|
Re: رحلت أم العيال بين الرقم الوطني والجوازات في السودان (Re: حسين عمر الفكي)
|
وصل أخي الى مقر الرقم الوطني مرة اخري لاستلام بقية ارقام ابنائي عمر وجليله..ولكن شبكة السجم لسع طاشة...فاصبح اخي وزوجتي مرابطون بصوره يوميه
في انتظار الشبكة بصورة يوميه...وفي اليوم الثالث وصلت الشبكة الطاشة بسلام وأمان ..تقدم اخي الى الموظفة لاستلام بقيه الارقام الوطنيه من الموظفه
فلكن خاب ظننا وجهدنا لاستلامهم ..فقالت السيدة الموظفة اوراقكم تم رفضها ..والسبب بان شهاداتهم الميلادية صادرة من قطر ولذالك تم رفضها ..وعشان تتم اجراءتك لازم
تسودن شهاده الميلاد ..فقال اخي الى الموظفة الاسبوع الفات استلمت رقمين لاخوتهم وهما ايضا مواليد الدوحة ..الجديد شنو والفرق شنو؟
فأجابت الموظفه بالله انا مافاضية اتفضل سودن شهادات الميلاد لو عايز رقم وطني.
نواصل
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: حسين عمر الفكي)
|
تحية طيبة لك أخي الكريم
فعلاً في المغتربين الانجاز أسرع وفعلاً ما بتحتاج لأي واسطة
في أم درمان إستخراج البطاقة مرات فيهو تأخير الشبكة طاشة
با أخوي عنوانك ده جهجهني لكن لامن دخلت عرفت أنك قاصد رحلة أم العيال وليس رحلت أم العيال
ههههههههه أنا قلت الناس ديل رحلو عدييييييل جمب الرقم الوطني ولا شنو ؟؟؟
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: حسين عمر الفكي)
|
سلام يا حسين
يا اخي استخراج الرقم الوطني في المغتربين من اسهل ما يكون ولا يستغرق اكثر من نصف ساعة وخدمة متميزة بقيادة عقيد رائع (ما بعرف اسمه)
انا مشيت بالصدفة ومتوجس ...فخرجت في اقل من نصف ساعة وقد اكملت الاجراءات ...واستلمت الرقم تاني يوم واكملت اجراءات البطاقة القومية في اقل من عشرة دقائق..
بدوووووون واسطة
مش حاجة غريبة في السودان..؟؟
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: ياسر منصور عثمان)
|
ألاخوة الكرام
ياسر منصور وبشير أحمد (شكرا جزيلا على المرور.....وفعلا في المغتربين الاجراءت اسهل واسرع ..انا شخصيا العام الماضي استخرجت الرقم الوطني خلال يوم واحد فقط). لكن تقول شنو ..عندنا واحد مسنوح وبحب التنظير أقنع الجماعة بأن الشئون البينية افضل وأسرع ..و قسم المغتربين ح يكون زحمة الايام دي .. لانو فترةاجازة المغتربون.
لكم الود والاحترام اخوتي
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: Mohd Ibrahim)
|
Quote: .والسبب بان شهاداتهم الميلادية صادرة من قطر ولذالك تم رفضها ..وعشان تتم اجراءتك لازم
تسودن شهاده الميلاد ..فقال اخي الى الموظفة الاسبوع الفات استلمت رقمين لاخوتهم وهما ايضا مواليد الدوحة ..الجديد شنو والفرق شنو؟
فأجابت الموظفه بالله انا مافاضية اتفضل سودن شهادات الميلاد لو عايز رقم وطني. |
شيى عجيب
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: وضاحة)
|
هي طولي طاشة مفروض تعلن في نشرة أخبار الشبكة جات وهي أنت قايلة شبكة شنو لو قدر الله وراحت البطاقة بعدما يسجلوا كل البيانات في شبكة الجن دي زجيت تطلع بدل فاقد .. البديهي بتعطيهم بعض معلوماتك ومن السيستم مفروض تطلع معلوامتك لا من أول وجديد بطلبوا منك كل الأوراق الثبوتية تاني وتاني تأخد ليك فترة جات ما جات المسنوح مصطفى وين خلي يمشي يفرش جنب دارهم ويرابط لما تجي الشبكة ههههه قولي خالد قال كدا
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: حسين عبد المجيد)
|
تحياتي اخي حسبن
عسر الاجراءات حالة ملازمة للخدمة العامة في السودان من زمان..
فعلا الرقم الوطني والجواز الجديد من مراكز الجوازات صعب .. وقد سمعنا ان وفد الجواز الجديد والرقم الوطني سيكون قريبا بالدوحة ..
