كتب الكاتب الفاتح جبرا المتوفرة بمعرض الدوحة
|
|
 مغتربة كان الكف فى أستقبالها بمطار الخرطوم
|
منذ نزولها من الطائرة بدأت بالشكوى خلاص جينا للبشتنة والسخانة وال###### وتهبب في نفسها بى طرف التوب دخلت صف الجوازات تنفخ وتتذمر انتظار الشنط من السير نفس الضجر والتذمر وهى طالعة ومعها العامل الذى يدفع عربة عفشها وعند بوابة الخروج من الصالة ذودت العيار وصار كانما تصرخ وباعلى صوتها تردد جينا خلاص للسودان والبشتنة وال###### والعواليق وينبرى لها عشا البيتات وكف صاموتى جعل كل من في صالة الاستقبال يقطع الحديث ويتابع هذا الحدث صرخت فية سوف احضر لك من يؤدبك تضربني سوف اقطع يدك . عشا البياتات لم يزيد اكثر من ان قال لها ( السودان دا جاك ولاجيتيهو كلو الا السودان نبذى حكومة وزراء السودان لا وذكر لها اسمة ومحل عملة وقال ليها اكبر ما عندك جيبيهو حصل هذا في مطار الخرطوم . والما مصدقنا يسال أصحاب الليموزين وأصحاب التاكسي الواقفة في المطار.
|
|
 
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: الزنجي)
|
| Quote: اذا صحت الواقعة كما تفضلت، فليس هنالك من سبب يمنح الرجل حق ان يضرب إمرأة بهذه الطريقة المشينة والتي تضعه تحت طائلة القانون، أو القصاص من طرف هذه السيدة وأهلها !! |
طيب يا سيف اليزل, إتفقنا معاك بأنه ما من حقه يضرب إمرأة, لكن هل من حقها تسيئ إلي السودان؟ طبعا ده إذا صحت المعلومات الواردة
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: aosman)
|
عفيت منو مقنع الكاشقات
تسلم البطن الجابتو
بالله النسوان ديل خصوصا المغتربات بالخليج اتعودن على الدلفري والراحات والنوم لحدي الساعة 3 عصراً
ولمليم الدهب ويجن يكشبن بيهو في السودان على الشقيات وتعبانات يربن ويقرن ويغسلن ويكون ويكنسن
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: عبد الله شم)
|
Quote: بالله النسوان ديل خصوصا المغتربات بالخليج اتعودن على الدلفري والراحات والنوم لحدي الساعة 3 عصراً
ولمليم الدهب ويجن يكشبن بيهو في السودان على الشقيات وتعبانات يربن ويقرن ويغسلن ويكون ويكنسن |
ده كان زمااااااااان زمن النسوان بمشو شنطه مع الراجل .... مش النسوان البفتشن فى الرزق ومشاركة الرجال معترك الحياة و ايد فى ايد تجدع بعيد ..
تحيات واحترامات اخوي عبدالله ......
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: الزنجي)
|
سلامات أخى الصادق,,| Quote: الرجل السوداني دا مافي زيو - رغم انو الرجولة اندثرت قليلاً جداً |
غايتو لو الرجولة أن تضرب بالكف إمرأة غريبة عنك ولم تفعل شيئا سوى التذمر والتأفف من حال البلد!!!!!
فعلى الرجولة السلام!!
الرجولة المطلوبة الآن هى رجولة من إعتدى على بنتهم وأختهم وزوجها وكل أهلها,,
لو وجدت وبنفس منطق أخونا الراجل شديييد دا إلا يشوف ليهو جحر قنفد,,
تحياتى,,
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: أيمن الطيب)
|
.
| Quote: طيب يا سيف اليزل, إتفقنا معاك بأنه ما من حقه يضرب إمرأة, لكن هل من حقها تسيئ إلي السودان؟ طبعا ده إذا صحت المعلومات الواردة |
انتم لم تقولوا بانه ما من حقه يضرب إمرأة! بل جعلتم منه "عشا بايتات" عديل !! وكمان تتساءلون إذا صحت المعلومات الواردة!
الشعب السوداني كله نساء ورجال وأطفال يتضجر ويتذمر ويشكو ويلعن خاش البلد، لكن الفلاحة في مواجهة "بشتنة" الوطن يجدها البعض في هذا الإعتداء المهزوم!!
.
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: سيف اليزل الماحي)
|
هي لمن تسيئ للسودان أساءت لنفسها أولا ، ولكن ليس من حق أحد أن يضربها وإن كانت الحجة أنه سوداني غيور وهي سودانية ، يا خي كيف لرجل أن يضرب إمرأة ، الرجل الصحيح لا يضرب المرأة وليست من الرجولة ولا من الفراسة أن تمد يدك على حرمة .
يا أخي لو أن خلاص حريص ومقهور من كلامها ، أشتكيها في القانون وهو الفاصل .
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: سيف اليزل الماحي)
|
سلامات يا شمّ,,
| Quote: عفيت منو مقنع الكاشفات |
مقنع الكاشفات الللبنات كفات ...
السموهو أهلو الضوء يا عبدالله والعرفوه الناس بالرجالة وحرارة القلب والشهامة والمروءة أصلو قبل كدا مافى زول قال لينا الزول دا بدق
البنات والنسوان حتى لو نسوانو وبناتو!!
هذا شخص منحرف وقد إرتكب جريمة والدليل هو القانون الذى وإن لم يردعه لكنه يجرم الفعل نفسه !!
دعك من حكمنا عليه وعلى أخلاقه فلا يمكن يكون مقنع كاشفات !!
معيارك قد إختل قليلا يا رجل,,
تحياتى
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: أيمن الطيب)
|
الاخ ايمن
شعللتها .
بعد اجازه العيد القريب ده و انا راجع . عند ركوب البص الي الطائره واحد زاحم واحده في البوابه . الزول الزاحمها لابس قميص راقي نص كم و العمر فوق ال40 سنه و اقل من ال 50 سنه الشعر تفه و اسود سواد الليل و الجسم غليد و الوش كبير و اللون اصفر و الشنب اقول يا غربتي اقدل فوقه السوسيو و تعلو الشكل العام وسامه . المهم اظنو عصر البت عصره حاره .
