة العمات دي .. كان ما مصدق انهن عاشن بوجدانن زمن العولمة اسمع الفيديو دا بمزاج الليلة.. ؤ تعال قول ليّ: في دينك الناقص فيهو شنو عشان ينزل بيهو احسن لاعب ديسكو ويكسر الواعين قبالكم؟ .
03-16-2015, 05:06 AM
Kabar Kabar
تاريخ التسجيل: 11-26-2002
مجموع المشاركات: 18537
قلت لي ، مصطفى ، عديت بحر شاري ؟..ليه كنت من كتائب توماس سانكرا ولا شنو العبارة؟..ههههههه..
حتة النفوذ دي مهمة للغاية..والغنا السوداني كان منتشر في افريقيا..والليلة لمن اعاين ليهو اكتشفت انو ده الغنا الوحيد الممكن تركبوا في ثقافات كتيرة غريبة عن وسط الغنا ده..وبرضك يمشي زي الترتيب..بس الحتة دي الجهة الوحيدة الما عارفاها او جايبه ليها خبر هي طبقة ناس المزيكا في امسودان..وناس امسودان في ذات نفسهم..! وممكن اديك نماذج لتجارب ناس تانيين اشتغلوا الغنا السوداني ، وادوهو نكهة خلتنا نحس بانو عندنا كنوز وما جايبين ليها خبر..تماما زي غنا عثمان حسين ، ما بتحس بتفاصيلو الإ لمن يشتغلوا زول/ة تاني..
نموذج اول..
زينة افيتموس..
شوف شغل زينة ده ، وشكلو مشروع تخرج ولا شنو كده ما عارف..بالرغم من انو اعتمد على اوركسترا فورمال تماما..لكنها قدرت تلتقط روح التطريب العالية في تجربة الكاشف برمتها..هي دي ما عندها علاقة بافريقيا اللهم الإ نظام محبة ساكت (الخلفية بتقول ليك القرن الأفريقي عديييل)..!
03-16-2015, 05:10 AM
Kabar Kabar
تاريخ التسجيل: 11-26-2002
مجموع المشاركات: 18537
نموذج تاني.. على بره..من الأرومو بتاعين اثيوبيا..بيغني (شذى زهر)..برميتها بتاعة ادريس جماع (ماله ايقظ الشجون فقاسى..)..
الأغنية دي ختيتها كذا مرة في المنتدى ، وقبل سنوات..وسألت ان يحذوا استاذنا الكابلي شغل تطريبي زي بتاع على بره..والكابلي كتر خيرو استجاب واعاد بعض الأعمال بمصاحبة فرقة اثيوبية..!
الأثيوبيين عندهم ميزة لطيفة جدا (بيعرفوا يظبطوا شغل النفحيات مع مساحات متوازنة للجيتارات بمختلف انواعها..عشان كده بحس بنبض مداري حار..يخليك تهوزز اطرافك طربا)..!
03-16-2015, 05:18 AM
Kabar Kabar
تاريخ التسجيل: 11-26-2002
مجموع المشاركات: 18537
شغل سيد خليفة مع فرقة اثيوبية..جات في واحد من مهرجانات الخرطوم للمزيكا..وبالرغم من انو سيد خليفة مرات بيحاول يخلي الشغل بتاعو تطريبي شديد.. لكن لمن دخلت ساكسفونات الحبش..الغنية بقت عندها هوية تانية ومحببة (طبعا لو سألتني ح اعتقد جازما انو شغل الأثيوبيين لغنية سيد خليفة هو روحها الأصلية المفروض تكون عليها)..!
ثم....
