|
|
|
 Re: مع الشاعر محمد خير الخولاني (حبيب اروى ) في (Re: Dahab Telbo)
|
أروى ..
0
عقاب يا أروي أزقيكي
أبّل إحساسي وأرويكي
أفرتق روحي وأبنيكي ، وترفضّي
بي دمعاتي تتوضئ
وأنقلا السما الأحمر وأتضّور
بيك أحلامي تتسور
وأتقريف علي دافيكي
وأتريق بلاكي وفيكي
وأتفرج علي الدنيا السماحا عِدم
وأتبرد بالألمي القُراح وقِدم
وأدرج مع الولد البدور ليه هِدم
لبن الطير مِنو الحارِيه
أريت الحال ده ماحالي ، وليك خطواتي سباقة
بِتين يا أروي نِتلاقة
دمعة عيني براقة
حِني عليّ وأرخيني
مِنو الفي الدنيا هاميني ، وما طار ليّ
أدخلي عليّ ..
مِن بابي البِجيب الريح مع الشهقة
تعالي رويحتي مُنفهقة
قعدتْ أظن قِده التبريق بي هِمية
وحاة حبوبتي ( مطرية )
لو شُفتي الحرامية
دحروني من قلبي ، ختفوا القِميرِية
وخز الإبر قاسي ، خدشوه إحساسي
كيتاً وهاشمية !
لكني بيكي سَرحَ ، نقزته في صوتِك
فِجة وتين القلب ، غافلني بارودِك ..
مُستني في الرملة ، والرملة سفاية
وسعة عُيون آية
والآية حاوطاني ، وكِيعي كراني
مِن حِسو حكاني ، وخزني وِجداني
الدمعة كبت شّب ..
لاقوني يا أروي
أبالة شافوني
لاقوني في اللفة، مِن عِندي دلوني
والعندي ماكفه
سألوني عن قلبي
لكِنو بيك هفه !
لكِنو يا أروي ..
إحساسي كان ثروة
صابتني ليّ قروة ،قبّل صِبح بروة .
غبشان معاي همي
فِجيني وإنصمي
أديني ليّ ألمي
أتوضئ جُرح الليل ، مُصلايتي في دمي ..
راجيكي في الضفة
لكِنو يا أروي ليل الهموم أدفأ
قِدريش نُتوف القلّب
خليني أتكفه ...
الخرطوم 1996م .
| |
 
|
|
|
|
|
|
|
|
Re: مع الشاعر محمد خير الخولاني (حبيب اروى ) في (Re: Dahab Telbo)
|
أروي 1 ..
******
يا إيدي شيليني ، ختيني بيت الله
خيتي يا ميرم ، خليني أجترة
أحلامي وآلامي .
شوفيهن يا الحُرة ، زادوهن أوهامي
إضطري حُوطيني
برادِك الصيني ، أقمجي عبيني
كِن مُعته دليني
براحة دِرّيني .
نُقارة لُب الليل ، صبّايا ربوها
أروي جابوها
نقوها مِن قلبي
تكِنه طبوها
قادوها مِن جنبي .
يا إيدي شيليني ، لي أروي وديني
خليها تتغبي ، تتحاشي عُرفاني
تجيني تدّبي ، توقِدا نيراني
أشوفا كِن خِلسة
في عضمي تندسه
وتشوي مُنصاصي .
يا أيدي شيليني
فِليني مِن ساسي
أروي حبيتا ، عرتني إحساسي
وعُيوني سِرهن
دموعي نقطن سرسكن عِرن
قلبي كم مِحِن
كم مرة غاب وجاب ، مابِحمل البِدن
محل ماشاف وراد بِنز عديل دِهن
خلوني مِنّهن ..
براي بعِيش أليف
بعِيش خرِيف هواي
بقود بصّيرتي فوق
ما بتلفِتْ وراي .
