|
|
 غدا الاثنين تأبين محمد سلمان بنادي البركل بالخرطوم
|
تقييم مجموعة من اصدقاء ومعارف المرحوم محمد سلمان بالتضامن مع جمعية نوري وبورداب موقع البركل بالخرطوم يوم لتأبين الراحل المقيم محمد سلمان محمد الخير العوض وذلك بنادي البركل بالخرطوم مساء غد الاثنين الموافق17/2/2014 نسأل الله له المغفرة والرحمة بقدر ما اجزل واعطى.
|
|
 
|
|
|
|
|
|
|
|
Re: غدا الاثنين تأبين محمد سلمان بنادي البركل بالخرطوم (Re: عبدالمنعم العوض)
|
من كتابات محمد سلمان الاحساس الصادق
سلام محرجل..
سلام مستقيم
مائه وثمانون درجة لاغير رغم التعرجات..
اشتاق اليكم.. واحتاجكم اليوم أكثر..
خبروني عنكم.. كيف شوقكم وأشواقكم في تلك المدة الحزينه ..
رغم حضوركم والغياب..
اما بعد،،،،
إذا دار محور سؤالكم عنا
فنحن نعاني مايفوق هذا العدد القياسي 24 قيراط من الحزن
ببضعة ارادب وكيلات يصعب حصرها الان..
علماً انا بفرحكم نفرح...
افتقدتكم دوماً لان كل لقاء يتم له منكم ومنا ذكري..
في زمن زمن ليته يعود..
بحثت عنه في منعطفات الروح كي احظي بلمحة فرح..
في فيضانات الاحزان المتدفق..
وأنا ادق الدفوف الي كل لحظات الفرح التي يحملها الامل..
او حتي التوقع..
علي حافة ضفاف الشوق...
منابعه.. خواتيمه...
البلد.. البلد
نحن علي دروب التواصل...
اخترنا المسير..
غداً تشرق الشمس
عوارض الطريق..
دابي الليل..
الدعت..
الحفر..
ابو دفان..
والرفاق..
انا احب الطريق...
لماذا لايبادلني الحب.. وينبهني!!
حقاً الرفيق قبل الطريق..
اذاً الشوق وعليكم الشوق..
كل المساحات الحزينه...
والمساءات المبللة بماء الملح..
مشاهد الحزانه..
وهم يجعلون من هروب الشمس لحظة هروب اخر..
ويفتحون ابواب الليل ليدخلون في خلوة خاصه...
صالحة للبكاء..
بكل تفاصيله..
حينها ازحت سدود تماسكي..
تدفها موجة حنين..
الي عوالمك..
وعلي حافة ضفاف الشوق ابحر..
متبرج.. يسترني العهد..
يتدفق ماء الملح الي وجه السماء صاعداً..
لنمنح الغيم الهطول..
أنا والرفاق ...
وأنت تبلل جفاف احاسيسي وتوشحني بالرضاء..
حقاً..
بلد صالح يحمد الله علي جوعه والجراحات
اليوم يفوح عطرالذي بيننا..
النصر لي والشوق وبلد..
هكذا كان يكتب الوريف كما كان يحلو لاصحابه مناداته فهل يا ترى كانت هذه اشارة ام نبوءة باحساس المودع وهو يلقي السلام.
اللهم اجعله في مقعد صدق عندك يا كريم فقد كان صادقا مع نفسه ومع الناس ونشهد له بذلك.