ليه الفنانين السودانيين ، في معظم اعمالهم قاعدين يلجأوا لحكاية الرصانة المصطنعة دي؟..ببساطة لأنو الجمهور السوداني ما بيعرف يرقص..والله صحي..!!..وفي نفس الوكت جمهور بتاع نقة ، عشان كده بيكون مركز على الكلمة اكتر من المزيكا..! هسع نحن لمن نقدم طلباتنا دي ، الناس ح تفهم شنو بالضبط؟..عني ، في العشرة سنين الأخيرة الغنا السوداني جاط جوطــة شديد خلاص..خصوصا الغنا القاعدين يقدموهو في الحفلات..لأنو بقى يعتمد على الة واحدة مركزية وهي الكيبورد (طبعا ما ح نحرج روحنا ، ونسأل حصل شفتو ليكم فنان عالمي عندو كيبورد في الفرقة بتاعتو؟..حتى لو استصحب واحد بيكون لدور ثانوي خالص..!!
الشكل الرسمي (بتاع ناس كلية الدراما والموسيقي) بيحاول يحافظ على ايقونة الأوركسترا المتكاملة القديمة..وده شغل كويس مافيهو مشكلة ، لكن نفس الفنانين البيشتغلوا في غنا كلية المزيكا ، اول ما يمشوا في طريقهم بيكون حمار شيخهم في العقبة..وبعد داك بيكون تحت رحمة السوق والمزاج وقلة التكاليف وشنو كده ما عارف..!
هناك شوية صومال ، ومورتانيين (مع انو رأي ناس مورتانيا ديل اخير يشوفوا ليهم شغل غير الغنا)..اضافة لفكرة اساتذة المزيكا الكوريين لمن جوا معهد المزيكا والمسرح في التمانينات..واشتغلوا حاجات كتيرة..ناس المزيكا بيسموها مرحلة (التكوير)..يعني تركيب الغنا السوداني في قوالب كورية..طبعا الكوريين كانوا فرحانين انو اعادوا اختراع الحاجات..ونحن فرحانين انو غنانا ممكن يتعايش ويتوطن مع مزاجات تانية..حتى لو كانت مزاجات من كوريا..!!
ونعود تاني.. كبر
03-16-2015, 05:50 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
يا أُستاذ مصطفى التحية ليك ؤُ لضيوفك الأفاضل الكرام.
عارفك محاربني، لكن يا اخي المصير دي ما بتتصاقع. والله صحي. حتي كان ما بتعرف التكتح في الموسيقى ؤُ في الكلمات ؤُ في التوزيع الغنوة دي لآمن تهبش وجدانك وأحاسيسك هي براها بتقولك أنا عالمية.
المصير أُغنية عالمية يمكن أن يتجاوب معها العالم أجمع...
أحمد المصطفى كان أسير للتربية الصوفية في الدبيبة والعيلفون من ناحية وارستقراطية آل أبو العلا (عوض أبو العلا) من ناحية ثانية غير إنو في نفسو زول هادئ لذلك ما كان عندو طريقة للتخفيف والصخب ورغم ذلك أبدع في تقديم تطريب عالي مستندا على الكلمة الرصينة والموسيقى الهادئة بدون زخم
في الجانب الآخر النمازج التانية بتاعة كبر دي بتثبت تماما إنو التأليف الموسيقي عندنا متقدم جدا برغم إنو من وضعوا هذه الألحان كانوا غير دارسين للموسيقى ما عدا القلة على عكس ما يشاع عن ضعف التأليف الموسيقي كل المشكلة هي التوزيع وتوظيف الآلات الموسيقيقة ودا بحتاج للعلم شوف المثال بتاع يا حنين
أنا بفتكر استخدام الساكسفون بالإضافة لإظهار صوت الإيقاع لمستوى محبب أدى الأغنية دي جاذبية كبيرة علاوة على مجمل أداء عافية والأوركسترا
أنا الأغنية دي مرات بكرر سماعها عشان اسمع صوت الساكس والإيقاع بس
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
mustafa mudathir
Kabar
محمد على طه الملك
معاوية المدير
أبوذر بابكر
حمد عبد الغفار عمر
فيس بوك
تويتر
انستقرام
يوتيوب
بنتيريست