|
حقو يا ناس نسوي البشبهنا أكان بننشُد الـنُـبْـل.. بلا تضامُن بلا بطيخ
|
لامِن زميل مِنا هِنا يِقع.. المفروض يكون عنْدنا برنامِج حد أدنى بحكي عن الإهتِمام والوفاء والنُبْل.. ايه بفيد قوله [أتضامن مع الزميل فلان] يِسوي بيها شنو يا بشر.. زولك ده قاعِد في بيت أشباح أو في زنزانة بِدون ما تُتيح ليهو فُرصة يِدافِع بيها عن نفسو قِدام قاضي مدني ومُحامي معاهو.. زولك ده وراهو عِيال.. بيت.. زولك ده لامِن يطلع مِن وهدتو دي حيكون بلا عمل في الأغلب.. ده كلو ظنك تضامنك الإسْفيري الوهم ده، بِفيدو في شنو!
البِفيد:- (1) جمع مال لِتوكيل مُحامي/إعانة أهل بيتو. (2) الواسطة البتدخروها لِليَوم الأسود، حقو تفعِلوها مره مره لِصالِح النُبْل. (3) عرض الحالة بطريقة إحترافِية للأجسام المعنية بِحقوق الإنسان (داخِل السودان وخارجه). (4) تحريك القِطاع المنتمي إلَيه الزول (إتحاد الصحفيين في حالة زُهير عُثمان حمد). (5) تكوين وفد لِزِيارة الأهل (طبعًا أهل المقبوض عليه ياخ!) علشان يحِسو إنو في بشر مع أبنهم. إلخ إلخ إلخ
قال أُندِد قال
والغريبة مِن أوهام الإسْفير، إنو عضوِية المواقِع الإسفيرِية عامةً وسودانيز أونلايِن خاصةً، العضوِية دي بتفتكِر إنو البنْكتِب هِنا بتقري وعندو تأثير بِموجبو ينْفك الأسير ويُنْصف المظلوم!
وبرضو في حالة وفاة زميل مُشارِك ومُتفاعِل، طوالي نجمع قروش- أيوه قروش هو في غيرا بِحِل وبربُط- ونعمِل بإسمو حاجة بتفيدو هو في الأول (سبيل/فصل في مدرسة/ريع لِصالِح المايقوما... إلخ) أو بِفيد البشر.. لأنو " الله يرحمو " دي ما كِفاية في إسْتحقاقات الزمالة والنبل وفي الغالب بتنْكتِب علشان اللوم ما يبقى في الوش
|
|
|
|
|
|
|
|
Re: حقو يا ناس نسوي البشبهنا أكان بننشُد الـنُـبْـل.. بلا تضامُن بلا بطيخ (Re: عزام حسن فرح)
|
كلامك يا عزام في صاح كثير
بس طريقتك الزي طريقتي دي اخير لك تخليها.
التضامن ده انت ما بتعرف قيمته فاحسن ما تنتقده. هذا اولا.
ثانيا:
قريبك النوبي ده (زهير عثمان) ما عصرته عليه كثير في مداخلتك الماضيه ,وباختصار حرام عليك و ظلمته.
زهير صحفي ما سهال كونه بيضحك و يتونس احيانا لا يلقي ما كتبه اساسي بحقه وهو حقيقي انه وقت الجد جادي جدا.
حكاية الكلام البنكتب هنا ليه قيمه فهو فعلا ليه قيمه. فلا تسهتون بذلك.
اهمية الدعم المالي بتفق معاك
وزهير لعلمك حورب في رزقه باكار وهو شبه العام و هو عاطل عن العمل المدفوع الاجر و شغال متطوع فقط.
| |
|
|
|
|
|
|
Re: حقو يا ناس نسوي البشبهنا أكان بننشُد الـنُـبْـل.. بلا تضامُن بلا بطيخ (Re: Tragie Mustafa)
|
Tragie Mustafa
Quote: بس طريقتك الزي طريقتي دي اخير لك تخليها. |
وافق شَنٌ طَبقة ـــــــــــــــــــــــــــــــــــــــــــــ
Quote: التضامن ده انت ما بتعرف قيمته فاحسن ما تنتقده |
أنا ما بقلِل مِن أهمِية "التضامُن" أنا بقلِل مِن قيمتو هِنا ده.. وريني منو الإتضامنتو معاهو، مرق؟! - تضامُن - تنديد - شجب - إدانة
الفوقات دي عضوِية سودانيز أولايِن باقية ليها مراقه.. إتضامن وندِد وأشجُب ودين، وأمرُق لِعمود تاني وهَيِص وقول رأيك في أغنِية الحقيبة المُدَوْزنه.. النوع ده لازِم زول يصحيهو ويِقول ليهو هوي ها ده ما كِفاية لا أبا لك!
| |
|
|
|
|
|
|
Re: حقو يا ناس نسوي البشبهنا أكان بننشُد الـنُـبْـل.. بلا تضامُن بلا بطيخ (Re: عزام حسن فرح)
|
بغض النظر عن طريقتك في عرض الموضوع يا عزام الا انني اتفق معك في ضرورة ان يتحول تضامننا مع أي زميل الي فعل وخصوصاً في الناحية المادية فريال واحد او دولار واحد يمكنه ان يغير الكثير ودي ابسط حقوق الزمالة والخوة
Quote: (1) جمع مال لِتوكيل مُحامي/إعانة أهل بيتو. (2) الواسطة البتدخروها لِليَوم الأسود، حقو تفعِلوها مره مره لِصالِح النُبْل. (3) عرض الحالة بطريقة إحترافِية للأجسام المعنية بِحقوق الإنسان (داخِل السودان وخارجه). (4) تحريك القِطاع المنتمي إلَيه الزول (إتحاد الصحفيين في حالة زُهير عُثمان حمد). (5) تكوين وفد لِزِيارة الأهل (طبعًا أهل المقبوض عليه ياخ!) علشان يحِسو إنو في بشر مع أبنهم. إلخ إلخ إلخ |
| |
|
|
|
|
|
|
|