كلمت اخوها زوجها الله اعلم . زول لابس قميس اي كلام عمره بين ال 20 و ال 30 سنه و شنب عادي ضل سبلوقه . جا طوالي و بكل هدوء ياخي الحصل شنو . زولك اب شنبا لامع رفع صوته و قال ليه انا ما عملته اي حاجه . زولنا اب شنب العادي ضل سبلوقه ، اتلفت علي الوليه و قال ليها حصل شنو ، قالت ليه عصرني ، وين الله اعلم ، سمعنا واااااااااااااااااااي .
زولك اب شنب لامع طلع عشا بايتات صيني ، و جنس كواريك ، المهم زولك اب شنب عادي ضل سبلوقه ما بتكلم بس نمر مع جاموس و لا نفس . نسمع كرو كرو ، الطياره اتخرت ساعتين عن موعد الاقلاع و السبب كان عشا بايتات صيني عصر بت عندها عشا بايتات سوداني .
محمد احمد سعيد اها زولك يا ربي صيني و له سوداني .
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: الزبير بشير)
|
| Quote: جينا خلاص للسودان والبشتنة وال###### والعواليق وينبرى لها عشا البيتات وكف صاموتى جعل كل من في صالة الاستقبال يقطع الحديث ويتابع هذا الحدث صرخت فية سوف احضر لك من يؤدبك تضربني سوف اقطع يدك . عشا البياتات لم يزيد اكثر من ان قال لها ( السودان دا جاك ولاجيتيهو كلو الا السودان نبذى حكومة وزراء السودان لا وذكر لها اسمة ومحل عملة وقال ليها اكبر ما عندك جيبيهو حصل هذا في مطار الخرطوم . والما مصدقنا يسال أصحاب الليموزين وأصحاب التاكسي الواقفة في المطار. |
هذا سلوك أهوج!
أن تضرب كفاً سلوك إجرامي و حسب
أي محاولات غبية لتبربر هذا السلوك العنقالي الهمجي يعكس
غياب ثقافة دولة القانون و حكمه
بل برقي لتشجيع السلوك البربري
هذا الفبي يحتاج للسجن لتأديبه و حسب
و الدفاع عن السودان لايحتاج للدفاع عن بؤس مطار الخرطوم
بل العكس هو الصحيح: من يحتج علي وضع المطار المتخلف هو من يحب السودلن
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: الزبير بشير)
|
شنو يا جماعة شابكننا عشا البايتات والا عشا النائمات !
واقسم بالله العظيم هذا الرجل دلوكه وما عنده نخوة ولا رجولة بتعريفة وانا لو حاضر الموقف ده ادخل ليه فى بطنه !
هو السودان ده حق ابوه .. هى سودانية كما هو سودانى , وبعدين هو لو راجل ما يمشى لرقاص القصر الجمهورى الذى اساء للسودان ولانسان السودان واحتقره لمدة 25 سنة ومازال !
فلاحتو ورجالة بس فى النسوان وبعدين الزولة دى اكيد بتكون اتضايقت من سوء التعامل من ناس الجوازات ومن ناس الجمارك ومن تاخير الشنط والصفوف الطويلة واللامبالاة البتحدث من المسئولين وهى بتنبذ فى الوضع ده وكتيرين بيحصل ليهم الموقف ده وبيسبوا .. يعنى ما هى الحالة الاولى ولا حتكون الاخيرة !
الزول ده مالى ايدو وعند ضهر فى النظام لو ما طلع رجل امن او مباحث , لانو يستحيل مواطن عادى يتصرف التصرف ده !
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: ismeil abbas)
|
بالجد ناس السودان ما عارفين السودان سخانة تلهب قدر شنو؟
بعد غياب دام حوالى 17 سنة .. عدت، كانت السخانة فى سلم الطائرة تلهب وجهى كما شهاب النار .. هذه المرأة لو ملصت ملابسها ومشت زنط تب .. معاها حق .. طبيعة السودان قاسية جداً لزول عائد من المناطق الباردة .. ولما تضيف لذلك الضيق ضيق أخر يكون الله فى عون المرء .. أو قولوا عون المرأة المسكينة.
يعنى المرأة دى ذى الزول أتقلبت بيهو عربية .. يقوم يضهرب إلا تلطعو كف جامد حتى يفيق إلى رشده .. عشا البايتات قام بالازم ..
بريمة
| |
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: بريمة محمد)
|
طيب اخونا عشا البايتات دا غشاءه دا الا على النسوان والولايا
ماشفناه عشى ليه مسؤول اختلس ..ونهب ..وسرق
ولا عشى ليه مسؤول عن وفاة المرضى بالاهمال ..
ولا عشى ليه مسؤول عن موت الناس بالامطار والسيول وصقع الكهرباء
ولا عشى ليه مسؤؤل خلانا ننهزم فى عقر دارنا 3 صفر ..
ولاعشى ليه مسؤول ....الخ
خليه يمسك من طرف ويعشى ....مش برضه نفس المنطق ...
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: ismeil abbas)
|
الوطن له محبة في النفس ونغير عليه كما نغير على عروضنا
ولكن ليس ذلك مبرر لتصرف أهوج يخالف القانون والعرف
فالعيب كل العيب أن تمد يدك لحرمة مهما كانت الدوافع حتى لو كانت شخصية ناهيك عن شأن عام
ثانياً كثيراً ما نعبر عن إستيائنا بصوت مسموع في الأماكن العامة ، فهك يمنح ذلك الحق لأي كائن أن يعتدي على بدافع الوطنية
أحي العزيز محمد أحمد ـ وين ناش عشاء البايتات ـ ديل ماتوا في كرري زمان
| |
|
|
|
|
|
|
|
|
 Re: مغتربة كان الكف فى أستقبالها بمطار الخرطوم (Re: محمد علي البصير)
|
Quote:
بالجد ناس السودان ما عارفين السودان سخانة تلهب قدر شنو؟
بعد غياب دام حوالى 17 سنة .. عدت، كانت السخانة فى سلم الطائرة تلهب وجهى كما شهاب النار .. هذه المرأة لو ملصت ملابسها ومشت زنط تب .. معاها حق .. طبيعة السودان قاسية جداً لزول عائد من المناطق الباردة .. ولما تضيف لذلك الضيق ضيق أخر يكون الله فى عون المرء .. أو قولوا عون المرأة المسكينة.
