كتب الكاتب الفاتح جبرا المتوفرة بمعرض الدوحة
|
|
 أولاد البلد دي
|
أولادنا في هذه الأصقاع، ليسو بأولادنا، ولكنهم (أولاد البلد دي)، نحن الآباء والأمهات معشر من البني كجة، أو بعض من قبائل الجن، أما همو فأمريكيون وبريطانيون وفرنسيون اوروبيون مستعمرون، لا استقلال لنا منهم لا في اول يناير ولا في صبح الخامس والعشرين من مايو الأغر، فكيف للماء المهين الذي جبلو منه، أن يتساوي وماءنا المعكر بالدكوة والقنقليس بالشطة وسائر الفطريات؟ وهمو سيداتنا وآنساتنا وسادتنا، تظللهم غمامة من القوانين والنظم المرعية، تمنع عنهم عسف الشلوت، وجرحة القزازة في الخور، وتحرش الاساتذة (الخصوصيين جدا)، والضرب بالعصا والفلقة، وغسيل يدين المدرسين، وملء الاباريق، والنهرة والسب ومراسيل التمباك حتى يتعلمو شيئاً يؤكد رجولتهم، ويا حبذا العرقي ونفس نفسين كاموتة. فلا تحضهم (عليها) سبعاً، وإياك أن تضربهم عشراً، فأنت و السجن والسجان عروة وثقى.
وهمو- نعني أولاد البلد دي- جميعهم بلا استثناء نابغون نابهون، لم أسمع باي منهم طيشاً، ولا أحد في قائمة لم ينجح أحد، وقد صافحت أذني مراراً وتكراراً، همسات زوجتي الممتلئة فخراً، تعلمني بأن إبني فلان، قد اختير من بين ثلاثة آلاف طالب، ومن بينهم ذوي أصول آسيوية ويابانية وهندية وروس وآيريش واسكوتيش وامريكان (بيض) وهذه الصفة مهمة، وانه الوحيد الذي اوصى العميد بمنحه قلادة الشرف في كذا وكذا، أقرأ الخطاب بنفسي، فامتلئ فخراً واسابقها زهواً، وأهمس لنفسي عجباً
الجابدو منو يكون يا ربي؟
ثم أذهب في المساء التقي اصدقائي في مقهى الهوكا، اقشر كما يقولون بنصرنا الموزر، وقبيل أن ارتدي قشرتي، يسارعون بزفاف أخبار ابناءهم، الذين وبصورة ما حصلوا علي نفس الشرف أو يزيد قليلاً، ثم أننا نستعرض لفترة ليست بالقصيرة، أوزان مواليدنا، حسب تقاليد ال Big boy المرعية في هذه البلاد، فيزيد كل منا الرطل والرطلين لوزن ابنه أو إبنته، لا نقتر عليهم تقتيرا، وندعو الله أن يغطي عليهم.
ثم أنني أتصل بصديق عزيز، عسى أن نلتقى على فنجان قهوة، في مساء الشتاء الثقيل، فلا يملك غير الإعتذار ببرنامج العيال، عارف براك اولاد الأمريكان ديل، يازول، فقلت لنفسي، رحم الله بندرشاه ضو البيت، كون الرجل ضحية بين أبيه وإبنه، ويعلمني، رسميين ودغري وحركات البني كجة دي ما بتخارج معاهم، امبارح عزو الصغير جاني قالي يا دادي إنت بتكضب مالك في التلفون على عمو ابدول؟ ياخي زاتو لمن يتكلمو ليك بالعربي المكسر ده.. نهنا ما اكلو هاجة... لزيزين خلاص... فقلت لنفسي مرة أخري، ياحليل كسار الحطب في موردة الحصاحيصا، ليس (بكيوت) ابداً حينما يقول سنو آفيا.
