|
|
 المعارضة أنواع والمعارضين خشم بيوت والكيزان أحمد وحاج أحمد واحد
|
12:50 PM Mar, 08 2015
سودانيز أون لاين
عادل الباهي عبدالرازق - زي أبن بطوطه رحال
مكتبتي في سودانيزاونلاين
من خلال متابعتي للحراك السياسي السوداني علي الطبيعة او من خلال الشبكة العنكبوتية المعارضين انواع فمثلا في معارضين ماخدين الشغلانية قشرة
ساي زي ما الواحد بيقشر ويكون ماشي حفله اها في معارضين قشرة ساي بس عشان يقولو والله الزول دا معارض بيقعد في اي بيت بكاء او صاله عرس او امام جهاز
الكمبيوتر وينعل سلسفيل الحكومة لكن لو ركزت معاهو ربع ساعة حتعرف انو ماشي مع القطيع ساي وبيكون اخر مرة شغل دماغو من زمن جدادي يلقط الحبه ويجي
يقول ليك كلام كبار كبار زي ، نهتف ونحن في اسرك وترجف انت في قصرك و يكون لا شاف أسر ولا في زول شغال بيهو الشغلة وفي معارضين عندهم مظالم شخصية
علي الحكومة فيعارض النظام من منطلق شخصي بحت لا يحركه قتل المدنيين في دارفور وجبال النوبه وبقية المناطق المشتعله يمر مرور الكرام في هذة الاخبار التي توثر
في اي بني ادم سوي بس الحاجة الشايفا انو الحكومة دي شردتو من عملو والخ من انواع المظالم الشخصية وهناك معارضين الواحد فيهم عاوز يصلح وضعو المادي دا كلو همو ،
يقعد يشاغب ويشاغب يقبضوهو ناس الامن والناس تقعد تكورك في المنتديات والمنابر والوسائط المختلفه تضامنو تضامنو تقوم تسمع بيهو المنظمات الغربية يتخارج لاحدي
دول الجوار ومنها يفك البيرق بفيزا لاحد الدول الاوربية او امريكا وبعدها فص ملح وداب ، يسد دي بي طينة ودي بي عجينة ويشتغل بنظرية جحا
بعد ما مرقتا من بطن امي إنشاءالله تنسد والله صحي .
وصنف رابع من المعارضين اها ديل ماخدين الشغلانية بالوراثة شب علي وش الدنيا وجد ابوهو معارض اصبح هو معارض بيعارض في منو ولي شنو
هو زاتو ماعارف المهم معارض وبس قبل الان حدفني حظي العاثر في احد بيوت العزاء ووجدت شاب في بداية العشرينات يكيل للنظام ويشتم لمن عروقو
اتشحطت وقرررربت تنفجر ، الود لا أنكر أثار اعجابي قلت كدي النطق معاهو الحنك وبعد نصف ساعة طق حنك اكتشفت انو الزول دا خرج مع عائلتة
في العام 91 وعمرو آنذاك ثلاثة أعوام ، قلت كدي النحسن الظن بيهو إحتمال بيعارض منذ أن كان في رياض الاطفال لكن خابت ظنوني رياض الاطفال زاتا ماشافا
علي حسب كلامو هززت راسي وقلت صحي حواء ولادة من بطن امو جاء يمتهن السياسة .
صنف خامس من المعارضين ديل البيطلق عليهم مغفل نافع وهم بيخدمو خط جهاز الامن ، جهاز الامن يشتت ليهم الاخبار المفبركة والتي سوف تكتشف
أنها مفبركة بعد ذلك وهم يلقطو الخبار دي حبه حبه من الفيس والواتساب وبقية الوسائط والواحد يشيل جلابتي في خشمو ويجي جاري وجدتها وجدتها
وبدون مايشغل كركورتو ينزلها طبعا أذا كان المتكلم مجنون فالمستمع عاقل وبعدها يجيك القاريء يقول ليك والله ناس المعارضة ديل كضابين جنس
كضب ويلم البيض كلو في سله واحدة .
