شوف عمايل الريدة فينا عمر عبدالكريم علي في الزياره الأخيره التي قام بيها أوباما لكينيا مر بالسودان برفقة زوجته الجميله والانيقه ميشيل ، وفي شارع الغابه إتقطع سير المكنه بتاع العربيه حقتو ، العبد لله كان ماري بهناك وسايق الكريسيدا حقة الوالد ، بشهامة السودانيين لمن شفت عربية واقفه وقفت وفحصت العربيه وعرفت انها محتاجه سير مكنه ، جري مشيت المنطقه جبت السير وحليت المشكله ، وبعد الإنتهاء من صيانة عربة اوباما شكرني الرجل شكر شديد والحقيقه انا ماكنت منتبه للكلام الكان بقولو لأنو كنت (أختلس) النظرات لميشيل الجميله ولقيت نفسي بدون ماأشعر (بسبل ليها بعيوني) ، وميشيل بدورها فتنت بأناقتي البالغه وعطري الأخاذ المصنع خصيصاً لشخصي الضعيف بواسطة خبير ماهر من عطور البخيت . إحم إحم صدرت هذه النحنحات من أوباما قاطعاً سلك كهرباء الحب الذي كان موصولاً بين قلبينا ، تنحنحت أيضاً بدوري بعد أن أحسست بالحرج وبالخجل فليس من عادتي إطلاقاً النظر لأملاك غيري إلا أن ميشيل كانت فاتنة بحق ذاك اليوم خصوصاً بعد أن تدلت خصلة مبللة بالعرق على جبينها وغطت جزءاً من عينها اليسرى . قبل ذهابهم طلبت من أوباما إنو (يكلم لي ناس اللوتري ويشوف مشكلتهم معاي شنو لأنو من 2003 وانا بقدم ومادايرين يشيلوني) . في سرة قال الرجل (دايرني اجيبك امريكا عشان تقصني في ميشيل يامفتح) ، وأول ماوصل أمريكا كلم ناس الهجره المسؤولين من اللوتري إنو العبد لله يتحظر من أمريكا نهائي . وبهذا قضى الرجل على حلم السفر لأمريكا و أيضاً حرم قلوب قصتهم قصيده . الموضوع ده طبعاً مكتمين عليهو تكتيم شديد وحتى الآن لايعلم أحد سر التكشيره وصرة الوش الذي لاتفارق ميشيل إطلاقاً ، لذا للحقيقه والتاريخ كان لزاماً أن أذكر هذه القصه . on the first page of our story the future seemed so bright دي النغمة بتاعة الموبايل المخصصها لي ميشيل كل يوم تضرب تقوللي : (يا أومر انا دايره أتطلق واجيك في السودان اعرسك واعيش معاك في أمضرمان) ، مافي حاجه مكجنها في المره دي غير إنها بتبشتن اسمي ومابتنطق امدرمان صاح ، في سري قلت (نحنا يحلنا الحله بله) ورديت قلت ليها : ياوليه انا مابعرس الا سودانيه حلّي من سماي ياخي ورسلت ليها في (الواتس اب) غنية وردي بتاعة (بنحب من بلدنا مابره البلد) ، بعد قنعت من خيراً فيني وكجنتني حرشت اوباما علي السودان كلو ومن ديك ماشفنا خير ، شي حظر إقتصادي وشي عقوبات في مجلس الأمن وعييييييييك . اعفو لي ياناس السودان قلبي العنيد سواها فيني وفيكم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر عبد الكريم علي
فيس بوك
تويتر
انستقرام
يوتيوب
بنتيريست