|
|
 ليه البورداب ما بقروا ردود بعض
|
مجرد سؤال لا يخلو الدهشة
ليه ما قاعدين نقرأ ردود
كأننا نكتفي بالعنوان وتوووووش نجي خاشين
ف شنو
تقرأ رد زول لي حجة آخر ويدحضها دحضا مبينا . لتجد تلك الحجة تمد رأسها مرة اخري
ولا
تلقي خبر واحد منزلينو اكتر من واحد .. ومرات بكون بايت
اقصد خبر منقول وليس تحليلا للخبر .. او رؤية مغايرة فقط نقلا بي ضبناتو
|
|
 
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
وتلك النكتة الشهيرة
هي ما ماشة السوق ؟
لا ماشة السوق !
لا خلاس امشي انا كنت قايلاك ماشة السوق
حسن الانصات للآخر يدفع بالحوار للامام
ولا حتي الونسة زاتها
احيانا اجد مداخلة من غير صاحب البوست . تضيف للبوست وتنقلة نقلة نوعية للامام كثيرا . ويمر بها الناس مرورا عابرا بي نمرة خمسة .. وهي تصلح ان تكون بوستا لوحدها
او مداخلة تنسف فكرة البوست من اصلها ولا يابه لها احد
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
عمي صديق ابوسن عندو كلام مشهور اسريا .. يقول ليك
فلاحة في الاكل اخير منها الجوع
وفلاحة في النوم اخير منها السهر
سمعت زول مات قالوا حليلو الاكال والنوام
اها
فلاحة في الغلاط اخير منها السكات
وفلاحة في الاساءة اخير منها الصمت
في زول مات قالوا حليلو الغالاط والنباذ
حتي الغولاط زاتو عندو ضوابط ونظم .. اي والله الغولاط الناس بتدفع قروش شان يغالطو ليهم .. لانهم ما عارفين يغالطوا كيف او يكذبوا الغالاطين
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
مرة جدي ربنا يديها العافية غالاطا جنس غولاط
مرة قاعدة مع جدي وجات بت جيرانهم .. جدها سألها سؤال عده عابرا و بديهي
دحين دي ما بت فلانة
قالت ليهو ابوة
قال ليها دي مش ياها المرة المشلخة ديك
قالت ليهو لا مشلخة
مشلخة
ما مشلخة
والعوا قامت فوق
اها جدي نادي البت
.. وهي فتاة في مقتبل العمر
يا بت انت امك مش مشلخة
قالت ليهو ايوة
نطت مرة جدي
امشي انتي زاتك ما بتعرفي امك
| |
|
|
|
|
|
|
|
|
|
Re: ليه البورداب ما بقروا ردود بعض (Re: د.محمد بابكر)
|
يا دكتور طول بالك ههههه
قالوا في المخاطب غير مقصود .. والامر علي سبيل التنظير العام .. طبعن دة حنكي مع المدام للزوغان هههه
هسة دي قصة ما تصدقها الا تحضرها ولها غيرها حتي صارت جحانا !
في ناس قراين بدون شك .. ولكن يظل الصوت النشاز الواحد يفسد العزف للجميع
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
غالبا الناس بتقرأ ردود ما يهمها من مواضيع ومداخلات أما غير ذلك فلا فضول اوقات ..
الواحد طبعا أول ما إدخل المنبر بشوف العناوين البارزة واللافتة للنظر يفتحها ( in new tap) .
على بال ما تفتح الواحد بيمشي يفتش المواضيع التى تداخل فيها مع البورداب ويرد على ما لزم ..
عشان كدا العايز يطلعو على مواضيعوا يحسن الاختيار ويتحرى المصداقية ..
| |
|
|
|
|
|
|
|
|
|
Re: ليه البورداب ما بقروا ردود بعض (Re: صالح عبده)
|
فعلا عز الدين صدقت
الصدق والمصداقية وحسن العرض .. مرات تكون مختلف مع الزول لكن لكن تحترم طريقتو في عرض حجتو .. وانو بستند علي تسلسل منطقي لي كلامو
والاهم انو غير متناقض في تداعي كتابتو
الزمن ما بتسع فعلا والقراءة إنتقائية
مرات الواحد يحب يتداخل في بوست لكن تحس انو تداخلك لن يدفع بالامر للامام لاسباب تعرفها فتنكص علي عقبيك خوفا من افتراع حوارا لا تستطيع منه فكاكا وان شئت
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
اخبار المشاهير .. او الاخبار السياسيةلاحداث تمت
ممكن تلقي مثلا اكتر من بوست عن خبر شخص واحد مشهور .. فتجد نفسك تعزي هناك وهنا ويجأر المنبر من الشكوي لازدحام الباونديث ..
