كتب الكاتب الفاتح جبرا المتوفرة بمعرض الدوحة
|
|
 سيد الكشك القدام باب الكليه
|
يعني مرقنا قرينا عادي زي كل البنات في الحله البكونن محظوظات في انو ولاد اعمامهم م بغطو قداحتن ..لا شنو يعني يغطو القدح زي الاكل يقوم يكفو فيهو غتااية كان صينينه كان غتاية جيركانه والا جردل طحنيه حسب المقاس المهم صدف صدفه م اتعمدت بجيب تقديرات كويسه في مواد وبسقط في مواد هبله كدا او كنت متخيلاها كدا يعني شنو مثلا اخد لي كورس عربي واسلاميه والتالت شنو ماعارفه ...المهم اليوم داك بتذكر الراجل البدرس الاسلاميه جلابيتو قصيره ومابسلم وبدرس رسم وثقافه اسلاميه وفي نفس الوكت يحب البنات زي حبو للمويه يعني كان معروف عنده لستة تسجيل سنويه للبنات البرلومات ولانو ما عندنا حظ من الجمال زي ما بقول فيصل زميلنا والعامل فيها حبيب رباب الاساسا عارفه انو اهلها ما حيوافقو بواحد من بره حوشهم الكبير! اتذكرت الراجل دا قال لي انتي هسي ما بتخجلي ولا عندك شوية خوف من الله الخلقك ! بتصلي والا ما شايله الصلاه ؟ما بتخجلي ابوك واعمامك يسمعو ببتهم بتسقط ثقافه اسلاميه ؟ صحي عقل عصفور الله يعينن علي ما بلاهم !
شنو يعني ما بلاهم؟
وصرخ زي القرصتو نمله في اضانو بررره ...مرت الحياه زي البرق وكان لازم انجح في ملحق الثقافه عشان اتخرج وبس جات سنة التخرج كل واحده تفتش شنو ليها وشنو عليها مواد ...وبكل طاقة وفرح والتقول البنات المحظوظات قال شنو يشتغلن في اخر السنه منو يمهدن للقعاد سنة الربيت ومنهن يطلعن مصاريفن من شغل حلال وطبعا لا عندنا عم رئس مجلس تشريعي ولا خال وزير ماليه ولا عسكري ساي في بوابة من بوابات الحكومه فكرنا في فكره مجنونه ...قدام الكليه في كشك مقفول ليه ما نفتحو ونشغلو عصائر واكل رخيص وبدت رحلة البحث عن صاحب الكشك القدام باب الكليه
|
|
 
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
لا عشان الشكر ما يجيني تقوم البت ابتسام تعبر خشمه وتقول اها ياهو الحال في البلد السجمانه الرمدانه دي الخيل تجقلب والشكر لحماد قااااادر الله .ابتسام ست الفكره قالت سمعت قصة مضحكه وبما انكن زميلات حجرتي مهددات بالربيت يا بالعربي او الاسلاميه ألا في حالات بالغة التعقيد والصعوبه وهي ان يرضا الراجل اب جلابيه قصيره عنكن ودا طبعا امر بغاية الصعوبه في خامسه !لا لا لا
نشوف غيره انتي يا امنه ح تموتي تشهقي بالضحك كدي ما شافتك حبوبتك كان اكلتك النعال
يابت احكي القصه خلي الافتراضات الماعندك علاقه بيها دي
اي اي سمعت انو الراجل سيد الكشك دا بس بجي يوماتي زي اتنين صباحا يفتح الكشك وما بولع انوار عنده فانوس اب شريط يقعد شويه ويقوم يقفل اها كل ما الشرطه تجي تقبضو ما بظهر او الباب بتفتح بس مافي زول بظهر لمن قالو الكشك مسكون وقاعد هنا ليهو قريب عشرين سنه مافي زول فتحو باع فيهو شي
يابنات ها مالكن فاتحات خشومكن دي بسم الله
رباب فورا انسحبت قالت بري كلو الا كلام الجن دا يلحقونا وينجدونا
ابتسام تضحك ياغبيانه ياجاهله دي انتي بتقولي كدا خليتي لحبوبه شنو
النووووم وجب !
