|
|
|
 Re: يعترف بجريمته بعد 46 عام (Re: omer osman)
|
جدي لامي المرحوم الحاج/احمد صديق حكي لي هذه القصة .......
والدتي فاطمة بت احمد لها الرحمة والمغفرة كانت هي المولودة الأولي .....
لجدي حيث توفي اربعة قبلها اما قبل ولادتهم او فورها .......
لذلك قرر جدي ان يكون الاحتفال بسمايتها كبير جداً ومميز .....
| |
 
|
|
|
|
|
|
|
|
Re: يعترف بجريمته بعد 46 عام (Re: omer osman)
|
جدي كان يعمل فني في السكة حديد وبالتالي يعد ميسور الحال بلغة ذلك الزمان
جمع مبلغ محترم جدا من المال واحتفظ به في محفظته التى وضعها داخل درج مكتبه
على امل ان يخرج بعد نهاية الدوام لشراء مستلزمات السماية من خرفان وخلافه ....
وكانت الصدمة عندما فتح الدرج آخر اليوم ليأخذ محفظته فاذا به يجده خالياً الا من بعض الاوراق
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
فاق جدي من الصدمة وبعد ان دارت الدنيا وغمت امام نظره قرر ان يفوض امره
الى الله ويحتسب ماله المفقود ورفض تحريك اى اجراءات او بلاغ خصوصاً ان الأمر
قد يطال زملائه بالتحقيق وجرجرة البوليس ..........
وقرر اللجوء الى شقيقه الأكبر الخليفة/عبدالحليم صديق جدي لابي وبمساعدته
تم الاحتفال بالسماية على اكمل وجه وانقضت ذكري تلك الحادثة وطواها النسيان
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
كبرت فاطمة وتزوجت من ابن عمها عثمان عبدالحليم وانجبت الذكور والاناث
وتقاعد جدي بالمعاش ومرت السنين في هدوء ........
ظهيرة احد الايام وبعد ان تناول جدي افطاره وقرر الخلود الى قيلولة صغيرة تعود علها
سمع صوت خبطات على الباب في وقت لم يتعود ان يزوره فيه احد فالزوار عادة ما يأتون
بعد العصر او المغرب ........... وخشي ان زائر النهار هذا ربما يحمل خبر وفاة قريب او صديق
على العموم توكل على الله وذهب لفتح الباب .........
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
مش معقول حاج/ ................. ووووووووووين يااااخ سنين طويلة ما شفتك
من ما نزلنا المعاش .........
والله ياحاج احمد ظروف الدنيا والخجل مانعني اجيك السنين دي كلها .....
طيب اتفضل اتفضل ادخل لي جوه ...... فطرت والا نعمل ليك فطور ...
لالا ياحاج احمد ان لا داير فطور ولا داير اى شيء بس دايرك تعفي لي ...
عاااادي ياحاج/ ............. الناس بتغيب من بعضها ومافي شيء وانا ذاتي مقصر معاك
لالا يا حاج احمد ان مشكلتي ما في كده انا مصيبتي اكبر من كده ....
ياحاج/.............. قول بسم الله مالك انت الليلة ؟؟
تتذكر ياحاج احمد سماية فاطمة بتك ......
ههههههههههه والله ياحاج/........ حيرتني الذكرك سماية فاطمة بتي شنو ؟
فاطمة ماشاء الله بتها سعاد جابت الاولاد والبنات ......
عارف يا حاج احمد وسامع بي اخبارهم بس دايرك تتذكر سماية فاطمة والقروش الاتسرقت منك
اييييييييييييك ياحاج/........... انا بتذكر الموضوع ده بس وقتها انا احتسبت القروش دي ونسيته خالص
بس انا ما نسيته يا حاج احمد ولا للحظة واحدة 46 سنة ياحاج احمد انا ما نسيت القروش دي 46 سنة
ياحاج احمد انا نومي بالليل كلو قلق وخوف .........