| |
|
|
|
|
|
|
|
|
|
Re: غدا الاثنين تأبين محمد سلمان بنادي البركل بالخرطوم (Re: عبدالمنعم العوض)
|
يا سرمدي(مرثية محمد سلمان) عبدالمنعم محمدأحمد العوض
رشيت مسكك فوق تراب وادي النعام
في اللفة يا المبروك رجع
في الساعة ديك
غابت شمس يوم الليالي البيض
غاب برضو القمر.. عمَ الظلام
وخليتني للأسى والوجع
إتبكمت لغة الكلام
تاهت مع الفرح النجع
شريان قلبنا الإنقطع
كيفن ربطنا عليهو بي حبل الصبر
فوَح عليكـ مسك الختام
في اللفة يا المبروك رجع
يا من مشيت على درب شوك الحياة
المعووج عديل
في يومو داك قنتت قنتي
بي صراخ صم الحجارة مع العويل
وإتوشحت نوري السواد
لبست دروع الحزن قالدت النخيل
مرقت تعزي في أطول تمرة وقعت
وإنحسر بالحسرة نيل
بكت أركويت الشرقي
يا حزن الجريف
ينزف نزيف
كدر صباح أفراحو ليل
رجفت منافي الغربة من هول المصاب
خرت عليك مغشية يا عالي الجناب
وكل البلاد مذهولة بي خبر الرحيل
يا غنوة جفت في حلق قمرية
جفت فوق فروع المنقة في قلب النخيل
رشيت مسكك فوق تراب وادي النعام
في اللفة يا المبروك رجع
عزًت عليك أشواقنا في عز الضُهر
شرَينا باقي الشوق صبر
لملمنا أطراف روحنا
دي المرقت وراك
عجلاني تنتاوق خطاك
السابقت معراج سماك
وفوضنا لله الأمر
موتك عظة
كفانا كمين موعظة
فلفل كتابنا سطُر سطُر
في اللَفة يا المبروك رجع
حررت نفسك من قيود الخوف
ومن سجن الجسد
يا دوب بعد موتك عرفت إنك وتَد
مغروس سند
ظهرت علامات السعادة الكاملة
عند ود اللحد
لاحت فيوض الرحمة والرهبة
التوسل والمدد
احسب أظنك ... إنك كأنك
في زمرة إبن معاذ سعد
وريني كيف بالله جد
حررت روحك من قيود الخوف
ومن سجن الجسد وفي أمان رقد
بعدك بعِد أيامي عد
قرًبت ألحق بي مَشاهدك يا ولد
رشيت مسكك فوق تراب وادي النعام
في اللفة يا المبروك رجع
أحسب أظنك
إنك .. كأنك
بديت حياتك من جديد
في برزخ الهنا يا سعيد
حي يا شهيد
حي في قلوب الناس
في (ظل الأمل) عمرك مديد
يا إنت يا ود عاشة ود سلمان
ياالإسمك محمد
يا معمد...من عديد ازمان
يا باقي المروة الفضلت في الدنيا
يا إنسان
شايل هموم الناس
وهمك في قلب مليان
ما بعت وطنك للطغاة
ما خفت ما إتبروقت
ما إتهز فيك جنان
ثابت على هادي الأرض
يا زول ... عرض
عزيت للأوطان
كفيت ما خليت فرض
أجرك على الرحمن
خصاك بي خدمة عيال الله
يا زين يا رقيق
دخلت في كل القلوب بلا إذن
وسَعت ضيق
أدخلت فيها من السرور
ما لا تطيق
هجيت من دار الغرور
إلى رفيق
جاتك إشارات المرور
صليت صلاة الآخرة في نص الطريق
ونفسك وقف
أهديتو زي نفحة حياة تنجد غريق
ما ياها عادتك
تمحي للناس الشرور
خيرك ترشو
يطفي شبات الحريق
في اللفة يا المبروك رجع
يا حر محمد يا شروق
انا كنت قايلك زيي زول دنيا ومتاع
دايما أجرك لي حطام الفانية
تتفلفص تذوغ
وتفرد شراع
تبحر على كيفك
وبي كيفك
إلى حضن الوساع
تشهد خيوط الشمس
من أول بذوغ
مرقت صافي بلا نزاع
يا خير من عرف المروق
بختك محمد يا شروق
صليت صلاة الآخرة في نص الطريق
في اللفة يا المبروك رجع
قبل السحر بعد الهجيع
يممت آفاق الهزيع
في صحوة كت دايرك تقيف
تزورني طيف
يا قائما بالله يا ظل الغيوب
تتجلى بي إسمو اللطيف
علمني كيف؟ أمرق نضيف
طمِني كيفن بي هناك
الحالة كيف؟
سدرك وطلحك
ماءك المسكوب والظل الوريف
الحالة كيف؟
أنشلني من وهدة مصير
أقراني بي حرفك
على عرش الخبير
وحدني بي إسمك
مع نبي الزمان
لأكون بصير
أفنيني في ذات المكان
أمشي وأجيك على سرر
مرفوعة بالحور الحسان
خلدني في أبد الخلود
وبعد الأبد واصلت سير
ختيت خطاك الواثقة
فوق درب النذير
يا سرمدي... يا سرمدي
زجوك في لجج الجمال
مغموس في أنوار الكمال
تشهد شهود الإنتساخ
قلبك بصير
يلا إنطلق لي مطلق الآمال
وهيهات أن تصل!!