إعترف يارجل، أحاور نفسي، بأنهم أفضل منك، أولاد الامريكان ديل، الذين رزقني الله بهم فآلوا إليهم، لا ملاريا لا دوسنتاريا، رعاية اسنان ورعاية آذان، دروس مزيكة بنوتة، كمنجة تعزف، سكسفون تدق، العربية.. بنزين، وكندشة ومنتشة وسي دي ودي في دي وايباد وايبود واي فوق و اي تحت، لا مجذوب لا البعيو بس فاريل ويليامز ومايكل جاكسون ديل، حزام مربوط، وحليب وكورن فليكس، الويكة واللغاويس يمتنعون، جزمة مايكل جوردان تنط لو ماعايز تنط، انجليزي يدقو زي الحلاوة، لا عبود لا بشير لا نميري لا سيدي فلان وسيدك علان، ولا غلاط فيمن قتل ضباط قصر الضيافة، هسي تقتل نص ساعة يجيبوك، يودوك سجن الابستيت تجي مارق بعد عمر طويل مسلم. لا شعراً يدغدغ أمانيك ورومانسيتك الثورية، حنبنيهو، حنبنيهو، حنبنيهو، لمن الشمس تقلع تقع غمران، تصحى تكابس في قلية العيش، ولسان حالك، فكو من ضهري قرد العرقي المكنكش ده، ولا لهبك ولا شمساً تطلع من بين أكمامك. مكوفر وراسك لافي، الحقوني بكفيل امرق من البلد دي.
أذهب أجرجر خطوي نحو بيت السماية، والطفل درير غرير، من نعم الله عليه أن السمع والبصر لا يكتمل نموهما، إلا بعد حين من السنين، يكون فيهما قد اعتاد على هرج ومرج البني كجة، والذين أشتهروا بحرصهم على الغناء مع الفنان كتفاً بكتف، وكلما علا صوته زادو اصواتهم طابقاً، وناس عبد الله كان شافوه، وليته ما أتى على ذكر السبب الحماني.
أقول ذهبت بيت السماية، والطفل الامريكي تحفة من إبداع الخلاق، لا يدري أي بلاد هو فيها، ولكن اباه يعلم، ناداني ووجهه ينضح غبطة، رمي بذراعه حول كتفي بحنو شديد، وهمس في عطف أكيد
شوف عليك الله اولاد الامريكان ديل بتولدو طوال وقيافة كيف!
|
|
  
|
|
|
|
|
|
|
|
Re: أولاد البلد دي (Re: Tagelsir Elmelik)
|
زمان صاحبنا كده عندو مقولة لمن تجي اجازة المغتربين والحة تتملي شفع مغتربين جارين ورا الجداد والغنم والحمير
يقول (عاين عليك الله شفع المغتربين مسخو شفع الحلة كيف)
هسي شفعكم مسخو شفع الحلة وشفع المغتربين زاتو هههههههههههه
تحياتي يا تاج
| |
|
|
|
|
|
|
|
|
|
Re: أولاد البلد دي (Re: mohmed khalail)
|
في كتابة بتخلي الزول عديل بليد و أهبل وما قادر يوصف احساسو بسماحتا أها زي كتابتك دي الواحد قدر مايقراها مرة و مرتين و تلاتة برضو الحال ياهو نفس الحال احساس عميق بجمال و روعة بتتسرب للدواخل لمن تدفق و يكون مبلم و ملجم ما قادر يقول كلمة واحدة.
دمت أستاذي في حفظ الله و رعايته و دمت منبعاً لهذا الفيض الجميل.