عطل النت ما كان يسمي سابقا بالسبق الصحفي .. يعني الجرايد كانت بتاخد 24 ساعة لتعاود الظهور
فلا يضيرني ان اطلع اولا علي المنبر لانشر خبرا وجدته حايم في النت من خلال مواقع التواصل او غيرها
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
أخي وصديقي ود أبوسن
عامك سعيد أنشالله ولك كل التحيا
والله نرد عليك ونقرأ كلامك حروف أصيله زي تمر بلدي وتحمل مضامين راقية وأنت زول تجربة أنسانية فنانة ومقامك في نفوسنا رفيع جدا
ربنا يحفظك لينا
لكين لضغوط الحياة كتيرة والواحد بقي يدخل المنبر وهو عندو الف شغلة ما أنتهت ولا ح تنتهي
لك العتبي أيها الحبيب حتي تبلغ الرضي واليقين بأنك من الكتاب المميزين في هذا المنبر
لك ودي
| |
|
|
|
|
|
|
|
|
Re: ليه البورداب ما بقروا ردود بعض (Re: زهير عثمان حمد)
|
Quote: مرحبا فيصل
ألتبس علي ردك فعذرا
هل الوقاحة اقتباسك لي
ام ان الكاتب يتجاوز من يرد له
مع اكيد التقدير والاعتذار عن سؤ فهمي |
صديقي ابوسن
ياخي انت اكرم الناس
ومن ضمن بوردابي المفضلين
فحاشا
انا بقصد الما بيردوا لزول جاك في بوستك
| |
|
|
|
|
|
|
|
|
|
Re: ليه البورداب ما بقروا ردود بعض (Re: فيصل محمد خليل)
|
الناس بتدفع قروش عشان يغالطوا ليهم
............................
عامك سعيد يا ود ابوسن
طبعا ديل زي ناس ود شيقوق..وود الحلة ود الفاضلاب .يعني المحامين بندفع ليهم عشان يغالطوا نيابة عننا..
والله مرة جدك دي القالت"انتي ذاتك ما بتعرفي امك" عاوزة ليها بوست منفصل..
ودمت بالف خير وصحة وعافية وان شاء الله السنة الجديدة تكون سنة خير وبركة وسنة بسيطة وما كبيسة..
وكان جيت للحقيقة كبيسة دي ذاتها نا بعرف معناها شنو ..لكن بس الناس بقولوها وبنرددها
| |
|
|
|
|
|
|
|
|
|
Re: ليه البورداب ما بقروا ردود بعض (Re: اميرة السيد)
|
تحياتي اخي ابو سن
سؤال مهم
معظم البورداب يقرأون ولا يتداخلون
والعض يعامل الباسوورد الذي يملكه وكأنه رقم وطني او بطاقة هوية يستعملها من حين لاخر
في حين ان عضو معناه التواصل والمشاركة والتفاعل كما وكيفا
دمتم
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
ابوسن سلامات وكيف الحال ..
المدهش حقا انو واحد يقرأ الرد كويس .. وكويس جدا كمان .. بس عشان يلقى فيهو ثغرة وااااحدة .. ولما ما يلقاها يخترع ليهو واحدة ..
أعتقد أن الخصومة من أجل الخصومة نزعة سودانية صرفة جدا ..