يا حاج احمد انا شلت قروش السماية حقت فاطمة ........ وانخرط في نوبة بكاء حاااااااااااااار
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
لاحول ولاقوة الا بالله ...... استغفر ياحاج/........... ده كلام شنو البتقول فيهو ده
والله العظيم ياحاج احمد زي مابقول ليك ده الحصل انا كنت في حوجة شديدة للقروش دي
والشيطان قدر على وشلتها والسنين دي كلها انا ندمان على الحكاية دي وكل ما اقول اجي
اعترف ليك وارجع القروش اخجل والله كتير جدا وصلت لحدي خشم بابك ورجعت ......
لكن ياحاج احمد دحن الموت قرب وخوفي من حساب ربنا بقي اكبر واقوي من خجلي عشان
كده الليلة نعلت الشيطان وجيتك وجبت معاي القروش ودايرك تعفي لي وتسامحني
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
لاحول ولاقوة الا بالله ..........
وياسلام عليك ياحاج/ ................ انت زول اصيل والله ولو ما كده مابتجي
بعد السنين دي كلها تعترف لي ، وانا والله مسامحك دنيا وآخرة والقروش نمرق
انا وانت نتصدق بيها على زول مسكين ...... وسرك في بير اعاهدك ما اكلم زول بي
اسمك لكن بحكي للناس القصة دي عشان يعرفوا انو باب التوبة فاتح وانو الدنيا لسه فيها خير
********* انتهت ***********
| |
|
|
|
|
|
|
|
|
|
Re: يعترف بجريمته بعد 46 عام (Re: رانيه محمد الشيخ)
|
Quote: اخى عمر
قصه روووووووووووووووووووعه شديد
وفعلا درس وعبره للتسامح ولطلب العفو والندم
بالجد روووووووووووووووووووعه
|
الف شكر يا رانية ..........
Quote: تسمح لى انقلها لمنتدى تانى؟؟؟؟
|
جداً لا مانع ........
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
Quote: بس انا ما نسيته يا حاج احمد ولا للحظة واحدة 46 سنة ياحاج احمد انا ما نسيت القروش دي 46 سنة
ياحاج احمد انا نومي بالليل كلو قلق وخوف ......... |
بس اوعى انت تكون نسيت صاحبك ياسر ابو ورقة
بيسلم عليك كتير وجبت ليك منو صورة هو وابنه
وحكى ذكريات جميله بينكم
سلام وشوق ياغالي وصلاح ابودية جنابو معانا هنا بس حاول افتكرنا مره وتعال لينا
| |
|
|
|
|
|
|
|
|
|
Re: يعترف بجريمته بعد 46 عام (Re: وليد عبد اللطيف)
|
Quote: [بس اوعى انت تكون نسيت صاحبك ياسر ابو ورقة
بيسلم عليك كتير وجبت ليك منو صورة هو وابنه
وحكى ذكريات جميله بينكم
سلام وشوق ياغالي وصلاح ابودية جنابو معانا هنا بس حاول افتكرنا مره وتعال لينا
íÇ......... |
ازيك يا ولي والله الشوق بحوررر
طبعا صاحبك ياسر ده ما ود حلتنا قبل ما يمشي بحري وناس الهلال جو
التمرين عشان يشوفوني بس اليوم داك كنت مافي وجات من حظ ياسر شافهو وسجلهو هههههههههه
تحياتي لي ياسر وناجي ابورقة ولي سعادتو صلاح ابودية وقول ليهو ما تنسانا من صالح الدعاء ......
| |
|
|
|
|
|
|
|
|
|
Re: يعترف بجريمته بعد 46 عام (Re: وليد عبد اللطيف)
|
انت يا ولى ياسر دا دحين مـش شقيق عماد ابورقـة زول الميرغنية ولا زول تانــى ...
الزول دا عليك امان الله لعب ضدنـا فى رابطة الدناقلة مع فريقهم اعتقد اسمو السواح
وفريقنا الصداقـة ( عمرهم ما غلبونـا )
يا جنابو عمر انت اتاريك مكمل المدد من زمن ياسر ابو ورقة
كيفنك عمر وليك وحشــة زمان ومكان
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
تعرف ياحبيبنا عمر امس بنحكي عن حال المنبر في العشاء
فسالت عنك وقلت ليهم غايتو المنبر دا مره مره عمر جنابو كان بيجع لينا باص مس كول على وزن قصة قصيرة
سبحان الله .
