|
|
 حجيتكم ما بجيتكم
|
ذات مرة وفي شارع ترابي جانبي قبضت قبضة من أثر الخبير ومع شديد الأسف خالط تلك القبضة شئ من لفاضة سفه أو تمباك أو ما شابه ولكن برغم صريتها في دلقان ، أها قمت مشيت للفكي أب أردب وهو رجل وقور مزحوم أكثر من وسط الخرطوم في عز الضهر ، قال لي الجابك شنو بي هنا جاي تفتش الماضي – والماضي هنا يا قوم هو شاكوش مااااكن أصاب دقنوسي فأوردني موارد ما في داعي لذكرها المهم حكاية وإنتهت – فقلت ليهو لا جاي أبحث في الحاضر والمستقبل ، قال لي ما تمشي لي فايقة ست الودع قلت ليهو لا أؤمن بمقدراتها قام إتنفش محاكياً الطاؤوس وقال لي هاتها ، أها تنحنحت وتوهطت في بطن الووواطه دي وقلت ليهو أنا شخص حاصل على درجة البكالوريوس في العلوم السياسية مع مرتبة قطن تحتاج إلى إعادة تنجيد وبدون مخده كمان ومشجع كبير لفريق ديترويت بيستونز ولاعب ضمنه من الطراز الأول وبطل حلتنا في جر النم والدوباي ومن أفضل عشرة قرويين يجيدون صرف العصا بالعصا – دي كان ما عرفتوها أسألوا منها منصور مفتاح – ومن أميز خمسة قرويين في العوم وقت الدميرة بعيداً عن التصنيفات فراشة أو ظهر أو سباحة حرة ، أها بكل مؤهلاتي الموضحة أعلاه داير أسألك ، قال لي أسعل قلت ليهو أها الزول لمن يفكها في نفسو و يصدق الكضبه بيكون من شنو ؟ وهنا تراب من أثر ذلك الكضاب للتحليل والكشف المخبري والسريري كمان.
قال لي يازول هوووي ببساطه كده ده اضطراب عام في التفكير ، قلت ليهو يعني شنو ، قال لي أصبر ما تقاطعني أنا لسه بنضم ، وأى زول بيعاني من هذا المرض بيكون عندو اعتقاد ثابت خاطئ لايتزعزع – شفت التعبير ده كيف يا أخي والله ما بتدي حريف نحن مكانا أبعد من الفروة والخلوة دي - حتى لو اعتقد الاخرون من حوله خلاف ذلك أو أبرزت له أدلة دامغة تنفي ذلك . وهو اعتقاد راسخ في نفس المريض (إنت زولك القاصدو ده منو) يا شيخ أب أردب صلي على الحبيب مالك ومال زولي أحكي بس ، طيب على رأيك أها وقفنا وين ، يا عمك شوت من أي حته ، أيوه أها زول زي ده إعتقادو بيكون عادة زائف أو خيالي أو مبني على الخداع.، زي إعتقاد أولاد محمود في الفكي البالي بالك ، المهم في عالم الطب النفسي ، يتم تعريف الوهم بأنه اعتقاد مرضي (ينتج عن مرض أو عن أحداث مرضية) وهمهم وتمتم ومن لغة الشلاليف قرأت التالي "أقطع ضراعي اليمن وأمشي بي نص شنب كان تكون فهمت حاجه من كلامي ده" ، يا جنا أنهر الغنماية ديك تك تك (ودي زيها وزي أي بريك إعلاني في مسلسل تركي يحبس الأنفاس) ، أها ويستمر المريض في تمسكه بوهمه على الرغم من وجود الدلائل التي تثبت له عكس ما يتوهمه. أما في علم الأمراض، فيتم التمييز بين الوهم وبين الاعتقاد المبني على أساس من الزيف – بس إنت ما قلت لي زولك ده عضو في منتدى سودانيز أونلاين ولا شنو ؟ يا أخي في بعض الأعضاء عندهم مرض إسمو البارافرينيا أسأل الله لي ولهم الشفاء.
البارافرينيا دي شنو كمان يا شيخ أب أردب ، قهقه شيخنا حتى ظننت أنه لن يعاود الكلام مرة أخرىى وفجأة سكت وقال لي إنت يا عمك دافع كم عشان نوريك كل حاجه قوم شتت وشوف ليك قوقل أو غوغل يجيب على سؤالك حياتك كلها ملح ، بي قروشك حلي ضروسك حق الوووواطه ما يملاك حصحاص ، تذكرت السوق الكبير والحرب الأزلية بين من يفترشون الأرض ببضاعتهم وأصحاب المصاطب الجانبية. وقبل أن نواصل الحديث شنف آذاننا صوت بائع جائل يردد "الطلح والشاف ، هونا يا الله لي ود النور أب حماراً محمول" فنظر الشيخ أب أأردب لي نظرة مريبة قرأت من خلالها التساؤل الغير مشروع للشيخ في حق البائع الجائل "دي شغلانه دي"
|
|
  
|
|
|
|
|
|
|
 Re: حجيتكم ما بجيتكم (Re: نعمات عماد)
|
Quote: عشرة قرويين يجيدون صرف العصا بالعصا –
دي كان ما عرفتوها أسألوا منها منصور مفتاح – |
هههههههههههههههههههه،
يا ملانا يا اخي كان شُفت منصور بقى لو قالولوا،
امشي اصرف ماهية ما يقدر يصرفا.
يا زول حجي لآمن يبين القمر بينات الضفاير.
أها قعدنا ورفعنا كرعينا من الدوابي...
| |
|
|
|
|
|
|
|
|
 Re: حجيتكم ما بجيتكم (Re: walid taha)
|
الوقور اخونا الاديب الاريب الملاعمر
سلام كبير وتحية سامقة
اما بعد
قرأنا الحجوة وتبجينا
ارجو ارسال معتي بارافرينيا في الخاص
وجه بابتسامة عريضة
دمتم
| |
|
|
|
|
|
|
|
|
|
Re: حجيتكم ما بجيتكم (Re: ابو جهينة)
|
خيرا جانا وخير جاك وأخير الله من حجاك
معاويه المدير-يفسخ العصاة بالعصاة متل الما بقى شئ بل يصد بالعصاة حجر النبله - دراق
سيف الهدندوى يحتار شن بسو فيه - والله قادر فى النم ما بتصاقع دائما قادلا قدام رباعته حماد
الرجاله ود محكر وود حبيش ويتتالب عليها الجناييت خوجالاً وبرجه العين حمراء والطاقيه كذلك
والوزين الجميعابى عام وقلع يا سلام -أما بائع الطلح ذلك الذى ختم الطنابره فهو حكاى وصاحب
دققٍ عجاب لا يستطع أن يدانيه أحد فالكل أبناء طلحه كما دوماً يقول - يالمله قول يا الغوث
والتسعين فى شمالك والسناهير فى اليمين.
منصور
| |
|
|
|
|
|
|
| |
almulaomar
نعمات عماد
معاوية المدير
walid taha
ابو جهينة
munswor almophtah
فيس بوك
تويتر
انستقرام
يوتيوب
بنتيريست