تتجلى بي إسمو الكبير
يا سرمدي ...يا سرمدي
وريني كيف؟
كان منتهاك إلى قدير
أحسب أظنك....إنك كأنك
نوفمبر 2013م
| |
|
|
|
|
|
|
|
|
|
Re: غدا الاثنين تأبين محمد سلمان بنادي البركل بالخرطوم (Re: عبدالمنعم العوض)
|
رحم الله محمد ياباشمهندس
واسكنه فسيح جناته
فلا زال جرحه لم يندمل عند كل من عرفه وعاشره
محمد أخو الأخوان شيال التقيلة
محمد فارس القبيلة
لازلنا بين مصدق ومكذب لرحيله المفاجي
نسأل الله له الرحمة والمغفرة وان بجعل الجنة مثواه
وان يصبركم ويصبر والديه وشقيقاته ويصبرنا جميعاعلى رحيله
وانا لله وانا اليه راجعون
| |
|
|
|
|
|
|
|
|
|
Re: غدا الاثنين تأبين محمد سلمان بنادي البركل بالخرطوم (Re: saidahmed shami)
|
كلمات د عبد العظيم محمد احمد العوض
بسم الله الرحمن الرحيم
ان المدخل لمرثيتى لإبنى الفقيد الراحل المقيم محمد سلمان هوعلاقته الخاصه مع فقيد الأمه الراحل المقيم الشهيد حميد حسن سالم( لهما الرحمه والمغفره) فكأنى أراهما يسيران على نفس الطريق ،فكل منهما وهب حياته ونفسه لإسعاد الآخرين وكأن موعداً قد ضرباه الإثنين معاً ليلتقيا فى مكان ما فأ اسال الله واسألوه انتم معى أن يكون ذلك المكان هوالجنه مع خاتم الأنبياء والمرسلين وأصحابه الميامين والشهداء والصدييقين (آمين) ولاعجب فقد اوقف الفقيد زملاءه بالسياره عند موقع حادثة الشهيد حميد وطلب منهم ان يترحموا عليه ويدعوا له وذلك قبل الحادث المفجع الاليم بزمن وجيز وقد كان يسبح بمسبحته حتى اخر لحظه من حياته كما روى ذلك مرافقوه بالسياره ،فهذا قضاء الله وقدره فلا حول ولا قوة الا بالله العلى العظيم وانا لله وانا اليه راجعون فهذه مرثيتى فى ابنى الحبيب محمد ود سلمان ،محمد ود عاشه محمد الوريف محمد الزاكر الزاهد له الرحمه والمغفره
حميد محمد جاك شهيد سرقو الزمن
لافينو بتوب العفاف ..حب الوطن
فارساً جسور لا عمره كل و لا وهن
صابر صبور تلقاهو في كل المحن
حلال مشاكل يطفي لي نار الفتن
مارق على صلة الرحم والرب أذن
وبكت اركويت نوري و جريف إتحزمن و إتلزمن
سافر قلب قلبي البريدو يا الله اه أنا إتمكن
خليتنا يا سمح الخصال صاحب الجميع طاهر البدن !
...................
قدراً عجيب صورة شهيد ينعى الشهيد
يبراهو بي نفس الخطا و نفس الطريق
و يتكرر اليوم الرهيب و المشهد الباكي الحزين
أنهر دموع و صرخات ألم و حزناً دفين
روحين علن فوق السحاب إتسالمن و إتعانقن
روحين على عالي الجنان إتواعدن و إتقابلن
و الحور هناك حوراً حسان يتسابقن .. يتهافتن
و ليهم يقابلن بابتسام مستبشرات و يرحبن
---------
يتمت خالك يا محمد و رحلت يا ابو خلقا جميل
يتمت خالك يا محمد و روحت يا ضل المقيل
و خليتنا في ليلاً بهيم غرقان حزن ليلاً طويل
أصلك اصيل ود الكرم ما كت بخيل
واصل الرحم راجح العقل نعم الدليل
و حسن الختام وجهك صلاح برقاً يشيل
و في الجنة بالزين و العديل تشرب هناك من سلسبيل
---------
ما أنت زي بحر التساب ما ليهو قيف
زين الشباب يا ركزة المسكين ضعيف
يا الدوحة يا الظل الوريف
يا النسمة يا مطر الخريف
و خضرة جرف زارعنو صيف
و شجرة حنان مغروسة في قلب الجريف
مغروسه فى كبد الجريف
مغروسه فى جرف الجريف
ورويانه بى حب الجميع ونوري وجريف
---------
انا وين اقبل يا محمد انا لسه منتظر الكتير
راجيك يا ولدي الكبير قايد النفير
و رحلت يا ولدي البخيت من غير نذير
دمعتنا نار و النار تقيد في الجوف سعير
يا صاحب الجود والكرم أرضيهو بالكيل الوفير
طيب ثراه أكرم لقاه و هنيهو بي خيراً كتير
و أجب دعاي و أهلي المعاي مولاي يا حي يا قدير
يا ربي تلزمنا الصبر و يجمعنا بيك في زفة الهادي البشير
| |
|
|
|
|
|
|
|
|
|
Re: غدا الاثنين تأبين محمد سلمان بنادي البركل بالخرطوم (Re: جمال خضر)
|
رحل محمد كاخر الاطياف فى الفجر توارى
رحم الله محمد فقد كان واسطة عقد الدبوكة واجمل سوميتاتها..
