|
|
 تخريج الروضة وفقر الاسر
|
09:01 AM Feb, 10 2015
سودانيز أون لاين
عبدالحفيظ ابوسن - كوستي / حي الشاطئ
مكتبتي في سودانيزاونلاين
سبق لي الحديث قبل عظم اظنه حول الصرف البذخي لتخريج اطفال الرياض .. مما ينؤ به كاهل الاسر الفقيرة
وتعلن كل روضة عن يوم مختلف لتخريج الطفل .. زفة تجوب المدينة .. وصالة فخمة تضيق بالاسر واطفالهم
وكلو من جيب رب الاسرة او ربتها
اقل رقم سمعتو السنة دي لرياض الاحياء الشعبية 250 ج للطفل الواحد في ظل الظروف الاقتصادية الطاحنة
|
|
 
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
هو هم يواجه رب الاسرة حسب ما ناقشت وسمعت وشاهدت
250ج او طفلك ما يحضر الاحتفال
وبدعة الروب
وتصوير الفيديو
وتصوير فتوغرافي
وألبوم
طيب ما ترفض !!؟
ارفض كيف عاد !!
الام وطفلها وبقية العيال في جيهة وانا قي جيهة
وحديث حول نفسيات الطفل واحساسه بالمهانة
وتقصير اسرته عن ان يكون مع اقرانه
ولسة
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
يا ابو سن ياخ الموضوع دا هنا مجهجهنا في الاغتراب .. خليك من ناس السودان ...عندي تلاتة ما بين المدرسة والروضة اليوم داك جابو لي خطابات دايرين من كل واحد 500 ريال .. يعني 1500 ريال وبالسوداني تلاتة مليون ونص عشان حفل التخريج
امهم قالت لي نفسية الاطفال وزملائهم والحنك دا .. قلت ليهم هم ما بيراعوا لي نفسيتي برضو مالهم ؟ ^_^
المهم يوم الاحتفال دا حنكتهم ومشينا مول والعاب وعضة وبهجة لي نص الليل ما فاتت ال 200 ريال .. ورجعوا مبسوطين وما اتذكروا احتفال المدرسة الحنك دا زاتو
| |
|
|
|
|
|
|
|
|
Re: تخريج الروضة وفقر الاسر (Re: اساسي)
|
تخريج الرياض أصبح فى السودان شئ واقع
وبقى تتدين وتتبين زي ماقلتو نفسيات الطفل وشيل الحال وسط
الأخوات والخالات والعمات فى بداية السنة يعصروك بالرسوم الدراسية
ونهاية السنة تطل زيت بتخريج الروضة .
| |
|
|
|
|
|
|
|
|
|
Re: تخريج الروضة وفقر الاسر (Re: أيمن الحاج)
|
مرحب اساسي
وحبابك
قلت لي دقست العيال وامهم هههه
وحات الله هنا مافي سكة تدقسم بيها
لا اماكن ترفيه هنا .. مكان الترفيه الوحيد اياهو التخريج دة .. هو كان بقت علي رسوم التخريج هينة ! شفت الحاجات البجيبوها للضيوف قي العقد والخطوبة هنا برضو بتجيبها
عصاير مشكلة وفشار وفنكوش وحلاوي وتورتة وخبيز وكعك .. لكن كويس مافيها شاي لبن
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
ودابوسن اخبارك يا حبيبنا
زمان لو عملته غلطه مثلا لو لحسته قعر فنجان القهوة الفيهو باقي السكر.