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
مرحبا فيصل
حبابك يا صاحب
واعتذر عن سؤ فهمي .. قاتل الله الانقاذ جعلت مستوي فهمنا واستيعابنا متدنيا فالعقل مشغول بتوفير حاجيات اجدادنا القدماء .. بؤسا لنا ان جل همنا ان نأكل ونشرب
اشكرك لسرعة ردك الذي ارحتني به من هم انني اسئت فهمك
وعام قادم ووطن حر ديمقراطي واحد موحد يسع الجميع ومنبر كمان
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
اللميرة بت اللمير
هههه اي اياهون المسانيح ويقاولوك كمان هههه
مرة جدي لو سويت ليها بوست منفصل بتعمل لي مشكلة اسرية .. بدغمسها في نص البوستات بس
مرة عندها عرس بتها .. وساقها ولدها بي ركشتو يلف بيها تعزم الناس .. وهم في ام درمان .. اولاد بتها المعرسة ركبو معاهم .. واصدرت ليهم الاوامر
ما شافع يدلا معاي خليكم في ركشتكم .. جني وجن قلت ادب الشفع
لافي بيها ولدها وهي تخش تعزم
ووصلو بيت .. وقفة الركشة وخشت تعزم ناس البيت
اتفضلو معانا يوم الجمعة وووو
الشفع جو لاحقينها .. ولمت فيهم خبت ورجعتهم الركشة .. وخشت تاني ورجعتهم
وولدها وناس البيت البتعزم فيهم ميتين بالضحك
تصدقي هي وصلت بيتها والاطفال عارفين انو دة بيتهم .. وبتعزم في ناس بيتها واهلها الجو للعرس وقاعدين معاها
اي والله
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
عندنا جارنا الله يرحمه رجل كان عالما في مجاله بروفسور
وعميد كلية
دخل جامعة الخرطوم وكان من التلاتة الاوائل على ما اذكر
وهادي جدا
يوم انا وهو خاتين الكراسي العصرية في الشارع بنتونس وبيحكي لي عن آخر مؤتمر والاراء الفيه وهو كان رايه شنو
يعني زي ما تقول ونسة شحمانة شديد
في اللحظة دي مرق جارنا ابوالغلاط وجايب كرسيه وتوش دخل في المواضيع وجارنا ده مجرد رجل عادي يجبد لعب الكرة درس معهد تبريد وتكييف في مصر .. اها .
وجا السعودية ظل بدون عمل فترة طويلة جدا فعندنا واحد من اولادنا بتاعين امدرمان الساخرين ديل
قال ليه معقول في السعودية ودارس تبريد وتكييف ما تلقى شغل والله انت الا قاري تبريد ازيار
المهم ابو الغلاط طوالي بدا يغالط في البروف انو كلامه ما صاح والمفروض والمفروض
قام الدكتور بهدوء قال ليه ياخ ده كلام انا قلته في المؤتمر والناس امنت عليه
اخونا بانفعال ردعليه ( ياخ قوم والله انت ما فاهم اي حاجة!!!!!)
| |
|
|
|
|
|
|
|
|
|
Re: ليه البورداب ما بقروا ردود بعض (Re: د.محمد حسن)
|
Quote:
عمي صديق ابوسن عندو كلام مشهور اسريا .. يقول ليك
فلاحة في الاكل اخير منها الجوع
وفلاحة في النوم اخير منها السهر
سمعت زول مات قالوا حليلو الاكال والنوام
اها
فلاحة في الغلاط اخير منها السكات
وفلاحة في الاساءة اخير منها الصمت
في زول مات قالوا حليلو الغالاط والنباذ
|
يا سلام .. كلام جميل يا ودأبوسن .. تحياتي ..
| |
|
|
|
|
|
|
|
|
|
Re: ليه البورداب ما بقروا ردود بعض (Re: محمد حيدر المشرف)
|
| Quote: ولكن يظل الصوت النشاز الواحد يفسد العزف للجميع |
صدقت يا ابوسن،
التحية ليك ولضيوفك الكرام،
والله بعض المداخلات تحيّر،
تلقي البوست في تسلسل منطقي
ويجي واحد بمداخلة (فيها صورة نمطية عن شخص او منطقة اوقبيلة او اثنية معينة او...) يحرف البوست
عن مساره ويفسد للجميع متابعة الموضوع والدخول في مهاترات لا علاقة للبوست بها اطلاقاً...
اذا شعر صاحب البوست ان احداً يريد ان يتجه بالبوست اتجاه اَخر
عليه ( صاحب البوست) تنبيهه، أو مطالبته بفتح بوست اخر بالذي طرحه من غلاط ليفسح المجال لحوار هادئ وهادف وبنّاء.
