هامش: * للقراء والأعضاء من الخرطوم وضواحيها: إستاربكس = اسم سلسلة مقاهي غربية، تٌدرج مع الشركات اليهودية أيام هيجات المقاطعة العربية للبضائع الأمريكية
إستاربكس: وأنا طالع من صالة المغادرة بمطار دبي الساعة واحدة صباحا بعد وداع صديق مسافر لندن، قلت أطلع صالة القدوم أشرب لي فرابتشينو كراميل من إستاربكس. مع الشفطة الأخيرة وقبل ألحس الكريمة لمحت لي زول آخر مرة شفتو كان قبل تلاتين سنة، عرفتو من مشيتو، إنتظرتو عند المخرج، إزيك يا دكتور عبد المنعم محمد حمد؟ عاين لي بدون إندهاش وقال لي: كويس الله يبارك فيك، ما عرفتك! - أنا مجدي سفسفة صديق محجوب أخوك الصغير الكارثة، كنا جيرانكم زمان بدباغة مدني جنب قبة ود كنان. قلدني "ونزلت منو دمعة " وقال لي متجنبا النظر لي مباشرة: أديني تلفونك يا مجدي، أنا مرهق جدا وماشي الفندق بتصل بيك بُكرة بعد بُكرة نتونس ونجتر شوية من شقاوة الماضي بتاعتك ومحجوب ورونق ماضي الدباغة. فجاءة خلعت جلابية مراكبية دبي ولبست عراقي دراويش ود كنان وقلت ليهو بتركيز شديد: تمشي معاي، ما بزعجك، ساكن براي على بعد حداشر دقيقة من المطار وبوفر ليك إقامة مريحة جدا وكنت في هذه الأثناء قد سحبت شنطتو الصغيرة وتقدمت خطوة نحو بوابة الخروج. إبتسم وردد: حداشر دقيقة! جنّك ذاتو!
04-18-2015, 04:49 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
رجّعت ليهو مقعد العربية الأمامي لوضع الاستلقاء، لاحظت الحزن المخلوط بالإرهاق على ملامحه، قررت بيني وبين نفسي الهروب للماضي مباشرة دون السؤال عن تداعيات الزمان عليه خلال التلاتين سنة الماضية. رأيك شنو يا دكتور، نزيد للحداشر دقيقة ساعة تاني؟ أعزمك فوقها شيّة بقهوة الفنانين في الهواء الطلق، المميز في الشيّة دي، انو الفنانين ديل، عندهم صحانا يتم تسخينها للحفاظ على صوت طقطقة الشواء المحبب والصوت (أزيز على قول جيجي صديقتي) دا، بكون مستمر أثناء تناولنا ليها، ودا، واحد من تلاتة برامج لو ما عملتهم لضيوفي بدبي بكون قطع شك مستضيفم مجاملة ساكت. هزّ راسو بالموافقة وأضفت والليلة تخلي النقّة كاملة لي وإتّا تستمع، كرر الهزّة. اخترنا مكان خافت الإضاءة ومكشوف للاستمتاع بنسايم نوفمبر اللطيفة والشيّة أم صوت، بعد كتابة الطلب، قلت ليهو: يوم قبلوك بالدفعة الأولى بكلية الطب جامعة الجزيرة (79)، اليوم داك، أُمي قالت لأبوي بعد صلاة المغرب: الليلة، بيوت الدباغة كلهن فرحانات بود محمد حمد غفير التلفزيون القبلوهو بالجامعة، ردّ عليها بفرح: بستاهل؛ هو وأبوهو مبروكين. تاني يوم ونحن راجعين من المدرسة المتوسطة وفي نص ميدان التلفزيون، محجوب أخوك حاول يقشر بيك عليّ، طوالي قبضتو من شنطة الدمورية وقلت ليهو: أسمع هوي، نعّوم دا، حقنا كلنا...
04-18-2015, 04:56 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
أول خميس ليك وإتّا عائد من الكلية الإعدادية لبيتكم، لقيتنا قاعدين نلعب بلي في ضلكم، قلت لينا أسمعوا إتوا الاتنين ديل، أوعة ألقاكم تاني قاعدين متفنين عند بت المنى تضربوا في البليلة العدسية بسلطة الروب، دا أكل غير صحي... سكتنا وأضمرنا عدم الطاعة وبعد إتّا دخلت البيت، محجوب علق ساخراً: يكون الاسبوع دا، ادوهم محاضرة عن البكتريا بالإنجليزي!! وواصل متحديا: البليلة والنيفة ديل، لو جاء عميدك سكن معانا هنا ما بنسيبن. مرّة ونحنا متفنين مع البليلة، محجوب لمحك من بعيد وقال لي: الزول البمشي زي السمبرية داك، نعوم أخوي قوم كُب الجاز نمشي البحر. بعد السباحة مشينا إنتظرنا النيافة يفتحوها؛ نشتري لينا واحد باسم. أثناء الإنتظار قلت لمحجوب: إتّا يا فردة، السمبرية بتمشي كيف؟ قال لي ما عارف، لكن أخوي دا، مشيتو فيها حاجة مميزة ما عارفها شنو! قلت ليهو: إذاً نختصر الموضوع ونسميهو سمبر، قعقع وقال لي حقو الزول الليلة يخليك تضرب لسان الباسم براك يا بجعة.
