|
|
 تـــــحـــــــــــــرش
|
ويبقى بينا
في المراجيح الهوى
شوق التواصل
والامنيات
وكتبت ليك
بسال عن الحال
وجوة في جوف السؤال
كان الحنين جوة التحايا الحانيات
وقعدت في قيف الرجا
منتظره مكتوبك
الباذخ يصل
يحكيني عن حال البلد
كيف العوين
كيف البنيات
ما اصلي جد خايف عليه
هادا البلد
من العساكر
والدساكر
والحرامية
الدقون التاف ها ت
خلينا ناخد كلمة لي هأد البلد
من بين امسامات القليب
ما من جرايد الدولة
او مدياع رخيص
او
زولا مؤجر بالقليل
شان ناسا هناك تاخد كتير
ناسن بتشقى
طول نهار تحت الشمش
وناس باردة تاخد كل عرق
غالي السمات
يا باشبزق
ما شبعت يا جنا
كمين سنة
عقدين ونص
والبطون الضامره بايتات القوى
لا ريقة يلقوها
لا رحمتات
خلينا نرجع
تاني للقيفة النديه
اديني منك حرفين يقين
اديك
مجموع اغنيات
عن حالي
والوجع الدفين
اتقفلت دروب الرجعة
حين
اتكومت حسايس الوجعة
حين
اتشوكت مراقد الهجعة
حين ناجيت حيالك
وكنت بمضغ في الصبر
والزاد طعمه مر
شردت من الليل النجيمات
وبقيت وحيد
انا والقمر
والذكريات
لعبة شليل ما انتهت
بعد القمر كانت كهارب
وشليل بعيد
ماتت كهارب
ورجعنا في ضو القمر نلعب شليل
وراح شليل
هل ياترى
جاعت كلاب الحلة
كيفن تجوع
والناس مشتتة في النجوع
يمكن سعر
للنعمة والحال الجديد
ونداوة الجلد المضمخ بالعبير
في الامسيات
وناس تخشن جلدها
من النوم الخزا
الفي الحصير
حالا جديد
واتشتت بين الافق
ومرارة الجوع الكمد
كل عصفير الاماني المثقلات
با رعشة العشم
البخاف
الامنيات
تعالي اديني الثقة
خليني احلم بالوطن
واتنسم الحلة العتيقة
واتوشح العشم اغنيات
وبس
|
|
 
|
|
|
|
|
|
|
|
Re: تـــــحـــــــــــــرش (Re: د.محمد حسن)
|
وكتين تسابق الدمعه دمعه في الخديد
آه وكمان آه يا بلد
بنسافر بلا تصاريح السفر
نصنقر في قيف البكا
نتوجع كتير يا زمن
Quote: والبطون الضامره بايتات القوى
لا ريقة يلقوها
لا رحمتات
خلينا نرجع
تاني للقيفة النديه
اديني منك حرفين يقين
اديك
مجموع اغنيات
عن حالي
والوجع الدفين |
| |
|
|
|
|
|
|
|
|
|
Re: تـــــحـــــــــــــرش (Re: د.محمد حسن)
|
هيأت نفسي عشان الاقيك في الحلم
لبست ليك افخر تياب
والعمة من صافي الغمام
الشال بروق السعد
والمطر النغم
هيات حتى المفردات
اتبرجت
بي كل جميل
واتزينت بي لون ربيع
و
لمن لقيتك
كنت مزحوم بي مززايك الهوى
وطرب شديد جوة القليب كان انتظم
يابت ةحشتيني وتسكني
وتفتقي العطر الندي
جوات عروق قلبا
مستف بيك اروع احتشاد
احساس حقيقي وما وهم
وانا وانت والقمر البغرد
بي غناويك للمجرات
والنجم
داك البساهر للفجر
شان يا حليوة ماليه الطرب
وانا بيك ماليني الحنين
اكتب عناوي الارتهان
وانساه في وجودك الم
يلاك نمشي مع المساديرالطوال
ونغني للايام غناوي
ونحكي للاطفال حكاوي
عن جمال النيل
وعن كيف الحكايات الجميلة
بقت عدم
شان العصافير هاجرت
وتاهت دروب الرجعة
لمن تاه
من سما النيل الخريف
والحالة مابين الرماد
وشيتن سجم
خلينا
من لونا السواد
خلينا من لون البنفسج
خلينا في لون الصفاء
والوان بتمرق
من عوينات قوس لقزح
تدي الفرح
تمرق نغم جوة الفؤاد
محبوس زمن لما انكتم
تعالي نرسم
بالاماني المترفات
ناخد من الاحساس جمال
ونلون الكون
بالعشم
هي الدنيا
ايه
غير ضحكة حانية
وغنوة نادية
وحلما نضيف
بي بكرة
بي زمنا خصيب
يدحض مخازيز العقم .