وفي صنف من المعارضين المخلصين أعتقلو وعذبو وشردو من وظائفهم وديارهم ولكنهم يتسامون فوق الجراح ويتناسون مظالمهم الشخصية
من أجل الوطن يعارضون بشرف ليس من أجل انفسهم ولكن من أجل الوطن فلهم ننحني ولهم ترفع القبعات ، أها المعارضين الزي ديل يبنو وغيرهم يهدم ماتم بناءه .
أما المعارضة حدث ولاحرج بعض الناس لايفرقون بين معارضة النظام ومعارضة الوطن ولا يري أبعد من ارنبه انفه يجيك أحمق يقول ليك الحكومة الامريكية
قالت ماحترفع العقوبات عن السودان ، طيب هي العقوبات شنو ؟ مش ياها منع الشركات الامريكية من التعامل مع السودان في جميع المجالات .طيب المتضرر منو ؟
ما أسرتي وأسرتك ، عمي وعمك ، والمواطن الغلبان دا ، الكيزان في يدهم الكاش والكاش بيقلل النقاش لو مرض أحدهم بيتعالج بالخارج وبيركبو خطوط الطيران
المحترمة اصلا سودانير البتودي التوج دي مابيركبوها . دي الانانية ذات نفسها المواطن بالداخل تبقي عليهو الحكومة من الداخل ونحن من الخارج ؟ لو مفتكرين
العقوبات سوف يتضرر منها النظام وليس المواطن نبقي غلطانين ، العقوبات دي ليها سنين أمشو شوفو البيموتو في المستشفيات ديل او البيموتو بالجوع فيهم كوز ؟
أو يجيك درويش يقول ليك ماتحول قروش لاسرتك في السودان لانو لو مادخلت عملة صعبه للسودان البشير وزمرتو بيسقطو وبيفكو البيرق يأخ أتلهي . في أسر
بالداخل لا مصدر رزق لها غير تحويلة أبنها المغترب أو المهاجر بيأكلو منها وبيشترو منها حبوب السكري والضغط ، أقوم أضحي بأسرتي عشان البشير
يفوت ولا يقعد ؟ البشير طائر والمعارضة في رجلينو .
أها بعد كدة كلو واحد يجيء يشيل الطاقية الزابطا مع راسو .
أما أذا دار محور سؤالكم عن بني كوز أحمد وحاج أحمد الله لا تاجرهم ،وجهان لعملة واحدة يزكر الخزيء والعار اينما زكرو بس الحاجة المحيراني
قوة عينهم يأخ ديل عندهم عين قوية بشكل ، رئيسهم قبل كم يوم قال للناس في القضارف عاوزين نوديكم الجنة . بيكون قاصد جنة الاطفال ؟ يأخ خلينا نشبع فيتريتا
في الاول ، يعني نمشي الجنة جيعانين ؟أرواح الناس الماتت في دارفور وجبال النوبة والنيل الازرق وجنوب كردفان وكجبار وغيرهم كلهم فوق
رقبتك يا اب رويس وبرضو تقول الجنة الجن اليطبوك منو في ام ضوبان ، يأخ أقتصاد البلد ماشي نحو الهاوية ،عملة صعبة يستوردو بيها السلع
الاساسية مافي لاقمح ولا غاز لا يحزنون وبرضو فاتح نفسو وعامل ليهو حملة للانتخابات يتنطط زي القرد من ولاية لولاية ومسبقا الكيزان
عارفين مافي زول راشد عاقل حيمشي يصوت للبشير وفي النهاية حيخجوها طيب لزوم الحملات والتبزير شنو ، قروش الحملات
دي اولي بيها المواطن الغلبان وخجو خجكم بالتخج مصارينكم .