الوصلة: ونحن راجعين البيت نام في العربية وبمجرد دخول البيت؛ غطّ في سابع نومة، صحى العصر وبعد الأكل والقهوة التركية ابتسم وقال لي: جلسة الفنانين غيرت مزاجي ويبدو أنو الصدفة دي، زي المحسوبة!! قلت ليهو: آخر عهدي بيك خريج جديد وعينوك بمستشفى مدني وفي نفس السنة ديك، أنا ومحجوب سافرنا للدراسة وناس بيتنا رحلوا من مدني، اعتقد محجوب سافر يوغسلافيا، يا أخي، الزول الجميل دا، كان مُعجب بيك إعجاب شديد. رجع ضهرو لورا وقال لي: محجوب دا، أجمل أخو ممكن تختارو وهو يتبع قلبو دائما، في واحدة من منعطفات حياتي جربت اسلوبو وكان سبب سعادتي. وواصل: بعد سنة في المستشفى أخدوني بالجامعة، في مرّة راجع البيت بعربيتي الموريس، جنب كبري حاجة عشة، العربية سخنت وطلعت دخاخين، وقفتها وأقرب باب دقيتو وطلبت من البت الفتحت الباب مويه للعربية، جابت المويه وأنا متحرك أفتح الكبوت، مسكتني من كتفي بحركة سريعة شرطت معاها طرف التوب بباب الزنكي وقالت لي إنتظرها تبرد. في لحظات الانتظار جابت لي شاي بنعناع. بعد دورت العربية قالت لي: الراديتر داير تسليك ونطقت الراديتر بإنجليزية سليمة، نزلت من العربية وقلت ليها: بتزوجيني؟ ردّت: محتاجة أعرفك أول قلت: عشان تعرفيني، محتاجة عُمر بحالو الخميس البعدو، بت المنى ما باعت سلطة الروب، وناس العشير اليوم داك ما طبخوا، وأبو عركي غنى لينا: عن حبيبتي بقول لكم وبدل الحمامات الحزينة قامت أدتا برتكانة غيرها لي قامت أدتا من حنانا ورفض يشيل قروش وحتى عرقي العازفين جابوهو أصحاب محجوب هدية.
Quote: بس أقاشي عمك محمد الله يرحمه )أطعم من شيتك البتحكي جمبها دي
سعيدين يا درديري بها الطلّة
يا أخي أطعم من شيًة دبي بوين؟ المخلي اللحمة والدحاج طاعم بالسودان هو طول المدة بين اللحمة واللحمة!
مواصلة: بعد ستة شهور من العرس توفى عمك محمد حمد أو المناضل كما يحلو لمحجوب منداته، إتّا طبعا عارف انو الحاجة إنتقلت بالتيتانس وهي بتضع محجوب. بعد أربعين يوم تانية جاتني بعثة دراسية بإستلفونيا (يوغسلافيا)، سافرنا أنا وسهام وخلينا خالتي سكينة الربتنا مع اهل سهام. الأقدار المقصودة وقعتني مع محجوب في مدينة واحدة. سنة 89 الجامعة وقفت البعثة، ومحجوب إتزوج صديقته وصديقتنا الجميلة إيليزابيتّا الإستلفونية وهو على أعتاب التخريج. سنة 90 إنهار الجدار وأصبحنا مُستكين، قربت أنهار وأدمنت الفودكا، نسيت أقول ليك: جابو لي محجوب الصغير سنة سبعة وتمانين ،وإيليزابيتّا الصغيرة يوم تمانية وعشرين رمضان سنة 90. يتبع.. باقي بس حكاية سهام التي أصبحت تتحدث بالإضافة للعربية والنوباوية، عدّة لغات بطلاقة زي بتاعة اللديتر!
* الحكاية دي كتبتها قبل سنتين بسودانيات وهسع بنقل فوقها مع تعديلات بسيطة لزوم ناس الخواض النقاد!!
زمان يا عمار لو ما لعبت كورة أو غالطت لي زول؛ كانت بتجيني حمى!
المهم: بعد سنين من زواجنا وفي إحدى عُطل عيد الميلاد بمدينة لوبلانا، أثناء ما سهام بتغزل ليها في بربتوز من الصوف لمحجوب - كانت قد تعلمت طريقة غزل الإستلفونيات ولغتهم من كلية المجتمع- سألتها وهي منهمكة، وبعد شفطة فودكا كبيرة جنب المدفاة: إتّي يا سهام، أهلك قبيلتم في السودان شنو؟ - طبعا إتّا بتعرف أهل أمي ناس دندنة الميكانيكية وأصلهم من جبال النوبة، لكن أبوي مقطوع من شدرة، تزوج أمي وعمرو ستة وستين بعد صداقة طويلة لخالي عثمان بمحالج مارنجان، وتقريبا من حكاويهو وحكاوي أهلنا بالتبني ناس الشقلة عوج الدرب، أستطيع أصور ليك حكايتو: حبوتي أم أبوي أنصارية أم درمانية غرابية، تم إغتصابها بعد كرري من الجنود الجعليين أو الشايقية؟؟ المهم، المرة الربت أبوي لقت حبوبتي مرميّة جنب كماين الشقلة الجنب المسيد ديك، وساقتها بيتها وولدت أبوي عندها وبعد أقل من شهرين ماتت.
واصلت سهام: طبعا القصة الحكيتها ليك دي؛ استنتاج مني الغريبة بالرغم من انو الدم الغرابي ماليني من من جهة حبوبتي الأنصارية وأمي النوباوية، لكن ملامحي جات تشبه الجلابة (بالقديم) وكأنو بتول النوياوية ما أُمي!! صرخت فيها بإعجاب شديد بعد أن إبتلت عروقي بالفودكا وثبت أجر الونسة: طيب ما نحن أخوان في الإنسانية. قالت لي: كيف يعني؟ تحركت للمطبخ جبتا زيادة جبنة، زيتون، خيار وجزر، وجيت شفطّ لي بقة كبيرة وقلت ليها: مرّة يا ستي، وبعد دراستنا للمكونات الحيوية للجسم، كنا أنا وأبوي راقدين في برندة الزنكي بتاعة الديوان، وأتذكر اليوم داك المطرة كانت صابة والكهربا قاطعة وأبوي بجغم ليهو في عرقي، قلت ليهو: إتّا يابا، لي شنو ملامح جدي الله يرحمو بتختلف من ملامحك وملامح أولاد عمومتك وأولاد خيلانك الكنت زمان بتودينا ليهم في الكردة غرب شندي؟ قال لي: الليلة يا ولدي، زي ما بقولوا أولاد الزمن دا، الكلام دخل الحوش!! جدك دا، ولدوهو بعد كتلة محمود ود أحمد، والظاهر أنو حبوبتك غلبا تقع البحر، وفقعا ضحكة عكست فيها أسنانو البرق القبلي. قالت لي: فعلا أخوان في الإنسانية وحقو لو جبنا لينا ولد تاني نسميهو سلام... يتبع.. باقي جزء بسيط بتاع هجرتم لكندا، بمجهود خارق من محجوب وإيليزابيتّا، وكيف سهام قرت لغات في جامعة واحدة مع بتّها، وكيف ماتت في حادث حركة لمان نزلت من العربية تجيب قهوة من إستاربكس وهم كلهم كانوا راجعين من حفل تخريجها وإيليزابيتّا الإبنة لو ما جيت راجع، أعفوا لي.