ضليت مِن الوطن
ماأتفه الزمن وخرابو للبيوت
قام سوي ليّ عُروض
لكِنو مافي ظن ، ماعِندي فوكي عود !
وحظي فيك تعيس
بِعتيني بيع رخيس
البيّ مِنو البِحِس
للذكري يوم ألز
وأقد أسوق غُناي
وأكِس بي صوتي جاي
جاي ومرة جاي
وأفنّه للوراي ..
محبوبي خان هواي
لاحسّ لافطن
لامرة بيّ رطن
خلاني للأذي وبلاني بالشجن !
يا إيدي شيليني
أبقي ليّ فنن
يا أيدي شيليني
ضليتْ مِن الوطن .
الخرطوم1995م .
| |
|
|
|
|
|
|
|
|
|
Re: مع الشاعر محمد خير الخولاني (حبيب اروى ) في (Re: Dahab Telbo)
|
أروي 2 ..
*******
الوردة في لُبي
قام الشوق نقاها قِرمته
الموية في بالي كشفني غُطاها مِحِنته
يومداك يا حِلوة حِلمته
ملين في إيدي عِدمته
عِدمته نواصي الحِيلة
هُمومي لِقيتا تقّيلة
وحُزني مُعبّه
ما العمرِ كِمِل يوم شبّا
غفلني سكني الهم ، قايطني الروح بي كم .
قايطني بي كم إجمالي
خِبرني وبشتن حالي
سديت شُباك الدنيا يوم ضاقت بيّ الغُنية
مِن حُزني قلتْ كفاي
شديت وسرجتْ قفاي
مُراح هنا طير ، عجبو غُناي
طويرة بي صوتي عاطت وااي ، مكني حنانا
قلبي ملاهي وفوقو جُبانة
ضيّق ضِيقة .
قلبي في إيدي وروحي غريقة
مهيضة في ورطة
شالو حبيبي وغيرو رفضتْ
رفضتْ بديلو
ولا هميت ْ بي زول مِن غيرو
زول زي نهجو مافي مثيلو
وتب مافِيّه .
ده زول مسكون ملان حِنيّة
رِموشو براهِن يِعادلن مِية ، أو مايزيد !
عينو بُحيرة وقلبو مُحِيط
بي زيدي مُشرّب .
وأنا يا طير حيران ومُعذب
حظي عبوس ودِيمة مُشقلب
مرصوص بين هوة وغيمة
غيمة رِهاب
والهم فتّرني شربني شراب
بشتن روحي ، خربني خراب
خلاني ضُلُمة .
رُعافِك دِيمة يا حِلوة بشُمه
رُفاة أحلامنا بُكرة بخُمة بشِيلا زوارة .
إلا ياحِلوة قلبك مالا
سنة أخدوكي جاتني إشارة
رِكبت جناحي دليتْ في نيالا
شِن خبرني في ناس غدارا !
بي أثمالا هاكي قّليبي
قلبي في إيدي وإيدي في جيبي
في جيبي الغُنية
والغُنية قلبها طِين . يا ريتني أنجمه وأنلم علي الغايبين
لازاد سوي الصبوات
ناير ملان بي حنين
وين روحي غلبانة
روحي في دمي ، روحي عكرانة
رحيقا إنحته .
خلوني أنجمه ، وأشتما ريحتا
لكِنو لو تفهم هذا النِدا الوردة !
الوردة صحّتني أسقتني شاشيبه
الدنيا دقتني ، شالتني شعقيبه
دمعي إتنصل ، قلبي بي عيبه
مليان شقا ومقدود
صبوا الحنين فوقو
ركعتْ طب صليتْ
مُتوضئ بي شوقو
كِن للعشم مفقود
بي قفاكي يا أروووي
رويحتي دايرة تفوت
بِقفاكي يا أروووي
لامِن جغمني الموت !
