|
|
 الســيرة مرقت عصر ...!!
|
كان يا ما كان
في قديم الزمان
الزمان السمح
نحن الشُفع ما بهمنا في العرس
إلا حاجتين
الاولى .. ناكل الضلع والحلو
) الحلو ده الكستر مع الرز (
والتانية : الســـــيرة
لي ناس الزمن الجميل وسمح
..! دعوة لزكريات السيرة
اليوم داك
يوم بشبه يوم العيد
لأننا نحظى فيه نحن البنات بفستان جديد .. وحنة في الأيد
في هذا اليوم يظل الحلم في أن تركب باص السيرة أو اللوري لا يفرق
لأن المهم في ذلك أن يتحقق حلمك الجميل وانت ربما لا تركب هاتين المركبتين إلا وانت مريض
وعندما يبلغ المرض بك حدا لا يحتمل .. ليتكرم عليك الوالد وذلك بأخذك للخرطوم وقد تكون رحلة لا تحظى فيها بالمتعة لأنك تصارع الحمى ووجع الحلق .!
لكن : أن تركب اللوري أو الباص وتكون في معية المتوجهين للجناين فهذه هي السعادة التي لا تعادلها سعادة
في هذ اليوم الإستثنائي أنت مستعد لتنفيذ كل الأوامر ... من مراسيل وشغل بيت .حتى تصل إلى تحقيق الحلم
وحتى لا تفوتك هذه الفرصة
اليوم الخامس للعرس : :
الزمان الساعة الرابعة عصرا
منزل العروس يعج ويضج .. الجميع في حالة استعداد .. عرايس وفتوات
حانت ساعة الصفر ....
باص الســـيرة جا ... باص الســيرة جا
أنا راجيا ..
اعداد مهولة من الشُفع ..
الخوف يشع من العيون ..!!
لماذا الخوف ..؟ وهذا مهرجان عرس وفرح
الخوف من الشايل الســــوط
ده شغلتو منع الشُفع بنات واولاد من ركوب بص السيرة
يقف متأبطا سوط العنج .. ويصرخ صرخة تتطير القلب
وتصيب من يسمعها بالرجفة
هوي ... هوي آ شفع .. الداير ينجلد يقررب من الباص
يبكي من يبكي ويهرب من يهرب
وفي انفسهم يتسائلون ... ليه بحمونا نمش في الســــــيرة ؟؟
وتتقادم البنات صوب الباص عند سماع البوري الرنان
ويبدا ركوب الباص بالعرسان .. قدام جمب السواق
وبعدها تبدا ركوب البنات ... لا مكان لي شاب داخل الباص ... كلو يركب علي ضهر الباص
لم يكتمل العدد بعد وعملية الإركاب تجري
وسوط العنج مرفوع أمام اعين المتشوقين من الشُفع
شافعة تركب مافي ...!
أنا وبعض رفيقاتي .. لم ننم ليلتها من هاجس باص السيرة
وجدنا الحيلة ... وليس من حل إلا أن نتخبا تحت تياب اخواتنا الكبار وحجمنا سيساعد في اجتياز المحنة
وننجح في ذلك .. لنجد انفسنا تحت مقاعد الباص ..! يا للسعادة
وانتطلقت الزغاريد
وضربت الدلوكة ... وغنن البنات مع الحان صوت البوري
عريسنا وارد البحر .... يا عديلة .. يقطع جرايد النخل .. الليلة زينة
وينطلق الباص علي الدرب التراب .. قاصد الجناين .. يا ســــــــلااام
وينزل العريس والعروس
وتنزل البنات والشباب ... وتكتمل الجلسة في الرملة المقابلة البحر
ليلة ويا لها من ليلها
فيها صوت الدلوكة .. وصوت الغنا الطاعم
فيها ابشر يا عريس ... والزغاريد التشق الوديان
العروس فرحانة .... والعريس طربان
والنخل متاكي في نص الجناين ...
وقطع العريس الفـــــرع ...
دربك اخدر ..
