|
|
 بيني وبينكم ياحكـــــــــــــــــــــــــــــــــــــــــــومة
|
07:23 PM Mar, 12 2015
سودانيز اون لاين
ودقاسم-
مكتبتى فى سودانيزاونلاين
الانتخابات استحقاق دستوري ... طيب ما اختلفنا ...طيب هل هي الاستحقاق الوحيد وللا في استحقاقات دستورية كتيرة حرم منها الشعب ؟
طيب لو حرمتوا الشعب من االانتخابات كاستحقاق دستوري زي ما بتقولوا .. منو الكان حا يسألكم وللا يقول ليكم انتو حرمتونا من الانتخابات ..
طيب لو أنتو فرضتوا الانتخابات على الناس الداير والماداير ، أليس هو استحقاق دستوري أن يختار المواطن موقفا مقنعا له تجاه هذه الانتخابات ؟
إذن لماذا كسر اليد والرمي بالرذالة والاتهام بانعدام الوطنية ؟
طيب كويس قبل اربع سنوات كانت هناك انتخابات .. بيني وبينكم ومافي أي زول يسمعنا إنتو متأكدين إنو الانتخابات ديك كانت نزيهة وشفافة وما فيها اي تزوير ؟
طيب تعالوا نسألكم ، الزبير والي الجزيرة كان منتخب شلتوهوه وغيرتوه ,, أليس هو حق دستوري لأهل الجزيرة الذين حسب وجهة نظركم انتخبوا الزبير بكامل الحرية والنزاهة ؟ أليس ذلك انتهاكا للحق الدستوري ؟
طيب إنتو ، وبالذات قيادات الصف الأول الرئيس ونائبه الأول والترابي ذاتو وعلي عثمان ونافع والجاز وحتى غازي وغيرهم ما بتتذكروا انتخابات نميري ؟
وما بتتذكروا إنكم كنتم معارضة وكنتم تقولون بعدم جدوى الانتخابات في نظام الحزب الواحد ؟ وما بتتذكروا إتنكم كنتم تجزمون مع الشعب أن نعم كلها مزورة ؟
وما بتتذكروا نعم بتاعة السادات ومبارك والأسد وصدام وغيرهم ؟ هل كنتم ترون أنها نعم صحيحة وسليمة ؟
طيب لو سالناكم ياتو نظام الفصل الجنوب ؟ أليس هو نظامكم ؟ من أطلق على حرب الجنوب اسم الجهاد ومن أقام عرس الشهداء ؟ ومن الذي أنكر ذلك في نهاية الأمر ؟
أنا ما عايز ارجع كتير وأقول كانت هناك حكومة منتخبة ديمقراطيا ، فمن الذي عطّل الدستور واقام نظاما بديلا لم ينتخبه أحد ؟
طيب لو قلنا قبلنا بالحكومة العسكرية ، لماذا تجرجرنا الحكومة العسكرية للعمل السياسي ؟ دعونا نحكم عليكم بأعمالكم كما قال الفريق عبود ..
نريد من الحكومة العسكرية أن تحول المواطن المسيس لمواطن يعمل ويصنع المعجزات ليأكل الناس وليصبح اقتصادنا قويا وليصبح شعبنا من أكثر الشعوب رفاهية ..
نحن شعب أرهقته السياسة والانتخابات فلا نريد مزيدا منها ..
يا جماعة حقّوا ما نتغالط ساكت .. الأمور واضحة وبينة وربنا عالم بما في الصدور وهو أعلم بالمتقين ..
نحن وانتو عارفين أن التجميع السياسي والتهييج وتسخين الساحة كلها أعمال سياسية ليست بريئة وليست طاهرة ..
وفيها الكثير من الريبة .. وربنا عالم بهذا .. ونحن وانتو عارفين كويس البيحصل .. وعارفين أن الوطن لا يحتمل صرفا على مثل هذه االأعمال ..
كل قرش عايزنو يمشي للحتة الصاح .. ويستفيد منو الوطن والشعب ويعود على الفقير بلقمة عيش بدلا من صرفه على كواريك وهيجان سياسي لا يفيدنا في شيء ولا قدرة لنا عليه ..
كدي يا جماعة أنا عايز أقول ليكم حاجة ، ما دايرين أي اجتماعات ولا حوارات ولا مغالطات ،
كل زول يرقد براهو ويفكر في ربّو ويراجع عملو ويراجع علاقتو بالآخر ويشوف هو بيعمل خير للوطن وللا بيضر بيهو من غير ما يحس ..
بعدما نراجع أعمالنا وأنفسنا ونوايانا وعلاقاتنا ببعضنا ، ممكن نجي نجتمع ونتحاور ..
بس الانتخابات دي خلوها أو أجلوها ، ما تستعجلوا عليها ومافي زولا باقي ليكم في حلقكم .. على راحتنا لاحقين على الاستحقاقات الدستورية ..
كدي خلونا نشوف كيف ممكن نتفق عشان الوطن دا ينبني بنوايا سليمة وبنفوس طيبة وبإخاء وتوادد بين أبناء الوطن كلهم ..
|
|
  
|
|
|
|
|
|
|
|
Re: بيني وبينكم ياحكـــــــــــــــــــــــ (Re: ودقاسم)
|
أنا ما عارف الشرعية الساكيها البشير دي شنو
وترشيحه هو بذات نفسه غير دستوري
اصله حاكم بالقوة
اليفضل حاكم بالقوة
(لحين إسقاطه بالقوة)
هو عارف والأمة دي كلها عارفة
إنه ما بني علي باطل الإنقلاب
فهو باطل
ما شرعية لمن إستولي علي السلطة في إنقلاب عسكري
فأحسن ليه يوفر القروش الكتيرة
إن شاء الله يصلحوا بيها مشروع الجزيرة
ولا يعملوا بيها سد صغير كدا في أي حتة
إن شاء في صحراء العتمور
ولا الخطوط الجوية أولي
(علي الإقل المسؤولين يسافروا بيها للإجازة في لندن)
| |
|
|
|
|
|
|
|
|
|
Re: بيني وبينكم ياحكـــــــــــــــــــــــ (Re: Nasr)
|
والله يا نصر أخوي كل أمنيتنا الناس ترتاح وتقعد محل قاعدة
ولو في شوية قريشات ممكن ننفع بيها البلد
ونختّها في جتة محتاجة ليها
بس ياريت يسمعوا ويفكّروا ويقدّروا
بلاش يستمعوا لأقوال المعارضة
ليستمعوا لأنفسهم ولضمائرهم
ثم ليعودوا لنا بنتيجة التأمل في الخروج
| |
|
|
|
|
|
|
|
|
|
Re: بيني وبينكم ياحكـــــــــــــــــــــــ (Re: حمزاوي)
|
الخال حمزاوي
قلنا تقدم العمر وكبر السن والاقتراب من لقاء الله ربما يؤثر في بعض الناس على الأقل
فوجهنا خطابنا إلى من يخشى الله ويتقيه أن ينظر في أحوال نفسه ويرى أين هو من الله ومن الشعب
الغرور الذي يصيب النخب ناتج عن التقارير الكاذبة .. لكن الله لن يقبل هذا
| |
|
|
|
|
|
|
| |
ودقاسم
عبدالعزيز عثمان
Nasr
فيس بوك
تويتر
انستقرام
يوتيوب
بنتيريست