الخرطوم . نيالا1998م .
| |
|
|
|
|
|
|
|
|
|
Re: مع الشاعر محمد خير الخولاني (حبيب اروى ) في (Re: Dahab Telbo)
|
أنا دمعة ببكي الود ..
ّّّّّّْْ،،،،،،،،،،،،،،،،،،،،،،،
حِليلن أروي وأخواتا
حِليلو دموعي النقاطة
كم دمعة تبكي الود ، مُتحدة تجري أناقة
كم روح بتنقسم أي روح جِسم ، تتحري وين رِفاقا
ماببرر النضم كِن ما مرق طلاقة
وسِكُوتنا يوم نقِره ، بِكون نفق نِطاقة
شق الدِيار عِلم ، حُسن خير بُطاقة
أنا دمعة ببكي الود ، بي حُرقة بشكي الفاقة
ودموعي ليّ بِشيرو
بتين يحِن أميرو ، يشيلني فوق .. أشيلو ، يتم بعض جميلو ؟
نلوجو محنة المعني يتِم
والأشواق نرسُما رسم .
رُمانة حِليوة جمالا وسم
حرير ملمسا
خِصِرا رِزِم .
مِتنو كرزة
قادر الله نفخ عززا
بوين من نارا نفوت نِندسا بدون شمِتا
بِتين نِدارك نلقي مِحِتا
ماتدق يا قلبي ووصف خِتا هاجم شِيلا
أو بالكاد أعزما مقِيلا
وخلي مقِلتك لُب شدّرا
شوف ككيف حامِشا فتيلا
وعُزراً ضاق لذيذ سمرا
وحِيدة شق في الدور مثّل الحنان طمرا
رهيفة وين ماتدور فايتا البنات تقلا
نديانة دِيمة حُضور ، السماح غُلب كتلا ، وتكاني قِمتا
كم في العذاب بِتا ؟
يا قلبي إتاقل إستني جكِتا
أوعك تكلم زول حلِفا زِمتا
حُزنك وكلو يهون ، فاتورتو شرِطا
باكر تشُمها شم ، لامن تنقِطا ، ترفِدا حِنينون
أوعك تكلم زول خلِي الحدِيث موزون لو مرة نظمتو
أنا دمعة ببكي الود ، وقليبي راضي قِسمتو
حق الحنين عِدِمتو ، ومسكتْ في الخشب
كرِيم كتير وهب ، (بخت الرِضا ) الدهب
نِنختا وين كنب . راجينا شوط مزار
أنا كيفو حظي شين ومعني بالجمال . كم دمعة تبكي الود
تطري الحنين لابد ، كفيف بِصِلي البال
كِن دقو ( قيدومة ) وتمموا الأدوار بخت الرضا الحلال
ننختا وين كنب وأحلامنا كيف تُدار ؟
مدارنا وينو سمتو
طِريفنا كيف نغمدو
أول جواز نحمدو ، نخبرو من بِدايتو
كريم كتير وهب عجمنا بي حِمايتو
وسمنا خيل مُسافرين
قلوبنا كالمواعين
الحب ندُخلو مارقين
مُروقنا منو دنكوس
في بالنا ياتو منصوص
غير ( نيالا ) ياتو محظوظ
مرات هي الإبرة وأنا الدبوس
نشيلو بعضنا قِيام وجلوس
الريدة كِتابا نشغُلو نصوص
أنا صافي لبن لكِن مخصوص ، منقوص حق شوقي .
يا منقوش في قلبي وعاطل عامل ميت فوقي
كلما تشوفني تبدا تقوقي
خايف من سُلطاني ولسعة شوقي
أو تعبرني تتلتلني .
شيلني أشيلك ، شيل شيلني ، شبشب قلبي ولخبتني
كلفتني غمامة
شوف دمي نبت بتن إترامي
نزنز مُتجاري ولاد أمي
ناس بالي وبنك .. دمي
يا دمي حاضرني ، لاحقني وين طاير ، طاير مُفوتني ؟
شوف بختي وين مايل خاسر مُحمدني
بي جُرح تاني جديد ، جرح سعيد وبخيت
في كل جرح رصيد ، قصيدة شافية وشايل
تكية لوح ومِحاية .