|
|
 
|
|
|
|
|
|
|
|
Re: المعارضة أنواع والمعارضين خشم بيوت والكيزان أحمد وحاج أحمد واحد (Re: محمد البشرى الخضر)
|
Quote:
هههههههههه
مبروك يا ود الباهي
تمت ترقيتك من رمادي ساي لكوز مندس كامل الدسم
بوستين تلاتة زي دا ونعمّدك أمنجي زي الترتيب |
ياود البشرى
هي اصلا تهمة الكوزنه راكبانا راكبانا من بعض الذين لا يرون أبعد من ظلهم
بس أستعجلو لي ترقية العمودية دي خلونا نبقي زي المنشار داخلين ماكلين طالعين ماكلين
وياريت كمان لو شوفتو لي مزرعه من المزارع البتجيب مليار ونصف دي ، جدي الله يرحمو
بيزرع لمن قابل ربو ماوفر ليهو أردب عيش 
| |
|
|
|
|
|
|
|
|
|
Re: المعارضة أنواع والمعارضين خشم بيوت والكيزان أحمد وحاج أحمد واحد (Re: عادل البراري)
|
Quote:
اها لما يدوك مزرع من مزارع الجنة صاحب مسلسل القتل المستمر يدوهو شنو اهو قاعد يعفص يمين وشمال
زي الاعمى السائق قندران .. ما ظنيتو وصل لحلم دا |
البراري ياحبوب
البشير دا الرئيس الوحيد الماقاعد يرجع لمستشارين ولا يحزنزن وحنكو مايقنع طفل أي كلام بيجيهو من رأسو
اللغليد دا بيدشو علي حسب جوء اللقاء ، بتذكر قبل سنين مضت حضرت له خطاب عبر التلفاز من قاعة الصداقة
يوم واحد يناير بمناسبة عيد الاستقلال وشكلو الخطاب كان مكتوب ، تحدث حديث طيب وكلام موزون علي انو
كل المعارضين يرجعو لحضن الوطن ونحن نمدد أيادينا بيضاء لهم ووووو وبعد يوم واحد يوم أثنين يناير سمعت
خطابه من سواكن بمناسبه إفتتاح ميناء بشائر ومع الحشد الجماهيري وغناء قيقم زولك رقص كما لم يرقص من قبل
ومسك المايك وقال والله ناس المعارضة لو عاوزين يجو البلد دي الا في الاول يغتسلو من البحر دا
قعدتا أضحك براي وتخيلت واحد من ناس المعارضة سمع خطاب القاعه وستف شنطنو لمن يسمع حطاب سواكن
بعد يوم يعمل شنو ؟ الزول دا فاقد الاهلية وبيتكلم ساي .
| |
|
|
|
|
|
|
|
|
|
Re: المعارضة أنواع والمعارضين خشم بيوت والكيزان أحمد وحاج أحمد واحد (Re: عادل الباهي عبدالرازق)
|
.
أخي عادل
أسمح لي فقط ان اعلق على المقتبس التالي
| Quote: بس الحاجة الشايفا انو الحكومة دي شردتو من عملو والخ من انواع المظالم الشخصية |
لماذا تستهين وتستحقر موقف الذي شرد من عمله وقطع رزقه ورزق عياله، وتحرمه حتى من حقه الطبيعي في مناهضة السلطة السياسية التي حرمته حق الحياة الكريمة،
نعم أنت غير مطالب بالدفاع عنه، ولا يلاحقك أحد لإبداء مجرد مشاعر التعاطف معه، فقط لا تملي عليه أي خيار قد تراه انت مناسبا!
.
| |
|
|
|
|
|
|
|
|
|
Re: المعارضة أنواع والمعارضين خشم بيوت والكيزان أحمد وحاج أحمد واحد (Re: سيف اليزل الماحي)
|
Quote:
لماذا تستهين وتستحقر موقف الذي شرد من عمله وقطع رزقه ورزق عياله، وتحرمه حتى من حقه الطبيعي في مناهضة السلطة السياسية التي حرمته حق الحياة الكريمة،
نعم أنت غير مطالب بالدفاع عنه، ولا يلاحقك أحد لإبداء مجرد مشاعر التعاطف معه، فقط لا تملي عليه أي خيار قد تراه انت مناسبا!