اها متابعين ياغالي والشاويش حسن جاب الكرسي وقعد جنبي تقبل سلامة ايضا
لكن ناس الهلال ماليهم حق ماكان ينتظروك احدي ماترجع هههههههههه
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
تحياتي وسلامت سعادتو
الشئ بالشئ يذكر
تقول الرواية التي سمعتها من والدي عليه رحمة الله تعالى قبل أكثر من أربعين عاماً
كان رجلي شرطة قادمين في منتصف أحد الليالي من قرية مجاورة لقريتهم ذهبا لها لأداء واجب عزاء . ولما لم تكن القريتان تبعدان عن بعضهما كثيراً فقد تعود الناس أن يقطعا المشوار مشياً على الأقدام أو على ظهور دوابهم .
في الخلاء الفاصل بين القريتين وعند مشارف قريتهما أحس أحد الشرطيين بحاسته الشرطية بحركة غريبة ، التفت ناحيتها فتراءى له أن يرى رجلاً جالساً فوق جسم رجل آخر . لفت الشرطي زميله فحاول هذا الآخر صرفه بأن هذا الذي يتراءى له من أثر السهر والإرهاق وليس هناك رجل أو حركة . أصر الشرطي الأول على رأيه وأقنع صديقه أن يذهبا ناحيتها وليس لديهما ما يخسرانه.
ذهبا ناحية الحركة المتوهمة
صدق حدس الشرطي الأول
رجل جالس وفي يده سكين وملابسه ملطخة بالدماء وبجواره جثة رجل آخر
قام الشرطيان بإجراءتهما الرسمية
وتم تسليم الجثة لأهلها وتم تقديم المتهم للمحكمة
كان اللافت أن المتهم في جميع مراحل التحقيق رفض تقديم أى إفادة ولم ينكر التهمة أو يعترف بها
إعتمدت الشرطة والنيابة على حالة التلبس وأداة الجريمة
أجلت المحكمة جلساتها مرات عديدة لتعطي المتهم فرصة ليتحدث
وأخيراً تحدث المتهم بمفاجأته المدوية
" أنا يا سعادة القاضي لم أقتل المرحوم
تعودت أن أحضر لهذه المنطقة من القرية في كل ليلة ، اليوم وجدت هذا الرجل والسكين في بطنه ، رآني فناداني بآخر ( نفس فيه ) أسرعت لأنقدذه أخرجت السكين من بطنه فانفجر الدم في ملابسي ، في تلك اللحظة مات الرجل وهى ذات اللحظة التي حضر فيها هذين الشرطيين ن ولكن.... "
سأله القاضي
ولكن ماذا ؟
أنت لم تسألني يا مولانا لماذا أحضر لهذه المنطقة من القرية كل ليلة
كنت سوف أسالك لماذا تعودت أن تحضر لهذه المنطقة كل ليلة ؟؟
لأنني قتلت نفساً ( فلان الفلاني ) قبل خمسة وعشرين سنة في هذا المكان ولم تعرف الشرطة وقتها القاتل وقيدت القضية ضد مجهول . ظننت وقتها أنني نجوت بفعلتي فهأنذا أواجه حكم الإعدام وفي يقيني أنه عن تلك الجريمة التي لم تعرفها الشرطة .
____________________
نفس الرواية التي حكاها لي والدي رحمه الله ربما صغتها بلغة أفصح من اللغة الدارجة التي تمت بها الحكاية وكان يحدثني يومها أن أفعالنا التي نود تخبئتها عن الناس سوف تنكشف يوماً مهما طال الزمن ومهما كان حذرنا
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
الاخ عمر تحياتي
قصة جميله تدل علي ان الاعتراف بالذبب فضيله ... وان العفو والسماح من جدك - عليه رحمة الله - كان نبيلا ..وان التصدق بالمال يدل علي الكرم والشهامة.
