|
|
 ممنوع لذوي القلوب الشكالة
|
دقيت علي بابك سحر
عز الحنين
واجف موزع بين ردود الصد
وبين
قلبا بدق مليان عشم
شايل معاي رهق الرحيل المر
والشوق المدكن بالسنين
مرات احس ريحة الجروف
وكتير اعانيه السقم
لكن وحاتك
لما في عز السهر
لامن اشوف عينيكي
تبسم لي
من بين الدياجر
والظلم
بفرح كتير
وحروفي تتلون هوى
وانساه في حضورك الم
راجيه ردك
وانا في رصيف مالح الغنا
ناغميني
ما تتصنتي
انا صوتي ليك
رسلته في حرفي الموله بيك
من زمن الحروف مخصوبة
بالمعنى الجميل
وظلت تعاني من الوحم
ياجدول الريدة المسرسرب
من فؤادي اليك
في سكة شجن
كانت حكاياتي المجاز
في جوفها احساس الحقيقة الما وهم
يلاكي نقراها المواثيق
في بطون العشق
في كتابات الحيارى
او في نبوؤة ناسكا
خبر المواسم والفصول لمن وجم
نتوسد الرؤيا الحلم
زمن الكتابات المجمرة بالنيازك
والاسافير العدم
مسافة الرؤيا
بين ضلفتين
ضلفة مداخلك والضياء
ضلفة تشوق قلبي ليك
مرات حروف صخابة ريد
مرات يغالبني النضم
شوفيني كيف
شايلك مواويل
والموية تغشى الضفة
تديها النغم
كلماتي ليك
حين المسافة اتمددت
حين الحنين اتشد في جواي وتر
ونزفت ليك نغما
من الصولا الموزعة في عصب احساسي
بيك
من عرقي ليك لمن صدح ما انكتم
كانت مزازيك الهوى
تريانة
بي كل المشاعر
الجاية من جوفا
كابد حسيس الغربة
عاند ما انهزم
لكنه قدام مقلتيك
سلم مفاتيح الدخول
عانق ضياك
اتلفح الزهو الوشاح
واعلن امام نبضاتو
قدم ليك مقاليد الجنون
الا بس
يا زولة اصلا ما انهزم
انت...بلقيس مشاعر زول
تشابه للاميرة
اديني كفيك
نمرق على وش السحر
نفتح الباب الكبير
يدخل علينا هوا البحر
الجاي من نيلنا السمح
يدخل شرايين السماح
يازولة سمحة زي الصباح
زي ملامح البدر لمن شاف عيونك وابتسم
وبس
|
|
 
|
|
|
|
|
|
|
|
Re: ممنوع لذوي القلوب الشكالة (Re: د.محمد حسن)
|
Quote: ياجدول الريدة المسرسرب
من فؤادي اليك
في سكة شجن
كانت حكاياتي المجاز
في جوفها احساس الحقيقة الما وهم
يلاكي نقراها المواثيق
في بطون العشق
في كتابات الحيارى
او في نبوؤة ناسكا
خبر المواسم والفصول لمن وجم
نتوسد الرؤيا الحلم
زمن الكتابات المجمرة بالنيازك
والاسافير العدم |
يا دكترة
دا كلام من جوا شديد ولازم يتغنى,
عشان الحب يعـم ويزيل الوحشـة والقبح المنتشر
تحياتي
أحمد الشايقي
| |
|
|
|
|
|
|
|
|
Re: ممنوع لذوي القلوب الشكالة (Re: Asma.A.Salih)
|
| Quote: غايتو انا جيت احجز مكاني لحد مااجيك بمزاااج عشان الكلام الفوق ده عايز ليهو ( دماغ معدولة ) |
لو ما خايف البوست يتحول لسياسي كان قلت ليك خلي مدير الجمارك يزورك حاوية ممن الاربعة حاويات
مرحب بيك وفي انتظار
| |
|
|
|
|
|
|
|
|
|
Re: ممنوع لذوي القلوب الشكالة (Re: Asma.A.Salih)
|
| Quote: همسة / لعل استرسالي هنا سببه ان كلماتك استوقفتني بصدق |
ولمن تموسق الحوف
للقلوب التي تنز بالجمال والهوى
وما الحب
الا حالة
من التسامي والتماهي والحضور
ياخ حبي على كيفك
وانداحي
واملاي الكون غناء
ومحل الرهيفة تنقد
| |
|
|
|
|
|
|
|
|
|
Re: ممنوع لذوي القلوب الشكالة (Re: د.محمد حسن)
|
Quote: وما الحب
الا حالة
من التسامي والتماهي والحضور |
اللهم زدنا حباً وهياماً وعشقاً