| |
|
|
|
|
|
|
|
|
 Re: أولاد البلد دي (Re: ALWALEED ALSHEIKH)
|
سلام يا تاج
كالعادة كتابة رشيقة ممتعة
بس أنا بختلف معاك في المضمون
الجزارين في السودان لما يضبح خروف لو في زول قال ليهو الخروف ما سمين
الجزار بقول ليهو مافي شحم لكن في نضاف (من نظافة) 
صاح العيال في الغربة نضيفين وشطار وكل شي تمام لكن صدقني أنا ما مطمئن للبراءة والمسكنة الضارباهم دي
ياخ نحن زمان في عمر سبعة سنين دا كنا قمرتية عديل نلعب البلي وطرة وكتابة مرات بالبلي ومرات بالقروش عديل والفريني والتعريفة وهلمجرا
وبعدين ما قادر اتخيل أولاد سودانيين يعيشوا مرفهين ومنعمين على الآخر ياخي لازم شوية خشونة و(مردغة) ولازم يحتكوا بالعوالم العجيبة الفي السودان ديك
بالمناسبة أنا من امس عايش في زهو عجيب مشيت المدرسة أجيب النتيجة لقيتها 99.52 % للبنت و 99.50 % للولد الأستاذ قال لي أمشي المكتب التاني في هدية مشيت أدوني ميدالية يمين من شدة الزهو لابسة أمس اليوم كلو في المكتب لحدي ما وصلت البيت
وجاني إحساس إني فزت في أولمبياد سيدني أو موسكو أو حتى كاس العالم الجاي دا وغيرها من الأحلام المندثرة هسة في زهو يا أخوانا أكتر من كدا
بس أنا شايف دا كلو فرح ميت لأنو لو في السودان الحِلة كلها كان انكسرت فينا وزغاريد وهجيج واحتمال ضبيحة من عم أو خال أو حفلة دكاكينية
بس في السودان احتمال ما يجيبوا النتيجة دي
| |
|
|
|
|
|
|
|
|
|
Re: أولاد البلد دي (Re: حمد عبد الغفار عمر)
|
Quote: بس أنا بختلف معاك في المضمون
الجزارين في السودان لما يضبح خروف لو في زول قال ليهو الخروف ما سمين
الجزار بقول ليهو مافي شحم لكن في نضاف (من نظافة)
صاح العيال في الغربة نضيفين وشطار وكل شي تمام لكن صدقني أنا ما مطمئن للبراءة والمسكنة الضارباهم دي
ياخ نحن زمان في عمر سبعة سنين دا كنا قمرتية عديل نلعب البلي وطرة وكتابة مرات بالبلي ومرات بالقروش عديل والفريني والتعريفة وهلمجرا
وبعدين ما قادر اتخيل أولاد سودانيين يعيشوا مرفهين ومنعمين على الآخر ياخي لازم شوية خشونة و(مردغة) ولازم يحتكوا بالعوالم العجيبة الفي السودان ديك
بالمناسبة أنا من امس عايش في زهو عجيب مشيت المدرسة أجيب النتيجة لقيتها 99.52 % للبنت و 99.50 % للولد الأستاذ قال لي أمشي المكتب التاني في هدية مشيت أدوني ميدالية يمين من شدة الزهو لابسة أمس اليوم كلو في المكتب لحدي ما وصلت البيت
وجاني إحساس إني فزت في أولمبياد سيدني أو موسكو أو حتى كاس العالم الجاي دا وغيرها من الأحلام المندثرة هسة في زهو يا أخوانا أكتر من كدا
بس أنا شايف دا كلو فرح ميت لأنو لو في السودان الحِلة كلها كان انكسرت فينا وزغاريد وهجيج واحتمال ضبيحة من عم أو خال أو حفلة دكاكينية
بس في السودان احتمال ما يجيبوا النتيجة دي |
طبعا يا حمد حبيت اجيب الاقتباس عشان اعاين قدامي
مداخلتك غنية وممتعة وتصب في مجري الموضوع
الجزء الاخير بتاع لو في السودان ما بجيبو النتيجة دي هو مربط الفرس!
الشاهد أن الظرف الذي يمارس فيه التعليم والتعليم ظرف قاسي، والمقاعد المرصودة وخانات العمل المتاحة
تحتم عصر الحجم البشري الطلابي إلى ارهف ما يمكن، ويبدو ان الوضع تحسن قليلا بسبب انشاء مؤسسات تعليمية ولو بالزندية