ولك كل الود
| |
|
|
|
|
|
|
|
|
|
Re: يعترف بجريمته بعد 46 عام (Re: ياسر إدريس حسن)
|
المثل دا ياجنابو زكرتنى قصة جريمة قتل حصلت فى محطة لفة جوبا فى اركويت قبل 5 سنوات تقريباً .. واتكتل فيها ولد شاب من اولاد الفور عندو كان محل شيشة فى المحطة .. والقاتل برضو شاب فى مقتبل العمر والسبب كان تافــه شديد .. المهم القاتل من اولاد القرعان وسائق رقشة اتشاكل مع الود بتاع المحل وطعنو بالسكين فى بطنو وجرى مع واحد صاحبو برضو سواق ركشة
شالو المطعون ودوهو ابراهيم مالك ومات بسبب النزيف الحاد
واتفتح البلاغ فى الشرقى وناس المباحث جرو فى القضية وما لموا فى القرعانى كلو كلو .. !
بعد سنتين من البلاغ جاء واحد خاشى القسم وقال داير يقابل الضابط المناوب وزمان الضابط المناوب كان بيكون مساعد فى الفترة المسائية .. المهم قال حضرة الصول وقال ليهو والله ياجنابو انا لى سنتين مانمت !
وحكى للصول قال ليهو انا قبل سنتين كتلت زول فى لفة جوبا وشردت وانا جيتكم وداير ارتاح من عذاب الضمير وانوم !!
وفعلاً لقوا فى بلاغ مفتوح فى التاريخ القالو ونزلوه وفى القبض !
تصدق لمن سمعت القصة دى مشيت القسم وقابلت الولد جانى عيونى منفخة من كترة النوم وحكى لى انو سافر تشاد بعد الجريمة ومنها مشى نيجيريا وافريقيا الوسطى دا كلو خوف ساكت ، حلف لى قال والله العظيم ما قدر ينوم ساعة فى خلال السنتين ديل من الكوابيس وعذاب الضمير .. وفعلاً الروح مابتروح!!!
...
| |
|
|
|
|
|
|
|
|
|
Re: يعترف بجريمته بعد 46 عام (Re: ismeil abbas)
|
| Quote: [جنابو يا جميل................تسلم....والذمة ألأن ما زى زمان.كل شىء تغير..الناس ألأن تقتل الميت وتمشى فى جنازته.... ... |
اسماعيل يا راقي سلام
الغفلة تنسيهم حساب الآخرة والشطارة في استغفال الناس تجعلهم يظنون انها يمكن ان تنجيهم يوم الحساب
| |
|
|
|
|
|
|
|
|
|
Re: يعترف بجريمته بعد 46 عام (Re: مزمل خيرى)
|
Quote: بعد سنتين من البلاغ جاء واحد خاشى القسم وقال داير يقابل الضابط المناوب وزمان الضابط المناوب كان بيكون مساعد فى الفترة المسائية .. المهم قال حضرة الصول وقال ليهو والله ياجنابو انا لى سنتين مانمت !
وحكى للصول قال ليهو انا قبل سنتين كتلت زول فى لفة جوبا وشردت وانا جيتكم وداير ارتاح من عذاب الضمير وانوم !!
وفعلاً لقوا فى بلاغ مفتوح فى التاريخ القالو ونزلوه وفى القبض !
... |
سلام يامزمل ...
دي كمان اقوي واعظم من الاعتراف بسرقة القروش وهو بالتأكيد يعلم ان ربما حكم بالاعدام في انتظاره
اتمني ان يكون اولياء الدم قد قبلوا الدية او عفو عنه .....
| |
|
|
|
|
|
|
|
|
|
Re: يعترف بجريمته بعد 46 عام (Re: ياسر إدريس حسن)
|
Quote: الاخ عمر تحياتي
قصة جميله تدل علي ان الاعتراف بالذبب فضيله ... وان العفو والسماح من جدك - عليه رحمة الله - كان نبيلا ..وان التصدق بالمال يدل علي الكرم والشهامة.
ولك كل الود
|
مثل هذا الاعتراف يحتاج الى درجة عالية من الايمان ومغالبة النفس ومخافة الله .....