الغريب بكل استسلام اتمدينا كل اتنين في سرير بعد شويه لصقنا السراير واخر شي جرينا للمشرفه مرعوبات وما كان في شي بخوف شديد في القصه بس كان الجو اتملا ريحة روح سيد الكشك
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
اساسا ريحة الروح كيف ما بعرف بس ابتسام اقنعتنا انو ريحة روحو حايمه حوالينا وهي حي الله فكره فكرناها يعني لسه ما عملنا دراسة جدوي عشان تقول الراجل خاف علي مالو يتم هدره من بنات خامسه المتوقعات يربتن سنه خامسه بس الثقافه والعربي ....اليوم دا الليل كلو مصنقرين فوق عنقريب المشرفه والمشرفه مطيره عيونه خايفه بس بتصرخ يا بنات امشن غرفتكن خلننا الننوم يا بنات انا شغاله لي سبعه سنه ما سمعت لي صوت بومه خلي شفت نور فانوس
ابتسام هوووووي قلنا ليك في الكشك المقفول جمب الكليه غايتو يا اأ الله وامين مشينا غرفتنا قفلناها وشغلنا القران في الاذاعه واتخمدنا نمنا لمن المحاضرة حقة الراجل الجلابيتو قصيره فاتت نصها ...وسريع سريع درعنا هديماتنا الكلام علي الاتندس الاتحرق
الكلام علي فضيحة الربيت بالثقافه يلا سبحان الله وصلنا والمحاضره خلاص شمسه غابت خبت الباب
جاوب ب ابتسامه كمان
اتفضلن مجموعة الكشك القدام الجامعه
بركاتك يا سيد الكشك !!
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
اول المحاضره م خلصت وبدا ياخد في الاتندس الكان بياخده قبل يبدا قال مجموعة السبعه وسيد الكشك يلحقني في مكتب المسجل
ابتسام فورا قالت ولد دا !
بس ما سمعه كويس او سمعه وعمل رايح قال في زول قال شي ؟
القاعه صمتا صمتا
مرق بجاي وبقينا حديث الساعه واحدين يسمعونا عديل اها عملن شنو مع سيد الكشك !
والبقول تستاهلن عاملات فيها عصابه والحال كلكن مافيكن واحدة تبل الريق ساي من الشنا وكمان الاكلن الفضول سارعوا بالسوال عن الحاصل سيد الكشك منو
عملتو ليهو شنو
واخيرا مشينا كراع ورا وكراع قدام لمكتب المسجل لقينا المكتب مقفول بس مكتب السكرتيره فاتح وقلت نحن ...شالت الكلام من خشمي اي سيد الكشك اقعدو بطلع هسي من الاجتماع وضحكنا ومهابشتنا ديك راحت فرد مره اللهم الا شوية معاينات ..والمتاكدين منو انو نحن ما اتكلمنا مع زول غير المشرفه في قصة خوفنا البليل دي معقول لحقت تكلم الدكتور الاساسا ماعندو بينا ايتها علاقه بس في لحظات الانتظار ديك ايييه
بعد زمن ما متاكده كم مرق يتبختر كعادته رافع صدره ونافش ريشو ومسبسب شعيراتو الصراحه وجيييييه بس لئييييييم والبتقع في ايدو تشبع كلام مر يكفيها واحفاده لكم جيل
اتفضلن اتفضلن ...اول مره ندخل مكتبو وهو في اساسا اول مره دخلنا كانت ونحن في سنه اولي ابتدر حديثه بنهره او انا نطيت بدون سبب
اها شنو قصتكن مع سيد الكشك
امنه :--ومنو انت عشان نحكي ليك يعني الصفه المخلياك اتنازلت واتكلمت مع طالبات شنو ؟
خشمو فاتح ما اظن كان متخيل بت ما تجاوب علي سوال منو بيني وبين نفسي قلت أن شاء الله خشمك الفاتح دا تدخل فيه ضبانه اي نعم المكان نضيف ومافي ضبان حايم بس ما بعيد يصادف الدعوة ملكا
ابتسام واصلت هي قصدها شنو قصدك من قصتنا مع سيد الكشك !