ما أردت قوله ان التحكم في المسار الصحيح للبوست يجب ان يكون في يد من فتحه.
دمتم بخير
| |
|
|
|
|
|
|
|
|
|
Re: ليه البورداب ما بقروا ردود بعض (Re: يحي قباني)
|
تحية
اللامبالة السودانية تحتاج الي مبحث منفصل للتحليل...والعلاقات الشخصية لها نصيب الأسد في الواقع الذي تشير اليه ...
بناءا علي ذلك وحسب ما جري تناوله بأعلاه من المتداخلين نتوقع من يتفضل عليك بالسؤال الأتي:
هل لك علاقة بعبد الحفيظ ابو سن والله انا غلطان؟ ..
| |
|
|
|
|
|
|
|
|
|
Re: ليه البورداب ما بقروا ردود بعض (Re: محمد الكامل عبد الحليم)
|
مرحبا ود المشرف
ناس النقد قالوا
من بحث عن عيب وجده
الخصومة من اجل الخصومة
والوقوف لي اخوك في العزيزة
وترصده وحفر الحفر ليهو واصطيادو
والتعامل معه بماضوية كأنة حجرا صلدا لا يتغير
و
و
واحدة من اسباب التنافر واللغة البائسة الناهرة !
مع قناعة اننا نجيد افضل من ذلك
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
مرحبا محمد حسن
ياخ السودان دة زاخر بنماذج تحتاج مؤلفا ذكيا
مرحبا منير
عمي صديق دة رغم اميته فهو ذكيا مليح وذو نوادر
في السوق مافي امام راتب للجماعة .. الجماعة نادوهو للصلاة
قال ليهم
علي بالطلاق يوم القيامة صلاتكم تمرق كيت .. يقولو لي بشير صلاتك اليوم داك غلط .. يقول ليهم انا كنت مسافر يوم داك . شوفو محمد علي بكون صلي بيهم .. محمد علي يجي يقول هو ما حضر الصلاة زاتو .. اها طلق صلاتكم ما يعرفو امامها زاتو يشطبوها ليكم
| |
|
|
|
|
|
|
|
|
|
Re: ليه البورداب ما بقروا ردود بعض (Re: سلمى الشيخ سلامة)
|
حبابكم يا اصحاب
قباني
صدقت لتكتب يجب ان تقرأ . لكي تكتب جيدا اقصد
محمد الكامل
تعرف كل الذين ردوا لا اعرف شخصا واحدا معرفة شخصية سوي علي دفع الله وتعرفت به هنا في الاسافير .
ولكنه سؤال سوف يخطر ببال كثر لغلبة المشاركات المربوطة بالمعرفة . محبة او عداوة
سلمي الشيخ
تاني وين ضيق المحل لو انتي في
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
اها
عودة ل ود المشرف
الما بدورك في الضلام يحدر ليك
يعني شوفو ذكاء المثل
الحدرة شان تخاف لامن تشوف العيون البتطاير منهن الشرر
ولكن الضلام ما بخليك تشوف زاتو .. زي قصة الزول البنتقم من الجماعة ويبول ليهم في الزير ولا علم لهم
لا يجد فرصة وإلا يلمزك في بوستات قد لا تدخلها حتي ويكون شايل حسك بين البوستات
الفكرة شنو
انا اعاديك اذا انا موجود
ولا شنو
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
تحية
الجميل في الموضوع هو العلاقات التي يخلقها التواصل...التنوير بالمعرفة والتجربة...التمرين الساخن لاعلاء اسلوب الحوار...
وطبعا قصدي هو ظاهرة اللامباله التي صارت ديدنا مالوفا...