تجيك ام دلدوم في ضهرك
أو قرصة في اضانك لما تتورم
ولا اقولو ليك ((الولد دا الليلة اصلو ما إتغذاء هنا خلي الجوع اكتلو))
الكلام دا في حالة ما جاك مركوب طاير في راسك أو امك شالت المفراكه ووقعت فيط خبت
حسي إحنا في جيل الايباد والجلكسي
لو الواحد قلب الواطه كلها وعمل السبعة وزمتها في النهاية .... يا ولد الليلة الايباد ما بتشوفو .... شايف شكل العقاب
خليك مع الزمن يا ريس
| |
|
|
|
|
|
|
|
|
|
Re: تخريج الروضة وفقر الاسر (Re: عباس الدسيس)
|
اي والله يا ايمن .. الرياض زاتا خشم بيوت .. في روضة رسومها تقريك طب مامون حميدة ! .. وسندوتشات
فول شنو وطعمية دايرين هنبيرقر ! الولد بقا يخجل يفطر قدام زمايلو .. واعياد ميلاد وتورتات .. يدورو بيك سنة كاملة ويظبطوك آخرها
نفسيات الولد ومستقبلو النفس وتأثيرها عليه في مستقبل ايامه
| |
|
|
|
|
|
|
|
|
|
Re: تخريج الروضة وفقر الاسر (Re: عمار عبدالله عبدالرحمن)
|
تحياتي ابوسن والمشاركين
نفسيات الطفل دي بتتأثر بي المعاملة السيئة وليس عدم الصرف البزخي
أصلاً الطفل لو عاوز أي حاجة أبوهو إلا يبقي بيل غيتس
في حاجة خطرة جداً هنا دي نهايتاها ممكن تكون (النفسيات) المابنها دي
وهي الديون
الأبو لو تدين وقام فجأة فقد مصدر دخلو أو وظيفتو هنا تحجي مشاكل أكبرها الطلاق وأقلاها النقة
ودي (نفسيات) جاهزة
أها سوء التغذية كمان مشكلة
الصرف ده بكون علي حساب حاجات أساسية منها تغذية الأطفال
| |
|
|
|
|
|
|
|
|
|
Re: تخريج الروضة وفقر الاسر (Re: أيمن الفاضل)
|
Quote: امهم قالت لي نفسية الاطفال وزملائهم والحنك دا .. قلت ليهم هم ما بيراعوا لي نفسيتي برضو مالهم ؟ ^_^
المهم يوم الاحتفال دا حنكتهم ومشينا مول والعاب وعضة وبهجة لي نص الليل ما فاتت ال 200 ريال .. ورجعوا مبسوطين وما اتذكروا احتفال المدرسة الحنك دا زات |
فأنظر يا هداك الله لهذا الأب المحتال النصّاب
استخسر على أبنائه مبلغ الألف وثلاثمائة ريال
ومارس نصباً وإحتيالاً، بل و(تدقيساً) كما لاحظ أبو سن
ويتباكى على نفسيته، بل ويطالب بمراعاتها
صدق الذي قال:(آباء آخر زمن).
وكل ذلك لأنه لم يتخرج من روضة، وبالتالي
يعتقد أن التخريج هو بدعة، فكيف حين يشب ابنه عن الطوق
ويكتشف (ويا للهول) أنه لم يتخرج من الروضة
وحينما يستعرض البعض صور التخرج بالآيفون 14س، ويكتشف
غيابه، فماذا سيفعل هذا المسكين
إنها عقدة ستطارده مدى حياته
التحية لأمهم التى انتبهت للأمر
والعار والشنان لأبيهم
الذي سيتصدر وبلا منازع قائمة أسوأ الآباء لهذا العام والأعوام القادمة
| |
|
|
|
|
|
|
|
|
|
Re: تخريج الروضة وفقر الاسر (Re: الصادق اسماعيل)
|
سلام أبوسن و الجميع
إضافة في نفس خط الموضوع.
في زيارتي للسودان الأخيرة
كنت في مكان عام اتجاذب أطراف الحديث مع واحدة قاعدة جنبي
قالت لي الليلة حنة بنتها (إفتكرتها حنة زواج) و أضافت حنة التخريج من الجامعة و بي ندى القلعة...
إندهشت جداً و سرحت في سوق العمل الأصلا ما موجود
عن المظاهر, سطحية و تسطيح الناس, و عن و عن ...
إنتبهت لي روحي و هي بتسألني ...ليك كم سنة من السودان ؟
"كم لبثتم" !!! بتاعة ناس أهل الكهف ديك زاااتها :)
تحياتي.