ابدا مشوراك .... سيرو وضاق الجديد ... سيرو وقطع الجريد
الســـــــــــــــــــــــــــــيرة :
مظهر لعظمة الإرتباط ... البداية تكون بعناق النيل _ البحر
الفال الطيب .. بالخضرة .. وما فرع النخل إلا لحكمة انها من اشجار الجنة ( وجعلنا فيها جنات من نخيل وأعناب وفجرنا فيها من العيون )
ما الذي جعل عاداتنا وإرثنا الجميل ينتهي ويصبح شيئا من الماضي
لتحل مكانه عادات لا تشبهنا ولا ورثة أجدادنا ..!!
. ناس الســـــيرة .. ارحكم بي زكريات الزمن الجميل .
|
|
 
|
|
|
|
|
|
|
 Re: الســيرة مرقت عصر ...!! (Re: رشا بابكر)
|
دور بينا البلد داك واحرق الجازولين يا الوابور جاز
دور بي
حبيبي دور بي
وسواقنا زينة وحالف ما يدلينا
ونحن مشكلتنا كصبيان كانت مع الحفلة
استاذ عبدالمنعم ابراهيم جعفر شفاه الله .. شايل سوطو بي برة الحفلة وجوة الحفلة . ممنوع الرقيص والتحشر وسط النسوان .. نتفن بملابسنا الزاهية في الواطة .. ممنوعين من التخرك .. نعاين بس . هذا بعد النجاح في الدخول
وشايلين نبل البلاستيك والذخيرة عبارة عن سيور الكراسي . نقطعها كقطع لا تتجاوز السم الواحد .. وضحايانا من النسوان والبنات والرجال عريضي القفا .. ذلك للذين يعجزون عن تجاوز السياج الصوطي المضروب للدايرة
اما عن السيرة .. فلا يستطيع ركوبها الا للمدلعاهو امو وماسكاهو من يدو
لكن سيرة الكرعين فنحن زي الفيران وسط الزفة .. العريس شايل جريد النخل .. ويهز والناس مبارينو .. نسوان شايلات طباقة فيها الحق والبخور
| |
|
|
|
|
|
|
|
|
 Re: الســيرة مرقت عصر ...!! (Re: عبدالحفيظ ابوسن)
|
والله الاستاذ عبدالمنعم ابراهيم جعفر ... أذى طفولتكم ياخي ...
| Quote: . ممنوع الرقيص والتحشر وسط النسوان .. نتفن بملابسنا الزاهية في الواطة .. ممنوعين من التخرك .. نعاين بس . |
لا غرو انكم تحملون أحقاد الدنيا على من يستمتع بلحظة صفاء ومرح في حياته ...
... المهم ....
... المهم ....
| |
|
|
|
|
|
|
|
|
Re: الســيرة مرقت عصر ...!! (Re: تبارك شيخ الدين جبريل)
|
| Quote: لا غرو انكم تحملون أحقاد الدنيا على من يستمتع بلحظة صفاء ومرح في حياته ... |
والله يا تبارك صفاء النفس الذي عرفته في عبد الحفيظ دا
لو وزعوهو على المنبر وما جاوره لحاقَ ودفّق روى الجيران.
من تقصد بأنكم؟! أب سن دا شبه تفكيرو المنفتح على كل الاتجاهات قليييل هنا، من العسير إلحاقه بجماعة منغلقة ما،
أما الأحقاد فأظنه سمع بها كلمة عابرة لن يجازف حتى بمجرد شرح معناها
إن كنت جادا يا ود شيخ الدين أرجو أن تبادر بالاعتذار، على الأقل عشان جمهورك الكريم
تحياتي لصاحبة البوست رشا بابكر
| |
|
|
|
|
|
|
|
|
 Re: الســيرة مرقت عصر ...!! (Re: معاوية الزبير)
|
Quote: والله يا تبارك صفاء النفس الذي عرفته في عبد الحفيظ دا
لو وزعوهو على المنبر وما جاوره لحاقَ ودفّق روى الجيران. |
قبل كدا حكى عن نفسو قصة يقوم فيها هو وأصدقاءه بتخريب سيارة بريئة بتهمة الزنا ... 