لك الاحترام وانا من المتابعين لحروفك بنكهة الاصالة...والحكي المعافي.. ..مرر سلامي لصديقي الاثير احمد ابوسن شقيق حمد ابوسن ضابط الصيد وكانت لنا معهما حكاوي..
| |
|
|
|
|
|
|
|
|
|
Re: ليه البورداب ما بقروا ردود بعض (Re: محمد الكامل عبد الحليم)
|
السلام والتحية لصاحب الدار وضيوفه الأجلاء
والتهاني بالأعياد لكل من يحسها ولمن لا يحسها نقول: تفاءلوا خيرا تجدوا خيراً
أشكرك جداُ على إثارة السؤال:"الناس ما بتتقرأ الرد" وكمان مابترد...أو تنقُز برا الطار كما قال أحد ضيوفك
وأفرحني الموضوع لأنه ساحتكم دي عملت لي عقدة....
تقول كلام الناس تصهين . انا قلت تكون أعراض الزهايمر البدت معاي دي حقبقبة.
أو يمكن انا ببالغ في أمر أخذ الأمور بجدية
أو الناس بتعتبر كلامي"ثرثرة نسوان"؟؟؟؟
هواجس كثيفة.
المهم تأكدت الآن انه العيب مافيَ.
لكن فعلاً حقو الناس تكتب مايهم الكاتب والقاريء
وتتابع آراء ضيوف الفكرة .. بل وترد عليهم ولو من باب "شرفتونا"
كما يفعل كاتب هذا البوست وعدد من الأخوة والأخوات الذين واللائي يقولون ما يعنون
ويهتمون بمن يهتم بهم ويتابع بوستاتهم
هذا مع ملاحظة الكوارث التقنية التي تحول دون المواظبة ومغبات الزمن
مرة أخرى عام سعيد وسلام
| |
|
|
|
|
|
|
|
|
|
Re: ليه البورداب ما بقروا ردود بعض (Re: عائشة موسي السعيد)
|
تحية
وجود الاستاذة عائشة السعيد في اي صورة من صور التفاعل عبر المنبر اعتبره اضافة معرفية... ولعلي لا اضيف جديدا لو قلت ان المنبر يحتاج لأمثالها...فيا استاذة اري ان ارهاف الحس قد يكون في بعض الاحيان خصما علي الذين ينتظرون امثالك للمشاركة والاضافة المطلوبة..
لك الاحترام وللاستاذ عبد الحفيظ فضل التنبيه..
| |
|
|
|
|
|
|
|
|
|
Re: ليه البورداب ما بقروا ردود بعض (Re: محمد الكامل عبد الحليم)
|
مرحبا عائشة
او كما يحلو لزوجتي وبنتي تهاني ان يقولوا
ماما عشة
وسبب المعرفة جائزة غادة
المهم
عطفا علي مداخلتك
فعلا مرات تحس انو كلامك بندق في بحر وسط زحمة الردود .. او انك افترعتي مسارا اخرا
نحتاج حقيقة ان نقرأ لبعض بعقل مفتوح .. وذهن صافي ودون سؤ قصد مسبق
نحتاج ان نثق في بعض
انا شخصيا آخذ موضوع الكتاب بجدية .. ولا اقول الا ما اقتنعت به .. ومستعد للتراجع ان تبين لي خطأي
وفي احيان كثيرة احجم عن التداخل حين احس انني لن اضيف لنفسي شيئا بل قد اكتسب عداوة لا مبرر لها وستعيقني آجلا
وجودك يسعدني
وانتي طيبة اخبرتني زوجتي وبنتها انهم اتصلوا بك مهنئين .. لك التحية ول سهام المجمر
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
شكرا للاستاذ الكامل على الحفاوة والتقريظ
وشكرا لك عبد الحفيظ...
أجل...كان اتصال أماني وتهاني عيدا حقيقياٌ بالنسبة لي
فالوفاء بين من تجمعهم المصادفة أو الاهتمامات المتشابهة دليل على أننا بخير واننا لا نؤذن في مالطا..كما يقولون.
كنت أتمنى وجود تهاني قريبة للمشاركة في هذه القراءات القصصية ضمن أنشطة معرض مفروش يوم السبت القادم.
أتمنى أن تتاح لها فرصة أخرى ذات يوم.
الكتابة من المهارات التي تحتاج لدوافع حتى تنشط...
وعلى الرغم من ان الكتابة الابداعية قد تختلف دوافعها إذ انها دوافع ذاتية بدرجة أكبر إلا انها تظل تعتمد على ردود الأفعال لتنتقل الى مرحلة
التجويد أو التغيير أو التصحيح أو غير ذلك.
