شاهد شفش حاجة!

Quote: سلام يا أخ عاطف عمر ح أقول رأيي! بغض النظر عن ردك عليه أو عدمه وأنا زيك عضو قديم! أولاً هو ما اسمه بكري أبو بكر! هو اسمه بكرى ابوبكر والفرق واضح ولقد بعثت اليه يوماً وقلت ليهو ياخي صلّح اسمك دا. فلم يرد عليّ ورفض وبرافو عليهو لأنه عمل اسمه ماركة مميزة وما خصاهو بالكتابة السليمة! نمرة اتنين: حاولت صادقاً تذكر الأسماء المهمة التي غادرت المنبر ففشلت! مَن هم الذين ذهبوا وترى أنت خسارة في ذهابهم؟ نمرة تلاتة: المنبر مشاكله ما ناس يكتبوا فيهو. تراهم كتار رغم انو أغلبهم أشباه أميين. الموقع فيهو غش في اللينكات. يعني تضرب علي اللينكات خارج المنبر فتدوخ. ليس هناك لينك يؤدي مباشرة لما تريده وأيضاً كتبت لبكرا (هكذا ينطق اسمه) وشكيت ليهو انو اللينكات بتدوّخ وممكن الزول يحرد من الحاجة الكايس ليها. لا رد علي ولا صلّح اللينكات! وأمسك البحث: حاول أبحث عن أي موضوع معين أو غير معين. لن تحصل على نتيجة! كل ذلك يدل على أن بكرا ليس فقط غير حريص على العضوية ولكنه ولعدم اعتماده على تشغيل موظفين، نعم موظفين لأن بكرا اليوم تدر له الاعلانات 8 ألف دولار في الشهر وبيستاهلها، موظفين يقومون بضبط القصور الفني وبالتالي خلق مناخ زي الانت بتفتكرو. فكيف تتم عملية الحرمان من الباسورد، أو الطرد ان شئت؟ الذي أراه أنها تتم بشكاوى وقوالات وآراء تحيزية وبدل ذلك كان ينبغي على بكرا أن يستعين بلجنة ولو تعمل بالتبرع لتقييم نشاط العضوية وللتشاور في مسألة حرمان عضو. أنا لا أنكر أهمية المنبر وسعيد والله بنجاح بكري أبوبكر، وهذا هو اسمه الحقيقي وأتمنى له مزيد من النجاح ولكن هيصة منح العضوية ومشاكل الموقع الفنية ومشاكل القوالات والتشفي هي قضايا هامة لاستمرار المنبر. ومن المهم أن أذكر أننا لا نعدم المواقع التي نكتب فيها وأمامك الفيس بوك واتاحته الفرصة لكل من تسول له نفسه الكتابة. ولكننا بنفس القدر وكسودانيين بنحب الحاجة الحبيناها من أول. وعندنا قدرة خرافية للوفاء للمكان الذي يجمعنا وسعداء بتسمية بورداب على وزن رباطاب وهاشماب و و!