محمد الهميم وقاف فوق راس الضيوف وبفرحة تكاد تظاهر..
ما لقيته الا باسماً هاشاً باشاً رغم ظروف هنا وعبوس حظوظ
ظروف الغربه فى وجهه مرات كثيرة ..
كريم اروش مجواد متلاف خدوم وفوق ذلك مثقف يحتفى
ويحتفل بالثقافه واهلها، يحفظ كثير من الشعر وكان الوطن
اكبر همومه ورأيه قاطع فى غير ما تشنج..
احى اللجنة واصدقاؤه الذين يقيمون هذه التظاهرة فمحمد حقيق
بكل تكريم يقام من اجله واهل لكل مكرمة وان اردناه فى حياته
فكان محمد نقولها مؤمنين بقضاء الله ناكرين غير منكرين..
رحم الله محمد الانسان الخلوق وعوضه شبابه جنة عرضها
السموات والارض وجملكم والاسرة الكريمة بالصبر يا عبد المنعم
وكل اهل نورى الكرام، واخر دعوانا ان الحمد لله رب العالمين،،،
| |
|
|
|
|
|
|
|
|
Re: غدا الاثنين تأبين محمد سلمان بنادي البركل بالخرطوم (Re: عبدالمنعم العوض)
|
رحم الله إبن عمتي وإبن خالي محمد سلمان.
يا الله يا رحمان يا رحيم نسألك اللهم بكل إسم هو لك أسميت به نفسك أو علمته أحدآ من خلقك أو إستأثرت به في علم الغيب عندك ...أن ترحم محمد سلمان وأن تسكنه مسكن الصديقين والشهداء وان تبدله اللهم دارآ خيرآ من داره وأهلآ خيرآ من أهله.
اللهم إجعل قبره روضه من رياض الجنه وأغسله اللهم بالثلج والماء والبرد.
اللهم إننا لفراقه محزونون فألبسنا اللهم وألبس الوالد عاشه بت محمد أحمد والوالد سلمان والوالد نوره بت سالم وعبدالمنعم وعبدالعظيم وأخواته ثوب الصبر والسلوان.
اللهم أرحم الوالد وأرحم اللهم كل أموات المسلمين.
"إنا لله وإنا إليه راجعون"
| |
|
|
|
|
|
|
|
|
|
Re: غدا الاثنين تأبين محمد سلمان بنادي البركل بالخرطوم (Re: الشيخ سيد أحمد)
|
الله يرحم محمد سلمان
ليتني لو كنت معكم بنادي البركل بالخرطوم .. مع أبناء نوري
وأصدقاء الفقيد العزيز في ذكرى الوفاء لمحمد سلمان فمنذ
رحيله الفاجع وروحه النبيلة لا تبارح فضاءات الأمكنة التي
أحبها وأحبته .. رحم الله محمد سلمان فقد كان أحد الذين
يبعثون الطمأنينة بأن كل شيء سيكون على ما يرام.
| |
|
|
|
|
|
|
| |
معاوية محمد الحسن
saidahmed shami
جمال خضر
صديق الموج
الشيخ سيد أحمد
Mohamed Abdelgaleel
فيس بوك
تويتر
انستقرام
يوتيوب
بنتيريست