نتمنى ان تكون رسوم استخراج الجواز الجديد والرقم الوطني نفس الرسوم باارض الوطن..
وان لا يستغلوا المغتربين الذين حالهم يغني عن سؤالهم.
.تحياتي لك وللاسرة وحمدلله على سلامتهم..
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: عادل ابراهيم احمد)
|
يبدو أنك أخطأت في كتابة العنوان لأن من يقرأه سوف يقول لك ( البركة فيكم)..
رحلة ... وليس رحلت
مع امنياتنا لأم العيال بطول العمر والسلامة
مجرد تصويب اخي الكريم
أخي عبد العزيز محمد علي (العطبراوي)
أشكر كل الشكر الجزيل على التصويب ...مرات الدقسه مفيدة جدا ..والدليل التقيت بك في هذا الحوش الكبير ..وكمان من عطبرة الجميلة.
انا والدتي من عطبرة ..المربعات بالقرب من محطة حليمة ماضي.
لك احترامي وتقديري أخي عبد العزيز
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: حسين عمر الفكي)
|
أولا مرحيا بك فى الحوش الكبير
وثانيا سامحك الله فى حق زوجك وثالثا جهجتنا والله.. هههه
بس لعلها ما من رواد النت .
اخي شمس الدين ساتي
هلا بيك ومرحبا..وشكرا على الترحيب
عليك امان الله أم العيال فطنت لهذا الخطأ الغير مقصود منذ الدقائق الاولى من كتابة البوست ..أخوك حرن مع الرفض الشديد من تصحيح الكلمة ههههههه
احترامي لك
| |
|
|
|
|
|
|
Re: رحلت أم العيال بين الرقم الوطني والجوازات في السودان (Re: حسين عمر الفكي)
|
الرجل الكلس ود الاصول أخي عادل ابراهيم.
تشكراتي بلا حدود على مرورك ...فعلا الاجراءات في السودان تأخذ اجازتك كلها والعجب لو مشيت ناس الاراضي هههههه.
في انتظار وفد الجوازات للدوحة ..بس تاكد الرسوم بتكون مختلفة...زي اراضي الوادي الاخضر في السودان كانت بثلاثة مليون بالقديم.
في الدوحه ب 9 ألف
لك احترامي
| |
|
|
|
|
|
|
Re: رحلة أم العيال بين الرقم الوطني والجوازات في السودان (Re: نصر الدين عثمان)
|
Quote: في انتظار وفد الجوازات للدوحة |
Quote: وقد سمعنا ان وفد الجواز الجديد والرقم الوطني سيكون قريبا بالدوحة .. نتمنى ان تكون رسوم استخراج الجواز الجديد والرقم الوطني نفس الرسوم باارض الوطن.. وان لا يستغلوا المغتربين الذين حالهم يغني عن سؤالهم. |
الإخوه الأعزاء حسين وعادل, حجوة أم ضبيبينة دى أنساكم منها!!! أنتظرو قبلكم كتيرين وبعد أن ملوا الإنتظار والتسويف والوعود والأعذار الواهية مشواخلصوا الشغلانة فى البلد..
تحياتى
| |
|
|
|
|
|
|
Re: رحلة أم العيال بين الرقم الوطني والجوازات في السودان (Re: أيمن الطيب)
|
Quote: وضاحة
شكرا على المرور...انشاء الله والدك بلغ الصحة والعافية.
فعلا شي عجيب جدا ...اصبحت اي اجراءت في السودان متوقفه على مزاج الموظف ....ربنا يصلح الحال باذن الله.
احترامي وتقديري |
الوالد بخير وعافية الحمد لله الموظفين فى السودان محتاجين يتعلموا كيف يتعاملوا مع المواطنيين قبل كل شي المفروض يدوهم دورات تعليمية وتثقيفية مثلاَ ممكن يسفرون برة علشان يتعرفوا ويتعلموا كيف الموظف بتعامل مع المواطن لكن للاسف اكبر راس في البلد مامتعلم وراسوا فاضي حا يتعلموا كيف !! انا والله لما اشوف واقرى الحاجات زى دى كل مرة بمشى ابوس راس ابوى وبشكروا انوا انقذنا من بلد فيها الانسان ما محترم ولا عندوا قيمة ياخى انا لو عاوزة اجدد بطاقة سواقة ولا جواز بقدم اون لاين وبوصلنى بالبريد لو مشيت بنفسي اول شي الموظف ببتسم ويقول ليك صباح الخير عزيزى او عزيزتى وكيف ممكن اخدمك دا في كندا الكلام دا طبعا مافى مقارنة لانوا كندا غير كذلك فى قطر بنجد كل الاحترام والمعاملة الطيبة من قبل الموظفيين ماعدا الموظفين الفى السودان كل واحد حاقد وشايل هم الدنيا فى راسوا يجي يتنفس في المواطنين المساكين ديل والله حاجة تحزن اسمع الرقم الوطنى دا شنو وبعملوا بي شنو ؟؟
| |
|
|
|
|
|
|
Re: رحلة أم العيال بين الرقم الوطني والجوازات في السودان (Re: وضاحة)
|
Quote: أخي عبد العزيز محمد عمر(العطبراوي)
أشكر كل الشكر الجزيل على التصويب ...مرات الدقسه مفيدة جدا ..والدليل التقيت بك في هذا الحوش الكبير ..وكمان من عطبرة الجميلة.