يلاك نوشوش للنسيم
نحكيه كيفن
يهزم الريح العقيم
وكيفن يسوق لينا السحابات الهواطل
تغسل عيون حزن المسافات الغياب
تقصر مسافات السفر
وندفن القلق المدكن في السهر
ونقول كلاما
مرة اشعار
مرة يتلون غناوي
ومرة يتحول نشيج
جوة اوتار
ومرة في عصب المحاسيس
جوة يتلم
وانت يا فرح العمر
يا دوحة لي زولا مسافر
عز هجير
كل الفصول النادية قدام
عيونو زاهية بتفارق تمر
وتخلي طعم الحلوة في احساسه مر
تعالي نرقص
رقصة الشوق للمطر
خلي السحابات تنهمر
إيقاعنا بي دلوكة
بي نقارة
بي دنقر صخيب
وكمان شتم
وحلفت يا ست البنات
ما اوصفك
اصلا جمالك
فاق الجميلات لي حدهن
من الفصاح وكمان عجم
وبس
| |
|
|
|
|
|
|
|
|
|
Re: تـــــحـــــــــــــرش (Re: د.محمد حسن)
|
ماكان لقانا على هدب القدر صدفة
كان ارتجا اللحظة الذهول
وضربت رملي على بختك واقول
سالت بي كل اندهاش
هل كان ما كان
في حكم زولا
بغامر جوة في حاجة
بتحير للعقول؟
كان اقتحام هذا التوقع
حاجة زي اسطورة ما معقولة بس
مقبولة
في روعة جمال
زي اغني الساقية
والليل منقسم
والقاك شادن عمري
ويسكرني في ريدك طرب
والقاها عرصات الفؤاد
نبض الحنين بي روعتك مأهول
تاهت سفاين شوقي
في بحر التوجس والنهايات الوهم
النوارس غايبة تسال في الغمامات
وانا في عوالم دهشتك
بترقب العشم الوصول
عافت حسايسي انفاس المنافي
وكرهت الوان المرافي
وشعرت بي وحشة وجوى
لمن لقيت كانت مافي
نورت مصباح الحقيقة
ضاوي في وضح النهار
وبديت افتش
عن مفاتيح الدخول
يازولة تملا الروح ثقة
يابنية من ريحة شوارع امدر
ومن نفس الضفاف الشاربة من النيل صبوح
جيتك علي
كل العنت
ختيت حمولي على عصب الكلام والمفردات
وتعبت من سفرا بطول
وريني بس
ما بين عيونك وسكة السفر البعيشو
اشواق وخوف
وعصب مستف بالحنين
يازول حنين
ونبد نسال
ديل منو
وعايزين شنو
وجونا من وين؟
ياغيمة السعد الهوى
وطلاسم الشوق الجوى
وخريطة تاهت فيها
في لحظة المعالم
وحرامي في الجامع بدرس
ويدي للناس الدروس
ويا الله عالم
وتقولي لي اسكت كفاك
خليه قول
عايزاك ترجع لي
يا احلا زول
وريني بس
كيف السكات
والناس بتمشي في الشوارع
جواها تصرخ في السكات
لا عارفة انها عايشة زي كل الخلوق
لا في الممات
اعفيني يا زولة
بتوج جواي كما العصافير
في الخريف
انا من ضراع النيل
الازرق
او الابيض
كنت اتغذيت بكل الانتما
وشربت من موية دميرته العاكرة
احلا من الزلال
اعفيني ما بقدر اصم
يا حليوة في جواي قول
عشان بريدك
وبشوف حروفي تتاتي ليك
مزيونة بي كل الحلاة
لانو في عيونك شعاع البهجى
يا ست الغلا
من نور بسيمك كان بغير لصف البرق
ومن نور عيوني كان بكون مدخل
ظنوني اليك والخاطر
بروض في عنادك
اصلو طبعك زول جفول
بكتب خطاويني اليك
في صفحة الليل الندي
وتقولي لي افصح شديد
وافصح معاك يفضحني حرفي
الما بخاف
لكني جد
حضرتك انا زول خجول
وبس
| |
|
|
|
|
|
|
|
|
|
Re: تـــــحـــــــــــــرش (Re: د.محمد حسن)
|
عايز اكتبك اجمل حروف
مليانة عزة
وانبهار
عايز احملك
ايقونة الصبر الجميل
اداعب بيها في الصحو النهار