طرحي هو في الاساس يتناول مسالة علاقتنا باطفالنا في المهجر وكيف انهم يتحولون الى ايقونة (علاء معرية) وهي من اشتقاقي، بمعني ماجناه على ابي وما جنيت على أحد
وهي قضية الا يتعرض ابناءك لما تعرضت له، حتي يصبح الابناء هم الاباء في النهاية، فكانما تصنع جسما اقدر منك واكثر تقدما يجعلك تعجو عن التحكم فيه فتقنع بان هذا الشخص
إنما شخص يتبع بروتوكولا اعقد ما امكانياتك انت والده!! وقع ليك؟؟
ساعود
| |
|
|
|
|
|
|
|
|
|
Re: أولاد البلد دي (Re: ALWALEED ALSHEIKH)
|
الوليد الشيخ العزيز
| Quote: في كتابة بتخلي الزول عديل بليد و أهبل وما قادر يوصف احساسو بسماحتا أها زي كتابتك دي الواحد قدر مايقراها مرة و مرتين و تلاتة برضو الحال ياهو نفس الحال احساس عميق بجمال و روعة بتتسرب للدواخل لمن تدفق و يكون مبلم و ملجم ما قادر يقول كلمة واحدة. |
حاشاك البلادة ولو انني افهم ماتعني
شكرا لدعواتك الطيبات ولك امثالها
| |
|
|
|
|
|
|
|
|
|
Re: أولاد البلد دي (Re: محمد إبراهيم علي)
|
محمد ابراهيم الصديق
ههههههه (مسخو شفع الحلة)
حقيقي والله وكأنهم من كوكب آخر، ولكنها طبيعة السودانيين الحنينة في الاحتفاء بالضيف
زمان كان معانا طالب في العام اسمو (ود قطر) ابوه مغترب في قطر، وعاش طفولتو هناك
انا لليوم ما عارف ليه اسم غير ود قطر، بعدين كان اسبيشال كده، والاساتذة بخافو ما بجلدو :)
في الفسحة بنمشي نتفرج فيه
تحياتي
| |
|
|
|
|
|
|
|
|
|
Re: أولاد البلد دي (Re: Tagelsir Elmelik)
|
فى سؤال محيرنى من زمان جداً ؟؟ أو هم فى الحقيقة سؤالين لو لقيت زول يجاوبنى أجابة منطقية أكون ممنون ..
الأول زمان فى المدارس كان فى الشطار و الناس النص نص و البلدا .. ليه أولاد السودانيين .. كلهم بلا أستثناء بطلعو شطار فى الغربة ؟ هل البلدا الكانو معانا زمان فى المدارس كلهم قاعدين لسه فى السودان و عرسو و عيالهم ما مرقو من السودان و لا هم أساساً ما كانو بلدا ..
السؤال التانى نحن أولاد العرب أو كما يقال فى السودان عندنا رأى قاطع إنو عرب الجزيرة العربية مثلاً و هم أصل العرب بنوصفهم أنهم قمة فى البلادة و كذلك (العبيد) و عذراً للفظ القبيح و المستخدم بشكل يومى فى السودان .. السؤال طيب نحن كسودانيين .. جبنا الذكاء دا من وين طالما العرب و الأفارقة الإتنين بلدا .. هل نحن من أصول المانية مثلاً ؟ (وش متحير و ضاحك و أى حاجة زاتو ..)
تاج السر زول عجيب جداً .. قدرة تعبيرية غريبة ..
| |
|
|
|
|
|
|
|
|
|
Re: أولاد البلد دي (Re: Tagelsir Elmelik)
|
( و شافعنا بيري الموت فوق الرقاب سنه)
جنيات الكابو كابو ....عند الاكل يتحابو و عند المرسال يابو
ياخ نحنا الشافع بيكون بيبكي ....يدقو عشان يسكت
و عييييك ليك اللحم و لينا العضم
ممتع كالعاده يا صحبي
| |
|
|
|
|
|
|
|
|
|
Re: أولاد البلد دي (Re: وليد عكاشة)
|
كتابة ممتعة جدا وبتهبش في وتر الحيرة بين نظافة الحياة في الغربة والبشتنة الواجبة والشر الذي لابد منه في السودان .
حكى لي صديقي في الغربة إنه يوما أعطى إبنه حتة لحم لياكلها ولكن الولد رفض بحجة إنو يا بابا فيها خشبة ( يقصد العضم ).
فقرر صديقنا ارسالهم السودان وقال لي ياخي لو عرف لي العضم بس يكفيني وكان اجتهد وبقى يسف فضلاً من الله وإن أتقدم شوية الرجالة مابتابى الزيادة .
