|
|
 امــشــــاج كــــــــلام.. يوجد فيديو
|
جوايا ليك شتلات كلام
مسقية بي شوق مستهام
راجياها امطار الحنين
وانا في انتظارك
باريت دعاشات البدايات
الغمام
مديت حبال الصبر ليك
عشمان وحاتك في الوصال
مرات تغيبي
ومرات ترشيني ابتسام
اصحى وافيق
والقاك في جواي تعربدي
زي خيول
نافرة
وقدر
ما امسك الحبل اللجام
القاها تاخدني
واطير بين النيازك والنجوم
وارجع معاك
من غير ملام
ما اصلي ردتك
والحروف
جواي امشاج من غرام
خليك معاي
خليكي جواي بتدوزني
فيني انفاس الهوى
وقلبا موله بيك هام
راجيك في ضل المسافة
بين قلبا عشق مضمون رؤاك
وروعة الخاطر
هناك
في الحلة في البيت الوسيع
لمن اساهر والخلوق
هاجعين نيام
اتغطى بي توب النجوم
واسرح مع الطيف الحنون
و الكلمة تتبهرج ظنون
والظنون في حضرتك
اجمل قصايد في الهيام
اقريني بينات السطور
اقريني بين ضو النجوم
اقريني في رعشة حلم وصف ضياك
اقريني بين رعشة نهار لاصف خطاك
اقريني بينات العيون الضاحكة في
لحظة رضا
وانا يا جميلة
بحس معاك العمر يا دوب ابتدا
والكائنات
من الكلام كيفن تكون
تكوين ملامح روعتك كون تكاوين من جنون
في احلا كون
مرات اجن
ومرات اكون بي ضحكتك
مبسوط دوام
وبس
|
|
 
|
|
|
|
د.محمد حسن
فيس بوك
تويتر
انستقرام
يوتيوب
بنتيريست