دا ما بوست يترد عليهو ساعة الدوام
بوست عاوز ليهو مزاج خاااص وشحن بطاريات
بجيك صاد يا دكتور ان ربنا ارد
وشكراً ليك على بذل الحب والجمال
| |
|
|
|
|
|
|
|
|
|
Re: ممنوع لذوي القلوب الشكالة (Re: د.محمد حسن)
|
Quote: كدي النحب معاكم شوية ..ههههههههههه
تحياتي حبيبنا د. محمد الحسن ليك ولي كل ضيوفك ذوي القلوب الغير شاكالة .. |
اماتن في ضمتك انت بتحب شوية
كرهتنا المايكات
بقت عليك نكتة المسطول القاااااااااشر وجا الحفلة قامو قالوا ليه قدم الفنان قال ليهم جدا
بس ما يكون ساكن بعيد
حبابك آ الارباب
| |
|
|
|
|
|
|
|
|
|
Re: ممنوع لذوي القلوب الشكالة (Re: د.محمد حسن)
|
بالله عندك درر زى دى ويوم داك مليت الحتة (ووووووووو)خمسين واو الله يسامحك ياخى كلام يجعلك تعود للبنبر لتبشر بالحب ههاهاههاا د كتور تحياتى طيبات
Quote: انا صوتي ليك
رسلته في حرفي الموله بيك
من زمن الحروف مخصوبة
بالمعنى الجميل
وظلت تعاني من الوحم
ياجدول الريدة المسرسرب
من فؤادي اليك
في سكة شجن
كانت حكاياتي المجاز |
شوف ليك طبلة نانو الكلام ده بيتلطش سريع لو ما قفلتو
| |
|
|
|
|
|
|
|
|
|
Re: ممنوع لذوي القلوب الشكالة (Re: د.محمد حسن)
|
وا شريري
وجع الغنا المدفون مجون
في مطامير الفؤاد
مليان هوى
ما ليك براك
كل الحسيس الفي العصب
كان لحظة الفعل الغرام
اتخت بين نبضة قلب مكلوم جوي
وبين شهقة النفس البيمرق
حالي من طاعم لماك
يدخل مفتق جوة في شرياني
في كبدى
في كل الخلايا
الديمة تلهج بي هواك
واشري منك
ومن
زلال ريقك
كما النيل
لحظة الفجرية ياخد من بهاك
انا فيك بريد حالي الغنا
وروعة الليل لما يغمر قلبي
بالحرف السنى
ولما تبرد لي نسيمات السحر
ترشح تبرد جوفي من طول العنا
وانا في رجاك
دايما بدوزن كل مفردات
حالي الكلام
ما اصلو ريدي
كان موسم
بين مسامات الزمان
نجم السعود بطلع
دغش
ويرميني بيك
وانا في بطون احلامي دايما
بلقى اني
بشوف رؤاك
زولة اجمل من قمر
واضوى من نورا جهر
وحاجة تدي الروح سلام
ورغم المسافات السفر
بيناتنا بتمدد عشم
انو الحواجز يوم تزول
اسكر اعب من خمرتك
في يوم لقاك
واشري
من زولا بيشبه
فورة النيل في الدميرة
وروعة التمرات بتلمع في السبيطة
ويا زولة هاك
كلمة بريدك ما رقة من جواي
مشبعة بي حلاك
انا ليك مرقت مع المطر
وقفت فيب اب السحاب
قلت ليه
وحياة بركتك
الجاية من قلب السماك
غسل حزاين الناس
عشان تفرح معاي
وبرقت بروقك كالنيازك،
ضوت مداخل الفرحة
لمن يا جميلة
اتيقنت
اني بي قلبي المعاك
ختيت بياضي على سعودك
والنية كانت بسمتك
حلمت ودعات النجوم بي روعتك
ونذرت كل حروفي النادية
لي باذخ هواك
وبغير عليك
من كل زول
شاف الصباح شايل ملامح
الفرحة
من عاطر نداك
وبغير عليك
من ريدي ليك
من حرفي لمن يرتعش طربا ويجيك
من القصيدة الما بتمرق
دايرة في جواي زمن
من غير فكاك
خلي بالك من عيونك
وروعة النور اللي فيها
وخلي بالك من قليبي
وكيف بيرتاح
بين يديك
واعرفي
اني في ضفة زمن
طول مقابل ضفة
الزول الهناك
وبس
| |
|
|
|
|
|
|
|
|
|
Re: ممنوع لذوي القلوب الشكالة (Re: عادل البراري)
|
اخوي عادل برجع ليك
برمي جعتي دي واجيك
ما بين غيابك ولوعتي
سكنت عصافيري الحروف