والله ولا بنعرفو ولا حصل شفناه ولا حصل لاقيناه
طيب هاكم اقرو دا
مدينا يدينا مع بعض لقينا ورقه فيها تنازل من سيد الكشك للعمل نهار فقط !!!!!زي اتكبت فينا مويه بااارده دا شنو دا معقول القصه صدفه ؟
رباب قالت انا ابرا واستبرا ما بخت كراعي في كشك جواه روح زول ويمكن ارواح و الثقافه دي يمين بالله اجيب فيها تقدير كمان يابنوت ها مدام سمع نضميكن وانتن في الاوضه المقفوله ورسل لكن عقد الايجار والا التنازل دا يمكن كمان يكون راجل فتان يمش يكلم اهالينا بنحن بنعمل في شنو والا بدل دا كلو انا الجامعه خليته راجعه الليله ما بكره ومنها اعقد علي ود عمي بلا قرايه بلا هم البت بالله خشمه ابا يسكت ابتسام نطت وصررررج كف صاموتي حتي سكتت ..المسجل نهائي ما زاد غير قال بدل اللداحه البديتن بيها الكلام كان تسالن الورق دا جاني كيف بس شيلن ورقتكن دي وامرقن لبره
من سكات شلنا كرعينا يا الله مرقنا والورقه في يد ابتسام !!
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
في شي كدي وصل القلب والراس فحصل زي شلل او وجع قلب ماعارف تقوم والا تنوم والا تحوم والا تسلم بامر الواقع اكون انا حايمه جوه حلم ! بس كمان حلم يستمر ليل ونهار !
مشينا الكافتريا كل زول داير ياكل شي وسيد الكافتريا غيز الطعميه والبطاطس ماعنده ظبطتنا ليك صحن البوش الماخمج وكبينا فيهو رطل شطه ودا كلو من سكات ناكل ودموعنا تجري ومافي واحده حاسه بالشطه حارقاها اخيرا الغمه اتكشفت جا من هناك يتقدل احمد واحد من شلتنا المهدده بالربيت يتضاحك في مناظرنا من اثر الشطه ...يابنات في شنو مالكن ؟
دايرين نفتح الكشك
اي القدام الجامعه ؟
فتحنا عيونا وخشومنا كلنا قال انتو في شي بتدس الزمن دا ؟
بالاساس الكشك مقفول وسيده قالو زمان لقو مكتول مخنوق فيه ولانو مافي زول عارف عنو شي دفنو والكشك لهسي مقفول ومساحته كلها اربعه امتار بس مال مال
مات !!صرخنا كلنا
طيب منو ادانا عقد الايجار دا
المسجل
والراجل اب جلابيه قصيره !!
اسمعن نصيحتي افتحن الكشك وما تسالن يمكن نعمه الله رسله ليكن اها نعمل حملة نضافه وجير ويفط وكدا متين؟
الليله شنو؟
الاتنين خلاص نعمل نفير الاربعا بعد اللاب انا علي الشغل وجمعة الناس
مشينا الداخليه خلاص الخوفه بدت تروح شويه شويه ويحل مكانه الحساب والعدد والفرح ح نشتغل اخييييييرا ونجمع قروش
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
بدينا بحله صغيرونه ياها الهدوها لينا وجازفنا جاي جاي كم صحن شكلهن جميييل والاهم بدينا نربي زبائن رسميييي وسعرنا رخيص وطعمو مختلف عن اي حته لمن بقينا ما قادرين نلحق برانا جبنا بنات يساعدونا والله القروش دي مطر مطر نازله اول يوم النصيحه ما ربحنا شي بس اكلنا لمن شبعنا راسمالنا ما دخل بس يلا نمشي
علي اعتبار نحن طلبه وكدا ما اتخيلنا في شي غير الايجار بس في نص زحمة الفطور ديك يقيف دفار الصحه قال شنو انزار دفع مشينا لقينا ليك الشي قبل نخش المدرسه مطلوب قروش نسدده قدر ما حنسنا واترجينا ووسطنا قالو شنو بس ندفع
الناس ديل متسببين اكيد نمشي نرسل لهم ابتسام يا حلته ياقفلوه وريحونا رجعنا لقصة الربيت بسبب مطلوب جامعه ...
تاني اتظبطنا ظبية نساء اعمال ما سيدات كشك مالاقيات حق ايصال الصحه
ودخلنا المدير المسؤل اول قعد يرفع في حاجب وينزل في التاني وهو بقرا في الجريده تاني عمله تلفون مهم ونحن مشحوطات شحطة عدوك بعد نص ساعه اتكرم من طرف نخرينو زي نحن زباله مفروض تشيله عربية الصحه خير في شنو ؟انزار و..