انا لو بعرفو زيك كان حا أموت من الحيرة ... كل ما اعرفه عنه هو ما يكتبه عن نفسه هنا ...
لذلك الموضوع ليس بالطريقة الشخصية التي تناولتها ...
فالسودان يعج بالساديين امثال ابراهيم جعفر هذا ... ويعج بالغاضبين والحاقدين أمثال عبدالحفيظ ابوسن ...
... المهم ...
| |
|
|
|
|
|
|
|
|
|
Re: الســيرة مرقت عصر ...!! (Re: عبدالحفيظ ابوسن)
|
قبال ما ادخل ..
ختيت بخور التيمــان ..
عشان البوســـت ما ( ينكبـس )
البوســت عنوانو لي عرســان اتنين
مرقوا مجرتقين ..
الصورة للزمن الســمح والناس السـمحة
ود ابو سن ..
طفولتكم وصباكم .. السهر في البيت والمسوح بالزيت
فتونة الجروف والبلدات
والقراية بالــ لمبات
والجنيات البقوا مضرب مثل عند أماتنا وحبوباتنا
وحات الله ياكن انتو ديل
اريتوا ( حال الجنيات لي حدهُن )
ابقى مواصل حكايات الزمن القبيل
.....
سلام ود البشرى
شكرا لحضورك
....
التحية ليك ود الزبير
مشكور ونعم الشهادة في الطيبين
| |
|
|
|
|
|
|
|
|
|
Re: الســيرة مرقت عصر ...!! (Re: رشا بابكر)
|
| Quote: لن اخوض فيما ارفضه سلوكا اضر بالمنبر... |
الدكتور قال "اضطريت اضحي بالأم والجنين عشان نجاح العملية" ...
نحن قاعدين نكتب هنا عن الأفكار والسلوكيات والمفاهيم الأضرت بينا إنسانيًا وثقافيًا واجتماعيًا واقتصاديًا وسياسيًا ...
إنت خايف مناقشة مفاهيمك ... القايمة على رد الفعل للعنف الإتعرضت ليهو ... تضر بالمنبر؟
يا اخوي انت لو زول ونسة ومطايبة ... امشي شوف ليك "واتساب" ... لا يضر بيك لا يوسّخ ايديك ...
المنبر دا لدرأ الأضرار عن المجتمع السوداني ... وليس العكس ...
... المهم ....
| |
|
|
|
|
|
|
|
|
|
Re: الســيرة مرقت عصر ...!! (Re: تبارك شيخ الدين جبريل)
|
| Quote: إن كنت جادا يا ود شيخ الدين أرجو أن تبادر بالاعتذار، على الأقل عشان جمهورك الكريم |
والله صحي ..
حفيظ اب سن شهادتي فيه مجروحة ..
ما عهدته الا أخاً كريماً .. حنوناً .. مرهف الحس ..
يا تباركـ ..
قسوت كثيراً على الرجل وبلا جريرة ..
إن كان مبدأ قساوتكـ من هنا ..
وإن كان خلاف ذلكـ ..
فخذها منا شهادة في حق الرجل ..
إنه من أحاسن الناس أخلاقاً ..
نأي وينأي عن جدليات الخلاف ..
ليس عن ضيق في الفهم والقول ..
لكن لينجو بنفسه من هكذا موقف ..
فحلمكـ يأخ .. حلمكـ ..
نحن وليس هو أحق باعتذاركـ ..
فهلا أكرمتنا ....
غايتو كان ما أكرمت حفيظ ده بي اعتذار ..
بنحتو معاكـ قرض .. .
| |
|
|
|
|
|
|
|
|
|
Re: الســيرة مرقت عصر ...!! (Re: رشا بابكر)
|
الأخت رشا ......
الدنيا ساعة وساعة ..
وإن حملنا همها لمتنا كمدا ..
عهدتني ومن زمنا قديم ..