يعنى المرأة دى ذى الزول أتقلبت بيهو عربية .. يقوم يضهرب إلا تلطعو كف جامد حتى يفيق إلى رشده .. عشا البايتات قام بالازم ..
بريمة
بريمة محمد
***
...
|
عزالدين عباس الفحل
ابوظبي
...
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: عزالدين عباس الفحل)
|
أخي ايمن الطيب
Quote: سلامات أخى الصادق,,
غايتو لو الرجولة أن تضرب بالكف إمرأة غريبة عنك ولم تفعل شيئا سوى التذمر والتأفف من حال البلد!!!!!
فعلى الرجولة السلام!!
الرجولة المطلوبة الآن هى رجولة من إعتدى على بنتهم وأختهم وزوجها وكل أهلها,,
لو وجدت وبنفس منطق أخونا الراجل شديييد دا إلا يشوف ليهو جحر قنفد,,
تحياتى, |
ولك من التحايا ما تعجز عن حلمها الجبال الشاهقات
في سنة كم وسبعين كدا كانت حبوبتي اخت جدي مريضة في المستشفى وجدي دا ابو امي
كان طالع من المستشفى وقريب من البوابة حقت مستشفى مدني جات ممرضة داخلة لابسة ليها توب ابيض خفيف وفستان قصير وكعب عالي وماشة علي راحتها وكل المستشفى متنشن معاها
قام جدي مشى عليها عديييييييل واول ما وصلها اداها كف قوي لمن اترتحت في الواطة وقعدت تبكي
قال ليها قومي انتي ابوك منو انا اكيد بعرفو وعشان تاني ما تلبسي لبس زي دا انا ضربتك عشان تحترمي نفسك وتحترمي ابوك التعب فيك
الكف دا كان بمثابة ادب لها وانتقلت البنت من اقصى اليسار الى اقصى اليمين
الكف دا ما عشان هو راجل وهي إمرأة ولكن هذا النوع من الرجال يحمل قيم كبيرة قد لا يعرفها الكثير منا
وضربه لها لأنه يحب بلده وأنا أؤكد لك ان مثل هذا الرجل لو قابله البشير بنفسه لضربه بالكف حتى يصحو من سباته وتتعالج ركبتيه الاتنين كمان
الضرب ليس لأنها إمرأة ولكن انظر لقيمة السودان في قلب هذا الرجل واحكم بعدها
لك التحية
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: محمد علي البصير)
|
| Quote: إتفقنا معاك بأنه ما من حقه يضرب إمرأة, لكن هل من حقها تسيئ إلي السودان؟ |
نعم من حقها ومن حقها حرق علم السودان نفسه
التعبير حق ولكن قد نختلف في محتواه
والاختلاف لايعطي للاخر الاعتداء علي المعبر
ولكن التعبير المضاد والسلمي
الاعتداء علي هذه السيده جريمه ومن المؤسف تشجيع هذه الممارسات
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Muhib)
|
| Quote: طيب يا سيف اليزل, إتفقنا معاك بأنه ما من حقه يضرب إمرأة, لكن هل من حقها تسيئ إلي السودان؟ |
اسوأ ما فعلته الإنقاذ و موجة الإسلام السياسي هو هذا التشويه الذي اصاب العقول
| Quote: وينبرى لها عشا البيتات وكف صاموتى |
حتى تراثنا اللغوي أصابه التشويه
عشا البايات وصف للرجل الذي يمعن في إحترام المرأة و تكريمها
فما ابعد المسافة بين عشا البايتات و كفات البنات
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Hafiz Bashir)
|
يضربوا الضريب كسار العناقريب.. أو كما يقلن ..
الزول دة ما سمع شيئ من الأدب النبوي ( رفقاً بالقوارير )
( إنما النساء شقائق الرجال ما أكرمهن إلا كريم وما أهانهن إلا لئيم )
زولة البلد ما عاجباها و الوضع ما عاجبها و من حقها تعبر عن رأيها
و تقول زي ما تقول ..
و ما عندو أي حق يضربها ،،
لو عندو رجالة يمشي يضرب الناس الطلعو ميتين أم البلد ..
عينو في الفيل و يكفت في المرا ؟؟
لا تقول لي سوداني و قلبو حار و لا جن أحمر ..
دي أسمها قلة أدب و بس ..
و الزول دة ما ما لقى ليهو راجل يأدبو..
و الغريبة إنو في ناس فرحانين هنا بما فعل
يا أخوانا ما تشيلكم الهاشمية ساكت ..
الغلط غلط ..
وحتى أفترضنا أنو لو الزولة دي غلطت ..
و أنا ما شايفها غلطانة ..
فالغلط الأكبر غلط من أعتدى عليها ..
وغلط من شاهده يفعل ذلك ..
و جاء ليحدث عنه بلا خجلة ..
..
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Muhib)
|
Quote: ولك من التحايا ما تعجز عن حلمها الجبال الشاهقات
في سنة كم وسبعين كدا كانت حبوبتي اخت جدي مريضة في المستشفى وجدي دا ابو امي
كان طالع من المستشفى وقريب من البوابة حقت مستشفى مدني جات ممرضة داخلة لابسة ليها توب ابيض خفيف وفستان قصير وكعب عالي وماشة علي راحتها وكل المستشفى متنشن معاها
قام جدي مشى عليها عديييييييل واول ما وصلها اداها كف قوي لمن اترتحت في الواطة وقعدت تبكي
قال ليها قومي انتي ابوك منو انا اكيد بعرفو وعشان تاني ما تلبسي لبس زي دا انا ضربتك عشان تحترمي نفسك وتحترمي ابوك التعب فيك
الكف دا كان بمثابة ادب لها وانتقلت البنت من اقصى اليسار الى اقصى اليمين
الكف دا ما عشان هو راجل وهي إمرأة ولكن هذا النوع من الرجال يحمل قيم كبيرة قد لا يعرفها الكثير منا
وضربه لها لأنه يحب بلده وأنا أؤكد لك ان مثل هذا الرجل لو قابله البشير بنفسه لضربه بالكف حتى يصحو من سباته وتتعالج ركبتيه الاتنين كمان
الضرب ليس لأنها إمرأة ولكن انظر لقيمة السودان في قلب هذا الرجل واحكم بعدها |
مع كامل إحترامى لك ولجدنا وليمد ألله فى أيامه ويرحمه لو رحل عن الفانية..