قبل تتم الكلام قال كوفير والا شاي ؟
ابتسام بغيظ شيشه
شنو ؟
يازول شوف نحن صابرين لينا ساعه لقرفك واستعراض اهميتك بس كترتها بكره يجيك ابوي نشوف بتعمل شنو؟
انتبه وسيادتك منو ابوك
ما مهم بنعرف القدرك واكبر منك وفررر مرقت وانا وراها لمن الراجل رسل عسكري لحقنا نظام تحانبس وكدا ...رجعنا قلنا ليه الكشك دا اساسا نحن فتحناه خدمه ما لاقين من وراه شي يمكن بعد نتعرف بس هسي عدتنا داب بنجمع فيها
عاوزاك شنو
اعفينا من متاخرات الكشك سيده ميت لمن قالت كدا كرووو باب المكتب خبت
الراجل سبحان مغير الاحوال عفا عن جزء وقسط الباقي علي سنه
مرقنا نضحك ما مصدقين بس قلت هسي كان قالك ابوك منو ا
دي ما مشكله نشوف اقرب باب خروج للداخليه وننسي اكل العيش!
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
كنا بنحس بمشي كرعي مرات ومرات كمان لمن يكون في زحمه شديده ونزهج يجي حمام ابيض يرك في كرسي متكول جمب الكشك مكسور اها الحمام دا بقي تميمة حظ وعملنا ورق خاص بينا علامه تجاريه يعني ...كنت متاكده بدل نربت بسبب الثقافه نربت عدم القرايه ...يوم نتونس في امان الله والبنات ديل يتضاحكن في جنس شمشرة الناس ابتسام قالت انتو يابنات في قصه تعال نختها في راسنا دا شنو القصه؟
اي تعال نفتش لسيد الدكان منو اهلو شنو قصتو وليه روحو متعذبه كدي ...اول الورق قعد يتطاير بلا هواء والدنيا عشاء وقمر مافي والكهرباء قطعت بس مع فكرة ابتسام المهببه دي
كنا بدينا نلاحظ الدكتور اب جلابيه قصيره استاذ الثقافه كلامو معانا شويه بقي فيهو حبة لين بس ما عزفنا ليه قلنا يمكن المال المال!
بس لا هو نفسو القادنا لمكتب المسجل القصه فيها كلام كبير
منو سيد الدكان دا
وبس ختيناه في راسنا تاني يوم الصباح جبنا معانا زوله بتعمل شاي وجبنه بدل نشرب في الداخليه نجي نحصل شاي الكشك ،مويتنا كانت طاعمه بس بنخت في حافظة المويه عرق حمريب دي افكاري انا طبعا اها اول ما جيت املا الحافظه لقيت الحمامه البيضاء مافي بس في ريش حايم
اتخلعت وصرخت هوي الحمامه اكلت الكديس !
لا لا الكديس اكل الحمامه ؟ وقبل اسمع رد سمعت فرررر الحمامه جات جريت مسكتها طوالي وقفت في يدي لقيته مضبلنه شويه اتحيرت ماله عيانه ؟كبيت لها موية سكر بس ما شربت يكون ما رضت كلام نفتش اهل سيد الدكان !