أتخن مشكلة ما بتقعد معاي ربع ساعة ..
أتكلها على خلاق الخلوق وهو كفيل بحلها ..
ليس عجزاً .. ولا تكاسلاً ..
لكن تسليم بالمثل القائل ..
تبيت نار .. تصبح رماد ..
لا تعتلي هم بكره ..
فالمولى كفيل به ..
وانثري في عوالمكـ الفرح ..
ولو عنوه ..
هكذا علمنا واقع كؤود مليء بالصعاب ..
اتراحه عام ..
وافراحه هنيهة ...
تمر كما البرق .. .
| |
|
|
|
|
|
|
|
|
|
Re: الســيرة مرقت عصر ...!! (Re: عبدالحفيظ ابوسن)
|
Quote: جمال
الشهير عندي ب
ود عكر
كتر خيرك وذلك فرط محبة وحسن ظن
اشكرك عليك
رشا بابكر فتيل العطر
لحين ميسرة |
لا يا صاحب ..
هي ليست شهادة مجانية ..
هو حقكـ .. وتستحقه ..
ما لمسناه منكـ حرفاً وشخصاً ..
تنوء عن حمله الخواطر ..
تضنيكـ إيماءه في غير محلها ..
ويعتصركـ مجرد سوء فهم .. ولو كان عابرا ..
فوجب التنويه ..
ـــــــــــــــــــــــــــــــــــــــــــــــــــــ
يا تباركـ بطّل مكاجره وتعال اعتذر ..
( أسحن ليكـ ) .....
| |
|
|
|
|
|
|
|
|
|
Re: الســيرة مرقت عصر ...!! (Re: رشا بابكر)
|
يا سلااااام يا رشا ياخى
دا الزمن الجميل وتانى ما بتكرر والناس كانت حنينة ونقية
السيرة ورقيص العروس وفساتين رموش شادية وما بعرف شنو كده
امى لى هسي محتفظة بفساتينا حقات الرقيص و قطع الرحط ههههههههههه
هاك شوفي الجمال دا
هسي في عروس يترقص كده مع الموبايلات والنت واصحاب النفوس المريضة
زمنكم زمن سمح ياخى وما بتكرر
| |
|
|
|
|
|
|
|
|
|
Re: الســيرة مرقت عصر ...!! (Re: وضاحة)
|
وسـمحة طلتك والله
قلنا زمنا سمح والناس ما مصدقانا .. ما علينا
وضــاحة عليك الله فساتين أمك للتاريخ الله يديها العافية
اعملي ليها بترينة قزاز حلوة وختيها فيها
وما تنسي لو في تياب كمان
لسه بتذكر تياب امي .. ربي يطوول عمرها
اسم التوب براهو يكفي
الإســتغلال
الأبيض ضميرك
ابو عيون كحيلة
واكيد ابو قجيجة
هههههه
هسه ابو القزع .. وقصات الممثلين ! والله زمن
يا سلام ياهو زاتو رقيص العروس زمان
التعليمة مدتها شهر برضو كان برنامج
هسه العروس ترقص علي الأنغام المصرية ..
كلو تقليد في تقليد .. يا حليل زمن الأصلي .ماركة مسجلة
تسلمي وضــاحة
| |
|
|
|
|
|
|
|
|
|
Re: الســيرة مرقت عصر ...!! (Re: رشا بابكر)
|
Quote: ونحن مشكلتنا كصبيان كانت مع الحفلة
استاذ عبدالمنعم ابراهيم جعفر شفاه الله .. شايل سوطو بي برة الحفلة وجوة الحفلة . ممنوع الرقيص والتحشر وسط النسوان .. نتفن بملابسنا الزاهية في الواطة .. ممنوعين من التخرك .. نعاين بس . هذا بعد النجاح في الدخول
وشايلين نبل البلاستيك والذخيرة عبارة عن سيور الكراسي . نقطعها كقطع لا تتجاوز السم الواحد .. وضحايانا من النسوان والبنات والرجال عريضي القفا .. ذلك للذين يعجزون عن تجاوز السياج الصوطي المضروب للدايرة
اما عن السيرة .. فلا يستطيع ركوبها الا للمدلعاهو امو وماسكاهو من يدو |
تفّين في الواطا ووسخ + وجفاف عاطفي ومنع من المشاركة في الفرح مع الآخرين من الجنس الآخر + أذى بالسوط = نبلة وأذى للحضور + آراء استعلائية تنم عن كراهية؛ "المدلعاهو أمو" ...