يا الصادق فى السبعينات حسب ما أعرف كان لبس القصير هو السائد فى أغلب المدن ومدنى كانت لا تفرق كثيرا عن الخرطوم
وبورتسودان وكوستى والأبيض وكل مدن السودان الكبيرة ,, مدن كانت حية بأنديتها ولياليها الثقافية والفنية ومهرجاناتها
وأفراحها وحراكها الإجتماعى وحتى باراتها كانت مفتوحة وتمازج كل أهل السودان بمختلف دياناتهم وثقافاتهم,,
طالما البنت ليست بنته ولا زوجته فالقانون والعرف والدين نفسه يقول أن هذا التصرف خاطئ ولا يصح إلا الصحيح,
الضرب وضرب النساء تحديدا رغم وقوعه فى كثير من المجتمعات وإرتكاب كثير من الناس له ولكنه يظل سلوكا خاطئا
منهى عنه فى أغلب قوانين الدنيا خاصة عندما يكون فى شكل إعتداء غير مفهوم وغير مبرر,,,
كما هو الحال فى الحالتين القدامنا ديل,,
لك التحايا يا حبيب..
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: أيمن الطيب)
|
صحي الرجال ماتو في كرري. لو مخلوق زي ده يعتدي على امراه بالضرب و نقول عليه عشاء البايتات على الدنيا السلام.
عبدالله شم. كلامك فيه حقد عجيب على المغتربات. الله ريحهن من الشقاوه انت عاوزهن يشقن لي؟
من بتين في راجل في السودان بيمد يزه على مرا؟ عجبي.
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: وضاحة)
|
Quote: جالتو في ضرب إمراءة ماياهو السودانيين ديل في الداخل والخارج بيلعنو ، بقت علي الغلبانه دي ؟
اقسم بالله لو كنت من أهل هذة المراءة ما أخليهو يشم الهواء تاني .
ولي أمر هذة الغلبانه يمشي يقطع ليهو يدو ومن بعدها عنقه ويعلقو في أقرب شجرة واليحصل يحصل . |
الاخ عادل الباهي كفيت واتفق معاك وازيد حبة لوعندها وليان المفروووض يقطعوا يده وان فشلوا في اخذ حقهم القانون ويكملوها معاه ده شخص مريييض
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: محمد المسلمي)
|
| Quote: هذا الرجل المعتوه الذي ضرب هذه المرأة المسكينة كان حري به ان يضرب الحيكومة في اي مكان موجع حتى يتنفس و يستريح من عناء القهر الذي يحمله بسبب ما فعلته به هذه الحيكومة القاهرة و المذلة لشعبها |
معقولة الزول الارعن ده يطلع في نظركم ابو الرجال وعشا البايتات
هههههههههههههههههههه عالم عجيبة والله
قال اداها كف وقال ليها إلا السودان هههههههههههههههه بالله خلاص الحيكومة دي يوميا بتذل في البلد وناس البلد وتسب وتلعن فيكم ومطلعاكم شحاتين ومتسولين وتبيع فيكم وتاكلكم لحم الحمير
فعلا الاستحمار اثر فينا وقت نقول لزول يضرب مرا انه عشا البايتات
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: وضاحة)
|
Quote:
ود الباهي روق المنقه شوية
مافي داعي لي تخلع النسوان يعني نحن كسودانين عارفين حال بلدنا وما غريب علينا بس في نسوان عندهم حب الظهور والتخلع قدام الناس وده عيب
في حق اي زول خصوصا في وضع البلد
لك من التحايا اجزلها
كسره :
ان شفتها تاني بقطع فيها كف صاموتي |
ياسيد أبراهيم في البدء حبابك في حوش بكري وأنشاءالله تكون إضافة إيجابية
ياحبوب أنا ماعارف الناس بتبرر للزول الاهوج دا فعلتو كيف ؟ السفر دا قطعة من نار
والله نحن الرجال الواحد لمن يسافر بيوصل قافلا معاهو وخاصة أذا كانت نواحي السودان
ومطار الخرطوم وماأدراك ما مطار الخرطوم العفش ماوصل ، الحرامية الشغالين جوا المطار
يمعطو ليك الشنطة بمطوة ويشيلو ماخف وزنه وغلي ثمنه والخ الناس مفترض تدي الناس أعذار
من ارهاق وغيره ، والزول الاهوج دا لو خلاس قلبو علي السودان اليمشي يفتح فيها بلاغ والقانون
يأخذ مجراه ، لكن بطل الكرتون بتاعكم دا عاوز يطلع مافي جوفه من إحباطات ويضاري فشله في صفع
إمراءة لا ذنب لها غير ارادت أن تعبر عن مافي نفسها من جراء سفرية مرهقة ومتعبة بصوت مسموع .
ومازلت عند رائي أولياء هذة المراءة لازم يعملو للمعتـــــــــــوة دا عاهه مستديمة علي أسوء الفروض
حتي يصبح عظه لغيره .
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: وضاحة)
|
Quote: يا عبد الله شم
انت زول مقرف وفهمك محدود |
وضاحة لاول واخر مرة ارجو ان تحسني اسلوب مخاطبتي فليس بيني وبينك شئ يستحق ان تسئ لي .