تعديل كلمة المدفأ للمدفاة
(عدل بواسطة أبوبكر عباس on 04-19-2015, 06:55 PM) (عدل بواسطة أبوبكر عباس on 05-04-2015, 11:03 AM)
04-18-2015, 07:13 PM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
Quote: كسرة : انت بتعرف قهوة إستاربكس من اين مصدر هذه القهوة ؟؟
أها خلاس دايرة تمسخيها علينا ؟. إنت من جماعة التبليغ واللآ شنو ؟، اليهود ديل ابناء عمومتنا يا وضاحة . والله صحي . اغرب حاجة العريبي دا بيعرف الحاجات دي، والله قال إستار بكس قال، مِحن !. كدي اللقوم امشي اشرب لي وآيت موكا بعد الحكي الطاعم دا ...
04-18-2015, 08:23 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
ابوبكر ود عباس زي ما قالوا ليك..انت زولا ما نصيح....ياخي انت كنت وين من زمان.. الحكي يا كدا يا بلاش....يو ميك ماي دي..you make my day الحقيقة ما كنت عندي عندي نية ادخل النت الليلة عشان نحن في رحلة لكن جاتني زهجة بدون سبب وقلت اشوف ناس عواطف عملوا شنو في بوست الرجال الساديين البعذبوا زوجاتهم ..وفجاة لقيت بوست بعنوان استاربكس وعشان انا مدمنة استاربكس دخلت....وما ندمت ..عشان وجدت اجمل قصة وباسلوب رائع ومسلي وانيق وجذاب... وبيني وبينك زواج صاحبك الدكتور وبالصدفة وجد البنت الساعدته وجابت ليهو الشاي عجبني شديد...ومتمنية لي عرسة زي دي..لانه قالوا عرسة الصدف هي البتنجح. وهي البتوثق الحب والعاطفة.. وعليك الله كان ما كتبت لينا اغنية ابو عركي الرائعة دي بالكامل.. ودمت بالف خير وصحة وعافية بسمات الشيخ عبد الرحيم
04-18-2015, 08:23 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
يا سلام و الله كتابه في السلك عندي احساس البوست دا سببو انا عشان طلب ال white mocha في بوستك التاني ياخي البتاعة دي غالية خلاس حوالي ٤ دولار للمقاس الصغير و انا مدمن بشرب اتنين تلاته في اليوم
يا فيصل، عشان خاطر بنابرك دي، أزيد ليك القصة وأودي ليك الدكتور المطار عشان نلاقي محجوبس (جمع محجوب) وإيليزابيتّاس الح يلاقوهو عشان ماشين السودان في رحلة وفاء لأهل سهام، وكيف تاني جلسنا بإستاربكس قبل وداعم للسودان. بالرغم من جو الحزن؛ فرحت بمحجوب الكبير فرح شديد، وتلصصت جمال ايليزابيتّاس الرائعتين، استغربت من تصالحم مع استاربكس!
ولا هللة تاني ما بزيدها
(عدل بواسطة أبوبكر عباس on 04-18-2015, 08:49 PM) (عدل بواسطة أبوبكر عباس on 04-18-2015, 08:56 PM)
04-18-2015, 08:56 PM
عبدالعزيز عثمان عبدالعزيز عثمان
تاريخ التسجيل: 05-26-2013
مجموع المشاركات: 4037
ود عباس،،وحات شيخي ات مخاوي... يازول النضم ده معتق كيف وبي شنو... يازول اكان ما المحيط الاطلسي الهادي،الادرياتيكي والبحار الحمر والصفر والمافيها روح البيناتنا...اكان ماوقفت عربيتي الا عندك... غايتو ان ختيت حبة الشركنة العندك دي-وكلنا مرات تغشانا-كت اخدت منك الطريق... مستمتعين يا رائع...
04-18-2015, 09:06 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: بالله يا المدير جيب لي معاك Tall extra hot white moch
والله يا ناصر جامع ما بلومك في إدمانك، يا البتاعة دي موبااااااااااالغة والله . تعرف، أنا بعملآ 180 درجة ؤُ دا آخر حد‘ قبل كدا قلت ليهم اعملوها لي 200 قالو لي ما بنمشي فوق للـ180 ؤُ بعد دا الجماعة اصحابي ما بيدورو يشربو معاي قهوة، عشان الـ180 بشفطا في دقيقتين بس . قالو، انا ما بتاع كيّف . انا زيّك التوبة غلبتني تب ...
04-18-2015, 09:07 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
غايتو النص دا بعد: - "كتابة مجنونة" من هدير الزين و - "حكي طاعم" من ود المدير و - "مستمتعين يا رائع" من عزو و - "موكات ناصر البيضاء" لو بكري ابوبكر ما علقو فوق يكون فعلا المؤتمر الوطني اشترى البورض
04-19-2015, 03:22 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
عزيزي البيطري ابن عباس سلامات صراحة ما قريت القصة،لأسباب كثيرة من ضمنها شح الوقت: وشح الوقت لا يجعل بوستك،
ارجو الا تزعل، واحدة من أولويات المتابعة الاسفيرية.