الكلام دا كاتبو انا؟
دا كلام ينم عن حقد وغضب وناتج عن التعرض للعنف والقهر ... وما أول مرة عبدالحفيظ ابوسن يكتب كلام زي دا ...
أنا احمد لعبدالحفيظ ابوسن أنه يعكس لنا هذا الجانب من الشخصية السودانية بشفافيته المعتادة ... ولكن كما سبق أن قلت لمعاوية الزبير ... يجب عدم تناول هذا الموضوع بصورة شخصية ... فأنا لا أعرف عبدالحفيظ ابوسن ... ولكنني اقرأ ما يكتب في هذا المنبر ... وهذه هي وجهة نظري ...
أعتذر لكل من أصابه "رشاش" من وجهة نظري هذه ... ولكنني متمسّك بها تمامًا ... حتى أرى ما يقنعني بغيرها ...
بل أشكر لرشا بابكر مجهودها في إعادة الفرح لهذه الطقوس التراثية الجميلة ... وأشكر لعبدالحفيظ ابوسن اضاءته للجانب الحزين والمؤسف منها ...
أنا عندي اولاد ... لو لقيت زول زي استاذ عبدالمنعم ابراهيم جعفر دا (فعلاً شفاه الله) ... شايل ليهم سوط وعامل ليهم قوانين تمنعهم المشاركة في الفرح مع الآخرين ... حا أجلدو بى سوطو دا ... عشان اولادي ما يضربوا الضيوف بالنبلة ... دي الحاجة الطبيعية ... البنات يغنّوا ويشكّروهم ... وهم يتعلّموا يخشّوا الساحة ويشيلوا الشبال من البنات ... قال نبلة قال ...
... المهم ....
| |
|
|
|
|
|
|
|
|
|
Re: الســيرة مرقت عصر ...!! (Re: تبارك شيخ الدين جبريل)
|
السياق، السياق يا تبارك
الكلام دا قبل كم وأربعين سنة
وقبلو بي كم وأربعين سنة، النسوان في الحفلات
كانن بقبّلن وجوههن ناحية الحيطة ويدّن قفاهن للرجال..
عنف وقهر شنو يا زول دي كانت تربية الزمن داك
انت جيت مطفّر من السبعينيات للألفينيات زي سوبرمان ولّ شنو
يا رشا عادي مافي أي بوست بمشي لي نهايتو بدون تفريعات
وما زلنا في سياق العرس
ابشري
| |
|
|
|
|
|
|
|
|
|
Re: الســيرة مرقت عصر ...!! (Re: معاوية الزبير)
|
ســـلام وتحية ..
كدي صلوا علي النبي .. اللهم صل وسلم عليه تسليما كثيرا
باركوها ..