عايز ارسمك جوات عيون الفجر لوحة
فيها ايات الجمال
وفي احساس التمنى
وفيها حلم اللقيا
في الحالة الجهار
بريدك
زي مجاري النيل بتهدر في دماي
بريدك
زي غناوي الامسيات
نادية بتعطر دماي
بريدك
زي لعبة الاطفال
والشارع بيرفل في الامان
بريدك
ريدة الزول البسيط
لا لاقي صيت ولا اشتهار
واحفرك جوات محاسيس العصب
وارجع افتش في المعاجم
وفي الدفاتر
وفي الاقاصيص الخرافة
عن كلاما ما انكتب
عن وصفة الريدة البتحرق في الحشا
وبرضو زي نسمة بتبرد للحشا
وبرضو زي ا حساس غريب
لا هو نار
لا هو برد
حاجة تشبه للسلام
وينبهم فيني المقال
لاهو بتطاول يجيك ولا هو
زي الاختصار
تعالي خليني النفتش بين عيونك
عن ابجدية ريدة ما اتكتبت قبل
عن مسارات العوالم
لي منابع الدهشة
لي عنوان حقيقة
الوجعة في
خواصر المفردات
لما تحبل بالاحنة
من معاني الرغبة في تحقيق
حلم العصافير
بالخريف
واصبح مع البدايات السحر
شايل قليبا بيك متستف رهيف
مرات اشيل احزاني وارحل بين مسامات الغياب
مرات الاغيك
ليك اضحك ولي تناغمي
وكم تقولي
انت يا محمد ظريف
ويسرح محمد
وجوة في عمق الفؤاد
ختاك بحيرة
من عذب الزلال
مرة سيلا من حنين ومرة انهار
يا جميلة
لي فيك شوقا مشوق
وانت فيني تجمليني
والقى حرفي اليك يسوق
والغرام بيناتنا باهي
والفؤاد طربان بيعشم بالوصال
والقصيد يبقى المنال
وابقى في القيفات اغازل في النخيل
واتغنى
ترتعش الظلال
خليك معاي
ما تخليني للغربة السفر
خليني انداح بي كلام
دكنته من زمن المغادرة
حين فجأة في عز الصبا
ختفني من عينيك سفر
وعشت في الحالة السهار
خليك حداي
زولي ومناي
ورهافة القول الموصل
من عصب عرق الحروف
جاييك متوكل عليك
ما فيه خوف
ونرجع نعيد القول كمان
الريدة يازولتي الامان
كلمة بتودي اليك حنين
وكلمة بنجيب منك هوى
وينهزم فينا الودار
وبس
| |
|
|
|
|
|
|
|
|
|
Re: تـــــحـــــــــــــرش (Re: د.محمد حسن)
|
جوايا ليك باقي الكلام الماكمل
لمن بدينا خطانا في رمل السفر
كانت حروف اللقيا تنبي عن
جمال مدسوس
هناك
في الحلة
في الشارع المعطر بالحنين
وبيناتنا كان كمين حجر
راجيني انديه بي نادي الحروف
وانثر بذور الكلمة شان
يمرق كلام الريدة من قبل الحجر
لكن
تباعدنا وركبنا
صهوات جياد الريح
وعشقنا قاسيها المنافي
واتزعت كل الخواطر في المرافي
وادمنا علكات السهر
ثم التقينا
اتفتت كل الظنون
اتبعثرت
ثم
في لحظة صدق اتجمعت
وكتبنا في في صفحة
الليل الحزين
بداية الاحساس
قصيدا من قليبا بيك شعر
واتكون الريد اغنيات
جواها كم من امنيات
ارعد ساحب الشوق
ثم
اتجمع الوابل و في لحظة انهمر
وغرقنا في اجمل هوى
ياروعة الكلمات
ويازولا معاي
جواي نيلين من حنين
جواي سواقي الليل تضج
تمرق انين
ومعايا انت
رقيقة زي همس النهر
دقيقة زي لون الصباح
وادمنت فيك الاندياح
زولة
تمنح الروح إرتياح
والقاك انال اجمل منال
والقا عشم المسافرين بالرجوع
للبلد
جواهم الاحساس سعد
طعم التراب
ريحة الغبار
الديمة متعلق على الاكتاف
وماسك في الضهر
ينضح موشح بي تعب مر السنين
القاسية والحالة الرحيل ..