في مسح سريع للبوست لفت انتباهي التعليق الآتي:
Quote: دا اسمو أدب ما بعد بعد بعد الحداثة القارئي نفسو ممكن يمسك الراية ويصبح جزء القصة
الزول الانتي قاصدوا، كان غلط. دا ما عندو علاقة بالحداثة او بما بعد الحداثة. شفت ليك زول ذهنيته معوكابية، رغم تعليمه الرسمي ، عندو علاقة بالحداثة او بما بعدها، أو بعد بعد بعدها؟
صه يا كنار انا ما قريت النص لأنك ما من أولوياتي في المرحلة دي لكن بمسح سريع جني وجن الزول الما بعرف السكر يكتب عنو وثانيا أمانة ما هملت يا الفرباتشينو وقمتي بروس يالموكا
04-19-2015, 06:44 AM
احمد التجانى احمد احمد التجانى احمد
تاريخ التسجيل: 11-11-2006
مجموع المشاركات: 3155
ابكر بقيت تكتب قصص كمان والله اتطورت تطور شديد خلاص من نص حريف فى الدافورى وشخصية ساخرة لكن جمهورك ما كان فايت ناس سراج وغازى اكثر زول كان مقتنع بانك زول موهوب تقوم تخليه وتبارى اخوه عمر , انا برضوا ما عندى ليك زمن لكن قريت قصتك كلها وعرفتها منجورة من ما قلت ابطالك ساكنين فى الدباغة وتانى ذكرت انهم شقوا ميدان التلفزيون وهم ماشين البيت الجاب ميدان التلفزيون للدباغة شنو , الخلانى ادخل البوست برغم ضيق زمنى لانك ود جيرانا فى زمان نحسبه كان نضرا والسبب التانى استاربكس دة يا اخى بيتى التانى , وا خيرا اسال الله ان يهب الاخت اميرة السيد ما تشاء
04-19-2015, 07:11 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
Quote: عجبني شديد...ومتمنية لي عرسة زي دي..لانه قالوا عرسة الصدف هي البتنجح. وهي البتوثق الحب والعاطفة.. وعليك الله كان ما كتبت لينا اغنية ابو عركي الرائعة دي بالكامل.. ودمت بالف خير وصحة وعافية بسمات الشيخ عبد الرحيم
يا بركة ود كنان وسعدابي تنوّل أميرة بت آمنة الفي مرادها وتصادف ليها ولد لطيف، حساس من مدني
04-19-2015, 08:15 AM
هشام كمال عبادي هشام كمال عبادي
تاريخ التسجيل: 10-30-2010
مجموع المشاركات: 2166
أخي أبوبكر عباس .. لا أخفيك سرا أنني ومنذ فترة طويلة أدخل المنبر خلسة لأستمتع بأقاصيص عبد العزيز عثمان ولكني اليوم أكتشفتك .. أسلوب ممتع ، لو تصدق اني كنت أتأنى في القراءة لكي لا يفوتني أي تعبير ..
هذه دعوة لمواصلة الكتابة أخي أبوبكر .. أنت مشروع قاص متميز ..
04-19-2015, 07:13 AM
وضاحة وضاحة
تاريخ التسجيل: 01-16-2005
مجموع المشاركات: 9116
Quote: أها خلاس دايرة تمسخيها علينا ؟. إنت من جماعة التبليغ واللآ شنو ؟، اليهود ديل ابناء عمومتنا يا وضاحة . والله صحي . اغرب حاجة العريبي دا بيعرف الحاجات دي، والله قال إستار بكس قال، مِحن !. كدي اللقوم امشي اشرب لي وآيت موكا بعد الحكي الطاعم دا ...
هههههههههههههههههه ود المدير سلامات واشواقات وحات الله كرهتى فى الدنيا قهوة إستاربكس
وكرهتها صديقتي كندية كانت مجنننانا بيها ومدمنهاها أقول ليها قهوتك دى ما بتستاهل يدفعوا فيها دولار واسالها ليك انتى عارفه البن بتاعها من شنو ههههههه لحدى ما سابتها لوم لى Tim Horton
الايام دى الجوء عندكم بدييييع اقع ال ICED CHOCOLATE LATTEعجييييب
04-19-2015, 08:33 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
يا خواض، قصتي دي ما دام استمتع بيها الأديب عبد العزيز عثمان واشاد بيها عبادي، وراعينها الفطاحلة معاوية (زبير + مدير)، وأداها المهندس الكبير أحمد التجاني عشرة دقائق من وقتو الغالي، وقرأها خالد عبد الوهاب للمرّة الرابعة؛ نقول ليك: "المشتهي زمن المشاء يطير" يا حداثي
التوقيع: المشاء الأصلي
تعديل المثل الدارج ليليق بأديبنا الكبير الخواض وأعتذر
يا أحمد التجاني، يا أخي، بيتنا الجاورناكم بيهو في بانت دا بيتنا التاني، بيتنا الكبير يبعد من بيت ناس ابوعركي خمس بيوت، ومن البحر تلاتة، ومن قبة ود كنان خمس وشارع زلط، وخالتنا الكانت بتبيع السلطة والبليلة في الناصية المقابلانا وبعدين اولاد ود كنان والدباغة الكانوا بقروا في بانت لازم يعبروا ميدان التلفزيون عشان يتفادوا شق حي البيان الملان شماشة فشنو يا أخي، اتصلح معانا واعترف بي كأديب
04-19-2015, 09:22 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
تحياتي ابوبكر عباس .. قرأت أول فقرتين - المداخلتين الأوائل - فأحسست طعم الروايات التي كنت أقرأها في الصبا .. والله شغل نضيف .. وبالبداية بلقاء صدفة في مطار ومسافر مرهق وقهوة وفندق ومشوار من المطار .. ده سيناريو رهيب يصلح مقدمة لفيلم أجنبي سوداني راقي .. لم أواصل بعد في القراءة لأن هذه القراءة تحت لمزاج رايق والآن المزاج مضطرب والزحمة شديدة .. سأتناول وجبتك هذه في لقمة واحدة بإذن الله حين يجي اليوم :)..
04-19-2015, 12:46 PM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7206
تعرف يا بكور قريت قصتك دي امس بالليل.. قبيل في الشغل قاعد مع واحد زميلنا و فجاءة تذكرت إنو من خريجي جامعة الجزيرة و بسرعة جداً سألتو "إنت بتعرف دكتور عبد المنعم محمد حمد؟"
حينها فقط أدركت إنو القصص نوعان: قصص تباريها عشان تقدر تكملها و قصص بعد تكملها تباريك
04-19-2015, 01:19 PM
بكري الخير بكري الخير
تاريخ التسجيل: 02-12-2008
مجموع المشاركات: 1779
أحسن زول يكتب عن السكر والخمور هم الناس الما بسكرو وبقعدوا مع السكرجية زمان كنت بمشي أودي أصحابي يجيبوا السكر من بار البراكودا، هم قايلني بلعب دور حاملها، لكن أنا كنت بستمتع بأشكال وألوان الحمور بالبار وطريقة عرضها
04-20-2015, 10:13 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
Quote: تحياتي ابوبكر عباس .. قرأت أول فقرتين - المداخلتين الأوائل - فأحسست طعم الروايات التي كنت أقرأها في الصبا .. والله شغل نضيف .. وبالبداية بلقاء صدفة في مطار ومسافر مرهق وقهوة وفندق ومشوار من المطار .. ده سيناريو رهيب يصلح مقدمة لفيلم أجنبي سوداني راقي .. لم أواصل بعد في القراءة لأن هذه القراءة تحت لمزاج رايق والآن المزاج مضطرب والزحمة شديدة .. سأتناول وجبتك هذه في لقمة واحدة بإذن الله حين يجي اليوم :)..