|
العزيز سيف اليزل الماحي
حبابك اااازول وزارتنا البركة
ياسيف كان مفترض تجيب لي المقتبس كامل لكلامي لانو نقل جزية معينة بتخرج الكلام من سياقه
دا كلامي في النقطة دي بالتحديد هاك
Quote:
وفي معارضين عندهم مظالم شخصية
علي الحكومة فيعارض النظام من منطلق شخصي بحت لا يحركه قتل المدنيين في دارفور وجبال النوبه وبقية المناطق المشتعله يمر مرور الكرام في هذة الاخبار التي توثر
في اي بني ادم سوي بس الحاجة الشايفا انو الحكومة دي شردتو من عملو والخ من انواع المظالم الشخصية
|
ياسيف لا أستهين اوأستحقر موقف أي بشر كان لكن المواقف لا تتجزاء ، الانسان مفترض يحس بآلامه وآلام غيره هل يعقل أن أعارض
النظام ولا أري فيه غير أنو شردني من عملي وقطع عيشي فقط ولمن أشوف قدامي الناس البتموت في المناطق الملتهبه وضرب الطيران لهم
أعمل رايح . ياسيف لنفترض المعارضين من أجل مظالمهم الشخصية البحتة ديل بكره البشير دا رجعهم لمناصبهم خلاص الواحد يصمت ؟ وحصلت
كثير اعرف كثير منهم مع زوال المظلمة الشخصية من عليه أصبح البشير أمير المؤمنين العادل ومثال بسيط عبدالرحمن الصادق المهدي
الموجود في القصر اليوم ، لمن جاءت الانقاذ دي وأحالوهو للمعاش وهو ضابط صغير عارض من هذا المنطلق ولمن رفعت عنه المظلمة
رجع وخلف رجل علي رجل والطيران بيضرب الي اليوم في جبال النوبه ودارفور وجنوب كردفان وماحصل سمعتو قال بغم .ديل القاصدهم انا
ياسيف .
أتمني أن أكون أوضحت لك هذة النقطه
شكري وتقديري الاكيدين
| |
|
|
|
|
|
|
|
|
|
Re: المعارضة أنواع والمعارضين خشم بيوت والكيزان أحمد وحاج أحمد واحد (Re: عادل الباهي عبدالرازق)
|
.
Quote: وفي معارضين عندهم مظالم شخصية
علي الحكومة فيعارض النظام من منطلق شخصي بحت لا يحركه قتل المدنيين في دارفور وجبال النوبه وبقية المناطق المشتعله يمر مرور الكرام في هذة الاخبار التي توثر
في اي بني ادم سوي بس الحاجة الشايفا انو الحكومة دي شردتو من عملو والخ من انواع المظالم الشخصية |
تحياتي .. وعفوا أخي عادل إذا إبتسرت بعضا من ما تفضلت به، ولك العتبى حتى ترضى،
لكن دعني أقول لك أيضا، أنه ليس من الضروري أن نطالب وعلى الدوام من عارضوا النظام لمظالم شخصية، أن يقدموا لنا كشف حساب لمواقفهم من القضايا الوطنية الأخرى،
وماهي القضايا الوطنية؟ إذا لم تشمل المطالبة برد مثل هذه الظلامات ووقفها ومنع حدوثها مستقبلا؟ وكيف لنا أن نعرف أن هذه الفئة وهكذاعلى المطلق، لا يحركها قتل المدنيين في دارفور وغيرها!
لكل من ظلم بالتشريد الحق بالتظلم ومناهضة من حرمه هذا الحق في المبتدأ، دون ان يكلفه ذلك إعلان إبراء ذمة من القضايا الأخرى لأي سلطة!
.
| |
|
|
|
|
|
|
|
|
|
Re: المعارضة أنواع والمعارضين خشم بيوت والكي (Re: سيف اليزل الماحي)
|
العزيز سيف اليزل
تحياتي مرة ثانية
يا سيف انا في هذا البوست بالتحديد لم أطلب من أحد تقديم كشف حساب لمواقفه من القضايا ولا يحق لي ذلك
ولكنني عرفت فقط انواع المعارضين . ياسيف في معارضين بمجرد زوال اسباب معارضتة تاني مابتسمع منو
لا خير ولاشر وفي معارضين حقيقين بيتفاعلو مع كل القضايا ومع كل مظلوم ونزرو حياتهم من أجلك ذلك
في معارض يمكن أن يشتري بمال وهناك أخر بيسدو ليهو خشمو بوظيفة ويوجد
معارض شريف لا يساوم ولا يخون وهدفه كنس نظام الظلم بكاملة فمن الظلم المساواة بين هذا وذاك .
| |
|
|
|
|
|
|
| |
عادل الباهي عبدالرازق
عادل البراري
محمد البشرى الخضر
فرح الطاهر ابو روضة
فيس بوك
تويتر
انستقرام
يوتيوب
بنتيريست