يوميات شهيد (الطبعة الثانية)

Quote: (1) سمير: سامعة حبيبتي ؟ ولاء: أيوة حبيبي سامعاك سمير: لا ما أنا ولاء: حبيبي أسمع شنو؟ سمير: سامعة البتكلم في التلفزيون دا؟ ولاء: حبيبي أنا فاتحة إم بي سي والمسلسلة شغالة سمير: إم بي سي شنو أفتحي السودان ولاء: السودان ؟ ترددها كم ؟ في شنو ؟ سمير: الزول دا بقول لينا ما تعرسوا ولاء: يووووه دا كلام شنو حبيبي - أيوة جبت قناة السودان شايفة أونكل عمر بتكلم وبقول تهريب سمير: أيوا عليك نور !!! قال عشان جيرانه عندهم خمسة عربات وعشان عساكره في الحدود باظوا وعشان السلع بتتهرب حيرفع البنزين ويخلينا ما نعرس ولاء: بس هو ما جاب سيرة العرس نهائي ، ولا الكلام دا قالوا قبيل؟ (2) نحن مرقنا مرقنا مرقنا ضد الناس السرقو عرقنا (3) قناة سكاي نيوز تورد صوراً للمظاهرات في السودان (4) في منزل ولاء: البكاء حار - وأخواتها يصبروا فيها - معليش حبيبتي إنا لله وإنا إليه راجعون لا حول ولا قوة إلا بالله ولاء: هي إهي إهي ما ممكن يا سمير ، خليتني لمنو ؟ سمير حبيبي لا (5) والد سمير: الحمد لله ... وتسيل الدموع أنهاراً على خديه أم سمير: - تدخل في حالة غيبوبة ويحملها الكل نحو المستشفى - (6) المستشفى: الطبيب يتحدث في الموبايل وينظر إلى والدة سمير ببلاهة علي: يا دكتور الطبيب: أيوة ... دقائق علي: يصفع الطبيب على وجهه (7) علي والطبيب يدخلان في اشتباك محمود وسميرة وأبو سمير يحملون أم سمير بسرعة بحثاً عن مستشفى آخر. وقبل أن يخرجوا توقفهم طبيبة بنظرة حانية: إن شاء الله خير، دخلوا الحاجة دي العيادة القدامكم دي تبدأ الطبيبة فحص أم سمير وتتصل بأخصائي تطلب منه الحضور فوراً (8) وكالات الأنباء تتبادل صورة سمير مضرجاً في دمائه (9) الهاتف يرن أبو سمير: محمود يا ولدي عملتَ شنو في اجراءات أخوك الله يرحمه ؟ أمك هنا تعبانة وبتهضرب وأنا فايتها بالصبر محمود: رفضوا يدونا الجثمان ، قالوا نجي بكرة أبو سمير: لا حول ولا قوة إلا بالله. ليكم يوم. (10) لجنة أطباء السودان تصدر بياناً يستنكر تعرض طبيب للاعتداء بالضرب في المستشفى أثناء تأدية واجبه المقدّس. (11) الطبيبة الهميمة تواصل عملها في الحوادث ، هاتفها يرن -: يا بتي ما ممكن ثلاثة يوم في المستشفى. -: أمي ما في زميلة تغطي لي وما بقدر أخلي العيانين براهم. -: أيوة أقعدي ضيعي زمنك في الحوادث وزملائك فتحوا عيادات وبنوا بيوت. -: يعني أخلي الناس يموتوا يا أمي؟ -: يتدخل زميلها مقاطعاً لها: ما في زول بموت قبل يومه خلي البتعملي فيه دا وأمشي البيت. (12) محمود: أبوي – شهادة الوفاة مكتوب فيها "موت طبيعي" أبو سمير: يا ولدي استلمه – إكرام الميت دفنه وما حنقدر نعمل حاجة للحكومة (13) أمجد - أكرم - محمد - وفاق - أبكر - شهاب - عبد الله - عبد المنعم - بلة - النقر - أوكاش - كانوا يسيرون على الأرض - يمشون في الأسواق ويأكلون الطعام ويحبون ويأملون هم الآن لدى عزيز مقتدر (14) عبد الله يصفي حساباته في الشركة ويستلم جواز سفره ويستعد للسفر إلى السودان للاستعداد للانضمام إلى أبناء حيّه الذين خرجوا حبّاً للوطن خالد زميله في العمل يعتذر له بأنه لا يستطيع السفر بسبب التزاماته ولكنه يعطيه مبلغ 500 دولار ويقول له: هي مصاريف للوطن. (14) صفحة حزب الأمة على الفيسبوك تنشر صورة للشهيد سمير بالزي الأنصاري وهو يصلي العيد في حوش الخليفة قبل سنتين. (15) صفحة الحزب الاتحادي الديموقراطي تنشر صورة لوالد الشهيد سمير وهو يأكل الفتة في حوليةٍ في بحري قبل تسعة سنوات. (16) فرعية الحزب الشيوعي في أوروبا تنشر تسريبات عن مراسلات بينها وبين الشهيد سمير قبل استشهاده (17) طلاب حزب البعث العربي الاشتراكي يغيرون صور بروفايلاتهم إلى صورة حديثة للشهيد سمير (18) صحيفة بعد بكرة تحوز سبقاً صحفياً وتجري لقاءً مع خطيبة الشهيد سمير (19) سمير في قبره يسأل : يا ربي الوطن حاله كيف؟ يا ربي الشباب حيقدروا يواصلوا البديناه ؟ (20) المؤتمر الوطني يؤكد أن الشهيد سمير من كوادره وأن استشهاده جاء بسبب تربص بعض المندسين الذين استغلوا ظروف الاحتجاجات لتحقيق أجنداتهم الخاصة