تصدق يا منير، انو أنا قمت ببعض التعديلات باللحكاية دي عشان شفت سيرتك الذاتية بأحد البوستات وعرفت انك من الدفعات الأولى بجامعة الجزيرة؟!
04-20-2015, 10:17 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
Quote: يا بكري الخير وشوقي إدريس، إتّوا بس كتروا لي من الشكر والإعجاب يغيظ الخواض ويهدد مكانتو الأدبية بالمنبر شكرا يا شباب
يا سيدي ،لأن الشعر الحديث لا يُدرّس في المدارس السودانية بما يناسب الحداثة, وكذلك لا يتم تدريس اساسيات مناهج النقد الحديث، فلا يمكنك الترويج لكتابتك عبر العبدلله، الذي إما: يسخر منه "محاكاة وابتذالا" أشباه المتعلمين، أو لا يهتم أحد بما كتبه. ولذلك حذف تلك النصوص والترجمات،و الملطيميطيات على حسب وصف واحد من أشباه المتعلمين الاسفيرين، ضحايا التعليم التقليدي. ابحث لك عن "كاتب جماهيري"، تحبه الجماهير ذات التوجه "المعوكابي".
04-21-2015, 06:21 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
غايتو يا خواض، داير أقول ليك حاجة بمناسبة كلامك بتاع هجوم الناس على كتاباتك وسحبك ليها: أي كلام قاعد يكتبو اسامة الخواض ، تقريبا كل قراء سودانيز قاعدين يمشوا يقروها بعد داك تقيّم كل زول يختلف المهم في الموضوع انو الناس بتجري تشوفك كتبتا شنو دحين خلي عوارة أهلك بتاعة الحردي يا أخي، زول يشيد بيهو حسين ملاسي، يزعل من حكيم الغنم وعنقالي عطبرة فشنو يا أخي، اتصلح معانا
Quote: يشيد بيهو حسين ملاسي، يزعل من حكيم الغنم وعنقالي عطبرة فشنو يا أخي، اتصلح معانا
يا بوكو اول مرة الحظ ليك كلام عاطفي
ثم تانيا شخصية العروس في روايتك الحديسة دي هل عندها ورشة مكانيكا ؟ ولة صبية معلم مع ابوها ؟ لانو قصة تسليك الراديتر ما ظنيتها سبب الدخاخين والسخانة بتاعة المورس
04-21-2015, 07:40 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ثم تانيا شخصية العروس في روايتك الحديسة دي هل عندها ورشة مكانيكا ؟ ولة صبية معلم مع ابوها ؟ لانو قصة تسليك الراديتر ما ظنيتها سبب الدخاخين والسخانة بتاعة المورس
لا حولآ، فترنا من المشي . هسّع يا الصادق مقرطا مع البيطري دا مالك ؟. ما قالك إنت ممكن تكون جزء من الرواية بحكم إنها حديسة ...
04-21-2015, 07:36 AM
osama elkhawad osama elkhawad
تاريخ التسجيل: 12-31-2002
مجموع المشاركات: 20429
عزيزي البيطري التنويري "حلوة دي"؟؟؟؟ يا سيدي حذفت ما كتبته، لاسباب ليس من ضمنها السيد معاوية المدير ولا ملهمه الروحي البروفيسور بلغته الركيكة وموسيقاه الشعرية الأكثر ركاكة. عموما سئم الكل هنامن مطاردة السيد الاستاذ معاو ية المدير لي وردي عليه.
وعليه توفيرا لهذا السأم،لن أرد مستقبلا على مطاردات "الباحث عن الشهرة" عبر مقتله.
ولكن أقو ل له بلغة المعوكاب: حسك، عينك، تبتذل نصا لي. سأهجوك. نقطة.
أنت تزعم أنك "حارس القدامى". لذا الهجاء لا يستثني أحدا ممن لهم علاقة بالمهجو: ابوه، امه، جده، جدته، عشيرته، عائلته، ولده، بنته إلخ.
وقد شرعت في هجائه: السيد معاوية المدير، و عائلته كلها، فاطمة والمقداد على رأس القائمة، وجده، و ....و ..و...و....و.......، كلها أهداف للهجاء.
صبرت عليه كثيرا. وهنا لا أنفي أنني أدافع عن نفسي، ولكن ضمن ذلك حق كل من كتب في السودان في أن يكتب كتابة مخالفة، و من حقه تلقي النقد الرصين ، لا ابتذالات أشباه المتعلمين من أمثال البروفيسور، و تلميذه الخائب.
تمّ هجاء المتنبي لان أبيه كان سقاء، ولقي حتفه بسبب هجاء.
هذا هو "الهجاء العربي"، لم أجربه في حياتي، ولا أحبذه.
ولكن أمثال ود المدير الذين لا يجيدون النقد، ولا اللغة العربية الفصحى، و لا موسيقى الشعر، و لا نسج الصور الشعرية،
ليس من سبيل سوى هجائهم.
هذا خطاب للجميع للعلم ،فقط. ودمتم ، نرجو أن نلتقي في ساعات لا تشبه هذا الوعيد.
لم يتركوا لي من سبيل: غفرانكم.
والله يكضب الشينة.
04-21-2015, 08:01 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
يا أخي، قاعد أخليها، هسع ما شفت كلامي الحنيّن للأستاذ الخواض!
الله يبارك فيك يا جلادونا القصة خلصت، لكن لو داير زيادة، ما عندي مانع
يا خالدي، العروس ثقافتها الميكانيكية سماعية من خيلانا، وبعدين الدكتور ما عجبتو عشان التشخيص الميكانبكي؟ كيمياء الموقف هي الجذبتو ليها: مسكة الكتف وشرطة التوب النطق السليم للكلمة الإنجليزية ويمكن كمان تكون ختت ليهو عرق محبة مع النعناع
وبعدين منو القال ليك لو المورس موية لديتروا كملت، المكنة ما بتطلع دخاخين من فوق الكبوت؟! اخونا أحمد التجاني قاعد لو قال الكلام الميكانيكي دا غلط، برجع أصلح الكلام مشكلة ما في يا قارئي
انتا قايل ما بعد بعد بعد بعد بعد الحداثة دي عرض لــ(حيدر قطامة) ولا شنو يعني؟..