Quote:
النسوان القلتهم ديل جاهلات واكيد جايين من بيئة متخلفه ما عندها احترام للزمن
واذا كان ديل نسوان المغتربين البتعرفهم دي مشكلتك فما تعمم ناسك على الاخرين
|
حينما تذكر النساء هنا وفي الاسافير تذكر من شذن عن بقية النساء بالسئ وبالجميل
بامكانك ان تسألب عدد من المغتربين بدول الخليج عن ما لفتن الانظار هناك
لا تساليه عن الطبيبة التي تمارس مهنتها وبكل تقدير ولا عن المعلمة ولا الاستاذه ولا ....
اسالي عن من تسببن في مشاكل لازواجهن او للسودان كل
لذلك انا كتب عن ما لفتن نظري ..
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Dania Elmaki)
|
Quote: عبدالله شم. كلامك فيه حقد عجيب على المغتربات. الله ريحهن من الشقاوه انت عاوزهن يشقن لي؟
|
دانيا يا أخيه ليه احقد انا
في رايك ما عندي الاخوات المغتربات ومكافحات
كتبت عن من شذن عن القاعدة وفي النهاية كل بنات السودان اخواتنا
طالما يسُمح لنا بممارسة دور الاخوه عليها
| |
|
|
|
|
|
|
|
|
 ماهو التعريف الصحيح لي عشا البايتات؟ (Re: Mohammed Ahmed Saeed)
|
كلنا مقتنعين أي شي في السودان صورة مقلوبة
لكن الأخت سلوكا فيو شي من الرعونة وعدم التقدير للذوق العام
لكن كمان السميتوو عشا البايتات دا ما أظنو إعشي
ليو حمامة والزول دا مافيو ذرة رجولة مع الإدانة التامة لسلوك الأخت
ـــــــــــــــــــ
الحليلة
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: elhilayla)
|
Quote: عفيت منو مقنع الكاشقات
تسلم البطن الجابتو
بالله النسوان ديل خصوصا المغتربات بالخليج اتعودن على الدلفري والراحات والنوم لحدي الساعة 3 عصراً
ولمليم الدهب ويجن يكشبن بيهو في السودان على الشقيات وتعبانات يربن ويقرن ويغسلن ويكون ويكنسن |
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: elhilayla)
|
في التمانينات كان في عروض سينما في قاعة الصداقة بالنهار ... مرة الفيلم خلص الساعة 2 ظهرا تقريبا وكان الجو داخل القاعة بارد برودة عجيبة ... طلعنا برة القاعة ولفحتنا ليك السخانة العجيبة ديك وكانت درجة الحرارة مرتفعة جدا ... واحد علق قال ... خلاص طلعنا من الجنة للنار  ... الناس جوة السودان قاعدين يشكوا لطوب الارض ... بس بقت على المسكينة دي يعني ...
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: قسم الفضيل مضوي محمد)
|
سؤال للناس المتفقة على الكف وضرب المرأة
هل ترضى شخص غريب يرفع يده ويضرب
أمك أختك زوجتك قريبتك أمام خلق الله بهذه الطريقة
بسبب أنها شكت من حالة معينة أم تظل ساكت دون أن تتحرك
وتأخذ بحقك أو تذهب للشخص الجاني تمدحه وتقول له عفيت منك
وتطلب منه أن يصفعك أنت أيضاً.
اليومين دي عندنا هنا واحد لاعب كرة قدم إمريكية قبل كذا
شهر مد يده على خطيبته آنذاك والتي أصبحت زوجته فيما بعد
وضربها في الأصانصير. ظهر حادث الضرب في فيديو كاملاً
وأصبح حديث عامة الناس في أمريكا كلف اللاعب خسارة كبيرة
وتم إقالته من صفوف التيم.
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: عزيز عيسى)
|
اقترح ان يراجع كل من تعاطف مع هذا الحيوان نفسو
ويمسح مداخلتوا ولمفترع البوست أقول ليهو دا فعل شين ما بيشبه الرجال الصاح
الرجل دا عنده عقد شخصية متراكمة من المغتربين وخصوصا النسوان
وجايي يفكها في اختنا دي
الذي رايته انا في ما يسمى مطار الخرطوم يعطي هذه المرأة المحترمة الحق في ان تقول ما تشاء
اهل هذه المرأة مطالبون برد اعتبار هذه المرأة بالقانون وليس بأيديهم ان كان في البلد قانون
وانا احتمال امشي السودان قريب وتلفوني في البروفايل واتحداه يلاقيني في مطار الخرطوم وحا أقول اكتر مما قالتو المرة دي اتحداه يرفع عينو في عيني
عشان نشوف عشاء البايتات دا
أما مسخرة وقلة ادب.
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: عزيز عيسى)
|
الاخ محمد سيد احمد وضيوفه بتاعين عشاء البايتات تحديداً
عشاكم دا يتعشي حجار من جبال السليت ان شاء الله
عشاء بايتاتكم دا لا شاف النهب والفساد والحروب المتنقلة والمحسوبية والرشاوي ولا تقارير المراجع العام لدرجة عينو ابو قناية عشان يشوف الحاصل فيها شنو ولا شاف الطيارات البتضرب وتقوم وزول جايب خبرها مافي ولا شاف الغلاء ولا شاف السيول
دا كله اعمى منو، العمي اليقودوهو منو بركة من صلى وقال يا الله
ديل كلهن ما شافهن ولا اترجل فيهن ولا سوى فيهن عنتر وجايين تبقوهو لينا بطل عشان ضرب ليهو مرة كف؟ !!!! انت بصحكم ولا بتهزرو؟
دي معايير عهد الصحابة الجدد انه البضرب ليهو مرة كف يبقى عشاء بايتات؟
عشا البايتات البنعرفو والغنن ليهو الحريم هو البسترهن ويغطي عليهن ويحفظ كرامتهن ويموت وهو بدافع عنهن
وبعدين هو براهو السوداني؟ ولا البلد حقت ابوهو وهي ما عندها فيها حاجة؟
قرف يقرفو التليفة الما بشبه الرجال ويقرف البدافعو عنو ومطلعنو بطل
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: قسم الفضيل مضوي محمد)
|
تصرف أرعن من رجل موتور في بلد ما عندها وجيع.