يا دمي إتقاصر عاين وراك غاية
وجُوهنا قالوا سُيوف وقلوبنا تُحفة مِرايا
يا دمي إتقاصرأرفع معي الراية ، أرفعا فوتني
فاكر براك طاير زاحف مُحوتني ، مامعني بالخُوة
القيلا والقالا .
إنشاءالله ولدمي العافية تتوالي ، تغشانا وتسمي
الريدة كِن بالدور
و الخُضرة ست دمي
قسماً برِيد نيالا
عظماً برِيد أمي ..
أنا أمي ست إسم فوق دمي تنقسم
أنا دمعة ببكي الوُد شان نيالا تبتسم !
نيالا ..
سبتمبر 2009
| |
|
|
|
|
|
|
|
|
|
Re: مع الشاعر محمد خير الخولاني (حبيب اروى ) في (Re: Dahab Telbo)
|
نيالا البِحير ..
ٌٌٌٌّّّّّّّْْْْْْ^^^^^^^
أبشرِي قولي خير
نيالا يا البِحير ..
بفرِكي بشوفكي
بشوف شبابي فيكي
كِن بلقي ليّ مقيل
الخضرة يا أم نواني
شوقكي قام رماني
تكاني في أحزاني
قِرمتا لي خياني
بِتين أتهني بيكي
تطِلقي لي عِناني
وقلبي ليك أفرِو
أروضك في ضُلو
لحدي للفجُر
وريدي ليك أقِرو
أتمِرك وأدرو
حرمان بدون أجُر .
الشافكي والله شاف
طُويرتي في خِديرا
تِتوسد العفاف
عُيونا ديل بُحيرة
رُموشا بس ضِفاف
وليل مابعدو ليل
إتوسد السدير
نيالا يا البحير ، أبُشري قولي خير
قومي يا أم نواني
أشوفكي بس ثواني
( شبه كي ) كفاني
ريدكي كِن خِتاني
طفاني في جِناني
النار بشاتي فيها
بصلي في كياني
بتغطي بي شرارا
شوفي ليّ جيهة
لِميني في البقارة
جيهة أي جيهة
خليت عِني البصارة
لازمت ليّ تكِية
و شِلتا مُستخارا
أحزاني حُمتا فيها
يوم كاكت النُقارة .
بقارة فرِيكو دلا يين
كجرتو وين ضراكو
حظي أصلو شين
زاملوني هُب معاكو
وريدي مِنو هاكو
دا الريد حرام بلاكو
حرام بلاكو عِيشة
دلوني وادي بِرلي
أحفرو ليّ مشيشة
وتِرو مِن همومي
كِن غباّ قلبي عِيدا
بملا كُله ألمي
وبدخل علي القصيدة
بسقي نيالا دمي
و بقعد علي الحديدة !
نيالا .. 1997م .
| |
|
|
|
|
|
|
|
|
|
Re: مع الشاعر محمد خير الخولاني (حبيب اروى ) في (Re: Dahab Telbo)
|
شكراً يااروى لمحتك
لازال الدنيا بخير
منديلك ايوا وهبتو
فستان لبنات الطير
بنموت يااروى عشانك
وبنعيش فى عشان الغير
***********
************
لو يسمح الزمن
نلاقى سكره
منتظرة فى الركن نتلاقى كف حضن
ضمه من جديد
ونجدع الهموم
الصباح رباح
ناعم نعيش فوقا
***********
***********
جلدى حق قليبى بسوى ليك حجاب ..!
| |
|
|
|
|
|
|
| |
Dahab Telbo
اسماعيل عبد الله محمد
صلاح شعيب
فيس بوك
تويتر
انستقرام
يوتيوب
بنتيريست