الغريب يا ول ابا انا كنت قايل الرواي اسمو مجد سفسفة..وانو الزولة الإتمنت العرسة العاملة زي صدفة البق بانق..هي صديقتنا بسمات بت عطبرة..!!
كتبت تمامة القصة ..لمن ضحا قامت قلبت بقت مسيحية ، وهي قايلة انا بقيت شيخ مسيحيين كبير في دار ترك.. وقطعت لي اسم دلع:ديفيد.. ثم عشاني ، مخسوس قامت مشت الجبال..دار نوبه..ثم وصلت لماما اميركا..اها يوم هف ليها حق السودانيات العجيب داك.. قالت لي عازماك تشرب معاي بن في استاربكس..طبعا استاربكس عندي معاهو مشكلة كواحد من ادوات الأمبريالية.. اها هي في سقط لقط وانا في امطرقا عراض..وتفتقت عبقريتها ان كل واحد فينا يشوف اقرب استاربكس..ونشرب البن بالتلفون .. هي اختارت طريقة الجلوس..قالت لي اقعد و قبل صباح وانا بقبل صباح..يعني نظام توازي وكده..الإتنين طلبنا البن في فناجيل صيني ..لونها ابيض..لأنو كبابي الكرتونة شكلها غير اليف.. وانا بتكلم معاها بالتلفون قلت ليها ما تدفقي الحتل..قالت اها وصلت الحتل اعمل شنو..قلت ليها حركيهو بصورة دايرية.. الساعة القامت فكت ليك الدهشة..قالت:سجمي ، ده مش انتا؟..قلت ليها ايوه ده انا..ياخي لا ما تهظر..صحي انت اللابس ليهو جاكت بني وبيريه اصفر؟.. قلت ليها.. ده انا يا ضحا.. الساعة العاطت ليك بطول حسها: الله اكبر..الله اكبر!!.. وانا اشيل واعيط:يا ضحا لأ..انتا في اميركا..الإ دي..!!.. وضحا تشيل وتعيط اندهاشا وازبهلالا: شكلك وسيم..ووب علي من الخدرة الدقاقة دي..الله اكبر..الله اكبر..الله اكبر!!
كل الخلق، القاعدة في استاربكس في نورث كارولينا،في العاصمة راليجا، المدينة القاعدة فيها ضحا ، كل الخلق اتضايرت تحت الترابيز.. وبعد شوية البوليس جا تووشك داخل..اخر حاجة قالتها لي: العالم دي متخيلة فنجالي قنبلة قرنيت..وفرحتي لله مخطط لضرب الأمني الوطني الأميركي.... ثم اسمع ليك: طاخ..طراخ..طراخ..!!..والتلفون ، الخط فيهو لسه فاتح..!!
انا جدعت تلفوني وفنجالي..وبلغت البوليس بتاع مدينتنا انو تلفوني اتسرق من اول امبارح.. ومرقتها في مدينة تانية..!!!
كبر
04-21-2015, 07:44 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ثم اضفت الآتي: والشيئ نفسه ينطبق على النصوص الإبداعية التجريبية. يا سيدي أنت ،و ملهمك البروفيسور في عزلته الما عارفها ايه،و غيركما، السبب الأساس في أنني لن انشر في هذا المنبر أية نصوص لي "نقدية، قصصية،شعرية، ملتيميدية أو غيرها"، لسببين بسيطين : لأ أريدكم أن تتغذوا كطفيليات اسفيرية من دم نصوصي عبر ابتذالها، والسبب الثاني أنني لست على استعداد لتحمل السخرية المجانية لأشباه المتعلمين.
Quote: عزيزي البيطري التنويري "حلوة دي"؟؟؟؟ يا سيدي حذفت ما كتبته، لاسباب ليس من ضمنها السيد معاوية المدير ولا ملهمه الروحي البروفيسور بلغته الركيكة وموسيقاه الشعرية الأكثر ركاكة.
[][]
04-22-2015, 04:46 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
ول يا اب اخدر دقاقة! يا أخي، متعتنا، لكن ضحا دي لو خليتها زينب، الله بحاسبك؟! الاسبوع الجاي أنا ماشي رالي، وحات سيدي الحسن، أول حاجة أعملها اشرب لي بٌنّة باستاربكس ومن هسع بشيل فنجان الصيني معاي، ولو بسمات طلّت لي في الفنجان؛ لنخر لك ساجدين!!
بالله، يا أخوانا، هوي، العندو حكي طاعم زي بتاع كبر دا يجينا، والما عندو برضو يجينا، القهوة في
يا هيثم، أنا طبعا بعرف خالد أخوك، لكن إتّا ما شفتك. يوم الجمعة الفاتت مشيت العين وأنا راجع لدبي بالليل وكالعادة غشيت الهيلي للتبرك بقهاوي الحبشيات، في القهوة لقيت لي سوداني بشبه خالد أخوك شبه شديد وجنبو بُنيّة بتقهوي فوقو، قعت قريب منهم عشان أتسنّط قال ليها: إتّي يا حنّا، ليه نحن السودانيين ديل بنريد الأثيوبيات؟ - ردّت: بتشربوا مويه من وين؟ إتّا رديت: من الأزرق - المويه في الجسم بتبقى دم؟ - بلحيل - الدم بمشي القلب؟ وشهقت شهقتن البتجننكم ديك! أشوفك وقفت على حيلك وكبرت: الله أكبر، الله أكبر نحن بدل نلبت تحت البناير؛ رددنا وراك: ولله الحمد، ولله الحمد وطلعنا تلفوناتنا سجلنا النغمة الجديدة
(عدل بواسطة أبوبكر عباس on 04-22-2015, 09:12 AM) (عدل بواسطة أبوبكر عباس on 04-22-2015, 09:14 AM)
Quote: وبعدين منو القال ليك لو المورس موية لديتروا كملت، المكنة ما بتطلع دخاخين من فوق الكبوت؟! اخونا أحمد التجاني قاعد لو قال الكلام الميكانيكي دا غلط، برجع أصلح الكلام
يا ابكر ما كان فى طريقة تجيب سيرة الفيسبا فى القصة دى ولا فول ناس كشك وابوظريفة
الانجليز ثقيلين ياخ لو كان عملوا المورس زى الفولكس بتاعت الالمان تتبرد بالهواء بس كان وفروا علينا مويتنا
04-23-2015, 04:36 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
ابو بكر يا مصيبة بالله القصة دى كلها من وحى الازرق والمنابع واثيوبيا والصورة الجابها عادل لوووووووب وكدا ؟ ها ها ها لايفز قووود ياخ تقول لى سد وهنضبه ! ((((عشان شفت سيرتك الذاتية بأحد البوستات وعرفت انك من الدفعات الأولى بجامعة الجزيرة؟!))))) ههههههههه وفى البوست داك ما ضغطت على اضف رد ليه ؟؟ تضغط على البروفايل ؟ ماقلتو نووووبة ..