انا والدتي من عطبرة ..المربعات بالقرب من محطة حليمة ماضي.
لك احترامي وتقديري أخي عبد العزيز |
يا سلااااااام
إيه الجمال دا ياااخ
أجدع ناس ، أهلنا ناس المربعات .... وانت جاي من شارع كسلا تمشي شرق.. تخرم بالدرجة .... وتمشي جنب الفحامة وسوق الخرفان لحدي مدرسة الخدمات ....
تلقاني لسه قاااااعد منتظر ( الفورموست )...
أها .. ( رحلت ) ولا ( رحلة )..
حبابك الف ... انت عطبراوي كامل الدسم .
الشغيل
| |
|
|
|
|
|
|
Re: رحلة أم العيال بين الرقم الوطني والجوازات في السودان (Re: حسين عمر الفكي)
|
الوالد بخير وعافية الحمد لله الموظفين فى السودان محتاجين يتعلموا كيف يتعاملوا مع المواطنيين قبل كل شي المفروض يدوهم دورات تعليمية وتثقيفية مثلاَ ممكن يسفرون برة علشان يتعرفوا ويتعلموا كيف الموظف بتعامل مع المواطن لكن للاسف اكبر راس في البلد مامتعلم وراسوا فاضي حا يتعلموا كيف !! انا والله لما اشوف واقرى الحاجات زى دى كل مرة بمشى ابوس راس ابوى وبشكروا انوا انقذنا من بلد فيها الانسان ما محترم ولا عندوا قيمة ياخى انا لو عاوزة اجدد بطاقة سواقة ولا جواز بقدم اون لاين وبوصلنى بالبريد لو مشيت بنفسي اول شي الموظف ببتسم ويقول ليك صباح الخير عزيزى او عزيزتى وكيف ممكن اخدمك دا في كندا الكلام دا طبعا مافى مقارنة لانوا كندا غير كذلك فى قطر بنجد كل الاحترام والمعاملة الطيبة من قبل الموظفيين ماعدا الموظفين الفى السودان كل واحد حاقد وشايل هم الدنيا فى راسوا يجي يتنفس في المواطنين المساكين ديل والله حاجة تحزن اسمع الرقم الوطنى دا شنو وبعملوا بي شنو ؟؟
وضاحة
كلامك في محلو تماما....معظم الموظفون السودانيون داخل وخارج السودان يحتاجون الى اعادة تأهيل في فن المعاملة مع الجمهور.
أما الرقم الوطني يا وضاحة هي الهوية السودانية.. وأصبح مهم جدا ...ماعندك رقم ما بتقدري تتحركي بوصة...كل المعاملات من استخراج جواز..تقديم للجامعات تقديم لوظيفة معينة ..شراء قطعة اومنزل ووو.......بالرقم الوطني.
احترامي
| |
|
|
|
|
|
|
Re: رحلة أم العيال بين الرقم الوطني والجوازات في السودان (Re: حسين عمر الفكي)
|
رجعنا..ورجعت الشبكة بكل قوتها العظمي ..وبداءت الاجراءات بصورة طيبة ..وكان الوعد باستلام الجوازات بعد أسبوع ..وقد كان .
وحمدنا الله حمدا كثيرا... وبعد أسبوع حضروا الوليدات الى الدوحة بعد اجازة غير سعيدة بين الرقم الوطني والجوازات .
وفي المطار أخذت اتصفح صفحات الجواز الجديد ..للاسف وجدت اسمي مكتوب خطأ ثلاثة مرات بالانجليزي في جوازاتهم..ابني عمر (omer husien)
ابني علي (Ali hussein) ابني أحمد(Ahmed hussien) بالرقم من الاسم واضح وضوح الشمس في شهادة الميلاد Hussain ..والله والله على ما اقولة شهيد دا الحاصل.
اسع اخوكم حيران اعمل شنو؟ الاسم غير مطابق ..افيدوني وجزاءكم الله خيرا..الوليدات عايز اقدم لية في اللوتري.
| |
|
|
|
|
|
|
|