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
زي تمينا فتره كويسه وانشهرنا اساسا قبل نخت زيت الطعميه في الطوه ..المهم بدا مؤسم تسجيل البرالمه وانشغلنا جد جد نقوم الدقش قبل الاذان اجباريا طبعا ناخد لنا قريه شويه لمن الصباح يصبح لازم نتخرج اي قررنا نتخرج بدل نفتش لسيد الكشك بس اتقسمنا انا وملاك وامل قلنا اهلنا اهلنا
ابتسام وامونه ورباب الكانت بتخاف من ضلها مع فتيش سيد الكشك المهم كحل وسط قلنا خلاص نقرا ساعتين يوماتي البتنجح تمشي اهله والبتبيت في خامسه تفتش الخبر شنو
بس الحياة ما زي مابنتوقع لها ولا نحلم بيها تجي مرات تفجعنا في حاجات تحيرنا
البت ملاك دي هي ملاك جد جد وجمال رايق كدا ماتعرفو الا تقرب منو وغير كدا شاطره مامهدده بالربيت يوم الاتنين عليها الاشراف علي النضافه كنا بنكنس ونمسح برانا وكل شي طبيعي بس لقت زي جحر في ركن الكشك خافت يكون فيه دوابي كلمت صلاح حبيب رباب يشحد لينا من العمال الشغالين في المبني الجنب الكليه حبة مونة يقفل بها الجحر .....بس سبحان الله قفلت الجحر وهي مارقه اتزحلقت وقعت كسرت يدها اليمين وحلفت انو في زول رماها في الواطه وخلت الكليه وحلفت يمين تاني كان عينوها معيده قبل تخلص السنه ما راجعه ...بعد الحادث بقينا شويه زي نخاف حتي ريحة وحركات الزول المابنشوفو ما كانت بتزعجنا بس في شي
والجحر هاداك فاتح ومره مره تمد عقربه راسه بس ما بنقدر نكتله
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
اي نسيت البت البرلومه رشا بت خرطوميه كدا مابتشبهنا في شقاوتنا يدينه ملس ماشالن مقشاشه قالت تسكن في غرفتنا في سرير ملاك لمن تجي راجعه !وبعد حصل لنا الخلعه هي منو عرفه بغياب ملاك ..طلعت تقرب للدكتور اب جلابيه قصيره معناه الراجل دا وراه قصه يمكن يكون عنده علاقه بسيد الكشك
قمنا حنسنا ابتسام تشوف اتجاه فكرو في خت بت اهلو تحديدا مع شلتنا الاساسا فضل ليها بس فصل دراسي يمكن ..نخلي الكشك كلنا
بس زي دا من وين نجيب ليهو مدخل !
تاني يوم سبحان الله جاء بكرعي شرب شاي وقبل يمشي ابتسام قالت لي
دكتور !
ضحك وقال اصبرن الخبر بجيك قريبات دي وقبل تختن كرعيكن بره باب الجامعه خريجات
متين ؟
الله تعالي اعلم
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
تاني يوم كالعاده صحينا بدري عشان ساعتين القرايه بس اليوم كان معكر مافهمت في غبار والا ضباب والا كتمة المتاكده منو انو في شي قلت للبنات كدا العاينت لي ودنقرت في دفتره والابتسمت لي مجامله والقالت لي حتكون الحساسيه حقتك قايمه ما تمشي الكليه بس عاينت بغيظ كدا وسكت البنات ما اشتغلن بكلامي شديد يلا خير ان شاء الله
لبسنا ومشينا شربنا الشاي في الكشك اتعودنا علي الغرائب الفيهو بس رزق كويس منو استثمار ومنو مساهمة في حل مشكلة تاخير المصاريف كنا بندين بالدفتر والناس البنعرفم كان قطعو قريشات بنمصرفن ..ابتسام مرقت من الربح زي مئة جنيه للطواري اها تشال يوماتي وترجع تاني يوم
المهم وانا بشرب في الشاي قلبي في انقباضتو ديك شفت زي اتنين جو علقو ليهم ورقه في البورد ومشو
لفتوني اول مره اشوفهم بس قلت يمكن مابشترو مننا ...الواطه صبحت سمح ماكنت شغاله وعلي الاشراف علي الفطور واحاسب سيد العيش والزبادي لمن يجو ..انشغلت في قطع سلطه كب ملح ضوق فجاة سمعت صوت صرخه واحده عاينت محلها لقيت ابتسام تكورك كضب لا يستحيل
جريت اشوف في شنو لقيت اغرب كلام ممكن يقولو زول
انه ستتم ازلة كشك سيد الكشك بعد اربعه وعشرين ساعه للممارسة اعمال دجل وشعوذة
قلت ما تكوركي تلمي الناس
شنو دجل وشعوذه ؟
ماعارفه بس نمشي وين !
اي اي الدكتور
اب جلابيه قصيره !
اي اساسا هو الختانه هنا دا يشوف لينا صرفه سقت البت ابتسام ومشيت سلمت عليهو من بعيد لبعيد سالني ابتسام وينه
اتلفت لقيت جمبي الحمامه البضاء اتخرصت ماعرفت اقول شنو بس هو قال لي لقيتو قرار ازاله ؟
اي قريتو؟
لا لا حلمت بس
كيف يعني
كدا !!!من يوم اديتكم الورق بحلم يوماتي بسيد الكشك عيوني ديل كبرن كبرن
الدكتور دا هسي صح بتكلم معاي والا جنيت يارب سجمي جدا
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
يا مها عبدالمنعم سلام يا زولة ..