مشاجرة حدثت في السوق الأفرنجي بين أتنين وواحد فيهم نبز
الآخر بـ "ياعب"! وإستعان المشتوم بشرطي مر بالمكان وأظنوا يعرف
الشاتم وقال ليهوا الزول دا قال لي يا "عب"!! بكل بساطة جنابوا قال
ليهوا ما أنت "عب" أنا أعمل ليك شنوا؟؟!!
فما غريب إنوا يكون في مصفقين بيننا للتصرف الأحمق دا!
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: Ahmed Alim)
|
بالله دى بقت الرجالة فى السودان???
و باقى (الرجال) فى المطار ما قالوا شيء????
__________
يا سودانيات....من الان خليكم واعيات فى السودان. عشان الواحدة ممكن يجيها كف طاير. خلى جزمتك قريبة. اللى بيمد يده عليك تديه بالجزمة فى وشه طوالى.
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: Ahmed Alim)
|
انتو من زمن الحريم ؟
و كمان واحد بيقول عنها انثى !!!
يا جماعة ما قلتو مساواة و حقوق متساوية الحصل شنو
اكثر ما يعيب على الذين يرفضون هذا التصرف انهم يتخذون من ضعف المرأة ذريعة للاستهجان بينما في نواح اخرى تجدهم يساوون المرأة بالرجل
اليس الاولى بهم اعتبار ان هذه الحادثة حدثت بين شخصين فقط شخصين و تجاوز الجندرة ؟ لماذا تجعلون من المرأة كائنا ضعيفا لاحول له و لاقوة حينا و كائنا مساو للرجل احيانا ؟
بوست فضح همة رجل قام بضرب امرأة و افتضح كثيرون مختلون فكريا
مبدئيا ادين هذا السلوك الذي صدر من هذا الرجل و ادين بشده هذه الاساءة التي صدرت من المرأة
| |
|
|
|
|
|
|
|
|
|
Re: ماهو التعريف الصحيح لي عشا البايتات؟ (Re: خالد المبارك)
|
سلوك همجي مشين ومستهجن ما من حقو يضربها كف
هي كالت الشتائم للسودان وإذا كان هذا الفعل يستحق التجريم والعقاب
فالقانون لا يعطي أي شخص الحق أن يطبقه بنفسه
الظاهر هذا الشخص ضهروا قوي ولا يخاف من المساءلة ويأمن العقوبة
لكن اللوم على وليان المرأة المعتدى عليها والله لو رجال صاح لردوا الصاع صاعين مهما تكن النتيجة
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Mohammed Ahmed Saeed)
|
ههههههههه الكلام ده لو قاله اجنبى ممكن تقول ليه معليش بس دى حالة البلد فى الوقت ده المرة جاية تعال زرنا فى الشتاء
بس دى سودانية وفى بلدها ممكن تعبر عن حالة بلدها بالاسلوب ال تقدر عليها يا اخونا دى حالتها ما سبت للحكومة لكان اخدت طلقة فى راسها
ما ارخص الانسان السودانى داخل بلده
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: حسين عبد المجيد)
|
Quote: عبدالله شم. كلامك فيه حقد عجيب على المغتربات. الله ريحهن من الشقاوه انت عاوزهن يشقن لي؟
دانيا يا أخيه ليه احقد انا
في رايك ما عندي الاخوات المغتربات ومكافحات
كتبت عن من شذن عن القاعدة وفي النهاية كل بنات السودان اخواتنا
طالما يسُمح لنا بممارسة دور الاخوه عليها
و انت مالك و مالهن شذن عن القاعده او التزمن بيها و منو البيحدد و شنو المعيار. كلام عجيب. بتفرض نفسك وصي على النساء بصفتك شنو. و يسمح ليك بممارسة دور الاخوة عليها لشنو ؟ صحي والله قلة الشغله بتعلم القرد المشاط. انا شخصيا ارفض اي اخوة لو ده نوعها و حزني على اخواتك و قريباتك. عالم غريب.
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: بارودى مصطفى فاشر)
|
ليس من حقه ان يضرب هذه الست،
تقول زي ما عاوزة، هو السودان دا كان حق ابوهو...
اي واحد يضرب طفل او امرأة، او عجوز، او اي واحد اقل منه قوة بشكل ظاهر...
دا واحد جـبان...
هذا الرجل الذي ضرب هذه الست مريض ونص وخمسة؛
ولو كان دا شاب مفتول العضلات، وقال نفس ما قالته هذه الست ،
لن يضربه كف لانه ببساطة جبـان،
واستفرد بهذه الست الوحيدة...
تفففففففففففف عليه......
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: عبدالمنعم الطيب حسن)
|
Quote: هذا الرجل الذي ضرب هذه الست مريض ونص وخمسة؛
ولو كان دا شاب مفتول العضلات، وقال نفس ما قالته هذه الست ،
لن يضربه كف لانه ببساطة جبـان،
واستفرد بهذه الست الوحيدة... |
عبد المنعم الطيب ممكن تورينا كلمة الست دي معناها شنو ؟؟
ضرب رجل الست
رجل معروف و ضرب فعل ماض لكن الست دي معناها شنو ما عارفين
ممكن توضح ؟؟ !!!!
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: خالد المبارك)
|
!Quote: عبد المنعم الطيب ممكن تورينا كلمة الست دي معناها شنو ؟؟
ضرب رجل الست
رجل معروف و ضرب فعل ماض لكن الست دي معناها شنو ما عارفين
ممكن توضح ؟؟ !!!! |
هههههههههههه
يا خالد المبارك كلمه ست هى كلمه محترمه بستعملوها المصريين وهى مقابل كلمه مره البستعملوها السودانيين
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: عبدالمنعم الطيب حسن)
|
عشاء البايتات ده ماشاف لحم الحمير والمصائب البتحصل فى السودان عشان يسجل بيها موقف بطولي يشتهر بيهو بدل ما يتطاول على واحده غلبانه .
وإحتمال يكون عمل بي نصيحة وزير الصحة وبياكل قعونج عشان البروتين ومافتح خشمو .