سجع المواول
والدينا ليل
وانا ليك بموسق في المسادير الطوال
شايل الرهق جواي ما كليت
ولا قلبي البريدك يوم فتر
حواي كان الاصطباغ
لون محاسيسي وغناي
وبقيتي زي فواصل في حجاي
وبقيتي لي سكة وصول
وبقيتي لي ترياق دواي
من حالة الفوضى التناسق
في الدواخل
وبقيتي لي روعة الوهج المداخل
ومشيت عليك
كانت خطاويني بتلح
درب السلامة الما خطر
وانت السلامة
جواي رزيم ايقاع جميل
لحنا بيمرق من حسيس عصبا
مشبع بيك واتشد الوتر
دوزنته بيك
وشيت كلامي المفردات
بي اروع الوان الجمال
عبيت مسامات الوريد
حتى انفجر
وبس
| |
|
|
|
|
|
|
|
|
|
Re: تـــــحـــــــــــــرش (Re: د.محمد حسن)
|
(يا تجيني نملاها المواعين بالهوى
يا اما ارحل ليك واسافر كالغمام
انا في رجاك ملت مدامعي الانتظار)
دايراجيك
املاك كلك بالهوى
افرغ لي مواعيني المستفة بالارق
طعم القلق
وخز السهر
نومي المفارق عيني من لحظة
عرفت السكة لي درب المطار
وبقيت افتش ليك كلما
شفت الحقائب
ولهفة الزول المسافر للوطن
واتحجرت فيني المشاعر
كلما غمضت عيني عن الخرائط
بس لما عيني
في غفلة من رهق السفر
تفتح تشوف
صورة النيل والضفاف
بملاني يا غالية اعتبار
واتحسس الكلمات تعبر عن رؤاي
احلامي
والعشم المنال
وحلاوة الاحساس
ولوعة الشوق البجادل
غيمة يستعذب
روعتك عز الحوار
( عايزاك اشوفك
قدامي يا زولا عشوق)
عايزك اشوفك فيني يازولة
بتبدد فيني موجوع الحسيس
لمن اشوفك غيمة
في ساعة نهار
تديني احساس الربيع
شجن الخريف
دف الشتا
واحساس وريف
زي نسمة بتبرد حرور
والدنيا صيف
احساس موشم بالصدق ما فيه زيف
آخ انا من توشيح السفر
ضجة حنين جواي في سكون السكات
تتوالى زي عجلات قطار
تك تتك
تك تتك
كل المحطات ماخدة لون الغربة
والشكل الجماد
مليانة رغم نضافة الاحياء
بالشكل الغبار
والا عيني
يا غالية كاسيها الغبار
لكنه جد اجمل غبار
من تراب عتمور بتشتاق للمطر
واتمي بيناتنا الوصال
في الليل
بعد كل الخلوق يغشاها نوم
ونبقى صاحين
انا وانت
والنجم البغير
من ريدي ليك
والقمرة بتنظر في انبهار
كلما اناجيك
الاقاها تبسم
ومرو تهمس لي جهار
ادينا فرصة
نريد معاك
الزولة نستمتع نحس
عمق الهوى
مش نحن سهرانين سوا
واضح مع القمرة واقول
انت للعاشقين دوا
لكن دواي
في زولتي ف ب ضحكة عيونها
برق سنونها
ورموشها لي اجمل دثار
خلونا اصحاب في السهر
ما تغيرو مني
او تمشو عني
ادوني ايحاء القصيد
حرفا جديد
ومعني من رحم الوجع يمرق جديد
يمكن بكرة
قبال الصباح
امشيه نيلنا مع الفجر
اخضر زغاريد العصافير
بين تميراتا تهبهب
والاريج يبقى في حالة انتشار
صدقيني
انا ليك ما عاشق بجبد القول
وانمق للحروف الحالية بيك
انا دمي منك
والشرايين شايلة حسنك
وديمة في حالة انفجار
وبس
| |
|
|
|
|
|
|
| |
د.محمد حسن
عادل البراري
فيس بوك
تويتر
انستقرام
يوتيوب
بنتيريست