مالك خليتينا في نص القصة دي وتاني ما طريتي الجية ..
الجماعة ديل كل مرة يتاوقو يقولو يمكن تتمي لينا الحصل شنو مع قرار الازالة للكشك ..
بالله ما تتأخري ..
فووووق ...
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
من دخلنا الكلية دي نهائي السياسة دي ماعندنا ليها اخلاق الا كان نحن في الكافتريا زول شات ليهو ركن بنسمعو لكن قصة ولا والا انضمام ما كان ابدا من اولوياتنا هسي نحن ديل السته مثال اتلمينا من تلاته قري ماعندهن فرد علاقه ببعض تلاته من النيل الابيض واتنين من علي جيهات بنزقه وانا من جاي ...السياسه دي شن نفردها ياهو الفرد مركز صحي بمساعده الطبي من قبل خلقتنا ماشفنا سياسة جابت شيتا نافع غايتو ايام يكون في انتخابات بننبسط بسطا شديد نشيل كرعينا نقوم اهلنا نجي نلقي اتر المعارك باينات في الحيط والكيزان بقولو لن كلمه فيها او نطفيها المهم كضب كضب صح صح تلقاهم شايلين كرعينن خافجين في كل مكان ...وقال شنو يهدو لينا العبايات واللازم منو ..والغريب انو نحن سته ما ختينا اسواط الا يقولو شنو نسبة التصويت في كليتنا ميه في الميه ...البت رشا مابتشبهنا في شي قريبه جلابيتو مقصره وهي متشعبطه مع ناس الجبهة الديمقراطية شعبطة السنين وقال نحن حانين عليها
يابت ها ابعدي من الشر وغني لو سياسة شنو كمان القايمه قاعده هسي كان خلاص عندك طاقه زايده امشي كوسي درب الطوعيات اهي جمعيات منها تكسبي ليك حسنات
بس البت اندرعت فينا وابت تفك انتن سلبيات خمسه سنه غير الكشك دا شنو الايجابي العملتنو
ابتسام قالت لها يابت ها انتي خليك ايجابيه نشوف الاشتراكيه القايمه قاعده فوقه دي شن بتنفعك بعدين ...ونحن تب اختي دربنا غير دايرين ننجح ونمرق ما عندنا شي تاني كمان ما ننسي دايرين نعرف قصة سيد الكشك
اول ماقالت كلمته دي صحن الفول جا طاير من الشباك زي الكشحو زول
بسم الله الرحمن الرحيم
ورباب شغاله يلحقنا وينجدنا
حوالينا وما علينا
| |
|
|
|
|
|
|
|
|
|
Re: سيد الكشك القدام باب الكليه (Re: مها عبدالمنعم)
|
جرينا حفايه انا وابتسام البت الصغيرونه الحليونه بت الخرطوم الما مسكت مقشاشه ولقينا البت دمها زي النافوره مارق من عينه
لالا في الاول شفتو كدا رباب اول ماشافت الدم وقعت غمرانه ابتسام اتماسكت يابت بسم الله مالك
هي تبكي ونحن نبكي زي الخيل لي عينه مرقت لبره لمن وصلنا الحوادث قالو شقت حاجبه غرزتين الحمد لله هينه بعد الدم وقف وعرفنا عينه ما انطفقت شديده جيت قلت للبنات اها صدقتن كلامي يمين بالله حتي انا كمان خليت القرايه ولاحقه ملاك بس شمالا عي عربنا
ابتسام ورباب مصنقعات يبحلقن فيني زي التقول بتكلم زول طويييييل اشان بعاينن لي ورقابن ممدوده لفوق يمكن من الهجمه والا يمكن زي ما انا بشوف مرات ابتسام حمامه والا الحمامه ابتسام بحصل معاي ..بس التمرق البنيه دي نوديها لاهله سكتنا مسااافه فجاة قلت تعرفن
البت رشا دي عرفت الخلاها خبتت اليافطه شنو ؟
اها يالفالحه ياست فكرة الكشك
يا دايره تخلي وتمشي
ياجبااااااااااانه
البنوت متغايظات والا مخلوعات يلا بعدين بروقن واقول الفكره الجات في راسي شنو
رجعنا الداخليه قريبه مابعيده ونحن نضحك علي منظر العين الانطفقت والا اتخيلناها انطفقت...ابتسام قالت لرشا هوي يابت امنتي بقدرة شيخنا سيد الكشك
عاينت لها بنظره ما عندها معني بس دمعاته جرن عارفات اليافطه هي الطارت وخبتتني !!!