ومازلنا بين فضائل الوطن ومغريات الغربة نجدف في بحراً ماليهو آخر ،،،،
تحية ب أقوى ماعندي ،،،
| |
|
|
|
|
|
|
|
|
|
Re: أولاد البلد دي (Re: عمر مصطفى مضوي)
|
شكرا اخي عمر مصطفي على المداخلة الثرة
ذكرتني النامو في الحوش والجماعة قرشو العربات تاني يوم ضربو لابوهم قالو لي
نمنا في ال parking lot
تحياتي باقوي
| |
|
|
|
|
|
|
|
|
|
Re: أولاد البلد دي (Re: وليد عكاشة)
|
ههههه لقيت لي ترتارة يا عكاشة
Quote: الأول زمان فى المدارس كان فى الشطار و الناس النص نص و البلدا .. ليه أولاد السودانيين .. كلهم بلا أستثناء بطلعو شطار فى الغربة ؟ هل البلدا الكانو معانا زمان فى المدارس كلهم قاعدين لسه فى السودان و عرسو و عيالهم ما مرقو من السودان و لا هم أساساً ما كانو بلدا ..
|
ح احاول اشتغل معاك في ده، زمان قالوا المروقين بعرسو البنات السمحات، تقوم القروش والسماحة يبقو في كوم، والفقر والشنا في كوم... جدلية شديدة!!
أي اولاد ما السودانيين براهم، بعيشو في ظروف منافسة شريفة، وظروف محفزة (اكل شراب صحة الخ)، يزحو منهم كوراريك الجلكين والمنغصات التانية
وإبتداءً وانتهاءً بالنظام السياسي .... بينجحو، ومن شروط النجاح، توفر مناخ الحرية، وده ماعون واسع.
بجيك للسؤال التالي
| |
|
|
|
|
|
|
|
|
|
Re: أولاد البلد دي (Re: Tagelsir Elmelik)
|
تحية لك وللجميع
Quote: طرحي هو في الاساس يتناول مسالة علاقتنا باطفالنا في المهجر وكيف انهم يتحولون الى ايقونة (علاء معرية) وهي من اشتقاقي، بمعني ماجناه على ابي وما جنيت على أحد
وهي قضية الا يتعرض ابناءك لما تعرضت له، حتي يصبح الابناء هم الاباء في النهاية، فكانما تصنع جسما اقدر منك واكثر تقدما يجعلك تعجو عن التحكم فيه فتقنع بان هذا الشخص
إنما شخص يتبع بروتوكولا اعقد ما امكانياتك انت والده!! وقع ليك؟؟ |
صحيح يا تاج وخليك من أمريكا والدول الأخرى المتقدمة في الخليج دا والما بفرق كتير عننا بتلقى بوادر فرق واضح بين مقدراتك ومقدرات اطفالك من حيث النظرة للأشياء والتعامل معاها وده مردو لتوفر المعينات من تقنية وتوفر وقت ليهم لتدوالها
لكن حجر الزاوية في الأمر هو إنهم لقوا اباء عارفين ومدركين لما يجب أن يكونوا عليه إبنائهم
على العكس مننا زمان . نحن ابائنا (ولهم التحية والتجلة لما قدموه لنا من تربية أخلاقية سليمة ومن مصاريف) كانوا فقط مجموعة أخلاق ومُثل وكرم وضكرنة وعادات كريمة
ما عندهم الميكانيزم المتطورة لمصارعة الأشياء ولمواجهة الظلم ونيل الحقوق واستقراء المستقبل قمة طموحهم أن تدخل الجامعة فقط وإن اكملت الثانوي لا بأس عليك وبعدها لتفعل بك الأقدار ما تفعل
بس بأكد ليك الفرق بينا وبين أطفالنا ما حيكون شاسع (يعني ولدي ما حيدقسني )
لأنو مازجنا بين القديم والجديد وأهو مواصلين معاهم من الآيفون وحتى تاريخه
الشيئ الوحيد الحيتفوقوا فيه هو التحرر ( المطلق) من الخوف والقيود وعشان عين تكرم ألف عين وغيرها من الخزعبلات
| |
|
|
|
|
|
|
|
|
|
Re: أولاد البلد دي (Re: حمد عبد الغفار عمر)
|
كتابة ممتعة جد!
أنا ما عارف ذاتو أتم كل المداخلات!
المهم يازول في واحد قاليك الشافع البيبكي
بيدقوه عشان يسكت!
ههههههه!
لكن حكاية فرص التعليم وما أدراك أنا توصلت
لأنه شمال أمريكا دي ما عايزين الجميع يقرأ
جامعة. عايزين الهاي سكول ويلا التحق بالقوى\
العاملة!
وأنا خايف من اصرار السودانيين انو كل أولادهم
يقروا جامعة يقوموا يسقطوهم عنية كدا. يخلوك
تحاول تتذكر آخر اجازة قضوها في السودان بحثاً
عن مبررات.