وغياب الconsistency في هذا المنبر من حيث المواظبة والمتابعة والتعليق أو إبداء الرأي يقلل من الحماس في استمرارية الحوار أو الدخول في مغبة فتح
موضوع للنقاش...
تراودني فكرة الكتابة كثيرا..لكن إشفاقي من مصير آذان مالطا يمنعني.
عموماً...تغلبني "قدرة" الكتابة على جذب الانتباه بأسلوب الكاتب أو جزالة أو أهمية الموضوع فأكتب ما يخطر ببالي .
وكما ذكرت في تعليقك تجنُب إثارة غضب الكاتب تجعلنا "نبلع لساننا" فهناك من لا يعرف قيمة النقد حتى السالب منه.
| |
|
|
|
|
|
|
|
|
|
Re: ليه البورداب ما بقروا ردود بعض (Re: عائشة موسي السعيد)
|
الاستاذة عائشة موسى السعيد
تحية طيبة
نشعر من قراءة كلماتكةالتي كتبتيها هنا في هذا البوست انك متمكنة في الكتابة الابداعية
وانك فعلا كاتبة بحق وحقيقة..ويا حبذا لو قرانا لك هنا في المنبر العام وتاكدي ان من تكتب
بهذه السلاسة والروعة ستجد الاذان الصاغية ..ونتطلع لمشاركتك بالحديث والتعليق والحوار
ودمتي بالف خير وصحة وعافية
| |
|
|
|
|
|
|
|
|
|
Re: ليه البورداب ما بقروا ردود بعض (Re: اميرة السيد)
|
مرحبا عائشة
وحبابك
نعم الكتابة الابداعية تحتاج لدوافع ذاتية .. أي كتابة ابداعية هي نزف للدواخل بما يدور داخلها من انعكاس الرؤية الشخصية للحياة او الاحداث او الذاكرة وانصهار كل ذلك بشكل غير مباشر ولكنه واعي
فحتي من لا ينشر في الاسافير وغيرها تنازعة فكرة الكتابة ويكتب ! يكتب الشخص الذي يهوي الكتابة ولو لنفسه .. يكتب في اوراق ويخبأها
فهي رغبة لا فكاك منها
والنقد يبين مواطن الجمال او مواطن الخلل وفي كل اضافة للكاتب بالتجويد او المراجعة
فأكتبي وثقي ان من يقرأون من خارج المنبر اكثر من اعضاء المنبر
ان رأيتي ان لك رأيا فقوليه
نعم لدينا حساسية تجاه نقد الاخطاء ونعتبر الامر شخصيا ولكننا سنكتب ..
تحية لك وشكر
تهاني محاصرة بامتحانات الشهادة السودانية
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
حفيظ..حبابك يا صديقي..
جيت قلت اطايبك واتمنى ليك سنة سعيدة.. بعد شوية ظهر زهير..قلنا مالو نطايب..بعد شوية ظهر محمد حسن..قلنا مالو نطايب.. بعد شوية ظهر فيسل هليل..وعييك وعاااك.. بت ابا اميرة السيد.. استاذتنا عائشة السعيد.. استاذتنا سلمي الشيخ..ابوجهينة..الكامل ..المشرف (بتاعنا مش بتاعة الجماعة)..علي عبد الله.. منير (صديقنا اللدود)..صالح..عز الدين..امحمد بابكر..ياخي ناس كلها عندي النية نطايبها ونتمنى ليها سنة سعيدة..!!
واحدة من الطرائف..يا حفيظ..فيما يخص عضم الخيط.. انو بعض الناس بترد بواسطة صورة البروفايل..أي والله..تعاين للصورة وتقوم تشوت ضفاري..!!
كنت لردح من الزمن..خاتي في البروفايل بتاعي صورة اختنا صفية محمد اسحق (امنياتي بسنة سعيدة يا صفية أينما كنت وكيفما كنتي)..اها نفس الصورة برضك خاتيها صديقنا الجميل عماد خليفة..اها ول ابا بريمة كان فاتح بوست..والردود ما عجبتو كلو كلو..وقام صديقنا عماد خليفة خش البوست..و قال كلام ما عجب بريمة كلو كلو.. اها بريمة ..لأنو عاين لصورة البروفايل وقايل البتفاهم معاهو كبر.. تووشك دخل شمال.. يا ول ابا كبر ياخي بطل حركات بن علمان..و شنو كده ما عارف..!!