انا من وجهة نظري الموضوع ما اكتر من سؤ فهم
اخوي عبدالحفيظ ذكر ووضح صورة لي واقع في زمن مضى
وانا بقول للأخ تبارك الموضوع ما موضوع عنف ابدا
الفلسفة في منع الأطفال بنات واولاد من التواجد في الحفلات
كان لي اسباب تربوية ودي حقيقة والله
اقول ليك هي شنو
الشُــفع زمان كان عندهم ادوار في البيت فيها البخصهم وفيها البخص الأسرة
بصحوا الصباح بدري .. فيهم البودي ( الغنم ) الســاروحة .. وفيهم البجيب موية مع أمه من البير
وبعدها برضو بيتفنوا ( عبارة ابوسن ) في الواطة عشان يشربوا الشاي
بعدها فيهم البمشي الخلوة .. والبمشي المدرسة .. والبمشي مع ابوه الزراعة حواشة كانت او جروف
فــ ده السبب الرئيسي في منع الشُـفع من السهر في الحفلات
والجانب الأهم البدخل في التربية ___ زي ما عارف أخي تبارك الحفلات مناسبة لبعض الممارسات
البُطــان والجلد المبرح ... وشراب الخمرة ... فلك أن تتصور مشاهدة اطفال تسكنهم البرائة لهذه المشاهد
ومثلما يحدث الأن في هذا الزمان وقد صارت هذه المشاهد وما يتبعها من عنف داخل البيوت والسبب ... وجود الشاشات الضخمة
والتي تجسد في عقل الطفل أن كل مايراه حقيقة .. فــ يختزن الكثير المثير في عقله وذاكرته التي تستجيب لكل ما هو مثير
ليطبقه على ارض الواقع إما مع نفسه او بين اصحابه وزملائه في المدرسة ولعلك قد سمعت الكثير عن حوداث حدثت بسبب مشاهدة الأطفال
للمسلسلات التي تحتوي على العنف وبعض الممارسات وغيرها
لذلك كانت الحكمة عند أهلنا في منع الأطفال في تلك الأيام من حضور حفلات الأعراس
وليس في الأمر احقاد ولا تعنيف بل اسلوب في التربية والحفاظ على طينة الطفل الهشة والتي تتأثر بما حولها
وقد نجحت تلك التربية ومع بساطتها وبساطة اهلها نجحت في تخريج اجيال هم من صنعوا مجد السودان
تلك اجيال لن تكرر .
اتمنى أن اكون قد وفقت في توضيح الـ صورة والتي كتب عنها الأستاذ الخلوق عبد الحفيظ ابوسن
| |
|
|
|
|
|
|
|
|
|
Re: الســيرة مرقت عصر ...!! (Re: رشا بابكر)
|
يا معاوية الزبير
والله البوست ده كسر للروتين والجفاف الصاب المنبر
و نقش في جدران الذاكرة لأيام جميلة هي جزء من ماضينا
وشكرا وانت بتبشر
التبشيرة دي ان شاالله تكون في عرس علا بتي
انا عندي النية اسوي عرسها هنا في الرياض
ومن هسه دي دعوة ليك لحضور العرس
وكل الزملاء والأخوان
| |
|
|
|
|
|
|
|
|
|
Re: الســيرة مرقت عصر ...!! (Re: رشا بابكر)
|
الشكر ل
معاوية
ود عكر
والعذر ل
رشا
هكذا كان السودان قديما
ليك اللحم ولينا العضم
يوصي بها الآباء المعلمين
فلم يسلم طالب من الجلد شاطرا ام بليدا
وهكذا هو السودان كان
يقف الاطفال يغسلون للمعازيم وهم يتضورون جوعا
ويقفون للخدمة .. يا ولد جيب كسرة .. جيب ملاح .. ولا ينصرفون حتي يغسلون ايادي الجميع بعد الاكل فيأكلون ما تبقي دون احساس بالدونية والقهر .. ويفرح من يترقي منهم ليأكل مع الكبار
وكذلك في مناسبات الكره والفرح .. يقيفون للخدمة ويأكلون ما تبقي من الطعام .. هكذا كان حال السودان في القري والنجوع والمدن
يمنع الاطفال من مخالطة الكبار .. وبل يعدون الجلوس مع ابيك في عنقريبه من سؤ الادب
تلك قيم ذلك الزمان
وكان للاطفال حياتهم
بها العنف واللعب العضلي القاسي والعنف
ولكنه لم يكن الا بفهم ان يكبروا رجالا اصحاب واجب
من منا من لم يأتي مجروحا ومعوقا ويجلده والده ثم يذهب به للعلاج
كان اهلنا يحبوننا بما توفر لهم من معرفة .. ويحبونابطريقتهم
لم نسمع كلمة حب فصرنا نستحي منها ان نقولها ..