جمدت مدارات الحضور
واتجش العشم العناء
وبقى السؤال
هل كان تدلل ؟
ام ظروف ؟
وليك كان
تفرح بدايات المساء
وتلبس
لبوس الوجد ترفل في اختيال
وارجاك موفور الشعور
احساس امان ما فيه خوف
مرات الاقيك صدفة
بين
شهقة نجم عاشق عيونك
في اللحظة دي
برسم الدهشة الجميلة
وتنثني الروعة الظلال
مليانة بي اجمل وصوف
تتذكري
يوم جينا عند النهر في لحظة تماه
شلت السعف
عمدت روحك
والقمر شاهد علينا
انو انت اميرة
لي كل القصيد الجاي من جواي
ليك
وغمام واقف يشوف
مطر الهوى النازل رذاذ
وهمستي لي
سامحني لو الغيرة
اعمت للبصيرة
سامحني لو شفتك بتكتب
ديمه بي جمل حروف
وضحكت يا ست البنات
ما انت مشوار الكلام
الما بقيف
نيلين ونيل
ونخيل مستت انتماء
والطابية مشهد
للتواريخ الحزينة
والنبيلة
والخيانة
والمجون
وبقينا بينات الحروف
من علة
او من فاعل مجرور على
جهل الكلام
وتبقى ليت
وهل
وسوف
ما تقيفي في الشمس الملهلبة
في الهجير
حفيانة من غير النعال
جمدانة من غيرانفعال
خليك قريبة
ليك ضل
من ..
ضلي الوقف
حين الزمن هلكان وقف
ومل من طول الوقوف
يامشرع الكلمة النزيف
ياروعة الريحة الخريف
يا شارع السوق القديم
يا بنية اتشتت على كل الدروب
وكل المطارات الغربية
شوقي الموشح بيك
يمكن يوم
يصادف عابرا
يرفع مقامي وليك يجيبو
بي كل احترم
يديك وليك يقول
( جبناه من زولا عطوف)
ما بين حضورك وبهجتي
طارت عصافيري الحروف
بي روعتك
واتحركت كل المدارات السكون
واتوشح الافق الشفق
عند الصبح
حمرة خجل
حمرة تشوق للصباح
واهديكي يا اجمل صباح
كلام حنين
ومن زول ولوف
وبس
| |
|
|
|
|
|
|
|
|
|
Re: ممنوع لذوي القلوب الشكالة (Re: د.محمد حسن)
|
يابنية
يا بهجة مفاتيح الكلام
اهديك بشارات الدخول
مليون سلام
اصباح صباحك والصباح
صبحين اصابح بيهم اليوم الصباح
واصبح تمام
يابنية منفتق الاقاح
روعة ربيع زاهي وملون بالمشاعر
والازاهير والغمام
لمن اشوفك
وانت بين فجر الزمن ويغشاني
فجرك هالي
يهزم كل انوع الدياجير والظلام
ببقى زي طفل النديهة
الما نجيهة
شايل الافراح وسام
وارسم على ممشى الغنا
عشم الحلم في انو يصبح بيك حقيقة
وابقى غارق في الهيام
شوقي الاكيد
الحرقة والسفر المطول
والمسافة الماشة تتمدد تطول
وانا والسهر صاحين دوام
اديني ايدك يا الحبيبة
اديني احساس الامان
كفيك
من
عينيك
من نظرات مشبعة بالحنان
خليني اظفر
في الزمان بي لحظة من صدق الحنان
شتاني جد هذا الزمان
بي فرقة بي وجعا سهام
يابنية زي نهرين تلاقوا وانجبو النيل السخي
وانا زي ضفافك والرمال
عايشين وئام
بسعد اكيد وانا بكتبك
من نبضي من حالة تلهف
واشتياق
كلمات غنا
انا بس بغنيها
وبذوب فيك مستهام
شان جد بريدك
والريدة بتزيد
وكلما زادت علي انا كم بغير
من الصباح البشتهيك
من الورود الشايلة من لونك مباهج والاريج
من العيون الضاحكه
لمن لي عيونك تاتلق تفرح تضاحك
ونحن في حالة غرام
وانا كم بغير من الحروف الضاجة في زي مهرجان
لما تقالد نور عيونك
وينبعث من بين حروفي اليك كلام
ما قلت ليك ياروعة غناي
انك
بهجة مفاتيح الكلام؟
وبس
| |
|
|
|
|
|
|
| |
د.محمد حسن
أحمد الشايقي
Asma.A.Salih
علي محمد الفكي
Khalid Saeed
عادل البراري
فيس بوك
تويتر
انستقرام
يوتيوب
بنتيريست