ما تستغربن انا عارفه انتن دايرات تطفشني من غرفتكن بس خلاص بكره برحل بشوف لي ناس تانين اقعد معاهن
لالا يابت والله مابتخلي الغرفه عشان كلامنا انتي زي اخواتنا الصغار بس من يوم الليله بعد الفديه الدفعتيها دي انتي تب هيلنا البجري عليك بجري علينا !!
| |
|
|
|
|
|
|
|
|
 Re: سيد الكشك القدام باب الكليه (Re: مها عبدالمنعم)
|
من ضربة رشا بيافطة الداخليه انا قلت بس دا اخر عهد لي بالكشك نقوم نسلم مفاتيحو ويادار مادخلك شر هسي البنيه المسكينه دي شنو ذنبها لمن وشيها الحليو دا يتشخبت بخيط وقلت مابرجع في كلامي كان الكيه دي كلها وقفت علي حيله معارضه راي دا كان اخر لاب في السنه وحننزل اسبوع الريدنق علي قولن مرقت ضربت للبنات ورشا وحبيب رباب ياهن الشركه معاي في قصة الكشك قلت خلاص نرجع المفتاح لسيده يعني معارفين سيده منو بس يلا
نمشي نودي للمسجل استلمو استلمو ما استلمو نحن قررنا
الاجتماع كان رايق البنات اصلا دايرات اليبدا يقول راي دا كنا زي خاتين لينا كرتونة شعيرية نوبو في الكشك ملصقينها وفيها فتحه صغيرونه بنخت فيها الربح خلال الفتره الفاتت دي كلها ماهبشناها جينا فتحنه الكرتونه لقينه القروش كتار يعلم الله ماشويه قلت نقسمن قسة الحلال لينا التسعه كلهم عاينو لي
قلت البت رشا ماشاركتنا في الرعب والاذي تتشارك معانا في الربح ممكن سهمه ينقص بس لازم نعوضه البت الخوفه الدخلته مابتمرق تاني دحين يمكن ننجح مامعروف الظروف شن بتسوي فينا بعد الاجازه
مرق لكل سهم فينا زي الف وتلتمائة وتلاتين ونحن بنقسم الحمامه تدردق في الواطه زي البضبحو فيها شلتها رفعتها قلت له العفو لله والرسول كان روح انس والا جان يعلم الله مادرنا ناذاك بس خفنا والخوف بجيب الغلط في اترو اشان كدي بنخلي الكشك زي ما فتحنته قبال تلاته شهور ان شاء الله كمان يجو ناس ويدورو من اول وجديد
كنا دايرين نعرف سر سيد الكشك الباقي عليهو عشره الا مافي نصيب..
قفلنا الكشك بحاجاتو الفيهو الا انبوبة الغاز شلناها بعناها واتعصرنا في الامتحانات بس مانسينه مره مره لمن تهب في الغرفة ريحة سيد الكشك نتعاين ونبتسم
سبحان الله مرقنا كلنا الا ملاك الابت تجي تمتحن وفرتكتنا السنين انا عن زات نفسي اخر جيه لي شفت الكشك محلو قاعد كيبل شركة اتصالات
| |
|
|
|
|
|
|
|
|
|
Re: سيد الكشك القدام باب الكليه (Re: محمد نور عودو)
|
الاخت مها تحياتي
عجبني عنوان البوست وفتحته . حكى بسيط وانيق وجميل واصلت بنفس واحد .. لكن فجأة تقولي لينا اتفرتقتوا وخلاص !!! ليه كده ؟؟؟ ونحن منتظرين نعرف سيد الكشك منو وكمية من الاسئلة المتزاحمة ... بس الصراحة ده حكي ممتع ممتع وشيق للغاية ز
تسلمي
| |
|
|
|
|
|
| |
مها عبدالمنعم
عبدالحفيظ ابوسن
الفاتح شلبي
هشام كمال عبادي
مني عمسيب
ABUHUSSEIN
محمد نور عودو
إسماعيل حسن
فيس بوك
تويتر
انستقرام
يوتيوب
بنتيريست