| |
|
|
|
|
|
|
|
|
|
Re: تخريج الروضة وفقر الاسر (Re: فردوس جامع)
|
اووو عباس
وينك ياخ
ليه ماقاعد تجي ياخ
تعرف كان لامن يدقوك وتحرد الاكل يدقوك تاني
تلعب وتنجرح يدقوك ويودوك الدكتور ويجيبو ليك الفواكهة
دة براهو ودة براو
تغلط امك تجلدك .. يجي ابوك يكلمو يجلدك
ولا في زول يمسكك من ابوك ولا من امك
تنجلد زي الترتيب ومرات حبوبتك بي سير المحفضة
اها هسة عليك امان الله تلقا اخوان ولا جيران متقاطعين والسبب الشفع الهسة هم اصحاب
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
معاوية وينك ياخ ومن الشوق رسول بيننا
خشيت ليك بي هناك لقيت كلام داير مذاكرة احترمت نفسي ومرقت
ناس الانقاذ ديل حيروا اصل العائلة زاتو والله
ماتعرف من اي ظلام من ظلاميات التاريخ اتوا
لم تعجن قلوبهم بماء الانسانية والرقة و العطف وطيب النفس
لا يرون سوي مصلحتهم التي تضيق حتي علي ازواجهم او اولادهم
كأن طينتهم عجنت بغبار المردة والشواطين
تنظر نحوهم فلا تري انسانا .. وتنظر داخلهم عميقا فلا تبصر سوي ظلاما دامسا
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
حدثي ولا حرج فردوس
وقولك يصب في ذات الفكرة
حفل التخرج ينقسم لقسمين
حفل تخرج تقوم به رابطة الطلاب والجامعة
وحفل تخرج خاص تقوم به اسرة الطالب
تدفع رسوم للتخرج وهي مبالغ ليست بسيطة .. ويستجلب له فنان بالسعر الفلاني . ومنسق اغاني ! لامن ينادوا علي الطالب او الطالبة بكون مختار مقطع اغنية لتخرجه.. ويزفوهو اهلو واصاحبو ورقيص وكشف ... اها زي العريس او العروس .. لبس جديد وفاخر وحنة وحلاقة جديدة ومنجهة
وكلو من جيب اسرتو
دة غير حفلة التخرج الفي البيت البي اكلها وشرابها وفنانها
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
سلام أخي عبد الحفيظ
أسمح لي أنظر شوية...و يدي في الموية الباردة كما في المثل 
إتناقشت مع الأخت الحكيت عنها قبيل طبعا قبل ما أسرح بخيالي... و إتفهمت وجهة نظرها و بالتأكيد و جهات نظر مداماتكم (كامل التضامن معهن طبعا...تهمة تحيز جندري لا أنفيها : -)
أعتقد – آي ظاهرة زي الحاصل في موضات التخريج دي بتحتاج لأنو الأسر تتفق على أشياء محددة – مبلغ معين لإستيفاء "مظاهر الإحتفاء" و بعديها يحتفلوا.
و الجامعات و رياض الأطفال ممكن ينسقوا للقاء ينشد الهدف ده و يكونوا بالوعي الكافي إنهم يوجهوا مجلس الآباء/الأمهات
أو حتى يضعوا حد من أنفسهم أعلى لكل الأسر...
يكونوا قيادة رشيدة !!!
تحياتي وتقديري...
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
وفنكوش
التخريج دا زمان ما كان فى ليه؟ نحن مساكين ولا خرجونا زاتو لامن مدرسة لامن "خلوة "
وبعدين سؤال ماهو الفنكوش يرحمكم الله
ثم انه حفيدتى اتخرجت من الروضة لا ملين ولاتعريفة ولبسوها الروب وهيصة وناس المدرسة جابو الحاجات
والعيال اكلو واهلهم برضو ولوجه الكريم
غايتو السودان بقى حاجة ما اظن الواحد يقدر يفهمها
| |
|
|
|
|
|
|
|
|
|
Re: تخريج الروضة وفقر الاسر (Re: سلمى الشيخ سلامة)
|
سلام ود أبو سن والضيوف ..
وسلمى البتسال عن الفنكوش صدقي وتأمني بالله عرفتو بس قبل شهر أو شهر ونص ..
عندي بتين في الروضة جو مرة من الروضة قالو دايرين فنكوش لانو في الروضة واحدة من المامات جابتو وعملتو ليهم وعجبم ... انا وأمهم ما عرفنا .. بعد اتصالات ماكوكية عرفناهو وكنا متشوقين نذوق طعمو أكتر من البنات ..
مشينا ابو حمامة حسب الوصف ولقيناهو حاجة عاملة زي المكرونة وكمان مختلف الوانها احمر واخضر واصفر والوان تانية .. حاجة كدة ناشفة .. رجعنا البيت وحسب الوصفة ختيناها في زيت للتحمير وفجأة فارت وانبهلت زي الفيشار !!
المهم طعمها لذيذ جدا ومقرمش وبتسلي الزول .. زي الشبس كدة !!
