|
تعالوا النفرة بص الثورة عايز دفرة...( رُكبة ) سيدي.. شعر هاشم صديق
|
قصيدة جديدة
تعالوا النفرة بص الثورة عايز دفرة( رُكبة ) سيدي
شعر : هاشم صديق
يا خلف الله ود عبدالله بص ( الثورة ) مابي يدوِّر كان ( إستارتر ) أو منفلّة كوركنا ننادي هوي يا شباب هوي يا رْجال هوي يا حريم هوي يا شوارع هوي يا نيم يا وِلاد البادية ياوِلاد النيل يا شعب أكتوبر يا شعب أبريل تعالوا ( النفرة )
لزوا معانا بص الثورة إنشاءالله يقوم لو وصَّلنا لباب القصر ( حتي النصر ) في الخرطوم وهُتافنا فطر ما سخسخ يصوم وبلّ حبالو وللحلقوم . .............
يا خلف الله يا ناس الحِلة يا أهل الله لمتين راجين ناس ديك أو ديل في ( شليل ) و ( الحِجْلَة ) لمتين ( حيص بيص ) لمتين الجوع لمتين الذِلّة ؟! . .............. يا خلف الله البلد إتهرست داسا السيل جانا الوالي عيونو حُمر ( حلب الباقة ) ( في الشُنقاقة ) صنقع ودنقر دوّر ولفّ إتمّهل وفكّر إتنحنح وصرّح - ما مطرة شديدة دي ( النقناقة ) وباقي الموية وحتي السيل من ( أوباما ) وإسرائيل . والموت يا جماعة - ومن ما قمنا - ياهو مهمة عزرائيل . ............... آخ خ خ .. يا مهازل لا زعلنا وشلنا جناب الوالي عديل طوالي مرمغنا رويسو جوه الطين لاثُرنا هتفنا يسقط يسقط الغش بالدين . .............. يا خلف الله بعد ما باعوا بلدنا وخيرها باعوا ( العون ) شالوا الخيمة ولبن البدرة وصلصة برة والمكرونة وشوربة ماجي وعجوة مكة وعِلب التونة وصابون فونا والمعجون . شالو العون بالحاويات وبالكرتون . ............. نفس الخمشة الحول الفايت بالكربون . ............ حاجه نفيسة بيتها إتماص الجوع بكّاها جاها الوالي كريم أهداها بس تلفون وللبطن الطامة كمان أداها فص ( ليمون) . ............... يا خلف الله ود عبدالله بص الثورة لا داير يدَوّر كان ( إستارتر ) أو منفلة . جانا ( الصادق ) قال إنتظروا لسه ( الأزمة ) بتغلي وتنضج ؟! جوه الصاج وجا ( أبو هاشم ) وقال يا رعية بفاتحة قوية ( الإنقاذ ) دي بتمرق بالنفاج وجا ( أبوعيسي ) قال ( لينين ) حيسخت ( بشبش ) إبقي كديسة وجانا ( ترابي ) قال يا ناس بحوار ( الوثبة ) الزول دا حيقعد زي ( موقابي ). ........... يا خلف الله ود عبدالله ربع القرن ونحنا رهاين جوه الكُبّة ومن فات الغازي والمستعمر ما شفنا فكي تحت القُبة نثور ونفور نجيب ( الريس ) نقول يتحبا . ويجينا الخير ما ياكلو الطير . لكن يا خسااااره أحلامنا تموت ينضرب الشارع وبالنبوت زرعنا يضيع وعشمنا رضيع وما نحصد حبة . ............. ويتلِّب طاغية يحرمنا العافية ونبقي رهاين لافانا الكُبّة عسكر وكاكي مهازل ورتبة. .............. ( بشبش ) ينقّز ( بشبش ) يعرض ( بشبش ) يرقص لامن بالغ وحلج الرُكبة . ............. ربع القرن والأُمة في كُبّة ياخلف الله ود عبدالله . لا فُرنا وثُرنا بلعنا أسفنا . والطاغية خنقنا قاعد آمن سمين مُطامِن لامن سوّس وبدل رُكبة . .......... يا شعب أكتوبر شعب أبريل أولاد البادية أولاد النيل بص الثورة داير لزّة عرش الطاغية عايز هزّة خرطوم الوالي السيل دكّاها وصبحت ( غزة ) الشعب جعان لابيت لا أمان وناس السُلطة سيلهم ويسكي وكافيارهم مزة . ............. ياخلف الله ود عبدالله بص ( الثورة ) مابي يدوّر كان ( إستارتر ) أو منفِلة كوركنا ننادي هوي يا رجال هوي ياحريم هوي يا شوارع هوي يانيم ياوِلاد البادية يا وِلاد أكتوبر يا شعب أبريل تعالوا ( النفرة ) لِزوا معانا بص الثورة .
11/8/2014م
|
|
|
|
|
|