الأخطر في الأمر (عشان تشوف خطورة سودانيز اونلاين القاعدين الناس يسخروا منها).. انا ما كنت جايب خبر..وكنت بعيد شوية من المنبر.. احد الصديقات في هولندا.. كلفت روحها مخسوس تضرب لي و تقول لي الحق شترة قريبك بريمة..ومشيت البورد ولقيت بريمة متجدع ومصر انو كبر قاعد يتكلم معاهو..!!
جبت نموذج بريمة مخصوص..لأني اعلم أن الرجل دقيق للغاية..وموضب عدة الشغل كويس لكن برضك بيدقس دقسات عجيبة خلاص..!!
نادر يا صديقي من يقرأ الخيط كاملا..والناس مرات بتقرا الحاجات الدايرة تتكلم فيها..ودي طريقة بتعرضنا بصورة شينة خلاص..اقل ما فيها اننا ناس قاعدة امفكو ساكت..!!
كل سنة وانت طيب..
كبر
| |
|
|
|
|
|
|
|
|
|
Re: ليه البورداب ما بقروا ردود بعض (Re: Kabar)
|
مرحبا اميرة
عائشة فعلا كتابة ومجيدة
وفوق ذلك كله له اسهامها في ترقية مهارات الاطفال والشباب الابداعية .. تهتم بهم وتمسك بأيديهم وتشجعهم
وبل تتصل بهم
فازت بنتي تهاني في مسابقة غادة التي ترأس جمعيتها دكتورة عائشة موسي .. وكانت سببا لتواصل عري المحبة والتعارف وتبادل الاتصالات بينها وبين بنتي وزوجتي
ف لو كتبت عن تجربتها فقط لابدعت
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
| Quote: وكان جيت للحقيقة كبيسة دي ذاتها نا بعرف معناها شنو ..لكن بس الناس بقولوها وبنرددها |
التحايا لك أخى عبد الحفيظ و ضيوفك الكرام
أغلب الناس بتابع البوستات حسب أهمية الموضوع المطروح
والبعض الآخر صاحبي و صاحبك و بعضهم من باب المجاملة
الأخت أميرة تحياتى
السنة الكبيسة عدد أيامها 366 يوم و يكون شهر فبراير 29 يوم
و لمعرفة السنة الكبيسة من البسيطة السنة الكبيسة تقبل القسمة
على 4 .. مثلاً سنة 2000 كبيسة و 2004 و 2008 و أى سنة
لا تقبل القسمة على 4 سنو بسيطة و 2015 سنة بسيطة ...
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
التحيات
شكراً لكما يا أميرة وعبد الحفيظ على الدعوة للكتابة التي تحفز فتقدم بهذا العنصر الأول في نجاح الكاتب..
الحقيقة انا أكتب في هذا المنبر منذ سنوات ولكن مجالي يجذب ، ربما‘ أنواع أخرى من القراء
بجانب الاجتهاد الأدبي والشأن النسائي والتربوي فقد ظل جل نشاطي في مجال الترجمة.
وقد طرقنا فيها مع مجموعة من المترجمين والنقاد سعدت بالتعرف عليهم، عوالم عديدة في نظريات الترجمة وترجمة الشعر على وجه الخصوص
والترجمات الأدبية.
إذن سألبي دعوتك يا أميرة تنفيذاً لاقتراح عبد الحفيظ في الكتابة عن تجربة العمل في جائزة غادة للشباب الكتاب والرسامين وهي تجربة
فريدة وثرية و أحس انها لمست الوتر الذي بدأناها بالضرب عليه لعلنا نكمل اللحن ذات يوم ونرى تهاني ومصطفى والآلاف التي شاركت معنا من أصدقاء غادة
خلال الخمس سنوات يشكلون عصب الفكر والإبداع في هذا الوطن وينفضون تراكم الغبار عن الشكل الحقيقي لهويته التي في نظري لا تحتاج للبحث والتنقيب.