ولا انا غلطان يا ابو سن ؟!
| |
|
|
|
|
|
|
|
|
|
Re: تخريج الروضة وفقر الاسر (Re: ناذر محمد الخليفة)
|
اوووو سلمي يا صاحبة
الفنكوش كما تفضل العزيز ناذر بالشرح
بتكون من بطاطس او قمح .. وفكرتو زي الفشار
فيهو ملون وسادة .. ومعمول كأشكال نجمة و لا قرقور ألخ . بتحمر وبزيد حجمو وشكلو اقرب للمشبك بتاع العرس .. ناشف وبتقرمش ... يعني ربع كيلو ممكن يعمل ليك جردل طلس كبير
حليل زمان
هسة العروس لو حملت بعملو ليها كرامة بي ضبيحتها .. زمان الا تسمع بيها قالو ولدت
| |
|
|
|
|
|
|
|
|
|
Re: تخريج الروضة وفقر الاسر (Re: معاوية الزبير)
|
جد والله ياخ نحن بقينا نحير نحن زاتو
بقينا مدهشين في اتجاه العبث . ك فلم ماتركس .. اهو بقينا كأننا نتجرك نحو الغيبوبة وتدمير الذات .. نسعي نحو مركز فوضي اللامعقول
الواحد عندو جنية وجيعان وماعندو رصيد .. يدخل بالجنية رصيد ... محتاج ويسعي لأن يكون محتاج اكثر
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
كان ياما كان
في جميل العصر والزمان
كانت الروضة ...
الروضة بت حاج عثمان
والروضة أم الحنان
وهسي الروضة ... روضة الجن ... ماها روضة جِنان
....
.. كانت خلوة ..
وفكت ريقك لبن وعصيدة
وكان العيش بتباع بالملوة
كان عراقي .. وكان سروال
وكان مصروفك ( فد ) تعريفة
حصل في يوم ادوكا ريال ؟
| |
|
|
|
|
|
|
|
|
|
Re: تخريج الروضة وفقر الاسر (Re: رشا بابكر)
|
حباب رشا بابكر فتيل العطر
واحد ضرب لي المطلوب منو لتخريج بتو مليون ج
مع ملاحظة انو الضوابط لفتح روضة متساهلة ..بعرف رياض لم يقرأ اصحابها سوي الثانوي
مافي ضوابط لفتح روضة .. في رياض مفتوحة في نص بيت وسط احياء ضيقة .. مساحة للعب مافي
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
بعد تمرق من ناس الروضة ديل .. يا حفيظ ..
شوف لينا ناس الأساس .. عليك الله ..
لأنو دي محطتنا ..
شطبنا روضة خلاص ..
والله حكومة تكرّهكـ البلي ذاتو ......
قال إدارة التعليم قبل المدرسي قال ..
غايتو الدايرينو سووهو ..
عاد بعدين اليركزوا على الدايرين يسووهو الناس فوقهم ..
| |
|
|
|
|
|
|
|
|
|
Re: تخريج الروضة وفقر الاسر (Re: عبدالحفيظ ابوسن)
|
| Quote: التعليم ما قبل المدرسي تصدق انو إلزامي ومافي روضة حكومية مجانية |
وده الجاب ليهم الفشل السنة النزلوها لي ناس الروضة دي ..
جاطت عليهم الشغلة ولي هسه ما عارفين يستروا فشلهم ده كيف ..
نزلوا المقررات لي تحت ..
عشان يدوا الروضة مقرر سنة أولى ففشلت فيه بامتياز ..
لأن الكوادر غير مؤهلة ..
ولا تدري شئ عن العملية التربوية الخاصة بي سنة أولى ..
والتي تحتاج لمجهود جبار وناس متخصصة ..
أوكلوها لي الفاقد التربوي .. والناس غير المؤهلين ..
كاستهتار منهم بي تعليم النشء أبجديات الحروف والكتابة ..
ومحاولة لانجاح فكرة مشروعهم بتاع التعليم ماقبل المدرسي ..
الطلع ماسورة شخرت ليهم في كامل العملية التعليمية ..
وبقوا الاطفال يجوكـ من الروضة ما عارفين ( الألف من كوز الضرة .. ) ..
ففشلت الشغلة لأن الأساس هو المهم ..
بيت ما عنده أساس متين كيف يبنوا ليهم فوقه دور تاني ..
وعلى هذا الأساس الواهي المجوبكـ ..
غايتو حاجة تفقع المرارة ..
كلووو ده كوم والتخريج وهيلمانته كوم تاني خالص ..
وشر البلية ما يضحكـ ..
| |
|
|
|
|
|
|
| |
عبدالحفيظ ابوسن
اساسي
عباس الدسيس
معاوية الزبير
عمار عبدالله عبدالرحمن
أيمن الفاضل
الصادق اسماعيل
فردوس جامع
سلمى الشيخ سلامة
ناذر محمد الخليفة
رشا بابكر
جمال ود القوز
فيس بوك
تويتر
انستقرام
يوتيوب
بنتيريست