تحياتي يا ياسر وتحياتي للاستاذ الكبير ادريس حسن
| |
|
|
|
|
|
|
|
|
|
Re: يعترف بجريمته بعد 46 عام (Re: omer osman)
|
Quote: وانا والله مسامحك دنيا وآخرة والقروش نمرق
انا وانت نتصدق بيها على زول مسكين |
سلامات يا جنابو عمر ..
فعلا ثلاثه عبر لمن يعتبر ...
وحكايه جدك عظمتها فى ختامها العظيم انشاء الله ...
بس أكيد زدتو قيمتها مراعاتا لفروقات الوقت !
| |
|
|
|
|
|
|
|
|
|
Re: يعترف بجريمته بعد 46 عام (Re: بشير دفع الله)
|
Quote: [سلامات يا جنابو عمر ..
فعلا ثلاثه عبر لمن يعتبر ...
وحكايه جدك عظمتها فى ختامها العظيم انشاء الله ...
بس أكيد زدتو قيمتها مراعاتا لفروقات الوقت !
|
هلا يا بشير ...........
فعلا فيها عبر لمن يعتبر وما اقل الاعتبار في زماننا هذا .......
فروق التوقيت موجودة في ذلك الوقت لكن لم تكون على شاكلة هذه الايام .........
| |
|
|
|
|
|
|
|
|
|
Re: يعترف بجريمته بعد 46 عام (Re: مزمل خيرى)
|
سلام يا جنابو عمر وضيوفه الكرام
وعوداً حميداً يا جنابو عن الحكي فقد إشتقلنا
لحكاويك البوليسية، وشكراً لك على هذه الجريمة
الغريبة وصحوة الضمير، وربنا يرحم جدك ويغفر له
وشكراً للعزيز مزمل خيري عن حكاية القرعاني السلم نفسو
دي حكاية مشابهة، حكاها لي صديق عن والده، فقد كان
والده يعمل قصاص (قصاص درب) ويتعاون مع الشرطة في
إحدى مدن ولاية الجزيرة، المهم أي حرامي عمنا الحاج
دا من دربو بس بيصل لحدي بيت الحرامي، المهم مرة واحدة
تابع أثر حرامي لكن بطريقةٍ ما فقد الأثر، وكل ما حاول
ما لقى طريقة يقص بها أثره، المهم نسى الموضوع، وترك
العمل مع الشرطة، وأيضاً ترك موهبته في قص الدرب
وبعدعشرة سنوات من هذه الحادثة، كان بتفرج في إستاذ المدينة
التى يقيم فيها، المهم، وهو قاعد كدا في المدرج جاء
واحد ماري بي قدامو، طوالي عمنا دا طب قبض في كراعو
هاهاها، وقال ليهو إنت اليوم الفلاني السنة الفلانية
سرقت كذا وكذا إعترف، وطوالي الحرامي إعترف ليهو
تحياتي للجميع
| |
|
|
|
|
|
|
|
|
|
Re: يعترف بجريمته بعد 46 عام (Re: النذير حجازي)
|
Quote: وهو قاعد كدا في المدرج جاء
واحد ماري بي قدامو، طوالي عمنا دا طب قبض في كراعو
هاهاها، وقال ليهو إنت اليوم الفلاني السنة الفلانية
سرقت كذا وكذا إعترف، وطوالي الحرامي إعترف ليهو
|
هاهاهاهاهاهاهاهاهاهاهاهاهاهاهاها
و الله عمك دا عكليته عكلته
سلام يا النذير و جنابو عمر و بقية المتداخلين
| |
|
|
|
|
|
|
| |
omer osman
وليد عبد اللطيف
بدر الدين اسحاق احمد
Hassan Makkawi
عاطف عمر
د.محمد بابكر
ياسر إدريس حسن
ابراهيم بقال سراج
مزمل خيرى
ismeil abbas
بشير دفع الله
محمد يوسف الزين
النذير حجازي
OSMAN SAYED MOHAMED
فيس بوك
تويتر
انستقرام
يوتيوب
بنتيريست