هسع الوهم الجاهل ده بيكون مشنق طايقتو وبيحكي للناس عن موقفو البطولي الوطنى ضد السيده الاساءت للسودان .
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: بدرالدين الطائف)
|
اه يا بلد !!!!!!!!
بالله عليكم دى عقليات دى !!!!
صدق من قال :
كيف ما تكونوا يولى عليكم
دائما انا بقول مشكله السودان مش فى افراد وجماعات حاكمه.... مشكله السودان فى طريقه التفكير يعنى
يمشى النميرى يجى الصادق يمشى الصادق يجى البشير يمشى البشير يجى غيروا والحال فى حالوا
يعنى فى البوست دا فقط فى كم دكتاتور وجاهل جو ناطين وفرحانيين على الحصل لهذه الست ؟؟؟؟
يعنى النوعيه دى لو الظروف اتاحت ليهم او لى ذويهم فرصه حكم السودان يا ما نشوف
تحضر الامم والافراد يقاس بمدى تعاملهم مع المرأة واحترامهم لها
من حق هذه الست ان تقول العايزه تقولو وتعبر عن عدم ارتياحها .... السودان دا حق ابو واحد فيكم ... عالم متخلفه
وبعدين الاخ الاسموا مين موش عارفه... البتكلم عن المساواة... تعال هنا النحدثك
المساواة المقصوده والبنطالب بيها هى مساواة المرأة مع الرجل فى القيمه الانسانيه يعنى الرجل والمرأة متساويين فى الانسانيه ومتساويين فى القيمه العقليه ومتساويين امام الله
وليس المقصود المساواة الجسديه (العضل)
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: تبارك شيخ الدين جبريل)
|
يا جماعة
الزول الضرب المرة دا زول قلبه حار، وقالوا دا نفس الزول الأدي عمر البشير شلوت لأنه حال البلد مايل، وفي ناس شافوه ساكي عبد الرحمن الخضر بعكاز في ايام السيول والفيضان، وقبل كدا مسكوه من المتعافي مسك. وعبد الرحيم احمد حسين خلى الشارع البييرجع بيه عشان الزول دا. وناس الأقطان في واحد باع بيته عديل عشان الزول دا ما يعرف البيت ويجي يقتله.
وود العطا بتاع جهاز الأمن قال ليهم الزول دا ما دايرين معاه مشاكل كله كله.
والزول دا من شدة ما وطني، قالوا امبارح لاقوه في الخطوط ما شي مسافر لاحق ناس الفريق القومي داير يدقهم عشان شوهوا صورة السودان بغلبهم الفات.
هسه بس بقت على المرة دي
الزول عشا بايتات وعشا فايتات (ما دايرين يبتوا)
نطالب بباسويرد لهذا الوطني الغيور
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: الصادق صديق سلمان)
|
| Quote: ما قالت وا معتصماه؟؟ |
أضحكتني رغم بؤس الموقف أضحك الله سنك
صراحة أنا ما مستغرب في موقف المتخلف ده ياهو فهمو
لكن المستغرب ليهو أكتر و حزّ في نفسي موقف الرجال الحضور وقت الحادثة ؟
ما فيهم واحد ود مقنّعة يوريهو الله واحد؟
الموقف ما استفز كرامة أى رجل من الحضور ؟
أم الناس كلها صارت تقول نفسي نفسي؟
لعنة الله على الإنقاذ التي قتلت فينا كل معاني الرجولة و الشهامة
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: عزالدين عباس الفحل)
|
المزعلني جد ما الزول الجب*ان بتاع الكف...
دا نص راجل البمد يدو علي مره...
ولا ############*ين القاعدين بتفرجو فيهو...وهو بضرب فيها وما ادوهو علقة نضيفه....رجاله السودانيين شكلها شالها السيل...مع شهامتهم ونخوتهم الزمان...
لكن مزعلني المتخلفين السزجج البكتبو هنا ببررو ويا ايدو ويشكرو فيه...
طممتو بطنا الله يطمم بطونكم...عالم وهم...
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Haitham Elsiddiq)
|
ول أبا عزالدين الفحل
سلامات ..
Quote: بريمة
لا فُـــض فُــوك ،
يسلم عشا البياتات ، |
تصدق الضربة نفسها لم تعجبنى .. ما أعجبنى هو أن عشا الباتيات رأى شيئ خطأ .. وأجتهد فى أن يغيره بيده ..
الكلام دا بقوله عن صدق .. كان هناك اعربة أنقلبت جوار قريتنا فى جنوب كردفان ..
أرتضطمدت العربة فى الناحية اليمنى بمنطقة عالية مثل حافة الخور .. والسائق لف العربة بقوة وأرتضطمدت فى الناحية اليسرى ..
ركاب العربة جميعاً كأنهم فقدوا الوعى .. منهم من حام على وجههه ومنهم من جلس القرفصاء متبلداً .. ومنهم من يصرخ بأعلى صوته ..
شيخ قريتنا قال لأهلنا أضربوهم كفوف .. أى زول أو إمرأة أخذ كفين جامدات حتى فاقوا إلى رشده. فى تلك اللحظة لا يهمنا فيهم مدير أو وزير .. تم تنفيذ الضرب فيهم جميعاً .. ولم يحتج أحد منهم.
أنا لما رجعت السودان .. من مسافة المطار حتى منزل أهلى .. أصابع يدى وأرجلى أشعر بهن تورمن .. وتصببت عرقاً كأنى جارى مارثون .. وشكيت ورغيت وأبدت مثل هذه المرأة .. لكن أحترمونى ساكت مافى زول كشطنى كف.
عشا البايتات .. لازم ندوه the benefit of doubt فيما فعل.
بريمة
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: alsngaq)
|
الناس الذين قالوا أن عشا البايتات جلف ومتحلف ..
نسألهم هل عشا البايتات حاقص فى المطار عشان يضرب النسوان المغتربات؟ .. وإذا أجبنا بالنفى أو الأيجاب يكون حسمنا الأمر ..
ومع صعوبة الأجابة بنعم أو لا .. يصبح المرجعية الوحيدة للفعل هو عشا البايتات نفسه .. لماذا فعل ما فعل.