أكرر التحية
وأهنئكم بحضرة المصطفى عليه أفضل الصلاة والتسليم.
| |
|
|
|
|
|
|
|
|
|
Re: ليه البورداب ما بقروا ردود بعض (Re: اميرة السيد)
|
عطفا علي مداخلة الاصدقاء
ود المشرف
كبر
مايحدث في المنبر الآن من تراشق ونعوت في امر اظنه لا يستوجب ذلك .. خلاف في اولويات امر رغم القناعة المشتركة بالمنهج الاساسي
ف شنو يعني
والاخ قصي يتساءل ألسنا زملاء حقيقين ! حقيقين كيف وكل زول فينا ماسك في رقبة التاني .. ولو إلتقوا لكانوا احبابا وتبادلوا الاحضان .. ويكتبوا هنا إلتقيت فلان ووجدته عكس ما تصورته
في الحياة دي عندنا اصحاب عديل كدة متابينين .. فيهم اقصي اليمين واقصي اليسار والوسط . ومن لا يحمل هما للدين او الاخلاق .. نخوض نقاشاتنا بمودة واحيانا بحدة ولا نجنح نحو الاساءات او الغلو .. ولو بحث كل واحد منا لوجد ذلك
فلماذا نتلبس تلك الروح العدائية حين نقف امام الشاشة .. ونعزل انفسنا من اللطف والذوق وحسن المعاملة والمجاملة
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
Quote: مرحبا فيصل
ألتبس علي ردك فعذرا
هل الوقاحة اقتباسك لي
ام ان الكاتب يتجاوز من يرد له
مع اكيد التقدير والاعتذار عن سؤ فهمي |
حتى فى السؤال أدب....تسلم أخى أبوسن...أعتقد أنت ومن خاطبت لايبدر منكما إلا كل جميل......تقديرى لكم........أنا بقرأ للبعض والبعض لا أهدر وقتى فى متابعتهم......تقديرى للجميع.
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
الرد علي البوست من عنوان كاتبه
وفقا لموقف سابق من نقاش تلقا الزول يقرا اسم الكاتب وقبل ما يعرف المضمنون يكون هدفو مهاجمة الكاتب
ويخلي الموضوع الاصلي ويهاجم بأي شكل ايا كان الموضوع المطروح .. وكما قال ودالبشري العداءات المسنحكمة من اجل العداء
المصداقية ؟!
ممكن نتكلم عنها
| |
|
|
|
|
|
|
|
|
|
Re: ليه البورداب ما بقروا ردود بعض (Re: عبدالحفيظ ابوسن)
|
المصداقية في زمن النت علي وزن الحب في زمن الكوليرا
مشكلة!
احكي موقف شخصي
قاعد في دكاني جاني صاحبي قال لي عمتي اتوفت هسة .. وابوي مشي البكاء وانا لاحقو .. وعمتو من ناس كوستي القدامي ولي علاقة مع اولادها .. وطوالي نزلتو في قروب كوستي شان الناس تحضر الدفن .. وقفلت موبايلي ومشيت بيت البكاء .. ولقيت الجو هادي ولا في بكا ولا يحزنون . جيت راجع وضربت لي ود اخوها .. واعتذر وأكد مافي بكاء
خشيت القروب ونفيت الخبر وبقينا نسك في الناس بالاتصالات ما ينشرو الخبر ..
الخبر انتشر في السوق بواسطة اخوها القفل دكانو وخم مرتو ومشي
اها مصداقيتي انضربت من جيث لا اعلم
من ديك وقفت الخدمة رغم ترجي الناس لي
ف شنو
ختو حسن النية
| |
|
|
|
|
|
|
| |
عبدالحفيظ ابوسن
د.محمد بابكر
عزالدين عمر
صالح عبده
فيصل محمد خليل
زهير عثمان حمد
ابو جهينة
محمد حيدر المشرف
د.محمد حسن
Munir
على عبدالله
يحي قباني
محمد الكامل عبد الحليم
سلمى الشيخ سلامة
عائشة موسي السعيد
Kabar
على عبدالله بشير
ismeil abbas
فيس بوك
تويتر
انستقرام
يوتيوب
بنتيريست