---------------- ذكاءك العجيب اتاح لينا فرصة للتضامن مع صديقى العزيز منير الظلامى .، والله مشتاقين يامنير وعجبنى ليك تستاهل ،،،،
04-23-2015, 06:44 PM
طارق عمر مكاوي طارق عمر مكاوي
تاريخ التسجيل: 10-16-2007
مجموع المشاركات: 738
Quote: تاني يوم ونحن راجعين من المدرسة المتوسطة وفي نص ميدان التلفزيون، محجوب أخوك حاول يقشر بيك عليّ، طوالي قبضتو من شنطة الدمورية وقلت ليهو: أسمع هوي، نعّوم دا، حقنا كلنا...
يا سلام .. زمن كل الناس صحاب و كل الناس أهل ..
شكراً علي الحكي الجميل أبوبكر.
04-23-2015, 07:22 PM
اسامة الامام اسامة الامام
تاريخ التسجيل: 02-24-2015
مجموع المشاركات: 47
قال الراوي ، سيدنا ابوبكر عباس ، في سلفكة ظاهرة ومجوبكة بتاعة (على بالطلاق تشربوا معانا الجبنة ، وهو عارف البيت يشكو من قلة الفيران ، وفي رواية الجقور..المهم.. قال الراوي:
Quote: عشان ماشين السودان في رحلة وفاء لأهل سهام،
وما سقط سهوا عن الرواي ، انو الدكتور انفقع ، وقعد يجوعر جاعورة اسكت ساكت خليها /
غايتو يا هيثم غالي ، انا واستاذنا محمد مسكين ، ختينا الخمسة في الإتنين..وقلنا: يا بركات ضحا تفزعنا..!!!!! اما فتاح السقيد ، وكت داك اخد ليهو دقسة ، لأنو الملمات الزي دي بتخلي الزول يدقس..!!!
لقيتني كيف يا ابوبكر؟..فقري ، وما قاعد ينوم بدري؟ مش؟..
خلي دينا ، تاني تجي تتقاطع بي هناااااااااااااااك...!!!
ابوبكر عباس ازيك اقسم بما تبقى من ايامى بكيت والحمد لله قاعدة براى عشان مافى زل يسالنى ماما فى شنو مالك ؟ انت زول عجيب حكاية لمن تبكى الزول دى ويقراها بنفس واحد عجيبة ما قاعدة اقرا الا نادرا كتابات سودانية اكون صادقة معاك لكن دهشة وصلتنى حد البكا العديل دا شكرا لقد صنعت صباحى ويومى وساظل متعلقة بهذا النص لغاية ما اشوف ليهو "تصريف" لو رسلته لى حاعمل منه مسلسل اذاعى واكون سعيدة جدا اخر مرة بكيت فى قصة امس لمن ايزابيل الليندى فتحت الرسالة الكتبتها بتها باولا فى شهر العسل وكنت فى الباص لكنى بكيت وماهمانى شى يسلمك رب العالمين ود امى
ابوبكر عباس الأديب القاص.. يا خي انت راجل عجيب... وهذا البوست الرائع استمتعنا به كثيرا جدا جدا ونحن في بلاد الغربة... لكن انت ما عارف حقوقك ساكت.. لأنك عملت دعاية لاستاربكس ما حصلت قبال كده.. ومفروض تطلب منهم اقل شئ مليون دولار رسوم دعاية لانهم بيدفعوا الملايين للدعاية.. وانت عملت استاربكس عنوان لهذا البوست البديع الراقي.. وبالمناسبة بت مصطفى قارية قانون وممكن ترفع ليك دعوى امام المحاكم الأمريكية وتقدر تشيل ليك من ناس استاربكس الشئ الفلاني.. بس اديها رسوم 5 % من المبلغ الحيدخل في جيبك..
ودمت بالف خير وصحة وعافية وشوف ليك قصة ثانية زي دي.. عشان نجيب قهوتنا ونقعد نستمع ونحن صانين وساكتين..وحاجزين بنبر من بنابر فيصل,, بسمات الشيخ عبد الرحيم
يا اخوانا مداخلاتكم دي كلها داخله في القصة رتبوا كلامكم كويس عشان ما تجوا تخرخروا بعد القصة تنطبع قال ليكم ما بعد بعد بعد الحداثة حتى بعد تقفلوا النت وتمشوا في حالكم، إياكم تنسوا أنكم شخصيات في قصة فما تخربوا على الراجل قصة القرن أففف
غايتو يا هيثم الغالي الواحد ما اغفل من حاجة في الحوش دا بلاهي كلمة تووووش دي حقتي المفروض ادخل بيها للبوستات الزي دي قدر ما فتشت ليها ما لقيتها اتراهو لفحها الغالي ود الغالي وخلاني برة في الصقيعة هههههههههه .
يا ابو بكر ود عباس والله اسفة علي التاخير والحضور بعد المظاهرات الضخمة الجات وراك ماشة دي ههههههه ياخي انا بحب المواقف الزي دي الله يشهد وبعدين اقول ليك سر بصوت عالي انت بتشبه ناس صالون الاميرة ليه ما بتجي عشان تشرب معانا ( كبتشينو ) ؟
وحاة الرسول انتوا احلي ناس .