وفى غيابه تصبح المحاكمات التى تدار هنا تنقصها الحيثيات لأقامة الحجة ضده.
أنا أعطى عشا البايتات حق ال the benefit of doubt بأنه رأى منكراً وغيره بيده.
بريمة
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Mohammed Ahmed Saeed)
|
ههههه عليكم الله من يستاهل الكف
ال اوصل بلادنا الى الوضع ده ولا المسكينة التى تحتج على الوضع المزرى ده
ثانيا لو كانت الضحية رجل هل هذا المتهور يتجرا ? طبعا لا
طبيا الزول ده يعانى من عقدة مركب نقص هى عقدة نفسية معقدة نتيجة لاحساسهم
بالدونية لسبب ماء مثلا يتعرض للاضطهاد من زملاءه فى الشغل لضعف ادائه الوظيفى
او اضطهاد من البيت لضعف اداءه الزوجية مثلا لا حصرا لذك دائما
يبحث عن طريقة لاثبات رجولته دائما ضحاياهم من اضعف الناس نساء اطفال معاقين ال اخره
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: بارودى مصطفى فاشر)
|
كتب العبار بريمة بلل:
Quote: سودانى أصيل ول بلد .. الله يكتر من أمثال عشا البايتات ..
بريمة
|
Quote:
الناس الذين قالوا أن عشا البايتات جلف ومتحلف ..
نسألهم هل عشا البايتات حاقص فى المطار عشان يضرب النسوان المغتربات؟ .. وإذا أجبنا بالنفى أو الأيجاب يكون حسمنا الأمر ..
ومع صعوبة الأجابة بنعم أو لا .. يصبح المرجعية الوحيدة للفعل هو عشا البايتات نفسه .. لماذا فعل ما فعل.
وفى غيابه تصبح المحاكمات التى تدار هنا تنقصها الحيثيات لأقامة الحجة ضده.
أنا أعطى عشا البايتات حق ال the benefit of doubt بأنه رأى منكراً وغيره بيده.
بريمة
|
يا بريمة. أنت عايش في أمريكا لك أكثر من 20 سنة ولسه بتؤيد ضرب النساء؟؟
معقولة بس !
بريمة أختشي.
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Deng)
|
ركاب العربة جميعاً كأنهم فقدوا الوعى .. منهم من حام على وجههه ومنهم من جلس القرفصاء متبلداً .. ومنهم من يصرخ بأعلى صوته ..
يا بريمة. حام على وجهه من حوامة و لا حام قاصد بيها هام على وجهه؟
حام يعني هام لغير الناطقيين باللغه العربي من اللسان المعووج.
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: Dania Elmaki)
|
ما ارتكبه هذا الشخص بحق المراة من الاستقواء على الضعفاء هو مما اصاب السودان في عهد الكيزان
اصبحنا نجد من بيننا الكثيرين ممن يستعرضون على المساكين في حين انهم وفي حضرة صاحب اي سلطة يكونون أذلاء كأشد ما تكون المذلة ولا تجد منهم الا كل التملق
الوضع في السودان وبعد ربع قرن من حكم مافيا الاخوان لا يطاق والفوضى وما يثير الاعصاب والضيق منتشر بدءا من المطار وانتا ماشي
| |
|
|
|
|
|
|
|
|
 Re: مغتربة كان الكف فى أستقبالها بمطار الخرطوم (Re: Abureesh)
|
هل ضرب هذه المرة يعد ضرب من ضروب الرجالة يا من تؤيدون فعل هذا المعنوه !!!!!! من يرضي ان يفعل هكذا باخته او بامه او بزوجته او او ......
كنت في السودان قبل العيد و رايت بام عيني التغيرات الكبيرة الطرأت علي الناس و المجتمع ككل ..... الحالة ما بتسر ... و الواحد لحدي هسة بطنو طامة ............ حقا مريض من يوافق علي فعل هذا المريض ... و الله انا لو في المطار و حاضر الحصل دا الزول دا اصلو ما افكو من يدي الا تجي الشرطة تستلمو
| |
|
|
|
|
|
|
|
|
|
Re: مغتربة كان الكف فى أستقبالها بمطار الخرطوم (Re: مازن فيصل هلال)
|
يا ما زن خليها علي الله شفت فقع المراراه دا؟؟؟ قال عشا بايتات قال!!!
حليلهم ( مقنع الكاشفات عشا البايتات ) اتوسدوا يمينهم من زمان لما كان في عرفنا اي راجل يشتم امراه ناهيك ان يمد يده يشوف مقامه وين في مقاييس الرجوله
. وشايفه هنا كمان جابت ليها مساواه عضليه
عشنا وشفنا يا ناس الزمن دا.
| |
|
|
|
|
|
|
| |
Mohammed Ahmed Saeed
نادر النور آدم
الصادق صديق سلمان
saidahmed shami
الزنجي
aosman
عبد الله شم
عفاف الصادق بابكر
أيمن الطيب
عزالدين عباس الفحل
اسماعيل عبد الله محمد
ولياب
عادل الباهي عبدالرازق
Sayed Ibrahim
الزبير بشير
Adil Isaac
خالد حاكم
ismeil abbas
بريمة محمد
Mohammed Alhasan Mohammed
محمد علي البصير
Muhib
Hafiz Bashir
Dania Elmaki
عبدالعظيم عثمان
Deng
وضاحة
محمد المسلمي
حسين عبد المجيد
elhilayla
قسم الفضيل مضوي محمد
عزيز عيسى
MOHAMMED ELSHEIKH
محمد عمر الفكي
د.محمد بابكر
صالح عبده
Ahmed Alim
smart_ana2001
خالد المبارك
سفيان عثمان قرضيه
عبدالمنعم الطيب حسن
زينب محمد عبدالله
بدرالدين الطائف
تبارك شيخ الدين جبريل
الصادق اسماعيل
Yassir Tayfour
alsngaq
علي محمد الفكي
مهدي صلاح
يحي قباني
Abureesh
doma
فيس بوك
تويتر
انستقرام
يوتيوب
بنتيريست