شكراً يا ملك ياخي ما تترجم البت نيم بتاعك دا للأمريكان!
هههههه!
| |
|
|
|
|
|
|
|
|
|
Re: أولاد البلد دي (Re: mustafa mudathir)
|
يا مصطقي يا
سعيد والله باطلالتك السموحة (شفت الانشقاق ده كيف)
مصداقا لكلامك بتاع (شمال امريكا)، الناس ديل بحبو الهسبان
لانو طموحهم محدوج (عسيل ومكوة) وغسيل عدة، قبليهم الافروميريكان
وديل عشان يملو السجون (الفيدرال ايد) للولاية بتجيبو السجون المكتظة
ويخلقو فرص عمل لل red neck السمان ديلك ويشغلوهم في مناجم الفحم
أها جينا نحنا المفلقصين ديل وما بنفع في الجيش وبنحب الجامعة خالس
بيفحطو بينا قريب. كلو ولا تزاحم اولادن في الجامعات، هنديك الباسكت بول والديسكو
وديل ماسكنهم ناس مايكل جوردان ومايكل جاكسون، و صابحني دايما مبتسم ما بتجيب
دخل بجاي... اها كيف؟
| |
|
|
|
|
|
|
|
|
|
Re: أولاد البلد دي (Re: Tagelsir Elmelik)
|
أجابتك دى محبطة ياخ و غير كدا ما مقنعة حقيقة .. يعنى نحن ما شطار مثلاً ؟ أنا كان عندى أعتقاد جازم أنو نحن عباقرة عديل كدا ههههههه
السؤال التانى دا لو حتجاوب عليهو بنفس طريقة السؤال الأول جليهو ... ما تمسخ لينا جدلياتنا بالله ..
| |
|
|
|
|
|
|
|
|
|
Re: أولاد البلد دي (Re: وليد عكاشة)
|
عكاشة الصديق
هههه لا ابدا ياخي، فينا الشطار والما شطار أعتمادا على ماهية ومعنى الشطارة (الشطارة الاكاديمية
شطارة السوق، الشطارة السياسية، شطارة حك الساسوية.. ألخ)، والشطارة الاكاديمية عندنا مقياسها
النجاح في المنهج التعليمي، والمنهج التعليمي القومي لا يزال به (قولان)، وقد سمعت من استاذ علمنا
في الخرطوم القديمة كلاما محبطا لا ازال اذكره (القارين ليها شنو، العالم اخترعو اي شي واي اختراع حسنو) !
هل نحن شطار؟
إذا كانت الشطارة تؤدي لجمع الصف وتوحيد الجهود لبناء الامة، وتعزيز الفضائل فإن شطارتنا لم تنجح في ذلك
وإذا كانت سبيلا للنجاح المادي، فان شطارنا لا يجدون وظائف تليق بهم، بينما يسعد الغير شطار بالنعيم ويحسبون
من الشطار (المفارقة)، والنجاح محفز على التشطر والاجتهاد ، وفي خارج البلاد تقف التجربة شاهدا على دعوانا
فحيث التنافس الشريف والفرص المبذولة والتحفيز (مافي بمبان ولا احتياطي مركزي ولا قتل ولا اغتيال للطلاب
ولا استهداف عنصري عقائدي مبيت)، لاسجون للطلاب بسبب من ابداء ارائهم السياسية، ولاقتل لمفكري الشعب (عبدالخالق، الشفيع
محمود محمد طه ) وغيرهم مما لايسع المجال لحصرهم، تأخذ الشعوب اجيالا لتتنجب مفكريها وقد يقتلهم شطار الجيش،
وشطار الفقه... هكذا!
في مناخ غير هذا، يظهر نبوغ
ابناء شعبنا.
وحتي ذلك الحين يستمر فرز السماحة والقروش في كوم، والشنا والفقر في كوم.
فماهي الشطارة.
| |
|
|
|
|
|
|
| |
Tagelsir Elmelik
محمد إبراهيم علي
mohmed khalail
ALWALEED ALSHEIKH
حمد عبد الغفار عمر
ابراهيم عدلان
Osman Musa
فيس بوك
تويتر
انستقرام
يوتيوب
بنتيريست