04-24-2015, 08:53 PM
عبد الحميد البرنس عبد الحميد البرنس
تاريخ التسجيل: 02-14-2005
مجموع المشاركات: 7114
لم تكن المره الأولى بل كانت الثانيه لزيارة ود مدنى الأولى عابراَ والثانيه زائراً يتعرف على بعض أسرارها والتى دوما يجلبها القص ولمن لا يعرف إن للبياطره خيالٌ خصب وقدره على الحكى تطابق وقدرتهم على معرفة ألام الظهر الحاد فى الحمير والإنسان عادة تتكون له معارف سماعيه يؤمن ببعضها وينتابه شئ من الشك فى البعض الآخر فالبيطرانى دكتور شهاب فتح الرحمن كبيطرى له قدره فائقه فى الحديث عن الثديات الضخام ويمتلك ذات أدوات ود عباس فى القص والتكنيك ويبتدع عوالماً وأحوالاَ تصنع الخدر فى شَعَرَةْ جلد السامع فتُكلِّب لها وتصفق الأذنان طرباَ ونشوه يحدد لك دكتور شهاب جزيرة الفيل وما يتحمله الإسم من إيحاءات يصنع فيك حالة من التهيؤ تنقلك إلى السوباط أو بحر العرب والزمان خريفاً ثم يبدأ بأن يقول لك كخبير متخصص أن القرنتيه تعشق البرسيم وأبو سبعين كعشاء فاخر ودواب البر والبحر لها ذات الخصائص فى التعرف على طرقها والمداومه على إستخدامها ف للقرنتى مشرعٌ معبدٌ آمن ومن الأصائل تتجمع فى بحيرة جزيرة الفيل تلك وعند سماع الله أكبر للمغرب تتبختر تلك الحيوانات من الماء إلى البر وفى ذات الوقت يتوجه الناس إلى المساجد فترعى تلك الدواب بتؤدة وترتع وتجتر حتى تمتلئ ضروعها فتتثاءب إلى النهر ثانية لترضع صغارها ويتكرر المشهد كل يوم وإذا لم تصدقونى دعونا نذهب لجزيرة الفيل عند أصيل الغد. يا ود عباس يقول محمد نجيبرمحمد على (أكاد لا أعى من الأمور غير ظاهر خفى) فكيف كان يملأ عليك القص!!؟؟؟
منصور
04-25-2015, 11:37 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
Quote: دهشة وصلتنى حد البكا العديل دا شكرا لقد صنعت صباحى ويومى وساظل متعلقة بهذا النص لغاية ما اشوف ليهو "تصريف" لو رسلته لى حاعمل منه مسلسل اذاعى واكون سعيدة جدا
يا سلمي بت أمي، يا أخي، ما جننتيني جن شديد ضرت لمعاوية الزبير صجيتو من النوم قلت ليهو: معقول كلام سلمى بتاع البكا دا؟ قال لي: سلمى دي الله خلقها كدا براها أشفّ من الماء!
يا زولة، على كيفك إتصرفي زي ما عايزة في الحكاية دي، لكن وحاتك ما عندي غير المكتوب دا ويا ستي، وحات سيدي الحسن، أنا لا عندي علاقة بالأدب ولا حاجة دي مجرد ونسة ساكت نفرق بيها على روحنا
Quote: أبوبكر بالغت لكن كمل القصة هسي فيصل دا جاب البنابر وقعد تحرجوا كده
يا وضاحة، القصة انتهت، لكن الباب مفتوح ليك تضيفي الدايراهو زي ما قال الناقد الكبير معاوية الزبير! لو دايراني أمشي ليك مع سهام بهناك؛ بمشي وبخليها ليك ملاك يرفرف قوق شبابيك بيوت الدباغة
(عدل بواسطة أبوبكر عباس on 04-25-2015, 03:19 PM) (عدل بواسطة أبوبكر عباس on 04-26-2015, 08:30 AM)
04-25-2015, 06:45 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
يابكة ماتخم الناس ساكت القصة ما انتهت! اخر مرة كنا قاعدين فيها مع ست الشاي بنشرب قهوة في سوق الناقة بعد ماضربنا الشية والسفن اب الملخبت بي زبادي انت حكيت لي انو سهام علمت نسوان الدباغة كيف يعملو بيتزا باستخدام الصاج حق العواسة! وزي البديت لي انها كانت بتدرب شفع الحي على كرة القدم لكن حصلت حاجة قطعت الحكي فبالله ياخي واصل القصة
04-26-2015, 06:42 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
أمس يا منى، ضرب لي تلفون عبد الخالق عابد، قلت ليهو عليك الله يا زول، قلل من تلفوناتك الكل يوم دي، أنا بعد تم تصنيفي أديب كبير داير أغير من نوعية الأصدقاء وآهو ناس صالون الأميرة رسلوا لي دعوة وفي احتمال منتدى عكس الريح يديني عضوية
شكرا يا منى
الأديب أبوبكر عباس
04-26-2015, 07:16 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
يا منصور، يا أخي، أول حاجة سلّم لي على صديقي الحنكوش شهاب فتح الرحمن وتاني حاجة أكيد جيت مدني لجيرانا أهل النصري صاحبك شخصية محجوب الفي قصتي ركبتها من عدة شخصيات لأصدقاء طفولة. عليك الله، هسع ما لمحت جزء من محجوب الفي القصة في واحد من أصحابك أهل النصري ديل؟!
يا أخي، الزول دا (ما داير أقول اسمو)، كان قاعد جنبي في سنة رابعة إبتدائي، الأستاذ قال لينا كل تلميذ يكتب أمنية حياتو في ورقة وأجمعوها، تلصصت ليهو لقيتو كاتب: أن أكون سعيدا لو مغالطني، أهو قاعد معاك بكندا أسألو
05-02-2015, 11:34 PM
اشرف السر اشرف السر
تاريخ التسجيل: 12-06-2003
مجموع المشاركات: 1563
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوبكر عباس
وضاحة
عمار عبدالله عبدالرحمن
معاوية الزبير
فيصل محمد خليل
Hadeer Alzain
معاوية المدير
عبدالعزيز عثمان
osama elkhawad
احمد التجانى احمد
هشام كمال عبادي
جعفر محي الدين
Munir
Hafiz Bashir
بكري الخير
showgi idriss
دينا خالد
جلالدونا
الصادق الخالدى
Kabar
محمد البشرى الخضر
طارق عمر مكاوي
سلمى الشيخ سلامة
عبد الحميد البرنس
munswor almophtah
اشرف السر
باسط المكي
فيس بوك
تويتر
انستقرام
يوتيوب
بنتيريست