تغير ذلك الواقع وكان لابد له .. والقيم تبع واقعها
وكما قال الطيب صالح في دومة ود حامد لصديق ابنه مودعا
لا تحكم علينا بقسوة
كامل الود
| |
|
|
|
|
|
|
|
|
|
Re: الســيرة مرقت عصر ...!! (Re: عبدالحفيظ ابوسن)
|
رشا بابكر
فتيل العطر
مبروك مقدما للبنية
وواقع علي حلف لو عملتي العرس في السودان اصل ليكم وابارك
فعلا والله الطقوس اتغيرت
شي
زفاف مصري
زفاف اجنبي
وزفة شنو
مرة ولدن لينا عمل زفة مصرية .. وجهزوا الساحة بي الانوار البتولع وتطفي وتعمل اشكال .. وانوار ملونة وخافتة
بتاع الكمرة بارا العرسان من الكوافير ويتم النقل مباشرة للساحة من خلال الشاشات
اها لامن وصلو .. طفو انوار الساحة حقت الصيوان المنصوب في الشارع وشغلو انوار ألكترونية
وركبو شريط
اتمختري يا عروس
غنية مصرية
والعريس خش و طابق عروسو
ومسكها من نصها وجراها عليهو يرقصو سلولي
عليك امان الله ابوهو واخوهو واخوالو قامو للدواس
كيف الكلام دة
المهم
لسنا بمنأ عن التغيرات العالمية .. ولكن لاغاني السيرة سحر
ولغناء
الليلة العديلة تقدمو وتبرا
لها كلكة في تلافيف الذاكرة
| |
|
|
|
|
|
|
|
|
|
Re: الســيرة مرقت عصر ...!! (Re: عبدالحفيظ ابوسن)
|
سلمك الله يا ود اب سن
زي ما قلنا اتغير وجه الزمان
فاتغيرت وجوه الناس
الناس كانت بتتضحك طول السنة ووشها منشرح
ما بتعرف فيهم الغني من الفقير
عشان الحياة كانت بسيطة والناس طيبة
راحت الحاجات السمحة وراحوا اهلها
وبلينا بواقع جديد لا يشبهنا
انتهت تقاليد اهلنا وبقينا نتسابق عشان نقلّد غيرنا
في كل شي .. ما وقفت علي مناسبات الفرح
وجه الزمان .. ما بين مدبر ومقبل
وما نملك غير نسلم الأمر لي الله
...
وتسلم اخوي والله حضورك في افراحنا شرف لينا
ربنا يقرب يوم السعد
| |
|
|
|
|
|
|
|
|
|
Re: الســيرة مرقت عصر ...!! (Re: عبدالكريم الاحمر)
|
الفضلي رشا دائما ما تغوصين في اعماق الدواخل بكتاباتك الجميلة الموقلة في المحنة الطيبة والاشياء الجميلة التي لن تنسى ولن تنسى مهما عفا عليها الدهر ,, فعلا ذاك هو الزمن السمح بعاداته وتقاليده وشخوصه واشياءه الجميلة فتلك كانت من اجمل الاشياء في ذاك الزمن وهي لمة الناس في بيت عرس او بيت طهور او سماية فهذه اشياء مازالت محفورة في دواخلنا بتفاصيلها الجميلة والتي عشناها في لتك الايام ,,, على العموم لك التحية على هذا الكلام الطيب والتحية لكل المتداخلين الذين اضافو نكهاتهم الخاصة على هذا البوست الذي تفوح منه رائحة الصندل والمحلب والبخور .. وواصلي في هذا الامتاع ...
تحياتي : ياسر العيلفون
| |
|
|
|
|
|
|
| |
رشا بابكر
عبدالحفيظ ابوسن
تبارك شيخ الدين جبريل
محمد البشرى الخضر
معاوية الزبير
جمال ود القوز
وضاحة
عبدالكريم الاحمر
ياسر السر
فيس بوك
تويتر
انستقرام
يوتيوب
بنتيريست